EKICWEKA EKY’OKWEGA 24
EKYESHONGORO 24 Ija aha Rushozi rwa Yehova
Guma ori Omugyenyi wa Yehova Ebiro Byona!
‘[Ai Yehova], n’oha oraaraare omu ihema ryawe?’ —ZAB. 15:1.
ENTIMA
Okwetegyereza eki twine kukora kuguma turi banywani ba Yehova, n’okweijutsya oku arikwenda tutwarize banywani be.
1. Ahabw’enki nitugasirwa twashwijuma Zaaburi 15:1-5?
OMU kicweka ekihwaire, twegire ngu abaheereza ba Yehova abehaireyo nibabaasa kuba abagyenyi omu eihema rye ery’akamanyiso barikuteeraho kugira omukago guhami nawe. Nitubaasa kugira tuta omukago nk’ogwo? Zaaburi 15 neegamba bingi aha nshonga egi. (Shoma Zaaburi 15:1-5.) Zaaburi egi neetugambira eki twine kukora kugira omukago guhami na Ruhanga.
2. Daudi omuhandiiki wa zaaburi akaba naateekateeka ahari ki obu yaagamba aha ihema rya Yehova?
2 Zaaburi 15 neetandika eti: ‘[Ai Yehova], n’oha oraaraare omu ihema ryawe? N’oha oraatuure aha kibungo kyawe ekirikwera?’ (Zab. 15:1) Obu Daudi omuhandiiki wa zaaburi yaagamba aha “ihema” rya Yehova, naabaasa kuba yaabaire naateekateeka aha ihema ry’okubugabuganiramu, eryabaire riri omuri Gibeoni kumara obwire. Daudi akagamba n’aha “kibungo [kya Ruhanga] ekirikwera,” obundi arikumanyisa Saayuuni ey’omuri Yerusaalemu. Daudi akateera eihema ry’okubiikamu eshanduukye y’endagaano mahiro nyingi bukiizi bwa buryo bwa Gibeoni, kuhitsya obu hekalu yaayombekwa.—2 Sam. 6:17.
3. Ahabw’enki nitwenda kwetegyereza Zaaburi 15? (Reeba n’ekishushani.)
3 Abaingi aha Baisraeli bakaba batarikwikirizibwa kuheereza aha ihema ry’okubugaabuganiramu, n’okutaaha omu ihema ahu eshanduukye y’endagaano yaabaire neebiikwa. Kwonka abaheereza ba Yehova abeesigwa boona, nibabaasa kuba abagyenyi omu ihema rye ery’akamanyiso barikuba kandi bakaguma bari banywani be. Ekyo nikyo twena turikwenda. Zaaburi 15 neeyoreka emwe aha mitwarize ei twine kugira, n’eki twine kukora kubaasa kuguma turi banywani ba Yehova.
Omu bwire bwa Daudi, Abaisraeli bakaba nibabaasa kuteera akashushani bari abagyenyi omu ihema rya Yehova (Reeba akacweka 3)
GYENDA OTAINE EKI ORIKUHANWA KANDI OKORE EBY’OKUHIKIIRIRA
4. Nitumanya tuta ngu okubatizibwa tikyo kyonka eki Yehova arikutwenza? (Isaaya 48:1)
4 Zaaburi 15:2 nihooreka ngu munywani wa Ruhanga, “niwe ogwo ogyenda ataine ki arikuhanwa, okora eby’okuhikiirira.” Ekigambo “ogyenda” n’ekigambo “okora” nibimanyisa okugumizamu nookora ekintu. Kwonka shi nikibaasika ‘kugyenda tutaine ki turikuhanwa’? Eego. N’obu haraabe hatariho omuntu ohikiriire, twakora eki turikubaasa kworobera Yehova naatureeba ‘nk’abarikugyenda tutaine ki turikuhanwa.’ Twayehayo ahari Ruhanga kandi tukabatizibwa, nituba twatandika kugyenda nawe. Yetegyereze ngu omu bwire bwa Baibuli, okuba Omwisraeli kyonka kikaba kitarikureetera omuntu yaaba ohikire kuba omugyenyi wa Yehova. Abamwe bakaba nibamutakira, “kwonka batarikukikora mu mazima nari omu buryo.” (Shoma Isaaya 48:1.) Abaisraeli abeesigwa bakaba baine kwega ebi Yehova yaabaire naabenza kandi bakabikuratira. Nikyo kimwe, kubaasa kusiimwa Ruhanga hati, twine kugira eki twakora ekirikukira aha kubatizibwa n’okukwatanisa n’ekibiina Ekikristaayo. Twine kugumizamu ‘nitukora eby’okuhikiirira.’ Ekyo nitubaasa kukikora tuta?
