1. Hadia zi tola tafahaʼö ita moroi ba Zinunö 15:​1-5?

 NO TAFAHAʼÖ ita ba artikel silalö wa ono mbanua Yehowa si no molulu faʼaurira khönia ba si lö tebulö mondrorogö fahuwusara khö Lowalangi, tola tobali ira tome ba nosenia. Hizaʼi, hadia zinangea tafalua enaʼö lö tebulö tobali ita tomenia? So wanema linia ba Zinunö 15. (Baso Zinunö 15:​1-5.) Ifatunö khöda ba zura Zinunö hadia zinangea tafalua enaʼö lö tebulö ahatö ita khönia.

2. Hadia zi so ba wangera-ngera Dawido me itötöi nose Yehowa?

² Tebörögö wehede ba zura Zinunö 15: ”He Yehowa, haniha zi tola möi fatome ba nosemö? Haniha zi tola toröi ba hili ni’amoni’ö andrö khöu?” (Si. 15:1) Me itötöi Dawido ’nose’ Yehowa, si so ba wangera-ngerania te ose Yehowa si no irai so ba Gibeona. Me itötöi göi ”hili niʼamoniʼö” khö Lowalangi, te manandrösa daʼö ba Hili Ziona si so ba Yeruzalema. So mato hauga kilometer waʼaröu hili andrö tanö raya Gibeona. Ba daʼö ifasindro Dawido nose ba wangiröʼö tawöla amabuʼula irege muʼotomosi nahiania si tebai mufawuʼa.—2 Sa. 6:17.

3. Hana wa adöni dödöda ba wamareso Sinunö 15? (Faigi göi gambara.)

³ Tatu manö, ato ndraono Gizaraʼeli si tebai mangai halöwö ba nose Lowalangi, ba lö ato zi tola möi bakha ba nose naha wangiröʼö tawöla amabuʼula. Hewaʼae simanö, fefu nono  mbanua Yehowa si lö faröi, tola tobali ira tomenia na lö tebulö tobali ira si fahuwu khönia. Tatu omasi ita fahuwu khö Yehowa sagötö faʼara. Ba zura Zinunö 15, ifatunö khöda hadia zinangea tafalua enaʼö lö tebulö tobali ita si fahuwu khö Yehowa.

LÖ MOSINEGU BA FALUA ZATULÖ

4. Hezo taʼila wa tenga ha famayagö idanö niʼandrö Yehowa khöda? (Yesaya 48:1)

⁴ Ba Zinunö 15:​2, niha si fahuwu khö Lowalangi laʼamaedolagö ia ”niha si lö sinegu, [ba] samalua satulö”. Daʼa zi lö tola löʼö tafalua sandrohu faʼaurida. Hizaʼi, hadia tola ’lö mosinegu’ ita? Tola. Hewaʼae lö moʼahonoa ita, hizaʼi ba wamaigi Yehowa ’lö mosinegu’ ita na tafalua wondrege zi sökhi ba woloʼö somasi ia. Duma-dumania, ba götö Zura Niʼamoniʼö, hewaʼae no farahu zi samösa niha ba soi ndraono Gizaraʼeli, tenga daʼö geluahania wa sinangea ia tobali tome Yehowa. So ösa ba gotaluara zoʼangaröfili Lowalangi ”tenga soroi ba dödö ba tenga si fao faʼatulö”. (Baso Yesaya 48:1.) Iraono Gizaraʼeli satulö tödö somasi tobali tome Yehowa, moguna lafahaʼö ira ba goi-goi Yehowa ba lafalua daʼö. Simanö göi iadaʼa, enaʼö tobali ita si fahuwu khö Yehowa, lö ibönö na asala no tebayagö ita idanö ba mufotöi ita Samaduhuʼö Yehowa. Me talulu waʼaurida khö Lowalangi ba tebayagö ita idanö, awena famobörö daʼö wanöröda lala Lowalangi. Moguna lö tebulö ’tafalua zatulö’. Hadia geluahania?

