1. Ti mwawiihai Salmu 15:1-5 onahaaleiye onikhaviherya?

 MMWAHA ovirale, hiyaano noohuserya wi yoowo onaveleela okumi awe wa Yehova onanwerya okhala nthamwene awe, naari wi ovolowa mmuxakalani mwawe. Nyenya ti mwawiihai nnahaalaahu otitelela okhala aleco mmuxakalani wa Yehova? Salmu 15 onnaloca vooloca sa mwaha ene yoowo. (Mwaalakhanye Salmu 15:1-5.) Salmu yoola onnathariha yeeyo nnaphwanelaahu weera wi ntitelele okhalano onthamwene wawaacameleyaxa ni Yehova.

2. Tavite akhweya uupuwela sa eheeni vaavaa aaloceiye sa muxakala wa Yehova?

² Salmu 15 onapacerya ni masu ala: “Khwoo Yehova, taani oni awerye okhala muleco mmuxakalani mwanyu? Taani oni awerye omaka va mwaako anyu waweela?” (Sal. 15:1) Vaavaa aalonceiye sa ‘muxakala’ wa Yehova, akhweya Tavite aahuupuwela sa tapernaakulu yoowo aari o Kapawoni mu elukuluku yeele. Tavite aahiloca tho vooloca sa ‘mwaako waweela’ wa Muluku, akhweya owo aaloca sa mwaako Siyoni, yoowo waakhala o Yerusalemu. Mwaako yoola, waakhala akilometru ancipale ohico wa Kapawoni, Tavite aahipaka muxakala wi amukuhemo arka awaataana ophiyerya empa ya Muluku etekinwe.—2 Sam. 6:17.

3. Ntakhara heeni ti woochuneya wiiwexexa yeeyo Salmu 15 onaloceiye? (Moone tho eruku.)

³ Ti yawooneya wi Aisarayeli hiyaaphwanela orumeela mu tapernaakulu, xaxaxa ovolowa mmuxakala mummo aarimo arka awaataana. Nyenya alapeli oothene oororomeleya a Yehova yaanwerya okhala mmuxakalani mwawe wooxiphela, ekhalaka ni otitelela okhala asinthamwene a Yehova. Nave ela echu yeeyo oothene ahu nnachunaahu. Salmu 15, onnaloca vooloca sa mikhalelo mikina  seiyo nnachunaahu wunnuwiha ni wooniherya wi ntitelele okhala asinthamwene a Yehova.

MWEECE MOOROROMELEYA NAVE MPAKE YEEYO ERI YAPHAAMA

4. Nnasuwela hai wi wa Yehova nnaphwanela opaka sincipale ohiya pahiru opatisiwa? (Yesaya 48:1)

⁴ Salmu 15:2, onaloca wi nthamwene a Muluku “Ti yoole oneeca moororomeleya, Oneera yeeyo eri yaphaama.” Masu awi “oneeca” ni “oneera” enooniherya wi nnaphwanela otitelela weerakano yeeyo. Apwanne nnanwerya ‘weeca moororomeleya’? Aai. Naamwi ahirivo muchu ori oophaameya, wa Yehova, ‘ninneeca moororomeleya’ vaavaa nnapakaahu owetha wahu wi nimwiiwelele yoowo. Vaavaa nniiveleelaahu wa Muluku ni opatisiwa pahiru ala mapacereryo a mukwaha ahu wa weeca ni Muluku. Moone wi khalai, opaka makupa mu nloko na Aisarayeli, hiweeriha wi muchu eeremoona okhala muleco a Yehova. Akina yaaloca wi annamulapela Muluku, nyenya hiyeerano eyo “mweeparipari naari mwawookololowa.” (Mwaalakhanye Yesaya 48:1, PMM.) Aisarayeli yaawo yaachuna okhala aleco a Yehova yaaphwanela ohuserya ichu soochuneya seiyo Yehova aatikithenryeiye ni ocharaka seiyo. Mmukhalelo mmohamoha, wi nikhaleno weemereryiwa ni Yehova olelo, nnaphwanela opaka sincipale ohiya pahiru opatisiwa ni oloca wi na Anamoona a Yehova. Nnaphwanela otitelela ‘opakaka yeeyo eri yaphaama.’ Eyo enataphulela eheeni?

