1. ¿Kenijkatsa techpaleuia Salmo 15:1-5?

 IPAN tlamachtili 23, tikitakej kenijkatsa itekipanojkauaj Jehová, uelis mokauasej kejuak ipan ichaj tlaj kuali mouampojchiuaj iuaya. Pero ¿tlake uelis tijchiuasej uan kiampa kuali timouikasej iuaya? Ipan Salmo 15, kiijtoua se keski tlamantli tlen techpaleuis más ma timonechkauikaj ika Dios (xijpoua Salmo 15:1-5).

2. ¿Ipan tlake moiljuik David kema kiijtok ichaj Jehová?

² Kampa peua Salmo 15, kiijtoua: “TOTEKO ¿ajkia uelis kalakis ipan mochaj kampa ta timokaua ipan motepe tlen tlatsejtseloltik? ¿Ajkia uelis mokauas nepa para tijmokuitlauis?” (Sal. 15:1). Kema David kiijtok ichaj Jehová, uelis moiljuik ipan nopa tabernáculo tlen eltoya ipan Gabaón se keski xiuitl. Kema David nojkia kiijtok “motepe tlen tlatsejtseloltik”, uelis kinejki kiijtos tepetl Sion tlen Jerusalén. Se keski kilómetros ika sur tlen Gabaón, David kikualchijchijki se yoyonkali para kikauasej nopa kuakajo kampa eltoya tlajtolsenkaualistli hasta kema kichijchiuaskiaj nopa teokali kampa kikauaskiaj (2 Sam. 6:17).

3. ¿Kenke moneki timoiljuisej ipan tlen kiijtoua Salmo 15? (Nojkia xikita tlaixkopinkayotl).

³ Miakej israelitajmej amo kema uelkej tlatekipanouaj ipan tabernáculo, yon ipan yoyonkali kampa eltoya nopa kuakajo kampa eltoya tlajtolsenkaualistli. Pero nochi katli kitekipanouayayaj Jehová, ueliyayaj mokauaj kejuak ipan ichaj tlaj kuali  mouampojchijtoyaj iuaya. Uan ya nopa tijnekij tijchiuasej. Ipan Salmo 15, kiijtoua se keski kuajkuali tlamantli tlen moneki tijnextisej uan kiampa nojua kuali timouampojchiuasej iuaya Jehová.

NOCHIPA MA TIMONEJNEMILTIKAJ XITLAUAK UAN MA TIJCHIUAKAJ TLEN KUALI

4. ¿Kenijkatsa tijmatij amo san moneki timoatsonpoliuiltisej tlaj tijnekij Jehová kuali ma techita? (Isaías 48:1).

⁴ Ipan Salmo 15:2 kiijtoua se iuampox Dios, nochipa monejnemiltia xitlauak uan “kichiua tlen kuali”. Nopa tlajtoli “monejnemiltia” uan “kichiua”, kinextia nochipa kichijtinemi nopa tlamantli. Uajka, ¿uelis timonejnemiltisej xitlauak? Kena. Maske nochi titlajtlakolejkej, Jehová techitas tinemij xitlauakej tlaj tijchiuaj kampeka tijneltokasej. Maske tijmaktiliaj Jehová tonemilis uan timoatsonpoliuiltiaj, nojua moneki tijchiuasej sekinok tlamantli ipan tonemilis. Ma tikilnamikikaj tlaj se akajya kinekiyaya mokauas ichaj Dios amo san monekiyaya elis israelita. Maske se keskij kiueyichiuayayaj Dios, amo kichiuayayaj tlen kuali yon tlen xitlauak (xijpoua Isaías 48:1). Katli nelnelia kinekiyayaj kiueyichiuasej, monekiyaya momachtisej uan kichiuasej Jehová iTlanauatiljuaj. Ipan ni tonali nojkia kiampa pano: tlaj tijnekij Dios kuali ma techita, amo san moneki timoatsonpoliuiltisej uan tiitstosej ipan itlanechikol. Moneki nojua tijchijtosej tlen kuali. ¿Kenijkatsa uelis tijchiuasej?

5. ¿Kenijkatsa Jehová kiita tlaj se akajya monejnemiltia xitlauak uan kichiua tlen kuali?

