1. Re tlo holega bjang ge re ka ithuta ka Psalme 15:​1-5?

 SEHLOGONG se se fetilego re ithutile gore bahlanka ba Jehofa bao ba ineetšego go yena, ba ka dula e le baeng ka tenteng ya gagwe ya seswantšhetšo ka go dula ba šoma ka thata gore ba be le segwera se sebotse le yena. Re ka dira’ng gore re dule re le bagwera ba Jehofa? Psalme 15 e re swaretše dikarabo. (Bala Psalme 15:​1-5.) Psalme ye e re botša ka dilo tšeo re ka di dirago gore re batamele kgauswi le Jehofa.

2. Ke’ng seo se ka bago se dirile gore mopsalme Dafida a bolele ka tente ya Jehofa?

² Psalme 15 e thoma ka mantšu ao a rego: “Wena Jehofa, ke mang a ka bago moeng tenteng ya gago? Ke mang a ka dulago thabeng ya gago e kgethwa?” (Ps. 15:1) Ge mopsalme Dafida a bolela ka “tente” ya Jehofa, a ka no ba a be a naganne ka taberenakele yeo e bego e le Gibeone ka nakwana. Dafida o be a bolela le ka “thaba e kgethwa ya Jehofa,” mohlomongwe a šupa go Tsione yeo e bego e le Jerusalema. Dafida o ile a hloma tente gomme a bea areka ya kgwerano ka go yona kgauswi le Gibeone pele go ka hwetšwa lefelo leo e bego e ka dulela sa ruri go lona.—2 Sam. 6:17.

3. Ke ka baka la’ng re swanetše go naganišiša ka Psalme 15? (Bona le seswantšho.)

³ Baisiraele ba bantšhi ga sa nka ba hlankela taberenakeleng,  goba go tsena ka gare ga taberenakele moo areka ya kgwerano e bego e beilwe gona. Bahlanka ka moka ba Jehofa ba ka kgona go ba baeng tenteng ya Jehofa ya seswantšhetšo le go dula ba gwerane le yena. Se ke seo ka moka ga rena re se kganyogago. Psalme 15 e bolela ka dika tšeo re swanetšego go ba le tšona gore re dule re le bagwera ba Jehofa.

DULA O SE NA MOLATO, O DIRA SE SE LOKILEGO

4. Re tseba bjang gore go kolobetšwa ga se gona feela go dirago gore re dule re le ka tenteng ya Jehofa? (Jesaya 48:1)

⁴ Psalme 15:​2, e re botša gore mogwera wa Modimo “ke yo a se nago molato, yo a dirago se se lokilego.” Se ke seo re swanetšego go dula re se dira. Na go a kgonega gore ‘re dule re se na molato’? Ee. Ga go na motho yo a phethagetšego, eupša ge re ka dira sohle seo re ka se kgonago go dula re ekwa Jehofa, o tlo re lebelela ‘re se na molato. Ge re ineela go Jehofa e bile re kolobetšwa, re thoma go sepela le Modimo. Gopola gore mehleng ya Beibele, go no ba Moisiraele go be go sa bolele gore motho ke moeng tenteng ya Jehofa. Ba bangwe ba be ba mo rapela eupša e sego “ka go rereša le ka go loka.” (Bala Jesaya 48:1.) Baisiraele ba botegago ba ile ba swanelwa ke go ithuta ka melao ya motheo ya Jehofa le go e latela. Ka mo go swanago, le lehono go no kolobetšwa le go kopanela le phuthego ya Bokriste ga go bolele gore Modimo o a re amogela. Re swanetše go dula re ‘dira se se lokilego.’ Re ka dira bjang seo?

5. Go kwa Jehofa dilong tšohle go akaretša’ng?

⁵ Jehofa ga a no lebelela go ya dibokeng le go dira dilo tše dingwe ka phuthegong e lego gona go dirago gore motho ‘a se be le molato le go dira se se lokilego.’ (1 Sam. 15:22) Re swanetše go lwela go dula re ekwa Modimo dilong ka moka tšeo re di dirago, le ge  re le noši. (Die. 3:6; Mmo. 12:​13, 14) Go bohlokwa gore re lwele go kwa Jehofa le dilong tše di nyenyane. Go dira seo go bontšha gore re tloga re mo rata e bile go dira gore a re amogele.—Joh. 14:23; 1 Joh. 5:3.

