1. ¿Tzeʼn jaku tzʼonin Salmo 15:1 a 5 qiʼj?

 TOJ xnaqʼtzbʼil o kyaj, el qnikʼ tiʼj qa in tzaj tqʼoʼn Jehová txokbʼil kyiʼj tmajen tuʼn kyten toj tja aj kyok te tamiw. Pero ¿tiʼ jaku bʼant quʼn tuʼn tten jun tbʼanel qamiwbʼil tukʼil? In nonin Salmo capítulo 15 qiʼj tuʼn tkanet tzaqʼwebʼil quʼn, tuʼnju ateʼkux tbʼanel xnaqʼtzbʼil toj aʼyeju jaku che onin qiʼj tuʼn qok laqʼeʼ mas ttxlaj Dios (kjawil uʼjit Salmo 15:​1-5).

2. ¿Alqiʼjtoq in ximen David tej tyolin tiʼj tja Jehová?

² In xi tzyet Salmo capítulo 15 kyukʼil yol lu: «Nman Dios: ¿Alkye jaku najan tuj tjaya? ¿Alkye jaku najan twi witz xjan aju etzan tuʼna?» (Sal. 15.1). Tej tyolin rey David tiʼj tja Jehová, atzlo ximen tiʼj tabernáculo kubʼ qoʼn toj jun ambʼil toj tnam Gabaón. Ax ikx yolin tiʼj jun «witz xjan» ex atzlo yolin tiʼj witz Sion aju ten toj tnam Jerusalén. Atztoq taʼ Sion toj sur te Gabaón ex ax toj Sion kubʼ tqʼoʼn David jun ja xbʼalun tuʼn tkubʼ ten kax kʼubʼl tley Qman Jehová tzmaxi tej tkubʼ bʼinchaʼn jun lugar mas tbʼanel (2 Sam. 6:17).

3. ¿Tiquʼn il tiʼj tuʼn qxnaqʼtzan tiʼj Salmo 15? (Ax ikx qʼonka twitza tiʼj tilbʼilal).

³ Nya kykyaqil aj Israel jakutoq che ajbʼen toj tabernáculo ex nya kykyaqil jakutoq che okx jatumel tkubʼ kax kʼubʼl ley. Pero kykyaqil tmajen Jehová jakutoq che ten toj tja aju in nok te jun techel aj tten jun tbʼanel kyamiwbʼil tukʼil. Ex atzun jlu qaj qkyaqilx. Toj Salmo 15 in tzaj tqʼamaʼn Jehová junjun qmod il tiʼj tuʼn tten tuʼntzun kukx qok te tamiw.

 QO BʼET TOJ TUMEL EX QBʼINCHAM AJU BʼAʼN

4. ¿Tiquʼn in xi qqʼamaʼn qa nya oʼkx tuʼn qbautisarin tuʼn ttzalaj Dios qiʼj? (Isaías 48:1).

⁴ In tzaj tqʼamaʼn Salmo 15:2 jlu tiʼj xjal in nok te tamiw Dios: «In bʼet tuj tumelxix ex in tbʼinchaʼn aju tzʼaqlxix». Aju txol yol «in bʼet» ex aju txol yol «in tbʼinchaʼn» in tzaj tyekʼin qa kukx il tiʼj tuʼn tbʼant quʼn. ¿Pero jakupe qo «bʼet tuj tumelxix»? Jaku. Maske aj il qoʼ, jaku qo bʼet toj tumelxix qa ma tzʼok tilil quʼn tuʼn qnimen te. In xi tzyet tuʼn qbʼet toj tumelxix aj t-xi qtziyen te Dios tuʼn qajbʼen te ex aj qbautisarin. Qa ma qo ximen tiʼj, toj ambʼil ojtxe nya tuʼnju aj Israel jun xjal jakutoq ten toj tja Jehová. Maske ateʼ junjun tzaj kynaʼn tbʼi, pero nya ax tok kyuʼn ex mintiʼ e ten tzʼaqli twitz (kjawil uʼjit Isaías 48:1). Aqeju aj Israel axix tok kyaj tuʼn kyajbʼen te Jehová, iltoq tiʼj tuʼn tel kynikʼ kyiʼj tkawbʼil ex tuʼn tjapun twiʼ kyuʼn. Axtzun jlu in bʼaj toj ambʼil jaʼlo, nya oʼkx tuʼn qbautisarin ex tuʼn qoktz toj ttnam Jehová tuʼn ttzalaj qiʼj. Sino il tiʼj tuʼn tok tilil quʼn tuʼn t-xi qbʼinchaʼn aju bʼaʼn. ¿Tiʼtzun t-xilen jlu?

