MURU OFUNJEDHA 24
NYUMBO 24 Bwerani Kuphiri la Yehova
Mudhowenave kala alendo a Yohova modhowa nodhowa!
“Nyo Yohova, n’nga mbaani unakale lendo tendani mwinyu?”—SAL. 15:1.
VINOFUNA I-YO FUNJEDHA
Ninoonani vyongo vinaire i-yo ira nidhowenave kala afwee a Yohova na vyongo vinodedi-edhela Yohova ira niirelenga afwee.
1. N’nga lemba la Salimo 15:1-5 linanikami-e a-vi?
MUYOFUNJEDHA ivirile, natoofunjedha ira atu anodhivelela wa Yohova anooda kala alendo mutendalee lopipirisa, akala anovilimbi-edha kala vauxamwali wapama na liye. N’nga ninaire a-vi ira nikale vauxamwali na Yohova? Salimo 15 linoonga vyongo vinjinji vamwasula. (Muleri Salimo 15:1-5.) Salimoli linoonga makundo ananikami-e ira nikale vauxamwali wapama na Nlungu.
2. N’nga chini yam’mwiri-idhe Davide onga vya tenda la Yohova?
2 Salimo 15 linoromana madhu oi: “Nyo Yohova, n’nga mbaani unakale lendo tendani mwinyu? N’nga mbaani unakale mwangoni mwinyu opambuleya?” (Sal. 15:1) Voonga vya “tenda” la Yohova, vinooneya ira Davide athuulela vya sasa wenuo wali wu Gibioni. Liye atoonga thitho vya ‘mwango opambuleya’ wa Nlungu venango vothuulela vya mwango wa Ziyoni wu Yerusalemu. Mwangula uli va makilometru mangasi makumelo a dhuwa wu Gibioni, weo Davide wa-enle liye tenda mwemo mwali likasa fiyedha vahora yamangiwile kachisi.—2 Sa. 6:17.
3. Mwasiwa ngwan’ni ninofwanela kaana ifunelo na vili va lemba la Salimo 15? (Muone thitho iruthiruthi.)
3 Pyaimbarimbari ira Aisraeli katarumeli-iwa laba vasasani masiki volowa mwari mwali likasa. Mbwenye arumiwi othene ororomeleya a Yohova tanooda kala alendo mutendalee lopipirisa vodhilimbi-edha ira takale afwee. Thitho vyevi ndi vimbo-ive na vinofuna i-yo othene. Va Salimo 15 vanoonga makalelo anofwanela i-yo akhaana ira nikale afwee a Yohova.
Aisraeli muhora ya Davide, tanooda ona mathuulelonimwiwa vya thapulela kala alendo tendani mwa Yohova (Muone ndima 3)
MUWENDENGA MO-ODAWI-A VYONGO THITHO MWIIRENGA VYONGO VYAPAMA
4. N’nga ninoidhiwa a-vi ira badiziwa baa-i kai okwakwanela ira Yohova asangalalenga na i-yo? (Esaya 48:1)
4 Lemba la Salimo 15:2, linoonga ira fwee wa Nlungu unofwanela “wenda mo-odawi-a vyongo, thitho airenga vyongo vyapama.” Madhu oi “wenda” thitho “irana” anothapulela irana vyongo vinangovyee mo-o-iyedhela. N’nga pyoodeya ‘wenda mo-odawi-a vyongo’? Ee. Imbarimbari choi, kavali mutu olongomana, mbwenye Yohova unoniona ira nili atu “o-odawi-a vyongo” akala ninovilimbi-edha m’vwela. Nadhivelela nobadiziwa, ninokala ira nitoroma wenda na Nlungu. Kathuulelani ira walelene, kala Muisraeli kwaairi-a ira mutu akale lendo wa Yohova. Vatookala atu enango enao ta-aira vyongo “kumela vathi varima thitho kataira vyongo vyofwanelela.” (Muleri Esaya 48:1.) Muisraeli ororomeleya anoofuneela funjedha malamulo a Yohova nowa-arelanga. Malamboano thitho ira Nlungu asangalalenga na i-yo, vanofuneela vyongo vinjinji kwaranya badiziwa nogumanyeyanga na pingo. Ninofuneela dhowanave “irana vyongo vyapama.” N’nga ninaire a-vi vyongo vyevi?