6. Ke’ng se bohlokwa kudu go feta dilo tše dibotse tšeo re di dirilego nakong e fetilego? (Baheberu 6:​10-12)

⁶ Jehofa o leboga dilo ka moka tšeo re mo diretšego tšona nakong e fetilego. Eupša dilo tše dibotse tšeo re di dirilego nakong e fetilego di ka se re dire gore re dule re le baeng tenteng ya Jehofa. Se se hlaloswa gabotse go lengwalo la Baheberu 6:​10-12. (Bala.) Jehofa ga a lebale dilo tše dibotse tšeo re mo direlago tšona. Eupša o nyaka gore re dule re mo hlankela ka dipelo tša rena ka moka “go fihla bofelong.” O tlo ba mogwera wa rena ka mo go sa felego ge e ba ‘re sa lape.’—Bagal. 6:9.

BOLELA NNETE KA PELONG YA GAGO

7. Go bolela nnete dipelong tša rena go akaretša’ng?

⁷ Motho yo a nyakago go dula e le moeng tenteng ya Jehofa, o swanetše go ikemišetša go dula a “bolela nnete ka pelong ya gagwe.” (Ps. 15:2) Mo ga go bolelwe ka go no phema go bolela maaka. Jehofa o nyaka gore re dule re botega dilong ka moka. (Baheb. 13:18) Se se bohlokwa ka gobane “Jehofa o hloile motho wa go radia ba bangwe, eupša ke mogwera yo mogolo wa batho bao ba lokilego.”—Die. 3:32.

8. Re swanetše go phema go itshwara bjang?

⁸ Motho yo a ‘bolelago nnete ka pelong ya gagwe’ ga a itire eka o kwa Jehofa ge a le gare ga batho eupša a roba melao ya gagwe ge a le noši. (Jes. 29:13) Jehofa o nyaka gore re se ke ra ba baikgakanyi. Motho yo a ikgakanyago a ka bona eka melao e mengwe ya motheo ya Jehofa ga se e bohlale. (Jak. 1:​5-8) A ka no se kwe Jehofa go dilo tšeo a bonago eka ga di bohlokwa. Ge a ka bona a sa wele mathateng ka baka la go se kwe melao ya Jehofa, a ka no se kwe le go feta gomme borapedi bja gagwe ya ba bja boikaketši. (Mmo. 8:11) Eupša rena re nyaka go dula re botega dilong tšohle.

9. Re ithuta’ng go se Jesu a se dirilego ge a be a kopana le Nathaniele la mathomo? (Bona le seswantšho.)

 ⁹ Re ka ithuta bohlokwa bja go botega nakong ya ge Jesu a kopana le Nathaniele la mathomo. Ge Filipi a tliša mogwera yoo wa gagwe go Jesu, go ile gwa direga selo seo se makatšago. Le ge Jesu a be a se a ka a kopana le Nathaniele, o ile a bolela gore: “Bona Moisiraele yoo ge e le gabotse go se nago bofora go yena.” (Joh. 1:47) Le ge Jesu a be a lebelela barutiwa ba gagwe e le ba botegago, eupša o ile a bona Nathaniele a botega ka tsela e makatšago. Nathaniele o be a swana le rena a se a phethagala, eupša e be e se moikaketši. Jesu o ile a rata seo ka Nathaniele gomme a mo reta. Go ka thabiša kudu ge Jesu a ka bolela seo ka rena!

10. Ke ka baka la’ng re sa swanela go senya batho ba bangwe maina? (Jakobo 1:26)

¹⁰ Psalme 15 e bolela ka dilo tšeo re swanetšego go di dira ge re dirišana le batho ba bangwe. Psalme 15:3 e re moeng tenteng ya Jehofa, “ga a senye batho maina ka leleme la gagwe. Ga a sware moagišane wa gagwe gampe, e bile ga a goboše bagwera ba gagwe.” Go senya batho ba bangwe maina go ka ba gobatša gomme gwa dira gore re se ke ra ba baeng ka tenteng ya Jehofa.—Bala Jakobo 1:26.

