1. Mmunyi mudi Musambu wa 15:​1-5 utuambuluisha?

 TUVUA balonge mu tshiena-bualu tshishale ne: bantu badi badilambula kudi Yehowa ne badia nende bulunda bukole ke badi mua kutudila mu ntenta wende. Kadi tshia kuenza ntshinyi bua kutudilamu? Musambu wa 15 udi utulejatshi. (Bala Misambu 15:​1-5.) Musambu eu udi uleja tshia kuenza bua kudia bulunda bukole ne Nzambi.

2. Pavua Davidi mutele ntenta wa Yehowa uvua mua kuikala wakula bua tshintu kayi?

² Musambu wa 15 udi utuadija ne mêyi a ne: “Yehowa, nnganyi udi mua kutudila mu ntenta webe? Nnganyi udi mua kusombela mu mukuna webe wa tshijila?” (Mis. 15:1) Pavua Davidi mutele “ntenta” wa Yehowa mu mvese eu, uvua mua kuikala wakula bua ntenta wa tshitendelelu uvua mu tshimenga tshia Gibeona tshikondo atshi. Davidi mmutele kabidi “mukuna wa tshijila” wa Nzambi pamuapa wakula bua Siona wa mu Yelushalema. Davidi wakasa ntenta muaba wa kilometre ndambu lua ku sud kua Gibeona. Mu ntenta amu ke muakanjiye kuteka mushete wa tshipungidi too ne pakaluabu kuibaka ntempelo.—2 Sam. 6:17.

3. Bua tshinyi mbimpe tumanye lungenyi ludi mu Musambu wa 15? (Tangila kabidi tshimfuanyi.)

³ Kabavua banyishile bena Isalele ba bungi bua kuenza mudimu ku ntenta wa tshitendelelu to, ne bantu bakese menemene ke bavua babuela mu ntenta muaba uvua mushete wa tshipungidi. Kadi lelu batendeledi bonso ba Yehowa ba lulamatu badi mua kutudila mu ntenta wende wa mu tshimfuanyi padibu badia nende bulunda ne babulama. Ke dijinga ditudi tuetu bonso nadi. Musambu wa 15 mmuleje ngikadilu itudi ne  bua kuikale nayi bua kushala balunda ba Yehowa.

ENDA KUYI KALEMA, WENZE MALU ADI MAKANE

4. Ntshinyi tshidi tshituleja ne: batismo ki ntshionso tshidi Yehowa utulomba to? (Yeshaya 48:1)

⁴ Misambu 15:2 udi wamba bua mulunda wa Nzambi ne: “mmuntu udi wenda kayi kalema, wenza malu adi makane.” Miaku “wenda” ne “wenza” idi yumvuija tshintu tshidi tshitungunuka ne kuenzeka. Kadi tudi mua ‘kuenda katuyi kalema’ anyi? Eyowa. Nansha mutudi katuyi bapuangane, Yehowa yeye neatumone ne: tudi ‘tuenda kakuyi kalema’ bituikala tudienzeja ne muoyo umue bua kumutumikila. Patudi tudilambula ne tubatijibua, tudi tutuadija kuenda ne Nzambi. Ku kale, kuikala patupu muena Isalele kakuvua kuvuija muntu mukumbane bua kutudila mu ntenta wa Yehowa to. Kuvua bena Isalele bavua babila Yehowa kabiyi “mu bulelela ne mu buakane” to. (Bala Yeshaya 48:1.) Bua bena Isalele kuleja ne: bavua bushuwa basue kutudila mu ntenta wa Yehowa, bavua ne bua kumanya mikenji yende ne kuyitumikila. Bia muomumue, bua Yehowa kutuanyisha lelu, katuena anu ne bua kubatijibua ne kuikala kubuela mu bisangilu patupu to. Tudi ne bua kutungunuka ne ‘kuenza malu adi makane.’ Mmunyi mutudi mua kuenza nanku?

