1. Ki kabakalañi kunyakisisa Samu 15:​1-5 hakukona kulutusa?

 MWA taba yefelile, neluitutile kuli batanga ba Jehova babaineezi ku yena bakona kuba baenyi mwa tende yahae ya swanisezo, ka kuba ni silikani sesitiile ni yena. Kono ki lika mañi zeluswanela kueza kuli lube baenyi bahae? Samu 15 ilutaluseza zeñata ka za taba yeo. (Mubale Samu 15:​1-5.) Samu ye, iluluta lituto zende zekona kulutusa kuba ni silikani sesitiile ni Mulimu.

2. Ki lika mañi mwendi zanaanahana Davida hanaabulela za tende ya Jehova?

² Samu 15 ikala ka lipuzo ze: “Jehova, ki mañi yakona kuba muenyi mwa tende yahao? Ki mañi yakona kuyaha fa lilundu lahao lelikenile?” (Samu 15:1) Davida muñoli yomuñwi wa lisamu hanaabulela za “tende” ya Jehova, mwendi naanahana za tabernakele yeneli mwa Gibioni ka nakonyana. Hape Davida hanaabulela za “lilundu [la Mulimu] lelikenile,” mwendi naama kwa lilundu la Sione lene lili mwa Jerusalema. Lilundu leo lene lili likilomita lisikai kuzwa kwa Gibioni, ki fona fo Davida naatomile tende ni kubeya mwateñi aleka ya tumelelano kufitela tempele iyahiwa.—2 Sam. 6:17.

3. Ki kabakalañi halubata kuutwisisa liñolo la Samu 15? (Mubone ni siswaniso.)

³ Ki niti kuli buñata bwa Maisilaele nebasa lumelezwi kusebeleza kwa tabernakele, mi ki basikai feela bane bakenanga mwa tende mone kubeilwe aleka ya tumelelano. Kono batanga ba Jehova kaufela babasepahala, nebakona kuba baenyi mwa tende yahae ya swanisezo ka kuzwelapili kuba balikani bahae. Nto yeo ki yona yelulakaza kaufelaa luna. Samu 15 italusa totuñwi twa tulemeno toluswanela kuba ni tona kuli luzwelepili kuba balikani ba Jehova.

 MUBE BABASINA MULATU MWA MUPILELO WAMINA MI MUEZE ZELUKILE

4. Luziba cwañi kuli Jehova ubata kuli lueze lika zeñwi kwandaa feela kukolobezwa? (Isaya 48:1)

⁴ Kwa Samu 15:​2, mulikanaa Mulimu utaluswa kuli ki mutu “yasina mulatu mwa mupilelo wahae, yaeza sesilukile.” Manzwi ali, “mupilelo” ni ‘kueza,’ aama kwa nto yezwelapili kueziwa. Kono kana luli lwakona kuba ‘babasina mulatu mwa mupilelo waluna’? Eni. Kusina taba kuli hakuna mutu yapetahalile, Jehova uka luunga kuba ‘babasina mulatu mwa mupilelo waluna’ haiba lueza molukonela kaufela kumuutwa. Haluneela bupilo bwaluna ku Mulimu ni kukolobezwa, lukalisa feela kuzamaya ni yena. Mwa linako zene iñolwa Bibele, mutu naasakoni kuba muenyi wa Jehova ka libaka feela la kuli naali Muisilaele. Babañwi nebabizanga fa libizo lahae, kono nebasa ezangi cwalo “ka niti ni ka kuluka.” (Mubale Isaya 48:1.) Maisilaele bane babata luli kuba baenyi ba Jehova, nebatokwa kuituta milao yahae ni kuimamela. Ka mukwa oswana, kuli lube ni silikani sesitiile ni Mulimu, lutokwa kueza lika zeñwi kwandaa feela kukolobezwa ni kuswalisana ni puteho ya Sikreste. Luswanela kuzwelapili ‘kueza zelukile.’ Lukona kueza cwañi cwalo?

