ARTÍCULO ÑA̱ KAʼVIYÓ 24
YAA 24 Ná ku̱ʼu̱nyó yuku̱ Jehová
Ná kǒo keeyó ti̱xin veʼe Jehová
“Jehová Ndióxi̱ miíi̱, ¿ndáana kúú na̱ kivi koo veʼún?”(SAL. 15:1).
TEMA
¿Ndáaña kúni̱ Jehová keʼéyó ña̱ va̱ʼa kutáʼanyó xíʼinra, ta ndáa ki̱ʼva kúni̱ra keʼéyó xíʼin na̱ migora?
1. ¿Ndáaña sákuaʼayó xíʼin ña̱ káʼa̱n Salmo 15:1-5?
NU̱Ú artículo ña̱ ni̱ya̱ʼa sa̱kúaʼayó ña̱ ndiʼi miíyó na̱ xa̱a̱ nda̱kuchi kivi kooyó migo Jehová tasaá viíní kutáʼanyó xíʼinra. Soo, ¿ndáaña keʼéyó ña̱ va̱ʼa viíní xa̱a̱yó kutáʼanyó xíʼinra? Nu̱ú ña̱ Salmo 15 va̱xi ña̱ kivi chindeétáʼan xíʼinyó ña̱ va̱ʼa xa̱a̱yó viíní kutáʼanyó xíʼinra (kaʼvi Salmo 15:1-5). a
2. ¿Ndáaña sana nda̱kanixi̱ní ta̱ David xa̱ʼa̱ tá ni̱ka̱ʼa̱nra xa̱ʼa̱ veʼe Jehová?
2 Salmo 15:1 káchiña: “Jehová Ndióxi̱ miíi̱, ¿ndáana kúú na̱ kivi koo veʼún? Ta, ¿ndáana kivi koo yuku̱ ña̱ yi̱i̱ní nu̱ú íyoún?”. Tá ni̱ka̱ʼa̱n ta̱ rey David xa̱ʼa̱ veʼe Jehová sana nda̱kanixi̱níra xa̱ʼa̱ ña̱ tabernáculo saáchi ni̱xi̱yo iin tiempo ña̱ ni̱xi̱yoña ñuu Gabaón. Ta saátu ta̱ David káʼa̱nra xa̱ʼa̱ yuku̱ ña̱ yi̱i̱ní, ta sana xa̱ʼa̱ yuku̱ Sion ña̱ xi̱ndikaa̱ Jerusalén ni̱ka̱ʼa̱nra xa̱ʼa̱. Kán ki̱ʼva 10 kilómetro chí sur ña̱ Gabaón ta̱ David i̱xava̱ʼara iin veʼe loʼo nu̱ú kundikaa̱ tú arca ña̱ trato ta ke̱ʼéra ña̱yóʼo nani íxava̱ʼana templo nu̱ú kundichi túyóʼo (2 Sam. 6:17).
3. ¿Nda̱chun xíniñúʼu kundi̱ʼi̱-iniyó xa̱ʼa̱ ña̱ káʼa̱n Salmo 15? (Koto na̱ʼná).
3 Ku̱a̱ʼání na̱ israelita kǒo níkivi kachíñuna ti̱xin tabernáculo saátu kǒo níkivi ki̱ʼvina nu̱ú xi̱ndikaa̱ arca ña̱ trato. Soo, ndiʼi na̱yóʼo kiviva koona veʼe Jehová tá xi̱chikaa̱na ndee̱ ña̱ vií kutáʼanna xíʼinra. Ta ña̱yóʼo kúútu ña̱ kúni̱ miíyó keʼévayó. Nu̱ú ña̱ Salmo 15 káʼa̱n ta̱ David xa̱ʼa̱ sava ña̱ʼa ña̱ xíniñúʼu keʼéyó ña̱ va̱ʼa kooyó migo Jehová.
Na̱ israelita na̱ ni̱xi̱yo tiempo ta̱ David va̱ʼaní xi̱kunda̱a̱-inina tá xi̱kaʼa̱nna xíʼinna ña̱ koona veʼe Jehová chi tiempo saá ni̱xi̱yo ku̱a̱ʼání veʼe ña̱ tela. (Koto párrafo 3).