5. Kutumikila Yehowa mu malu onso kudi kumvuija tshinyi?

⁵ Bua Yehowa kuamba ne: ‘tudi tuenda katuyi kalema’ ne ‘tuenza malu adi makane’ katuena anu ne bua kuikala tubuela mu bisangilu ku nzubu wa Bukalenge patupu to. (1 Sam. 15:22) Tudi ne bua kumutumikila mu malu onso atudi tuenza, nansha patudi pa nkayetu. (Nsu. 3:6; Muam. 12:​13, 14) Mbia mushinga bua tuetu kutumikila Yehowa nansha mu tumalu tukese. Kuenza nanku kudi kuleja ne:  tudi bamunange. Dîba adi, neatunange petu.—Yone 14:23; 1 Yone 5:3.

6. Bilondeshile Ebelu 6:​10-12, ntshinyi tshidi ne mushinga wa bungi kupita bionso bitukadi benze mu mudimu wa Yehowa?

⁶ Yehowa udi ne dianyisha dia bungi bua bionso bitukadi bamuenzele. Nansha nanku, malu atukadi bamuenzele au nkayawu ki ngadi enza bua tushale mu ntenta wende to. Ke tshidi tshileja mu Ebelu 6:​10-12. (Bala.) Yehowa ki mmupue mudimu utukadi bamuenzele muoyo to. Kadi mmusue bua tutungunuke ne kumuenzelawu ne muoyo mujima “too ne ku ndekelu.” Neashale mulunda wetu bua kashidi “tuetu katuyi batshioke” to.—Gal. 6:9.

AMBA BULELELA MU MUOYO WEBE

7. Kuamba bulelela mu muoyo kudi kumvuija tshinyi?

⁷ Muntu yonso udi musue kushala mu ntenta wa Yehowa udi ne bua kuikala “wamba bulelela mu muoyo wende.” (Mis. 15:2) Kabiena biumvuija anu kubenga kushima to. Yehowa mmusue tuikale bena bululame mu malu onso. (Eb. 13:18) Kuenza nanku kudi ne mushinga ‘bualu Yehowa mmukine muntu muena malu a bibenda, kadi bulunda buende bushême budi kudi bena bululame.’—Nsu. 3:32.

8. Ntshikadilu kayi tshitudi ne bua kuepuka?

⁸ Bantu badi ‘bamba bulelela mu muoyo wabu’ kabena batumikila Nzambi padibu pa bantu, babenga kumutumikila padibu pa nkayabu to. (Yesh. 29:13) Badi bepuka malu a bibenda. Muntu muena malu a bibenda udi mua kutuadija kudiambila ne: mikenji ya Yehowa kayitu anu ne mushinga misangu yonso to. (Yak. 1:​5-8) Udi mua kutuadija kushipa mikenji ya Nzambi mu malu adiye umona ne: kaena ne mushinga to. Kushipa mikenji ya Yehowa ayi kuoku kakuyi kumutuadila bipeta bibi, udi mua kutuadija kuenza malu mabi bikole. Nansha mudiye wela meji ne: utshidi utendelela Yehowa, Yehowa katshiena witaba ntendelelu wende to. (Muam. 8:11) Ke bualu kayi, tudi ne bua kuikala bena bululame mu malu onso.

9. Ntshinyi tshivua tshienzeke pavua Yezu mupetangane ne Natanaele bua musangu wa kumpala? (Tangila kabidi tshimfuanyi.)

 ⁹ Kuamba bulelela mu muoyo wetu kudi ne mushinga. Ke tshivua tshienzeke pavua Filipo mulombe mulunda wende Natanaele bua aye kupetangana ne Yezu. Nansha muvua Yezu kayi muanji kutuilangana ne Natanaele, Yezu wakamba ne: “Monayi, yeye udi bulelela muena Isalele udi kayi ne dishima munda muende.” (Yone 1:47) Yezu uvua mumanye ne: bayidi bende bakuabu bavua bena bululame. Kadi Natanaele uvua yeye mubapite. Natanaele uvua mupange bupuangane anu bu tuetu bonso, kadi kavua muena lubombo to, uvua muena bululame mu malu onso. Yezu wakamuanyisha bua bululame buende, kumuelaye kalumbandi. Nebikale bimpe Yezu yeye umvua kabidi nanku buetu lelu.

