1. Isamu 15:1-5 dinateli kutukwashaña ñahi?

 MUCHIBAABA chinafumihu, twadizili netu ambuña aYehova adihana anateli kwikala enyi mwitenti dindi dachifwikija kuhitila mukwikala nawubwambu wakola chikupu nayena. Hanu dinu yumanyi yitwatela kwila hakwila twiikali naniwu wubwambu? Isamu 15 dahosha haniyi nsañu. (Tañenu Isamu 15:1-5.) Idi Isamu dashimuna yuma yalema yitwatela kwila hakwila tuswini kwakwihi naNzambi.

2. Chumanyi chatela chamuletesheli ñimbi yamasamu Davidi ateni itenti daYehova?

² Isamu 15 datachika namazu akwila nawu: “Eyi Yehova, hinyi wunateli kwikala mwenyi mwitenti deyi? Hinyi wunateli kushakama mumpidi yeyi yajila?” (Mas. 15:1) Hateneneñayi “itenti” daYehova, ñimbi yamasamu Davidi hadaha watoñojokeleña hatabanaka yadiña muGibeyoni hakapinji. Davidi wateneni cheñi ‘mpidi yajila’ yaNzambi, hadaha watalishileña kuZiyona yamuYerusalema. Kufuma kweniku nakushika kukabeta kakuchidiilu kaGibeyoni, hekala makilomita amavulu, nawa Davidi dikwalemeneniyi itenti mwatentekeliyi chimbañu chachitiyañenu kushika nimpinji yatuñiliwu tembeli.—2 Sam. 6:17.

3. Muloñadi wutwatela kutiyishishila nsañu yidi Mwisamu 15? (Talenu cheñi mwevulu.)

³ Hela chochu, aIsarela amavulu hiyayitejeli kukalakela hatabanakaku, nawa antesha hohu diwu eñilileña mwitenti mwahembeleleñawu chimbañu chachitiyañenu. Ilaña ambuña aYehova ashinshika ejima anateli kwikala mwitenti dindi dachifwikija neyi ekala amabwambu jindi nawa atwalekahu kwikala nawubwambu nayena. Dichuma chitwafwilaña wejima wetu. Isamu 15 dashimuna yilwilu yitwatela kwikala nayu hakwila tutwalekihu kwikala amabwambu jaYehova.

 ENDENUÑA CHAKADI HAKUYINKELA MULOÑA NAWA ILENUÑA YUMA YALOÑA

4. Tuneluki ñahi netu kupapatishewa bayi neyi dichuma hohu chakeñañayi Yehova nindi twiliku? (Isaya 48:1)

⁴ HaIsamu 15:2, ibwambu daNzambi amulumbulula nawu “muntu wunakwenda chakadi hakumwinkela muloña, wunakwila yuma yaloña.” Izu dakwila nawu “wunakwenda” niizu dakwila nawu “wunakwila,” awa mazu ejima ayedi anakumwekesha chuma chinakutwalekahu kumwekana. Komana mwamweni tunateli kwenda ‘chakadi hakutwinkela muloña’? Eña. Hela chakwila kwosi muntu wawanina, Yehova wukutumona nindi ‘tunakwenda chakadi hakutwinkela muloña’ neyi tuzataña hakumina ñovu jetu kumwovwahila. Neyi tudihana kudi Nzambi nawa tupapatishewa, dikwila nawu tunatachiki kwendela hamu naNzambi. Anukenu nenu kunyima muntu hashikeneneña hohu kwikala mwenyi waYehova hamuloña wakwikala kaIsarelaku. Antu amakwawu amutambikileña, ilaña “[hiyamutambikileña] muchalala nimukuloñaku.” (Tañenu Isaya 48:1.) AIsarela ashinshika adizileña yuma yakeñeleñayi Yehova nawa ayovwahilileña. Munjila yoyimu, hakwila Nzambi atutiyeña kuwaha makonu, kudi yuma yayivulu yitwatela kwila kubadika hohu kupapatishewa nikudikunda nachipompelu chawakaKristu. Twatela kutwalekahu “kwila yuma yaloña.” Awa mazu atalisha mudihi?

