1. Pisalema 15:​1-5 yi ka re berekela ka mokgo mang?

 GA HLOGOTABA ya go fela, re tšhutiye gore malata ya Jehova ya gore ma tineyele ma ka ba divakaši ga letente lage la go fo tshwanisela ka go lwela go ba le senghana sa thina naye. Mara di nyaka re make ying gore re tshwanelege go ba le senghana sa mošaga wonone? Pisalema 15 yi na le tsa go tlala tso re ka bolabolang ka tsona ga taba yone. (Bala Pisalema 15:​1-5.) Pisalema yowa yi re botsa tso re tshwaneleng re di make gore re thogo ba banghana ba Modimo.

2. Mara Dafita a ka fo ba a yye a nagana ka ying mo a šinya a bolabola ka letente la Jehova?

² Pisalema 15 yi thomisa ka putsiso ya gore: “Wene Jehova, mara go ka vakaša mang letenteng lago? Ke mang a ka dulang thabeng yago ya go hlawolega?” (Pis. 15:1) Mo mopisalema Dafita a bolabola ka ‘letente’ la Jehova di ka makega gore ne a nagana ka tabarenakele ya gore ne yi le ga Ghibhiyoni ka senakonyana. Fote Dafita o yye a bolabola le ka ‘thaba ya go hlawolega’ ya Modimo, di ka makega gore ne a nagana ka Thaba ya Siyone ya gore yi Jerusalema. Gana hone, mo o sepela dikhilomitha tsa go tlalanyana ka borwa bya Ghibhiyoni, Dafita o yye a hloma letente ke mokane a beya areka ya kwano ka teng ga lona go segela mo ba yaga tempele.—2 Sam. 6:17.

3. Ke ntaba di nyaka re yi kwisisa gabutši Pisalema 15? (Lebelela le sethombhe.)

³ Ke nnete gore Maisrayele ya go tlala ne ba sa ma dumelele gore ma bereke tabarenakeleng fote ne go fo ba paranyana ya bona ba gore ba yye ba kena ga letente la gore ne go na le areka ya kwano. Mara malata ka mokana ga wona ya Jehova ya gore maa tshepega ma ka ba divakaši ka letenteng lage la go fo tshwanisela mo ma ka thomisa go ba banghana bage ma boya ma ro  ngangarela ga senghana sone. Phela ka mokana ga rune tsotsone re ro di nabela. Pisalema 15 yi bolabodiye ka mekgwa ye mengwana yo re tshwaneleng re be nayo gore re thogo dula re le banghana ba Jehova.

O HLOKE SELABI FOTE O MAKE TSA LOKA

4. Re di tšibela kaye gore Jehova aa re motho o pasiye mo a kolobetsiwwe? (Jesaya 48:1)

⁴ Ga Pisalema 15:​2, monghana wa Modimo ba mo hlatolla ka gore, “ke wa gore o hloka selabi, wa gore o maka tsa go loka.” Tsotsone ke tso di nyakang re dula re di maka. Nje di ya kgonega gore re ‘hloke selabi’? Eya. Ka taba la gore a go na motho wa gore o felegelele, Jehova o nyoko re tseya re le ba go “hloka selabi” mo re ka maka so re ka se kgonang gore re mo theetsele. Mo re tineyela ga Modimo re boya re kolobetsiwa re thomisa go gobagoba naye. Ka dinako tsa Bhayibele, go fo re o wela ga setšhaba sa Israyele ne di sa nape di rela gore wa tshwanelega go ba sevakaši sa Jehova. Ba bangwana ne ba mmitsa ga Modimo mara ne “ba se na nnete fote ba timakisanyana.” (Bala Jesaya 48:1.) Gore nnete Maisrayele maa di nyaka go ba divakaši tsa Jehova, di nyaka ma tšhute ka tso a di nyakang ma boye ma di latelele. Go fo tshwana le lekgono gore motho a be le senghananghana le Jehova, di nyaka a make tsa go feta go kolobetsiwa ke mokane ba re ke Hlatse ya Jehova. Di nyaka re dule re “maka tsa go loka.” Tsotsone re ka di maka byang?

5. Di ra gore king go theetsela Jehova ga dilo ka mokana ga tsona?

⁵ Ga Jehova, taba ya go “hloka selabi” le go “maka tsa go loka” a yi fo rela go ya megahlanong Holong ya Mmušo. (1 Sam. 15:22) Di nyaka re karakare ka matla gore re theetsele Modimo ga se sengwana le se sengwana so re se makang mo re kene re phela, re ra le mo re le ntoši. (Diy. 3:6; Mmo. 12:​13, 14) Phela ke taba ye kgolo go liketsa ka matla gore re theetsele Jehova le ga dilo tsa gore mo re di lebelele re bona nkare a yi tsa selo. Mo re maka ka mokgonone re ba re šupetsa gore mo re re re ya  mo nyaka, a re timakisi fote tsotsone di nyoko maka gore a re nyakise tsa mohlolo.—Joh. 14:23; 1 Joh. 5:3.

