1. Ukuhlola iHubo 15:​1-5 kuzasinceda ngani?

 ESIHLOKWENI esidlulileyo sibonile ukuthi abantu abamukelwa nguJehova etendeni lakhe ngabazinikela kuye bahlale bengabangane bakhe. Kodwa kumele senzeni ukuze uJehova asamukele etendeni lakhe? IHubo 15 liyawuphendula umbuzo lo. (Bala iHubo 15:​1-5.) IHubo leli liyasitshela okumele sikwenze ukuze sibe ngabangane bakaNkulunkulu.

2. Kuyini okungabe kwenza uDavida wakhuluma ngetende likaJehova?

² IHubo 15 liqalisa ngamazwi athi: “Awu Jehova, ngonjani umuntu omamukela etendeni lakho? Ngubani ongahlala entabeni yakho engcwele?” (Hubo. 15:1) Ngesikhathi umhubi uDavida ekhuluma ‘ngetende’ likaJehova kungenzeka ukuthi wayecabanga ngethabanikeli elaliseGibhiyoni okwesikhathi esithile. UDavida uphinda akhulume ‘ngentaba engcwele’ kaNkulunkulu. Kungenzeka ukuthi wayesitsho intaba iZiyoni eyayiseJerusalema. Entabeni leyo eyayingamakhilomitha angaba litshumi eningizimu yeGibhiyoni, uDavida wamisa itende lapho okwakuzahlala khona ibhokisi lesivumelwano kuze kwakhiwe ithempeli.—2 Sam. 6:17.

3. Kungani kumele silizwisise iHubo 15? (Khangela lomfanekiso.)

³ Ama-Israyeli amanengi ayengavunyelwa ukusebenza ethabanikeli njalo malutshwana kakhulu ake angena etendeni okwakugcinelwa kulo ibhokisi lesivumelwano. Kodwa izinceku zikaJehova ezithembekileyo zingemukelwa etendeni lakhe nxa zingaba ngabangane bakhe futhi ziqhubeke ziyibo. Sonke siyakufuna sibili ukuhlala singabangane bakhe. IHubo 15 lisitshela lokho okumele sikwenze ukuze sihlale singabangane bakaJehova.

 WOBA NGONGASOLEKIYO NJALO WENZE OKUHLE

4. Sikwazi njani ukuthi ukubhabhathizwa kayisikho kodwa okwenza uJehova asamukele? (U-Isaya 48:1)

⁴ IHubo 15:2 lithi umngane kaJehova “ngulowo ongasolekiyo, owenza okuhle.” Lezi yizinto okumele siqhubeke sizenza. Kodwa kungenzakala yini ukuthi sibe ngabantu ‘abangasolekiyo’? Ye kungenzakala. Lanxa sonke silesono, uJehova uzasibona singabantu ‘abangasolekiyo’ nxa singenza konke okusemandleni ethu ukuthi simlalele. Nxa singazinikela kuNkulunkulu sibhabhathizwe siyabe siqalisa ukuba ngabangane bakhe. Khumbula ukuthi kudala ukuba ngum-Israyeli ayisikho okwakusitsho ukuthi uJehova uyamamukela umuntu etendeni lakhe. Abanye babekhuleka kuye lanxa lokho ‘babengakwenzi ngeqiniso langokulunga.’ (Bala u-Isaya 48:1.) Um-Israyeli owayekufuna sibili ukwamukelwa nguJehova etendeni lakhe kwakumele akwazi ukuthi uJehova ufunani futhi akwenze. Lalamuhla ukubhabhathizwa lokungena imihlangano yaboFakazi bakaJehova akutsho ukuthi umuntu usengumngane kaJehova. Kulokunye okuyabe kumele sikwenze. Kumele sihlale ‘sisenza okuhle.’ Singakwenza njani lokho?

5. Kutshoni ukulalela uJehova kukho konke?

⁵ Nxa umuntu ehamba emihlanganweni yebandla zikhathi zonke akutsho ukuthi ‘usengongasolekiyo’ kuJehova kumbe ukuthi ‘usesenza okuhle.’ (1 Sam. 15:22) Kumele senze konke okusemandleni ethu ukuthi silalele uNkulunkulu kukho konke esikwenzayo lanxa kungelamuntu osibonayo. (Zaga. 3:6; Umtshu. 12:​13, 14) Kuqakathekile ukuthi silalele uJehova lasezintweni ezingakhanya zizincane. Nxa singenza njalo siyabe sitshengisa ukuthi siyamthanda kakhulu njalo lokho kuzenza laye asithande.—Joh. 14:23; 1 Joh. 5:3.