5. ¿Tiʼ t-xilen toj twitz Jehová tuʼn qbʼet toj tumelxix ex tuʼn tkubʼ qbʼinchaʼn aju bʼaʼn?

⁵ Toj twitz Jehová «aju xjal in bʼet tuj tumelxix ex in tbʼinchaʼn aju tzʼaqlxix», nya oʼkx il tiʼj tuʼn t-xiʼ kyoj chmabʼil (1 Sam. 15:22). Sino kykyaqil okslal il tiʼj tuʼn tok tilil kyuʼn tuʼn t-xi kynimen tkyaqil tkawbʼil Dios maske kyjunalx ateʼ (Prov. 3:6; Ecl. 12:​13, 14). Tuʼntzunju nim toklen tuʼn t-xi qnimen tkyaqil tkawbʼil Dios maske nyaxix nim kyoklen toj qwitz. Qa ma bʼant jlu quʼn, ok kbʼel qyekʼin qa kʼujlaʼn quʼn ex qo okel kʼujlaʼn tuʼn (Juan 14:23; 1 Juan 5:3).

6. Ik tzeʼn in tzaj tqʼamaʼn Hebreos 6:10 a 12, ¿oʼkxpe in nok tqʼoʼn Jehová twitz tiʼjju o bʼant quʼn ojtxe?

 ⁶ Nimxix toklen toj twitz Jehová aju o bʼant quʼn toj qajbʼebʼil te. Pero nya tuʼnju o qo ten tzʼaqli twitz toj ambʼil ojtxe kukx qo tel toj tja ik tzeʼn in tzaj tqʼamaʼn Hebreos 6:10 a 12 (kjawil uʼjit). Maske mintiʼ in nikʼ tnaʼl tuʼn Jehová tkyaqilju o bʼant quʼn toj qajbʼebʼil te, taj tuʼn «kukx tuʼn tok tilil» quʼn. «Qa mintiʼ ma qo kubʼ numj», qo okel te tamiw te jumajx (Gál. 6:9).

QO YOLIN AXIX TOK TUʼN TKYAQIL QANMI

7. ¿Tiʼ t-xilen tuʼn qyolin axix tok tuʼn tkyaqil qanmi?

⁷ In tzaj tyekʼin Salmo 15:2 qa oʼkx in xi tqʼoʼn Jehová txokbʼil kyiʼj qeju in che yolin axix tok tuʼn tkyaqil kyanmi. Nya oʼkx in yolin jlu tiʼj tuʼn miʼn t-xi qqʼamaʼn nya ax tok yol, sino ax ikx in yolin tiʼj tkyaqilju in bʼant quʼn ex tiʼj tkyaqilju in xi qqʼamaʼn (Heb. 13:18). Nim toklen jlu tuʼnju «ikʼun tuʼn Qman qe xjal bʼinchal mya bʼaʼn; atzun qeju in kybʼinchaʼn tzʼaqlxix, at tmojbʼabʼl tibʼ kyukʼil» (Prov. 3:32).

8. ¿Alkye mod mintiʼ tuʼn tel qkanoʼn?

⁸ Aju xjal in yolin tiʼj «axix tok tuʼn tkyaqil tanmi», nya oʼkx in nimen te Dios qa at kyukʼil txqantl, ex aj tten tjunalx in kubʼ tbʼinchaʼn nya bʼaʼn (Is. 29:13). Nya bʼaʼn qa ma bʼant jlu quʼn. ¿Tiquʼn in che kubʼ tzʼaq junjun toj tramp lu? Atlo maj tuʼnju mintiʼ in nok qeʼxix kykʼuʼj tiʼj junjun tkawbʼil Jehová (Sant. 1:​5-8). Tuʼntzunju, qa at junjun tkawbʼil Jehová nyaxix nim toklen toj kywitz mintiʼ in xi kynimen. Ex qatzun mintiʼ jun nya bʼaʼn saj kyiʼj tuʼn, in kubʼ kybʼinchaʼn junjuntl tiʼ mas nya bʼaʼn. In kubʼ kyximen qa in bʼant tajbʼil Jehová kyuʼn, pero mintiʼ in xi tkʼamoʼn Jehová kykʼulbʼil (Ecl. 8:11). Atzun qe, qaj tuʼn tkubʼ qbʼinchaʼn bʼaʼn toj tkyaqil ambʼil.