5. Kumwovwahila Yehova muyuma yejima mwabombeladi?

⁵ Kwesekeja nachamonañayi Yehova, ‘kwenda chakadi hakutwinkela muloña’ ‘nikwila yuma yaloña,’ hichatalisha hohu mukuya Kwitala daWanta mpinji yejima nakupompaku. (1 Sam. 15:22) Twatela kufwilaña kumwovwahila Nzambi muyuma yejima yitwelaña muchihandilu chetu, nihampinji yitudi kwakankawetu. (Yish. 3:6; Mukwa. 12:13, 14) Chalema neyi tufwilaña kumwovwahila Yehova nimutuyuma twanyanya nankashi. Neyi twilaña mwenimu, tukumwekeshaña netu twamukeña chikupu, nawa chumichi chaleteshaña asweji kutukeña.—Yow. 14:23; 1 Yow. 5:3.

6. Kwesekeja naAHeberu 6:10-12, chumanyi chalema nankashi kubadika nyidimu yitwakalakeli nakashinshi kunyima?

⁶ Yehova wasakililaña nankashi hanyidimu yitwamukalakeleli kunyima. Hela chochu, nyidimu yitwakalakeli nakashinshi kunyima hidiyi hohu yinateli kutuletesha kutwalekahu kwikala enyi mwitenti daYehovaku. Chumichi achimwekesha hatooka haAHeberu 6:10-​12. (Tañenu.) Yehova havulamenaña nyidimu yayiwahi yitwamukalakeleli kunyimaku. Ilaña wakeñaña nindi tutwalekeñahu kudifukula namuchima wetu wejima “ndo-o nikunsa.” Wakekala Ibwambu detu haya nyaaka “neyi tubula kuzeya.”—Ñal. 6:9.

HOSHENUÑA CHALALA MUMUCHIMA WENU

7. Kuhosha chalala mumuchima wetu mwabombela yumanyi?

⁷ Muntu wunakukeña nindi ekali mwenyi mwitenti daYehova watela “[kuhoshaña] chalala mumuchima windi.” (Mas. 15:2) Ichi hichinatalishi hohu mukubula kutwambaku. Yehova wakeñaña nindi twikaleña ashinshika muyuma yejima yitwahoshaña niyitwelaña. (Heb. 13:18) Kwila mwenimu kwalema nankashi muloña, “Yehova wahela muntu watwambaña, ilaña Yena wadikunda chikupu namuntu woloka.”—Yish. 3:32.

8. Chilwilwinyi chitwatela kutondolwela?

⁸ Antu ‘ahoshaña chalala mumuchima wawu’ hiyatwambaña kwikala ovwahila hamesu awantu ilaña kumbadi anakufumpa nshimbi jaNzambiku. (Isa. 29:13) Atondolwelaña kutwamba. Muntu watwambaña nateli kutachika kutoñojoka nindi nshimbi jaYehova hijakwashanaña mpinji yejimaku. (Yak. 1:5-8) Nateli kudikaña naYehova munsañu yinamoniyi nindi yalema nankashi wanyi. Kuhiñahu neyi amona nindi mukudikaña kwindi himunafumi yuma yatamaku, wukuswejelaku kufumpa nshimbi jaNzambi, nawa kudifukula kwindi kukwikala kwawunfwikiji. (Mukwa. 8:11) Ilaña etu, tunakukeña kwikala ashinshika muyuma yejima.

9. Chumanyi chitunateli kudizila kuchuma cheliliyi Yesu hadimweniyi naNataneli katachi? (Talenu cheñi mwevulu.)

⁹ Kuchuma cheliliyi Yesu hadibulakeniyi naNataneli katachi, tunateli kudizilaku chichalemena kwikala namuchima washinshika. Chelili Fwilipi amuleti ibwambu dindi Nataneli kudi  Yesu, kudi chuma chalema chamwekeni. Hela chakwila Yesu wadiña kanda adimoneñahu dehi naNataneli, Yesu wahosheli nindi: “Talenu, ­kaIsarela walala wabula makudi.” (Yow. 1:47) Chakadi nikujina, Yesu welukili nindi atumbanji twindi amakwawu adiña ashinshika, ilaña wamweni nindi Nataneli wadiña washinshika nankashi. Nataneli wadiña wabula kuwanina neyi etu. Ilaña wadiña washinshika muyuma yejima, hadiña nfwikijiku. Yesu watiyili kuwaha hachumichi nawa wamuhamekeli Nataneli. Kwenoku kuwaha kutukutiya neyi chakwila Yesu atuleja muniyi njila!

