NKHANI YOPHUNZILA N.° 24
NYIMBO N.° 24 Welani ku lupili ya Yehova
Pitilijani kunkhala alwendo a Yehova mpaka kale-kale!
“Mwewo Yehova, niŵani angankhale mulwendo mutenti yanu?”—SAL. 15:1.
CHOLINGA CHANKHANI
Munkhani ino tufuna kuti timvwishe vatufunikila kuchita kuti tipitilije kunkhala paushamwali na Yehova komasoti mwatingachitile vinthu na ŵanthu amene ni azishamwali ŵake.
1. Kansi lemba ya Salimo 15:1–5 yutiyavya mwanjila yanji?
MUNKHANI yapita, tephunzila kuti atumiki olipeleka a Yehova komasoti amene ali paushamwali na yove, angankhale alwendo “mutenti” yake. Koma kansi tufunikila kuchita tyani kuti tinkhale alwendo mutenti ya Mulungu? Chapitala 15 chabuku ya Masalimo, chufotokoza vinyinji pankhani yamene iyi. (Ŵelengani Salimo 15:1–5.) Salimo yamene iyi yufotokoza vatufunikila kuchita kuti tinkhale paushamwali wotang’a na Mulungu.
2. Kansi vuwoneka kuti Davide enzeganizila chinji pechitomola za tenti ya Yehova?
2 Chapitala 15 cha buku ya Masalimo chuyamba na mawu akuti: “Mwewo Yehova, niŵani angankhale mulwendo mutenti yanu? Niŵani wamene angankhale mulupili yanu yopatulika?” (Sal. 15:1) Pechitomola za “tenti” ya Yehova, Wamasalimo Davide payakine enzeganizila za tenti ya Mulungu yamene panthawe yamene iyo yenzenkhala ku Gibeyoni. Komasoti pechitomola za “lupili yopatulika” ya Mulungu, payakine Davide enzenena za lupili ya Ziyoni yaku Yelusalemu. Davide emanga tenti ya Mulungu noikamo likasa yapangano, ndipo yenzenkhala mwamene umo mpaka panthawe yechimangiwa kachisi.—2 Sam. 6:17.
3. Ndaŵa yanji tufuna kuti tiimvwishe luweme lemba ya Salimo 15? (Onanisoti chithunzi.)
3 Koma olo n’tetyo, Aisiraeli anyinji enzetumikilalini patenti ya Mulungu ndipo niŵanthu tyala atontho amene enzeloŵa nkati mwatenti mwamene mwenzenkhala likasa yapangano. Koma atumiki onse okhulupilika a Yehova angankhale alwendo mutenti yophiphilisila ya Mulungu mwakunkhala naye paushali nopitilija mphela kukulisha ushamwali wamene uyo. Tonse tufuna kunkhala paushamwali na Yehova. Salimo 15, yufotokoza vinthu vatufunikila kuchita kuti tipitilije kunkhala paushamwali na Yehova.
Kuli Aisiraeli amunthawe ya Davide, venze vosavuta kuganizila tanthauzo yakunkhala mulwedo mutenti ya Yehova (Onani ndime 3.)
MUKOYENDA MOSAPHONIYESHA VINTHU KOMASOTI MUKOCHITA VINTHU VIWEME
4. Ndaŵa yanji tinganene kuti Yehova ofuna vinyinji kuli sewo kuyangijila paubatizo? (Yesaya 48:1)
4 Pa Salimo 15:2, nshamwali wa Mulungu ofotokozewa kuti ni munthu “wamene oyenda mosaphoniyesha vinthu, wamene ochita vinthu viweme.” Vamene ivi niye vatufunikila kupitilija kuchita. Koma kansi tingakwanishe chendi “kuyenda mosaphoniyesha vinthu”? Eye tingakwanishe. Olo kuti tiliye ungwilo, Yehova angatiwone monga ŵanthu amene “oyenda mosaphoniyesha vinthu.” Munthu akalipeleka kwa Mulungu nobatizika niye pakuyamba kuyenda na Mulungu. Mwachisanzo, munthawe za m’Baibolo Mulungu enzelondelalini munthu mutenti yake pachifukwa tyala chakuti evyalikila muntundu wa Aisiraeli. Ŵanthu ayakine enzeita pa zina ya Mulungu, koma “enzechitalini vamene ivo mofumila pansi pa ntima.” (Ŵelengani Yesaya 48:1.) Aisiraeli aweme ntima enzefunikila kuphunzila mfundo za Yehova nozikonkheja. Molingana na vamene ivi, kuti tinkhale paushamwali wotang’a na Yehova nase tufunikila kuchita vinyinji kuyangijila pakunkhala obatizika komasoti wa Mboni za Yehova. Sewo tufunikila kupitilija “kuchita vinthu viweme.” Kansi tingachite tyani vamene ivi?