5. N’nga m’vwela Yohova va vyongo vyothene unothangani-avon’ni?
5 Wa Yohova “wenda mo-odawi-a vyongo” thitho “irana vyongo vyapama,” unothapulela irana vyongo vinjinji a-kala gumanyeya venango irana vyongo vinjinji vamigumanoni baa-i. (1 Sa. 15:22) Ninofwanela dhilimbi-edhanga ira nivwelenga Nlungu vavyongo vyothene masiki nakala okene. (San. 3:6; Nam. 12:13, 14) Ndipama dhilimbi-edhanga m’vwela Yohova masiki va vyongo vinooneya ninga ndi ving’ono. Irana vyongo vyevi unothonyi-edha ira ninom’dhiveliwana thitho unosangalala na i-yo.—Ju. 14:23; 1 Ju. 5:3.
6. Movwelana na lemba la Aebere 6:10-12, n’nga yofuneya maningi chini kwaranya vyongo vikadhi i-yo niiranga ndulimu?
6 Yohova unosimba maningi vyongo vyapama vyam’mwirenle i-yo ndulimu. Mbwenye vyevyo vaokene kai vyokwakwanela ira nidhowenave kala tendani mwa Yohova. Likundo leli linoongiwa movweya pama va Aebere. 6:10-12. (Muleri.) Yohova kanodiwala vyongo viirile i-yo ndulimu thitho unofuna ira nim’labelenga na rimi-u othene fiyedha komoni. Yohova unodha kala fwi-u modhowa nodhowa “na-achenyele.”—Agl. 6:9.
MUONGENGA VYONGO VYAIMBARIMBARI KUMELA RIMANI MWINYU
7. N’nga onga imbarimbari kumela rimani mwi-u unothangani-avon’ni?
7 Ira mutu arumeli-iwe kala lendo tendani mwa Yohova, unofwanela “onganga vyongo vyaimbarimbari kumela rimani.” (Sal. 15:2) Veva kaiira anothapulela rambela nama baa-i. Yohova unofuna ira hora dhothene nikalenga oona rima. (Aeb. 13:18) Vyevi ndi vyofuneya maningi, “namwasa oi Yohova unothakaleliwa na mutu wainyengo mbwenye atu amirima yapama, anokala vauxamwali olimba na Yohova.”—San. 3:32.
8. N’nga ndi kalelo livi linofwanela i-yo lirambela?
8 Atu anoonga ‘vyongo vyaimbarimbari kumela rimanimwiwa,’ katinodedi-edhela kala ovwela takala vamwinjini baa-i, mbwenye takala vaokene aliwa a-arelanga malamulo a Nlungu. (Esa. 29:13) Anorambela vyongo vyainyengo. Mutu wainyengo unoroma kaikela akala malamulo a Yohova mbazelu. (Yak. 1:5-8) Mutu oi ee-no kanom’vwela Yohova va vyongo vinoona liye ira ndi ving’ono. Aona ira kanagumanenavo nyarwa namwasa o-ovwelao, unokalave olimba rima nodhowanganave a-arela malamulo a Nlungu thitho lambelawee unokala wainyengo. (Nam. 8:11) Mbwenye i-yo ninofuna kala oona rima vavyongo vyothene.
9. N’nga ninofunjedhavon’ni va vyongo vyaireile Yesu angagumanena Nataniyeli? (Muone thitho iruthiruthi.)
9 Ninooda ona upama okala oona rima, nathuulela vyongo vyaireile Yesu angagumanena Natanieli fendo yoroma. Filipi angam’dhidhena Natanieli wa Yesu, vatooireya yongo inango yodabwi-a. Angalive ira Yesu ali a-anagumanevo na Natanieli, liye atoonga ira: “Kaing’anani mwiisraeli waimbarimbari, oi mwa liye kamuli inyengo.” (Ju. 1:47) Vinooneya ira Yesu aona ira enango mwa anamafunjedhee tali oona rima, mbwenye atoona ira Natanieli ali oona rima maningi. Moladana na i-yo othene, Natanieli kaali olongomana mbwenye anoovilimbi-edha rambela inyengo. Yesu atoodabwa na vyevi thitho atoom’simba Natanieli. Vinooda kala vyosangalali-a maningi akala Yesu unoniona e-no.