5. Kuutwa Jehova mwa lika kaufela kuamañi?

⁵ Ku Jehova, ‘kuba babasina mulatu mwa mupilelo waluna’ ni ‘kueza zelukile,’ kuama kueza lika zeñata kwandaa feela kueza misebezi yemiñwi yeeziwanga kamita kwa Ndu ya Mubuso. (1 Sam. 15:22) Luswanela kueza molukonela kaufela kuutwa Mulimu mwa lika kaufela zelueza, mane niha luli lunosi. (Liprov. 3:6; Muek. 12:​13, 14) Ki kwa butokwa kuli luikataze kuutwa Jehova mane nihaiba mwa lika zebonahala kuba zenyinyani hahulu. Kueza cwalo kubonisa kuli lwamulata luli, ili nto yekatahisa kuli alulate hahulu nikufita.—Joa. 14:23; 1 Joa. 5:3.

6. Ka kuya ka Maheberu 6:​10-12, ki nto mañi ya butokwa hahulu kufita busepahali bone lubonisize kwamulaho?

 ⁶ Jehova uitebuha hahulu zelu muezelize kwamulaho. Nihakulicwalo, halukoni kuzwelapili kuba baenyi mwa tende ya Jehova ka libaka feela la kuli nelusepahala ku yena kwamulaho. Taba yeo italusizwe hande kwa Maheberu 6:​10-12. (Mubale.) Jehova halibalangi lika zende zene luezize kwamulaho. Kono ubata kuli luzwelepili kumusebeleza ka pilu yaluna kaufela “kuisa kwa mafelelezo.” Ukaba mulikanaa luna kuya kuile “haiba lusazwafi.”—Magal. 6:9.

MUBULELE NITI MWA PILU YAMINA

7. Kubulela niti mwa pilu yaluna kuamañi?

⁷ Mutu kaufela yabata kuba muenyi mwa tende ya Jehova, uswanela ‘kubulela niti mwa pilu yahae.’ (Samu 15:2) Taba yeo haitalusi feela kusapuma. Jehova ubata kuli lusepahale mwa lika kaufela zelubulela ni zelueza. (Maheb. 13:18) Ki kwa butokwa kueza cwalo “kakuli Jehova utoile mutu yapila ka bupumi, kono uitama bulikani bobutuna ni babalukile.”—Liprov. 3:32.

8. Ki mukwa mañi oluswanela kutokolomoha?

⁸ Batu ‘bababulela niti mwa lipilu zabona’ habaipumisangi kuutwa Mulimu habali ni batu kono inze baloba milao yahae habali kwa mukunda. (Isa. 29:13) Haki baipumisi. Mutu yaipumisa ukona kukala kunahana kuli milao ya Jehova haikoni kulutusa kamita. (Jak. 1:​5-8) Wakona kusautwa Jehova mwa litaba zanahana kuli haki za butokwa hahulu. Mi haiba kubonahala kuli hakuna zemaswe zezwa mwateñi, wakona kuba ni bundume bwa kueza lika zemaswe hahulu nikufita, mi Jehova haana kuamuhela sebelezo yahae. (Muek. 8:11) Kono luna lubata kusepahala mwa lika kaufela.

9. Lukona kuitutañi ku zeneezahezi Jesu hakopana ni Natanaele lwapili? (Mubone ni siswaniso.)

⁹ Lwakona kuituta butokwa bwa kubulelanga niti mwa lipilu zaluna ku zeneezahezi Jesu hakopana ni Natanaele lwapili. Filipi hanaaisize mulikanaa hae Natanaele ku Jesu, nekuezahezi nto yeñwi yekomokisa. Nihaike kuli lo neli lona lwapili Jesu hakopana ni Natanaele, naabulezi kuli: “Hamubone  Muisilaele yo kusina bupumi ku yena.” (Joa. 1:47) Ki niti kuli Jesu naanga balutiwa bahae kaufela kuli nebasepahala, kono naalemuhile kuli Natanaele naasepahala hahulu nikufita. Ka kuswana ni luna, Natanaele naasika petahala. Kono naasi muipumisi mi naasepahala mwa lika kaufela. Jesu naatabisizwe ki nto yeo mi naababalize Natanaele. Kaniti luli, kaufelaa luna lubata kuli Jesu aluunge cwalo!