NINA ÑA̱ VA̱ʼA NÁ KEʼÉYÓ
4. ¿Á xa̱ʼa̱ ña̱ xa̱a̱ nda̱kuchiyó kúni̱ kachiña ña̱ kíndo̱o-ini Jehová xíʼin ña̱ kéʼéyó? (Isaías 48:1).
4 Nu̱ú Salmo 15:2, káʼa̱nña xa̱ʼa̱ na̱ migo Jehová ña̱ ndiʼi tiempo xíniñúʼu keʼéna ña̱ va̱ʼa ta nda̱kú koo inina xíʼinra. Soo, ¿á kivi keʼéyóña? Kiviva. Ni kúúyó na̱ yiví ku̱a̱chi, soo tá xíniso̱ʼoyó ña̱ káʼa̱n Jehová kivi ka̱ʼa̱nra xa̱ʼa̱yó ña̱ kúúyó na̱ yiví va̱ʼa. Tá ndákuchiyó saá kúú ña̱ kivi chika̱a̱kayó ndee̱ ña̱ viíka ndasakáʼnuyó Jehová. Tiempo xi̱naʼá ku̱a̱ʼání na̱ israelita xi̱kaʼa̱n ña̱ xi̱ndasakáʼnuna Jehová, soo su̱ví xíʼin ndinuʼu-inina níxi̱keʼénaña (kaʼvi Isaías 48:1). b Soo na̱ ndixa xi̱kuni̱ ndasakáʼnu Jehová, xi̱niñúʼu kunda̱a̱-inina ndáaña xi̱kuni̱ra keʼéna. Ta saátu tiempo vitin su̱ví xa̱ʼa̱ ña̱ xáʼa̱nyó reunión á xa̱ʼa̱ ña̱ nda̱kuchiyó kúni̱ kachiña ña̱ kíndo̱o-ini Jehová xíʼin ña̱ kéʼéyó, chi ndiʼi tiempo xíniñúʼu keʼéyó ña̱ kútóora. Soo, ¿ndáa ki̱ʼva keʼéyóña?
5. ¿Ndáaña kúni̱ kachi ña̱ keʼéyó nina ña̱ va̱ʼa nu̱ú Jehová?
5 ¿Á xa̱ʼa̱ ña̱ xáʼa̱nyó ndiʼi semana reunión kúni̱ kachiña ña̱ kéʼéyó ña̱ va̱ʼa nu̱ú Jehová ta nda̱kú íyo iniyó xíʼinra? Su̱ví saáví íyoña (1 Sam. 15:22). Miíyó na̱ ndásakáʼnu Ndióxi̱ xíniñúʼu chikaa̱yó ndee̱ ña̱ keʼéyó nina ña̱ va̱ʼa ni íyo mitúʼunyó (Prov. 3:6; Ecl. 12:13, 14). Ña̱kán ndiʼi tiempo ná chika̱a̱yó ndee̱ ña̱ kuniso̱ʼoyó ña̱ káʼa̱n Jehová xíʼinyó, ni túviyó ña̱ su̱ví ña̱ ndeé kúúña, chi saá kúú ña̱ na̱ʼa̱yó ña̱ kúʼvi̱-iniyó xíniyó Jehová ta saátu miíra kusi̱íní-inira xíʼinyó (Juan 14:23; 1 Juan 5:3).
6. ¿Ndáaña xíniñúʼu keʼékayó ni nda̱kú ni̱xi̱yo iniyó xíʼin Jehová tá ya̱chi̱? (Hebreos 6:10-12).
6 Ndiʼi ña̱ xa̱a̱ kéʼéyó xa̱ʼa̱ Jehová ndáyáʼviníña nu̱úra. Ni nda̱kúní ni̱xi̱yo iniyó xíʼin Jehová tá ya̱chi̱, soo su̱ví ña̱yóʼo kúni̱ kachiña ña̱ kivi kooyó veʼera ndiʼi tiempo, nda̱a̱ táki̱ʼva káʼa̱n Hebreos 6:10-12 (kaʼviña). Kǒo nándósó-iniví Jehová xa̱ʼa̱ ndiʼi ña̱ xa̱a̱ ke̱ʼéyó nu̱úra. Soo kúni̱ra ña̱ ná chika̱a̱yó ndee̱ ña̱ kachíñuyó xíʼin ndiʼi níma̱yó nu̱úra nda̱a̱ ná kuviyó. Tá kǒo sándakooyó ña̱ ndasakáʼnuyó Jehová kivi kooyó migora ndiʼi tiempo (Gál. 6:9).