5. Hadia geluahania taʼoʼö niwaʼö Yehowa ba ngawalö hadia ia?

⁵ Ba wamaigi Yehowa, ”niha si lö sinegu, [ba] samalua satulö” tenga daʼö geluahania ha owölö-ölö weʼamöi ba gangowuloa. (1 Sa. 15:22) Hizaʼi, moguna göi taforege woloʼö niwaʼö Lowalangi ba ngawalö hadia nifaluada, mendrua manö ba ginötö ha samösa-mösa ita. (Amd. 3:6; Sango. 12:​13, 14) Moguna  sibai taforege ba woloʼö niwaʼö Yehowa ofeta ba wondrege zide-ide. Na tafalua daʼö, no taforomaʼö wa sindruhu-ndruhu taʼomasiʼö ia, ba daʼa mbörö wa itugu iʼomasiʼö ita.—Yoh. 14:23; 1 Yo. 5:3.

6. Moloʼö Heberaiʼo 6:​10-12, hadia nasa zabölö moguna moroi ba ngawalö zi sökhi nifaluada ba zilalö?

⁶ Omuso sibai dödö Yehowa ba ngawalö nifaluada khönia ba zilalö. Hizaʼi, amuata si sökhi nifaluada ba zilalö, tenga sibai daʼö mbörö wa lö tebulö tobali ita tome ba nose Yehowa. Tola taʼila daʼö ba Heberaiʼo 6:​10-12. (Baso.) Sindruhu sa, lö olifu Yehowa fefu zi sökhi nifaluada ba zilalö. Hizaʼi, omasi ia na tabeʼe khönia wondrege zi sökhi soroi ba dödö ”irugi gamozua”. Tobali ia si Fahuwu khöda sagötö faʼara ”na lö atage ita”.—Gal. 6:9.

WAʼÖ ZINDRUHU BAKHA BA DÖDÖ

7. Hadia geluahania ’mangumaʼö sindruhu bakha ba dödö’?

⁷ Niha somasi tobali tome Yehowa, lö tola löʼö ’iwaʼö zindruhu bakha ba dödönia’. (Si. 15:2) Eluahania tenga ha lö falimo. Iʼandrö khöda Yehowa enaʼö tatörö zindruhu ba wehede hegöi nifaluada. (Heb. 13:18) Moguna sibai daʼa ”börö me ogoro Yehowa niha samalua faʼonekhe, hizaʼi, fahuwu sibai ia ba niha sadölö tödö”.—Amd. 3:32.

8. Hadia gamuata sinangea tatimbagö?

⁸ Niha ”sangumaʼö sindruhu bakha ba dödönia”, lö ifalua zatulö ha enaʼö laʼila niha, hizaʼi ifalua zi lö sökhi na lö sangila yaʼia. (Yes. 29:13) Lö göi ifalua waʼonekhe. Niha samalua faʼonekhe te iwaʼö tödönia wa lö ero-ero tefaudu gamakhoita nibeʼe Yehowa. (Yak. 1:​5-8) Te lö iʼoʼö niwaʼö Yehowa na iwaʼö tödönia wa lö moguna sibai daʼö. Ba na lö itema zulö moroi ba walömoloʼönia, tola manö ifalua zi töra moroi ba daʼö. Hewaʼae iwaʼö tödönia wa samosumange Lowalangi ia, hizaʼi lö itema zumangenia Yehowa. (Sango. 8:11) Börö daʼö, dataforege wanörö sindruhu ba ngawalö hadia ia.

9. Hadia wamahaʼö si tola tahalö moroi khö Yesu me awena falukha ia khö Natanaʼeli? (Faigi göi gambara.)

⁹ Tola tafahaʼö ita ba wangokhögö tödö satulö  moroi ba waö-waö me iʼohe Filifo nawönia sotöi Natanaʼeli ba wamalukhaisi Yesu. Hewaʼae na lö irai falukha Yesu khö Natanaʼeli, imane Yesu, ”Hiza, yaʼia andre niha Gizaraʼeli sindruhu. Lö hadöi falimosa ba dödönia.” (Yoh. 1:47) Tatu manö ba wamaigi Yesu lö hadöi falimosa ba dödö ndra nifahaʼönia, hizaʼi iʼila wa so zi tohude sahöli-höli dödö niʼokhögö Natanaʼeli. Simane yaʼita lö moʼahonoa Natanaʼeli, hizaʼi lö mamodombua tödö ia ba itörö zindruhu ba ngawalö hadia ia. Ahöli-höli dödö Yesu ba isuno Natanaʼeli börö me iʼokhögö dödö satulö. Tatu manö omasi göi ita enaʼö simane daʼö wehede Yesu khöda!