9. ¿Tiʼ xnaqʼtzbʼil jaku tzʼel qiʼn tiʼjju bʼaj tej tok tojtzqiʼn Jesús Natanael? (Ax ikx qʼonka twitza tiʼj tilbʼilal).

⁹ Aju bʼaj tej tok tojtzqiʼn Jesús Natanael in tzaj tyekʼin qa nim toklen tuʼn  miʼn qsbʼun. Tej t-xi tiʼn Felipe Natanael tuʼn tok ojtzqiʼn tuʼn Jesús, bʼaj jun tiʼ nim toklen. Bʼajxtoq tzʼok tojtzqiʼn Jesús Natanael, pero tqʼama jlu tiʼj: «Lu jun aj Israel lu, axix tok mibʼan sbʼun» (Juan 1:47). Ojtzqiʼntoq tuʼn Jesús qa mintiʼ in che sbʼuʼn qe txqantl t-xnaqʼtzbʼen, pero mas te Natanael. Maske aj iltoq te Natanael ik tzeʼn qe, ok tilil tuʼn tuʼn miʼn tsbʼuʼn. Tbʼanel ela jlu toj twitz Jesús ex tuʼntzunju tqʼama tbʼanel yol tiʼj. Ax ikx qe qaj tuʼn ttzaj tqʼamaʼn Jesús qe tbʼanel yol lu qiʼj.

10. ¿Tiquʼn nim toklen tuʼn tok qxqʼuqin qtziʼ? (Santiago 1:26).

¹⁰ Chʼixmi tkyaqilju in tzaj qʼamaʼn toj Salmo 15 at toklen tukʼil qmod tuʼn tten kyukʼil txqantl. In tzaj tqʼamaʼn Salmo 15:3 qa oʼkx in xi tkʼamoʼn Jehová «aju [xjal] mintiʼ in yolin mya bʼaʼn tiʼj juntl; aju mintiʼ in tbʼinchaʼn mya bʼaʼn tiʼj tamiw, ex mintiʼ in xoʼn yol tiʼj tvesin». Qa mintiʼ sok qxqʼuqin qtziʼ, jaku tzʼok qbʼinchaʼn nim nya bʼaʼn kyiʼj txqantl ex ya mlay qo tentl toj tja Jehová (kjawil uʼjit Santiago 1:26).

11. Qa mintiʼ sajtz tiʼj tanmi jun xjal in yolin nya bʼaʼn kyiʼj txqantl, ¿tiʼ jaku bʼaj tiʼj?

¹¹ Yolin salmista kyiʼj qeju in che yolin nya bʼaʼn kyiʼj txqantl. In nok kybʼinchaʼn nya bʼaʼn kyiʼj aj t-xi kyqʼamaʼn nya ax tok yol kyiʼj. Ex qa mintiʼ ma tzʼajtz tiʼj kyanmi, in che ex qʼiʼn toj congregación (Jer. 17:10).

12, 13. ¿Toj alkye ambʼil jaku qo yolin nya bʼaʼn kyiʼj qamiw? (Ax ikx qʼonka twitza tiʼj tilbʼilal).

¹² Ax ikx in tzaj tnaʼn Salmo 15:3 qe qa aju in ten toj tja Jehová «mintiʼ in tbʼinchaʼn mya bʼaʼn tiʼj tamiw, ex mintiʼ in xoʼn yol tiʼj tvesin». Pero, ¿tiʼ t-xilen txol yol «mintiʼ in tbʼinchaʼn mya bʼaʼn tiʼj tamiw»?

