1. ¿Tlenon techijlia Salmo 15:​1-5?

 IPAN tlamachtijli tlen youajpanok, otikitakej ika itekipanojkauan Jehová akin itech yonosentemakakej uelis nemiskej ichan, noso, uelis iuan nouikaskej. San ika ¿kenijki uelis iuan touikaskej? Ipan Salmo 15 techijlia kenijki uelis más tonisiuiskej itech Jehová (xpoua Salmo 15:​1-5).

2. ¿Tlenon kinemilijtoya David ijkuak okiteneuj iyekteopan, noso, ikajkal Jehová?

² Ipan Salmo 15 peua ika yejuin tlajtoltin: “NoTEKO, ¿Akinon uelis kalakis ipan moyektiopan [noso mokajkal]? ¿Akinon uelis kalakis ipan on yektepetl kampa mochan?” (Sal. 15:1). Ijkuak David okiteneuj iyekteopan, noso, ikajkal Jehová, kanaj tlanemilijtoya itech tabernáculo tlen melak ouejkauj ne Gabaón. Niman ijkuak David okijto “yektepetl”, kanaj tlanemilijtoya itech kalpan Sion, ne Jerusalén. Sion nokauaya ika tlatsintlan itech Gabaón niman ompa David okichijchiuj se kajkajli para ompa kitlalis “iyekcaja toTEKO”. Sakin, ompa okichijchiuilijkej iteopan Jehová (2 Sam. 6:17).

3. ¿Tleka noneki matikitakan tlen kijtoua Salmo 15? (Noijki xkita tlaixkopinajli).

³ Xnochimej israelitas ueliyaj tlapaleuiayaj ipan tabernáculo, niman xmiyekej kalakiyaj kampa onkatka “iyekcaja toTEKO”. San ika, Jehová kentla nochimej kinkauiliaya manemikan ichan pampa kinektoya nochimej imiuan nouikas. Tla tejuamej noijki tiknekij touikaskej iuan Jehová, noneki tikchiuaskej tlen kijtoua Salmo 15.

 KUAJLI MATOUIKAKAN NIMAN MATIKCHIUAKAN TLEN MELAJKI

4. ¿Tleka xsan noneki toapolaktiskej para uelis touikaskej iuan Jehová? (Isaías 48:1).

⁴ Ipan Salmo 15:2 kijtoua ika san uelis nouikas iuan Jehová “on yejuan kuajli nouika” niman on “yejuan kichiua tlen melajki”. San ika, yejuin xsan sejpa noneki kichiuas, yej noneki nochipa ijkon kichiujtos. San ika ¿uelis kuajli touikaskej, noso, kuajli tinemiskej? Kema. Maski titlajtlakolejkej, Jehová kitas ika kuajli touikaj, noso, ika kuajli tinemij tla tokojtiliaj tiktlakamatiskej. Tejuamej peuaj touikaj iuan Jehová ijkuak itech tosentemakaj niman toapolaktiaj. Matikilnamikikan ika yeuejkaui xsan nonekiya tiisraelita yes para uelis timouikas iuan Jehová. Nemiyaj sekimej akin kiueyikatsajtsiliayaj toTajtsin, san ika, xkichiuayaj ika inyojlo niman xkichiuayaj ken kinamikiya (xpoua Isaías 48:1). Akin melauak kinekiyaj nouikaskej iuan Jehová nomachtiayaj itlanauatiluan niman kintlakamatiyaj. Aman noijki ijkon panoua, para uelis touikaskej iuan Jehová, xsan noneki toapolaktiskej niman tinemiskej ipan tlanechikojli, noijki noneki nochipa tikchiujtoskej tlen melajki. Matikitakan kenijki uelis tikchiuaskej yejuin.

5. ¿Tlenon noneki tikchiuaskej tla tiknekij matechita Jehová ken yakaj akin “kuajli nouika” niman “kichiua tlen melajki”?

⁵ Tla yakaj nochipa yauj tlanechikojli, xkijtosneki tla Jehová kita ken yakaj akin “kuajli nouika” niman “kichiua tlen melajki” (1 Sam. 15:22). Akin tikchiuaj ken Cristo noneki nochipa tiktlakamatiskej Jehová maski san toselti tinemiskej (Prov. 3:6; Ecl. 12:​13, 14). Melak noneki matiktlakamatikan Jehová ipan okseki tlen tikchiuaj tlen nesi ika xueyi kijtosneki. Tla ijkon tikchiuaj, tikititiskej ika melak tiktlasojtlaj niman yejua noijki techtlasojtlas (Juan 14:23; 1 Juan 5:3).

