1. Dikon ta importante pa nos pasa den Salmo 15:​1-5?

 DEN e artíkulo anterior, nos a siña ku hende ku dediká nan bida na Yehova i tin un amistat será kuné por keda serka dje den su “tènt.” Pero, kon nos por tin un amistat asina será ku Yehova? Salmo 15 ta yuda nos ku esei. (Lesa Salmo 15:​1-5.) P’esei ta masha importante pa nos pasa den dje pasó e tin lèsnan balioso ku lo yuda nos bira mas será ku Yehova.

2. Kiko kisas David tabatin na mente ora el a menshoná Yehova su tènt?

² Salmo 15 ta kuminsá asin’akí: “Yehova, ken tin mag di keda serka bo, òf tin mag di ta huéspet, den bo tènt? Ken tin mag di biba riba bo seru santu?” (Sal. 15:​1, nota) Ora e salmista David a menshoná Yehova su “tènt,” kisas e tabata pensando riba Yehova su tabernakel ku e tempu ei tabata na Gábaòn. Pero David a menshoná tambe Yehova su “seru santu,” kisas pensando riba Siòn na Herúsalèm. Einan, kasi 10 kilometer zùit di Gábaòn, David a harma un tènt pa pone e arka di pakto te ora ku a traha e tèmpel.—2 Sám. 6:17.

3. Dikon nos ke komprondé Salmo 15? (Wak e plachi.)

³ Klaru ku mayoria di israelita no por a traha na e tabernakel i muchu ménos drenta e tènt kaminda e arka di pakto tabata. Pero, tur Yehova su fiel sirbidónan por tabata huéspet den su “tènt” si nan a bira i keda Yehova su amigu. Esei ta algu ku nos tur ke. Salmo 15 ta bisa kiko ta e kosnan ku nos tin ku hasi pa keda Yehova su amigu.

 SEMPER HASI LOKE TA BON I PRAKTIKÁ LOKE TA KOREKTO

4. Kon nos sa ku boutismo no ta e úniko kos ku Yehova ta ferwagt di nos? (Isaías 48:1)

⁴ Salmo 15:2 ta bisa ku un amigu di Dios “semper ta hasi loke ta bon” i ta “praktiká loke ta korekto.” Esei ta algu ku nos tin ku sigui hasi. Pero, di bèrdat ‘semper nos por hasi loke ta bon’? Sí, nos por. Aunke ku nos tur ta imperfekto, Yehova lo konsiderá ku ‘semper nos ta hasi loke ta bon’ si nos ta hasi nos bèst pa obedes’é. Ora nos dediká nos bida na Dios i batisá, esei ta djis e komienso. Por ehèmpel, den tempu di Beibel, djis pasó un hende tabata israelita no a nifiká ku outomátikamente e tabata un huéspet di Yehova. Algun israelita tabata resa na Yehova pero nan no tabata ‘sinsero ni no tabata hasi loke ta korekto.’ (Lesa Isaías 48:1.) Israelitanan ku di kurason ke tabata huéspet di Yehova mester a siña kiko ta loke Yehova tabata ferwagt di nan i kumpli ku esei. Awe ta meskos. Si nos ke tin un amistat será ku Yehova, nos tin ku hasi mas ku djis batisá i karga e nòmber Testigu di Yehova. Nos tin ku “praktiká loke ta korekto.” Kon nos por hasi esei?

5. Kiko ta enserá obedesé Yehova den tur kos?

⁵ Pa Yehova, semper “hasi loke ta bon” i “praktiká loke ta korekto” ta enserá mas ku djis bai reunion tur siman. (1 Sám. 15:22) Nos tin ku hasi tur nos esfuerso pa obedesé Yehova den tur loke nos ta hasi, asta ora nos ta nos so. (Pro. 3:6; Ekl. 12:​13, 14) Ta importante pa nos purba di obedesé Yehova asta den kosnan ku no ta parse dje importante ei. Ora nos hasi asina, nos ta demostrá Yehova ku nos ègt stim’é i di e  manera ei nos ta gana su kariño.—Huan 14:23; 1 Huan 5:3.

6. Segun Hebreonan 6:​10-12, kiko ta mas importante ku e bon kosnan ku nos a hasi den pasado pa Yehova?

⁶ Yehova ta apresiá mashá tur loke nos a hasi p’e den pasado. Sinembargo, djis pasó nos a hasi bon kosnan den pasado no ke men ku outomátikamente nos lo keda den Yehova su tènt. Hebreonan 6:​10-12 ta laga nos mira esei bon kla. (Les’é.) Aunke Yehova lo no lubidá e bon kosnan ku nos a hasi, e ke pa nos sigui dun’é lo mihó di nos “te na fin.” Anto “si nos no kansa,” lo e rekompensá nos ku su amistat pa semper.—Gal. 6:9.

PAPIA BÈRDAT DEN BO KURASON

7. Ki ke men papia bèrdat den nos kurason?

⁷ Hende ku Yehova invitá na su tènt ta “papia bèrdat den [nan] kurason.” (Sal. 15:2) Esaki ta enserá mas ku no gaña. Yehova ke pa nos ta sinsero i onesto den tur kos. (Heb. 13:18) Esei ta importante “pasobra Yehova ta detestá hende astuto. E tin amistat será ku hende rekto.”—Pro. 3:32.