11. Go senya leina ke’ng, gona go direga’ng ka batho bao ba senyago ba bangwe maina gomme ba sa itshole?

¹¹ Mopsalme o bolela ka go senya leina. Go senya leina ke’ng? Ke go bolela maaka ka motho yo mongwe gomme seo sa senya botumo bja gagwe. Batho bao ba senyago ba bangwe maina gomme ba sa itshole, ba a ntšhwa ka phuthegong ya Bokriste.—Jer. 17:10.

12-13. Ke maemong afe moo re ka ikhwetšago re goboša bagwera ba rena re sa lemoge? (Bona le seswantšho.)

¹² Psalme 15:3 e re botša gore baeng bao ba lego tenteng ya Jehofa ga ba sware baagišane ba bona gampe e bile ga ba goboše  bagwera ba bona. Re ka goboša bagwera ba rena bjang?

¹³ Re ka goboša batho ba bangwe re sa lemoge ka go phatlalatša mabarebare ka bona. Ka mohlala: (1) kgaetšedi o tlogela tirelo ya nako e tletšego, (2) banyalani ga ba sa hlankela Bethele, goba (3) ngwanabo rena ga a sa hlankela bjalo ka mogolo goba mohlanka wa bodiredi. Na e ka ba mo go swanelago gore re phatlalatše mabarebare a gore ke ka baka la’ng ba se sa hlankela? Go ka ba le mabaka ao re sa a tsebego a gore go be le diphetogo tšeo. Go oketša moo, baeng bao ba lego ka tenteng ya Jehofa ‘ga ba sware baagišane ba bona gampe e bile ga ba goboše bagwera ba bona.’

HLOMPHA BAO BA BOIFAGO JEHOFA

14. Hlalosa kamoo moeng tenteng ya Jehofa a phemago go gwerana le “batho bao ba dirago dilo tše di gobogilego.”

¹⁴ Psalme 15:4 e re mogwera wa Jehofa “ga a gwerane le batho bao ba dirago dilo tše di gobogilego.” Re ka tseba bjang gore motho o dira dilo tše di gobogilego? Bjale ka batho ba sa phethagalago ga re na tokelo ya go ahlola batho ba bangwe. Ka baka la’ng? Re ka rata batho ba bangwe ka baka la tsela yeo ba phelago ka yona gomme ra se rate ba bangwe ka ge re sa ba kwešiše. Re swanetše go phema go gwerana le batho bao Jehofa a ba lebelelago ba “gobogile.” (1 Bakor. 5:11) Batho bao ba akaretša bao ba dirago dilo tše mpe gomme ba sa itshole, bao ba sa hlomphego dilo tšeo re di dumelago le bao ba nyatšago tsela yeo re hlankelago Jehofa ka yona.—Die. 13:20.

15. Re ka bontšha bjang gore re hlompha bao “ba boifago Jehofa”?

¹⁵ Psalme 15:4 e re botša gore re hlomphe “bao ba boifago Jehofa.” Re dula re lwela go hlompha bagwera ba Jehofa le go ba bontšha botho. (Baroma 12:10) Bjang? Selo se sengwe gape seo Psalme 15:4 e re botšago sona ka moeng yo a lego tenteng ya Jehofa ke gore “o phetha seo a se tshepišitšego le ge go le thata go dira bjalo.” Ge re sa dire dilo tšeo re di tshepišitšego re ka kweša ba bangwe bohloko. (Mat. 5:37) Ka mohlala, Jehofa o letetše gore baeng bao ba lego tenteng ya gagwe ba phelele dikeno tša bona tša lenyalo. O thaba kudu ge batswadi ba dira sohle seo ba ka se kgonago go dira dilo tšeo ba di tshepišitšego bana ba bona. Go rata Modimo le baagišane go tlo re thuša gore re dire sohle seo re ka se kgonago go phethagatša dilo tšeo re di tshepišitšego.