10. Muloñadi wutwatela kutondolwela kuzatisha chatama chawaana chetu chakuhosha? (Yakoba 1:26)

¹⁰ Yuma yayivulu yakeñekaña yashimunawu Mwisamu 15 yahosha hachitwelaña nawakwetu. Isamu 15:3 yashimuna nawu mwenyi wudi mwitenti daYehova “hatwambilaña akwawu nedimi dindiku, hamwilaña ntuñi nindi katamaku, nawa hasawulaña amabwambu jindiku.” Kuzatisha nhoshelu yetu chatama muniyi njila, kukuyikatisha akwetu kunyichima nawa kukuletesha tubuli kushikilamu kwikala enyi mwitenti daYehova.—Tañenu Yakoba 1:26.

11. Kutwambila mukwenu kwatalisha mudihi, nawa chumanyi chayilañawu antu abulaña kubalumuka mumuchima atwambilaña akwawu?

¹¹ Ñimbi yamasamu wahosheli hadi muntu watwambilaña akwawu. Kutwambila mukwenu kwatalisha mudihi? Kakavulu, hikuhosha nsañu yakutwamba yinateli kutamisha ijina damukwenu. Akakutwambila akwawu abulaña kubalumuka mumuchima, ayifumishaña muchipompelu chawakaKristu.—Yere. 17:10.

12-13. Muyumanyi mutunateli kwikalila namuloña wakusawula amabwambu jetu chakadi kwiluka? (Talenu cheñi mwevulu.)

¹² Isamu 15:3 datwanukishaña cheñi nawu enyi jaYehova hiyelaña antuñi nawu katamaku nawa hiyasawulaña amabwambu jawuku. Tunateli kwila ñahi mwenimu?

¹³ Tunateli kusawula mukwetu chakadi kwiluka kuhitila mukutaandisha nsañu yakutwamba hadi yena. Chakutalilahu: (1) muhela naleki  kuzata mudimu wampinji yejima, (2) adisumbula analeki kuzatila haBeteli, hela (3) manakwetu naleki kukalakala hamu neyi mukulumpi indi kwiji nkoñi wakuzatila. Chikwikala chatama neyi tutachika kuleja antu netu awa amanakwetu niahela hadaha anakoñi chuma chatama chinaleteshi yuma yiikali muniyi njila. Kunateli kwikala yuma yitunabuli kwiluka yinaleteshi kwiikali iku kuhimpika. Kubombelahu, mwenyi mwitenti daYehova “hamwilaña ntuñi nindi katamaku, nawa hasawulaña amabwambu jindiku.”

LEMESHENUÑA ANTU AMUTIYAÑA YEHOVA WOMA

14. Lumbululenu enyi jaYehova chatondolwelañawu kudikunda “namuntu watama.”

¹⁴ Isamu 15:4 dahosha nawu ibwambu ­daYehova “wadikundaña namuntu watama wanyi.” Tunateli kwila ñahi mwenimu? Chineli hitwawaninaku, twashikilamu wanyi kwiluka neyi chakwila muntu watama hela nehi. Muloñadi? Hadaha tunateli kudikunda nankashi nawantu amu muloña wakwila twatiyañanaña nawu, ilaña amakwawu tunateli kuyihela muloña wakwila atuneñeshaña. Dichi, twatela hohu kuleka kudikunda nawantu amonañayi Yehova nindi ‘atama.’ (1 Kor. 5:11) Mudi awa antu mwabombela antu elaña yuma yatama abulaña kubalumuka mumuchima, abulaña kulemesha yuma yitwakuhwelela, hela afwilaña kukisañana ­wubwambu wetu naYehova.—Yish. 13:20.

15. Njilanyi yimu mutunateli kulemeshela “antu amutiyaña Yehova woma”?

¹⁵ Kafwampi, Isamu 15:4 datulejaña kulemesha “antu amutiyaña Yehova woma.” Dichi twakeñakeñaña njila jakumwekeshelamu luwi nikulemesha amabwambu jaYehova. (Rom. 12:10) Munjilanyi? Kwesekeja naIsamu 15:4, njila yimu yidi yakwila nawu mwenyi mwitenti daYehova “welaña mwashiikañayi, hela chakwila munakali ñahi.” Chakadi nikujina, kubula kushikija mutunashiiki kunateli kuneñesha akwetu. (Mat. 5:37) Chakutalilahu, Yehova wakeñaña enyi jindi kukakela kuchikaninu chawu chawulu. Watiyaña cheñi kuwaha neyi anvwali azataña nañovu kwila mwakanañawu kuyilila anyanawu. Chineli twamukeña Nzambi niakwetu antu, tukuzata hakumina ñovu jetu kwila mutwakanini.

