1. Молан мыланна Псалом 14:1—5 почеламутым ончен лекташ кӱлеш?

 КОДШО статьяште ме пален налынна, кӧм Иегова шке шатёрышкыжо ӱжеш. Тиде тыгай еҥ-влак, кӧ шке илышыжым Иеговалан служитлымылан пуэн да Иегова дене йолташ лиймыжым акла. Юмо дене лишыл йолташ лияш да кодаш манын, мом ыштыман? Тиде шотышто мыланна 14-ше Псалом полша. (Псалом 14:1—5 лудын лекса.) Айста тиде Псаломын кажне почеламутшым лончылен налына да пален налына, мом Иегова шке йолташыж-влак деч вуча.

2. Иегован шатёржо нерген ойлен, Давид, очыни, мо нерген шонен?

² 14-ше Псалом тыгай мут дене тӱҥалеш: «Иегова, тыйын шатёрыштет кӧ уна лийын кертеш? Тыйын святой курыкыштет кӧ илен кертеш?» (Пс. 14:1). Иегован «шатёржо» нерген ойлен, Давид, очыни, священный шатёр нерген шонен, кудыжо икмыняр жап Гаваонышто лийын. Тыгак Давид «святой курык» нерген палемден. Очыни, тудо Иерусалимысе Сион курык нерген ойлен. Тиде курыкышто, Гаваон деч икмыняр километрлан кечывал вел могырышто, Давид шатёрым шогалтен да тушко сугынь ковчегым кондаш кӱштен (2 Сам. 6:17). Ковчег тушто храмым чоҥен пытарымешке шоген.

3. Кузе 14-ше Псалом мыланна Иегован йолташыже кодаш полша? (Тыгак сӱретым ончыза.)

³ Конешне, израильтян-влак гыч шукышт священный шатёрышто нигунамат служитлен огытыл. Южо еҥ-влак веле пурен кертыныт тушко, кушто сугынь ковчег лийын. Но Иегован чыла ӱшанле служитлышыже-влак тудын йолташыже,  але символический шатёржын унаже, лийын кертыныт. Мемнанат тыгай кумылна уло. 14-ше Псаломышто ойлалтеш, мом мыланна Иегован йолташыже кодашлан ыштыман.

ТИТАКДЫМЕ ДА ЧЫНЫМ ЫШТЫШЕ ЛИЙЗА

4. Иегован йолташыже лияшлан тынеш пураш гына огеш сите манын, кушеч ме палена? (Исайя 48:1).

⁴ Псалом 14:2 почеламутышто возымо дене келшышын, Иегован йолташыже «шылталаш лийдыме, чыным ыштыше». Но сулыкан еҥ-влак титакдыме лийын кертыт мо? Лийын кертыт. Иеговам колышташлан шкенан могырна гыч чылажымат ыштена гын, тудо мемнам титакдымылан шотлаш тӱҥалеш. Юмым жапын-жапын огыл, а эре колыштман. Иеговалан ӱшанле лияш сӧрымашым пуымаш да тынеш пурымаш — тиде тӱҥалтыш веле. Иеговалан ӱшанле кодашлан мыланна умбакыжат вийым пыштыман. Мутлан, Израиль калык Юмылан ойырымо калык лийын. Но чыла израильтян Иегован унаже лийын манын, тиде ончыктен огыл. Молан тыге каласаш лиеш? Южыштын кумалмышт шӱм гыч лекше лийын огыл, да шке ыштымышт дене нуно Юмым шӱктареныт. (Исайя 48:1 лудын лекса.) Израильтян-влаклан, кудыштын Иегован унаже кодмышт шуын, тудын кӱштымашыже-влакым пален налаш да нуным шукташ кӱлын. Тачат тыгак: тынеш пураш да Иегован Таныкше лӱмым нумалаш гына огеш сите. Мыланна чыным ышташ кӱлеш. Мо тышке пура?

5. Чыла шотыштат Иеговам колыштмаш мом ончыкта?