6. Maheberu 6:​10-12, yi re king sa gore ke se segolo go phala tsa gabutši tso re di makiyeng ku botala?

⁶ Jehova di mo jabodisa la go sa hlayisegi mo a gopola tso re yyeng ra mo makela tsona ku botala. Mara ka taba la gore re yye ra maka tsa gabutši ku botala, tsotsone a di rele gore re krayye thikiti ya go dula re le divakaši ka letenteng la Jehova. Taba yone yi napa yi kwagala gabutši mo ga Maheberu 6:​10-12. (Bala.) Jehova aa lebale ka tsa gabutši tso re yyeng ra di maka. Mara o nyaka re ragarage ga taba ya go dula re mmerekela ka dipelo ka mokana ga tsona “go segela mafelelong.” Phela o nyoko re rufa ra fo dula re le banghana takataka “mo re sa tini.”—Magal. 6:9.

BOLABOLA NNETE DI TŠWA PELONG

7. Anthe di ra gore king mo ba re go bolabola nnete di tšwa pelong?

⁷ Ye mongwana le ye mongwana ye a nyakang gore Jehova a mo yamogele go le sevakaši ka letenteng lage, di nyaka a “bolabola nnete di tšwa pelong.” (Pis. 15:2) Tsotsone di rela go feta taba ya go sa bolabole matsaka. Jehova o nyaka re tshepege ga dilo ka mokana ga tsona tso re di hlayang le tso re di makang. (Maheb. 13:18) Tsotsone re sa di tseyi ka gonyana ka gore “Jehova o silikisa ke motho wa gore ke sešakašakane mara o nghanelana ka matla le ba go tilokela.”—Diy. 3:32.

8. Ke mokgwa wofeng wo di nyakang re kganela kgole nawo?

⁸ Ba gore ba ‘bolabola nnete di tšwa pelong’ a ba make tsa nkare bona ba theetsela melawo ya Modimo mo ba le gare ga batho mara mo ba le makhukhung o kraya ba tshosa le mong yene Sathane. (Jes. 29:13) Ba kganela kgole le go maka tsa bošakašakane. Motho wa sešakašakane a ka thomisa go kamaka melawo ya Jehova a re go na le mo yi felang yi re lahla gona. (Jak. 1:​5-8) A ka fo tiwomisa hlogo a sa theetsele Jehova ga tse dingwana a tseya nkare a yi tsa selo. Ke mokane mo go bonala nkare a go sinyegi selo mo a sa theetsele, a ka fo ya mahlong a napa a sinya ka matla tsotsone dya maka gore le mo a re wa rapela Jehova a mo teyise ka moya. (Mmo. 8:11) Mara mo go le rune re nyaka go tshepega ga dilo ka mokana ga tsona re sa šiyi le mong se se twii.

9. Re ka tšhuta ying ga taba ya mo Jeso a sa thomisa go gahlana le Nathaniyele? (Lebelela le sethombhe.)

 ⁹ Re ka tšhuta taba ye kgolo ga Jeso ya go bolabola nnete di tšwa pelong nakwela a sa thomisa go gahlana le Nathaniyele. Tsotsone re ka di bona ga tso di makegiyeng nakwela Filipi a mema monghanage Nathaniyele gore a tle a gahlane le Jeso. Le mo yi le gore le ka tšatši la mohlolo Jeso a sanka a gahlana le Nathaniyele, mara o yitseri: “Bonaneng Leisrayele la mannete, la gore a le na botsotsi.” (Joh. 1:47) Ke nnete gore Jeso ke mo a tseya malata yage ma tshepega mara mo go le Nathaniyele yene ke mo a tshepega mong go tshepega. Le Nathaniyele ne a sa felegelela go fo tshwana le rune. Ke mo a sa timakisanyi mara a tshepega ga dilo ka mokana ga tsona. Ka taba la tsotsone Jeso o yye a phaphatela Nathaniyele matsogo a boya a ro mo thanaka. Phela ka mokana ga rune re ya di nyaka gore Jeso a tikwe ka mokgonone ka rune!