5. Okworobera Yehova omuri byona nikitwariramu ki?
5 Omu maisho ga Yehova, ‘okugyenda tutaine ki turikuhanwa n’okukora eby’okuhikiirira’ nibikira aha kwejumba omu birikukorerwa aha Kyombeko ky’Obukama. (1 Sam. 15:22) Twine kuteeraho kworobera Ruhanga omuri byona ebi turikukora, n’obu twakuba turi twenka. (Enf. 3:6; Mub. 12:13, 14) Ni kikuru kworobera Yehova n’omu nshonga nkye munonga. Twakora tutyo nitworeka ngu buzima nitumukunda kandi ekyo nikitwiriza haihi nawe.—Yoh. 14:23; 1 Yoh. 5:3.
6. Kurugiirira aha Abaheburaayo 6:10-12, niki ekirikukira ebikorwa byaitu by’obwesigwa eby’enyima?
6 Yehova naasiima ebi tumukoreire. Kwonka, ebikorwa byaitu by’obwesigwa eby’enyima tibyo byonka ebirikutureetera kuguma turi abagyenyi omu ihema rya Yehova. Eki nikyorekwa butunu omu Abaheburaayo 6:10-12. (Kishome.) Yehova tarikwebwa ebikorwa byaitu birungi eby’enyima. Kwonka naayenda ngu tugumizemu nitumuramya twihire aha mutima “okuhitsya aha muheru.” Naija kuguma ari munywani waitu ebiro byona twaba tutarikuruha.—Gal. 6:9.
GAMBA AMAZIMA OYIHIRE AHA MUTIMA
7. Okugamba eby’amazima twihire aha mutima nikitwariramu ki?
7 Omuntu orikwenda kuba omugyenyi omu ihema rya Yehova aine ‘kugamba amazima aihire aha mutima.’ (Zab. 15:2) Eki nikikira aha kutabeiha. Yehova naayenda ngu tube ab’amazima omu buri kimwe. (Heb. 13:18) Ekyo ni kikuru ‘ahakuba omuntu orikwehabagiza n’ekirikunugwa ahari [Yehova], kwonka ab’omutima ogugororokire naabeesiga.’—Enf. 3:32.
8. Twine kwetantara kukora ki?
8 Abarikugamba ‘amazima baihire aha mutima’ tibarikworobera ebiragiro bya Ruhanga obu barikuba nibareebwa abantu bwonka, reero bakanga kukikora baaba bari bonka. (Isa. 29:13) Nibeetantara kwehabagiza. Omuntu orikwehabagiza naabaasa kutandika kubangaanisa yaaba obuhabuzi bwa Yehova n’obw’obwengye. (Yak. 1:5-8) Naabaasa kugomera Yehova omu nshonga ezi arikureeba nk’ezitari nkuru. Reero, yaareeba hataine kintu kibi ekyabaho ahabw’okugoma, naabaasa kwongyera kuhenda ebiragiro bya Ruhanga, kandi okuramya kwe nikuba kutakisiimwa. (Mub. 8:11) Kwonka, itwe nitwenda kuba ab’amazima omuri byona.
9. Nitwegyera ki aha kyabaireho obu Yesu yaabugana Nasanaeli omurundi gw’okubanza? (Reeba n’ekishushani.)
9 Nitubaasa kwega obukuru bw’okuba ab’amazima twateekateeka aha ki Yesu yaagambire obu yaabanza kubugana Nasanaeli. Filipo ku yaareetsire munywani we Nasanaeli kubugana Yesu, hakabaho ekintu ky’omutaano. N’obu Yesu araabe yaabaire atakareebahoga Nasanaeli akagira ati: “Reeba Omwisraeli kashushu, otaine buryarya.” (Yoh. 1:47) Buzima, Yesu akaba naareeba abeegi be abandi nk’ab’amazima, kwonka akareeba ngu Nasanaeli akaba naakizaho omu kuba ow’amazima. Nasanaeli akaba atahikiriire nkaitwe, kwonka akaba ataine buryarya, kandi ari ow’amazima omuri byona. Ekyo kikashemeza Yesu, kandi akakimusiimira. Ka gwakubaire omugisha naitwe Yesu kutugambaho atyo!
