1. Vati Visamo 15:​1-5 i hasa ku tu kuasa?

 MU CILONGESA ci na hiti, tua muene nguetu vose ve ku lihana kuli Yehova na ku likuata vusamba vua ku kaniama Nendi, ve ku kovela mu mbalaka yendi. Vika tua pande ku linga tu pue vangendzi va Yehova? Visamo 15 ya handeka ha cimpande caco. (Tandenu Visamo 15:​1-5.) Samo yaco, ya handeka vika tua pande ku linga tu likuate vusamba vua ku kaniama na Njambi.

2. Vika halumo Ndaviti ua singaniekele mua tumbuile via mbalaka ya Yehova?

² Visamo 15 ya putuka nevi vihula: “Yehova, iya a ka lisukila mu mbalaka yove? Iya a ka kala ha muncinda uove ua ku lela?” (Visa. 15:1) Ndaviti mua tumbuile via “mbalaka,” halumo ua kele na ku singanieka via tavenakulu ya kele ku Ngiveone mu imo ntsimbu. Cikuavo naua, Ndaviti mua tumbuile via ‘muncinda [ua Njambi] ua ku lela’ halumo ua kele na ku singanieka ha mbalaka ya kele ku Muncinda ua Siono ku Yelusalema. Ndaviti ua tungile mbalaka na ku hakamo cikasa ca litavasiano, noho ha va manusuile ku tunga tembele.—2 Sam. 6:17.

3. Omo lia vika tua pande kuivuisisa Visamo 15? (Talenu naua cikupulo.)

³ Cingi ca vaIsaleli ka va pangelele mu tavenakulu, kaha va vandende lika va va tavesele ku kovela mu mbalaka mua kele cikasa ca litavasiano. Vunoni vose vangamba va Yehova va kuononoka, va kele na vukovelelo vua ku va lania mu mbalaka yendi ya cimueso na ku tualelelaho kupua vavusamba vendi. Evi vikevio vi tu tonda tu vose, ni vati? Visamo 15 ya handekele vi tua pande ku linga, tu tualeleleho kupua vavusamba va Yehova.

 PUENU VAKUA VILINGA VIA CILI

4. Vati tua tantekeya nguetu Yehova ka tondo tu lengele lika ha mbatizimu? (Isaya 48:1)

⁴ Visamo 15:2 ya muesa ngecize, kavusamba ka Yehova ua pua “uze a ku enda mu ku sungama, kaha a ku panga vuviuke.” Evi vikevio vi tua pande ku tualelelaho ku linga. Vuno tu hasa mpundu “ku enda mu ku sungama” ni? Eyo. Vutuhu tu vose ka tua tantulukile, vunoni Yehova a ka tu mona kupua vakua “ku enda mu ku sungama” nga tu lihakela kapandi ka ku muononoka. Kaha ku lihana kuli Yehova na ku tu mbatiza ca pua lika ku putuka kuenda na Njambi. Ca ku muenako, ku laza kupua kaIsaleli ka ca lombolokele ngecize, muntu ua puile ngendzi ya Yehova. Muomu vamo va tambekele Yehova “kati mu vusunga, cipue mu vuviuke.” (Tandenu Isaya 48:1.) Ngeci mukemuo, vaIsaleli va tondele kupua vangendzi va Yehova, va pandele ku lilongesa masiko a Endi na kuononoka. Na vuno vene, linga tu likuate vusamba vua ku kaniama na Yehova, ka tua pandele ku lengela lika ha mbatizimu na ku tu sana Vakaleho va Yehova. Vunoni, tua pande ku tualelelaho “ku panga vuviuke.” Vati tu hasa ku lingamo?

5. Vika ca lomboloka kuononoka Yehova mu viuma viose?

⁵ Kuli Yehova, “ku enda mu ku sungama” na “ku panga vuviuke” ka ca puile lika ku kunguluka ntsimbu yose. (1 Sam. 15:22) Tua pande ku lihakela kapandi ka kuononoka Njambi mu viose, ambe nga tuli lika lietu. (Visi. 3:6; Ekel. 12:​13, 14) Capua ca seho kuononoka Yehova, ambe mu viuma vie ku soloka ngue ka via kele na seho. Ku lingamo, ce ku muesa ngecize tua mu lema kaha evi vie ku lingisa Nendi a tu leme mua kama.—Yoa. 14:23; 1 Yoa. 5:3.