10. Ke ntaba di nyaka re pasope tso re di ntshang ka ho ganong? (Jakobo 1:26)

¹⁰ Tsa go tlala ga tso di nyakegang tsa gore di ngwadiwwe ga Pisalema 15 di bolabola ka taba ya ka mokgo re tshwarang ba bangwana ka gona. Pisalema 15:3 yi re motho wa gore ke sevakaši ga letente la Jehova “aa thomelane matsaka ka lleme lage, o tshwara moyagelane wage gabutši, fote aa sinyi banghana bage lebitso.” Mo re ka sinyana lebitso ka mokgonone di ka kwaletsa ba bangwana fote dya maka gore re sa sa tshwanelega go ba divakaši ga letente la Jehova.—Bala Jakobo 1:26.

11. Motho wa go sinya ba bangwana lebitso ke wa mošaga mang fote go ka makega ying ka yene mo a sa tikemisela go sokologa?

¹¹ Gabutšibutši mopisalema o bolabodiye ka matla ka motho wa go sinya batho lebitso. Anthe motho wa go sinyana lebitso ke wa mošaga mang? Re ka fo re ke wa gore o hlaya taba ya matsaka ka ye mongwana go fo re a mo sinye lebitso. Motho wa go sinya ba bangwana lebitso fote a sa tikemisela go sokologa, a ka ntshiwa ka phutegong ya Sekreste.—Jer. 17:10.

12-13. Ke ga seyemo sefeng mo re ka tšhogang re ba le molato wa go sinya banghana ba rune lebitso? (Lebelela le sethombhe.)

 ¹² Fote Pisalema 15:3 yi re gopotsa taba ya gore divakaši tsa Jehova di tshwara bayagelane ba tsona gabutši, fote a di sinyi banghana ba tsona lebitso. Banghana ba rune re ka ba sinya lebitso ka mokgo mang?

¹³ Di ka makega gore re sinye ye mongwana lebitso re sa tikemisela ka go fo bolabola dilo tsa go fo tikela ku ka yene. Mo re beyisa: (1) mogageru wa mosadi o lisetsa mmereko wage wa nako ka moka wa gore ke mošupatsela, (2) monna le mosadi wage a ba sa bereka Bethele kela (3) mogageru aa sa bereka go le mogolo kela lelata ka phutegong. Ayitsano go ko ba go le tsona mara go botsa ba bangwana gore magageru yawa go ka fo ba go na le tso ma di sinnyeng mo go šinya go ba ka mokgonowa? Go ka fo ba go na le tsa go tlala tsa gore a re di tšibi tso di makiyeng gore seyemo se tšhentšhe. Go tokegela gana hone, motho wa gore ke sevakaši ga letente la Jehova “o tshwara moyagelane wage gabutši, fote aa sinyi banghana bage lebitso.”

HLOMPA BO BA TŠHABANG JEHOVA

14. Hlatolla gore ke ntaba divakaši tsa Jehova di sa “nghanelane le ba dipelo tse diphifadu.”

¹⁴ Pisalema 15:4 yi re monghana wa Jehova “aa nghanelane le ba dipelo tse diphifadu.” Re ka di maka byang tsotsone? Ka taba la gore re batho ba go sa yenela, re ka sa di kgone go nyakolla re di bona gore motho o na le pelo ye phifadu kela byang. Ke ntaba mara? Re ka fo kwa re kwana le batho ba bangwana ka matla re goga ke mekgwa ya bona ke mokane re kwa ba bangwana ba fo re tshwatisa nje. Mara, a di nyake re nghanelana le ba gore Jehova o re ke “ba dipelo tse diphifadu.” (1 Makor. 5:11) Ga taba yowa go kena le ba gore ba fo ya mahlong ba maka tsa go befa, ba sa hlompi tumelo ya rune kela go šepisa senghana sa rune le Jehova.—Diy. 13:20.

15. Mokgwa wo mongwana wa go šupetsa go hlompa “bo ba tšhabang Jehova” ke wofeng?

¹⁵ Sa go latela ke gore Pisalema 15:4 yi re di nyaka re hlompe “bo ba tšhabang Jehova.” Byalo, re maka so re ka se kgonang gore re šupetse banghana ba Jehova gore re ba kwela go baba fote re ya ba hlompa. (Marom. 12:10) Byang? Mokgwa wo mongwana wa gore ba wo hlayye ga Pisalema 15:4 ke gore motho wa gore ke sevakaši ga letente la Jehova “mo a tshepisiye, o tshepisiye, le mo a bona gore di ko mo kwaletsa.” Go sa make tso re di tshepisiyeng di ka kwaletsa ba bangwana. (Mat. 5:37) Mo re beyisa, Jehova o nyaka gore divakaši tsage tsa gore di šadhiye di phele ka mokgo di tshepisanneng mo di sa tseyana. Fote o jabola ka matla mo babelegi ba karakara ka matla gore ba make tso ba di tshepisiyeng bana ba bona. Ka taba la gore ga Modimo le bayagelane ba rune re ba nyaka ka matla, re nyoko fo kwa di re tšhofa gore re karakare ka matla ga taba ya go maka tso re di tshepisiyeng.