16. Njilanyi yikwawu mutwalemeshelaña amabwambu jaYehova?

¹⁶ Njila yikwawu mutunateli kulemeshela amabwambu jaNzambi hikwikala nachisambu nimuchima wakuhana. (Rom. 12:13) Mpinji yitwazañalelaña hamu nawamanakwetu niahela yatukwashaña kukolesha wubwambu wetu nawena ninaYehova. Kubombelahu, neyi tumwekeshaña chisambu, tukumwimbujolaña Yehova.

BAYI MUSWEJA KUKEÑA MALIKU

17. Muloñadi nsañu yamali chayitenenawu Mwisamu 15?

¹⁷ Twatañaña netu mwenyi waYehova “hakongweshaña mali indi kulonda atambwilihu mali amakwawuku, nawa hatambulaña majika kanwa akufwisha nachu muntu wakadi muloñaku.” (Mas. 15:⁠5) Muloñadi mali chayitenenawu munidi isamu dadihi? Muloña neyi tumonaña mali munjila yatama tunateli kuneñesha akwetu nikuluwañesha wubwambu wetu naNzambi. (1 Tim. 6:10) Kunyima, antu amakwawu adiilileña mabula hamutu amanakwawu atuzweñi kuhitila mukutambwilahu mali amakwawu hamali ayikongwesheleñawu. Ansompeshi amakwawu niwena atambwileña majika kanwa kulonda afwishi namuloña antu akadi nyiloña. Yehova wahela yaaku yamuchidiwu.—Ezek. 22:12.

18. Malwihwinyi anateli kutukwasha kudishinshika etu aweni kutalisha hachitwamonaña mali? (AHeberu 13:5)

¹⁸ Chalema nankashi kudishinshika etu ­aweni kutalisha hachitwamonaña mali. Dihulenu  nenu: ‘Komana mpinji yejima natoñojokaña hamali niyuma yinatela kulandamu? Neyi nakongoli mali, nashintajalaña kuyifuntisha nakutoñojoka nami muntu wankongwesheli nakuyikeña wanyi? Komana kwikala namali kwanleteshaña kudimona kulema chakwila nakañanyaña kwikala namuchima wakuhana? Nasompeshaña amanakwetu niahela nami asweja kukeña maheta muloña hohu wakwila akweti mali? Komana nadikundaña nawantu aheta nakudiwula atuzweñi?’ Tukweti kukooleka kwabadika kwakwikala enyi jaYehova. Ilaña tunateli kutwalekahu kwikala enyi jindi neyi tutondolwelaña kusweja kukeña mali. Neyi twila mwenimu, Yehova hamba katushiyaku!—Tañenu AHeberu 13:5.

YEHOVA WAKEÑA AMABWAMBU JINDI

19. Muloñadi Yehova chakeñelañayi nindi twileña yuma yejima yashimunawu Mwisamu 15?

¹⁹ Isamu 15 dakunkulula nachikaninu ­chakwila nawu: “Muntu wejima welaña yumiyi wakanyinkeshewa wanyi.” (Mas. 15:5) Haniyi vasi ñimbi yamasamu walumbulula muloña waweni Yehova wakeñelañayi nindi twileña yuma yejima yashimunayi munidi Isamu. Yehova wakeñaña nindi tuzañalaleña. Dichi watwinkaña wunlomboli watukwashaña kwikala nachihandilu chachiwahi nawa akiñewa.—Isa. 48:17.

20. Enyi jaYehova atalilaña yumanyi?

²⁰ Enyi atiyañawu kuwaha kudi Yehova atalilaña kudiluñisha yuma yayiwahi kumbidi. Awayishewa ashinshika akayiteja kwiñila “[mumaluña] amavulu mwakushakama” ayiloñeshelawu kudi Yesu mwiwulu. (Yow. 14:2) Antu akweti kuchiñeja kwakushakama hamaseki atalilaña kushikijewa kwayikaninu yashimunawu haChimwekeshu 21:3. Mwamweni, wejima wetu twatiyaña netu atulemesha nankashi hakutambwila mutambi waYehova wawuwahi wakwikala amabwambu jindi, dikwila nawu kwikala enyi mwitenti dindi haya nyaaka!