5. Kansi kumvwila Yehova pachilichonse kupamikijapo chinji?
5 Kwa Yehova, “kuyenda mosaphoniyesha vinthu” na “kuchita vinthu viweme” kutanthauza vinyinji osati tyala kupezeka pamisonkhano ku Ng’anda ya Ufumu nthawe zonse. (1 Sam. 15:22) Sewo tufunikila kuyeja-yeja mwakhama kuti tikomvwila Mulungu muvochita vasu vonse olo tikankhala kwaseka. (Miy. 3:6; Mlal. 12:13, 14) N’chinthu chofunika kuti tikoyeja-yeja kumvwila Yehova, olo pavinthu vamene vuwoneka monga nivosafunika ngako. Keno tuchita tetyo, tizawoneshe kuti tumukonda chendi Mulungu ndipo vamene ivi vizachitishe kuti naye akotikonda ngako.—Yoh. 14:23; 1 Yoh. 5:3.
6. Mokatijana na Ahebeli 6:10-12, kansi nichinthu chotyani chofunika ngako kupambana ntchito ziweme zetichita kuvuli?
6 Yehova osangalala ngako na vinthu viweme vamene vetimuchitila kuvuli. Koma sewo tingapitilijelini kunkhala alwendo mutenti ya Yehova pachifukwa tyala chakuti temuchitila vinthu viweme kuvuli. Mfundo yamene iyi niyachendi tikaganizila mawu ali pa Ahebeli 6:10-12. (Ŵelengani.) Yehova oluŵalini ntchito zasu ziweme zamene zetimuchitila kuvuli. Koma olo n’tetyo, yove ofuna kuti tipitilije kumutumikila na ntima wasu wonse “mpaka pamapeto.” Mulungu azatidalise potilola kuti tinkhale azishamwali ŵake mpaka kale-kale “keno tingaleke kuŵeŵa.”—Agal. 6:9.
MUKOLAŴILA VINTHU VACHENDI MUNTIMA MWANU
7. Kansi kulaŵila vinthu vachendi muntima mwasu kupamikijapo kuchita chinji?
7 Munthu wamene ofuna kunkhala mulwendo mutenti ya Yehova, ofunikila ‘kulaŵila vinthu vachendi muntima mwake.’ (Sal. 15:2) Mawu amene aŵa ali na tanthauzo ikulu ngako. Yehova ofuna kuti sewo tinkhale achilungamo muvinthu vonse vatulaŵila komasoti vatuchita. (Ahe. 13:18) Mfundo yamene iyi niyofunika, “chifukwa Yehova onyansiwa na munthu wachinyengo, koma ŵanthu oyondoloka ntima onkhala nawo paushamwali wotang’a.”—Miy. 3:32.
