1. Psalmdi 15:​1-5 sa mati a hui da ǁkhā?

 ǃKHARUGO ǁkhāǁkhāǃâs ǃnâ da ge go ǁkhāǁkhāsen ǁnān Jehovab ai ra māǁnâsenan tsî ǁîb ǀkha ǀgū ǀhōsagusisa ūhân ǁîb tentommi ǃnâ a ǃhaokhoesa. Tae-e da a dī ǁkhā î da ǁîb tentommi ǃnâ ǃhaokhoesa ǃkhōǃoahe? Psalmdi 15 ge nēs xa ǂgui xūna ra mî. (Khomai re Psalmdi 15:​1-5 sa.) Nē Psalmdi ge ra hui da ǁnâuǃāsa tae-e da nî dīsa î da Elob di ǀgū ǀhōsa kai.

2. Davida ǀnîsi tae-e ǂâis ǃnâ ge ūhâ i Jehovab tentommi xab gere ǃhoa o?

² Psalmdi 15 ge sao ra dîs ǀkha ra tsoatsoa: “ǃKhūtse, tari-e nî hâ sa tentommi ǃnâ? Tari-e nî ǁan sa ǃanusib di ǃhommi ai?” (Psa. 15:1) Jehovab di “tentommi” xab gere ǃhoa, ob ge ǀnîsi Psalmdi xoa-aob Davida, Gibeons ǃnâ hâ tabernakela ǂâis ǃnâ ge ūhâ i. Davidi ge Elob “ǃanu ǃhommi” xas tsîna ra ǃhoa, īǁkhā i ga ob ge Sionsǃhomma ǃoa ǀnîsi gere ǁnaeǁgau. Davidi ge tentomma ǂnaumâi tsî arka ǁnāpa ge ūhâ ǀgara tempeli ge omhes kōse.—2Sam. 6:17.

3. Tae-i ǃaroma da Psalmdi 15 sa ra ǁnâuǃā ǂgao? (Ai-īsiba mû re.)

³ Hoa Israelǁîn ge ge mā-amhe tama hâ i tabernakeli ǃnâ ǂgâsa. Naun mā-amhe ge hâ în ge tentommi kōse gere ǂgâ ǃgaeǀhaos arki (ǂgaes) ge hâ i ǃkhais tawa. Xawe Jehovab di ǂgomǂgomsa ǃoaba-aon hoan ge ǁgauǁgaus ase ǁîb di ǃhaokhoese nî hâ ǀgara. ǁNāsa da ge hoa da ra ǁkhorebasen. Psalmdi 15 ge Jehovab di ǀhōsa kai ǂgao da ga, o da nî omkhâi tsî ūhâ ǀgara ǀgauga ra ǃhoaǃgao.

ǂHAUǃNÂSE ÛI TSÎ ǂHANU-AISIBA SÎSENǂUI

4. Mati da a ǂan Jehovab ǁāǁnâ kaisens xa ǃnāsa-e ra ǂgaoǀkhā dasa? (Jesajab 48:1)

⁴ Psalmdi 15: 2 ǃnâ î ge Elob ǀhōsa-e “ǂhauǃnâse ra tanisen-i  tsî ǂhanu-aisiba ra sîsenǂui-i” ase ra ǁguiǃāhe. Nē mî ra “tanisen” tsî “sîsenǂui” ti hâ ra ge xū-e dī ǀgarasa ǃoa ra ǁnaeǁgau. Xawe ‘ǂhauǃnâse tanisen’ ǁkhā i da a? Îo, ǀoasa kurusa ūhâ khoe-i ge a ǀkhai. Jehovab ge “ǂhauǃnâse ra tanisen” khoe-i ase ra mû da dītsâ tsî da ga ǁîba ǁnâuǀnam o. Māǁnâsen tsî da ga ǁāǁnâ kaisen, os ge ǁnāsa Elob daob ai hâs di tsoatsoa. Aiǁgaus ase, Elobmîs ǁaeb ǃnâ i ge Isrealǁî ǃhaosa xu ǂoaxasa ǂâibasen tama hâ Jehovab ǃhoakhoets asa. ǀNîn ge ǁîba gere ǂgaiǀî, xawen ge “amab tsî ǂhanu ǀgaub” ǃnâ ǁnāsa ge dī tama hâ i. (Khomai re Jesajab 48:1 sa.) ǂHauǃnâ ǃhaokhoen asen ga Jehovab xa ūǃoahe ǃkhaisan ga ra ǂkhâba, on ge Israelǁîna Jehovab ǂgaoǀkhāde ǁkhāǁkhāsen tsî gere sao. Nētsē da ga Jehovab ǀkha ǀgū ǀhōsagusisa ūhâ ǂgao, o da ge ǁāǁnâ kaisen tsî ǁîb ǃoaba-aon ase ǂanhes xa ǃnāsase nî dī. Aiǃgû tsî da ge ‘ǂhanu-aisiba nî sîsenǂui’. ǁNāsa da mati a dī ǁkhā?

