1. Uno mukanda waSamu 15:​1-5 unahase kutukafwa ngachilihi?

 MUCHIHANDE chinafumuho, twalinangulanga nge vangamba jaYehova vakulihana vanahase kupwa vangeji mumbalaka yenyi yachifwanyisa hakupwa nausoko wakukola naikiye. Uno vyuma muka navitukafwa mangana tupwenga nausepa kana? Mukanda waSamu 15 wahanjika vyuma vyavivulu hachihande kana. (Tangenu Samu 15:​1-5.) Eyi samu yahanjika vyuma twatela kulinga vize navitukafwa tupandame chikuma kuli Kalunga.

2. Vyuma muka pamo vyalingishile muka-kwimba jisamu Ndavichi avuluke mbalaka yaYehova?

² Mukanda waSamu 15 waputuka namazu ano ngwawo: “Ove Yehova, iya nahase kupwa ngeji mumbalaka yove? Iya nahase kutwama hapili yove yajila?” (Samu 15:1) Muka-kwimba jisamu Ndavichi hakuvuluka “mbalaka” yaYehova pamo apwile nakushinganyeka hatavanaku yize yapwile muNgiveyone halwola kana. Ndavichi avulukile nawa ‘pili yajila’ yaKalunga, pamo apwile nakutalisa kuZeyone yamuYelusalema. Kaha Ndavichi ajikile mbalaka kafwe jikilomita 10 kusulo yaNgiveyone. Mumbalaka kana mukiko valaminyinyinenga chikasha chalushiko palanga nomu vatungile chihela chivene chakulamina chikasha kana.—Samwe. 2, 6:17.

3. Mwomwo ika twatela kulinangwila mukanda waSamu 15? (Talenu nawa muvwimbimbi.)

³ VaIsalele vavavulu kavavetavishile kuzachila hatavanakuko, chikumanyi mukachi kambalaka muze valaminyinyinenga chikasha chalushiko. Chipwe ngocho, vangamba jaYehova vakushishika vosena vanahase kupwa vangeji mumbalaka yachifwanyisa yaYehova, nakutwalaho lika kupwa masepa jenyi. Echi chikiko chuma twafwila etu tuvosena. Mumukanda waSamu 15, Ndavichi avulukamo vilinga vimwe twatela kupwa navyo mangana tutwaleho lika kupwa masepa jaYehova.

 TAMBUKENUNGA MUKULONGA NAKULINGANGA VYUMA VYAKWOLOKA

4. Twatachikiza ngachilihi ngwetu Yehova kasaka tukumine kaha hakutumbapachisako? (Isaya 48:1)

⁴ Hali Samu 15:​2, mutu uze apwa sepa lyaKalunga vamuvuluka kupwa mutu uze “eji kutambukanga mukulonga, [uze] eji kulinganga vyuma vyakwoloka.” Mazu akwamba ngwavo, “kutambukanga” “[na]kulinganga” asolola mutu uze ali nakutwalaho lika kulinga vyuma, keshi kutwama kaha mbombomaneko. Kutala chikupu tunahase ‘kutambuka mukulonga’ tahi? Eyo. Numba tuhu etu vatu katwakupukako, oloze Yehova mwatumona kupwa tuvatu vaze veji “kutambukanga mukulonga” kachi nge natuzata nangolo tumwononoke. Tachikizenu ngwenu, nge tunalihane kuli Kalunga nakutumbapachisa, echi chinapu kaha maputukilo aungeji wetu wakutunga usoko wakukola naKalunga. Anukenu ngwenu, muMbimbiliya kupwa kaha mumuyachi wavaIsalele kachalumbunwine nge mutu natemo kupwa ngeji yaYehovako. VaIsalele vamwe vasanyikilenga Kalunga, oloze keshi “mumuchano namukwolokako.” (Tangenu Isaya 48:1.) VaIsalele vamwaza michima valinangwilenga jishimbi jaYehova nakujikavangiza. Chochimwe namakumbi ano nawa, hakusaka tupwenga masepa jaKalunga twatela kulingako vyuma vimwe, keshi kutumbapachisa nakulikata navandumbwetu muchikungulwilo kahako. Twatela kutwalaho lika “kulinganga vyuma vyakwoloka.” Uno tunahase kulinga ngachilihi ngocho?