5. Enataphulela eheeni omwiiwelela Yehova mu ichu soothene?

⁵ Va mithoni va Yehova ‘weeca moororomeleya’ ni ‘opaka yeeyo eri yaphaama’ enataphulela, ohiya pahiru oya mmithukumano mu Empa ya Omwene. (1 Sam. 15:22) Hiyaano nnaphwanela wiilipixerya wi nimwiiwelele Yehova mmakupa oothene a okumi ahu, xaxaxa vaavaa nnakhalaahu mukhatiihu. (Mas. 3:6; Ekl. 12:13, 14) Ti woochuneya otitelela wiilipixerya omwiiwelela Yehova naamwi mu ichu seiyo inooneya wi ti soohichuneya. Vaavaa nneeraahuno yeeyo, ninnooniherya wi chiryene ninnamusivela Yehova, nave owo onahaala onisivela vancipale.—Yoh. 14:23; 1 Yoh. 5:3.

6. Mwawiiwanana ni Ahepri 6:10-12, tiheeni eri yoochuneyaxa opwaha ichu seiyo nipankaahu khalai?

 ⁶ Yehova onnatepa ovaha esisapo yeeyo hiyaano nimpakenlaahu owo khalai. Nyenya ohiya wi ichu seiyo nipankaahu khalai hiseeriha wi nnahaala otitelela okhala aleco mmuxakalani wa Yehova. Hiyaano ninnoona yeeyo mu Ahepri 6:10-12. (Mwaalakhanye.) Eparipari wi Yehova hanacuwala ichu saphaama nipankaahu khalai. Nyenya owo onachuna wi ntitelele omulapelaka yoowo ni okumi ahu woothene “ophiyerya wuukuchulani.” Nave hiyaano nnanwerya okhala asinthamwene awe okhala wookhala “wakhala wi hinivelavenle.”—Aka. 6:9.

MULOCE EPARIPARI MMURIMANI MWANYU

7. Enataphulela eheeni oloca eparipari mmurimani mwahu?

⁷ Muchu onachuna okhala muleco aweemereryiwa mmuxakalani wa Yehova onaphwanela ‘olocaka eparipari mmurimani mwawe.’ (Sal. 15:2) Eyo enataphulela, ohiya pahiru ohiloca ichu sawootha. Yehova onachuna wi nikhale oororomeleya mu soothene seiyo nnalocaahu ni nnapakaahu. (Ahe. 13:18) Nave eyo ti yoochuneya ‘woona wi Yehova onnamuthanya mulavilavi, nto anniiwananano awookololowa murima.’—Mas. 3:32.

8. Meecelo taani nnaphwanelaahu osepa?

⁸ Yoole “onaloca eparipari mmurimani mwawe” haniiseera wi onnamwiiwelela Yehova veeri va achu, mu elukuluku emohamoha ahinamwiiwelela Muluku vaavaa onakhaleiye mukhateiye. (Yes. 29:13) Moohiyana ni yeeyo, muchu yoola onnasepa okhala mulavilavi. Muchu eelavilavi onanwerya opacerya woonaka wi tahi waphaama ilukuluku soothene ocharihaka malamulo a Yehova. (Tiy. 1:5-8) Owo onanwerya opacerya ohimwiiwelela Yehova mmiyaha seiyo inooneya ntoko wi ti soohichuneya. Nave vaavaa owo onooneiye wi hiyaavo eneereya wakhala wi owo hiiwelenle, owo onnapacerya opaka ichu itokweene soonanaraxa, naamwi owo uupuwelaka wi onnamurumeela Muluku, Yehova haneemererya malapelo awe. (Ekl. 8:11) Nyenya hiyaano nnachuna okhala oororomeleya mu ichu soothene.