16. Mokgwa wo mongwana wa go hlompa banghana ba Jehova ke wofeng?

¹⁶ Mokgwa wo mongwana wa go šupetsa go hlompa banghana ba Modimo ke wa go yamogela divakaši le go sa konane. (Marom. 12:13) Phela go ka sa ro tlopoga selo mo ka dinako tse dingwana re fetsa nako re fokatsa le magageru re se megahlanong ya phutego kela tšhomong, tsotsone di nyoko maka gore senghana sa rune nawo le Jehova se tiye mong go tiya. Fote, mo re yamogela divakaši re ba re yekisela Jehova.

O SA KWANE KA MATLA LE TŠHELETA

17. Ke ntaba Pisalema 15 yi bolabola ka tšheleta?

¹⁷ Mo re bala re kwa gore motho wa gore ke sevakaši sa Jehova “mo a yadimisa tšheleta, aa yi tswadisi, fote aa yamogele dhizi ya ba go se na molato.” (Pis. 15:5) Ke ntaba pisalema yowa yi bolabola ka tšheleta? Ka taba la gore mo re kwana ka matla le tšheleta, tsotsone di ka kwaletsa ba bangwana dya boya dya kerefela senghana sa rune le Modimo. (1 Thim. 6:10) Ka dinako  tsa Bhayibele, ba bangwana mo ba yadima magagabo ya gore maa tihlupegela tšheleta, ne ba yi tswadisa yi tshwanele yi boye yi na le manamane. Fote ga ba bangwana bo ba go yahlula ne ba yamogela dhizi fote ba sa ba yahlule gabutši bo ba go tilokela. Mokgwa wone wo silikisa Jehova ka matla.—Hezek. 22:12.

18. Ke diputsiso difeng tso di ka re phafosang gore re tinyakolle mo di tla ga taba ya tšheleta? (Maheberu 13:5)

¹⁸ Wa tšiba di ka ba gabutši ka matla gore re tinyakolle rune beng gore re tikwa byang mo di tla ga taba ya tšheleta. Tiputsise gore: ‘Ayitsano ke dula ke nagana ka matla ka tšheleta ke boya ke nagana le gore nka reka ying ka yona? Mo ke yadima tšheleta, ayitsano ke ya nanankela gore ke yi busetse ke fetsa ka gore motho ye a nkadimmeng aa yi jaga? Ayitsano taba ya gore ke na le tšheleta yi maka gore ke titseye nkare nna ke nna fote yi maka le gore di go thathafele go neya ba bangwana dilo? Ayitsano ke yahlula magageru ke re ma na le dilo tsa go tlala ka taba la gore ma na le tšheleta? Ayitsano ke lwela go nghanelana le magageru ya gore ma ghannye ke mokane ka nyemula magageru ya gore maa tihlupegela?’ Jehova o re thulele lešuba la gore re be divakaši tsage. Mara re ka dula re le divakaši tsa Jehova mo re ka maka so re ka se kgonang gore re sa kwane le tšheleta ka matla. Mo re ka maka ka mokgonone, Jehova a ka sa tsoge a re lahliye!—Bala Maheberu 13:5.

JEHOVA O BA NYAKA KA MATLA BANGHANA BAGE

19. Ke ntaba Jehova a nyaka gore re make dilo ka mokana ga tsona tso di leng ga Pisalema 15?

¹⁹ Pisalema 15 yi fetsa ka go tshepisa gore: “Ye mongwana le ye mongwana ye a makang dilo tsowa, a ka sa ro šikinyega.” (Pis. 15:5) Phela pisalema yowa yi napa yi di beya lekgwaying gore ke ntaba Jehova a nyaka re maka dilo ka mokana ga tsona tso di leng howa ga yona. Jehova o nyaka re jabole. Byalo, mo re ka maka tso Modimo a reng re di make a go jiki, re nyoko phela mothebenene ra boya ra ro tšhireletsega.—Jes. 48:17.

20. Divakaši tsa Jehova di yemele ying ku mahlong?

²⁰ Divakaši tsa Jehova di yemele ke tsa go gadimela ku mahlong. Bo ba go tlotsiwa ba gore baa tshepega ba nyoko ba yamogela ka gore “ga go dula go tlele,” ga gore Jeso o ba lukiselele gona ku legedimong. (Joh. 14:2) Bo ba gore ba na le tshepo ya go phela ho lefaseng ba di yemele ka maahlo ya ma khubedu go bona go makega tso Kutullo 21:3 yi di tshepisang. Phela re fo kwa re sa tshepi taba ya gore Jehova o re memme gore re be banghana bage le gore re be divakaši go ya go yye ga letente lage!