6. UHebheru 6:​10-12 utshengisa ukuthi kuyini okuqakatheke kakhulu ukwedlula izinto ezinhle esake sazenza kudala?

⁶ UJehova uyathokoza kakhulu ngezinto  ezinhle esamenzela zona esikhathini esidlulileyo. Kodwa okuhle esakwenza kudala ayisikho okwenza ukuthi uJehova ahlale esamukela etendeni lakhe. UHebheru 6:​10-12 (Bala.) uyasinceda ukuthi sikuzwisise lokhu. UJehova kayikhohlwa imisebenzi emihle esake samenzela yona, kodwa ufuna siqhubeke simkhonza ngenhliziyo yonke “kuze kube sekucineni.” Uzahlala engumngane wethu kuze kube nini lanini “nxa kuyikuthi asidinwa.”—Gal. 6:9.

KHULUMA IQINISO ENHLIZIYWENI YAKHO

7. Ukukhuluma iqiniso enhliziyweni yethu kutshoni?

⁷ Umuntu ofuna ukwamukelwa nguJehova etendeni lakhe kumele ‘akhulume iqiniso enhliziyweni yakhe.’ (Hubo. 15:2) Lokhu akutsho ukungaqambi amanga kuphela. UJehova ufuna sithembeke kukho konke esikukhulumayo lesikwenzayo. (Heb. 13:18) Kuqakathekile ukuthi senze njalo ngoba “uJehova uyamzonda umuntu oliqili, kodwa ungumngane omkhulu wabathembekileyo.”—Zaga. 3:32.

8. Kuyini okungamelanga sikwenze?

⁸ Umuntu “okhuluma iqiniso enhliziyweni yakhe” kazitshayi umuntu olalela uNkulunkulu nxa esebantwini kodwa abesesenza okubi nxa eseyedwa. (Isaya. 29:13) Kanti njalo kayisiloqili. Umuntu oliqili loba ongathembekanga angaqalisa ukuthandabuza ukuthi imithetho kaJehova iyasinceda zikhathi zonke. (Jak. 1:​5-8) Angakhetha ukungalaleli uJehova endabeni yena abona angani kaziqakathekanga kangako. Nxa angabona ukuthi akulalutho olubi olwenzakalayo ngenxa yokungalaleli kwakhe, angaqalisa ukwenza izinto ezimbi kakhulu. Lanxa yena eyabe ezitshela ukuthi uyakhonza, uJehova uyabe engasamamukeli. (Umtshu. 8:11) Kodwa thina sifuna ukuthembeka ezintweni zonke.

9. Kuyini esingakufunda kulokho okwenzakala ngesikhathi uJesu eqalisa ukuhlangana loNathaniyeli? (Khangela lomfanekiso.)

⁹ Okwenzakala ngesikhathi uJesu eqalisa ukuhlangana loNathaniyeli kungasifundisa ukuqakatheka kokuba ngabantu abaqotho. Ngesikhathi uFiliphu eletha umngane wakhe uNathaniyeli kuJesu, kulento emangalisayo eyenzakalayo. Lanxa uJesu wayeqalisa ukumbona, wathi: “Khangelani, um-Israyeli uqobo  ongelabuqili ngitsho.” (Joh. 1:47) UJesu wayekwazi ukuthi abanye abafundi bakhe babethembekile kodwa wabona ukuthi uNathaniyeli wayeqotho kakhulu. UNathaniyeli wayelesono njengathi kodwa wayethembekile ezintweni zonke, engelabuqili. UJesu wakunanzelela lokho futhi wamncoma uNathaniyeli. Akuthandabuzwa ukuthi sonke siyafisa ukuthi uJesu asibone njalo.