¹³ Atlo maj jaku txi qqʼamaʼn jun tiʼ nya toj tumel tiʼj juntl. Ik tzeʼn qa ya mintiʼ in  najbʼen jun ermana toj tkyaqil ambʼil, qa o tzʼetz jun mejebʼleʼn toj Betel, ex qa ma tzʼetz qʼamaʼn qa ya nya ansyan jun ermano moqa ya nya onil kye ansyan. Tuʼnju mintiʼ ojtzqiʼn tkyaqil tqanil quʼn, nyalo bʼaʼn tuʼn qok ten qʼamalte kye txqantl qa ma bʼaj jlu kyiʼj tuʼnju o kubʼ kybʼinchaʼn jun nya bʼaʼn. Ex bʼaʼn tuʼn ttzaj qnaʼn qa aju xjal in ten toj tja Jehová «mintiʼ in tbʼinchaʼn mya bʼaʼn tiʼj tamiw, ex mintiʼ in xoʼn yol tiʼj tvesin».

QQʼONK KYOKLEN QEJU IN CHE NIMEN TE JEHOVÁ

14. ¿Alkyeqe xjal in che el tikʼun Dios ex il tiʼj tuʼn kyel qikʼun?

¹⁴ In tzaj tqʼamaʼn Salmo 15:4 qa aju tamiw Jehová «ikʼun tuʼn aju xjal ikʼun tuʼn Dios». Qa oʼkx ma qo ximen qiʼjx, mlay tzʼel qnikʼ tiʼj alkye jun xjal ikʼun tuʼn Dios. ¿Tiquʼn? Tuʼnju aj il qoʼ. At maj oʼkx junjun xjal bʼaʼn in nela kymod toj qwitz, atzun junjuntl nya bʼaʼn. Tuʼntzunju, nim toklen tuʼn tten qximbʼetz ik tzeʼn te Jehová ex tuʼn kyel qikʼun oʼkx qeju in che el tikʼun (1 Cor. 5:11). Kyxol qe xjal lu ateʼ qeju in kubʼ kybʼinchaʼn il ex mintiʼ in najtz tiʼj kyanmi, qeju mintiʼ in che respetarin tiʼj qokslabʼil ex qeju kyaj tuʼn tnaj qamiwbʼil tukʼil Jehová (Prov. 13:20).

15. ¿Alkye jun tumel jaku tzʼok qqʼoʼn kyoklen qeju in che nimen te Jehová?

¹⁵ Ax ikx in tzaj tqʼamaʼn Salmo 15:4 qa il tiʼj tuʼn tok qqʼoʼn kyoklen «qeju in che niman te Qman» Jehová. Tuʼntzunju, in nok tilil quʼn tuʼn t-xi qyekʼin tbʼanel qmod ex tuʼn tok qqʼoʼn kyoklen qeju tamiw Dios (Rom. 12:10). ¿Alkye jun tumel jaku bʼant jlu quʼn? In tzaj tqʼamaʼn Salmo 15:4 qa aju xjal in ten toj tja Jehová «in japun tuʼn aju trat otoq txi ttziyan maske mya bʼaʼn ma tzʼela». Jaku tzʼok qbʼinchaʼn jun nya bʼaʼn kyiʼj txqantl qa mintiʼ xjapun jun qyol otoq txi qtziyen (Mat. 5:37). Ik tzeʼn qeju o che kubʼ mojeʼ, taj Jehová tuʼn tjapun twiʼ kyyol o txi kytziyen. Ax ikx taj tuʼn tjapun twiʼ kyyol mambʼaj in xi kytziyen kye kykʼwal. In nok tilil quʼn tuʼn tjapun twiʼ qyol in xi qtziyen tuʼnju kʼujlaʼn Dios quʼn ex qe txqantl.

16. ¿Alkye juntl tumel in nok qqʼoʼn kyoklen tamiw Dios?

¹⁶ Juntl tumel tuʼn tok qqʼoʼn kyoklen tamiw Dios aju aj qonin kyiʼj ex aj tten tbʼanel qmod kyukʼil (Rom. 12:13). Ik tzeʼn aj t-xi qqʼoʼn txokbʼil kyiʼj aj qtzalaj jun rat. In nonin jlu tuʼn tchʼiy qamiwbʼil kyukʼil ex tukʼil Jehová. Aj tbʼant jlu quʼn, in nel qkanoʼn tbʼanel tmod.

MIʼN TZʼOK QKʼUJLAʼN PWAQ

17. ¿Tiquʼn in yolin Salmo tiʼj pwaq toj capítulo 15?