9. Tiheeni yaaweeren’ye vaavaa Yesu aamusuwenleiye Nataniyeli mu ekwaha awe yoopacerya, nave tiheeni nnahuseryaahu ni yeeyo? (Moone tho eruku.)

⁹ Nnanwerya ohuserya sincipale vooloca sa ochuneya waya wa okhala achu eeparipari va  woona yeeyo yeeren’ye vaavaa Yesu aamusuwenleiye Nataniyeli mu ekwaha awe yoopacerya. Vaavaa Filipi aamusuwelinheiye nthamwene awe wa Yesu, yaaheereya echu yootikhiniha. Naamwi Yesu ahimusuwele Nataniyeli, owo aaloca: “Mmoone Muisarayeli eeparipari, mwa yoowo hiwaamo owoka.” (Yoh. 1:47) Eparipari wi Yesu aanawoona tho oohuserya awe akina ntoko achu oororomeleya, nto Yesu aahoona mwa Nataniyeli ororomeleya weeparipari. Hiiha ntoko hiyaano, Nataniyeli aari oohiphaameya. Nyenya owo haari nawiisootherye, aari oororomeleya mu ichu soothene. Yesu aahitikhiniheya ni yeela nave aahimuthamalela Nataniyeli. Apwanne hamunoona wi yaamukhala echu yoocicimiheya waakhanle wi Yesu ooloca echu ntoko yeela wa nyuwaano?

10. Ntakhara heeni nnaphwanelaahu okhalano ekaasoope wa ichu seiyo nnalocaahu? (Tiyaku 1:26)

¹⁰ Wa ichu sincipale seiyo nnaphwanelaahu weera inaphwanyeya mu Salmu 15 ennavolowela mukhalelo nnaakhalihaahu achu akina. Salmu 15:3 onaloca wi muleco mmuxakalani wa Yehova “hanootha ni nlumi nawe, hanamweerela yoonanara mwaacamani awe, nave hanaanyemula asinthamwene awe.” Wakhala wi hannapharihela phaama nlumi nahu naari omootherya muchu, eyo enanwerya waaphoreiha achu, nave nthowa na yeeyo Yehova haneemererya okhala aleco awe.—Mwaalakhanye Tiyaku 1:26.

11. Wootha tiheeni, nave tiheeni eneereya ni mulipa awootha?

¹¹ Tavite ooloca mooluluwanya vooloca sa wootha. Nto wootha tiheeni? Wiiliwiili, ori muchaka watheru yoowo onawerya onanariha meecelo a muchu. Muchu yoowo onanyemula naari onootha vooloca sa akina nave ahicharuwa, owo hanatitelela okhala Namoona a Yehova.—Yer. 17:10.

12-13. Mmikhalelo taani naahaalaahu waanyemula asinthamwene ahu? (Moone tho eruku.)

¹² Salmu 15:3 onnanuupuxerya tho wi aleco a Yehova hanaweerela yoonanara achu akina naari waanyemula ni owuuliha muru asinthamwene aya. Eyo enataphulela eheeni?

¹³ Akhweya moohilakelela, hiyaano nnanwerya  opacerya omunyemula muchu moorweela wa omwaramwaxa michaka satheru vooloca sa yoowo. Muupuwele mmikhalelo iha: (1) murokora yoowo ohin’ye orumeela ntoko pioneera, (2) mutheli yoowo ohin’ye orumeela Opeteli, naari (3) munna yoowo ohin’ye orumeela ntoko mutokweene naari murummwa oorumeela. Yaamukhala echu yoonanaraxa waakhanle wi ninnaloca wi anna yaala akhweya epanke echu yoonanara, nave ti nthowa nene ichu seiya iweerenlaaya! Mweeparipari aakhalavo mathowa mancipale hiyaano nihinaweryaahu osuwela. Mwawiihiiha muleco a mmuxakalani wa Yehova “hanamweerela yoonanara mwaacamani awe, nave hanaanyemula asinthamwene awe.”