10. Kungani kumele sinanzelele izinto esizikhulumayo? (UJakhobe 1:26)

¹⁰ Izinto ezinengi okukhulunywa ngazo kuHubo 15 zimayelana lendlela esiphatha ngayo abanye. IHubo 15:3 lithi umuntu owamukelwa nguJehova etendeni lakhe “kakhulumi amanga ngomunye umuntu [kumbe kanyundeli omunye, amabala angaphansi], kenzi okubi kumakhelwane wakhe, njalo kagconi abangane bakhe.” Inkulumo ezinjalo zingabalimaza kakhulu abanye njalo zingacina zisenza ukuthi uJehova angasasamukeli etendeni lakhe.—Bala uJakhobe 1:26.

11. Kutshoni ukunyundela njalo kuyini okwenzakalayo emuntwini nxa engaphenduki?

¹¹ Umhubi ukhuluma ngokunyundela. Kutshoni ukunyundela? Kutsho amanga akhulunywa mayelana lomunye umuntu angangcolisa ibizo lakhe. Umuntu onyundela abanye engaphenduki angacina esuswa ebandleni.—Jer. 17:10.

12-13. Kunini lapho esingagcona khona abanye singananzelelanga? (Khangela lomfanekiso.)

¹² IHubo 15:3 lisikhumbuza lokuthi abantu abemukelwa nguJehova kabenzi okubi kubomakhelwane babo njalo kabagconi abangane babo. Kutshoni lokho?

¹³ Singagcona umuntu ngokuhamba sifafaza izinto ezingamanga ngaye singananzeleli. Ngokwesibonelo, ake sithi udadewethu uyama ukuphayona kumbe umfowethu lomkakhe bayasuka eBhetheli, loba omunye umfowethu uyama ukuba ngumdala kumbe ukuba yinceku ekhonzayo. Kuqondile yini ukuthi sizame ukucabangela ukuthi kungani lokho kwenzakele  futhi sihambe sesitshela abanye lokho esikucabangayo kodwa esingelaqiniso lakho? Kungenzakala ukuthi kulezizatho esingazaziyo ezingabe zenze kwaba lotshintsho lolo. Kanti njalo kumele sikhumbule ukuthi umuntu owemukelwa nguJehova etendeni lakhe “kenzi okubi kumakhelwane wakhe, njalo kagconi abangane bakhe.”

HLONIPHA LABO ABESABA UJEHOVA

14. Kutshoni ukungadlelani laloba ngubani “owenza izinto ezenyanyekayo?”

¹⁴ IHubo 15:4 lithi umngane kaJehova “kadlelani laloba ngubani owenza izinto ezenyanyekayo.” Sibakwazi njani ukuthi umuntu wenza izinto ezenyanyekayo? Njengoba silesono, ngeke sahlulele umuntu ngokuthi wenza izinto ezenyanyekayo. Phela singabe sithanda abanye abantu ngenxa yobuntu obuthile abalabo kodwa kuphinde kube labanye esizwa besicaphula ngenxa yobuntu babo. Kodwa labo okungamelanga sidlelane labo ngabantu uJehova athi ‘benza izinto ezenyanyekayo.’ (1 Khor. 5:11) Abanye bakhona ngabenza izinto ezimbi bengaphenduki, abangahloniphi lokho esikukholwayo kumbe abazama ukuphambanisa ubungane bethu loJehova.—Zaga. 13:20.

15. Yiphi indlela esingatshengisa ngayo ukuthi siyabahlonipha “labo abesaba uJehova?”

¹⁵ IHubo 15:4 liphinda lisitshele ukuthi sihloniphe labo “abesaba uJehova.” Yikho siyadinga indlela zokuba lomusa kubangane bakhe njalo sibahloniphe. (Rom. 12:10) Enye indlela esingakwenza ngayo lokho okukhulunywa ngayo kuHubo 15:4 ‘yikugcwalisa isithembiso sethu lalapho kubuhlungu ukwenza njalo.’ Ukwephula izithembiso zethu kungabazwisa ubuhlungu kakhulu abanye. (Mat. 5:37) Ngokwesibonelo, uJehova ukhangelele ukuthi labo abamukela etendeni lakhe bagcine izifungo zabo zomtshado. Uyajabula nxa abazali besenza konke okusemandleni abo ukuthi bakwenze lokho abakuthembisa abantwababo. Nxa simthanda uNkulunkulu kanye lomakhelwane wethu, sizenza konke okusemandleni ethu ukuthi sikwenze lokho esiyabe sikuthembisile.