NINA ÑA̱ NDA̱A̱ NÁ KA̱ʼA̱NYÓ
7. ¿Ndáa ki̱ʼva kúni̱ Jehová kooyó?
7 Salmo 15:2 káʼa̱nña ña̱ ndiʼi na̱ kána Jehová veʼera nina ña̱ nda̱a̱ xíniñúʼu ka̱ʼa̱nna. Kǒo kúni̱ Jehová sandáʼviyó inkana chi kúni̱ra ña̱ nina ña̱ va̱ʼa keʼéyó (Heb. 13:18). Ndáyáʼviní ña̱yóʼo saáchi Jehová kúndasíra xínira na̱ sándaʼvi, soo va̱ʼaní kítáʼanra xíʼin na̱ káʼa̱n ña̱ nda̱a̱ (Prov. 3:32).
8. ¿Ndáaña kǒo xíniñúʼu keʼéyó?
8 Savana va̱ʼaní kéʼéna tá íyona xíʼin na̱ hermano, soo tá íyo mitúʼunna kéʼéna ña̱ kǒo kútóo Jehová. Soo na̱ íyo veʼe Jehová ndiʼi tiempo kéʼéna na̱ va̱ʼa (Is. 29:13). Miíyó kǒo kúni̱yó keʼéyó nda̱a̱ táki̱ʼva kéʼé sava na̱ yiví. Soo, ¿ndáa ki̱ʼva kíxáʼana kéʼéna ña̱yóʼo? Sana kíxáʼana xíka-inina xíʼin ña̱ káʼa̱n Jehová, saáchi ndákanixi̱nína ña̱ kǒo chíndeétáʼanví consejo ña̱ káʼa̱nra xíʼinna (Sant. 1:5-8). Sava yichi̱ ndákanixi̱nína ña̱ kǒo xíniñúʼu kuniso̱ʼovína ña̱ káʼa̱n Jehová, chi túvina ña̱ su̱ví ña̱ ndeéví kúú ña̱ kúni̱na keʼéna, ta tá xítona ña̱ kǒo tu̱ndóʼo va̱xi nu̱úna xa̱ʼa̱ ña̱ ke̱ʼéna, kíxáʼa kéʼéna ku̱a̱chi ña̱ ndeéka nu̱ú Ndióxi̱. Xa̱ʼa̱ ña̱kán ni káʼa̱nnívana ña̱ ndásakáʼnuna Ndióxi̱ soo kǒo kíndo̱o inira xíʼin ña̱ kéʼéna (Ecl. 8:11). Soo, miíyó kúni̱yó ka̱ʼa̱nyó nina ña̱ nda̱a̱ ta kǒo kúni̱yó sandáʼviyó.
9. ¿Ndáaña sákuaʼayó xíʼin ña̱ ku̱u tá xi̱nitáʼan ta̱ Jesús xíʼin ta̱ Natanael? (Koto na̱ʼná).
9 Ndáyáʼviní ña̱ ka̱ʼa̱nyó nina ña̱ nda̱a̱, ná kotoyó ndáa ña̱ ku̱u tá xi̱ni ta̱ Jesús ta̱ Natanael. Tá ni̱xa̱a̱ ta̱ Felipe xíʼin ta̱ Natanael nu̱ú ta̱ Jesús ku̱u iin ña̱ʼa ña̱ ndáyáʼviní, ta̱ Jesús kǒo níxi̱xini̱ra ta̱ Natanael soo tá xi̱nirara ni̱ka̱ʼa̱nra: “Kotondó, iin ta̱ ñuu Israel ta̱ kǒo sándaʼvi” (Juan 1:47). Ta̱ Jesús xi̱xini̱vara ndáa ki̱ʼva ni̱xi̱yo na̱ discípulora, soo xi̱kunda̱a̱-inira ña̱ va̱ʼaní ni̱xi̱yo-ini ta̱ Natanael chi kǒo sándáʼvira na̱ yiví. Nda̱a̱ táki̱ʼva íyo miíyó saá ni̱xi̱yo ta̱ Natanael chi ta̱ ku̱a̱chi xi̱kuura soo xi̱chika̱a̱níra ndee̱ ña̱ ka̱ʼa̱nra nina ña̱ nda̱a̱. Ta xa̱ʼa̱ ña̱kán va̱ʼaní ni̱ka̱ʼa̱n ta̱ Jesús xa̱ʼa̱ra, ta saátu miíyó kusi̱íní-iniyó tá saá ná ka̱ʼa̱n ta̱ Jesús xa̱ʼa̱yó.