6. Kuliya na VaHevelu 6:​10-12, vika via pua via seho ku hiana viuma via cili vitua lingile ku nima?

⁶ Yehova ua viukilila na viose vi mua mu  lingilile ku nima. Kaha vutuhu tua lingile viuma via cili ku nima, vunoni ka ca lombolokele ngecize tu tualelelaho kupua vangendzi mu mbalaka ya Yehova. Vusunga vuaco tu vu uana ku VaHevelu 6:​10-12. (Tandenu.) Yehova ke ku suva vilinga vietu via cili. Vunoni, a tonda tu mu pangele na mutima uetu uose ‘na ha ku kotoka.’ Kaha Yehova a kapua kavusamba ketu ku miaka yose “nga ka tu katala.”—Ngal. 6:9.

PUENU NA KU HANDEKA VUSUNGA MU MUTIMA

7. Vika ca lomboloka ku handeka vusunga mu mutima uetu?

⁷ Uose a tonda kupua ngendzi mu mbalaka ya Yehova, na pande “ku handeka vusunga mu mutima ueni.” (Visa. 15:2) Eci ka ca lombolokele lika ku hona ku handeka makuli. Yehova a tonda tu pue vakua vusunga mu viose vi tue ku linga. (VaHe. 13:18) Ku lingamo capua ca seho, “muomu mukua vuhuke ikeye cizila kuli Yehova; vunoni vusamba vueni vu li kuli vakua vuoloke.”—Visi. 3:32.

8. Viuma vika tua pande ku viana?

⁸ Vaze ve “ku handeka vusunga mu mutima,” ka ve kuononoka lika Yehova nga vakuavo vali na ku va mona, vunoni naua nga vali kua likaliavo. (Isaya 29:13) Ka va puile vakua civembulu mu ku linga viuma via ku pihia mu vusueke. Muomu vaze ve ku lingamo, ve ku singanieka nguavo masiko a Yehova ka a puile a cili. (Tia. 1:​5-8) Ka ve kuononoka Yehova mu viuma vi ve ku singanieka nguavo ka via puile via seho. Kaha vantu vaco nga va mona nguavo viahi via va solokela vutuhu va na tsihi masiko a Yehova, ve ku putuka ku linga vupi vua kama. Cikuavo naua, ve ku singanieka nguavo vali na ku pangela Njambi, vunoni Yehova ke ku tava ku lemesa cavo. (Ekel. 8:11) Ngeci mukemuo, tu tonda kupua vakua vusunga mu viuma viose.

9. Vika Yesu ua handekele mua liuanene na Natanele, kaha vika tu lilongesaho? (Talenu naua cikupulo.)

⁹ Capua ca seho ‘ku handeka vusunga mu mutima uetu.’ Vusunga vuaco tu vu muena ku mezi a handeke Yesu omo Filipu ua laniene kavusamba kendi Natanele a ka liuane na  Yesu. Vutuhu Yesu tele ka tantekeyele Natanele, vunoni ua handekele nguendi: “Talenu, kaIsaleli ua vusunga, ikeye ke ku kokola!” (Yoa. 1:47) Yesu ua tantekeyele nguendi vandongesi vendi vakuavo va puile vakua vusunga, vunoni Natanele ua puile mukua vusunga mu cifua ca ku lifuila. Ngeci muetu, Natanele nendi ka puile ua ku tantuluka. Vutuhu ngoco ka puile mukua civembulu, vunoni ua puile mukua vusunga mu viuma viose. Omo liaco, Yesu ua mu sangalele. Mua vusunga, tu vose tu tonda Yesu a tu sangale ngue mua lingile na Natanele!

10. Omo lia vika tua pande ku zangama na viuma vi tue ku handeka? (Tiango 1:26)

¹⁰ Cingi ca mizimbu ya kala ku Visamo 15, ya likuata na cifua ci tua pande ku yoyelamo na vakuetu. Visamo 15:3 ya muesa nguayo, ngendzi mu mbalaka ya Yehova “ke ku handeka visaki na lilimi lieni, cipue ke ku linga vupi na kavusamba keni.” Nga tu pua na ku vangeya vakuetu, ci ka va vavalesa ku mutima kaha na ku tu lingisa tu hone ku tualeleleho kupua vangendzi mu mbalaka ya Yehova.—Tandenu Tiango 1:26.