16. Yiphi enye indlela esingatshengisa ngayo ukuthi siyabahlonipha abangane bakaJehova?

¹⁶ Enye indlela esingatshengisa ngayo ukuthi siyabahlonipha abangane bakaNkulunkulu yikubanxusa emizini yethu kanye lokuba ngabaphanayo. (Rom. 12:13) Ukuzinika isikhathi sokuzikholisela labafowethu labodadewethu kungasinceda ukuthi sizwanane labo kakhulu lokuthi sisondele kuJehova. Kanti njalo nxa sinxusa abantu emizini yethu siyabe silingisela uJehova.

XWAYA UKUTHANDA IMALI

17. Kungani kukhulunywa langemali kuHubo 15?

¹⁷ IHubo 15 liphinda lithi umuntu owamukelwa nguJehova etendeni lakhe “kaboleki muntu imali yakhe abeseyifuna isizele, kavumi ukufunjathiswa ukuze athi olungileyo ulecala.” (Hubo. 15:5) Kungani kukhulunywa ngemali esahlukweni lesi? Ngenxa yokuthi ukuthanda imali kungenza sizwise abanye ubuhlungu lokuthi siphambanise ubungane bethu loNkulunkulu. (1 Thim. 6:10) Kudala abanye babecindezela abafowabo abangabayanga ngokubaboleka imali besebebabhadalisa isilenzuzo. Abanye abahluleli babevuma ukufunjathiswa besebesahlulela kubi abantu abangelacala. Izinto lezi ziyenyanyeka kuJehova.—Hez. 22:12.

18. Yiphi imibuzo esingazibuza yona engasinceda sihlole indlela esiyibona ngayo imali? (UHebheru 13:5)

¹⁸ Kungaba kuhle ukuthi sihlale sihlola indlela esiyibona ngayo imali. Zibuze imibuzo le: ‘Ngihlala ngicabanga ngemali yini kumbe ngezinto ebengingazithenga aluba bengilayo? Nxa ngingaboleka imali ngiyaphuza yini ukuyibhadala ngizitshela ukuthi umuntu ongiboleke yona kayidingi? Ukuba lemali kungenza ngizibone  ngiqakathekile yini? Kunzima yini ukuthi ngiyiphe abanye? Ngicabanga ukuthi abafowethu labodadewethu abalemali bayithanda ukwedlula uJehova yini? Ngingumngane labantu abanothileyo kuphela yini?’ Silesibusiso esikhulu sokuba setendeni likaJehova. Kodwa okuzasinceda ukuthi uJehova ahlale esamukela etendeni lakhe yikuxwaya ukuthanda imali. Nxa singenza njalo uJehova kasoze asitshiye.—Bala uHebheru 13:5.

UJEHOVA UYABATHANDA ABANGANE BAKHE

19. Kungani uJehova efuna senze konke okukhulunywa ngakho kuHubo 15?

¹⁹ IHubo 15 liphetha ngesithembiso esithi: “Umuntu onjalo kasoze anyikinywe.” (Hubo. 15:5) Evesini le umhubi uyasichasisela ukuthi kungani uJehova efuna senze zonke izinto eziqanjwe esahlukweni leso. Ufuna sithokoze. Nxa singenza lokho athi sikwenze uzasibusisa futhi uzasivikela.—Isaya. 48:17.

20. Abantu abasetendeni likaJehova balindeleni?

²⁰ Abantu abamukelwa nguJehova etendeni lakhe bangakhangelela ukuba lekusasa elihle. Abagcotshiweyo abathembekileyo bazamukelwa ‘endaweni ezinengi zokuhlala’ abazilungiselelwe nguJesu ezulwini. (Joh. 14:2) Abalethemba lokuphila emhlabeni bakulindele ngabomvu ukugcwaliseka kwesithembiso esikuSambulo 21:3. Akuthandabuzwa ukuthi sonke siyasiqakathekisa isibusiso esiligugu sokwamukelwa nguJehova sibe ngabangane bakhe njalo sihlale etendeni lakhe kuze kube phakade!