10. Tudi ne bua kutabalela ngakuilu wetu bua tshinyi? (Yakobo 1:26)

¹⁰ Malu a bungi a kuenza adi mu Musambu wa 15, adi atangila mutudi mua kuenzela bakuabu malu. Misambu 15:3 udi uleja ne: muntu udi musue kutudila mu ntenta wa Yehowa “kena ushiminyinangana malu ne ludimi luende, kena wenzela mukuende bualu bubi, ne kena unyangila balunda bende lumu” to. Tuetu tushiminyina bakuabu malu, nebibanyingalaje bikole, nebitupangishe bua kushala mu ntenta wa Yehowa.—Bala Yakobo 1:26.

11. Kushiminyinangana malu kudi kumvuija tshinyi? Ntshinyi tshidibu benzela mushiminyinyanganyi wa malu udi kayi unyingalala?

¹¹ Mufundi wa misambu mmuakule bua kushiminyinangana malu. Kudi kumvuija kuamba malu a dishima adi mua kuyanga lumu lua muntu. Mushiminyinyanganyi wa malu udi kayi unyingalala badi bamuipata mu tshisumbu.—Yel. 17:10.

12-13. Fila bilejilu bidi mua kuleja mutudi mua kumuangalajilangana ngumu mibi kabiyi ku budisuile. (Tangila kabidi tshimfuanyi.)

¹² Misambu 15:3 mmuambe kabidi ne: muntu  udi utudila mu ntenta wa Yehowa kena wenzela mukuende bualu bubi ne kena unyangila balunda bende lumu to. Mmunyi mutudi mua kunyangila balunda betu lumu?

¹³ Tudi mua kubanyangila lumu kabiyi ku budisuile patudi tuambilangana malu a mafi adi abatangila. Tshilejilu: 1) Mbumbushe muanetu wa bakaji mu bumpanda-njila, 2) Mbumbushe muanetu wa balume ne mukajende ku Betele, peshi 3) Mbumbushe muanetu wa balume mu bukulu anyi mu busadidi. Nebikale bibi bua kuambila bakuabu ne: bana betu aba badi ne bua kuikala benze bualu bubi. Ke bualu kayi, mbabumbushe mu midimu ayi. Kudi mua kuikala malu a bungi adi menze bua babumbushe mu midimu ayi atudi katuyi bamanye to. Bualu bukuabu budi ne: muntu udi utudila mu ntenta wa Yehowa “kena wenzela mukuende bualu bubi, ne kena unyangila balunda bende lumu” to.

NEMEKA BADI BATSHINA YEHOWA

14. ‘Muntu udi muakanyine kupetudibua’ mmuntu kayi?

¹⁴ Misambu 15:​4, udi uleja mudi mulunda wa Yehowa ‘ubenga muntu yonso udi muakanyine kupetudibua.’ Mmunyi mutudi mua kumanya muntu wa mushindu au? Bu mutudi bapange bupuangane, katuena bakumbane bua kuamba ne: muntu kampanda mmukumbanyine kupetudibua to. Tudi bafuane kunanga bantu batudi tupetangana nabu bimpe ne kubenga badi batunyingalaja. Pabi tudi ne bua kubenga anu muntu udi Yehowa umona ne: ‘mmuakanyine kupetudibua.’ (1 Kol. 5:11) Muntu au ngudi mudîne mu dienza mpekatu kayi unyingalala, wakula bibi bua ditabuja dietu ne bua malongesha etu, ne ukeba kunyanga bulunda buetu ne Yehowa.—Nsu. 13:20.

15. Ngumue mushindu kayi utudi mua kunemeka bantu “badi batshina Yehowa”?

¹⁵ Misambu 15:4 udi wamba kabidi ne: tudi ne bua kunemeka “badi batshina Yehowa.” Tuambe ne: tudi ne bua kuikala tuenzela balunda ba Yehowa malu malenga ne tubanemeka. (Lomo 12:10) Mushindu kayi? Misambu 15:4 udi uleja umue mushindu wa kuenza nanku. Udi wamba mudi muntu udi mu ntenta wa Yehowa ‘kayi upingana tshianyima bua malu adiye mulaye, nansha padiwu amubipila.’ Kubenga kukumbaja malu atudi balaye kudi mua kunyingalaja batudi baalaye. (Mat. 5:37) Yehowa udi ulomba mulume ne mukajende bua banemeke mutshipu wabu wa dibaka. Udi kabidi usanka padi baledi bakumbajila bana babu malu avuabu babalaye. Bu mutudi banange Nzambi ne bantu netu, tudienzeje ne muetu muonso bua kukumbaja malu atudi tulaya.