¹⁷ In tzaj tqʼamaʼn Salmo 15:5 qa aju xjal in ten toj tja Jehová «in xi tqʼoʼn tpwaq te kychʼex xjal ex mintiʼ in tqanin taʼl, ex [ . . . ] mintiʼ in tkʼmoʼn pwaq in tzaj oyin te tuʼn tkubʼ t-sentens jun xjal mintiʼ til». ¿Tiquʼn in yolin Salmo tiʼj pwaq toj capítulo lu? Tuʼnju kwest tuʼn tten qximbʼetz toj tumel tiʼj pwaq ex jun rat jaku tzʼok qkʼujlaʼn. Qa ma bʼaj jlu qiʼj, jaku tzʼok qbʼinchaʼn nya bʼaʼn kyiʼj txqantl ex jaku naj qamiwbʼil tukʼil Jehová (1 Tim. 6:10). Toj ambʼil ojtxe ateʼ junjun ok tilil kyuʼn tuʼn tel kyiʼn tal pwaq xi kyqʼoʼn te kychʼex erman mintiʼxix kypwaq. Ax ikx e ten jwes kubʼ kyqʼoʼn kysentens xjal mintiʼ kyil noq tuʼn pwaq xi qʼoʼn kye. Nya bʼaʼn in nel tkyaqil jlu toj twitz Jehová (Ezeq. 22:12).

18. ¿Alkyeqe xjel bʼaʼn tuʼn qximen kyiʼj? (Hebreos 13:5).

 ¹⁸ Bʼaʼn tuʼn qximen tiʼj tiʼ qximbʼetz at tiʼj pwaq. Qo ximen kyiʼj xjel lu: «¿Toj tkyaqil ambʼil in chin ximane tiʼj pwaq ex tiʼjju waje tuʼn ttzaj nlaqʼoʼne? Qa at jun in tzaj tqʼoʼn nchʼexe, ¿jun ratpe in xi nchjoʼne moqa in kubʼ nximane qa mintiʼ tajbʼen te? ¿In kubʼpe nximane qa at nim woklene noq tuʼnju at npwaqe? ¿Jun ratpe in chin onine kyiʼj txqantl moqa kwest? ¿In kubʼpe nximane qa aʼyeju erman at kypwaq mas kʼujlaʼn pwaq kyuʼn twitz Jehová? ¿Maspe ngane tuʼn tok wamiwen wibʼe kyukʼil qeju at kypwaq ex nya kyukʼil qeju mintiʼxix at kye?». Nimxix toklen tuʼn qximen kyiʼj xjel lu tuʼnju o tzaj qʼoʼn tbʼanelxix qoklen tuʼn qok te tamiw Jehová. Qa ma tzʼok tilil quʼn tuʼn miʼn tok qkʼujlaʼn pwaq, mlayx qo kyaj ttzaqpiʼn Jehová (kjawil uʼjit Hebreos 13:5).

IN CHE OK TKʼUJLAʼN JEHOVÁ QE TAMIW

19. ¿Tiquʼn tajbʼil Jehová tuʼn tkubʼ qbʼinchaʼn tkyaqilju in tzaj qʼamaʼn toj Salmo 15?

¹⁹ In kubʼaj Salmo 15:5 kyukʼil yol lu: «Aju xjal in bʼant tkyaqil jlu tuʼn tuj tumel, mlayx kubʼ tzʼaq». Kyukʼil yol lu in tzaj tqʼamaʼn salmista qa taj Jehová tuʼn kyjapun qe kawbʼil ma qo yolin tiʼj tuʼnju taj tuʼn qtzalaj. Qa ma kubʼ qbʼinchaʼn aju in tzaj tqʼamaʼn Dios qe, mas tbʼanel ktel qanqʼibʼil ex qo okel t-xqʼuqin (Is. 48:17).

20. ¿Tiʼ kʼiwlabʼil tzul qʼoʼn kye tamiw Jehová?

²⁰ Puro tbʼanel che tel qeju ateʼ toj tja Jehová qa kukx ma che ten tzʼaqli twitz. Che anqʼil qeju skʼoʼn maj toj kyaʼj jatumel o kubʼ tbʼinchaʼn Jesús jun lugar kye (Juan 14:2). Atzun qe txqantl okslal che anqʼil tzalu twitz Txʼotxʼ ex tzul kykʼamoʼn qe kʼiwlabʼil in tzaj qʼamaʼn toj Apocalipsis 21:3. Tbʼanelxix qoklen o tzaj tqʼoʼn Jehová tuʼnju jaku qo ok te tamiw te jumajx.