ZÃMSGÃ YĨNGA 24
YƖƖLL 24 Wa-y-yã a Zeova tãngã zugu
Kell n pa-y-yã a Zeova fu-roogẽ wã wakat fãa yĩnga
“Zeova, ãnda n tõe n sig sãand yãmb fu-roogẽ wã?”—YƖƖN. 15:1
D SẼN NA N BÃNGE
D na n yãa d sẽn segd n maan to-to n kell n yɩ a Zeova zo-rãmba, la a sẽn dat tɩ d tall manesem ning ne a zo-rãmb a taabã.
1. Bõe yĩng tɩ Yɩɩn-sõamyã 15:1-5 wã zamsg tõe n naf tõndo?
SÕSG ning sẽn loogã pʋgẽ, d yãame tɩ neb nins sẽn dɩk b mens n kõ a Zeova wã sã n modg tɩ bãmb ne yẽ zoodã kell n tall pãnga, b tõe n kell n paa a fu-roogẽ wã. La bõe la d tõe n maan n paam zood a woto buudu? Yɩɩn-sõamyã 15 soabã sõngd-d lame tɩ d bãng bũmb wʋsg rẽ wɛɛngẽ. (Karm-y Yɩɩn-sõamyã 15:1-5.) Yɩɩn-kãng kõta sagls sẽn tõe n sõng-d tɩ d tall zood sõma ne Wẽnnaam.
2. A Davɩɩd sẽn wa n gomd a Zeova “fu-roogã” yellã, tõe tɩ yaa bõe yell la a ra tagsda?
2 Yɩɩn-sõamyã 15 soabã sɩngrẽ, b sokame yaa: “Zeova, ãnda n tõe n sig sãand yãmb fu-roogẽ wã? Ãnda n tõe n zĩnd yãmb tãn-sõngã zugu?” (Yɩɩn. 15:1) Yɩɩn-gʋlsd a Davɩɩd sẽn gom a Zeova “fu-roogã” yellã, tõe tɩ yaa sɛk-roogã sẽn da be Gabawõ wakat bilf yĩngã yell la a ra tagsda. A Davɩɩd goma Wẽnnaam “tãn-sõngã” yell me. Tõe tɩ yaa Siyõ tãngã sẽn be Zerizalɛmmã yell la a ra gomda. A Davɩɩd ra tii fu-roog tãn-kãng zugu, n na n ning kãabg koglgã beenẽ n tãag wakat ning b sẽn na n me roog a yĩngã. Tãn-kãng bee Gabawõ goabga, t’a zãrmã zems kɩlo piiga.—2 Sãm. 6:17.
3. Bõe yĩng tɩ d segd n bao n bãng Yɩɩn-sõamyã 15 wã sẽn yet bũmb ningã? (Ges-y fotã me.)
3 Yaa sɩd tɩ Israyɛll nebã fãa la bal ra pa tʋmd sɛk-roogẽ wã, tɩ sẽn da tõe n kẽng-b fu-roog ning pʋgẽ kãabg koglgã sẽn be wã sõor me ra pa waoog ye. La sẽn maand-b sɩd ne a Zeova wã fãa ra tõe n siga a fu-roogẽ wã la b kell n yɩ a zo-rãmba. D fãa rata woto. Yɩɩn-sõamyã 15 wã sõdga zʋg-sõma kẽer d sẽn segd n bɩɩse, n kell n yɩ a Zeova zo-rãmba.
