MWAHA WOOSOMIYA 24
NCIPO 24 Rwaani Omwaako wa Yehova
Nkhale aletto a Yehova mpaka!
“Yehova, tipani nolamuliya ukhala nletto nheemani waa?”—ISAA. 15:1.
ITTHU INHALEEHU WIITTHUCA
Ninaahala woona isiyani inlamuliyeehu upanka wiira nihihiyerere ukhala apatthani a Yehova ni mananna owaawacera ale akhanle apatthani a Yehova.
1. Nhina Isaalimu 15:1-5 manannani cinhalaaya unikavihera?
MWAHA uvinre, hi niheetthuca wiira ntthu avahereraka ukumyaawe wa Yehova pooti ukhala mpatthannyaawe awula ukhala nheemani wawe. Masi, manannani hiiva ninhaleehu uhihiyerera ukhala aletto nheemani wa Yehova? Isaalimu 15 inawuuluma iyo itthwiiyo. (Nsome Isaalimu 15:1-5. a) Iyo isaalimwiiyo inataphulela isiyani inlamuliyeehu upanka wiira nihihiyerere ukhalana upatthani woolipa ni Yehova.
2. Isiyani Davidi yoopuwelaawe ukati woolumilyaawe amwaacaka heema a Yehova?
2 Isaalimu 15 inancera yiiraka: “Oo Yehova, tipani nolamuliya ukhala nletto nheemani waa? Tipani nolamuliya ukhala umwaakoni waa wowaarya?” (Isaa. 15:1) Ukati waamulumilyawe “heema” a Yehova, atthunaka Davidi oopuwela wiira ikhanle itabernaakulu yaari u Gibeão ule ukatyuule. Davidi ciicammo ahooluma aacaka “mwaako wowaarya” wa Nluku. Khweeliini uyo aaca mwaako Siyau waari Yerusalemu. Uyo mwaakooyo, wakhala imeeturu cene nuuculu wo Gideão, Davidi ahonteka heemaawe wiira asunke ikasa yonlehaano mpaka waahalaaya utekiya itempulu.—2 Sam. 6:17.
3. Kontha isiyani ikhanlyaaya itthu yofayita wiiweeha itthu inhimyaaya Isaalimu 15? (Nwehe ciicammo ilatarato.)
3 Khweeliini, asarayeli enci khayaavara miteko ntabernaakulu ni ciicammo khayaakela nheemani waari ikasa yonlehaano. Masi, aswali okhuluvelya otheene pooti waakhalaaya aletto a Yehova nheemani wawe wonthoonyero. Iyo ikhanle itthu hiiva otheene cihu nimpheeleehu. Nhina Isaalimu 15, inawuuluma makhalelo hiiva ninlamuliyeehu uthoonyera wiira nihihiyerere ukhala apatthani a Yehova.
Asarayeli yaakhala ukati wa Davidi, khawaarikela ucuwela maanaaya isiyani ukhala nletto nheemani wa Yehova (Nwehe iparaagarafu 3)
NKHALE EEMAANI NI MPANKE CITTHU COMAANA
4. Nincuwela cani wiira khuntosera upattisiya wiira nikhale apatthani a Yehova? (Isaiya 48:1)
4 Isaalimu 15:2, Ineera mpatthani a Nluku “phi ntthu khanle eemaani ni nopanka citthu comaana.” Moolumo “khanle” ni “nopanka” anthoonyera wiira ninlamuliya uhihiyerera upanka. Niireke khweeliini hiiva ninaakhitiri ‘ukhala eemaani’? Iyee. Khweeliini, otheene cihu nikhanle oopahuwa. Masi Yehova, nonoona ‘ukhala eemaani’ naahihiyerereke wiikurumica umwiiwelela. Neevahereraka ni napattisiyaka, hiiva ninawiira upacera unkhuluvela Yehova. Khalayi, khawaatosa paahi ukhala nsarayeli wiira ntthu akhale nletto a Yehova. Akhwaawe yeeraka wiira ananswalela Nluku masi khayaapanka “iyo niikhweeli.” (Nsome Isaiya 48:1. b) Asarayeli yaapheela ukhala aletto a Yehova yahaana yeetthucaka ikhweeli ca Yehova ni utthara nnyo ikhweelinnyo. Inanna imocaaru, wiira nikhale apatthani a Yehova nihaana upanka itthu uhiya paahi upattisiya ni ucuweliya ukhala Masaahiti a Yehova. Nihaana uhihiyerera “upanka citthu comaana.” Maanaaya isiyani?