6. Ken kijtoua Hebreos 6:​10-12, ¿tlenon noneki tikchiujtoskej maski yeuejkaui otikchiujkej tlen kuajli?

 ⁶ Jehová melak kipatiojkaita nochi tlen yotikchiujkej ipampa. San ika, maski yeuejkaui otikchiujkej tlen kuajli, xkijtosneki tla yejon kichiuas nochipa matinemikan ichan Jehová, ijkon ken kijtoua Hebreos 6:​10-12 (xpoua). Jehová xkilkauas nochi tlen kuajli yotikchiujkej, san ika, yejua kineki nochipa matiktekichiuilijtokan hasta ijkuak yejkos itonal. “Maka tej, ma tisiauikan”, pampa tla xtisiauij, nochipa uelis touikaskej iuan Jehová (Gál. 6:9).

MATIKIJTOKAN IKA NOCHI TOYOJLO TLEN MELAUAK

7. ¿Tlenon kichiua yakaj akin “kijtoua ika nochi iyojlo tlen melauak”?

⁷ Jehová kinotsa ichan akin “kijtoua ika nochi iyojlo tlen melauak” (Sal. 15:2). Kuakon, xnoneki titekajkayauaskej. San ika, Jehová noijki kineki nochipa matikijtokan tlen melauak niman maka matitekajkayauakan ika tlen tikchiuaj (Heb. 13:18). Matikilnamikikan ika Jehová “sanoyej kikualaniaj on xompayejyeuamej, pero kimpiyalia kuajli iyojlo on tlakamej yejuan yolchipajkej” (Prov. 3:32).

8. ¿Tlenon xtiknekij tikchiuaskej?

⁸ Tla yakaj kitlakamati toTajtsin kampa tojlan, san ika, xkitlakamati ijkuak san iselti nemi, kuakon, yejua xkijtoua “ika nochi iyojlo tlen melauak” (Is. 29:13). Melak xkuajli akin ijkin kichiua. ¿Niman tleka sekimej peuaj ijkin kichiuaj? Pampa peuaj kinemiliaj ika xmás tepaleuiyaj itlanauatiluan Jehová (Sant. 1:​5-8). Ueliskia peuas kichiuas tlen nesi ika xmás tlajtlakojli. Niman tla kita ika xtlaj ipan nochiua, kanaj peuas kichiuas tlen más xkuajli. Maski yejua kinemilia ika kitekichiuilijtok Jehová, Jehová xkiselis ken kiueyichiua (Ecl. 8:11). Tejuamej xtiknekij ijkon tikchiuaskej, tejuamej tiknekij nochipa tikijtoskej tlen melauak niman xtiknekij titekajkayauaskej.

9. ¿Tlenon techmachtia tlen opanok ijkuak Jesús okixmat Natanael? (Noijki xkita tlaixkopinajli).

⁹ Melak noneki nochipa matikijtokan ika nochi toyojlo tlen melauak. Matikteneuakan tlen opanok ijkuak Felipe okuikak Natanael  para makixmati Jesús. Ijkuak Jesús okitak, okijto: “Nikan uajlau se yejuan melauak hebreo yejuan xkaman tlakajkayaua” (Juan 1:47). Jesús kimatstoya ika inomachtijkauan nochipa kijtouayaj tlen melauak, san ika, okitak ika Natanael más nesiya ika ijkon kichiuaya. Niman maski Natanael tlajtlakole katka ijkon ken tejuamej, yejua xkipiaya ome ixayak pampa xkeman tekajkayauaya. Jesús okijli ika melak kuajli ika ijkon kichiuaya. ¡Melak kuajli yeskia tla Jesús noijki ijkon kijtoua totechkopa!

10. ¿Tleka noneki kuajli titlajtoskej? (Santiago 1:26).

¹⁰ Ipan Salmo 15, kampa noteneua tlen techtlajtlanilia Jehová para uelis tinemiskej ichan, miyekpa noteneua kenijki noneki tikinnotsaskej oksekimej. Ipan Salmo 15:3 kijtoua ika Jehová san kiselis ichan on “yejuan xtlamach teteneuilia, yejuan kichiua nochi tlen kuajli para itlajsojkaikniuan, niman yejuan xkipajsoloua inisiuchanejkau”. Tla xkuajli titlajtouaj, xsan melak tikinyolkokoskej oksekimej, noijki kichiuas ika Jehová maka sa matechseli ichan (xpoua Santiago 1:26).