A Davɩɩd wakatẽ wã, Israyɛll nebã ra tõe n mamsame tɩ b bee a Zeova fu-roogẽ wã (Ges-y sull a 3)
KẼND-Y NE BURKĨND LA Y MAAND SẼN YAA TƖRGA
4. Bõe n wilgd tɩ reeg lisg bal pa seke? (Ezayi 48:1)
4 Yɩɩn-sõamyã 15:2 pʋgẽ, b yeelame tɩ Wẽnnaam zoa “yaa ned ning sẽn kẽnd ne burkĩndi, sẽn maand sẽn yaa tɩrga.” Gom-biis nins sẽn yaa “kẽnd” la “maandã” wilgdame tɩ yaa bũmb d sẽn segd n maand n pa basdẽ ye. La rẽ yĩnga, d sɩd tõe n ‘kẽna ne burkĩnd’ bɩ? N-ye. Baa ned sẽn zems zãng sẽn ka be wã, d sã n maand d sẽn tõe fãa n sakd a Zeova, a getame tɩ d ‘kẽnda ne burkĩndi.’ D sẽn wa n dɩk d meng n kõ Wẽnnaam n deeg lisgã, yaa d sẽn sɩng kẽn ne Wẽnnaam bala. Tẽeg-y tɩ pĩnd wẽndẽ wã, pa ned sẽn da yaa Israyɛll buudã ned yĩng bal la b tõe n yeel t’a siga a Zeova fu-roogẽ wã ye. Israyɛll neb kẽer da boonda Wẽnnaam, la ra pa ne “sɩd la tɩrlem” ye. (Karm-y Ezayi 48:1.) Israyɛll ned sã n da rat n wilg t’a sɩd rat n yɩɩ a Zeova zoa, a ra segd n bao n bãnga a noyã la a tũ. Rũndã-rũndã me, ned sã n dat n ta a Zeova yam, a sã n deeg lisg n lebg a Zeova Kaset soab bala pa sek ye. A segd n “maanda sẽn yaa tɩrga.” Rẽ rat n yeelame tɩ bõe?
5. Sak a Zeova bũmb fãa pʋgẽ wã rat n yeelame tɩ bõe?
5 A Zeova nifẽ, “kẽnd ne burkĩnd” la “maand sẽn yaa tɩrgã” zʋʋga d sẽn na n kẽnd Rĩungã roogẽ n pa vaandẽ bala. (1 Sãm. 15:22) D segd n modgd n sakda Wẽnnaam noyã d vɩɩmã nens fãa pʋsẽ, baa d sã n wa yaa d yembre. (Yel. 3:6; Koɛ. 12:13, 14) Tara yõod tɩ d modgd n sakd a Zeova, baa yel-bõonesã pʋsẽ. D sã n maand woto, d wilgdame tɩ d sɩd nong-a lame. Rẽ na n kɩtame t’a maneg n nong tõndo.—Zã 14:23; 1 Zã 5:3.
6. Sã n yaa ne Ebre-rãmb 6:10-12, bõe n tar yõod n yɩɩd bõn-sõma nins d sẽn maan pĩndã?
6 A Zeova sũur nooma wʋsg ne bũmb nins d sẽn zoe n maan n kõ-a wã. La bõn-sõma nins d sẽn maan pĩndã bal pa sek d na kell n pa a Zeova fu-roogẽ wã ye. Ebre-rãmb 6:10-12 wilgda rẽ vẽenega. (Karm-y-yã.) A Zeova pa yĩmd bõn-sõma nins d sẽn maan pĩndã yell ye. La a ratame tɩ d kell n sak-a ne d sũur fãa “n tãag saabã.” D sã n “pa koms raood n base,” d na n wa yɩɩ a zo-rãmb wakat sẽn kõn sa yĩnga.—Gal. 6:9.
TOGSD-Y Y MENG SƖDA
7. Togsd-f meng sɩd rat n yeelame tɩ bõe?
7 Ned ning fãa sẽn dat n sig a Zeova fu-roogẽ wã segd n “togsda a meng sɩda.” (Yɩɩn. 15:2) Pa rat n yeel tɩ yaa ned sẽn pa yagd ziri bal ye. A Zeova ratame tɩ d yɩ pʋ-peelem dãmb d no-goamã la d tʋʋm-tʋmdɩ wã pʋgẽ. (Ebre. 13:18) Rẽ tara yõodo, “bala a Zeova kisa zãmb soaba, la yaa nin-tɩrsã n paamd a zoodo.”—Yel. 3:32.