5. Umwiiwelela Yehova nhina citthu cotheene maanaaya isiyani?
5 Moonelo a Yehova, ‘ukhala eemaani’ ni ‘upanka citthu comaana’ khunakhala paahi urwaa umikutthaanoni. (1 Sam. 15:22) Masi, nihaana uhihiyerera wiikurumica umwiiwelela Yehova muukumini wihu motheene ni hataa ciicammo nikhalaka veekha. (Miru. 3:6; Ekles. 12:13, 14) Ikhanle itthu yofayita wiikurumica umwiiwelela Yehova hataa cikhalaka citthu cinooneehu ukhala khampa coohifayita. Napankaka commo, ninaahala uthoonyera wiira ninanfenta Yehova ni uyo ciicammo naahala unifenta.—Joau 14:23; 1 Jo. 5:3.
6. Khampa cinthoonyeraaya Maberewu 6:10-12, isiyani ikhanle itthu yofayita uvikana citthu comaana nipankileehu khalayi?
6 Yehova naavaha ifayita cinene nteko nivanreehu khalayi. Masi, nnyo citthu nivanreehu khalayinnyo khacintosa wiira nihihiyerere ukhala aletto nheemani wa Yehova. Iyo itthwiiyo inawoonannya nhina Maberewu 6:10-12. c (Nsome.) Yehova khanliyala citthu comaana cipankileehu khalayi. Masi, uyo nopheela wiira nihihiyerere unswalela muukumini wihu motheene, “mpaka wuukhiceroni.” Ni hiiva ninaahala ukhala apatthani a Yehova mpaka, “naahilolovaceke.”—Akalas. 6:9.
NHIMYE IKHWEELI WANRIMANI WINYU
7. Wuuluma ikhweeli maanaaya isiyani?
7 Ntthu nopheela ukhala nletto oothanliya nheemani wa Yehova haana “ahimyaka ikhweeli wanrimani wawe.” (Isaa. 15:2) Iyo ikhanle itthu yofayita uhiya paahi wootha. Uhiya ukhala okhuluvelya nicitthu cinoolumeehu, nihaana ukhala okhuluvelya nicitthu cotheene cimpankeehu. (Mabere. 13:18) Iyo ikhanle itthu yofayita, “kontha Yehova unrusa ntthu oohikhuluvelya, masi nawaapatthanana cinene atthu ookhuluvelya.”—Miru. 3:32.
8. Isiyani ihinlamuliyeehu upanka?
8 Ntthu “nooluma ikhweeli,” khanthoonyera umwiiwelela Yehova waatthuni paahi, masi akhalaka veekha upanka citthu cootakhala. (Isai. 29:13) Uhiya commo, uyo naanyema ukhala ntthu owootha. Ntthu owootha pooti wuupuwela wiira ikhanle itthu yoonanara utthara malakihero a Yehova. (Tiya. 1:5-8) Uyo pooti upacera uhimwiiwelela Yehova, nhina citthu cacikaani ni oonaka wiira khinhala umwiirannyeela itthu yowoopiha. Ukati uhimwiiwelelaawe Yehova, citthu cimpankaawe cinaatepa. Hataa oopuwelaka wiira naaswali, Yehova khanvaha ifayita uswali wawe. (Ekles. 8:11) Masi, hiiva nihaana nikhalaka ookhuluvelya ni citthu cotheene.