11. ¿Tlenon kinchiuiliaj akin tetlajtolchijchiuiliaj niman xnoyolkuepaj?

¹¹ Salmista noijki okiteneuj akin tlemach “teteneuilia”, noso, akin tetlajtolchijchiuilia. Ijkuak yakaj ijkon kichiua niman kijtoua tlen xmelauak intech oksekimej, kichiua ika oksekimej maka kuajli makimitakan. Akin tetlajtolchijchiuiliaj niman xnoyolkuepaj kinkixtiaj itech tlanechikojli (Jer. 17:10).

12, 13. ¿Kemanon ueliskia tikijtlakoskej ken kimitaj toamigos? (Noijki xkita tlaixkopinajli).

¹² Ipan Salmo 15:​3, noijki techijlia ika akin nemi ichan Jehová “kichiua nochi tlen kuajli para itlajsojkaikniuan” niman “xkipajsoloua inisiuchanejkau”, noso, xkijtoua itlaj tlen uelis kichiuas ika oksekimej maka kuajli makitakan. ¿Kenijki ueliskia tikijtlakoskej ken kimitaj toamigos?

 ¹³ Kemantika ueliskia tikijtoskej tlen xkinamiki intech oksekimej. Matiknemilikan tlen ueliskia panos: 1) se tokniuj siuatl xok precursora, 2) se tokniuj niman isiuauj xok nemij Betel noso 3) se tokniuj xok tlayekanketl noso xok tlapaleuijketl ipan tlanechikojli. ¿Kuajli yeskia tla peuaj tiknemiliaj tleka ijkon opanok niman tikimijliskej oksekimej tlen tiknemiliaj? Ka, pampa kanaj xtikmatij tlen yemelak opanok. Niman matikilnamikikan ika akin nemi ichan Jehová “kichiua nochi tlen kuajli para itlajsojkaikniuan” niman “xkipajsoloua inisiuchanejkau”, noso, xkijtoua itlaj tlen uelis kichiuas ika oksekimej maka kuajli makitakan.

MATIKINTLAKAITAKAN AKIN KITLAKAITAJ JEHOVÁ

14. ¿Kenijki uelis tikmatiskej akinomej “xkuajkualtin tlakamej” niman ijkon ximiuan touikaskej?

¹⁴ Ipan Salmo 15:​4, kijtoua ika akin nouika iuan Jehová “xkuelita kenijki nouikaj on xkuajkualtin tlakamej”. San ika, pampa titlajtlakolejkej, xueli tikitaj akinomej xkuajkualtin tlakamej. Kemantika tiknemiliaj ika yakaj se kuajli tlakatl pampa nimantsin ouel iuan otouikakej niman akin techkualaniaj tiknemiliaj ika xkuajkualtin. San ika, xnoneki ijkon tiknemiliskej. Noneki tikitaskej akinomej kimita Jehová ika xkuajkualtin niman ijkon ximiuan touikaskej (1 Cor. 5:11). Niman, ¿akinomej kijtoua Jehová ika xkuajkualtin? Akin tlajtlakouaj niman xnoyolkuepaj, akin xkitlakaitaj tlen tikneltokaj niman akin xkinekij matouikakan iuan Jehová (Prov. 13:20).

15. ¿Kenijki uelis tikintlakaitaskej akin kitlakaitaj Jehová?

¹⁵ Salmo 15:4 noijki kijtoua ika noneki matikintlakaitakan “on yejuan kitlakaitaj toTEKO”. Ika yejon, matikintlakaitakan niman matikimiknelikan akin nouikaj iuan Jehová (Rom. 12:10). ¿Kenijki uelis tikchiuaskej yejuin? Salmo 15:4 kijtoua ika akin nemi ichan Jehová “kitemaka tlen kiprometeroua, maski kijyouiya itlaj xkuajli”. Tla xtikchiuaj tlen tikijtouaj, ueliskia titeyolkokoskej (Mat. 5:37). Jehová kichia ika akin yononamiktijkej makichiuakan tlen okijtojkej ijkuak ononamiktijkej. Noijki kineki ika tatajtin makichiuakan tlen kimijliaj inkoneuan. Pampa tiktlasojtlaj toTajtsin niman tikintlasojtlaj oksekimej, noneki tokojtiliskej tikchiuaskej tlen tikijtouaj.

