1. Nduyo 15:​1-5 ingatibeseresa kudini?

 MU CIJIJO cakapera, itusu takajija kuti wiya anopira upenyu hwake kuna Jehovha, angava shamwari yake no kunghwina mu tende yake yokuezanisira. Tingaitisa kudini kuti tienderere mberi tiri varendo mutende ya Jehovha? Nduyo 15 inobhuya ngo pamusoro po shwiro iyi. (Verenganyi Nduyo 15:​1-5.) Nduyo iyi inonasa kutisanangurira zvatinodikana kuita kuti tikwanise kuva no ushamwari hwophedo na Jehovha.

2. Kangaije Dhavhidhi wairangarirenyi paakabhuya ngo pamusoro po tende ya Jehovha?

² Nduyo 15 inotanga ngo kubhuya kudari: “Jehovha, ndiyani anofanera kuva murendo mutende yenyu? Ndiyani anofanera kugara pa dundhu renyu rakacena?” (Nduyo 15:1) Mutari wo nduyo paakabhuya “tende” ya Jehovha, zvingaita kuti iyena wainga ecirangarira ngo pamusoro po tabhernake yaingaya ku Gibhiyoni. Dhavhidhi wakabhuyavo ngo “dundhu ra Mwari rakacena,” kangaije iyena wainga ecibhuya dundhu ro Ziyoni raingaya ku Jerusarema. Kuvha ku dundhu, painga no makiromita akawanda maningi mbhera koguma ku mavhazuva ko Gibhiyoni. Kondhoyo Dhavhidhi wainga akaita tende odiremo arka yo citenderano mbhera pakazovakwa themberi.—2 Samueli 6:17.

3. Ngenyi zvinosisira kuzwisisa zvinonangwa pana Nduyo 15? (Vonanyi foto.)

³ Zvakajeka kuti Vaiziraeri vazinji avacaidikanepi kushandira mu tabherinake, maningi-ningi mukati mainga no tende, mokuti arka yo citenderano yainga yakangwaririhwa mukatimo. Asi vashandiri vese vakagondeka va Jehovha vaikwanisa kuva varendo mu tende yake yokuezanisira. Ivona vaiita zvondhozvo ngokuva shamwari jake no kwenderera mberi vakadaro. Izvi i zviro zvokuti tese tinozvida. Nduyo 15 inobhuya ngo pamusoro po mugariro jimweni jatinodikana kusakurira no kukhombija kuti tikwanise kwenderera mberi tiri shamwari ja Jehovha.

 FAMBANYI MUKUGONDEKA ITANYI ZVAKARURAMA

4. Tinozvizivisa kudini kuti kuna Jehovha tinodikana kuita zvizinji kusiyapo basi kubhabhatijwa? (Isaia 48:1)

⁴ Nduyo 15:​2, inonanga kuti shamwari ya Mwari “nga wiya anofamba akagondeka eciita zvakanaka.” Magama okuti “kufamba” no “kuita” anokhombija kuti tinodikana kwenderera mberi teciita zvondhozvo. Kureva kuti tinokwanisadi kamare ‘kufamba mukugondeka’? Hina. Zvakajeka kuti akuna mundhu wakakwana, asi Jehovha anotivona kuti tiri “kufamba mukugondeka” kudari tikaita zvese zvatinokwanisa kuti timuzwire. Patinopira upenyu hwedu kuna Mwari tobhabhatijwa, tinonga tecitanga kamare kufamba na Mwari. Asi vonanyi kuti mu nguva jokare, kuita basi divi ro jinja ro Vaiziraeri azvicaikwanepi kuti mundhu ave murendo wa Jehovha. Ngokuti vamweni vainanga kuti vaishandira Mwari, asi “avacaizviita ngo mwoyo wese.” (Verenganyi Isaia 48:1.) Vaiziraeri vokuti vaida kuva varendo va Jehovha vaidikana kupsaka kuziva kuti ngozvapi zvaidiwa ndi Mwari kuti vaite, voita zvondhozvo. Ngo njira yakaezana, kudari itusu tinoda kutendehwa ndi Jehovha, tinodikana kuita zvizinji kusiyapo basi kubhabhatijwa no kuvonesa kuti tiri Zvapupu zva Jehovha. Tinodikana kwenderera mberi “teciita zvakanaka.” Zvinoda kurevenyi izvi?