10. Ki kabakalañi haluswanela kuitusisa hande mpo yaluna ya kubulela? (Jakobo 1:26)

¹⁰ Buñata bwa lika zeluswanela kueza zekolohanyizwe kwa Samu 15, libonisa moluswanela kupilisanela ni babañwi. Samu 15:3 ibulela kuli muenyi mwa tende ya Jehova “haasawani mutu ka lulimi lwahae, haaezi maswe mutu yomuñwi, mi haasinyi balikani bahae libizo.” Kusaitusisa hande mpo yaluna ya kubulela kukona kutahiseza babañwi butata bobutuna ni kulupaleliswa kuzwelapili kuba baenyi mwa tende ya Jehova.—Mubale Jakobo 1:26.

11. Kusawana mutu yomuñwi kutalusañi, mi ki lika mañi zeeziwanga kwa masawana babasa lati kubaka?

¹¹ Muñoli wa samu ye, ubulela ka kunonga ka za kusawana mutu yomuñwi. Kusawana mutu kutalusañi? Hañata kutalusa kubulela litaba za buhata zekona kusinya libizo la mutu yomuñwi. Masawana babasa lati kubaka bazwisiwanga mwa puteho ya Sikreste.—Jer. 17:10.

12-13. Ki mwa miinelo mañi yemiñwi molukona kusinya balikani baluna libizo ka kusalela? (Mubone ni siswaniso.)

¹² Liñolo la Samu 15:​3, hape liluhupulisa kuli baenyi ba Jehova habaezangi maswe batu babañwi mi habasinyangi balikani babona libizo. Lukona kusinya cwañi babañwi libizo?

¹³ Ka kusalela, lwakona kusinya mutu yomuñwi libizo ka kubulela litaba zemaswe ka za hae. Halunyakisiseñi mitala yelatelela: (1) kaizeli yomuñwi utuhela kuba mwa sebelezo ya nako kaufela, (2) muzwale ni musalaa hae batuhela kusebeleza fa Betele, kamba (3) muzwale yomuñwi haasa sebeza sina  muuna-muhulu kamba sikombwa sa puteho. Kana kwaswanela kubulelela babañwi litaba zesina hande bupaki ka za libaka hakubile ni licinceho zeo? Kukona kuba ni mabaka amañata elusa zibi atahisize kuli kube ni licinceho zeo. Kutuha fo, muenyi mwa tende ya Jehova “haaezi maswe mutu yomuñwi, mi haasinyi balikani bahae libizo.”

MUKUTEKE BATU BABASABA JEHOVA

14. Mutaluse mo baenyi ba Jehova babonisezanga kuli ‘bahana mutu yanyazahala.’

¹⁴ Samu 15:4 ibulela kuli mulikanaa Jehova “uhana mutu yanyazahala.” Lukona kuziba cwañi mutu yanyazahala? Ka kuba batu babasika petahala, halukoni kuziba kuli mutu yomuñwi wanyazahala kamba kutokwa. Kabakalañi? Kakuli kukona kulubela hahulu bunolo kulata batu babañwi kamba kunyemiswa ki batu babañwi, kabakala butu bwabona. Kacwalo, luswanela feela kuhana batu baanga Jehova kuli ‘banyazahala.’ (1 Makor. 5:11) Batu bao bakopanyeleza batu babazwelapili kueza lika zemaswe, babasa kuteki zelulumela, kamba babalika kufokolisa silikani saluna ni Jehova.—Liprov. 13:20.

15. Ki nzila ifi yeñwi yelukona kukuteka ka yona batu “babasaba Jehova”?

¹⁵ Kuzwa fo, Samu 15:4 ibulela kuli luswanela kukuteka batu “babasaba Jehova.” Kacwalo, lubatanga linzila za kubonisa ka zona sishemo ni likute kwa balikani ba Jehova. (Maro. 12:10) Ka mukwa ufi? Ka kuya ka Samu 15:​4, nzila yeñwi ki ya kuli muenyi mwa tende ya Jehova “haapalelwi kutaleleza sepiso yahae, lika niha lisike zamuzamaela hande.” Lukautwisa babañwi butuku kwa pilu haiba lupalelwa kutaleleza zelusepisize. (Mat. 5:37) Ka mutala, Jehova ubata kuli baenyi bahae bapete buitamo bone baezize habanyalana. Hape watabanga habona bashemi habaeza mobakonela kaufela kueza lika zebasepisize bana babona. Lilato laluna ku Mulimu ni kwa batu babañwi, lilususuezanga kueza molukonela kaufela kutaleleza lisepiso zaluna.

