CILONGESA 24
MWASO 24 Ijeni ku Munkinda wa Yehova
Twaleleleniho Kupwa Bangenzi mu Tenti ya Yehova.
“Obe Yehova, iya asa kupwa mungenzi mu tenti yobe?”—SAMU 15:1.
BILI MUNO MU CILONGESA
Tulilongesa bitunapande kulinga mangana tutwaleleleho kupwa babusamba ba Yehova, nomwo mwatondela ngwendi tulinge babusamba bendi.
1. Kusimutwiya ha mukanda wa Samu capita 15:1-5 kutukwasa bati?
MU CILONGESA cinahu, twalilongesele ngwetu baje balikundika kuli Yehova na kukanyamesa busamba bwabo nendi, basa kupwa bangenzi mu tenti yendi ya cifwisa, oloni bika bitunapande kulinga mangana tupwe bangenzi bendi? Mukanda wa Bisamu 15 unatuleke bya kulinga. (Tandeni Samu 15:1-5.) Ei Samu ituleka bitunapande kulinga mangana tupwe babusamba ba Njambi.
2. Byuma muka hamo byakele na kusinganyeka Devidi mwakele na kwendeka bya tenti ya Yehova?
2 Mukanda wa Samu 15 washangumuka na majwi a kwendeka ngwawo “Obe Yehova, iya asa kupwa mungenzi mu tenti yobe? Iya asa kukala ha munkinda wobe wa kujela?” (Samu 15:1) Devidi mwakele na kwendeka bya tenti hamo wasinganyekele bya tabanakele ije yakele mu Ngimbiyone ha simbu ije. Devidi wendekele lalo bya “munkinda wa kujela,” hamo kulumbununa Siyone ije yakele mu Jelusalema. Munkinda wa Siyone wakele nunda yaindondo lika kuya mbwela ya nganda ya Ngimbiyone, kukekwo kwashimbikile tenti Devidi na kwakamo cikasha ca cikumiiyo simbu kanda batunge tempele ya Yehova.—2 Samwe 6:17.
3. Mwafwa bika tunapande kuzibisisa mukanda wa Samu capita 15? (Taleni na cikupulo.)
3 Bwingi bwa baIsalele kubabatabesele kupangela ku tabanakele, co babandondo lika basele kukobela mu tenti muje mwakele cikasha ca cikumiiyo. Oloni bangamba ba Yehova ba kulongwa boshe basele kupwa bangenzi mu tenti yendi ya cifwisa ha kutwalelelaho kulikuta nendi busamba. Ebi bikebyo bitushaka tubaboshe. Ku mukanda wa Samu capita 15, banendeka bifwa bitunapande kukala nabyo nga tushaka kutwalelelaho kupwa babusamba ba Yehova.
BaIsalele baje bayoyele mu simbu yayoyele Mwene Devidi kwabapwililile kwakwasi kusinganyeka bikwalumbunwine kupwa bangenzi mu tenti ya Yehova (Taleni paragirafu 3)
ENDENI MU KULONGWA NA KULINGA BYABIBWA SIMBU YOSHE
4. Tuzibuka bati ngwetu cimbwitiko keti cikeco lika cuma catonda Yehova kuli yetu? (Isaya 48:1)
4 Ku mukanda wa Samu 15:2, kabusamba ka Njambi banamutumbula ngwabo napu munu “uje enda mu kulongwa, Uje alinga byabibwa simbu yoshe” lijwi lya ‘kwenda’ na lya ‘kulinga’ limwesa byuma bitunapande kutwalelelaho kulinga. Kuma twasa ‘kwenda mu kulongwa’ ndi? Eyo. Nameme kutwalumbunukile, nga tweseka mwoshe mutwasela kwononoka Yehova atumona ngwendi tuli na ‘kwenda mu kulongwa.’ Nga tulikundika kuli Yehova na kutumbwitika, co tushangumuka bungenzi bwetu bwa kwenda na Yehova. Anukeni ngweni nameme mu simbu ibasonekele Mbimbiliya, kupwa lika kaIsalele kukwasele kulingisa munu apwe mungenzi wa Yehova. Nameme bamo bakele na kumulemesa, oloni ‘kubalingile ngoco mu busunga na mu kusungama.’ (Tandeni Isaya 48:1.) BaIsalele basele kumwesa ngwabo batondele kupwa bangenzi ba Yehova ha kwononoka mashiko endi na kuwakabangeya. Mu ngila imolika, nga tushaka kukala na busamba bwa kukanyama na Yehova, kuli byuma bikwabo bitunapande kulinga keti lika kutumbwitika nambe kupwa umo wa Bakaleho ba Yehova. Tunapande kutwalelelaho ‘kulinga byabibwa simbu yoshe.’ Twasa kulinga bati ngoco?