10. Hana wa moguna mangelama ita ba wehededa? (Yakobo 1:26)

¹⁰ Arakhagö fefu nitutunö ba Zinunö 15 moʼamakhaita daʼö ba nifaluada ba niha böʼö. Ba Zinunö 15:​3, itutunö wa niha si möi fatome ba nose Yehowa yaʼia daʼö ”si lö mamöbögö si lö duhu lelania, lö ifalua zi lö sökhi khö nawönia, ba lö iʼailasi nawönia”. Na taböbögö zi lö duhu ba niha böʼö, tobali fangafökhö dödöra daʼö ba tenga sinangea ita tobali tome ba nose Yehowa.—Baso Yakobo 1:26.

11. Hadia geluahania mamöbögö si lö duhu, ba hadia lua-luania na so niha samalua daʼö si lö mamalalini era-erania?

¹¹ Itutunö sanura buku Zinunö sanandrösa ba wamöbögö si lö duhu. Hadia geluahania mamöbögö si lö duhu? Eluahania fehede faya sangobousi töi niha böʼö. Na so niha sangobousi awönia ba lö ifalalini gera-erania, tola muʼefasi ia moroi ba mbanua niha Keriso.—Yer. 17:10.

12-13. Hezo manö tola taʼailasi nawöda hewaʼae lö taʼodödögö? (Faigi göi gambara.)

¹² Ifasugi göi ba dödöda Sinunö 15:3 wa niha si möi fatome ba nose Yehowa, lö ifalua zi lö sökhi khö nawönia ba lö iʼailasi nawönia. Hadia geluahania?

 ¹³ Tola manö lö taʼodödögö ba wangailasi niha böʼö ba ginötö tadunö-dunö zi lö sökhi sanandrösa khöra. Duma-dumania na so (1) samösa dalifusöda ira alawe si no mamöhöli mangai halöwö safönu inötö, (2) sambua fongambatö si lö saʼae mangai halöwö ba Mbetieli, mazui (3) samösa dalifusöda ira matua si lö saʼae mangai halöwö tobali satua sokubaloi mazui enoni. Hadia tefaudu na manahö-nahö dödöda hadia mbörö wa alua daʼö ba tafadunö-dunö ira ba niha böʼö? Tola manö oya zi lö aboto ba dödöda. Datatörö tödöda wa niha si tobali tome ba nose Yehowa, ”lö ifalua zi lö sökhi khö nawönia, ba lö iʼailasi nawönia”.

FOSUMANGE NIHA SANGATAʼUFI YEHOWA

14. Hadia geluahania ”lö faʼawö ba niha si lö sökhi”?

¹⁴ Ifatunö khöda ba Zinunö 15:4 wa niha si fahuwu khö Yehowa ’lö faʼawö ia ba niha si lö sökhi’. Hezo tola taʼila wa lö sökhi zi samösa niha? Tatu manö lö tahuku zi samösa niha moloʼö lala wangera-ngerada. Hadia mbörö? Börö me lö moʼahonoa ita. Tola manö adöni dödöda khö zi samösa niha börö me omasi ita gamuatania, hizaʼi lö omasi ita danö böʼö börö me iʼafökhöiʼö dödöda. Tobali, nitimbagöda yaʼia daʼö ”niha si lö sökhi” ba wamaigi Yehowa. (1 Ko. 5:11) Farahu ba daʼö niha samalua si lö sökhi ba si lö omasi mamalalini era-era, si lö mamosumange nifaduhusida tödö, mazui samorege ba wamaʼala famatida.—Amd. 13:20.

15. Hadia nifaluada ba wangoromaʼö wa tafosumange ”niha sangataʼufi Yehowa”?

¹⁵ Ba Zinunö 15:​4, iʼandrö khöda enaʼö tafosumange ”niha sangataʼufi Yehowa”. Börö daʼö, dataʼalui lala ba wangoromaʼö faʼasökhi dödö ba tafosumange niha si fahuwu khö Yehowa. (Rom. 12:10) Sambua lala si tola tafalua simane nitutunö ba Zinunö 15:4 yaʼia daʼö ’lö tawuʼai mbuʼusa lida hewaʼae rugi ita’. Na tasawö mbuʼusa lida, tola manö möi fangafökhö dödö niha böʼö daʼö. (Mat. 5:37) Duma-dumania, itötöna Yehowa ba niha si tobali tomenia enaʼö niha si no mongambatö lafalua mbuʼusa lira. Omuso göi dödönia khö ndra satua samorege ba wamalua si no lafabuʼu khö ndraonora. Börö me taʼomasiʼö Lowalangi hegöi awöda niha, daʼö zamarou yaʼita ba wamalua si no tafabuʼu.