⁵ Jehová amo kiita se akajya nochipa monejnemiltia xitlauak uan “kichiua tlen kuali” san pampa yaui tlanechikoli (1 Sam. 15:22). Nochi katli tijtekipanouaj Jehová, moneki tijchiuasej kampeka tijneltokasej ipan nochi tonemilis uan más kema tiitstokej toselti (Prov. 3:6; Ecl. 12:13, 14). Tlauel  moneki tijneltokasej Jehová maske timoiljuisej se keski tlamantli amo tlauel ipati. Tlaj kiampa tijchiuaj, tijnextisej tlauel tikikneliaj uan ya nojkia techiknelis (Juan 14:23; 1 Juan 5:3).

6. Kej kiijtoua Hebreos 6:10-12, ¿kenke nojua moneki tijchijtosej kampeka kuali tijtekipanosej Jehová?

⁶ Jehová tlauel kipatiita pampa tijchiuaj kampeka tijtekipanosej. Pero maske kuali tijtekipanojtokej, nopa amo kiijtosneki nochipa kiampa tijchijtosej kej kiijtoua Hebreos 6:10-12 (xijpoua). Maske Jehová amo kiilkaua nochi tlen tijchiuaj, ya kineki nochipa ma tijtekipanojtokaj ika nochi toyolo. Tlaj amo tijtlauelkauaj, ya nochipa elis touampox (Gál. 6:9).

MA TIKIJTOKAJ TLEN MELAUAK IKA NOCHI TOYOLO

7. ¿Tlake kiijtosneki tikijtosej tlen melauak ika nochi toyolo?

⁷ Salmo 15:2 kiijtoua Jehová kitlaneui ichaj katli “kiijtoua tlen melauak ika nochi iyolo”. Nopa amo san kiijtosneki amo titeistlakauisej. Jehová kineki nochipa ma tikijtokaj tlen melauak uan amo ma tiistlakatikaj ipan nochi tlamantli tlen tijchiuaj (Heb. 13:18). Ni tlamantli tlauel ipati “pampa TOTEKO kikualankaita nopa tlakatl tlen uijkoltik iojui, pero kiniknelia tlen itstokej xitlauakej iixpa” (Prov. 3:32).

8. ¿Tlake amo kinamiki tijchiuasej?

⁸ Katli “kiijtoua tlen melauak ika nochi iyolo”, amo san kineki kinextis kineltoka Dios kema itstok ininuaya sekinok pero kema itstok iselti amo kineltoka (Is. 29:13). Katli kiampa kichiua, amo kitlepanita Dios uan tojuantij amo tijnekij kiampa tielisej. ¿Kenijkatsa uelis se akajya peuas kiampa kichiuas? Tlaj moiljuis Jehová iTlanauatiljuaj amo kipaleuia (Sant. 1:5-8). Uelis amo kineltokas Dios ipan se keski tlamantli tlen moiljuia amo tlauel ipati. Teipa tlaj kiitas amo tleno kipano ika tlen kichiua, uelis peuas kichiuas sekinok tlamantli tlen tlauel amo kuali uan ayokmo kiueyichiuas Jehová ika nochi iyolo (Ecl. 8:11). Tojuantij nochipa tijnekij tikijtosej tlen melauak uan amo kema tiistlakatisej ipan nochi tlen tijchiuaj.

9. ¿Tlake techmachtia tlen panok kema Jesús kiixmatki Natanael? (Nojkia xikita tlaixkopinkayotl).

 ⁹ Kema Jesús kiixmatki Natanael, kinextik kenke tlauel ipati amo titekajkayauasej. Kema Felipe kiuikak Natanael para ma kiixmati Jesús, panok tlen amo kema panotoya. Maske Jesús amo kema kiitstoya Natanael, kiijtok: “Xikitakaj, se israelejketl katli nelia amo tlakajkayaua” (Juan 1:47). Jesús kimatiyaya itokilijkauaj amo tekajkayauayayaj, pero ya kiitak Natanael tlauel pankisayaya pampa tlauel kinextiyaya ni kuali tlamantli ipan inemilis. Maske Natanael nojkia eliyaya tlajtlakole, nochipa kiijtouayaya tlen melauak. Jesús tlauel kipatiitak uan kiiljuik kuali tlen kichiuayaya. ¡Tlauel techpaktiskia Jesús nojkia kiampa ma techita!

10. ¿Kenke moneki kuali timoiljuisej tlen tikijtosej? (Santiago 1:26).

¹⁰ Ipan miak versículos tlen Salmo 15, kiijtoua kenijkatsa kinamiki tikinnojnotsasej sekinok. Uan Salmo 15:3, kiijtoua Jehová kiselia ichaj katli “axtetlaijiljuia. [...] Axkiistlakauia tlen itstok ikalnechka, uan tlen axkineki kinyolkokos sekinok”. Kema amo kuali timoiljuiaj tlen tikijtouaj, amo san tikinyolkokouaj sekinok, nojkia uelis kichiuas ayokmo ma tiitstokaj Jehová ichaj (xijpoua Santiago 1:26).

