1. ¿Keniuj techpaleuia Salmo 15:​1-5?

 ITECH okse tamachtilis timomachtijkej ke akin kitekitiliaj Jehová, uelij kemej yeskia mokauaj ichan Dios komo kisentokaj kuali iuan mouikaj. Sayoj ke, ¿keniuj uelis tel kuali iuan timouikaskej? Itech Salmo capítulo 15 tikajsij tanankilil, ompa kijtoua toni moneki tikchiuaskej para okachi kuali timouikaskej iuan Dios (xikonixtajtolti Salmo 15:​1-5).

2. ¿Toni xa kinemilijtoya David keman ika tajtoj ichan Jehová?

² Salmo capítulo 15 peua kijtoua nejin: “Jehová noDios, ¿akoni uelis mokauas mochan? ¿Akoni uelis nemis itech tepet tein tikijitak?” (Sal. 15:1). Keman David ika tajtoua ‘ichan’ Jehová, xa ika tanemilijtoya ikaltsin Dios tein yetoya ompa Gabaón se tiempo. David no ika tajtoj ‘tepet tein Dios kijitak’, nejin xa katka tepet Sion, tein moajsia ompa Jerusalén. Ompa, kemej 10 kilómetros tanikopa de Gabaón, David kichijchiuak se kaltsin kampa kitaliskia tatiochiualkaxon hasta keman kichijchiuaskiaj templo (2 Sam. 6:17).

3. ¿Keyej moneki timomachtiskej Salmo 15? (No xikonita taixkopin).

³ Miakej israelitas amo keman uelik tapaleuijkej itech ikaltsin Dios, uan nion no kalakkej kampa yetoya tatiochiualkaxon. Maski ijkon, nochin akin kuali kitekitiliayaj Jehová uelia kemej yeskia mokauayaj ichan komo kuali mouikayaj iuan. Uan tejuan no tiknekij nejon. Itech Salmo capítulo 15, kijtoua seki taman tein moneki tikchiuaskej para tiksentokaskej kuali timouikaskej iuan Jehová.

 MAJ TICHIPAUJKANEMIKAN UAN MAJ TIKCHIUAKAN TEIN KUALI

4. ¿Keyej amo moneki sayoj maj timoauikan komo tiknekij tikyolpaktiskej Jehová? (Isaías 48:1).

⁴ Itech Salmo 15:2 kijtoua ke akin kuali mouika iuan Dios “chipaujkanemi” uan “kichiua tein kuali”. Uan nochipa moneki ijkon tikchiujtoskej. Sayoj ke, ¿yekmelauj uelis ‘tichipaujkanemiskej’? Kemaj. Maski tinochin titajtakolejkej, komo timochikauaj tiktakamatiskej, yejuatsin kiitas ke tichipaujkanemij. Uan peua ijkon tikchiuaj keman timotemaktiaj iuan Dios uan timoauiaj. Ne uejkauj, amo sayoj porin aksa katka israelita kijtosnekia ke uelia yetoya ichan Jehová. Maski sekin kinotsayaj Dios, amo kichiuayaj tein kuali uan taixkajkayauayaj (xikonixtajtolti Isaías 48:1). Akin yekmelauj kitasojtayaj Jehová monekia kimatiskej uan kichiuaskej tein tanauatiaya. No ijkon axkan, komo tiknekij tikyolpaktiskej Dios amo sayoj moneki tipouiskej itech inechikol uan timoauiskej, ta moneki tiksentokaskej tikchiuaskej tein kuali. ¿Keniuj uelis tikchiuaskej?

5. ¿Toni kijtosneki maj tichipaujkanemikan uan maj tikchiuakan tein kuali?

⁵ Jehová amo kiita ke aksa “chipaujkanemi” uan “kichiua tein kuali” sayoj porin youi nochi nechikolmej (1 Sam. 15:22). Akin tiktekitiliaj Dios moneki timochikauaskej nochipa tiktakamatiskej hasta keman tietoskej toselti (Prov. 3:6; Ecl. 12:​13, 14). Moneki tiktakamatiskej Jehová hasta keman tiknemiliskej ke amo motelneki. Komo ijkon tikchiuaj tiknextiliskej ke tiktasojtaj uan yejua no ijkon kichiuas (Juan 14:23; 1 Juan 5:3).