5. Jehovaba hoa xūn ǃnâ ǁnâuǀnamsa tae-e ra ǂâibasen?

⁵ Jehovab mûǁae “ǂHauǃnâse ra tanisen-i, tsî “ǂhanu-aisiba ra sîsenǂui-i” tsîn ge gagasi xūn ǃnâ ǁhaos xa ǃnāsa-e dīsa ǃkhōǂgā hâ. (1Sam. 15:22) Dītsâ tsî da ge Eloba sada di tsēkōrobe ûib ǃnâ nî ǁnâuǀnam, ǀguri da ga hâs tsîna. (ǂKhm. 3:6; Aoǁn. 12:​13, 14) Kaise i ge a ǂhâǂhâsa î da Jehovaba, ǁnātikōse ǂhâǂhâsa tama ti da ra ǂâi mâsigu ǃnâs tsîna ǁnâuǀnam. Nēsa da ga dī, o da ge ra ǁgau ǁîba da a ǀnamsa tsî i ge ǁîb sida ūba hâ ǀnammi tsîna nî kai.—Jhn. 14:23; 1Jhn. 5:3.

6. Hebreǁîn 6:​10-12 ǃoagu tae-e ǃkharuge ǁaeb ǃnâ da ge dī xūn xa ǂhâǂhâsa?

⁶ Jehovab ge ǃgamse ra ǃgôaǃgâ ǃkharuge ǁaeb ǃnâ da gere dība bi xūna. Xawes  ge ǁnāsa ǂâibasen tama ǃkharuge ǁaeb ǃnâ da ge dī ǃgâi xūn ǃgao da Jehovab tentommi ǃnâ ǃhaokhoese nî hâhâsa. Nēs ge ǃgāsase Hebreǁîn 6:​10-12 ǃnâ ra ǁgauhe. (Khomai re.) Amase Jehovab ge dī da ge ǃgâi dīga ǀuru tide. Xaweb ge ra ǂhâba î da sida ǂgaob hoab ǀkha aiǃgû tsî ǁîba ǃoaba ǀgara “ǀunis kōse.” “ǀÛsen tama da ga i” ob ge nî sida ǀhōsa kai ǀamosib kōse.—Gal. 6:9.

AMABA ǂGAOB ǃNÂ ǃHOA

7. ǂGaob ǃnâ amaba ǃhoasa tae-e ra ǂâibasen?

⁷ Khoe-i ga Jehovab tentommi ǃnâ ǃhaokhoe ǂgao, o i ge “ǂgaob â-i ǀkha amaba” nî ǃhoa. (Psa. 15:2) Nēs ge ǂhumi tama is xa ǃnāsa-e ǃkhōǂgā hâ. Jehovab ge ra ǂhâba î da, mî tsî da ra dī xūn ǃnâ ǂhauǃnâsiba ǁgau. (Heb. 13:18) Nēs ge a ǂhâǂhâsa, “ǀhôagao khoeb ge ǃKhūb mûǁae a ui-uisa, xawe ǂhauǃnâ khoebab ge ra ǂgomǃgâ.”—ǂKhm. 3:32.

8. Mâ tanisen ǀgauba xu da nî ǂgōsen?

⁸ ǁNān ‘amaba ǂgaob’ ǃnâ ra ǃhoan ge, khoen xan ra mûhe ǁaeb ai ǀgui ǁnâuǀnam tama. Xawe ǀgurin ga hâ ǁaeb ais tsîna ra ǁnauǀnam. (Jes. 29:13) ǁÎn ge ǀhôagaose tanisen tama. ǀHôagao khoe-i ge Jehovab ǁgaragu hoaǁae ǂhanu tama ti a ǂâi tsoatsoa ǁkhā. (Jak. 1:​5-8) ǁÎ-i ge ǂhâǂhâsa tama ti i ra ǂâi xūn ǃnâ Jehovaba a ǁnauǀnamoǃnâ tsoatsoa ǁkhā. ǁNâuǀnam tama i hâ amaga i tsū xū-e ī tamasa i ga mû, o i ge ǁnās ǂam-ai aiǃgû tsî ǁgai xūna dī tsoatsoa ǁkhā. ǁÎ-i ge Eloba i ra ǃoaba ti a tsâ ǁkhā, xaweb ge Jehovaba ǁî-i ǃoabasa ūǃoa tide. (Aoǁn. 8:11) Sada ge hoa xūn ǃnâ ra ǂhauǃnâ ǂgao.

