1. Engtin nge Sâm 15:1-5-na chuan min ṭanpui theih?

 THUZIAK hmasaah khân, Pathian Jehova rawngbâwl tûra inpumpêkte chuan amah nêna mi mal inlaichînna nghet tak neiin, entîr nei a puan inah mikhual an ni thei tih kan hria a. A nih leh, a mikhualte ni thei tûrin eng nge kan tih ngai? Chumi chungchâng chu Sâm 15-nain tam tak a târ lang a. (Sâm 15:1-5 chhiar rawh.) Chu fakna hlaah chuan Pathian hnaih tlat tûra min ṭanpui thei zir tûr tam tak târ lan a ni.

2. Fakna hla phuahtu Davida chuan Jehova puan in tia a sawi khân, eng nge a ngaihtuah mai theih?

² Sâm 15-na chu: “LALPA, i puan inah chuan tu nge lo mikhual ang? I tlâng thianghlimah chuan tu nge lo awm ang?” tih zawhnaa ṭan a ni a. (Sâm 15:1) Fakna hla phuahtu Davida’n Jehova ‘puan in’ tia a sawi hian hun eng emawti chhûng Gibeon khuaa awm biak bûk chungchâng a ngaihtuah pawh a ni thei. Ani chuan Jerusalema Zion tlâng sawina ni thei Pathian ‘tlâng thianghlim’ chungchâng a sawi bawk. Chu hmun chu Gibeon khawpui chhim lam mêl tam taka hlaah a awm a, chutah chuan Davida’n thuthlung bâwm dahna puan in a sa a, biak in sak a nih hma loh, chu puan inah chuan thuthlung bâwm chu dah a ni.—2 Sam. 6:17.

3. Engvângin nge Sâm 15-na chu kan ngaihven ang? (Milem en bawk rawh.)

³ Israel mi a tam zâwk chuan biak bûka rawngbâwl theihna an nei lo va; mi tlêm tê chauh thuthlung bâwm dahna puan in chhûngah an lût thei a ni. Mahse, Jehova ṭhiana insiam a, a ṭhian ni rengtu a chhiahhlawh rinawm zawng zawngte chu entîr nei a puan inah mikhual an ni thei a. Kan vai hian a ṭhian  nih kan duh ṭheuh va. Sâm 15-na chuan Jehova ṭhian ni reng tûra kan tih ngaite leh kan neih chhoh ngai mize ṭhenkhat a târ lang a ni.

DIK TAKIN AWM LA, FEL TAKIN TI RAWH

4. Engtin nge Jehova chuan baptisma chang tûr chauhvin min phut lo tih kan hriat? (Isaia 48:1)

⁴ Sâm 15:2-na chuan Pathian ṭhian chu “dik taka awma, fel taka” titu angin a târ lang a. Chutiang chuan kan awm zawm zêl tûr a ni. Mahse, ‘dik takin’ kan awm tak tak thei ang em? Thei e. Mihring ṭha famkim lo ni mah ila, Jehova chuan theih tâwp chhuaha a thu kan âwih chuan ‘dik taka awm’ angin min thlîr ang. Pathian hnêna inpumpêka baptisma kan chan hian a ṭhian ni thei tûrin hma kan la ṭan chauh a ni a. Bible hun lai khân, mi chu Israel hnam a nih avâng maiin Pathian Jehova mikhual a ni nghâl thei lo tih chhinchhiah ang che. Mi ṭhenkhat chu a hnênah ṭawngṭai mah se, “thutakah” leh “felnaah” an awm lo va. (Isaia 48:1 chhiar rawh.) A nihna takah chuan Israel mi chuan Jehova thil phûtte a zir a, a zawm a ngai a ni. Chutiang bawkin, tûn laiah pawh Pathian Jehova nêna inṭhianna nghet tak nei tûr chuan baptisma chan a, kohhrana Kristian unaute nêna inkawmhona neih mai bâkah, ‘dik taka kan awm tlat’ a ngai a ni. Chu chu engtin nge kan tih theih?

5. Thil engkimah Jehova thu kan âwih tih awmzia chu eng nge ni?

⁵ Jehova mithmuha ‘dik taka awma, fel taka tihnaah’ chuan Kingdom Hall-a inkhâwm ziah aia tam a tel a. (1 Sam. 15:22) Mahni chauhva kan awm hunah pawh kan nun dân zawng zawngah Pathian thuawih kan tum tlat tûr a ni. (Thuf. 3:6; Thur. 12:13, 14) Thil pawimawh lo anga lang thil tê thamah pawh a thuawih tlat chu thil pawimawh tak a ni a. Chutianga tihna hmanga amah kan hmangaih tak zetzia kan lantîr chuan  ani pawhin min hmangaih lehzual ang.—Joh. 14:23; 1 Joh. 5:3.