11. ¿Tlake kiijtosneki kema se akajya teistlakauia, uan tlake pano kema amo moyolkuepa?

¹¹ Katli kiijkuilok ni salmo kamanalti tlen se akajya katli teistlakauia. Pero, ¿tlake kiijtosneki nopa tlamantli? Eli kema se akajya kiijtoua tlen amo melauak tlen seyok pampa kineki sekinok ayokmo kuali ma kiitakaj. Katli kiampa kichiuaj uan amo moyolkuepaj, kinkixtiaj tlen Jehová itlanechikol (Jer. 17:10).

12, 13. ¿Kema ueliskia tijchiuasej sekinok ayokmo kuali ma kinitakaj touampoyouaj? (Nojkia xikita tlaixkopinkayotl).

¹² Salmo 15:3 nojkia kiijtoua katli mokaua ichaj Jehová “axkiistlakauia tlen itstok  ikalnechka, uan [...] axkineki kinyolkokos sekinok”. ¿Kenijkatsa ueliskia tijchiuasej sekinok ayokmo kuali ma kinitakaj touampoyouaj?

¹³ Uelis tijchiuasej sekinok ayokmo kuali ma kiitakaj se akajya, tlaj tikijtosej tlamantli tlen amo kuali tlen ya. Ma timoiljuikaj ipan ni tlamantli: 1) se tosiuaikni ayokmo tlatekipanoua kej precursora, 2) se toikni iuaya isiua ayokmo tlatekipanouaj Betel o 3) techiljuiaj se toikni ayokmo tlatekipanos kej ueuejtlakatl o tlapaleuijketl. ¿Kinamiki timoiljuijtinemisej tlake panok uan tikiniljuisej sekinok tlen timoiljuiaj? Uelis amo tijmatij nochi tlen panok. Uan ma tikilnamikikaj katli itstok ichaj Jehová “axkiistlakauia tlen itstok ikalnechka, uan [...] axkineki kinyolkokos sekinok”.

MA TIKINTLEPANITAKAJ KATLI KIMAKASIJ KIIXPANOSEJ JEHOVÁ

14. ¿Kenijkatsa katli itstok ichaj Jehová kimati iuaya ajkia amo kinamiki mouikas?

¹⁴ Salmo 15:4 kiijtoua katli eli iuampox Jehová “kiuejkamajkaua [katli kichiua, TNM] tlen fiero”. Pero, ¿kenijkatsa uelis tijmatisej ajkia inijuantij kichiuaj tlen fiero? Nochi titlajtlakolejkej, yeka amo uelis timotemachisej san ipan tlen tojuantij timoiljuiaj. ¿Kenke? Pampa uelis ika se keskij maseualmej amo ouij tijmatij kuali timouikasej. Pero ika se keskij uelis kena ouij tijmatij pampa techkualankamakaj. Moneki amo timouikasej ininuaya maseualmej katli Jehová amo kuali kinita (1 Cor. 5:11). Kej katli tlajtlakolchiuaj uan amo moyolkuepaj, katli amo kitlepanitaj tlen tijneltokaj uan katli kinekij ayokmo kuali ma timouikakaj iuaya Jehová (Prov. 13:20).

15. ¿Kenijkatsa uelis tikintlepanitasej katli kimakasij kiixpanosej Jehová?

¹⁵ Ipan Salmo 15:4 kiijtoua moneki ma tikintlepanitakaj katli kimakasij kiixpanosej Jehová. Yeka tijchiuaj kampeka tijnextisej tikinikneliaj uan tikintlepanitaj iuampoyouaj (Rom. 12:10). ¿Kenijkatsa uelis kiampa tijchiuasej? Salmo 15:4 kiijtoua katli itstokej ichaj Jehová “kitlamichiuaj tlen mokajtokej kichiuasej yonke nelouij uan kinkokoua para kichiuasej”. Tlaj amo tijchiuaj tlen tikijtouaj, uelis tikinyolkokosej sekinok (Mat. 5:37). Jehová kineki katli itstokej ichaj uan kipiaj ininnamik ma kichiuakaj tlen kitenkajkej kema mosenkajkej. Nojkia kineki tetajmej ma kichiuakaj kampeka kichiuasej tlen kintenkauiliaj ininkoneuaj. Tlauel tikikneliaj Jehová uan sekinok, yeka tijchiuaj kampeka nochipa tijchiuasej tlen tikijtouaj.