9. Tae-e ge ī Jesub ge ǂguroǃnās ase Natanaeli ǀkha a ǀhao o tsî ǁnāsa tae-e ra ǁkhāǁkhā da? (Ai-īsiba mû re.)

⁹ ǂHauǃnâ ǂgaoba ūhâs xa da ge Jesub ge ǂguroǃnās ase Natanaela a ǀhao-ū ǃnaeǃkhaisa xu, xū-e ra ǁkhāǁkhāsen. Filipub ge ǁîb ǀhōsab Natanaela Jesuba ǃoa a sī-ū, o i ge kaise ra mâǂoa xū-e ge ī. Jesub ge Natanaela ǂguroǃnās ase ǀhao-ū xaweb ge sao ra mîde ge mî:  “Nē ǃgôaxab ge ama Israelǁîb, gāxaǃnâsi-e ūhâ tamaba.” (Jhn. 1:47) Jesub ge nau ǁkhāǁkhāsabega ǂhauǃnâ khoegu ase ge ǂan-i. Xaweb ge Natanaeli ǃnâ a mû xū-i ge kaise ge ǀō-aisa i. Natanaeli ge sada khami ǀoasa kurusa ge ūhâ tama hâ i. Xaweb ge ǀhôagao tama i tsî hoan ǃnâ ge ǂhauǃnâ i. Jesub ge ǁnā-e Natanaeli xa kaise gere ǃgôaǃgâ tsî ǁîba nēs xa ge koa. Ama as ge hoa da ge ra ǂhâba îb Jesuba ǁnā mîde sida xa mî.

10. Tae-i ǃaroma da sada namsa ǃgâise nî sîsenū? (Jakobub 1:26)

¹⁰ Psalmdi 15 ǃnâ hâ ǂgaoǀkhādi ge nau khoena da ra hâ-ū ǀgauba ǃkhōǂgā hâ. Psalmdi 15:3 ǃôagu i ge Jehovab tentommi ǃnâ hâ ǃhaokhoe-e: ‘Nams ǀkha mîǁgaiǁgai, ǀgūkhoe-i ǃoagu ǂkhabadī tsî ǀgūkhoe-e ǃgôaǁnâ tama.’ Sada namsa da ga ǃgâi tama ǀgaub ǃnâ a sîsenū, o da ge nau khoena a tsûtsû ǁkhā. Tsî nēs ǀkha ǃhaokhoese Elob tentommi ǃnâ ūǃoahe tide.—Khomai re Jakobub 1:26 sa.

11. Khoe-e mîǁgaiǁgaisa tae-e ra ǂâibasen? Mîǁgaiǁgai-ao i ga ǃhōbasen tama i, o i tae-e ǁî-i ǀkha nî ī?

¹¹ Psalmdi xoa-aob ge mîǁgaiǁgais xa ra ǃhoa. Mîǁgaiǁgaisa tae-e ra ǂâibasen? Nēs ge khoe-i xa ama tama ǂhôana ǃhoasa ǃoa ra ǁnaeǁgau, khoe-i di ǃgâi ǀonsa a ǁgaiǁgai ǁkhā-e. Khoena mîǁgaiǁgai tamas ka io ra ǀhoe khoe-i ga ǁnamahe tsî ǃhōbasen tama i, o i ge ǀhaohâba xu a ǂnûiǂûihe ǁkhā.—Jer. 17:10.

12-13. Mâ ga ǀnî ǀgaugu sida ǀhōsana da ǀuǃgâsib ǃnâ mîǁgaiǁgai ǁkhā ga? (Ai-īsiba mû re.)

¹² Psalmdi 15:3 ge ra hōhōǃnâ da Jehovab ǃhaokhoen ǁîn ǁanǁare-aona tsūdī tamas ka io mîǁgaiǁgai tamasa. Nēsa tae-e ǃkhōǂgā hâ?