5. Kwononoka Yehova mu byuma byoshe kulumbununa bika?
5 Byabingi byalibungila mu ‘kwenda mu kulongwa’ na ‘kulinga byabibwa simbu yoshe’ keti lika kuya ku biwano ku Njibo ya Bumwene. (1 Samwe 15:22) Tunapande kwononoka Njambi mu byuma byoshe bitulinga nameme nga tuli likalyetu. (Prov 3:6; Ekele 12:13, 14) Co lalo tunapande kulifwita kwononoka Yehova nameme mu byuma byabindondo. Nga tulinga ngoco, tumwesa ngwetu twamuzema manene, co oku kulingisa nendi atuzeme manene.—Iwano 14:23; 1 Iwano 5:3.
6. Kwesekesa na mukanda wa Bahebelu 6:10-12, byuma muka bya seho bitunapande kulinga bije bitubakana kulongwa kwetu kwa kunima?
6 Yehova akakandelela manene ku bipangi bitwamulingilile kunima. Oloni kutwasa kutwalelelaho kupwa bangenzi mu tenti yendi mwafwa lika ya bilinga byabibwa bitwalingile kunima. Mukemwo muumwesela na mukanda wa Bahebelu 6:10-12 (Tandeni.) Yehova kesi kwibala byuma byabibwa bitwalingile kunima, oloni atonda ngwendi tutwaleleleho kumupangela na mbunge yetu yoshe “kweta na kushongo.” atwalelelaho kupwa kabusamba ketu “nga kutujuka.”—Gala 6:9.
ENDEKENI BUSUNGA MU MBUNGE YENI
7. Kwendeka busunga mu mbunge yetu, kulumbununa bika?
7 Munu uje ashaka kupwa mungenzi mu tenti ya Yehova napande “kwendeka busunga mu mbunge yendi.” (Samu 15:2) Oku kukulumbununa kujeneka kwendeka lika makuli. Yehova ashaka ngwendi tupwe baka-busunga mu byuma byoshe bitulinga na kwendeka. (Hebe 13:18) Kulinga ngoco kunapu kwa seho, mwafwa “Yehova wazinda muka-kukwisa, Oloni akalikutu busamba bwa kukanyama na banu ba kusungama.”—Prov 3:32.
8. Byuma muka kutwapandele kulinga?
8 Baje ‘bakendeka busunga mu mbunge yabo’ kubesi kulikwisa kwononoka mashiko a Njambi nga bali mu mbunga na kuwapokola nga bali ku bushweke. (Isaya 29:13) Kubesi kukwisa. Muka-kukwisa nasa kushangumuka kusinganyeka ngwendi binangulo bimo bya Yehova kubyesi kupanga simbu yoshe. (Jems 1:5-8) Nasa kujeneka kupwa wa kulongwa kuli Yehova mu byuma byamona ikeye ngwendi keti bya seho manene. Co nga amona ngwendi byahi bitundamo mu kupokola mashiko a Yehova, nasa kushangumuka kupokoloni manene mashiko a Yehova. Nameme asinganyeka ngwendi ali na kupangela Yehova. Yehova kasa kutambula kulemesa kwendi. (Ekele 8:11) Yetu tushaka kupwa baka-busunga mu byuma byoshe.
9. Bika bitulilongesa ku byuma byendekele Yesu mwaliwanene na Natanele lwa kulibanga? (Taleni na cikupulo.)
9 Kunapu kwa seho manene kwendeka busunga mu mbunge yetu. Tulilongesa seho ya kulinga ngoco, ku byuma byalingiwile omwo Filipu walanyele kabusamba kendi Natanele mangana aliwane na Yesu. Nameme Yesu te kanda aciliwaneho laja na Natanele, mwamumwene wendekele ngwendi: “Taleni ou kaIsalele, cili bene muli ikeye kumwesi makuli.” (Iwano 1:47) Yesu wazibukile ngwendi bandongesi bendi bakwabo bapwile baka-busunga, oloni cisholoka ngwe Natanele wapwile muka-busunga manene. Natanele kapwile wa kulumbunuka ngwe mwetu, oloni kapwile muka-kukwisa, wapwile muka-busunga mu byuma byoshe. Yesu wamwene eci cifwa muli Natanele, co wamushangalele. Netu tuliziba bwino nga Yesu endeka byuma bya kulifwa hali yetu.