6. Kemej kijtoua Hebreos 6:​10-12, ¿toni moneki tiksentokaskej tikchiuaskej maski ipa tikchiuanijya tein kuali?

⁶ Jehová semi kiyolpaktia nochi tein tikchiuanij para tiktekitiliskej. Sayoj  ke, amo uelis tiksentokaskej tietoskej ichan Jehová sayoj porin tikchiujkaj tein kuali, ijkon kimelaua tein kijtoua Hebreos 6:​10-12 (xikonixtajtolti). Maski Jehová amo kielkaua nochi tein kuali tein tikchiuaj, yejua kineki maj nochipa tiksentokakan tiktekitilikan. Uan komo “amo timosenkauaj” uelis nochipa kuali iuan timouikaskej (Gál. 6:​9, nota).

MAJ TIKIJTOKAN TEIN YEKMELAUJ KISA ITECH TOYOLO

7. ¿Toni kijtosneki maj se kijto tein yekmelauj kisa itech toyolo?

⁷ Salmo 15:2 kijtoua ke akin yetok ichan Jehová “kijtoua tein yekmelauj kisa itech iyolo”. Amo sayoj moneki maj amo titakajkayauakan, ta Jehová kineki maj timelaujkej itech nochi (Heb. 13:18). Nejin semi moneki, “porin Jehová amo kineki kinitas akin kinextiaj ke yolkualmej sayoj ke amo melauak, sayoj ke semi kuali mouika iniuan akin yolmelaujkej” (Prov. 3:32).

8. ¿Toni amo moneki tikchiuaskej?

⁸ Komo aksa kitakamati Dios keman kiitstokej, sayoj ke keman yetok iselti amo, ¿kijtosneki ke “kijtoua tein yekmelauj kisa itech iyolo”? Amo (Is. 29:13). ¿Keniuj se tokniuj ueliskia peuas ijkon kichiuas? Xa peuas kinemilis ke tein Jehová tanauatia amo tapaleuia (Sant. 1:​5-8). Xa kemansa amo kitakamatis porin kinemilia ke amo motelneki. Uan komo kiita ke amo teyi kipanoua, satepan kichiuas okachi tajtakolmej. Maski kinemilia ke kitekitilijtok Jehová, yejuatsin amo kiyolpaktia tein kichiua (Ecl. 8:11). Tejuan amo tiknekij titakajkayauaskej ika tein tikijtouaj uan tein tikchiuaj.

9. ¿Toni techmachtia tein panok keman Jesús kiixmatik Natanael? (No xikonita taixkopin).

⁹ Semi moneki maj amo titakajkayauakan, tikmatij nejin keman tikitaj tein panok keman Felipe kiyoleuak itasojikniuj Natanael maj kiixmatiti Jesús. Maski Jesús amo keman kiitstoya Natanael, kijtoj: “Xikitakan, nejin se takat israelita  akin amo takajkayaua” (Juan 1:47). Jesús kimatia ke oksekin imomachtijkauan amo takajkayauayaj, sayoj ke yejua kiitak ke Natanael okachi amo takajkayauaya. Maski Natanael no katka tajtakolej kemej tejuan, amo keman takajkayauaya, ta nochipa kijtouaya tein melauak. Jesús kimojkaitaya tein kichiuaya Natanael uan kiluij ke kuali tein kichiuaya. ¡Tel kuali yeskia maj Jesús no ijkon techita!

10. ¿Keyej moneki kuali tiknemiliskej tein tikijtoskej? (Santiago 1:26).

¹⁰ Miak taman tein kijtoua Salmo capítulo 15 kinextia keniuj moneki timouikaskej iniuan oksekin. Salmo 15:3 kijtoua ke akin nemi ichan Jehová “amo tetakajkayauilia, amo teyi kinchiuilia oksekin uan amo kinpinaujtia akin kintasojta”. Komo tikintakajkayauiliaj oksekin uelis semi tikinyolkokoskej uan hasta uelis kichiuas maj amo tietokanok ichan Jehová (xikonixtajtolti Santiago 1:26).