6. Hebrai 6:10-12-a sawi angin, tûn hmaa rinawm taka kan thiltihte aiin eng nge pawimawh zâwk?

⁶ Jehova chuan tûn hmaa a tâna thil kan lo tihte chu a ngaihlu tak zet a. Chutih rualin, tûn hmaa rinawm taka thiltihte chu Jehova puan ina mikhual nih reng theih nân a tâwk lo. Chu chu Hebrai 6:10-12-ah chiang takin kan hmu thei a ni. (Chhiar rawh.) Pathian Jehova chuan tûn hmaa kan thiltih ṭhatte chu a theihnghilh lo va. Mahse, “a tâwp thlenga” thinlung zawng zawnga a rawngbâwl tûrin min duh a ni. Ani chuan “kan inthlahdah loh” chuan chatuana a ṭhian ni tûrin mal min sâwm ang.—Gal. 6:9.

I RILRUA AWM THUTAK SAWI RAWH

7. Kan rilrua awm thutak sawi tih awmzia chu eng nge ni?

⁷ Jehova puan ina mikhual nih duhtu chuan ‘a rilrua awm thutak’ a sawi tûr a ni. (Sâm 15:2) Chutah chuan dâwt sawi loh aia tam a tel a. Pathian Jehova chuan kan thusawiahte leh kan thiltih zawng zawngahte rinawm tlat tûrin min duh a ni. (Heb. 13:18) “Mi kawhmawh chu LALPA ngaihin tenawm an ni si a; mi ṭha famkim erawh chu a ṭhian” an nih avângin chu chu thil pawimawh tak a ni.—Thuf. 3:32.

8. Kan pumpelh ngai mizia chu eng nge ni?

⁸ An ‘rilrua awm thutak sawitute’ chuan mi hmuhah chauh ni lovin, mi hmuh lohvah pawh Pathian dân an zâwm tlat a. (Is. 29:13) Rinawm lo takin thil an ti ngai lo. Mahse, mi rinawm lo chuan Pathian dânte chu engtik lai pawhin a ṭha ber tih a ringhlel ṭhîn a. (Jak. 1:5-8) Ani chuan thil lian tham lo anga lang dinhmunahte Pathian thu a âwih lo thei a ni. A thuawih lohna sawhkhâwk chu a tawrh nghâl mai loh avângin Pathian dân bawhchhiat chu a pawisa lo telh telh a. Pathian rawngbâwlah inngai mah se, a biakna chu pawm a ni lo. (Thur. 8:11) Chuvângin, kawng engkimah rinawm taka thil tih kan duh a ni.

9. Isua’n Nathanaela a hmuh hmasak ber ṭum aṭangin eng nge kan zir theih? (Milem en bawk rawh.)

⁹ Rilrua awm dik taka sawi a pawimawhzia chu Isua’n Nathanaela a hmuh hmasak ber  ṭuma a thusawi aṭangin kan hre thei a. Philipa’n a ṭhian Nathanaela chu Isua hmu tûra a hruai lai khân, thil chhinchhiah tlâk tak a thleng a ni. Isua chuan Nathanaela chu hmu ngai lo mah se: “En teh u, Israel mi tak, ngamthlêmna rêng nei lo saw,” tiin a sawi a ni. (Joh. 1:47) Ani chuan a zirtîr dangte chu mi rinawm tak niin hre mah se, Nathanaela erawh chu mi rinawm lehzual niin a hmu a. Ani chu keimahni ang bawka ṭha famkim lo ni mah se, a nun dânah vervêkna a nei lova, thil engkimah a rinawm a ni. Chuvângin, Isua chuan Nathanaela chu a lâwm hle a, a fak a ni. Kan vai hian chutiang mi anga Isua min ngaih chu kan duh ṭheuh ngei ang!

10. Engvângin nge thusawi theihna thilpêk hman sualna chu kan pumpelh ang? (Jakoba 1:26)

¹⁰ Sâm 15-naa thu târ lan tam zâwk chu mi dangte kan cheibâwl dân nêna inkûngkaih a ni a. Sâm 15:3-na chuan Jehova puan ina mikhualte chu “a leia mi rêl ngai lova, a ṭhian chung pawha thil sual ti ngai lova, a vêngte hming pawh sawichhe ngai lo mi chu,” tiin a sawi a ni. Kan thusawi theihna hi mi dangte tina thei tûr zâwnga kan hman chuan, Pathian puan inah mikhual angin kan awm reng thei lo vang.—Jakoba 1:26 chhiar rawh.