Filipu wazimbwile kabusamba kendi Natanele munalume uje kapwile muka-kukwisa kuli Yesu. Kuma netu mukemwo mubatuzibukila ndi? (Taleni paragirafu 9)
10. Mwafwa bika tunapande kunyanyama na byuma bitwendeka? (Jemusi 1:26)
10 Bwingi bwa byuma bibanendeka ku mukanda wa Samu 15, binakundama mutunapande kuyoyela na bakwetu. Mukanda wa Samu 15:3 wendeka ngwawo, mungenzi mu tenti ya Yehova, “kesi kubiisa bakwabo mazina na ndaka yendi, kesi kulinga bakwabo mwamubi, co kesi kushaula babusamba bendi.” Kubiisa bakwetu mazina kwasa kubazibisa kubabala ku mbunge, co nga tulinga ngoco twasa kwonowa kutwalelelaho kupwa bangenzi mu tenti ya Yehova.—Tandeni Jemusi 1:26.
11. Kubiisa bakwetu mazina kwapwa kuka, co byuma muka byasa kulingiwa ku munu uje atwalelelaho kubiisa mukwabo lizina?
11 Muka-kwimba nendeka bya munu uje abiisa bakwabo mazina. Kubiisa munu lizina kulumbununa bika? Kunapu kwendeka biñanda bya makuli bije byasa kubiisa mukwetu lizina. Baka-kubiisa bakwabo mazina baje kubatengulula futisi yabo kubasa kutwalelelaho kukala mu cikungulukilo ca baka-Kristu.—Njele 17:10.
12-13. Twasa kubiisa bati bakwetu mazina mu kujeneka kuzibuka? (Taleni na cikupulo.)
12 Mukanda wa Samu 15:3, utwanukisa ngwawo bangenzi ba Yehova kubesi kulinga bakwabo mwamubi na kushaula babusamba babo. Twasa kushaula bati babusamba betu?
13 Twasa kushaula mukwetu kwa kujeneka kuzibuka nga tushandola biñanda bya kuhenga hali ikeye. Acisinganyekeni hali ebi byakumwenako: (1) ndokazi alikela cipangi ca simbu yoshe, (2) munu na munakazi wendi becela kupangela ha Betheu, (3) ndolome banamutundisa ha bukulunu nambe ha kupwa ngamba wa cikungulukilo. Kutulingi mwamubwa nga tuleka bakwetu ngwetu aba bandolome na bandokazi banalingi byuma byabibi mukemwo byuma binatenguluka mu kuyoya kwabo. Hamo kuli byuma byabingi binalingiwa bije kutuzibuka binanene oco kutenguluka. Kutundaho, mungenzi mu tenti ya Yehova “kesi kulinga bakwabo mwamubi, co kesi kushaula babusamba bendi.”
Kwakwasi kushandola biñanda bya makuli hali bakwetu, kulinga ngoco kwasa kutulingisa tupwe baka-kubiisa bakwetu mazina (Taleni palagilafu 12-13)
SINGIMIKENI BAJE BAKAZIBILA YEHOVA LYOBA
14. Mwasa kubyana bati “munu woshe wamubi” ha kupwa mungenzi wa Yehova? Lumbununeni.
14 Mukanda wa Samu 15:4 unendeka ngwawo kabusamba ka Yehova “Akabyana munu woshe wamubi.” Twasa kulinga bati ngoco? Ha kupwa ba kujeneka kulumbunuka kutwasa kwakula munu ngwetu wamubi. Mwafwa bika? Twasa kulizilila manene na bandolome bamo mwafwa ya bunu bwabo na kujeneka kulikwatasana manene na bandolome bakwabo. Ngeci, tunapande kujenjuka lika munu uje yamona Yehova ngwendi “wamubi.” (1 Kori 5:11) Aba banu bababi banambateselela banu baje kubatengulula bilinga byabo byabibi, banu baje kubasingimika byuma bitwakulahela nambe baje bashaka kutwonowesa kupangela Yehova.—Prov 13:20.
15. Ngila muka itwasa kusingimikila “baje bazibila Yehova lyoba”?
15 Mbimbiliya ku mukanda wa Samu 15:4 yatuleke tusingimike “baje bazibila Yehova lyoba.” Ngeci, tukatondo bingila mutwasa kusingimikilamo babusamba ba Yehova na kubamwesa ngozi. (Loma 12:10) Mu ngila muka? Ngila imo itwasa kulingilamo ngoco banaisoneka ku mukanda wa Samu 15:4, oku ku mukanda banamwesa ngwabo, mungenzi mu tenti ya Yehova “kesi kutengulula cikulaheso cendi, nameme byuma kubimwendela mwamubwa.” Nga kutulingi byuma bitunalikumiiya, co tuzibisa bakwetu kubabala ku mbunge. (Mate 5:37) Cakumwenako, Yehova atonda ngwendi baje banalyambata banyunge cikumiyo cabo ca bulo. Akazibi lalo kubwaha nga bisemi balinga byuma bibanakulahesele kulingila bana babo. Kuzema Njambi na bakwetu kutulingisa tulinge mwoshe mutwasela kulinga byuma bitunakulahesele kubalingila.