11. ¿Toni kijtosneki keman aksa tetakajkayauilia, uan toni kipanoua komo amo moyolpata?

¹¹ Salmista okachi ika tajtoua keman aksa tetakajkayauilia. ¿Toni kijtosneki nejon? Keman kijtouiliaj aksa tein amo melauj uan kichiua maj amo kuali ika tajtokanok. Akin ijkon kichiuaj uan amo moyolpataj kinkalankixtiaj itech nechikol (Jer. 17:10).

12, 13. ¿Kemanian ueliskia tikijijtoskej aksa maski amo timomakaskej cuenta? (No xikonita taixkopin).

¹² Salmo 15:3 no techiluia ke akin mokaua ichan Jehová “amo teyi kinchiuilia oksekin uan amo kinpinaujtia akin kintasojta”. ¿Keniuj ueliskia tikinpinaujtiskej totasojikniuan?

¹³ Maski amo timomakaskej cuenta, ueliskia tikijijtojtoskej aksa. Maj  tiknemilikan nejin: 1) se tokniuj siuat amo kitekitiliaok Jehová miak tonalmej, 2) se tokniuj takat uan isiuatsin kisaj de Betel, oso 3) tanauatiaj ke se tokniuj amo tayekankejok oso amo tapaleuijkejok itech nechikol. Amo kuali yeskia maj tikiniluikan oksekin ke nejon tokniuan kichiujkej tein amo kuali uan ke yejua ika kinpanok nejon. Xa amo tikmatij nochi tein panok. Uan maj tikelnamikikan ke akin mokaua ichan Jehová “amo teyi kinchiuilia oksekin uan amo kinpinaujtia akin kintasojta”.

MAJ TIKINPATIUITAKAN AKIN KIMOJKATOKAJ JEHOVÁ

14. ¿Keniuj itasojikniuj Jehová uelis kimatis akoni Dios kiixtopeua uan ke amo moneki iuan mouikas?

¹⁴ Salmo 15:4 kijtoua ke itasojikniuj Jehová “amo mouika iniuan akin Dios kinixtopeua”. Amo uelis tikijtoskej ke aksa kiixtopeua Dios sayoj porin tejuan ijkon tiknemiliaj oso porin tataman titaixpejpenaj. ¿Keyej? Porin titajtakolejkej, uan xa tikuelitaskej tietoskej sayoj akin kuali iniuan timouikaj, uan amo tiknekij iniuan timouikaskej oksekin porin techkualantiaj. Sayoj ke, moneki tikinixtopeuaskej sayoj akin Jehová kinixtopeua (1 Cor. 5:11). Sekin yejuan akin tajtakolchiuaj uan amo moyolpataj, akin techijijtouaj uan kijijtouaj tein tikneltokaj, uan akin kitemouaj maj amo kuali timouikakanok iuan Jehová (Prov. 13:20).

15. ¿Keniuj tiknextiaj ke tikinpatiuitaj “akin kimojkatokaj Jehová”?

¹⁵ Sayoj ke Salmo 15:4 kijtoua ke moneki tikinpatiuitaskej “akin kimojkatokaj Dios”. Yejua ika tiyolkualmej iniuan itasojikniuan Jehová uan tikinpatiuitaj (Rom. 12:10). ¿Keniuj uelis tikchiuaskej? Salmo 15:4 kijtoua ke akin mokaua ichan Jehová “nochipa kichiua tein motenkaua maski tapolos”. Komo amo tikchiuaj tein timotenkauaj ueliskia tikinyolkokoskej oksekin (Mat. 5:37). Jehová kichia maj se takat uan isiuatsin kichiuakan tein motenkaujkej keman monamiktijkej. Jehová no kineki maj tetatmej mochikauakan kichiuaskej tein motenkauaj iniuan ininkoneuan. Kemej tiktasojtaj Dios uan oksekin, timochikauaj tikchiuaskej tein timotenkauaj.