MWAACICIMIHEKE YAALE ANAMOOVA YEHOVA

14. Mutharihe ti mwawiihai muleco a Yehova onahaaleiye omukhooca “yoole ori oothanyeya”?

¹⁴ Salmu 15:4 olonce wi nthamwene a Yehova “onnamwiica yoole ori oothanyeya.” Nnamusuwela hai muchu oothanyeya? Ntoko achu oohiphaameya, hiyaano hinaano mavyakelo a omusuwela muchu waakhanle wi toothanyeya naari hooye. Ntakhara heeni? Wa nthowa na ohiphaameya wahu, nnanwerya opacerya osiveliwaka ni muchu yoowo nnalikanaahuno nave nihinasiveliwa ni achu akina akhweya yaawo anannyeenyeiha. Mweeparipari, nnaphwanela waakhooca pahiru yaale Yehova olonceiye wi ‘toothanyeya.’ (1 Ako. 5:11) Eyo enaphitaanyerya achu yaale anapaka ichu soonanara ni yaale ahinacharuwa, yaale ahinacicimiha soororomela sahu ni yaale aneererya oceecheiha onthamwene ahu ni Yehova.—Mas. 13:20.

15. Mmukhalelo taani nnaacicimihaahu “yaale anamoova Yehova”?

¹⁵ Mmakupa makina, Salmu 15:4 onaloca wi nnaphwanela waacicimihaka “yaale anamoova Yehova.” Wi neereno yeela, hiyaano ninnaavya mikhalelo sa wooniherya oreera murima ni ncicimiho wa asinthamwene a Yehova. (Aro. 12:10) Mwawiihai? Mukhalelo mmoha wa weerano yeeyo onathipeleya mu Salmu 15:4, muleco mmuxakalani wa Yehova “hanahiya waakhwaniherya yoororomeliha awe, naamwi ichu sihimweecenle phaama.” Vaavaa nihinaakhwanihaahu soororomeliha sahu, nnanwerya waahiciha akina. (Mat. 5:37) Ntoko yootakiherya, Yehova onaweherya wi alopwana ethenle naari athiyana etheliwe ekhwaaniherye yoororomeliha epankaaya wa mukina ni mukhwaawe vaavaa yaathelanaaya. Yehova tho onnahakalala vaavaa asitiithi aniilipixeryaaya wi ekhwaaniherye soororomeliha seiho anapakaaya wa anamwane aya. Wa nthowa na osivela yoowo nnoonaahu wa Yehova ni wa akina, hiyaano nnanwerya opaka soothene ophiyerya vaavaa nnaweryelaahu wi naakhwaniherye soororomeliha sahu.

16. Mmukhalelo taani mukina nnaacicimihaahu asinthamwene a Yehova?

¹⁶ Mukhalelo mukina wa waacicimiha asinthamwene a Muluku ori moorweela wa okhala a mahala ni oowaakhela aleco. (Aro. 12:13) Omaliha elukuluku vamoha ni anna ni arokora ohiya pahiru mmithukumano naari mmuteko woolaleerya, onnanikhaviherya olipiha onthamwene ahu wa yaawo vamoha ni Yehova. Ohiya yeeyoru, moorweela wa wooniherya owaakhela aleco, hiyaano nnamutakiherya Yehova.