16. Ngila muka ikwabo itwasa kusingimikilamo babusamba ba Yehova?
16 Ngila ikwabo itwasa kumweselamo ngwetu twasingimika babusamba ba Njambi inapu kutambula bangenzi na kupwa baka-kwana. (Loma 12:13) Nga tuwana-wanako simbu yakusikama na bandolome na bandokazi, tukanyamesa busamba bwetu nabo na kukanyamesa busamba bwetu na Yehova. Kutundaho, nga tutambula bangenzi tumwesa ngwetu tuli na kutembwinina Yehova.
KETI MUZEME BIMBONGO
17. Mwafwa bika mukanda wa Samu 15 unendeka ha bimbongo?
17 Mungenzi mu tenti ya Yehova “Kesi kukolotesa bimbongo byendi mangana bamwane kakondweso, co lalo kesi kutambula lizika kanwa mangana alinge mwamubi munu wa kujeneka mulonga.” (Samu 15:5) Mwafwa bika ou mukanda wendeka ha bimbongo? Mwafwa nga tuzema bimbongo twasa kutsiya busamba bwetu na bakwetu hamolika na kuzibisa Njambi kubabala ku mbunge. (1 Timo 6:10) Mu simbu ibasonekele Mbimbiliya, baka-Kristu bamo kubakele na kulinga mwamubwa bandolome babo baje bapwile tuhutu, mubakele na kubakolotesa bimbongo bakele na kutonda ngwabo babwezeleleko lalo bimbongo bikwabo byabingi helu. Kutundaho, maako bamo bakele na kutambula mazika-kanwa, co kubakele na kusompa mwamubwa banu baje kubakele na mulonga. Njambi kesi kuliziba mwamubwa nga banu balinga byuma bya cifweci.—Ezeki 22:12.
18. Bihula muka bitunapande kulihula ha bimbongo? (Bahebelu 13:5)
18 Kunapu kwa seho manene kusinganyekesesa mutwamwenamo bimbongo. Lihuleni ngweni ‘kuma njikasinganyekesesa manene ha bimbongo na byuma binjasa kulanda ndi? Nga njakolota bimbongo, kuma njikambata simbu kubilwisa mwafwa ya kusinganyeka ngwange munu nanjikolotesa bimbongo hamo kashaka kubipangesa ndi? Kuma kukala na bimbongo kukanjilingisa njilizibe kupwa wa seho na kujeneka kukwasako bakwetu ndi? Kuma njikasinganyeka ngwange bandolome na bandokazi baje bali na bimbongo bazema manene bufuko ndi? Kuma njikashaka kulikwatasana lika na baje bali na bimbongo na kuyengula tuhutu ndi? Kunapu kwa seho manene kusinganyekesesa ha bihula ebi mwafwa kunapu kubezika kwakama manene kupwa bangenzi ba Yehova. Twasa kutwalelelaho kupwa bangenzi ba Yehova nga kutuzeme bimbongo. Nga tulinga ngoco, co Yehova katuyengula!—Tandeni Bahebelu 13:5.
YEHOVA WAZEMA BABUSAMBA BENDI
19. Mwafwa bika Yehova atonda ngwendi tulinge byuma bili ku mukanda wa Samu 15?
19 Mukanda wa Samu 15, unahu na majwi a cikulaheso akwendeka ngwawo “Woshe alinga ebi byuma kubakamuningangesa.” (Samu 15:5) Ou mukanda unamwesa bubwa butundamo nga tukabangeya byuma byoshe byatonda Njambi ngwendi tulinge. Yehova ashaka ngwendi tupwe ba kubwahelela. Nga tulinga byuma byatonda Njambi ngwendi tulinge, tuyoya mwamubwa, co atwalelelaho kutunyungilila.—Isaya 48:17.
20. Byuma muka bibanabandamena kukalikuwa bangenzi ba Yehova?
20 Bangenzi ba Yehova banabandamena kukalikuwa byuma byabibwa kulutwe. Bakubwabesa bakayoya mwilu muje mwanabakulahesa Yesu mwela. (Iwano 14:2) Baje bali na lilabelelo lya kukayoya hano hasi banabandamena kukalikuwa byuma bibanakulahesa ku mukanda wa Kujombolola 21:3. Kunapu kubezika kwakama kuzibuka ngwetu Yehova natulanya kupwa bangenzi mu tenti yendi ku myaka yoshe!
MWASO 39 Kaleni na Lizina Lyalibwa Kuli Njambi