11. Insawi chhiatna chu eng nge ni a, mi sawi chhiat hmangte chu an sim loh chuan an chungah eng nge thleng ang?

¹¹ Fakna hla phuahtu chuan a bîk takin insawi chhiatna chungchâng a târ lang a. Insawi chhiatna chu eng nge ni? Chu chu a tlângpui thuin, tu emaw hming tichhe tûr khawpa dik lo taka a chungchâng sawina hi a ni. Mi sawi chhiat hmangte chuan an thiltih chu an sim loh chuan Kristian kohhranah awm zawm phal an ni lo vang.—Jer. 17:10.

12-13. Eng dinhmunahte nge hriat lovin kan ṭhiante hming kan tihchhiat theih? (Milem en bawk rawh.)

¹² Sâm 15:3-nain Jehova mikhualte chuan an vêngte chungah thil ṭha lo engmah an ti lo va, an ṭhiante an tihmingchhe lo tih min hriat  nawntîr a. Engtin nge kan ṭhiante hming kan tihchhiat theih?

¹³ Tum rêng vâng ni lovin, chanchin dik lo thehdarhna hmangin tu emaw hming kan tichhe thei a. Entîr nân: (1) unaunu tu emaw chuan hunbi kima rawngbâwlna a chawlhsan a, (2) nupa tuak khatin Bethel-a rawngbâwlna an chawlhsan a, (3) unaupa pakhat chu kohhran upa emaw, kohhran rawngbâwltu emaw a ni tawh lo. Chutianga inthlâk danglamna a awm chhan chu thil dik lo an tih avânga ngaiin, mi dangte hnêna chûng kan ngaih dânte hrilh chu thil ṭha a ni ang em? Inthlâk danglam a nih chhan tam tak kan hriat loh a awm thei a. Chuvângin, Pathian Jehova puan ina mikhual chuan ‘a ṭhian chungah pawh thil sual a ti ngai lova, a vêngte hming pawh a sawichhe ngai lo’ a ni.

PATHIAN JEHOVA ṬIHTUTE CHU CHAWIMAWI RAWH

14. Jehova mikhualte chuan ‘hmuhsitawma awmte’ an hnâwl dân hrilhfiah rawh.

¹⁴ Sâm 15:4-ah chuan Jehova ṭhian chuan ‘mi sual tak chu a hmusit’ tih a sawi a. Engtin nge mi chu hmuhsitawm a ni tih kan sawi theih? Mihring ṭha famkim lo kan nih angin, mi tu emaw chu hmuhsitawm a nih leh nih loh hre tûrin kan tling tâwk lo a ni. Engvângin nge? Mi ṭhenkhat chu an miziate avângin kan ngainain kan ngaina lo thei a. Chuvângin, Jehova’n ‘hmuhsitawma’ a ngaihte chauh chu kan hnâwl tûr a ni. (1 Kor. 5:11) Chûng mite zîngah chuan thil sual tia inchhîr duh lotute, kan rinna leh thurin zah lotute leh, Pathian nêna kan inlaichînna tihchhiat tumtute an tel a ni.—Thuf. 13:20.

15. Eng kawngin nge ‘Jehova ṭihtute’ chu chawimawi an nih?

¹⁵ Kawng leh lamah chuan, Sâm 15:4-na chuan ‘Jehova ṭihtute erawh chu chawimawi’ tûrin min phût a. Chuvângin, Pathian ṭhiante chunga ngilneihna leh zahna lantîr dân kawngte kan zawng a ni. (Rom 12:10) Engtin nge? Kawng khatah chuan Sâm 15:4-na ṭanchhanin, Pathian puan ina mikhualte chuan “mahni tâna pawi tûr pawh chhechhama an tiam tawh chuan an tidanglam ngai lo.” Kan thutiamte bawhchhiatna chuan, mi dangte a tina thei a ni. (Mt. 5:37) Entîr nân, Pathian Jehova chuan a mikhualte chu an inneihna thutiam hlen tûrin a beisei a. Nu leh pate’n an fate chunga an thutiamte theih tâwp chhuaha an hlen hian a lâwm bawk. Pathian leh kan vêngte kan hmangaihna avângin, theih tâwp chhuaha kan thutiamte hlen tûrin kan tih theih apiang kan ti ang.