Tá ni̱ka̱ʼa̱n ta̱ Felipe xíʼin ta̱ Jesús “ta̱yóʼo kúú ta̱ Natanael”, ta̱ Jesús ni̱ka̱ʼa̱nra iin ta̱a va̱ʼa kúú ta̱ Natanael chi kǒo sándáʼvira na̱ yiví. ¿Á ka̱ʼa̱n ta̱ Jesús ña̱yóʼo xa̱ʼa̱ miíyó? (Koto párrafo 9).
10. ¿Nda̱chun xíniñúʼu kiʼinníyó kuenta xíʼin ña̱ káʼa̱nyó? (Santiago 1:26).
10 Ña̱ Salmo 15 káʼa̱nña xa̱ʼa̱ ki̱ʼva ña̱ xíniñúʼu kooyó á keʼéyó xíʼin inkana. Salmo 15:3 káʼa̱nña ña̱ ndiʼi na̱ kána Jehová veʼera va̱ása káʼa̱nna ña̱ síkí ta “kǒo kéʼéna ña̱ va̱ása va̱ʼa xíʼin inkana ta kǒo káʼa̱nna ña̱ va̱ása va̱ʼa xa̱ʼa̱ na̱ migona”. Tá kǒo kíʼinyó kuenta xíʼin ña̱ káʼa̱nyó kivi sandákavayó-ini inkana ta kǒo kivi kookayó veʼe Jehová á ña̱ kooyó migora (kaʼvi Santiago 1:26).
11. ¿Ndáaña kúú tu̱ʼun síkí, ta ndáaña kéʼéna xíʼin na̱ kǒo ndándikó-ini xa̱ʼa̱ ña̱ káʼa̱nna tu̱ʼun síkí?
11 Nu̱ú ña̱ Salmo 15, ta̱ salmista ka̱ʼyíra xa̱ʼa̱ na̱ káʼa̱n tu̱ʼun síkí. Soo, ¿ndáaña kúú ña̱yóʼo? Ña̱yóʼo kúni̱ kachiña ña̱ ka̱ʼa̱nna ña̱ vatá á ña̱ to̱ʼón xa̱ʼa̱ iin na̱ yiví, chi kúni̱na ña̱ ka̱ʼa̱n ndi̱va̱ʼa inka na̱ yiví xa̱ʼa̱na. Tá iin na̱ ñaniyó á ku̱ʼvayó káʼa̱nna tu̱ʼun síkí ta kǒo ndándikó-inina xa̱ʼa̱ ña̱ kéʼéna távanana ti̱xin congregación (Jer. 17:10).
12, 13. Tá kǒo kiʼinyó kuenta, ¿ama kúú ña̱ sana kixáʼayó ka̱ʼa̱nyó ña̱ va̱ása va̱ʼa xa̱ʼa̱ na̱ migoyó? (Koto na̱ʼná).
12 Ña̱ Salmo 15:3 sándakaʼánña miíyó ña̱ ndiʼi na̱ íyo veʼe Jehová kǒo kéʼéna ña̱ va̱ása va̱ʼa xíʼin inkana, ta ni kǒo káʼa̱nna ña̱ va̱ása va̱ʼa xa̱ʼa̱ na̱ migona. Soo, tá kǒo kíʼinyó kuenta, ¿ama kúú ña̱ sana kixáʼayó ka̱ʼa̱nyó ña̱ va̱ása va̱ʼa xa̱ʼa̱ na̱ migoyó?