¹³ ǂÂibasen tamase da ge khoe-e a mîǁgaiǁgai ǁkhā, ǁî-i xa da ga ǃgâi tama  xūna mî o. Aiǁgaus ase da ge sao ra aiǁgaudi xa a ǂâi ǁkhā: (1) ǃgâsas ge aimâba-aos ase ra ǃoaba ǀû, (2) ǃgamme hâ khoe-aogura ge Betels tawa ra ǃoaba ǀû tamas ka io (3) ǃgâsab ge ǀhaohâb ǃûi-aob tamas ka io hui-aob ase ra ǃoaba ǀû. Nēs ge ǃgâi tamase nî ǁnâusen ǃgâsana du ga mîba o, nē ǃgâsan ge tsū xūnan ge dī amaga a ǃoaba ǀû ti. Sada a ǀū ǃaromadi ge ǀnîsi hâ, tae-i ǃaroman ge ǁîna a ǃoaba ǀûsa. Jehovab tentommi ǃnâ a ǃhaokhoe-i ge “ǀgūkhoe-i â-i ǃoagu ǂkhabadī tama-i, ǀgūkhoe-i â-e ǃgôaǁnâ tama-e.”

ǃKHŪBA RA ǁNÂUǀNAMNA ǃGÔASIBA ǁGAU

14. ǁGuiǃā re Jehovab ǃhaokhoen mati ‘ǂharahe’ hâna ra ǃkharaxu ǀgauba.

¹⁴ Psalmdi 15:4 ge ra mî, Jehovab ǀhōsan ge “ǁnān Elob xa ra ǂharahena ra ǃharaxū.” Mati da ǁnāsa a dī ǁkhā? ǀOasa kurusa ūhâ tama khoen ase da ge a mî ǁoa khoe-i Elob xa ra ǃkharaxu-esa. Tae-i ǃaroma? ǀOasa kurusa da ūhâ tama amaga da ge ǃgâiba da a khoen ǀkha ǀgui a hâ ǁkhā tsî nauna a ǃkharaxū ǁkhā ǁîn ra ǀara kai da amaga. ǁNā-amaga da ge Jehovab xa ra ‘ǂharahen’ ǀguina nî ǃkharaxu. (1Kor. 5:11) Nēs ge ǁnān hîna ǁgai xūna xu ǃhōbasen taman, sada ǂgomsa ra ǃgôaǁnân tamas ka io Jehovab ǀkha da ūhâ ǀhōsagusisa ra ǁgaiǁgai ǂgaona ǃkhōǂgā hâ.—ǂKhm. 13:20.

15. Mâ ǀgaub ǃnâ da “ǁnān ǃKhūba ra ǁnâuǀnamna” ǃgôasiba ra ǁgau?

¹⁵ Sao rase Psalmdi 15:4 ge ra mî, î da “ǁnān ǃKhūba ra ǁnâuǀnamna” ǃgôa. ǁNā-amaga da ge ǀgauna ra ôa î da Jehovab ǀhōsana khoexaǃnâsib tsî ǃgôasib tsîna ǁgau. (Rom. 12:10) Mati? ǀGui ǀgaub Psalmdi 15:4 ǃnâ ra ǃhoaǃgaoheb ge Jehovab tentommi ǃnâ da ga ǃhaokhoe ǂgao o da ge “hoaǁae mîmâis âna ra dīǀoaǀoa mâtikōse i ga ǃgom xawe.” Mîmâi da hâ xū-e da ga dīǀoaǀoa tama i, o da ge nau khoe-e tsûtsû ǁkhā. (Mat. 5:37) Aiǁgaus ase Jehovab ge ra ǃâubasen, în ǁîb ǃhaokhoena ǃgammeb di mîǁguiba dīǀoaǀoa. ǁÎb ge ra ǃgâiaǂgao ǁgûn ga ǀgôanan mîmâiba hâ xūna ga dīǀoaǀoa o. Elob tsî sida ǀgūkhoen tsîna da ūba hâ ǀnammi ge nî hui da î da sida mîmâide dīǀoaǀoa.

16. Mâ ǀgaub ǃnâs tsînan Jehovab ǀhōsana ǃgôaǃgâsiba ra ǁgau?

¹⁶ ǀNî hâ ǀgaub Elob ǀhōsana da ǃgôasiba a ǁgau ǁkhāb ge, ǃhoakhoe ǃkhōǃoaxasiba ǁîna ǁgau tsî māxasa. (Rom. 12:13) Sida ǃgâsan ǀkha da ga ǁkhoaxa ǁaeba ūhâ, o da ge ǁîn tsî Jehovab tsîn ǀkha da ūhâ ǀhōsagusisa ra ǀgaiǀgai. ǁNās ǂam-ai ǃhoakhoe ǃkhōǃoaxasiba ǁgaus ǃnâ-ū da ge Jehovaba ra ǁgae.