16. Hadia nasa zi tola tafalua ba wangoromaʼö wa tafosumange niha si fahuwu khö Yehowa?

¹⁶ Lala tanö böʼö si tola tafalua ba wamosumange niha si fahuwu khö Yehowa yaʼia daʼö tatemaʼö ira tobali tome ba taforomaʼö khöra waʼoböwö. (Rom. 12:13) Na tatehegö ginötöda fariawö khö ndra talifusö, daʼö zangaʼaroʼö fahuwusada khöra hegöi khö Yehowa. Baero daʼö, na taforomaʼö waʼoböwö no taʼoʼö gamuata Yehowa.

BÖI OMASIʼÖ GEFE

17. Hana wa itutunö sanandrösa ba gefe Sinunö 15?

¹⁷ Iwaʼö ba Zinunö 15 wa niha si tobali tome Yehowa, ”lö ihalö nono gefe na lafiza gefenia, lö itema zölö-sölö ba wamobahulu niha si lö sala”. (Si. 15:5) Hadia mbörö wa itutunö daʼa buku Zinunö? Na taʼomasiʼö gefe, tola tekiko wahuwusada khö Lowalangi ba taʼafökhöiʼö dödö niha böʼö. (1 Ti. 6:10) Ba götö Zura Niʼamoniʼö, so ösa niha sangai hare khö dalifusöra si tosasa, yaʼia me laʼandrö mbunga na lafafizaʼö gefera. So göi ösa ndra sanguhuku sanema sölö-sölö ba lahuku niha si lö fasala. Fatuwu sibai Yehowa ba niha samalua daʼö.—Hez. 22:12.

18. Hadia manö wanofu-nofu sanolo yaʼita ba wangila hewisa dödöda sanandrösa ba gefe? (Heberaiʼo 13:5)

 ¹⁸ Sökhi na tafareso hewisa dödöda sanandrösa ba gefe. Sofu khöu samösa: ’Hadia asese uʼera-era manö gefe hegöi ngawalö zomasido uʼöli? Na ufiza gefe, hadia ara ubuʼa börö me uwaʼö tödögu wa lö nasa moguna khönia? Hadia börö me mokefe ndraʼo, uwaʼö tödögu wa abölö tohude ndraʼo moroi ba niha böʼö? Hadia abua khögu ba wangoromaʼö faʼoböwö? Hadia uwaʼö tödögu wa niha sangomasiʼö kefe ndra talifusöda si kayo? Hadia ha ba niha si kayo fariawö ndraʼo ba lö uʼameʼegö tödö niha si numana?’ Datatörö tödöda wa no tebeʼe khöda ginötö tobali tome Yehowa. Tola tarorogö döi si sökhi andrö na lö taʼomasiʼö gefe. Na tafalua daʼö, lö iröi ita Yehowa!—Baso Heberaiʼo 13:5.

IʼOMASIʼÖ ZI FAHUWU KHÖNIA YEHOWA

19. Hana wa iʼandrö khöda Yehowa enaʼö tafalua fefu zi no mututunö ba Zinunö 15?

¹⁹ So mbuʼusa li ba gafuriata ngawua wehede nisura ba Zinunö 15. Imane, ”Lö mangiwa niha samalua daʼö irugi zi lö aetu.” (Si. 15:5) Daʼö mbörö wa omasi Yehowa na tafalua fefu nitutunö ba zura Zinunö andre. Omasi ia na omuso dödöda. Na tafalua hadia niʼandrönia khöda, tasöndra waʼohahau dödö ba waʼauri ba ilumöʼö ita.—Yes. 48:17.

20. Hadia nidöna-döna niha si tobali tome Yehowa?

²⁰ Niha si tobali tome Yehowa, ladöna-döna waʼohahau dödö ba zi so miföna. Ba niha nibayoini si lö faröi, ”oya nahia” si no ihenaigö Yesu khöra ba zorugo. (Yoh. 14:2) Ba niha sanötöna ba gulidanö, ladöna-döna mbuʼusa li nisura ba Wamaʼeleʼö 21:3. No töi sebua khöda me ikaoni ita Yehowa tobali tome ba nosenia sagötö faʼara!