13 Sava yichi̱ kǒo kíʼinyó kuenta ta kíxáʼayó káʼa̱nyó ña̱ vatá á ña̱ to̱ʼón xa̱ʼa̱ na̱ migoyó. Ná ndakanixi̱níyó xa̱ʼa̱ ña̱ kivi kuu: 1) iin ñá hermana kǒo kúúkañá precursora, 2) iin na̱ matrimonio ke̱ena Betel, 3) iin ta̱ hermano va̱ása kúúkara anciano á siervo ministerial. Tá kúu ña̱yóʼo, ¿á xíniñúʼu kakayó ka̱ʼa̱nyó xa̱ʼa̱na xíʼin inkana? Sana kǒo xíni̱yó ndáaña ku̱u xíʼinna, ña̱kán kǒo xíniñúʼu kakayó ka̱ʼa̱nyó xa̱ʼa̱na. Ná ndakaʼányó chi ndiʼi na̱ ñúʼu veʼe Jehová chíkaa̱na ndee̱ ña̱ kitáʼan va̱ʼana xíʼin ndiʼina ta kǒo káʼa̱nna ña̱ va̱ása va̱ʼa xa̱ʼa̱ na̱ migona.
Kamaníva kixáʼayó ka̱ʼa̱nyó ña̱ va̱ása va̱ʼa xa̱ʼa̱ inkana ta nda̱a̱ kivi kooña tu̱ʼun síkí. (Koto párrafo 12, 13).
NÁ IXATO̱ʼÓYÓ NA̱ KÁCHÍÑU NU̱Ú JEHOVÁ
14. ¿Ndáa ki̱ʼva ndakuniyó na̱ yiví na̱ kúndasí Jehová xínira?
14 Salmo 15:4 káʼa̱nña ña̱ na̱ kúú migo Jehová kǒo kítáʼanna xíʼin na̱ kéʼé ña̱ kúndasíra xínira. Soo, ¿ndáa ki̱ʼva kunda̱a̱-iniyó ndáana kúndasí Jehová xínira? Xa̱ʼa̱ ña̱ kúúyó na̱ yiví ku̱a̱chi kǒo kíví ndakuniyó ndáa ki̱ʼva íyo na̱ yiví, ¿nda̱chun? Saáchi savana va̱ʼaní kítáʼanyó xíʼinna, ta savana sása̱a̱nína miíyó. Ña̱kán na̱ kéʼé ña̱ kúndasí Jehová xínira kúú na̱ kǒo kítáʼanyó xíʼin (1 Cor. 5:11). Na̱ kúndasí Jehová xínira kúú na̱ kéʼé ku̱a̱chi kini ta kǒo ndándikó-inina xa̱ʼa̱ ña̱ kéʼéna, na̱ kǒo íxato̱ʼó miíyó xa̱ʼa̱ ña̱ ndásakáʼnuyó Jehová xíʼin na̱ káʼa̱n xíʼinyó ña̱ kǒo xíniñúʼu ndasakáʼnuyóra (Prov. 13:20).
15. ¿Ndáaña kivi keʼéyó ña̱ va̱ʼa ixato̱ʼóyó na̱ ndásakáʼnu Jehová?
15 Nu̱ú Salmo 15:4 káʼa̱nña xíʼinyó ña̱ xíniñúʼu ixato̱ʼóyó na̱ ndásakáʼnu Jehová, xa̱ʼa̱ ña̱kán va̱ʼa iniyó xíʼin na̱ kúú migo Jehová ta íxato̱ʼóyóna (Rom. 12:10). ¿Ndáa ki̱ʼva keʼéyó ña̱yóʼo? Nu̱ú ña̱ Salmo 15:4 káʼa̱nña ña̱ na̱ íyo veʼe Jehová sáxi̱nuna ña̱ ki̱ndoona keʼéna ni sava yichi̱ íxayo̱ʼvi̱ña xíʼinna. Tá va̱ása sáxi̱nuyó ña̱ ki̱ndooyó keʼéyó kivi sandákavayó-ini inkana (Mat. 5:37). Jehová kúni̱ra ña̱ ná saxínu na̱ ti̱ndaʼa̱ voto ña̱ ke̱ʼéna ki̱vi̱ ña̱ ti̱ndaʼa̱na, saátu kúni̱ra ña̱ ná saxínu ña̱ íyo se̱ʼe ña̱ káʼa̱nna xíʼin na̱ va̱lí se̱ʼena. Xa̱ʼa̱ ña̱ kúʼvi̱-iniyó xíniyó Jehová xíʼin na̱ yiví chíkaa̱yó ndee̱ ña̱ sáxi̱nuyó ña̱ káʼa̱nyó.
16. ¿Ndáaka ña̱ kivi keʼéyó ña̱ va̱ʼa ixato̱ʼóyó na̱ migo Jehová?