MUHISIVELE IKHOROWA

17. Ntakhara heeni Salmu 15 onnaloca tho sa ikhorowa?

¹⁷ Hiyaano ninnaalakhanya wi muleco a Yehova “Hanapoleiha ikhorowa sawe achunaka okookiheriwa mwawaaceererya. Nave haneemererya makhwankwa wi amphwanyerye mathowa muchu ohirino mathowa.” (Sal. 15:5) Ntakhara heeni Tavite olonceiye sa ikhorowa mu ekapitulu yeela yookhuveyaxa? Nthowa nawi, wakhala wi hiyaano ninnuukhuwaxa ni ikhorowa eyo enanwerya okhala yoochuneyaxa wa hiyaano waapwaha achu akina, ophiyerya tho wi ompwaha Yehova. (1 Tim. 6:10) Mu elukuluku ya khalai achu akina yaaniiphwanyerya wa annaya yaawo yaari oohaawa moorweela wa waapoleiha  ikhorowa eweheryaka okookiheryiwa mwawaaceererya yeeyo awo tho yahaahaalaaya owerya oliva. Ohiya yeeyoru, athoriha akina yaaneemererya makhwankwa wi yaathorihe moohookololowa achu yaawo ahirino nthowa. Wa Yehova saweera seiya ti soothanyeya.—Ese. 22:12.

18. Makoho taani nnaphwanelaahu wiipakela wi nsuwele moonelo taani nryaahuno vooloca sa ikhorowa? (Ahepri 13:5)

¹⁸ Yaamukhala phaama oothene ahu wuupuwela wi tuuvi ori moonelo ahu vooloca sa ikhorowa. Mwiikohe: ‘Apwanne kinakhala kuupuwelaka ikhorowaru ni yeeyo kaahaalaka okula waakhanle wi kookhalano ikhorowa sincipale? Wakhala wi muchu ookipoleya ekhorowa, apwanne kinnalekeliha omukookiherya ekhorowaawe kuupuwelaka wi owo hanahaala ochuna? Apwanne kinniisoona okhala oochuneyaxa waapwaha akina nthowa nawi kookhalano ikhorowa sincipale? Apwanne kookhalano nikacamiho na wooniherya mahala wa akina? Apwanne kinnaathoriha anna ni arokora wi toosivela muhakhu pahiru nthowa nawi awo aakhalano ikhorowa? Apwanne kinapaka pahiru onthamwene ni achu ooreela nave kihinaapwacha achu oohaawa?’ Oothene ahu nookhalano ekari etokweene ya owompwa ntoko aleco a Yehova. Nyenya wakhala wi ninnachuna otitelela okhala aleco a Yehova, nnaphwanela osepa osivela ikhorowa. Wakhala wi ninnamusivelaxa Yehova opwaha ikhorowa, owo harwa anihiya!—Mwaalakhanye Ahepri 13:5.

YEHOVA ONNAASIVELA ASINTHAMWENE AWE

19. Ntakhara heeni Yehova onachuna wi nipake ichu soothene seiyo ilociwe mu ekapitulu 15 ya Salmu?

¹⁹ Salmu 15 onakuchula ni yoororomeliha ela: “Yoowo oneerano ichu seiha harwa acikinyeyaru.” (Sal. 15:5) Ophiyerya vaavaa, Tavite oothariha ntakhara heeni Yehova onachuneiye wi nipake ichu soothene seiha silociwe mu ekapitulu yeela. Nthowa nawi Yehova onachuna wi nikhale oohakalala. Mwawiihiiha, vaavaa nnapakaahu yeeyo Muluku onanivekeiye, hiyaano ninnakhalano ekumi yaphaama nave owo onnanikhapelela.—Yes. 48:17.

20. Tiheeni aleco a Yehova anaweheryaaya omwaahiyu?

²⁰ Aleco a Yehova aakhalano ohoolo ewehereryo ya omwaahiyu yawaarya. Oothanliwa oororomeleya anahaala owompwa wi yakhaleke ‘mmapuro mancipale’ yaawo Yesu oreherenryeiye ntakhara awo wirimu. (Yoh. 14:2) Wa yaale arino ewehereryo ya okhala veelaponi ya vathi anaweherya waakhwanela wa yoororomeliha enaphwanyeya mu Wupulula 21:3. Moohikhwa minikwa, hiyaano ninnoona okhala oocicimiheya vacipale owompwa ni Yehova wi nikhale asinthamwene awe nave tho wi nikhale aleco awe mmuxakalani mwawe okhala wookhala!