5. Zvinorevenyi kuzwira Jehovha pa zviro zvese?

⁵ Pa meso pa Jehovha, “kufamba takagondeka” no “kuita zvakanaka” zvinoreva kuita zvakawanda maningi kupinda basi kwenda kozwa musongano ku Nyumba yo Umambo. (1 Samueli 15:22) Itusu tinodikana kuvangisira maningi kuti tizwire Jehovha mu zvese zvatinoita mu upenyu hwedu, kubatanijavo na paya patinonga tiri tega. (Mazwi Akangwara 3:6; Mucumaeri 12:​13, 14) Zvinosisira kwenderera mberi tecivangisira kuti tizwire Jehovha pikija pa zviro zvatinovona kuti azvisisiri. Patinoita izvi, tinonasa kukhombija kamare kuti itusu tinoda Jehovha. Cimwenizve, iyena anozoendereravo mberi ecitida.—Johani 14:23; 1 Johani 5:3.

6. Mukuzwirana na Vahebheru 6:​10-12, ngozvapi zviro zvinosisira maningi kupinda zviya zvaushoni zvatakaita kare?

 ⁶ Jehovha anoreremeja maningi zvese zvatakamuitira. Zviro zvatakaita kare andizvopi zvingatibesera kuti tienderere mberi tiri mu tende ya Jehovha, izvi zvinonasa kujekeswa ushoni pa bhuku ra Vahebheru 6:​10-12. (Verenganyi.) Zvakajeka kuti Jehovha aazombokanganwi zvese zvatakamuitira. Asi iyena anoda kuti itusu tienderere mberi tecimunamata “mbhera kumagumo.” Tinozokwanisa kuva shamwari jake jo kwenda no kwenda kudari ‘tikatama kuremba.’—Vagaratiya 6:9.

VEREKETANYI COKWADI MU MWOYO MENYU

7. Zvinorevenyi kubhuya cokwadi mu mwoyo medu?

⁷ Mundhu anoda kuva murendo anotendehwa ndi Jehovha mu tende yake, anodikana “kuvereketa cokwadi mu mwoyo make.” (Nduyo 15:2) Izvo ngo zvaushoni maningi kupinda kunyepa. Kusiyapo kuva takagondeka pazvatinobhuya, tinoda kuva takagondeka pa zviro zvese. (Vahebheru 13:18) Izvi zvinosisira “ngokuti Jehovha anonyenya vandhu vanonyepa,” asi anoita ushamwari hwakavanga maningi no vandhu vakagondeka.—Mazwi Akangwara 3:32.

8. Zvicinyi zvaticikadikani kuita?

⁸ Mundhu ‘anobhuya cokwadi mu mwoyo make’ aakhombiji basi kuti anozwira Jehovha pakawanda vandhu, asi paanonga ari ega anozviitavo. (Isaia 29:13) Mukusiyana, mundhu wakadari anongwarira kuti atame kuita zviro mu njira yo kucengejera. Mundhu anocengejera, angatanga kukana-kana kuti mutemo jimweni ja Jehovha ndijona kana kuti haiwa. (Jakobo 1:​5-8) Asi iyena angatotanga kutama kuzwira Jehovha pa zviro zvaanorangarira kuti azvisisiri. Paanovona kuti apana zvinoitika paanotama kuzwira, anoenderera mberi ecindoita zviro zvakashata. Pikija iyena ecirangarira kuti ari kushandira Jehovha, asi Jehovha aatenderi manamatiro ake. (Mucumaeri 8:11) Asi itusu tinoda kuva vandhu vakagondeka mu zviro zvese.

9. Zvicinyi zvakaitika Jesu paakaziva Natanieri, tingajijenyi ngo pamusoro pazvo? (Vonanyi foto.)

⁹ Zvinosisira maningi kuva vandhu vanobhuya cokwadi mu mwoyo medu. Tinokwanisa kuvona kuti izvi ndizvona kuvha ku zvakaitika na Natanieri, Firipi shamwari yake payakamukoka  kuti aende kozivana na Jesu. Pikija kuti Jesu wainga acito amuziva Natanieri, iyena wakananga kudari: “Uwu ndiyena Muiziraeri wo cokwadi, acikacengejeri.” (Johani 1:47) Zvakajeka kuti Jesu waitovonavo vamweni vo vajiji vake inga vandhu vakagondeka, asi wakavona Natanieri inga mundhu wakagondeka maningi. Inga ndusu, Natanieri wainga mundhu acizivi kukwana, asi iyena aacaingepi mucengejeri, wainga akagondeka pa zviro zvese. Jesu wakashamaisika maningi ndizvona perapo omuvangisa. Zvakajeka kuti tese tinoda kuti Jesu ativone ngo njira yondhoyo.