8. D segd n zãaga d meng ne bõe?
8 Ned sẽn ‘togsd a meng sɩd’ pa sakd Wẽnnaam noyã a sã n wa be neb sʋka, n yaool n kɩɩsd no-kãens a sã n wa yaa a yembr ye. (Eza. 29:13) A pa maand zãmb ye. Zãmb soab tagsdame tɩ pa wakat fãa la a Zeova noyã tũub nafd ned ye. (Zak 1:5-8) A tõe n kɩɩsda a Zeova noyã bũmb nins a sẽn tagsd tɩ pa tar yõod wʋsgã wɛɛngẽ. Sã n wõnd rẽ pa wat ne zu-loeese, tõe n kɩtame t’a kɩɩs Wẽnnaam noy a taaba. Baa a sã n tagsdẽ t’a tũuda Wẽnnaam, a pa tat a Zeova yam ye. (Koɛ. 8:11) Tõnd yẽ rat n yɩɩ pʋ-peelem dãmb bũmb fãa pʋgẽ.
9. A Zeezi sẽn yeel bũmb ning a sẽn wa n yã a Natanayɛll pipi wã wilgda tõnd bõe? (Ges-y fotã me.)
9 Tara yõod wʋsg tɩ d yɩ ned sẽn togsd a meng sɩda. Bũmb ning sẽn maan a Filip sẽn wa n tall a zoa a Natanayɛll n wa a Zeezi nengẽ wã wilgda rẽ. Baa a Zeezi sẽn da zɩ n yãa a Natanayɛllã, a yeelame yaa: “Ad Israyɛll ned meng-menga, zãmb sẽn pa be a pʋgẽ.” (Zã 1:47) Yaa vẽeneg t’a Zeezi ra miime t’a karen-biis a taabã yaa pʋ-peelem dãmba, la a yãame t’a Natanayɛll pʋ-peelmã yaa kãseng wʋsgo. A Natanayɛll ra yaa ned sẽn pa zems zãng wa tõndo. La a ra pa pʋ-lik soab ye. A ra maanda pʋ-peelem bũmb fãa pʋgẽ. Rẽ yɩɩ a Zeezi noogo, t’a pẽg-a. D sã n paam t’a Zeezi pẽg-d woto, yaa zu-zẽkr tɛke!
A Filip talla a Natanayɛll n wa a Zeezi nengẽ, t’a Zeezi yeel tɩ zãmb pa be a pʋgẽ ye. B tõe n goma tõnd me yell n yeel woto bɩ? (Ges-y sull a 9)
10. Bõe yĩng tɩ d segd n gũusd ne d no-goamã? (Zak 1:26)
10 Bũmb nins b sẽn sõdg Yɩɩn-sõamyã 15 wã pʋgẽ wã fãa la bal yaa d manesem sẽn segd n yɩ to-to ne d taabã wɛɛngẽ. Yɩɩn-sõamyã 15:3 yeelame tɩ ned sẽn sig a Zeova fu-roogẽ wã “pa tar a zɩlemdã n maand munaafɩglem, a pa maand a to wẽnga, la a pa sãamd a zo-rãmb yʋy me ye.” D sã n maand munaafɩglem tõe n sãama d taabã sũuri, la kɩt tɩ d pa tõe n pa a Zeova fu-rogẽ wã ye.—Karm-y Zak 1:26.
11. Munaafɩglem yaa bõe, la ned sã n maan munaafɩglem n pa tek yam n kos sugri bõe la b maanda?
11 Yɩɩn-gʋlsdã goma munaafɩglem yelle. Munaafɩglem yaa bõe? Yaa zirẽ-beed ned sẽn togse, n na n sãam a to yʋʋre. Ned sã n maan munaafɩglem n pa tek yam n kos sugri, b yiisd-a-la tigingã pʋgẽ.—Zer. 17:10.
12-13. Togs-y bũmb kẽer sẽn tõe n maan tɩ d wa sãam d zoa yʋʋr n pa bãnge. (Ges-y fotã me.)
12 Yɩɩn-sõamyã 15:3 wilgdame me tɩ ned sẽn sig a Zeova fu-roogẽ wã pa maand a to wẽnga, la t’a pa sãamd a zo-rãmb yʋy me ye. Wãn to la ned tõe n sãam a zoa yʋʋre?