8. Kansi ninkhalidwe yotyani yatufunikila kupewa?
8 Ŵanthu amene ‘olaŵila vinthu vachendi muntima mwawo’ opeŵa ntima woyopejela kuti omvwila Yehova akankhala pagulu, nochita vinthu viipa akawona kuti paliyeoŵaona. (Yes. 29:13) Ove opeŵa kuchita vinthu mwachinyengo. Munthu wachinyengo angayambe kuganiza kuti malamulo ŵakupeleka Yehova ni osayavya nthawe ziyakine. (Yako. 1:5–8) Munthu wotetyo, angakangiwe kumvwila Yehova pankhani zakuona kuti nizitontho-zitontho. Chifukwa cha vamene ivi, yove akawona kuti okumanalini na vokonkhapo vakusamvwila kwake, angayambe kuchita vinthu viipa ngako. Tetyo, olo kuti munthu wotetyo angaganize kuti otumikila Mulungu, yove osangalalalini na vakuchita pomutumikila. (Mlal. 8:11) Koma sewo tufuna kuchita vinthu vonse mwachilungamo.
9. Kansi tuphunzila chinji pavechilaŵila Yesu pa nthawe yoyamba yechikumana na Natanayeli? (Onanisoti chithunzi.)
9 ‘Kulaŵila vinthu vachendi m’mitima yasu’ n’chinthu chofunika ngako. Kuchita vamene ivi nikofunika ngako tikawona vechilaŵila Yesu pechikumana na Natanayeli nshamwali wa Filipi. Olo kuti Yesu enze akaliyekumanapo na Natanayeli, yove enena kuti: “Onani Mwisiraeli shuwa wamene muli yove muliye chinyengo.” (Yoh. 1:47) Yesu enzeziŵa kuti ophunzila ŵake ayakine enze na chilungamo, koma Natanayeli enzewonesha nkhalidwe yamene iyi mwanjila yapadela. Olo kuti Natanayeli enze munthu aliye ungwilo monga nisewo, yove enzeve chinyengo, ndipo m’malo mwake enzechita vinthu vonse mwachilungamo. Yesu, echita naye chidwi ngako ndipo emutembeja chifukwa cha vamene ivi. N’vosakaikisha kuti tonse tufuna kuti Yesu akotiwona mwanjila yamene iyi!
Panthawe yoyamba yechikumana na Natanayeli, Yesu enena kuti “muli yove muliye chinyengo.” Kansi nase angatiujesoti chimozi-mozi? (Onani ndime 9.)
10. Ndaŵa yanji tufunikila kunkhala osamala na vinthu vatulaŵila? (Yakobo 1:26)
10 Mfundo zinyinji zamene zilembewa muchapitala 15 cha buku ya Masalimo, zunena vatufunikila kuchita na ŵanthu ayakine. Salimo 15:3 yunena mawu amene owonesha kuti munthu wamene nimulwendo mutenti ya Yehova “onenalini tonjo na lilimi yake ochitilalini muyake chiipa chilichonse, ndipo onyozalini ayake.” Keno sewo tutonja ŵanthu ayakine vingachitishe kuti ove akhumudwe ngako ndipo tingapitilijelini kunkhala alwendo mutenti ya Yehova.—Ŵelengani Yakobo 1:26.
11. Kansi tonjo nichinji, ndipo nichinji chuchitikila ŵanthu atonjo amene ofunalini kulapa?
11 Palemba yamene iyi, wamasalimo ngako-ngako enena za tonjo. Kansi tonjo nichinji? Kanyinji-kanyinji, tonjo nikulaŵila mawu aipa amene angawononge mbili ya munthu muyakine. Munthu akayamba tonjo ndipo ofunalini kulapa angachosewe mumpingo.—Yer. 17:10.
12–13. Kansi nivochitika votyani vamene vingachitishe kuti tiphoniyeshe vinthu mosaziŵa nonyoza azishamwali ŵasu? (Onanisoti chithunzi.)
12 Salimo 15:3 yutikumbushasoti kuti ŵanthu amene ni alwendo mutenti ya Yehova ochitilalini ayawo chiipa chilichonse komasoti onyozalini ayakine. Kansi vamene ivi vupamikijapo chinji?