10. Ngenyi tinodikana kungwarira zvatinobhuya? (Jakobo 1:26)

¹⁰ Masoko amweni ari pa bhuku ra Nduyo 15, anobhuya kana kuti anocokuita maningi-ningi ngo manera atinotaja vandhu vamweni. Nduyo 15:3 inobhuya kuti murendo mu tende ya Jehovha ‘aashandisi rurumi hwake kuti anyepere vamweni, aaitiri vadoni vake zviro zvakashata, nee aarevi shamwari jake.’ Kudari itusu tikava vandhu vanobhuya ngo njira iyi, tinoguma pakukhugunya vamweni, zvikadaro Jehovha aazotenderi kuti tive varendo mutende yake.—Verenganyi Jakobo 1:26.

11. Zvinorevenyi kunyepa, zvicinyi zvinoitika no munyepi acikakhauyi?

¹¹ Dhavhidhi wakamuka kubhuya kamare ngo pamusoro po mundhu anonyepera vamweni. Kuitisa kudini kunyepera vamweni? Kunasa kunanga ikundha-ndhanisa masoko okunyepa ngo pamusoro po mundhu umweni, zvingatoguma pakukhuvaza mufambiro wo mundhu wondhowo. Mundhu anobhuya masoko aciripi iwona ngo pamusoro po umweni kana kuti kumunyepera otama kukhauya, aadikanizve kuva Capupu ca Jehovha.—Jeremia 17:10.

12-13. Pa mugariro japi jataizopejisira ngokureva shamwari jedu? (Vonanyi foto.)

¹² Nduyo 15:3 inoticeukija kuti varendo va Jehovha avaiti zviro zvakashata ku vadoni vavo nee avarevi shamwari javo no kujinyoweja. Izvi zvinoda kurevenyi?

 ¹³ Kangaije ticikazvidi tingagumira pakureva mudoni wedu ngokundha-ndhanisa masoko aciripi okadi. Rangariranyi ngo mugariro mutatu iji jinoteverari: Wokutanga, hambzaji yasiya kuva piyona. Wocipiri, varovorani vasiya kushandira pa Bheteri. Wocitatu, hama yokuti aiciripizve mukuru kana aiciripizve mubeseri wo ungano. Zvaizova zvakashata kudari itusu tikagara tecibhuya kuti hama iji jakaita zviro zvakashata ndiyo ndava vaitikihwa nga izvi. Kaingaije pano mathangwe akawanda anobatanijwepo aticikazivi. Ngo kudaro, murendo mutende ya Jehovha “aaitiri vadoni vake zviro zvakashata, nee aarevi shamwari jake.”

KUJANYI VAYA VANOTHYA JEHOVHA

14. Sananguranyi kuti kuitisa kudini murendo wa Jehovha angatama “kuita ushamwari no mundhu wese anoita zvakashata.”

¹⁴ Nduyo 15:4 inonanga kuti shamwari ya Jehovha “ayiiti ushamwari no mundhu wese anoita zvakashata.” Tingamuzivisa kudini kuti mundhu uwu anoita zvakashata? Ngokuti tiri vandhu vacizivi kukwana atikwanisi kunanga kuti uwu anoita zvakashata kana kuti haiwa. Ngenyi? Ngo ndava yokutama kukwana, itusu tingaguma pakudakarira vandhu vatinovona kuti vakareruka kupona navo totama kudakarira vandhu vatinovona inga vanoita zvakashata ngokuti vanotinyangajisa. Asi itusu atidikani kuita ushamwari no vandhu vaya vanonangwa ndi Jehovha kuti vanoita ‘zvakashata.’ (1 Vakorinte 5:11) Izvi zvinobatanija vandhu vanoita zvakashata vacikakhauyi, vacikareremeji zviya zvatinotenda no vaya vanoeja kurembesa ushamwari hwedu na Jehovha.—Mazwi Akangwara 13:20.

15. Mu njira yapi tingakuja “vaya vanothya Jehovha”?

¹⁵ Ngo divi rimweni, Nduyo 15:​4, inonanga kuti tinodikana kukuja “mundhu wese anothya Jehovha.” Kuti tikwanise kuita izvi tinopsaka njira jokukhombija ndijona kunaka mwoyo no nderemejo kuno shamwari ja Jehovha. (Varoma 12:10) Njira imweni yokuita ndiyona izvi inonangwa pa bhuku ra Nduyo 15:​4, murendo mu tende ya Jehovha “anokwanirisa zvaanogondesa, pikija zvecinesa kwaari.” Patinotama kukwanirisa zvatakagondesa tingaguma pakukhugunya vamweni. (Mateu 5:37) Inga muezaniso, Jehovha anovetera kuti mwamuna no mukaji vakwanirise mbhiko yavo yavakaita pa njiku yavakacadha. Jehovha anodakaravo maningi kudari majibaba akakwanirisa mbhiko javakaita kuno vana vavo. Ngo ndava yo rudo hwatinahwo no vandhu na Jehovha itusu tinoita zvese zvatinokwanisa kuti tikwanirise zviya zvatakagondesa.