9. Isiyani yaakhumelenle ukati Yesu wancuwenlyaawe Natanaeli ni isiyani ineetthucereehu? (Nwehe ciicammo ilatarato.)
9 Hiiva pooti waneetthucereehu ifayita urinaaya ukhala atthu ookhuluvelya niitthu yaakhumelenle ukati Yesu wancuwenlyaawe ikwaha yoopacera Natanaeli. Ukati Filipe wancuwelihilyaawe Yesu mpatthannyaawe Natanaeli, yahokhumelela itthu yomaana. Waahookhalaru wiira Yesu khancuwela saana Natanaeli, uyo aheera: “Ula khanle nsarayeeli eekhweeli, nlattu wo uyo khuuvo wootha.” (Joau 1:47) Ciicammo Yesu aawehera attharyaawe khampa atthu okhuluvelya, masi uyo ahomoona Natanaeli ukhala ntthu ootepa ukhuluvelya. Khampa hiiva, Natanaeli ciicammo aari ntthu oopahuwa. Masi uyo khootha, uhiya commo, uyo aari okhuluvelya wocitthu cotheene. Yesu ahookhala ootteeliya nlattu wo iyo itthwiiyo ni ahonttottopela Natanaeli. Niireke khawaahala wuucivelani unari wiira Yesu ahoolumaca iyo itthwiiyo awaacakani nyuuva?
Filipe ahoncuweliha Yesu mpatthannyaawe Natanaeli, nlopwana aahimya ikhweeli. Niireke Yesu aahala unoona ciicammo? (Nwehe iparaagarafu 9)
10. Kontha isiyani ninlamuliyeehu uwehacera citthu cinoolumeehu? (Tiyaku 1:26)
10 Malakihero amphwanyannya nhina Isaalimu 15 anaavaranaca nimananna ninaawacereehu atthu akhwaawe. Isaalimu 15:3 ineera wiira aletto a Yehova “Khammootherya nkhunanawe ninlimi nawe, khanompanka nkhunanawe hataa itthu yootakhala ni khanwoonihiihaca ihaaya asipatthannyaawe.” Hiiva namootheryeeka ntthu, pooti wiiriha atthu uriipiya nrima ni Yehova uhitthuna wiira nikhale alettwaawe.—Nsome Tiyaku 1:26. d
11. Wootha maanaaya isiyani ni isiyani inaakhumelela ale anootha ahooniheraka uttharuwa?
11 Davidi hohimya nuulumo wootha. Yeeriyaka wootha maanaaya isiyani? Ukhanle umwarusela moolumo owoothiya anhala wiiriha unanariha makhalelo antthu noromolaciya. Ntthu owootha ni hinoonihera uttharuwa, khanlamuliya ukhala Saahiti a Yehova.—Jer. 17:10.
12-13. Citthuni cikhwaawe hiiva cinhala uniiriha waaterempulaca asipatthaniihu? (Nwehe ciicammo ilatarato.)
12 Isaalimu 15:3 inaanuupusera wiira aletto a Yehova khanompanka nkhunanaya hataa itthu yootakhala ni khanwoonihiihaca ihaaya asipatthannyaaya. Isiyani impheelaaya uhimya?
13 Hiiva pooti umoonihiihaca ihaaya ntthu woohicuwelela nlattu woomwarusela ihapari cowoothiya cimmuuluma uyoova. Muupuwele nnya citthunnya: (1) arokorihu amoca ahiile uvara nteko wowiivaherera ukati wotheene, (2) anamathelana amoca ahiile ukavihera upeteli, awula (3) munna mmoca hiile ukhala humu awula nruminya owanlokoni. Yaahala ukhala itthu yootakhala wuuluma pusya wiira ayo mayamunnaayo atthunaka ahopanka itthu yootakhala, phimaana yaakhumelelaka iyo itthwiiyo! Khweeliini, cihaavo citthu cinci cipankilyaaya hiiva nihincuweleehu. Phimaana, nletto a Yehova “khanompanka nkhunanawe hataa itthu yootakhala ni khanwoonihiihaca ihaaya asipatthannyaawe.”
Nihicuwelelaka, hiiva pooti umwarusela ihapari cowoothiya caakhunanihu caahala uwiiriha waaterempulaca mayamunneehu (Nwehe iparaagarafu 12-13)
MWAAHISIME ALE ANONTTITTHIMIHA YEHOVA
14. Manannani nletto a Yehova nohalaawe waakhotta “ale atthu oohinamaana?” Ntaphulele.
14 Isaalimu 15:4 ineera wiira mpatthani a Yehova “Nankhotta ntthu oohinamaana.” Ninhala uncuwela cani ntthu oohinamaana? Nlattu wookhala atthu oopahuwa, hiiva khanirina mananna oocuwela wakhala wiira ntthuuyo oohinamaana awula mena. Kontha isiyani? Nlattu woopahuwa, pooti unicivela cinene ntthu nimooneehu ukhala oomaala uhiya ale atthuna annipwapwela. Masi, hiiva nihaana waakhotta ale Yehova nowoonaawe ukhala “oohinamaana.” (1 Akor. 5:11) Iyo ciicammo, inawaahela nhina ale ampanka citthu cootakhala ni ahooniheraka uttharuwa, ale anhanyuriha itthu inkupaliihu ni ale ammananiha ulolovihaca upatthaniihu ni Yehova.—Miru. 13:20.