5. Uno kwononoka Yehova muvyuma vyosena chasakiwa kulinga ika?

⁵ Kuli Yehova, “kutambukanga mukulonga” “[na]kulinganga vyuma vyakwoloka” chalumbununa kuyanga kukukunguluka, nakulinganga vyuma vyakushipilitu vyakulisezaseza. (Samwe. 1, 15:22) Twatela kufwila kwononoka Kalunga mukuyoya chetu chosena, numba nge tuli kwauka wetu. (Vishi. 3:6; Kwambu. 12:​13, 14) Chapwa chachilemu kuzata nangolo jetu josena mangana twononoke Yehova namuvyuma vyavindende. Echi nachisolola nge twazanga chikuma  Yehova, nakumulingisa nawa atuzange chikuma.—Yowa. 14:23; Yowa. 1, 5:3.

6. Kweseka nachisoneka chaWavaHepeleu 6:​10-12, chuma muka chapwa chachilemu chikuma kuhambakana kala vyuma vyamwaza twalingile kunyima?

⁶ Yehova eji kwivwanga kuwaha chikuma havyuma vyamwaza twamulingililile kunyima. Chipwe ngocho, vyuma vyamwaza twalingile kunyima keshi vikiko kaha vinahase kutulingisa tutengamo kupwa vangeji mumbalaka yaYehovako. Echi vachisolola hatoma hali WavaHepeleu 6:​10-12. (Tangenu.) Numba tuhu Yehova kavulyama vyuma vyamwaza twamulingililileko, oloze asaka tutwaleho lika kumulemesa namuchima wetu wosena “palanga nakusongo.” Nge ‘katweshi kuzeyako,’ kaha mwatwalangaho lika kupwa sepa lyetu haya myaka.—Ngale. 6:9.

HANJIKENUNGA MUCHANO MUMUCHIMA WENU

7. Uno kuhanjikanga muchano mumuchima wetu chalumbununa ika?

⁷ Mutu uze mwasaka kupwa ngeji mumbalaka yaYehova, atela “kuhanjikanga muchano mumuchima wenyi.” (Samu 15:2) Echi chalumbununa nge twatela kulihenda kukuhanjikanga makuli, kaha Yehova nawa asaka tupwenganga vakashishi muvyuma vyosena. (Hepe. 13:18) Chuma kana chapwa chachilemu, mwomwo “Yehova ahunga muka-kutangisa, oloze apwa sepa lyavaka-kusungama.”—Vishi. 3:32.

8. Chuma muka twatela kulihendako?

⁸ Vaze veji ‘kuhanjikanga muchano mumichima yavo’ kaveshi kulyonga kukavangiza jishimbi jaKalunga hameso avatu, kahomu navaheta kwaukawavo hinavajihokolako. (Isa. 29:13) Veji kulihendanga kumuchima wakumbembejeka. Muka-kumbembejeka eji kuputukanga kuhuhwasana ngwenyi jishimbi jimwe jaYehova kajapwa jamwazako. (Yako. 1:​5-8) Nahase kulikanga kuli Yehova havyuma vize namono ngwenyi keshi vyavilemu chikumako. Kachi nge namono ngwenyi kulikanga chenyi kachamunehelelele ukaluko, eji kutwalangaho lika kulinga vyuma vyavipi, kaha numba nge mwashinganyeka ngwenyi ali nakuzachila Kalunga, oloze Kalunga keshi kwitavila kulemesa chenyiko. (Kwambu. 8:11) Oloze etu twasaka kupwa vakashishi muvyuma vyosena.

9. Vyuma muka natulinangula kuvyuma alingile Yesu omu valiwanyine naNatanyele halwola lwatete? (Talenu nawa muvwimbimbi.)

⁹ Tunahase kulinangula kulema chakupwa namuchima  wakuhanjikanga muchano kuvyuma alingile Yesu omu aliwanyine naNatanyele halwola lwatete. Kwapwile vyuma vyakulipwila vyasolokele omu Fwilipu atwalile sepa lyenyi Natanyele kuli Yesu. Numba tuhu elu lwapwile lwola lwatete Yesu kuliwana naNatanyele, oloze ambile ngwenyi: “Talenu, muli ou kaIsalele chikupu vene kamweshi makuliko.” (Yowa. 1:47) Chikupu vene, Yesu amwene ngwenyi tumbaji twenyi veka vapwile vakashishi, oloze Natanyelenyi apwile wakashishi chikuma. Natanyele kapwile nakulyongako, kaha apwile wakashishi muvyuma vyosena, numba tuhu kapwile wakukupukako. Yesu evwile kuwaha nachuma kana, kaha amusangejekele. Tunahase kwivwa kuwaha kachi nge nayetu navatusangejeka kuli Yesu mwomwo yakupwa vakushishika.