16. I njira japi jimweni jatingakuja ndijona shamwari ja Jehovha?

¹⁶ Njira imweni yokukuja shamwari ja Jehovha ngo yo kuva vandhu vanoashira varendo no kukova. (Varoma 12:13) Kupeja nguva no hama no hambzaji kuciripi basi mu basa rokucumaera no kumusongano, zvinotibesera kuti tivangise ushamwari hwedu navo pamwepo na Jehovha. Kunja kwa zvondhozvo, kukhombija kuashira varendo, tinonga tecitevejera Jehovha.

MUCADISISA MANINGI MARE

17. Ngenyi Nduyo 15 inobhuyavo ngo pamusoro po mare?

¹⁷ Pa bhuku ra Nduyo 15:5 tinoverenga kuti murendo wa Jehovha “aashongeji mare yake kuti azopuwe mare yakawanda, iyena aatenderi kudyekehwa kuti ape ndava mundhu acina ndava.” (Nduyo 15:5) Ngenyi nduyo iyi inobhuya ngo pamusoro po mare? Ngokuti kudari tikaneseka maningi ngo pamusoro po mare, ingazoguma pakuva inosisira maningi kupinda vandhu na Jehovha. (1 Timoti 6:10) Mu nguva jokare, vamweni vaishongeja mare  hama javo javaivona kuti varombo kuti vazopuwa yawanda. Kunja kwa zvondhozvo, vatongi vamweni vaitendera kudyekehwa kuti vatonge vandhu vacina ndava ngo njira icizivi kururama. Asi Jehovha anonyenya vandhu vanoita izvi.—Ezekieli 22:12.

18. Ngojapi muvhunjo jatingajiita kuti tivone kuti ngoapi mavonero edu ngo pamusoro po mare? (Vahebheru 13:5)

¹⁸ Zvaizova zvaushoni kudari tikaima torangarira kuti ngoapi mavonero edu ngo pamusoro po mare. Jivhunjisenyi kudari: ‘Kureva kuti ndinogara maningi ndecirangarira ngo pamusoro po mare, kana kuti zvandaizotenga kudari nondainga ndino mare? Kudari mundhu akandishongeja mare kureva kuti ndinononoka kuhwirija, ndecirangarira kuti azvipsasi mune wayo? Kureva kuti ndinojivona ndecisisira maningi kupinda vamweni ngo kuti ndino mare maningi? Kureva kuti ndinocineso cokuva anokova ku vamweni? Kureva kuti ari wese ano zvizinji ngokuti iyena ano mare maningi? Kureva kuti ndinoita maningi ushamwari no vandhu vakagarika kuciripi vaya vari varombo?’ Tese hedu tinocidakajiso cikuru cokukokwa kuti tive varendo mu tende ya Jehovha. Kudari itusu tecida kwenderera mberi tiri varendo va Jehovha tinodikana kungwarira maningi kuti titame kudisisa mare. Kudari tikada maningi Jehovha kupinda mare, narini Jehovha aazotisiyi.—Verenganyi Vahebheru 13:5.

JEHOVHA ANODA SHAMWARI JAKE

19. Ngenyi Jehovha anoda kuti itusu tiite zvese zvanangwari pana Nduyo 15?

¹⁹ Nduyo 15 inopejisira ngo cigondiso ici “mundhu wese anoita zviro izvi, anozoenderera mberi akaima.” (Nduyo 15:5) Apa Dhavhidhi anobhuya ngo thangwe rinosisira maningi rinoita kuti Jehovha ativhunje zviro zvese izvi. Jehovha anoda kuti itusu tive takadakara. Ndiyo ndava, patinoita zviro zvatinokumbihwa ndi Jehovha tinova no upenyu hwaushoni no kujivirihwa.—Isaia 48:17.

20. Varendo va Jehovha vari kuveterenyi kumbejiyo?

²⁰ Varendo va Jehovha vanokumbeji kwaushoni kunomonikira. Vashandiri va Jehovha vakagondeka vokuzojwa, vanozokokwa kuti vaende kogara “mu ndau zinji” jo vakanasiririhwa ndi Jesu kudenga. (Johani 14:2) Kuna vaya vano vetero yokuzorarama pasi pano, vari kuvetera no cidaka-daka cese kukwanirisika ko cigondiso ciri pana Apokaripsi 21:3. Pacina kukana-kana, itusu tinovona kuti ici i cidakajiso cikuru maningi kukokwa ndi Jehovha kuti tive shamwari jake no kuva varendo mu tende yake mbhera narini.