MARI-E ǀNAMSA XU ǂGŌSEN

17. Psalmdi 15 sa tae-i ǃaroma mari-i xa ra ǃhoa?

¹⁷ Khomai da ge ra Jehovab ǃhaokhoen ge: “mari-e hōǂgāsa nî hōxūse ǀkhupiǂui tama hâ, tsî ǀgūkhoe-i ân ǃoagu nî ǀhûǀguitimîse ǁamaǃkhunimari-e ǃkhōǃoa tama.” (Psa. 15:5) Nē Psalmde tae-i ǃaroma mari-i xa ra ǃhoa? ǃGâi tama mûǂuiba mari-i xa ūhâs ge nauna tsûtsû ǁkhā tsî Jehovab ǀkha da ūhâ ǀhōsagusis tsîna a ǁgaiǁgai ǁkhā. (1Tim. 6:10) Elobmîs ǁaeb ǃnân ge ǀnîna ǀgâsa ǃgâsana mari-e ǀkhupi tsî gere ǂgaoǀkhā în ǁîna ǁnān go ǀkhupi maris xa ǃnāsase matare-oa. ǀGoraǃgâ-aogu tsîn ge ǁamaǃkhunimari-e ǃkhōǃoa tsî ǀhapiokhoena ǂhanu tama ǀgaub ǃnâ gere ǀgoraǃgâ.—Ese. 22:12.

18. Mâ dîde da mari-i ǃoagau da ūhâ tanisen ǀgaub xa dîsen ǁkhā? (Hebreǁîn 13:5)

 ¹⁸ Kaise i ge a ǂhâǂhâsa î da mari-i ǃoagu da ūhâ tsâsiga ôaǃnâ. Dîsen re: ‘ǃNāsa ǁaeba ta mari-i tsî tae-e da a ǁama ǁkhās xas tsîna ra ǂâi? Mari-e ta ga ǀkhupi o da ge ǂause ra ū mā-oasa, ǁî-i mari-e ǂhâ tama ti ta ra ǂâi amaga? Mari-e ūhâsa ǂhâǂhâsa ta a khami ra tsâ kaite xawe i-a ǃgom nau khoena māsa? ǃGâsana da mari-en ūhâ ǃkhais ǃgao ra ǀgoraǃgâ? ǃGâsan ǂgui mari-e ūhâ amaga ta ra mî ǁîn mari-e ǃnāsase a ǀnamsa, Jehovab xa? Mari-e ūhâ khoen ǀkha ǀgui da ra hâ ǀhao tsî ǀgâsan ǀkha ǁae tama? Nē dîde dîsens ge kaise a ǂhâǂhâsa, ǃgōsase Jehovab ǃhaokhoen ase ǁkhauǂuihes ǁgaumâisa da ūhâ amaga. Nē ǀō-aisa ǂkhauǂuisa da ge a ǁkhauba ǁkhā, mari-e ǀnamsa xu ǂgōsens ǃnâ-ū. Nēsa da ga dī, ob ge Jehovaba tātsē ǁnāxuǃnâ da tide.—Khomai re Hebreǁîn 13:5 sa.

JEHOVAB GE ǁÎB ǀHŌSANA A ǀNAM

19. Jehovaba tae-i ǃaroma ra ǂhâba î da Psalmdi 15 ǃnâ ra ǃhoaǃgaohe xūna dī?

¹⁹ Psalmdi 15 ge sao ra mîmâis ǀkha ra ǀam: “Nēna ga dī-i hoa-i ge ǀamose ǁnobe tide.” (Psa. 15:5) Psalmdi xoa-aob ge nēba ra ǁguiǃā tae-i ǃaromab Jehovaba ra ǂhâbasa î da nē go ǃhoaǃgaohe xūn hoana dī. Jehovab ge ra ǂhâba î da ǃgâiaǂgao. Jehovab ra ǂgan da xūna da ga dī, o da ge ǃgâi ûiba nî ūhâ tsîb ge ǁîb tsîna nî ǁkhauba da.—Jes. 48:17.

20. Jehovab ǃhaokhoena tae-e ǃoa a mûǂui ǁkhā?

²⁰ Jehovab ǃhaokhoen ge buruburuxa hānîǁaeba ǃoa a mûǂui ǁkhā. ǁNān ǀhommi khâis ǃâubasensa ūhân ge Jesub ge aiǂhomiban ‘ǃnā-omdi’ ǃnâ sī nî ǁan. (Jhn. 14:2) ǁNān ǃhūbaib ai ûis ǃâubasensa ūhân ge ǂHaiǂhais 21:3 ǃnâ hâ mîmâide ǃoa ra mûǂûi. Kai aiǂhanub ge Jehovab xa da ǃhaokhoen ase ǁîb tentommi ǃoa ra ǁkhauhesa.