11. Ku vangeya capua vika? Kaha vika vi hasa ku solokela muntu nga a tualelelaho ku vangeya vakuavo?

¹¹ Mukua visamo ua handekele ha toma via visaki ni ku vangeya. Ku vangeya capua vika? Capua ku handeka makuli na vutumbe vua ku pihisa lutsimo lua cili lua vakuetu. Kaha nga muntu a tualelelaho ku vangeya vakuavo, citava va mu uise mu cikungulukilo.—Yele. 17:10.

12-13. Vati tu hasa ku vangeya vavusamba vetu ku ndzimba?

¹² Visamo 15:3 ya tu vuluisa naua ngecize, vangendzi va Yehova ka va pandele ku linga via ku pihia ku vakuavo ni ku vangeya vavusamba vavo. Vati tu hasa ku vangeya vavusamba vetu?

¹³ Tu hasa ku lingamo ku ndzimba mu ku  sanduola mizimbu ya ku pihia ku tuala ha vakuetu. Ca ku muenako: (1) Nga umo ndumbuetu na likela vupioneiro, (2) nga vamo va yala na mpuevo va na likela ku pangela ha Mbetele, ni (3) nga umo muanetu ka puile naua mukuluntu mu cikungulukilo ni mukua ku kuasa vipanga. Ka tua pandele ku leka vakuetu nguetu, vamuanetu vaco va na lingi vupi, ngeci va na likela ku linga vipanga viaco. Muomu kuli vusunga vua vuingi vu hasa ku va lingisa ku likela vipanga viaco, kaha ka tu vu tantekeya. Cikuavo naua, uze ua pua ngendzi mu mbalaka ya Yehova “ke ku linga vupi na kavusamba keni, cipue ke ku nehela mukuavo kasahuntu.”

SINGIMIKENU VAZE VE KU VUILA YEHOVA VUOMA

14. Vati vangedzi va Yehova ve ku ‘yengula mukua vupi’? Lombololenu.

¹⁴ Visamo 15:4 ya handeka nguayo vavusamba va Yehova ve ku ‘yengula mukua vupi.’ Vuno vati tu hasa ku tantekeya nga muntu ua pua mukua vupi? Ka tu hasa ku tantekeya mpundu nga umo muntu ua pua mukua vupi ni kuahi. Omo lia vika? Muomu ka tua tantulukile. Ngeci mukemuo, tu hasa ku lema vantu vaze va tue ku litombola navo, na ku hona ku lema vaze ka tue ku litombola. Vunoni, tua pande ku viana lika vantu ve ku mona Yehova nguendi vapua ‘vakua vupi.’ (1 Kol. 5:11) Ca ku muenako, tua pande ku viana vaze ve ku linga vupi kaha ka ve ku liveya, ka ve ku singimika vi tua tsiliela kaha na vaze ve ku seteka ku zeyesa vusamba vuetu na Yehova.—Visi. 13:20.

15. Vati tu hasa ku “singimika vaze va vuila Yehova vuoma”?

¹⁵ Visamo 15:4 ya handeka naua nguayo, tua pande ku “singimika vaze va vuila Yehova vuoma.” Ngeci mukemuo, tua pande ku tonda vinjila via ku mueselamo ngozi na ku singimika vavusamba va Yehova. (Loma 12:10) Mu njila ika? Imo ya vinjila tu i uana ku Visamo 15:4 nguayo, uze ua pua ngendzi mu mbalaka ya Yehova ue ku “lisinga na ku aluluka cahi cipue a ku uana luvinda.” Ce ku vavalesa cikuma vakuetu nga ka tua puisilemo vi tua likuminia. (Mat. 5:37) Ca ku muenako, Yehova ua lavelela vaze va liambata va tualeleleho ku puisamo nkuminio yavo ya vulo. Ue ku viukilila naua, nga visemi va puisamo vi ve ku kulahesa vana vavo. Mu ku linga tua lema Yehova na vakuetu, ngeci tue ku linga cose mu ku puisamo vi tue ku likuminia.