10. Mwomwo ika twatela kulihendela kukuzachisa lilimi lyetu mujila yayipi? (WaYakova 1:26)

¹⁰ Vyuma vyavivulu vavuluka hali Samu 15, vyalikwatasana najila tweji kutwaminangamo navakwetu. Samu 15:3 yahanjika kutalisa kuli ngeji uze ali mumbalaka yaYehova ngwayo, “keshi kuvangila vakwavo nalilimi lyenyiko, keshi kulinga vyuma vyavipi kuvakwavoko, kaha keshi kusaula masepa jenyiko.” Kuzachisa lilimi lyetu muvyuma kanevi vyavipi chinahase kuhakisa vakwetu muponde nakutulingisa tuhone kutamo kupwa vangeji mumbalaka yaYehova.—Tangenu WaYakova 1:26.

11. Uno lizu kuvangila lyalumbununa ika, kaha vaka-kuvangila vakwavo vaze kaveshi kupihilila nakwalumukako veji kuvalinganga ngachilihi?

¹¹ Muka-kwimba jisamu avulukile lizu kuvangila. Uno lizu kuvangila lyalumbununa ika? Lyalumbununa kuzachisa mazu amakuli, aze anahase kwenyeka puho yamutu. Vaka-kuvangila vakwavo vaze kaveshi kupihilila nakwalumukako veji kuvafumisanga muchikungulwilo.—Yele. 17:10.

12-13. Muvyuma muka tunahase kupwa namulonga wakusaula vakwetu chakuzeneka kutachikiza? (Talenu nawa muvwimbimbi.)

¹² Samu 15:3 yatulweza nawa ngwayo, vangeji jaYehova kaveshi kulinga vyuma vyavipi kuli vakwavoko, kaha nawa kaveshi kusaula masepa javoko.  Uno tunahase kusaula ngachilihi masepa jetu?

¹³ Tunahase kusaula vakwetu chakuzeneka etu vavene kutachikiza, hakutanjisa mijimbu yimwe yakutalisa kuli vakiko. Chakutalilaho: (1) nge ndumbwetu wapwevo neche kuzata mulimo washimbu yosena, (2) nge valunga napwevo kaveshi cheka nakuzachila haMbeteleko, (3) nge ndumbwetu walunga keshi cheka mukulwane muchikungulwilo chipwe muka-kuzachilako. Kutala nachipwa chamwaza kuputuka kuhumikiza vyuma vinalingisa kupwenga kwalumuka kana nakuputuka kuvilweza vakwetu tahi? Nduma, mwomwo kunahase kupwa vyuma vimwe vinalingisa kupwenga kwalumuka kana vize katwatachikijileko. Kaha nawa mutu uze apwa ngeji mumbalaka yaYehova “keshi kulinga vyuma vyavipi kuvakwavoko, kaha keshi kusaula masepa jenyiko.”

VUMBIKENUNGA VAZE VEJI KWIVWANGA WOMA YEHOVA

14. Lumbununenu ovyo vatu vaze vapwa vangeji jaYehova veji kukanyinanga “vipapwoki vosena.”

¹⁴ Hali Samu 15:4 vamba ngwavo sepa lyaYehova “eji kukananga vipapwoki vosena.” Uno tunahase kulinga ngachilihi ngocho? Hakuwana nge katwakupukako, ngocho katwatamo kumona mutu kupwa chipapwokiko. Mwomwo ika? Mwomwo tunahase kupandama kuvatu vamwe mwomwo yavilinga vyavo, nakuhunga veka. Shikaho twatela kukana kaha vatu vaze Yehova amona kupwa “vipapwoki.” (Koli. 1, 5:11) Vatu kana shina vaze veji kutwalangaho lika kulinga vyuma vyavipi, chipwe kuhona kuvumbika vyuma twafwelela, chipwe kusaka kwenyeka usoko wetu naYehova.—Vishi. 13:20.

15. Jila muka yimwe yize tweji kuvumbikilangamo “vaze vevwa Yehova woma”?

¹⁵ Hali Samu 15:4 vatulweza tuvumbikenga “vaze vevwa Yehova woma.” Shikaho, tweji kufwilanga kuwana jijila jakusolwelamo likoji nakuvumbika masepa jaYehova. (Loma 12:10) Mujila muka? Jila yimwe shina yize yatwama hali Samu 15:4 ngwavo, mutu uze apwa ngeji mumbalaka yaYehova “eji kulinganga vyuma nashiki, numba nge vyuma vinamukaluhwila.” Vakwetu veji kwivwanga kukola kumuchima kachi nge tunahono kutesamo vyuma twavashikile. (Mateu 5:37) Chakutalilaho, Yehova asaka vatu vaze vapwa vangeji jenyi vatesemo lushiko lwavo lwaulo. Eji kwivwanga nawa kuwaha kachi nge visemi navazata nangolo mangana vatesemo vyuma veji kushikanga vana vavo. Kuzanga Kalunga navakwetu nachitukafwa tutesengamo jishiko jetu, kweseka noho hanakumina ngolo jetu.