Filipi atoodhowa wa Yesu na Natanieli, oi mwaliye kamwali inyengo. N’nga ndi mwemo thitho mukalele aliwa na i-yo? (Muone ndima 9)
10. Mwasiwa ngwan’ni ninofwanela rambela i-ndi-edha basa modaweya yotuva yoonga? (Yakobo 1:26)
10 Makundo manjinji a Salimo 15, anokuza vyongo vinoira i-yo naafwi-u. Salimo 15:3 linoonga ira lendo wa tendani mwa Yohova, “kanoirela afwee vyongo vyothakala, thitho kanonyoza afwee.” I-ndi-edha basa madhwi-u modaweya, unooda niimwanani-a kala alendo tendani mwa Yohova.—Muleri Yakobo 1:26.
11. N’nga mafyeda chini, n’nga chini inom’mwireela mutu wamafyeda a-achinyuwe?
11 Olemba masalimo atoonga thitho vyokuza mafyeda. N’nga fyeda chini? Mogwandela ndi onga vyongo vyonama thitho vyothakala vinanonge limbili la mutu mwinango. Mutu wamafyeda a-achinyuwe, unooda kumi-iwa pingoni.—Jer. 17:10.
12-13. N’nga ndi vyongo vivi vinaniiri-e kaana landu mo-odhiwa namwasa othakali-a limbili laafwi-u? (Muone thitho iruthiruthi.)
12 Salimo 15:3 linonithuucha thitho ira lendo wa tendani mwa Yohova, kanoirela afwee vyongo vyothakala thitho kanonyoza atu enango. N’nga mutu unairele a-vi atu enango vyongo vyothakala?
13 Ninooda irela atu enango vyongo vyothakala vomwadha vyongo vyonama vyokuza aliwa. Mwaifwanafwani-o: (1) rongola uto-iya urumiwi wahora dhothene, (2) banja n’nango kalinolabave va Beteli venango (3) bali uto-ii-iwa laba ninga ndimuwa wavapingoni venango rumiwi okami-a. N’nga ndi pama thuulelanga viiri-idhe chinjao, nowandelanga atu enango vyongo vinothuulela i-yo? Vanooda kala myasa dhiiri-idhe ira ta-iye dhedho dha-aidhi i-yo. Muthuulelenga ira lendo wa tendani mwa Yohova, “kanoirela afwee vyongo vyothakala thitho kanonyoza afwee.”
Mafyeda anooda iri-a ira nimwadhenga myasa yothakala yokuza atu enango (Muone ndima 12-13)
MULEMEZENGA ATU ANOM’MOVA YOHOVA
14. N’nga alendo a Yohova anorambela a-vi “atu amakalelo athakala”?
14 Salimo 15:4 linoonga ira afwee a Yohova, “katinovwelana na mutu uliwethene oira vyongo vyothakala.” N’nga ninaire a-vi vyevi? Voi kanili atu olongomana, kaninaidhiwe akala mutuo unoira vyongo vyothakala venango ngothakala. Mwasiwa ngwan’ni ninoonga e-no? Ninoonga ee-no namwasa oi mwaibaliwelo ninooda dhiveliwangana atu enango namwasa wa makalelwiwa nothakaleliwangana atu enango. Ee-no ninofwanela rambela vwelananga naatu enao anowaona Yohova ira “mbothakala.” (1 Ak. 5:11) Atu enala anothangani-avo atu anoira vyongo vyothakala amala aliwa a-chinyuwa, atu anonyoza vyongo vinororomela i-yo venango enao anofuna dodomi-a uxamwali-u na Yohova.—San. 13:20.
15. N’nga ninathonyi-edhe a-vi ira ninolemeza “atu anom’mova Yohova”?
15 Lemba la Salimo 15:4 linonilimbi-a ira nilemezenga “atu anom’mova Yohova.” Ee-no nivilimbi-edhenga fwanya ndhila yothonyi-edhela riya rima thitho lemeza afwee a Yohova. (Aro. 12:10) Ndhila imbo-i iongiwile va Salimo 15:4, choi mutu uli lendo tendani mwa Yohova, “kanochinja vyongo vilanyedhile liye masiki vyongo vya-akale pama wa liye.” A-kwakwaneli-edha vyongo vilanyedhile i-yo unooda pei-a atu enango. (Mat. 5:37) Mwaifwanafwani-o, Yohova unodedi-edhela ira afwee talemezenga vilumbenle aliwa vakazametoni. Yohova unosangalala na anamabala enao anokwakwaneli-edha vyongo vilanyedhile aliwa wa a-imiwa. Dhiveliwana Nlungu thitho afwi-u, unooda nilimbi-a ira nivilimbi-edhenga kwakwaneli-edha vyongo vilanyedhile i-yo.