15. Manannani hiiva ninhaleehu waahisima “ale anonttitthimiha Yehova”?
15 Isaalimu 15:4 ciicammo ineera wiira nihaana waahisima “ale anonttitthimiha Yehova.” Wiira nipanke iyo, hiiva nihaana nitothaka mananna owoonihera nnema ni owaahisima apatthani a Yehova. (Aroo. 12:10) Manannani? Inanna imoca yoopanka iyo, ciicammo ihohimiya nhina Isaalimu 15:4 wiira aletto a Yehova “khanhiya upanka itthu ikhuluvelihilyaaya, hataa ihalaka waaphwanyiha masakha.” Nahiyaka upanka itthu ikhuluvelihileehu, pooti waariipiha nrima akhunanihu. (Mat. 5:37) Wootakihera, Yehova noweherera wiira anamathelana ahaana wiiranyeha itthu akhuluvelihannyaaya ukati waathelanacaaya. Yehova ciicammo naakhala ootteeliya oonaaka ayari yeekurumicaka waapankela asaanaaya itthu yaakhuluvelihilyaaya. Nlattu wonifento nihu ni Yehova ni atthu akhwaawe, hiiva ninaahala upanka yotheene inkhitiriihu wiira niirannyeehe itthu ikhuluvelihileehu.
16. Manannani owaattitthimiha apatthani a Yehova?
16 Inanna ikhwaawe yowaattitthimiha apatthani a Nluku ukhanle ukhala namavaha ni namaakhelela aletto. (Aroo. 12:13) Uviriha ukati nkhayi nimayamunna ni mayanuunu uhiya paahi umikutthaanoni awula wuulalyeerani, unaahala unikavihera ulipihaca upatthaniihu naayova ni Yehova. Uhiya commo, hiiva ninantakiha Yehova nooniheraka waakhela aletto.
NHIFENTE NSURUKHU
17. Kontha isiyani Isaalimu 15 inuulumaaya nsurukhu?
17 Nhina Isaalimu 15:5 hiiva nihosoma wiira aletto a Yehova “khankopiha nsurukhwaaya awehereraka uliviya nisuuru ni khanaamini uliviya wiira ampankele itthu yootakhala ntthu hitthekile.” Kontha isiyani Davidi woopuwenlyaawe wuuluma nsurukhu nhina ila Isaalimu yankaniila? Kontha hiiva wanicivelaka nsurukhu cinene pooti ukhala itthu yofayita muukumini wihu uvikana atthu akhwaawe awula Yehova. (1 Tim. 6:10) Khalayi, atthu akhwaawe yaanennyera mayamunnaaya yaakopihaka nsurukhu awehereraka uliviya nisuuru hataa yaahakhitiryaaya uliva. Uhiya commo, masuwiisi yankupali unyolihiya wiira anvahe isariya ntthu ahaari isariya. Yehova unrusa atthu ampanka nnyo citthunnyo.—Ezek. 22:12.
18. Makohoni anhaleehu wiipankela wiira nicuwele mananna cinwehereehu nsurukhu? (Maberewu 13:5)
18 Otheene cihu wanreera wuupuwela mananna ninwehereehu nsurukhu. Mwiikohe co: ‘Kiireke miiva kinaakhala kuupuwelaka nsurukhu ni citthu caahalaaka uthuma kinarina nsurukhu? Kankopelaka ntthu nsurukhu, kiireke kinaapica nunliva kuupuwelaka wiira khunonthwa? Kiireke unaakirikela uvaha? Kiireke miiva kineecoona ukhala ntthu ofayita uvikana atthu akhwaawe nlattu wookhalana nsurukhu? Kiireke miiva kinawuupuwela wiira munna unciva mihakhu nlattu wookhalana nsurukhu? Kiireke asipatthannyaaka akhanle oopuha waahiya oohuva?’ Otheene cihu nihaana iparakha yuulupale yoolatthuliya wiira nikhale aletto a Yehova. Masi nihaana uhihiyerera ukhala aletto a Yehova ni unyema ufenta nsurukhu. Nanfentaka Yehova uhiya nsurukhu, Yehova khanla uninyanyala!—Nsome Maberewu 13:5. e