13 D sã n togsd goam sẽn pa kengd raood ned zugu, d tõe n sãama a yʋʋr n pa bãng ye. Wala makre: 1) Saam-bi-poak sẽn da yaa so-pakd sẽn yãk yam n na n base, 2) pag ne a sɩd sẽn da tʋmd Betɛllẽ wã n wa base, wall 3) saam-biig n pa le yaa kãsem-soab wall kãsem-sõangd ye. D sã n yet nebã tɩ tõe tɩ yaa nin-kãens sẽn beeg yĩng la b yɛlã sẽn toeemã, pa sõma ye. Bũmb toor-toor n tõe n kɩt tɩ b yɛlã toeeme. Hakɩɩka, ned sẽn sig a Zeova fu-roogẽ wã “pa maand a to wẽnga, la a pa sãamd a zo-rãmb yʋy me ye.”
Yaa nana tɩ d yelg goam sẽn pa kengd raood neb a taabã zugu, tɩ tõe n wa lebg munaafɩglem menga (Ges-y sull 12-13)
WAOOGD-Y NEB NINS SẼN ZOET A ZEOVA WÃ
14. Ãnd dãmb la neb nins “sẽn ka bark” t’a Zeova zo-rãmbã segd n zãag b mens ne-wã?
14 Yɩɩn-sõamyã 15:4 yeelame t’a Zeova zoa “zãagda a meng ne ned sẽn ka barka.” D maanda a wãn n bãng ned sẽn ka barka? D pa tõe n tik tõnd mengã tagsgã zug n bãng ned sẽn ka bark n bak ye. Bõe yĩnga? D yaa neb sẽn pa zems zãnga, tɩ kɩt tɩ d tõe n nong neb d sẽn get tɩ b tara zʋg-sõma yĩnga, la d pa nong sãnda, b manesem sẽn yikd d sũur yĩnga. Rẽ n so tɩ d segd n zãagd d meng ne neb nins “sẽn ka bark” a Zeova nifẽ wã bala. (1 Kor. 5:11) Wala makre, neb nins sẽn tʋmd tʋʋm-wẽns n pa rat n tek yam kos sugrã, sẽn pa nand-b tõnd sẽn tẽed bũmb ninsã, wall sẽn dat-b n sãam tõnd ne a Zeova zoodã.—Yel. 13:20.
15. Bõe la d tõe n maan n wilg tɩ d waoogda “neb nins sẽn zoet a Zeova wã”?
15 La Yɩɩn-sõamyã 15:4 yeel-d lame tɩ d waoogd “neb nins sẽn zoet a Zeova wã.” Rẽ n so tɩ d modgd n maand a Zeova zo-rãmb a taabã neere, la d waoogd-ba. (Rom. 12:10) Wãn to? Sã n yaa ne Yɩɩn-sõamyã 15:4, bũmb a ye yaa tɩ ned sẽn sig a Zeova fu-roogẽ wã “sã n maan pʋlenga, a pa lebsd a noorã poorẽ, baa sã n wa yaa toog ne-a” ye. Yaa vẽeneg tɩ d sã n pʋlem n pa pidsi, sãamda neb a taabã sũuri. (Mat. 5:37) Wala makre a Zeova ratame t’a zo-rãmb nins sẽn kẽ kãadmã pids pʋleng ning b sẽn maan b kãadmã daarã. Roagdbã sã n modgd n pids bũmb nins b sẽn pʋlemd b kambã me, nooma a Zeova. D sẽn nong Wẽnnaam la d taabã yĩnga, d na n maanda d sẽn tõe fãa n pidsd d pʋlemsã.
16. Bõe me la d tõe n maan n waoog a Zeova zo-rãmbã?
16 Bũmb a to d sẽn tõe n maan n waoog Wẽnnaam zo-rãmbã yaa d sẽn na n yaa kõatb la neb sẽn nong sãamb reegre. (Rom. 12:13) D sã n naagd d tẽed-n-taasã n kokd pemsem, paasda tõnd ne bãmb zoodã, la tõnd ne a Zeova zoodã pãnga. Sẽn paase, d sã n nong sãamb reegre, d rɩkda a Zeova togs-n-taare.