16. Re ka hlompha bagwera ba Jehofa ka tsela efe e nngwe?

¹⁶ Tsela e nngwe ya go hlompha bagwera ba Jehofa ke ka go ba amogela le go ba bontšha botho. (Baroma 12:13) Nako yeo re e fetšago re ithabiša le bana babo rena le dikgaetšedi e dira gore re ba tsebe gakaone e bile re dule re na le segwera se tiilego le Jehofa. Re ekiša Jehofa ge re amogela ba bangwe.

O SE KE WA RATA TŠHELETE

17. Ke ka baka la’ng go bolelwa ka tšhelete go Psalme 15?

¹⁷ Re bala gore moeng tenteng ya Jehofa “ga a adimiše tšhelete ya gagwe ka tswalo, e bile o ka se mo reke gore a latofatše motho yo a se nago molato.” (Ps. 15:5) Ke ka baka la’ng Psalme ye e bolela ka tšhelete? Ka gobane ge re ka rata tšhelete re ka kweša batho bangwe bohloko ra ba ra senya segwera sa rena le Jehofa. (1 Tim. 6:10) Ba bangwe mehleng ya Beibele ba be ba sa sware bana babo bona bao ba se nago sa bona gabotse  ka go ba adima tšhelete gomme ba e nyaka e na le tswalo. Baahlodi ba bangwe ba be ba amogela letsogo le kobong ke moka ba se ahlole ba bangwe ka toka. Dilo tšeo di šišimiša Jehofa.—Hesek. 22:12.

18. Re ka ipotšiša dipotšišo dife ge re hlahloba tsela yeo re lebelelago tšhelete ka yona? (Baheberu 13:5)

¹⁸ Go bohlokwa gore re fele re hlahloba tsela yeo re lebelelago tšhelete ka yona. Ipotšiše gore: ‘Na ke dula ke nagana ka tšhelete le ka dilo tšeo e ka di rekago? Ge ke kgopela motho yo a itšego tšhelete, na ke tšea nako go mo patela le go phetha ka gore ga a nape a e hloka? Na ge ke na le tšhelete ke ipona ke le bohlokwa e bile ke a timana? Na ke bona bana bešo le dikgaetšedi ba rata dilo tše di bonagalago ge ba na le tšhelete? Na ke leka go gwerana le bahumi gomme ka phaela badiidi ka thoko?’ Re na le tokelo e kgolo ya go ba baeng tenteng ya Jehofa. Re ka dula re le baeng tenteng ye ge e ba re sa rate tšhelete. Seo se tlo dira gore Jehofa e dule e le mogwera wa rena!—Bala Baheberu 13:5.

JEHOFA O RATA BAENG BA GAGWE

19. Ke ka baka la’ng Jehofa a re neile melao ya motheo?

¹⁹ Psalme 15 e phetha ka mantšu ao a rego: “Motho yo a dirago dilo tše a ka se tsoge a šišintšwe.” (Ps. 15:5) Mopsalme o re botša bohlokwa bja go latela melao ya Jehofa ya motheo. Jehofa o nyaka gore re thabe. Ke ka baka leo a re neago tlhahlo yeo e tla re thušago go hwetša ditšhegofatšo le go dula re šireletšegile.—Jes. 48:17.

20. Baeng bao ba lego ka tenteng ya Jehofa ba na le bokamoso bja mohuta mang?

²⁰ Baeng bao ba lego tenteng ya Jehofa ba na le bokamoso bjo bo kgahlišago. Batlotšwa ba botegago ba tlo ba le “madulo a mantšhi” ao Jesu a ba lokišeditšego ona kua legodimong. (Joh. 14:2) Bao ba tlago go phela mo lefaseng ba fela pelo ya go bona lengwalo la Kutullo 21:3 le phethagala. Ka moka ga rena re tšeela godimo tokelo ye Jehofa a re neilego yona ya go re mema gore re be bagwera ba gagwe le go ba baeng tenteng ya gagwe ka mo go sa felego!