16. Jehova ṭhiante chawimawi dân kawng dang leh chu eng nge ni?

¹⁶ Pathian ṭhiante chawimawi dân kawng dang leh chu, khualchhâwn thiamna leh thil phalna lantîrna hmangin a ni a. (Rom 12:13) Inkhâwmnaahte leh rawngbâwlnaahte chauh ni lovin kan unaute nêna hun kan hmanho hian anmahni leh Jehova nên inṭhianna nghet tak kan nei thei a. Chu bâkah, khualchhâwn thiamna lantîrna hmangin Jehova kan entawn a ni.

TANGKA SUM NGAINATNA LAKAH FIHLIM RAWH

17. Engvângin nge Sâm 15-naah tangka sum chungchâng târ lan a nih?

¹⁷ Jehova mikhualte chuan ‘a pung ûm tûrin tangka an pûktîr ngai lova, a thiam zâwk thiam loh chantîrna tûrin thamna pawh an la ngai lo’ a ni. (Sâm 15:5) Engvângin nge fakna hla phuahtu chuan tangka sum chungchâng a târ lan? Tangka sum chungchânga thlîr dân inbûk tâwk neih lohna chuan mi dangte nêna kan inlaichînna leh Pathian nêna kan inlaichînna a tihchhiat theih vâng a ni. (1 Tim.  6:10) Bible hun laia mi ṭhenkhat chuan an unau rethei zâwkte chu a pung tam tak laa sum pûktîrin an hmang ṭangkai a. Rorêltu ṭhenkhat chuan thamna lain a thiam zâwkte chu thiam loh chantîrin dik lo takin ro an rêl bawk. Chutiang thiltihte chu Jehova ten zâwng tak a ni.—Ezek. 22:12.

18. Eng zawhnate’n nge sum chungchânga kan thlîr dân inenfiah tûra min ṭanpui thei? (Hebrai 13:5)

¹⁸ Sum leh pai chungchânga kan thlîr dân inenfiah chu thil ṭha tak a ni a. Heti hian kan inzâwt thei a ni: ‘Sum leh pai chauh ka ngaihtuahin, ka sum neihin a lei theihte chu ka ngaihtuah reng ṭhîn em? Sum ka pûk a nih chuan, min pûktîrtu chuan a mamawh lo tiin rulh leh ka harsat em? Sum leh pai neihna chuan mi pawimawh tak nia inngaihna min neihtîrin, mi uikawm tak min nihtîr em? Sum leh pai an ngah avâng maiin ka unaute chu hausakna âtchilhtute angin ka thlîr em? Mi hausate chauh ṭhiana siamin, mi retheite chu kan ngaihsak meuh lo vem?’ tiin. Pathian mikhualte ni tûrin chawimawina ropui tak kan dawng a. Kan nunah tangka sum ngainatna laka fihlîmin, chu chanvo hlu chu kan vênghim thei a ni. Chutianga kan tih chuan Pathian Jehova’n min thlahthlam ngai lo vang!—Hebrai 13:5 chhiar rawh.

JEHOVA CHUAN A ṬHIANTE A HMANGAIH

19. Engvângin nge Jehova’n Sâm 15-naa târ lan zawng zawngte chu zâwm tûra min duh?

¹⁹ Sâm 15-na chu he thutiam hian tihtâwp a ni: “Chûng thil titu chu engtikah mah a nghîng lo vang,” tiin. (Sâm 15:5) Hetah hian Fakna hla phuahtu chuan Pathianin ti tûra min duh zawng zawngte chu a târ lang a. Jehova chuan hlim tûrin min duh a ni. Chuvângin, kaihhruaina min pêkte kan zawm chuan a malsâwmna leh a vênhimna kan dawng ang.—Is. 48:17.

20. Jehova mikhualte chuan eng nge an beisei theih?

²⁰ Jehova mikhualte chuan hma lam hun hlimawm tak an nei a. Hriak thih rinawmte chuan vânah Isua buatsaih “awmna tam tak” an nei ang. (Joh. 14:2) Lei lam beiseina neite chuan Thu Puan 21:3-a thutiamte chu an nghâkhlel hle a ni. Jehova’n a ṭhiante ni tûr leh entîr nei a puan ina chatuana mikhual ni tûra kan vaia min sâwm chu chawimawina ropui tak a va ni chiang êm!