16. ¿Keniuj no tiknextiaj ke tikinpatiuitaj itasojikniuan Jehová?

¹⁶ No tiknextiaj ke tikinpatiuitaj itasojikniuan Dios keman kuali tikinseliaj uan tiyolkualmej iniuan (Rom. 12:13). Amo sayoj moneki timonechikoskej uan iniuan titanojnotsaskej tokniuan, ta no moneki timosentiliskej para timoixpetaniskej, ijkon okachi kuali iniuan timouikaskej uan no iuan Jehová. Uan no, tikchiuaj kemej Jehová keman kuali tikinseliaj oksekin.

MAJ AMO TIKTELNEKIKAN TIMOTOMINTISKEJ

17. ¿Keyej ika motajtoua tomin itech Salmo 15?

¹⁷ Salmo capítulo 15 kisentoka kijtoua ke akin mokaua ichan Jehová “keman tetaneujtia tomin amo kitemoua kitanilis uan amo kitapantia akin yolkuali maski kitaxtauiskej” (Sal. 15:5). ¿Keyej nejin salmo ika tajtoua tomin? Porin komo sayoj tiknejnekij tikpiaskej miak tomin, xa amo kuali timouikaskejok iuan Dios nion iniuan oksekin (1 Tim. 6:10). Ne uejkauj, sekin kintajtaniayaj miak tomin akin pobres maski amo miak kintaneujtijkaj. Uan seki jueces kiseliayaj tomin tein kinmakayaj para kinpantiskej  sekin ke kichiujkaj tein amo kuali. Jehová amo kiuelita maj aksa kichiua nejon (Ezeq. 22:12).

18. ¿Toni moneki timotajtaniskej? (Hebreos 13:5).

¹⁸ Moneki maj tiknemilikan keniuj tikitaj tomin. Maj timotajtanikan: “¿Nochipa ika nitanemilijtinemi tomin uan tein nikneki nikouas? Komo aksa nechtaneujtia tomin, ¿semi niuejkaua para nikepilis porin niknemilia ke yejua amo kipoloua? ¿Nimoueyimati porin nikpia tomin? ¿Nechouijkisa ika nikinpaleuis oksekin? ¿Niknemilia ke tokniuan akin kipiaj tomin amo kitasojtaj Jehová uan sayoj kinejnekij kipiaskej miak taman? ¿Sayoj kuali nimouika iniuan akin kipiaj tomin uan amo iniuan akin pobres?”. Semi moneki maj timotajtanikan nejin porin tejuan kemej yeskia tietokej ichan Jehová. Uan uelis tiksentokaskej ompa tietoskej komo amo sayoj tiktemouaj tikpiaskej miak tomin. Komo ijkon tikchiuaj, Jehová amo keman techkauas (xikonixtajtolti Hebreos 13:5).

JEHOVÁ KINTASOJTA ITASOJIKNIUAN

19. ¿Keyej kineki Jehová maj tikchiuakan tein kijtoua Salmo 15?

¹⁹ Kampa tami Salmo capítulo 15, kijtoua nejin: “Akin kichiua nejin amo teyi kipanos” (Sal. 15:5). Ika nejin tajtolmej, salmista kijtoua ke Jehová kineki maj tikchiuakan tein axkan timomachtijkej para maj tiyolpakikan. Keman tikchiuaj tein Dios kineki, tiyolpakij uan yejuatsin techyekpias (Is. 48:17).

20. ¿Toni tein kualtsin kichiaj maj mochiua akin moajsij ichan Jehová?

²⁰ Akin nemij kampa kemej yeskia ichan Jehová uan amo keman kikauaj, kiseliskej miak taman tein kuali amo uejkaua. Taijitalmej nemiskej ne iluikak, kampa Jesús kintachijchiuij (Juan 14:2). Uan nochin oksekin akin kichiuaj kemej Cristo semi yolpakiskej keman nemiskej nikan taltikpak uan kiseliskej tein kijtoua Apocalipsis 21:3. ¡Semi tiktasojkamatiliaj Jehová porin techyoleua maj nochipa tinemikan kampa kemej yeskia ichan!