⁵ «Шылталаш лийдыме, чыным ыштыше» лияш — тиде вашлиймашыш эре кошташ гына огыл (1 Сам. 15:22). Кеч-мом ыштен, эре Иеговам колыштшаш улына — тунамат, кунам мемнам нигӧат огеш уж (Прит. 3:6; Эккл. 12:13, 14). Изи пашаштат Иеговам колышташ кӱлеш. Тыге ме тудым  йӧратымым ончыктена, да тудо вашеш мемнам эше чотрак йӧраташ тӱҥалеш (Иоан. 14:23; 1 Иоан. 5:3).

6. Еврей-влаклан 6:10—12 дене келшышын, Иегован шатёрыштыжо кодашлан молан ончыч ыштыме поро паша гына огеш сите?

⁶ Мом ме Иеговалан ыштен улына, тудо чылажымат акла. Но ончыч ыштыме поро пашалан кӧра гына тудын шатёрыштыжо уна кодын она керт. Тидым Еврей-влаклан 6:10—12 пеҥгыдемда (лудын лекса). Иегова мемнан ончыч ыштыме поро пашанам огеш мондо, но тудо мемнан деч тудлан «мучаш марте» уло шӱм дене умбакыжат служитлымынам вуча. Киднам она волто гын, вийым пыштымына суапландарыме лиеш — Иегова дене курымеш йолташ лийына (Гал. 6:9).

ШӰМЫШТЫДА ЧЫНЫМ ОЙЛЫЗА

7. Шӱмыштӧ чыным ойлымаш мом ончыкта?

⁷ Кӧ Иегован унаже лийнеже, тудо «шӱмыштыжӧ» чыным ойлышаш (Пс. 14:2). Сандене ме она шойышт да чыла шотыштат мут дене да паша дене честный улына (Евр. 13:18). Тиде чотак кӱлешан, «вет Иегова шояче айдеме деч йырна, а чын ыштышылан Юмо — лишыл йолташ» (Прит. 3:32).

8. Мом ыштыме деч кораҥаш кӱлеш?

⁸ «Шӱмыштыжӧ чыным ойлышо» айдеме тыге ышташ огеш тӱҥал: еҥ-влак ончылно тудо Юмым колыштеш, а кунам шкетын кодеш, тудын законжо-влакым пудырта (Ис. 29:13). Тыге ыштен, тудо сайла кояш тӧча. Айдеме тыгай кузе лийын кертеш? Ончыч тудын южо библийысе нормо-влакын чын улмышт шотышто кокыте шонымаш лектеш (Иак. 1:5—8). Вара тудо тыгай йодыш-влак шотышто, кудышт тудын шонымаште кӱлешан огытыл, Иеговам колыштмым чарна. А кунам тудо уда лектышыжым огеш уж, тунам, Юмын законжо-влакым пудыртен, эше кугурак сулыкым ышташ тӱҥалеш (Эккл. 8:11). Тудо умбакыжат Юмылан служитла манын шона гынат, тыгай служитлымым Юмо йӧрдымылан шотлаш тӱҥалеш. Но мемнан чыла шотыштат честный лиймына шуэш.

9. Нафанаил Иисуслан мо дене келшен, да тиде мемнам мо́лан туныкта? (Тыгак сӱретым ончыза.)

 ⁹ Шӱмыштӧ чыным ойлаш чотак кӱлешан. Тидым ик случай пеҥгыдемда. Филипп Иисус деке Нафанаил йолташыжым вӱден конден. Иисус Нафанаил дене палыме лийын огыл гынат, каласен: «Теве чынжымак Израиль еҥ, тудын нимогай шоякшат уке» (Иоан. 1:47). Мутат уке, Иисус чыла тунемшыжым честныйлан шотлен, но Нафанаил тиде койыш дене чотак ойыртемалтын. Мемнан гаяк Нафанаил сулыкан лийын гынат, тудо сайла кояш тӧчен огыл да чыла шотыштат честный лийын. Иисуслан тиде чот келшен, да тудо Нафанаилым мокталтен. Иисус мемнан нергенат тидымак каласыже манын кумылна уло.

10. Молан мыланна эскераш кӱлеш, мом ме ойлена? (Иаковын 1:26).