Filipo akaanjurira Yesu munywani we Nasanaeli, omushaija owaabaire ataine buryarya. Naitwe shi nikwo turikumanywa? (Reeba akacweka 9)
10. Ahabw’enki twine kwetantara kukoresa kubi orurimi rwaitu? (Yakobo 1:26)
10 Bingi ebi Yehova arikutwenza ebiri omu Zaaburi 15, biine akakwate n’oku turikutwariza abandi. Zaaburi 15:3 nihagira ngu omugyenyi omu ihema rya Yehova ‘tarikubeiherera abandi n’orurimi rwe, n’obu kwakuba okukora kubi mugyenzi we nari okunyaga mutaahi we.’ Okukoresa orurimi rwaitu omu muringo nk’ogwo nikibaasa kureetera abandi akabi k’amaani, kandi tufeerwe omugisha gw’okuguma turi abagyenyi omu ihema rya Yehova.—Shoma Yakobo 1:26.
11. Okubeiherera abandi nikimanyisa ki, kandi niki ekirikuhika aha bantu abarikubeiherera abandi bakanga kweteisa?
11 Omuhandiiki wa zaaburi akagamba n’aha kubeiherera. Okubeiherera abandi nikimanyisa ki? N’okugamba ebitahikire ebirikubaasa kushiisha eiziina ry’ondiijo. Abarikubeiherera abandi kandi bakanga kweteisa nibabingwa omu kibiina Ekikristaayo.—Yer. 17:10.
12-13. Ni mu mbeera ki obu turikubaasa kushiisha eiziina ry’abanywani baitu tutakigyendereire? (Reeba n’ekishushani.)
12 Kandi Zaaburi 15:3 neetwijutsya ngu abagyenyi ba Yehova tibarikukora kubi bagyenzi baabo nari kugamba ebitahikire kushiisha eiziina ry’abanywani baabo. Ekyo nikitwariramu ki?
13 Nitubaasa kushiisha eiziina ry’ondiijo tutakigyendereire twamugambaho ebintu bibi. Nk’eky’okureeberaho: Ka tugire ngu (1) munyaanyazi-itwe yaaruga omu obuheereza bw’obutwire, (2) omushaija n’omukazi we tibakiheereza aha Beseeli, nari (3) ow’eishe-emwe takiri mureeberezi nari omuheereza. Mbwenu shi nikiba kiri eky’oburyo kuteebereza ngu nitumanya enshonga ahabw’enki habaireho empinduka ezo, reero tukatandika kuzigambira abandi? Nihabaasa kuba hariho enshonga ezi tutarikumanya ezireetsire haabaho empinduka ezo. Omugyenyi omu ihema rya Yehova tarikukora kubi mugyenzi we nari kushiisha eiziina rye.
Kyorobi kugamba ebintu bibi aha bandi, obundi turikubabeiherera (Reeba akacweka 12-13)
HA EKITIINISA ABARIKUTIINA YEHOVA
14. Shoboorora oku abagyenyi ba Yehova barikwanga omuntu weena “otaine mugasho.”
14 Zaaburi 15:4 neegira ngu munywani wa Yehova naayanga omuntu weena “otaine mugasho.” Ekyo nitubaasa kukikora tuta? Abantu abatahikiriire tibaine bushoboorozi bw’okureeba omuntu nk’otaine mugasho. Ahabw’enki? Nitubaasa kuba nitworoberwa kwirira haihi abantu abamwe ahabw’emitwarize yaabo, kandi abandi barikutugwisa kubi. Kwonka, twine kwetantara abu Yehova arikureeba nk’abataine “mugasho.” (1 Kor. 5:11) Aba nibatwariramu abarikukora ebibi bakanga kweteisa, abarikugaya ebi turikwikiriza nari abarikuteeraho kutumaramu amaani omu by’omwoyo.—Enf. 13:20.
15. Ni muringo ki gumwe oku turikubaasa kuha ekitiinisa abarikutiina Yehova?
15 Ekindi, Zaaburi 15:4 neetuhiga kuha ekitiinisa abarikutiina Yehova. Nitusherura emiringo y’okugiirira banywani ba Yehova embabazi n’okubatwariza omu muringo gw’ekitiinisa. (Rom. 12:10) Tuta shi? Omuringo gumwe guri omu Zaaburi 15:4, aharikugira ngu omugyenyi omu ihema rya Yehova “ku arahira, n’obu afeerwa tahinduka.” Twaremwa kuhikiiriza ebi turaganiise nikishaasha abandi. (Mat. 5:37) Nk’eky’okureeberaho, Yehova naayenda ngu abagyenyi be bahikiirize endagaano yaabo y’obushwere. Kandi nikimushemeza abazaire bateeraho kuhikiiriza ebi baraganiise abaana baabo. Rukundo ei twiniire Ruhanga n’abataahi neija kutuhiga kuhikiiriza ebi turaganiise nk’oku kirikubaasika.