16. Jila muka yikwavo yakuvumbikilamo masepa jaYehova?

¹⁶ Jila yikwavo yakuvumbikilamo masepa jaKalunga shina kuvasolwela chisambo nazumbu. (Loma 12:13) Kupwa nalwola lwakushikama navandumbwetu cheji kutukafwanga tuzamise usepa wetu navakiko naYehova. Kaha nawa kusolwela vandumbwetu chisambo, nachisolola nge tuli nakulondezeza Yehova.

LIHENDENU KUMUCHIMA WAKUZANGA JIMBONGO

17. Mwomwo ika vavulukila chihande chajimbongo muSamu 15?

¹⁷ Tweji kutanganga ngwavo, mutu uze apwa ngeji yaYehova “keshi kulevanyisa jimbongo jenyi hasakuko, keshi kutambula maswekeza mangana ahane mulonga mutu wakuzeneka mulongako.” (Samu 15:5) Mwomwo ika vavuluka vyajimbongo musamu kaneyi? Mwomwo kachi nge natuhaka chikuma muchima kujimbongo, kaha chinahase kutulingisa twivwise vakwetu kumuchima kupihya nakwenyeka usoko wetu naKalunga. (Chimo. 1, 6:10) Kushikulu, vatu vamwe valilililenga hamitwe vandumbwavo vakuhutwa hakuvalevanyisa jimbongo hasaku. Vaka-kuyula vamwe nawa vetavililenga maswekeza nakuhana milonga vatu vaze vazenekelenga milonga. Yehova amona vilinga kana kupwa vyaunyengwe.—Ezeke. 22:12.

18. Vihula muka vinahase kutukafwa tulikekese tumone numba nge twatwama namuchima wakuzanga jimbongo nyi chiku? (WavaHepeleu 13:5)

 ¹⁸ Chapwa chamwaza kulikekesa etu vavene mangana tutachikize numba nge twatwama namuchima wakuzanga jimbongo chipwe chiku. Shikaho lihulisenu ngwenu: ‘Uno kakavulu ngweji kushinganyekanga hajimbongo nahavyuma vize ngunahase kulanda tahi? Nge ngunakongola jimbongo, uno ngweji kushimbulanga kujikindulwisa nakukukulula ngwami mutu uze nangukwongwesajo keshi nakusakiwa jimbongo kanako tahi? Uno kupwa najimbongo cheji kungulingisanga ngulivwe kupwa nguwamulemu, nakuhona kusolola muchima wakuhana tahi? Kutala vandumbwami vaze vali najimbongo ngwavamona ngwami vali namuchima wakufwila luheto tahi? Uno ngweji kutunganga usepa navaka-luheto kuhambakana vihutu tahi?’ Tuli nakutokwa chachinene chikuma chakupwa tuvangeji jaYehova. Tunahase kutwalaho lika kupwa tuvangeji jenyi hakulihenda kumuchima wakuzanga jimbongo. Nge natulinga ngocho, kaha Yehova keshi kukatusezako.—Tangenu WavaHepeleu 13:5.

YEHOVA AZANGA MASEPA JENYI

19. Mwomwo ika Yehova asaka tukavangizenga jindongi jize atuhana?

¹⁹ Mukanda waSamu 15 wakuma namazu ano akutushika ngwawo: “Weshowo eji kulinganga vyuma kanevi kaveshi kukamunyikisako.” (Samu 15:5) Hali ou mukanda, muka-kwimba jisamu asolola ovyo vyatela kutulingisa tukavangize vyuma vavuluka hasamu kaneyi. Yehova asaka tupwenga vakuwahilila. Shikaho, atuhana jindongi jize jeji kumulingisanga atukisule nakutukinga.—Isa. 48:17.

20. Uno vangeji jaYehova vatalilila vyuma muka?

²⁰ Shikaho, vangeji jaYehova vanahase kutalilila vyuma vyamwaza kulutwe. Vawavisa vakushishika navakapwa “[na]vihela vyakutwama vyavivulu” vize Yesu avawahishila mwilu. (Yowa. 14:2) Vaze vatwama nalutalililo lwakuyoyela hano hamavu, veji kutalililanga kutesamo chajishiko vavuluka hali Kusoloka 21:3. Chikupu vene, twapwa tuvakutokwa chikuma hakutusanyika kuli Yehova tupwenga tuvangeji mumbalaka yenyi haya myaka, kulumbununa kupwa tumasepa jenyi.