16. Mmushindu kayi mukuabu utudi tunemeka balunda ba Yehowa?

¹⁶ Mushindu mukuabu wa kunemeka balunda ba Nzambi ngua kubakidila ku metu ne kubapesha bintu. (Lomo 12:13) Patudi tusombeshangana ne bena Kristo netu, bulunda butudi badie nabu ne butudi badie ne Yehowa budi bukola. Kupita apu, patudi tubakidila ku metu tudi tuidikija Yehowa.

EPUKA DINANGA DIA MAKUTA

17. Bua tshinyi Musambu wa 15 udi wakula bua makuta?

¹⁷ Muntu udi mu ntenta wa Yehowa “kena usombeshangana makuta ende bua kupeta tshia kasombela, ne kena witaba mbuejilu bua kupisha muntu udi kayi ne bualu” to. (Mis. 15:5) Mufundi wa misambu mmutele makuta mu mvese eu bua tshinyi? Bualu dinanga dia makuta didi mua kunyanga bulunda butudi badie ne Nzambi ne bantu netu. (1 Tim. 6:10) Ku kale, bamue bantu bavua  badiila pambidi pa bapele, babalomba tshia kasombela. Bamue balumbuluishi bavua bangata nkosa mishiku, pashishe banyanga tshilumbu tshia bantu bavua kabayi ne bualu bavuabu bakengeshe. Yehowa mmukine bienzedi bia nunku.—Yeh. 22:12.

18. Nnkonko kayi iudi mua kudiela bua kukonkonona mushindu uudi umona makuta? (Ebelu 13:5)

¹⁸ Konkonona mushindu uutu umona makuta. Diebeja ne: ‘Meji anyi atu anu matuma ku makuta ne ku bindi mua kusumba anyi? Pantu nsombangana makuta, ntuku nshala wa bakadi banana bua kufuta, ndiambila ne: udi muansombeshe kena nawu dijinga anyi? Makuta anyi atu angela muulu anyi? Bituku binkolela bua kuapeshangana anyi? Ntuku ndiambila ne: bana betu badi ne kantu ku bianza mbanange makuta kupita Yehowa anyi? Banyi balunda batu anu bena kantu ku bianza anyi?’ Kudiela nkonko eyi kudi ne mushinga bualu Yehowa mmutubikile bua kutudila mu ntenta wende. Kadi netushalamu anu tuetu katuyi banange makuta to. Dîba adi Yehowa kakutulekela nansha kakese.—Bala Ebelu 13:5.

YEHOWA MMUNANGE BALUNDA BENDE

19. Ntshinyi tshidi ne bua kutusaka bua kutumikila mikenji ya Yehowa?

¹⁹ Musambu wa 15 udi ujika ne dilaya edi: “Muntu yonso udi wenza malu aa kabakumunyukula nansha kakese.” (Mis. 15:5) Muaba eu, mufundi wa misambu udi uleja tshidi ne bua kutusaka bua kutumikila mikenji ya Yehowa idi mu nshapita eu. Yehowa mmusue bua tuikale ne disanka. Patudi tutumikila mikenji yende, netuikale ne nsombelu muimpe ne neatukube.—Yesh. 48:17.

20. Bantu badi mu ntenta wa Yehowa nebapete nsombelu kayi?

²⁰ Bantu badi mu ntenta wa Yehowa nebapete nsombelu muimpe wa dikema. Bena Kristo bela manyi nebaye mu diulu mudi Yezu mubalongoluele “miaba ya bungi ya kusombela.” (Yone 14:2) Bena Kristo badi ne ditekemena dia kupeta muoyo pa buloba mbindile dikumbana dia Buakabuluibua 21:3. Tuetu bonso tudi ne diakalenga dinene bua mudi Yehowa mutubikile bua tushale balunda bende, bua tutudile mu ntenta wende bua kashidi.