13 Mosaziŵa, sewo tingayambe kunyoza munthu muyakine mwakulaŵila nkhani ziipa zokhuza yove. Ganizilani vochitika ivi vokonkhapo: (1) kalongosi angapanamikiwe kutumikila monga mpainiya, (2) banja ingapanamikiwe kutumikila pa Beteli, olo (3) mkwasu angapanamikiwe kutumikila monga nkulu olo ntumiki wothandiza. Angankhale maganizo aipa kuuja ŵanthu ayakine kuti enekwasu na akalongosi otetyo epanamikiwa m’mautumiki ŵawo chifukwa chakuti echita vinthu viipa. Pangankhale vifukwa viyakine viweme vamene vingachitishe kuti utumiki wa munthu uchinje vamene sewo tingaviziŵelini. Kuyangijila pamene apo, munthu wamene nimulwendo mutenti ya Yehova “ochitilalini muyake chiipa chilichonse ndipo onyozalini ayake.”
N’kosavuta kuyamba kulaŵila vinthu viipa vokhuza ŵanthu ayakine, ndipo kuchita vamene ivi nikutonja (Onani ndime 12-13.)
MUKOLEMEKEZA ŴANTHU AMENE OYOPA YEHOVA
14. Fotokozani vakuchita alwendo a Yehova popewa kukatijana na “munthu aliyense wonyansa.”
14 Salimo 15:4 yunena kuti nshamwali wa Yehova “okatijanalini na munthu aliyense wonyansa.” Kansi sewo tingachite tyani vamene ivi? Chifukwa chakuti nise ŵanthu ochimwa, sewo tiliye udindo woweluza munthu kuti niwonyansa. Ndaŵa yanji? Mwachibadwa, sewo tingasankhe ŵanthu ayakine kuti ankhale azishamwali ŵasu chifukwa chaumunthu wawo, nonyansiwa na ayakine chifukwa chaumunthu wawo. Tetyo, sewo tufunikila kupewa tyala ŵanthu amene Yehova aŵawona kuti ni “onyansa.” (1 Ako. 5:11) Vamene ivi vupamikijapo ŵanthu amene ochita vinthu viipa ndipo ofunalini kulapa, olemekezalini vinthu vatukhulupilila, olo amene ofuna kuwononga ushamwali wasu na Yehova.—Miy. 13:20.
15. Kansi njila imozi yamene yatingawoneshele kuti “tulemekeza ŵanthu amene oyopa Yehova” niyotyani?
15 Pavuli pake, Salimo 15:4 yunena kuti tufunikila “kulemekeza ŵanthu amene oyopa Yehova.” Tetyo, sewo tuyeja-yeja kusakila mipata iweme kuti tiwoneshe kuwama ntima komasoti ulemu kuli azishamwali a Yehova. (Alo. 12:10) Mwanjila yotyani? Njila imozi yatomolewa pa Salimo 15:4, ndipo yuwonesha kuti munthu wamene nimulwendo mutenti ya Yehova “ochinjalini vawalonjeza olo kuti vinthu vililini luweme kuli yove.” Kulaŵila chendi kufwaya pangano kungakhumudwise ŵanthu ayakine. (Mat. 5:37) Mwachisanzo, Mulungu oyembekezela kuti alwendo ŵake akokwanilisha lumbilo yawo yaukwati. Yove osangalalasoti keno makolo oyeja-yeja mwakhama kukwanilisha vakulonjeza kuli ŵana ŵawo. Chifukwa chakuti tukonda Yehova komasoti ŵanthu, tizachite vonse vatingakwanishe kuti tikokwanilishe malonjezo ŵasu.
16. Kansi njila iyakine yatingawoneshele kuti tulemekeza azishamwali a Yehova niyotyani?
16 Njila iyakine yatingawoneshele kuti tulemekeza azishamwali a Mulungu, nikunkhala na ntima wotandaja alwendo komasoti kunkhala opasa. (Alo. 12:13) Kupatulapo kumisonkhano komasoti muutumiki, tikapatula nthawe kuti titandale nenekwasu komasoti akalongosi tuyamba kukondana nawo ngako ndipo ushamwali wasu na Yehova utang’asoti. Ndipo tikankhala na ntima wotandaja alwendo tukonkheja Yehova.