¹⁰ 14-ше Псаломышто шукыракшым ойлалтеш, могай отношений мемнан весе-влак деке лийшаш да кузе тидым паша дене ончыкташ. Псалом 14:3 дене келшышын, Иегован унаже «шоям ок шаркале, лишылжылан осалым ок ыште да йолташыж-влакым намысыш огеш пурто». Мом ойлымынам она эскере гын, весе-влаклан кугу эҥгекым ыштен кертына. Тунам Иегован шатёрыштыжо кодаш правам йомдарена. (Иаковын 1:26 лудын лекса.)

11. Шоям шаркалыше да ӧкыныдымӧ христиан дене мо лиеш?

¹¹ Псаломым мурышо раш ойла тыгай еҥ-влак нерген, кӧ весе-влакын репутацийыштым амырта. Тыгай еҥ-влак, весе-влак нерген шоям ойлен, нунылан эҥгекым кондат. Кӧ весе-влакын репутацийыштым амырта да огеш ӧкынӧ, тудо христиан погынымаш гыч кораҥдыме лиеш (Иер. 17:10).

12, 13. Кузе ме йолташна-влакым шижде намысыш пуртен кертына? (Тыгак сӱретым ончыза.)

¹² Псалом 14:3 дене келшышын, Иегован унаже «лишылжылан осалым ок ыште да йолташыж-влакым намысыш огеш пурто».  Кузе ме йолташна-влакым намысыш пуртен кертына?

¹³ Ме шижде иктаж-кӧн репутацийжым амыртен кертына. Мутлан, айста тыгай ситуаций-влак нерген шонкалена: 1) ака пионер семын служитлымым чарна, 2) еш мужыр Вефиль гыч кая, 3) иза кугурак иза семын але служебный полышкалыше семын служитлымым чарна. Молан тыге лийын шонаш да тидын нерген весе-влак дене мутланаш чын огыл. Ме чыла амалым, молан тыгай решений лукмо лийын, она пале докан. Кузе ме шарнена, Иегован унаже «лишылжылан осалым ок ыште да йолташыж-влакым намысыш огеш пурто».

ИЕГОВА ДЕЧ ЛӰДШӦ-ВЛАКЫМ ПАГАЛЫЗА

14. Кузе Иегован йолташыже-влак пален кертыт, кӧм «ужмышудымылан» шотлаш? Умылтарыза.

¹⁴ Псалом 14:4 дене келшышын, Иегован йолташыже «ужмышудымо-влак деч кораҥеш». Айдемылан тыгай оценкым кӧ пуэн кертеш? Тиде йодышышто шижмашнам да шонымашнам шотыш налаш огеш кӱл, вет ме языкан улына. Тидлан кӧра мыланна иктышт дене келшен илаш куштылго, а весышт мемнам шыдештарен кертыт. Тыгела, кӧм Иегова «ужмышудымылан» шотла, нунын деч веле кораҥына (1 Кор. 5:11). Тыгай еҥ-влак коклаште ӧкыныдымӧ языкан еҥ-влакат улыт, а эше тыгай-влак, кӧ ӱшанымашнам огеш пагале але Иегова дене йолташ лиймынам пудырташ тӧча (Прит. 13:20).

15. «Иегова деч лӱдшӧ-влакым» пагалымым кузе ончыктен кертына?

¹⁵ Псалом 14:4 дене келшышын, тыгак мыланна «Иегова деч лӱдшӧ-влакым» пагалаш кӱлеш. Сандене ме Иегован йолташыж-влак дене поро лияш да нуным пагалаш тыршена (Рим. 12:10). Порылыкнам да пагалымашнам кузе ончыктен кертына? Псалом 14:4 дене келшышын, Иегован унаже «эре шке мутшым куча, кеч тиде тудлан эҥгекым конден кертеш». Сӧрымашнам она шукто гын, тиде весе-влаклан чон корштымашым конден кертеш (Матф. 5:37). Мутлан, Иегова йолташыж-влак деч мужыраҥмаш товатлыме мутым кучымым вуча. Тыгак тудлан ласка ужаш, кунам ача-ава-влак, мом икшывыштлан сӧреныт, чылажымат шуктат. Ме Юмынам да лишылна-влакым йӧратена гын, сӧрымӧ мутнам шукташлан уло вийым пыштена.