16. Vati naua tu hasa ku singimika vavusamba va Yehova?

¹⁶ Vinjila vikuavo vi tu hasa ku singimikilamo vavusamba va Njambi via pua ku va muesa vuhuanga na ku va zumbula. (Loma 12:13) Ngeci mukemuo, ku kunguluka, kuambulula na ku sikama na vamuanetu, vusamba vuetu navo kaha na Yehova vue ku kaniema. Cikuavo naua, nga tu zumbula vakuetu, tuli na ku tambuluisa Yehova.

KATI MU LEME VIMBONGO

17. Omo lia vika mukua Visamo ua handekele via vimbongo?

¹⁷ Mbimbiliya ya handeka naua ku tuala ha ngendzi ya Yehova nguayo, “zimbongo zieni ke ku kumuisa na kakondueso, cipue ke ku tambula mbanda ya ku hisa uze kesi na mulonga.” (Visa. 15:5) Omo lia vika mukua Visamo ua handekele via vimbongo? Muomu nga tu lema vimbongo, tu hasa ku vi puisa via seho ya kama ku hiana vantu, ambe vene Njambi. (1 Tim. 6:10) VaIsaleli va kele na ku muesa vuhenge ku vamuanaye va puile vihutu, mu ku va fuetesa vimbongo via ku hiana vize vi va kele na ku va levala. Kaha vamo vangazi, va kele na ku tambula fueto mu ku sompesa  vaze ka va kele na mulonga. Yehova mueka ua zinda vilinga viaco.—Ezek. 22:12.

18. Vihula vika tu hasa ku lilinga mangana tu tantekeye cifua ci tue ku muenamo vimbongo? (VaHevelu 13:5)

¹⁸ Ca pua ca seho ku hilula cifua ci tue ku muenamo vimbongo. Ngeci mukemuo, lihulenu nguenu: ‘Vuno ntsimbu yose nje ku singanieka lika via vimbongo na vika nji landa ni? Vuno ka nje ku hiluisa vuasi vimbongo vi nje ku levala, muomu nje ku singanieka nguange muntu ua nji levaleselevio ka vi tondo naua ni? Vuno ku kala na vimbongo, ce ku nji lingisa ku livua ngue nji ua seho ku hiana vakuetu ni? Vuno ce ku nji kaluuila ku zumbula vukuetu ni? Vuno nje ku singanieka ngecize nga vamuanetu va kala na vimbongo via vingi, va lema mua kama vimbongo ku hiana Yehova ni? Vuno nje ku likuata vusamba na vampite lika ni? Ca pua ca seho ku lilinga evi vihula, muomu tua kala na civezikiso ca kupua vangendzi va Yehova. Vunoni tu hasa lika ku tualelelaho ku pua vangendzi va Yehova, nga ka tu leme vimbongo. Kaha nga tu lingamo, Yehova ka ka tu seza na limo litangua liahi!—Tandenu VaHevelu 13:5.

YEHOVA UA LEMA VAVUSAMBA VENDI

19. Omo lia vika Yehova ua tonda tuononoke vi va tumbula ku Visamo 15?

¹⁹ Visamo 15 ya manusula na cikulaheso nguaco: “Ou a linga evi ka li ka taliangela ku miaka yose ya ya-ye.” (Visa. 15, 5) Mezi aco, a muesa ngecize Yehova a tonda tuononoke vi va tumbula ku Samo yaco, linga tu yoye mu ndzolela. Ngeci mukemuo, ue ku tu hana vimamuna vie ku tu niunga kaha ue ku tu vezikisa.—Isaya 48:17.

20. Vika va lavelela vangendzi va Yehova?

²⁰ Vangendzi va Yehova va lavelela muono ua cili ku lutue. Vakua Kilistu va ku vuavesa va ka yoyela muilu. (Yoa. 14:2) Kaha vaze va ka yoyela hano ha mavu, va lavelela ku lipuisamo ca vikulaheso via ku Ku-Solola 21:3. Mua vusunga, tu vose tue kuivua ndzolela omo lia ku tu lania tu pue vangendzi va Yehova ku miaka yose!