16. ¿Ika tlake seyok tlamantli tijnextiaj tikintlepanitaj Jehová iuampoyouaj?

¹⁶ Nojkia tijnextiaj tikintlepanitaj iuampoyouaj Jehová, kema kuali tikinseliaj uan tikinmakaj tlen tijpiaj (Rom. 12:13). Kema tiitstokej ininuaya toikniuaj uan tijchiuaj se keski tlamantli, techpaleuia ma timouampojchiuakaj ininuaya uan nojkia ika Jehová. Kema kuali tikinseliaj sekinok, tijchiuaj kej ya.

AMO MA TIJNEKIKAJ TLAUEL TITLATOMINPIASEJ

17. ¿Kenke Salmo 15 kamanalti tlen tomij?

¹⁷ Ipan Salmo 15 nojkia kiijtoua katli itstokej ichaj Jehová, amo tlainamaj ika itlanka “kema tetlanejtiaj tomij, uan axkinistlakauiaj tlen axtlaixpanotokej, yonke sekinok kintenkauiliaj tomij para ma istlakatikaj” (Sal. 15:5). ¿Kenke ni salmo kamanalti tlen tomij? Pampa nima uelis tikixtokasej uan tijnekisej tijpiasej miak tomij. Tlaj kiampa techpanoskia, uelis tikintlanauisej sekinok uan ayokmo kuali timouampojchiuasej  iuaya Jehová (1 Tim. 6:10). Uejkajkia, se keskij kintlanejtiyayaj tomij katli eliyayaj teikneltsitsij uan kininamayayaj ika itlanka. Nojkia se keskij tetlajtolsenkauanij kiseliyayaj tomij para amo kuali kintlajtolsenkauasej sekinok. Jehová amo kipaktia kema maseualmej kiampa kichiuaj (Ezeq. 22:12).

18. ¿Tlake moneki timotlatsintokisej? (Hebreos 13:5).

¹⁸ Nochi moneki timoiljuisej tlaj tikitaj tomij kej kinamiki. Ma timotlatsintokikaj: “¿Nochipa nimoiljuijtok ipan tomij uan ipan tlake nijneki nijkouas? Tlaj se akajya nechtlanejtia tomij, ¿amo nima nijkuepilia pampa nimoiljuia ya amo kitekiuia? ¿Nimoiljuia tlauel nopati pampa nitlatominpia uan nijmati ouij nitemakas se tlamantli? ¿Nimoiljuia toikniuaj katli tlatominpiaj amo kuali mouampojchijtokej iuaya Jehová? ¿San nimouampojchiua ininuaya katli tlatominpiaj?”. Eli se ueyi tlateochiualistli tiitstosej ichaj Jehová, yeka ma tijchiuakaj kampeka nochipa tiitstosej nopaya. Ma timosentlalikaj amo tijnekisej tijpiasej miak tomij. Tlaj kiampa tijchiuaj, Jehová amo kema techtlauelkauas (xijpoua Hebreos 13:5).

JEHOVÁ KINIKNELIA IUAMPOYOUAJ

19. ¿Kenke Jehová kineki ma tijmatikaj tlen kiijtoua Salmo 15?

¹⁹ Kampa tlami Salmo 15 kiijtoua: “Inijuantij tlen kichiuaj tlen ni kuali tlamantli axaka ueli kintlanis” (Sal. 15:5). Katli kiijkuilok ni salmo, kinextia Jehová techiljuia ma tijchiuakaj ni tlamantli pampa kineki ma tiyolpakikaj. Kema tijchiuaj tlen Jehová techiljuia, kuali tiitstokej uan techmokuitlauia (Is. 48:17).

20. ¿Tlake tlateochiualistli kiselisej katli itstokej ichaj Jehová?

²⁰ Tlaj katli itstokej ichaj Jehová amo kitlauelkauasej, teipa tlauel kuali itstosej. Tlapejpenilmej yasej iluikak, kampa Jesús kinkualchijchiuilijtok kampa itstosej (Juan 14:2). Uan katli mokauasej ipan Tlaltipaktli tlauel yolpakisej pampa moaxitis tlen kiijtoua Apocalipsis 21:3. ¡Elis se ueyi tlateochiualistli pampa Jehová techtlanejtok ichaj uan kineki ma tiitstokaj nopaya nochipa!