16. Ki ifi nzila yeñwi yelukona kukuteka ka yona balikani ba Jehova?

¹⁶ Nzila yeñwi yelukona kukuteka ka yona balikani ba Mulimu, ki ka kuba ni moya wa kuamuhela baenyi ni kuba ni bufani. (Maro. 12:13) Kuitabisa ni mizwale ni likaizeli baluna, kuka lutusa kutiisa silikani saluna ni bona ni kutiisa silikani saluna ni Jehova. Kuzwa fo, haluba ni moya wa kuamuhela baenyi, lulikanyisa Jehova.

MUSIKE MWABA NI LILATO LA MASHELEÑI

17. Ki kabakalañi Samu 15 haibulela za masheleñi?

¹⁷ Lubala kuli muenyi wa Jehova “haabati kekelezo hakolotisa masheleñi ahae, mi haamuheli kweta ya kuli alyanganise taba ya mutu yasina mulatu.” (Samu 15:5) Kono cwale ki kabakalañi samu yekuswani ye haibulela za masheleñi? Kakuli haiba haluna mubonelo omunde ka za masheleñi, lwakona kuutwisa babañwi butuku kwa pilu ni kusinya silikani saluna ni Mulimu. (1 Tim. 6:10) Mwa linako zene iñolwa Bibele, batu babañwi nebasa ezangi hande mizwale babona bane bali babotana, ka kubata kekelezo hane babakolotisanga masheleñi. Hape baatuli babañwi nebaamuhelanga likweta, ili nto yenetahisanga kuli baatule batu babasina mulatu ka kusaluka. Jehova utoile hahulu likezo zecwalo.—Ezek. 22:12.

18. Ki lipuzo mañi zekona kulutusa kuziba moluungela masheleñi? (Maheberu 13:5)

¹⁸ Lukaeza hande haiba luitekula kuli lubone moluungela masheleñi. Muipuze kuli: ‘Kana hañata ninahananga hahulu ka za masheleñi ni zenikona kuleka? Hanikolotanga masheleñi, kana naliyehanga kuakutisa ka  kunahana kuli mwendi mutu yanikolotisize haatokwi masheleñi ao kapili? Kana hanibanga ni masheleñi niikutwanga kuba wa butokwa hahulu mi kunibelanga taata kuba ni bufani? Kana niinganga mizwale ni likaizeli baka kuli balata hahulu sifumu ka libaka feela la kuli banani masheleñi? Kana nibatanga feela kuitama bulikani ni batu babafumile kufita babotana?’ Ki kwa butokwa hahulu kuipuza lipuzo zeo bakeñisa kuli lunani tohonolo yetuna ya kuba baenyi ba Jehova. Lukona feela kuzwelapili kuba baenyi ba Jehova ka kusaba ni lilato la masheleñi. Haiba lueza cwalo, Jehova haana kulusiya nikamuta!—Mubale Maheberu 13:5.

JEHOVA WALATA BALIKANI BAHAE

19. Ki kabakalañi Mulimu habata kuli lueze lika kaufela zebulezwi kwa Samu 15?

¹⁹ Samu 15 ifeza ka sepiso yeli: “Mutu kaufela yaeza cwalo haana kunyanganyiswa nikamuta.” (Samu 15:5) Mwa timana ye, muñoli wa lisamu yo utalusa libaka Mulimu habata kuli lueze lika kaufela zebulezwi mwa samu yeo. Jehova ubata kuli lube ni tabo. Kacwalo, haiba lueza zabata Mulimu kuli lueze, lukaikola bupilo mi lukasilelezwa.—Isa. 48:17.

20. Ki lika mañi zebanyolezwi baenyi ba Jehova?

²⁰ Baenyi ba Jehova bakaikola lika zende kwapili. Bakreste babatozizwe, ili babasepahala bakaba ni “libaka za kuina zeñata” zona zabalukiselize Jesu kwa lihalimu. (Joa. 14:2) Batu babanani sepo ya kuto pila fa lifasi bona banyolezwi kubona liñolo la Sinulo 21:3 halika talelezwa. Kaniti luli, kaufelaa luna luikutwa kuba ni tohonolo yetuna ya kuba balikani ba Jehova, ili kuba baenyi mwa tende yahae kuya kuile!