16 Inka ki̱ʼva ña̱ na̱ʼa̱yó ña̱ íxato̱ʼóyó na̱ migo Jehová kúú ña̱ va̱ʼa koo iniyó xíʼinna (Rom. 12:13). Tá kánayó na̱ ñaniyó xíʼin ku̱ʼvayó ña̱ ku̱ʼu̱n si̱ína xíʼinyó, saá kúú ña̱ va̱ʼaní kítáʼanyó xíʼina ta saátu xíʼin Jehová. Tá va̱ʼa iniyó xíʼinna kéʼéyó nda̱a̱ táki̱ʼva kéʼé Jehová.
NÁ KǑO KUTÓOYÓ KUMIÍYÓ KU̱A̱ʼÁNÍ XU̱ʼÚN
17. ¿Nda̱chun káʼa̱n Salmo 15 xa̱ʼa̱ xu̱ʼún?
17 Ña̱ Salmo 15 káʼa̱nña ña̱ na̱ íyo veʼe Jehová tá sátatuna xu̱ʼún á tá táxi tóonaña kǒo kíʼinna si̱ki̱ña, ta ni kǒo kéʼéna ña̱ va̱ása va̱ʼa xíʼin na̱ kǒo ku̱a̱chi kúúmií (Sal. 15:5). Loʼoní versículo kúúmií Salmo yóʼo ña̱kán, ¿nda̱chun káʼa̱nña xa̱ʼa̱ xu̱ʼún? Saáchi kivi kixáʼa ku̱ndi̱ʼi̱níka-iniyó xa̱ʼa̱ xu̱ʼún nu̱úka ña̱ kundi̱ʼi̱-iniyó xa̱ʼa̱ Ndióxi̱ á xa̱ʼa̱ na̱ ñaniyó á ku̱ʼvayó. Tá ná kundoʼoyó ña̱yóʼo kivi saxóʼvi̱yó-ini inkana ta va̱ása viíka kitáʼanyó xíʼin Ndióxi̱ (1 Tim. 6:10). Tiempo xi̱naʼá ni̱xi̱yo na̱ xi̱satatu xu̱ʼún á na̱ xi̱taxi tóoña ndaʼa̱ na̱ nda̱ʼví, soo ku̱a̱ʼání si̱ki̱ña xi̱kiʼinna nu̱úna, ta saátu ni̱xi̱yo na̱ juez na̱ xi̱kiʼin xu̱ʼún tasaá va̱ása viíka níxi̱ndatinna ku̱a̱chi xíʼin na̱ yiví. Kúndasíní Jehová xínira ña̱ kéʼé ña̱yóʼo (Ezeq. 22:12).
18. ¿Ndáa pregunta xíniñúʼu ndakanixi̱níyó xa̱ʼa̱? (Hebreos 13:5).
18 Ta miíyó, ¿á kútóoníyó xu̱ʼún? Ná ndakanixi̱níyó xa̱ʼa̱ pregunta yóʼo: “¿Á ndiʼi tiempo ndíʼi̱-inii̱ xa̱ʼa̱ xu̱ʼún ta kúnii̱ satái̱ á kuei̱n ku̱a̱ʼání ña̱ʼa? Tá iinna sátatu á táxi tóona xu̱ʼún ndaʼíi̱, ¿á kúachi̱níi̱ ña̱ chaʼvii̱ nu̱úna chi ndákanixi̱níi̱ ña̱ kǒo xíniñúʼunaña? ¿Á túvii̱ ña̱ ndáyáʼviníi̱ xa̱ʼa̱ ña̱ kúúmiíi̱ ku̱a̱ʼá xu̱ʼún? ¿Á íxayo̱ʼvi̱ña xíʼi̱n ña̱ va̱ʼa koo-inii̱ xíʼin inkana? Tá iin na̱ ñaniyó á ku̱ʼvayó kúúmiína ku̱a̱ʼá xu̱ʼún, ¿á ndákanixi̱níi̱ ña̱ kǒo ndíʼi̱-inina xa̱ʼa̱ chiñu Jehová ta nina xa̱ʼa̱ xu̱ʼún kuití ndíʼi̱-inina? ¿Á nina na̱ ku̱i̱ká kuití kítáʼi̱n xíʼin ta kǒo kítáʼi̱n xíʼin na̱ nda̱ʼví?”. Kúsi̱íní-iniyó ña̱ ñúʼuyó veʼe Jehová ña̱kán ná kǒo kundi̱ʼi̱ní-iniyó xa̱ʼa̱ ña̱ ku̱i̱ká. Tá saá ná keʼéyó kǒo sandákoo ndaʼa̱ Jehová miíyó (kaʼvi Hebreos 13:5).