16. ¿Kenijki noijki tikimititiaj ika tikintlakaitaj akin nouikaj iuan Jehová?

¹⁶ Noijki uelis tikimititiskej akin nouikaj iuan Jehová ika tikintlakaitaj tla kuajli tikinseliaj niman tla tikinmakaj tlen tikpiyaj (Rom. 12:13). Uelis imiuan tosentlaliskej, niman yejon kichiuas más kuajli imiuan matouikakan niman más kuajli matouikakan iuan Jehová. Niman ijkuak kuajli tikinseliaj, tikchiujtokej ken Jehová.

MAKA MATIKTLASOJTLAKAN TOMIN

17. ¿Tleka salmista otlajto itech tomin?

¹⁷ Ipan Salmo 15 noijki kijtoua ika akin nemi ichan Jehová “xkitetlajtlanilia itlanka itomin ijkuak kitetlanejtia, niman xkiselia ichtakatlaxtlauijli para itlaj kitechtis se yejuan xkipiya tlajtlakojli” (Sal. 15:5). ¿Tleka salmista otlajto itech tomin? Pampa tla peua tiktlasojtlaj tomin, xok kuajli touikaskej iuan Jehová niman uelis tikimijtlakoskej oksekimej (1 Tim. 6:10). Yeuejkaui, melak xkuajli tlen sekimej kichiuayaj pampa ijkuak kintlaneujtiayaj tomin akin xtlaj kipiayaj, kintlajtlaniliayaj makintlaxtlauilikan iuan itlanka. Noijki nemiyaj jueces akin san ichtaka kintlaxtlauiliayaj para kintlajtlakoltiskej akin xokichiujka tlen xkuajli. Jehová kintlauelita akin ijkin kichiuaj (Ezeq. 22:12).

18. ¿Tlenon noneki totlajtoltiskej? (Hebreos 13:5).

 ¹⁸ Melak noneki matiknemilikan kenijki tikitaj tomin. Matotlajtoltikan: “¿Nochipa nitlanemilijtika itech tomin niman itech tlen nikneki nijkouas? Tla nechtlaneujtiaj tomin, ¿xnimantsin nitekuepilia pampa niknemilia ika akin onechtlaneujti xkipoloua? ¿Ninoueyimati pampa nikpiya tomin? ¿Ouijtika nikita niktemakas tlen nikpiya? ¿Niknemilia ika tokniuan akin kipiyaj tomin más kitlasojtlaj tomin xijkon ken Jehová? ¿San ninouika imiuan akin kipiyaj tomin niman akin xkipiyaj tomin xnikiminotsa?”. Melak noneki matotlajtoltikan yejuin pampa Jehová yotechnots ichan, niman san uelis tinemiskej ichan tla xtiktlasojtlaj tomin. Tla ijkin tikchiuaj, Jehová xkeman techkauas (xpoua Hebreos 13:5).

JEHOVÁ KINTLASOJTLA IAMIGOS

19. ¿Tleka Jehová techtlajtlanilia matikchiuakan tlen kijtoua Salmo 15?

¹⁹ Jehová techtlajtlanilia matikchiuakan tlen kijtoua Salmo 15 pampa kineki matiyolpakikan. Ika yejon, salmista ijkin ontlami: “San akinon yejuan ijkin nouika, xkaman kipolos itlaneltok” (Sal. 15:5). Ijkuak tikchiuaj tlen Jehová techtlajtlanilia, más kuajli tinemij niman yejua techtlajpiya (Is. 48:17).

20. ¿Tlenon kualtsin kiseliskej akin nemij ichan Jehová?

²⁰ Akin nemij ichan Jehová niman melajkanemij melak kualtsin tlen kiseliskej ika tlayekapan. Tokniuan tlapejpeniltin yaskej iluikak, kampa Jesús yokinyektlalili “miyek chanyotl kampa uelis chantiuas [noso chantiskej]” (Juan 14:2). Niman akin nemiskej ipan tlaltikpaktli, kinseliskej tlateochiualistin tlen noteneuaj ipan Apocalipsis 21:3. ¡Melak kualtsin ika Jehová okinek touan nouikas niman melak tiyolpakij pampa uelis nochipa tinemiskej ichan!