MUKOPEŴA NTIMA WOKONDA NDALAMA
17. Ndaŵa yanji lemba ya Salimo 15 yunena vokhuza ndalama?
17 Sewo tuŵelenga kuti munthu wamene nimulwendo mutenti ya Yehova “okongoleshalini ndalama zake kuti alondele kaloŵa, ndipo olondelalini chiphuphu kuti aleweshe mulandu wa munthu wosaphoniya.” (Sal. 15:5) Ndaŵa yanji Salimo yamene iyi yutomola za ndalama? Chifukwa chakuti keno munthu okonda ngako ndalama, angoziwona kunkhala zofunika ngako kupambana ushamwali wake na Yehova. (1 Tim. 6:10) Munthawe za m’Baibolo, ŵanthu ayakine enzechitila achibale ŵawo osauka vinthu viliye chilungamo poŵauja kuti awejele ndalama zinyinji kupambana zechijamika. Oweluza ayakine ovomela kulondela chiphuphu, noweluza ŵanthu osaphoniya mwanjila iliye chilungamo. Yehova vumuipila muntima mwake akawona ŵanthu ochita vinthu monga nivamene ivi.—Ezek. 22:12.
18. Kansi ni makonsho otyani amene ŵatingalikonshe kuti tiziŵe mwatuganizila pankhani ya ndalama? (Ahebeli 13:5)
18 Tingachite luweme kulifufuza kuti tiziŵe mwatuganizila pankhani yandalama. Tingalikonshe kuti: ‘Kansi nthawe zinyinji nukonda kuganizila vokhuza ndalama komasoti vinthu vaningagule? Kansi nikajamika ndalama vunitolela nthawe itali kuti nijoshele chifukwa choganiza kuti munecho oifunalini? Kansi nuliwona kuti nine munthu wofunika ngako kupambana ŵanthu ayakine chifukwa cha ndalama zanili nazo? Kansi vunivuta kupasako ŵanthu ayakine vinthu vanili navo? Kansi nuweluza enekwasu na akalongosi kuti okonda chuma chifukwa chakuti ali na ndalama? Kansi nusankha ŵanthu olemela ŵeka kuti ankhale azishamwali ŵangu nopewa ŵanthu osauka?’ Tufunika kulikonsha makonsho amene aŵa chifukwa tapasiwa mwayi wonkhala alwendo mutenti ya Yehova. Kupewa ntima wokonda ndalama kungatiyavye kuti tipitilije kunkhala alwendo mutenti ya Mulungu. Tikachita tetyo, Yehova azatisiyelini napatontho kumo!—Ŵelengani Ahebeli 13:5.
YEHOVA OKONDA AZISHAMWALI ŴAKE
19. Ndaŵa yanji Yehova ofuna kuti sewo tikochita vinthu vonse vamene vutomolewa mu Salimo 15?
19 Lemba ya Salimo 15 yusilija na lonjezo yakuti: “Munthu aliyense wamene ochita vamene ivi, azanyang’anyikelini.” (Sal. 15:5) Mawu osilijila avesi yamene iyi, ofotokoza chifukwa chake Yehova ofuna kuti sewo tikochita vinthu vonse vutomolewa muchapitala chamene ichi. Yehova ofuna kuti tikosangalala. Keno sewo tuchita vinthu vakutiuja Mulungu tizankhale na moyo uweme ngako ndipo Yehova akotiteteza.—Yes. 48:17.
20. Kansi alwendo amene ali mutenti ya Yehova oyembekezela chinji?
20 Ŵanthu amene ni alwendo mutenti ya Yehova, oyembekezela sogolo iweme ngako. Akhilisitu ozozewa akankhale kululu pamalo ŵechiŵakonzela Yesu. (Yoh. 14:2) Atumiki a Mulungu amene azankhale pano pachalo oyembekezela mwachidwi kukwanilishiwa kwa lonjezo yapa Chivumbuluso 21:3. Kulaŵila chendi Yehova watilemekeza ngako potiita kuti tinkhale alwendo mutenti yake mpaka kale-kale!
NYIMBO N.° 39 Tipange zina iweme na Mulungu