16. Ni muringo ki ogundi oku turikubaasa kuha ekitiinisa banywani ba Yehova?
16 Omuringo ogundi oku turikubaasa kuha banywani ba Ruhanga ekitiinisa n’okuba efura. (Rom. 12:13) Obwire obu turikumara turikweshemeza turi n’ab’eishe-emwe na banyaanyazi-itwe nibutuhwera kuhamya omukago gwaitu nabo, kandi twongyera kwirira haihi Yehova. Twaba efura nituba nitutooreza Yehova.
YETANTARE OKUKUNDA ESENTE
17. Ahabw’enki Zaaburi 15 neegamba aha sente?
17 Zaaburi neegira ngu omugyenyi wa Yehova ‘tarikuguza mpiiha ze ahabw’enshaagi ehinguraine, n’obu kwakuba okurya enguzi, ngu asingise orubanja abatarwine.’ (Zab. 15:5) Ahabw’enki esente nizigambwaho omu zaaburi egi? Ahakuba okugira emiteekateekyere etahikire nikireetera abandi obusaasi, kandi kishiisha omukago gwaitu na Ruhanga. (1 Tim. 6:10) Omu bwire bwa Baibuli, abamwe bakaba nibatwariza ab’eishe-emwe abooro omu muringo gutari gw’oburingaaniza barikubaguza esente, kandi bakabashaba amagoba. Kandi, abaramuzi abamwe bakaba nibaikiriza enguzi basingisa orubanja abatarwine. Ebikorwa nk’ebyo bikaba nibigwisa kubi Yehova.—Ezk. 22:12.
18. Ni bibuuzo ki ebirikubaasa kutuhwera kushwijuma emiteekateekyere ei twine aha sente? (Abaheburaayo 13:5)
18 Ni kikuru kushwijuma emiteekateekyere ei twine aha sente. Yebuuze oti: ‘Ninkira kweshanga ndikuteekateeka aha sente n’ebi zirikubaasa kugura? Naayeguza esente, niinkyerererwa kushashura, ndikuteekateeka ngu omuntu ongurize esente tarikuzetenga? Okugira esente nikindeetera kwetwara nk’orikukira abandi kwonka ngumirwa kuba efura? Nincwera orubanja ab’eishe-emwe na banyaanyazi-itwe ahabw’okuba abagaiga? Niinywana abagaiga kwonka nyehuzya abooro?’ Twine omugisha gw’okuba abagyenyi ba Yehova. Nitubaasa kurinda omugisha ogwo turikwetantara kukunda esente. Twakora tutyo, Yehova tarikwija kututsigaho.—Shoma Abaheburaayo 13:5.
YEHOVA NAAKUNDA BANYWANI BE
19. Ahabw’enki Yehova naayenda tukore ebi Yehova arikutwenza?
19 Zaaburi 15 neehendera erikugira eti: ‘Orikukora ebyo taritengyetsibwa ebiro byona.’ (Zab. 15:5) Omuhandiiki wa zaaburi akooreka ngu enshonga nkuru ahabw’enki twine kukora ebi Ruhanga arikutwenza, n’ahabw’okugira ngu naayenda tushemererwe. N’ahabw’ekyo, naatuha obuhabuzi oburaatuhwere kugira emigisha ye n’oburinzi.—Isa. 48:17.
20. Abagyenyi ba Yehova nibabaasa kugirira ki ekihika?
20 Abagyenyi ba Yehova abu arikusiima nibabaasa kugirira nyentsya yaabo ekihika. Entoore abeesigwa nibaija kwakiirwa omu ‘myanya mingi ey’okutuuramu’ ei Yesu yaabatebeekanisiize omu iguru. (Yoh. 14:2) Kandi abaine amatsiko g’okutuura omu nsi baine ekihika ky’okureeba ebiraganiso ebiri omu Okushuuruurwa 21:3 birikuhikiirira. Buzima, n’omugisha gw’amaani Yehova kutweta kuba banywani be, kandi abagyenyi omu ihema rye ebiro byona.
EKYESHONGORO 39 Okukora Eiziina Rirungi na Ruhanga