YEHOVA NAWAAFENTA ASIPATTHANNYAAWE
19. Isiyani Yehova immwiiriha unikhanyereriha upanka citthu cinci?
19 Isaalimu 15 immalela niinatiri ineera: “Ntthu nopanka commo khanhala uttenkuwaca.” (Isaa. 15:5) Va, Davidi oonihera itthu yuulupale yaamwiiriha Yehova unikhanyereriha citthu cinci. Yehova nopheela wiira hiiva nitteeliye. Phimaana, uyo naanivaha iphiro inhala uniphwanyiha iparakha ni unikhikicera.—Isai. 48:17.
20. Isiyani aletto a Yehova inwehereraaya yoohoolo?
20 Aletto a Yehova ahaana niweherero nofayita cinene noohoolo. Aswali oothanliya okhuluvelya anhala ulattuliya wiira yakhale wiirimu mapuro Yesu aatthenkacenryaawe. (Joau 14:2) Vano, ale aarina niweherero nokhala mpeephoni va watuninyani va anweherera wiirannya inatiri imphwanyannya nhina Apokalipise 21:3. Woohaanyihacera, hi ninawiicoona ukhalana ifayita cinene nlattu woolattuliya ni Yehova wiira nikhale apatthannyaawe ni wiira nikhale aletto nheemani wawe mahuku otheene!
NCIPO 39 Okhalana Nsina Nooloka Ohoolo wa Muluku
a Isaalimu 15:1 Yehova, tipani nolamuliya ukhala nletto nheemani waa? Tipani nolamuliya ukhala umwaakoni waa wowaarya? 2 Phi ntthu khanle eemaani, nopanka citthu comaana ni nohimya ikhweeli wanrimani wawe. 3 Khammootherya nkhunanawe ninlimi nawe. Khanompanka nkhunanawe hataa itthu yootakhala, ni khanwoonihiihaca ihaaya asipatthannyaawe. 4 Uyo nankhotta ntthu oohinamaana, masi nawaattitthimiha ale ammoova Yehova. Khanhiya upanka itthu ikhuluvelihilyaawe, hataa ihalaka umphwanyiha masakha. 5 Khankopiha nsurukhwaawe awehereraka uliviya mwinci ni khanaamini uliviya wiira ampanke itthu yootakhala ntthu hitthekile. Ntthu nopanka commo khanhala uttenkuwaca.
b Isaiya 48:1 Nviriyane ila itthwiila, ucuulu wa Yakopi, nyuuva nneeciihana nincina Isarayeli ni nkhanle ucuulu wa Yuuta. Nyuuva nnolapha nromolaka ncina na Yehova, ni nnonlompa Nluku o Isarayeli, masi khannolompa niikhweeli ni nimananna omaana.
c Maberewu 6:10 Kontha Nluku khanakhala ootakhala nrima wiira aliyale miteko cinyu ni inanna cifentaleenyu ncina nawe, waakavihera winyu ale akhanle owaarya ni uhihiyerera winyu waakavihera. 11 Masi nimpheela wiira khula ntthu ri iriyariinyu ciicammo eekurumice, wiira atepe ukhuluvela niweherero nirineehu mpaka wuukhicerani, 12 nhikhale oonyoonyiya, masi mwaatakihe ale anaakhela itthuvo cikhuluvelihiye nlattu wo waamini ni nlattu woovilela waya.
d Tiyaku 1:26 Ntthu noyoona wiira nanswalela Nluku, masi hinvaraca nlimi nawe, nawiithepya wanrimani wawe, ni uswali wawe unkhala wo pure.
e Maberewu 13:5 Nhikhale wuucivakani nsurukhu cinene muukumini winyu; ni nkhale ootteeliya nrima ni citthu cirineenyu. Kontha uyo heera: “Mi akinhala wuuhiya ni akinhala wuunyanyala.”