KÚʼVI̱NÍ-INI JEHOVÁ XÍNIRA NA̱ MIGORA
19. ¿Nda̱chun táxi Jehová consejo ña̱ va̱xi nu̱ú Salmo 15 ndaʼa̱yó?
19 Nu̱ú ndíʼi Salmo 15 káchiña: “Na̱ kéʼé ña̱yóʼo ni iin yichi̱ va̱ása ndakavana” (Sal. 15:5). Ta̱ ka̱ʼyí ña̱ Salmo yóʼo ni̱ka̱ʼa̱nra ña̱ mií Jehová ta̱xi consejo yóʼo ndaʼa̱yó chi kúni̱ra ña̱ si̱í kooyó. Ta nu̱ú ña̱yóʼo káʼa̱nña xíʼinyó ndáaña xíniñúʼu keʼéyó ña̱ va̱ʼa taxi Jehová bendición ndaʼa̱yó ta saátu ña̱ kundaara miíyó (Is. 48:17).
20. ¿Ndáaña va̱ʼa ndakiʼin ndiʼi na̱ íyo veʼe Jehová?
20 Ku̱a̱ʼání ña̱ va̱ʼa taxi Jehová ndaʼa̱ na̱ nda̱kú íyo ini xíʼinra. Na̱ ungido ku̱ʼu̱nna chí ndiví ta kán xa̱a̱ i̱xatu̱ʼva ta̱ Jesús nu̱ú koona (Juan 14:2). Ta ndiʼi na̱ kundoo nu̱ú ñuʼú yóʼo, ndakiʼinna bendición ña̱ káʼa̱n Apocalipsis 21:3. Kúsi̱íní-iniyó chi Jehová nda̱kaxinra miíyó ña̱ kooyó migora ta kivi kooyó veʼera ndiʼi tiempo.
YAA 39 Ná kindo̱o va̱ʼayó nu̱ú Jehová
a Salmo 15:1-5: “Jehová Ndióxi̱ miíi̱, ¿ndáana kúú na̱ kivi koo veʼún? Ta, ¿ndáana kivi koo yuku̱ ña̱ yi̱i̱ní nu̱ú íyoún? 2 Na̱ kéʼé nina ña̱ nda̱kú, na̱ kéʼé nina ña̱ va̱ʼa ta nina ña̱ nda̱a̱ ndákani-inina xa̱ʼa̱. 3 Va̱ása káʼa̱nna ña̱ síkí, kǒo kéʼéna ña̱ va̱ása va̱ʼa xíʼin inkana ta kǒo sákukaʼanna nu̱ú na̱ migona. 4 Kǒo kítáʼanna xíʼin na̱ kúndasí Ndióxi̱ xínira, soo íxato̱ʼóna na̱ ndásakáʼnu Jehová. Ta sáxi̱nuna ña̱ káʼa̱nna ni íxayo̱ʼvi̱ña xíʼinna. 5 Tá sátatuna xu̱ʼún, kǒo kíʼinna si̱kíña. Kǒo kéʼéna ña̱ va̱ása va̱ʼa xíʼin na̱ kǒo ku̱a̱chi kúúmií ni ná kuni̱na chaʼvinana. Na̱ kéʼé ña̱yóʼo ni iin yichi̱ va̱ása ndakavana”.
b Isaías 48:1: “Kuniso̱ʼondó ña̱yóʼo, ndóʼó na̱ veʼe ta̱ Jacob, ndóʼó na̱ káʼa̱n ña̱ naníndó Israel, ndóʼó na̱ ke̱e ti̱xin na̱ veʼe ta̱ Judá, ndóʼó na̱ chínaʼá xa̱ʼa̱ ki̱vi̱ Jehová, ndóʼó na̱ ndásakáʼnu Ndióxi̱ na̱ ñuu Israel, kéʼéndó ña̱yóʼo soo su̱ví xíʼin ndinuʼu-inindó kéʼéndóña ta ni va̱ása kéʼéndó ña̱ nda̱kú”.