ZÃAG-Y Y MENG NE LIGDÃ NONGLEM
17. Bõe yĩng tɩ b gomd ligd yell Yɩɩn-sõamyã 15 wã pʋgẽ?
17 Yɩɩn-gʋlsdã yeelame t’a Zeova zoa “pa pengd ned ligd n dogl yõodo, a pa reegd noor-madgr n dõd bʋʋm soab me ye.” (Yɩɩn. 15:5) Bõe yĩng tɩ b gomd ligd yell yɩɩn-kãngã pʋgẽ? Yaa tɩ d sã n pa tall tagsg sẽn zems ligdã wɛɛngẽ, d tõe n wa maana bũmb n sãam neb a taabã sũuri, wall tõnd ne Wẽnnaam zoodã. (1 Tɩm. 6:10) Pĩnd wẽndẽ wã, Israyɛll neb kẽer ra wẽgda b saam-biis nins sẽn yaa naong rãmbã, n pengd-b ligd n dogend yõodo. Sẽn paase, bʋ-kaoodb kẽer da sakd n deegda noor-madgre, n kao bʋʋm soab bʋʋd kɛgre. A Zeova kisa manesem a woto buudu.—Eze. 22:12.
18. Sogs-bʋs n tõe n sõng-d tɩ d bãng d tagsg sẽn yaa a soab ne ligdã? (Ebre-rãmbã 13:5)
18 Yɩta sõma tɩ d fees d meng n ges d tagsg sẽn yaa a soab ne ligdã. Sok-y meng yaa: ‘Mam wae n tagsda ligdã yelle, la bũmb nins m sẽn tõe n da wã yell bɩ? M sã n peng ligdi, m pa yãgd ne yaoobo, n yetẽ t’a soabã pa tar a raab bɩ? M sã n tar ligdi, m getame tɩ m sãoo m taabã bɩ? M getame tɩ yaa toog tɩ m kõ ned bũmb bɩ? M tagsdame tɩ m tẽed-n-taag sã n tar ligd wʋsgo, yaa a sẽn nong ligdã n yɩɩd a Zeova yĩng bɩ? Mam baooda sẽn tar-b ligdã zoodo, la m maand m toog kae ne naong rãmbã bɩ?’ D sẽn paam n sig sãand a Zeova fu-roogẽ wã yaa zu-zẽkr tɛkẽ! La yaa d sã n zãag d mens ne ligdã nonglem bal la d na n kell n yɩ a Zeova zo-rãmba. D sã n maan woto, a Zeova pa na n tol n daag-d n bas ye.—Karm-y Ebre-rãmb 13:5.
A ZEOVA NONGA A ZO-RÃMBÃ
19. Bõe yĩng t’a Zeova rat tɩ d maand bũmb nins sẽn be Yɩɩn-sõamyã 15 pʋgẽ wã?
19 Yɩɩn-sõamyã 15 wã baasgẽ, b yeelame yaa: “Ned ning fãa sẽn maand woto pa na n tol n maan yɩɩr ye.” (Yɩɩn. 15: 5) Gom-kãensã wilgda bũmb nins sẽn kɩt t’a Zeova rat tɩ d maand bũmb nins sẽn be yɩɩn-kãngã pʋgẽ wã. A ratame tɩ d vɩɩmã yɩ noogo. Rẽ n so t’a kõt-d saglse, tɩ d sã n tũ bɩ a ning-d bark la a kogl-do.—Eza. 48:17.
20. Bõe la sẽn be-b a Zeova fu-roogẽ wã saagd n na n wa paame?
20 Neb nins sẽn be a Zeova fu-roogẽ wã na n wa paama vɩɩm sẽn be yamleoogo. Sẽn paam-b vʋʋsem sõng zaeebã sã n kell n maan sɩd ne Wẽnnaam, b na n wa paam n kẽe “rot” nins a Zeezi sẽn tɩ segl saasẽ n bĩng-bã pʋsẽ. (Zã 14:2) Sẽn saagd-b n na n wa vɩɩmd tẽngã zug wakat sẽn kõn sa wã gũuda Vẽnegr 21:3 pidsgu. Hakɩɩka, d sẽn paam t’a Zeova sak tɩ d sig a fu-roogẽ wã, tɩ d tõe n pa be wakat sẽn kõn sa yĩngã yaa zu-zẽkr tɛkẽ!
YƖƖLL 39 D bao yʋ-noog Wẽnnaam nifẽ