16. N’nga ninathonyi-edhe mundhila iivi ira ninolemeza afwee a Yohova?
16 Ndhila imbo-i inathonyi-edhelena i-yo ira ninolemeza afwee a Yohova, kukala owachela alendo thitho ova-a modhala mandha. (Aro. 12:13) Waredhela abali naarongoli-u unonikami-a ira nivwelanenga maningi naaliwa thitho nivwelanenga na Yohova. Nakala owachela alendo, ninokala nim’sazi-edhanga Yohova.
NIRAMBELENGA DHIVELIWANA MANINGI KOBIRI
17. Mwasiwa ngwan’ni Salimo 15 linoonga mwasa wa kobiri?
17 Bibilya linoonga ira lendo wa Yohova “kanofiyari-a fwee kobiri mwajuru, thitho kanodyekeliwa ira akhoti-e landu wa mutu o-odawa.” (Sal. 15:5) Mwasiwa ngwan’ni musalimoli munoongiwa vya kobiri? Namwasa oi akala ninodhiveliwana maningi kobiri, ninooda roma onanga ira tofuneya maningi kwaranya atu na uxamwali-u na Yohova. (1 Ti. 6:10) Walelene atu tanoodyela abaliwa kobiri, vowapagali-a mwajuru va kobiri dhafiyarile aliwa. Thitho anamatonga enango tanoodyekeliwa votonga atu o-odawa mo-olongomana. Mbwenye Yohova unoidanana vyongo ninga vyevi.—Zak. 22:12.
18. N’nga ninadhifuke vyofuka viivi ira niidhiwe mathuulelwi-u vamwasa wa kobiri? (Aebere 13:5)
18 Mudhifuke ira: ‘N’nga hora dhothene ndinokalelave thuulelanga vya kobiri na vyongo vinagule miyo? N’nga ndafiyari kobiri ndinodembuwecha pagali nothuulelanga ira mwinyaa kobiridho kanodhifuna? N’nga kaana kobiri unondiiri-a ira ndidhionenga kala ofuneya, noimwanananga kami-a atu enango? N’nga ndinoona ira abali na arongola enango anodhiveliwana maningi kobiri namwasa oi atokaana kobiridho? N’nga ndinodhiveliwana waredha naatu ofuma norambelanga waredha naatu osauwa?’ Nitokaana ngari ilukulu yokala alendo a Yohova, ee-no ira nidhowenave kala afwee, ninofwanela rambela dhiveliwana maningi kobiri. Ninoirana vyongo vyevi namwasa oi Yohova kanodha ni-iya!—Muleri Aebere 13:5.
YOHOVA UNODHIVELIWANA ATU OI MBAAFWEE
19. Mwasiwa ngwan’ni Yohova unofuna ira niirenga vyongo vyothene viongiwile va Salimo 15?
19 Salimo 15 linomari-a na madhu oi: “Mutu uliwethene unoirana vyongo vyevi, kanodha tekenyeya.” (Sal. 15:5) Veva mulimbo lemba masalimo, atoonga mwasee Yohova unofunela liye ira niirenga vyongo viongiwile musalimoli. Yohova unofuna ira nisangalalenga. Ee-no unoniva-a malangi-o ananikami-e fwanya maraeli-o thitho kala obareleya.—Esa. 48:17.
20. N’nga alendo a Yohova anodedi-edhelan’ni?
20 Alendo a Yohova anodedi-edhela vyongo vyapama maningi. Ozoziwa anjinji ororomeleya, anodha wachela “mamburo manjinji okalamo” enao Yesu aasaka-edhele liye dhulu. (Ju. 14:2) Atu ana idedi-edho yodhakala vailambo yavathila, anodedi-edhela dhaona kwakwaneli-edhiwa wa vyolanyedha vili va lemba la Apokalipse 21:3. Onga mwaimbarimbari, ninoona ira ndi ngari ilukulu kala afwee a Yohova thitho alendo mutendanimwee modhowa nodhowa.
NYUMBO 39 Tipange Dzina Labwino Ndi Mulungu