16. Кузе эше ме Иегован йолташыже-влакым пагален кертына?

¹⁶ Тыгак ме Юмын йолташыж-влакым унала ӱжына гын, да нунылан нимом она чамане гын, нуным пагалымынам ончыктена (Рим. 12:13). Мыланна иза-ака-влак дене погынымаш деч ончыч, погынымаш деч вара да служымаште гына огыл мутланаш кӱлеш. Ме нунын дене пырля яра жапым эртарена гын, тиде мыланна икте-весе дене да Иегова дене эше лишылрак лияш полша. А эше уначе лийын, ме Юмына деч примерым налына.

ОКСАМ ЙӦРАТЫМЕ ДЕЧ ШЕКЛАНЫЗА

17. Молан 14-ше Псаломышто окса нерген ойлалтеш?

¹⁷ Иегован унаже «пояҥашлан... оксажым кӱсын огеш пу да титакдымым титаклашлан взяткым огеш нал» (Пс. 14:5). Молан тиде кӱчык псаломышто окса нерген ойлалтеш? Молан манаш гын, окса нерген шуко шонаш гын, тунам окса еҥ-влак деч да Юмо дене йолташ лийме деч тӱҥрак лийын кертеш (1 Тим. 6:10). Библий жапыште южо еҥ-влак иза-шольыштлан оксам процент дене кӱсын пуэн пояҥаш тыршеныт. Тыгак судья-влак взяткым налыныт  да вара титакдыме еҥ-влакым титакленыт. Тыгай паша-влак Иеговалан ужмышудымо лийыныт (Иез. 22:12).

18. Могай йодыш-влак окса шотышто шкенам терген налаш полшен кертыт? (Еврей-влаклан 13:5).

¹⁸ Окса шотышто шкенам терген налаш сай лиеш ыле. Шке деч йодса: «Окса нерген да мом тиде оксалан налаш лиеш манын, чӱчкыдын шонем мо? Парымым жапыштыже тӱлем мо? Але мый жапым шуйкалем да шонем: айдеме мыланем оксам пуэн гын, лектеш, нуно тудлан пешыжак огыт кӱл? Оксалан кӧра мый кугешныше да опкынланыше улам мо? Шонем мо мый, пуйто иза але ака шуко оксам налеш гын, тудо окса нерген гына шона? Йорло-влак дене огыл, а поян-влак дене гына йолташ лияш тыршем мо?» Иегова мыланна тудын унаже лияш йӧным пуэн. Тудо мемнам нигунамат огеш кодо манын сӧрен. Но мыланна Юмо дене умбакыжат йолташ лияшлан оксам йӧратыме деч шекланыман. (Еврей-влаклан 13:5 лудын лекса.)

ИЕГОВА ШКЕ ЙОЛТАШЫЖ-ВЛАКЫМ ЙӦРАТА

19. Молан Иегова мемнан деч 14-ше Псалом дене келшышын ыштымынам вуча?

¹⁹ 14-ше Псалом тыгай сӧрымаш дене пыта: «Тыге ыштыше нигунамат огеш шӱртнялт» (Пс. 14:5). Тыште псаломым мурышо умылтара, молан Иегова мемнан деч тиде псалом дене келшышын ыштымынам вуча. Молан манаш гын, тунам ме пиалан лийына. Юмын виктарымыже почеш ыштена гын, Юмо мемнам суапландараш да аралаш тӱҥалеш (Ис. 48:17).

20. Иегован унаже-влакым могай ончыкылык вуча?

²⁰ Иегован унаже-влакым сылне ончыкылык вуча. Тудын шӱрымӧ служитлышыже-влак каваште илаш тӱҥалыт. Иисус нунылан тушто шуко «илыме верым» ямдылен (Иоан. 14:2). А мландыште илаш ӱшаныше еҥ-влак Почмаш 21:3 гыч сӧрымашын шукталтмыжым вучат. Иегова мыланна тудын йолташыже лияш да шатёрыштыжо курымеш кодаш кугу чапым пуэн!