8. Ki kondukta nos tin ku evitá?

⁸ Un hende astuto no ta ‘papia bèrdat den su kurason’; e tin dos kara. E ta fingi di obedesé Yehova su leinan anto despues ta desobedesé nan den sekreto. (Isa. 29:13) Ta klaru ku nos ke evitá e tipo di kondukta ei. Pero, kon un hende por kai den e trampa ei? Kisas e ta kuminsá pensa ku no ta semper tur Yehova su leinan ta bon. (Sant. 1:​5-8) E por desobedesé e leinan ei den kosnan ku p’e no ta dje importante ei. Anto ora e mira ku nada malu no ta pasa ora e desobedesé, kisas e por kuminsá hasi kosnan ku ta asta mas pió. Segun e, e ta sirbiendo Yehova, pero Yehova no ta aseptá su adorashon. (Ekl. 8:11) Nos no ke ta manera un hende asina; nos ke ta onesto den tur kos.

9. Kiko Hesus a bisa Natanael e promé biaha ku el a top’é, i kiko esei ta siña nos? (Wak e plachi.)

 ⁹ Ta masha importante pa nos ta hendenan ku ta ‘papia bèrdat den nos kurason.’ Nos por mira esei for di loke a pasa ora Felipe a hiba su amigu Natanael pa topa ku Hesus. Aunke Hesus nunka a mira Natanael promé, el a bisa: “Ata un israelita den ken sigur no tin engaño.” (Huan 1:47) Sin duda Hesus no tabata ke men ku su otro disipelnan no tabata onesto, pero Natanael tabatin un sinseridat ekstraordinario. Natanael tabata imperfekto meskos ku nos. Pero e tabata un hòmber franko; di un palabra; e tabatin un kara. Hesus a balorá esei mashá i a elogi’é pa esei. Klaru ku nos tur ke pa Hesus bisa asina tambe di nos!

10. Dikon nos tin ku paga tinu ku loke nos ta papia? (Santiago 1:26)

¹⁰ Mayoria di e rekisitonan menshoná den Salmo 15 tin di haber ku e manera ku nos ta trata otro. Salmo 15:3 ta bisa ku un hende ku Yehova invitá den su tènt “no ta papia malu di otro hende; e no ta hasi daño na su próhimo ni e no ta daña nòmber di su amigunan.” Ora nos usa nos lenga pa papia malu di otro hende, e daño ku nos ta hasi ta inimaginabel, anto pió ainda, Yehova por saka nos for di Su tènt.—Lesa Santiago 1:26.

11. Kiko por pasa ku un persona ku ta papia malu di otro hende i no ke arepentí?

¹¹ E salmista ta menshoná spesífikamente persona ku ta papia malu di otro hende. Un persona asina ke daña nòmber di otro hende i p’esei ta gaña kos riba dje. Un persona ku ta hasi esei i ku no ke arepentí, no por keda un Testigu di Yehova i lo ser ekspulsá for di e kongregashon.—Yer. 17:10.

12-13. Ki ora nos por daña nòmber di nos amigunan sin ku nos ke? (Wak e plachi.)

 ¹² Salmo 15:3 tambe ta kòrda nos ku un huéspet di Yehova “no ta hasi daño na su próhimo ni e no ta daña nòmber di su amigunan.” Kiko esei ta enserá?

¹³ Sin ku nos ke nos por daña nòmber di un hende dor di bisa kosnan negativo tokante dje. Por ehèmpel, ban bisa nos a tende ku (1) un ruman muhé a stòp di traha pionero, (2) un pareha kasá no ta na Bètel mas òf (3) un ruman no ta ansiano òf sirbidó ministerial mas. Awor, lo ta bon pa spekulá ta kon bin esei a sosodé i despues papi’é ku otro hende? Muy probablemente nos no sa kiko a hiba na e kambio. Ademas, un huéspet den Yehova su tènt “no ta hasi daño na su próhimo ni e no ta daña nòmber di su amigunan.”

ONRA HENDE KU TIN RÈSPÈT PROFUNDO PA YEHOVA

14. Kiko ke men “rechasá tur hende malbado”?

¹⁴ Salmo 15:4 ta bisa ku un amigu di Yehova “ta rechasá tur hende malbado.” Kon nos por sa si un hende ta malbado? A base di nos propio opinion, nos no ta kapas pa determiná si un hende ta malbado òf nò. Dikon? Pasó komo ku nos ta imperfekto, hopi biaha nos gusta i ta pega na hende ku tin mesun personalidat ku nos i ta haña ku ta difísil pa anda ku hende ku nos ta sinti ku nos sanger no ta bai ku nan. Pero eigenlijk e úniko hendenan ku nos tin ku rechasá ta esnan ku Yehova ta haña ta “malbado.” (1 Kor. 5:11) Esei ta enserá hende ku ta praktiká loke ta malu i no ke arepentí, ku ta hasi chèrchi di nos fe i kreensia òf ku ta purba di kibra nos amistat ku Yehova.—Pro. 13:20.

15. Den ki manera nos por “onra hende ku tin rèspèt profundo pa Yehova”?

¹⁵ E siguiente kos ku Salmo 15:4 ta pidi nos ta pa “onra hende ku tin rèspèt profundo pa Yehova.” P’esei nos ta buska manera pa mustra bondat i rèspèt na Yehova su amigunan. (Rom. 12:10) Kon ta un manera ku nos por hasi esei? Salmo 15:4 ta bisa ku un huéspet den Yehova su tènt “ta kumpli ku su promesa, asta ora esei no ta kumbinié.” Si nos no kumpli ku nos promesa esei por hasi otro hende daño. (Mat. 5:37) Por ehèmpel, Yehova ta ferwagt pa nos kumpli ku loke nos a primintí dia nos a kasa. Tambe e ta keda kontentu ora mayornan ta hasi nan esfuerso pa kumpli ku loke nan a primintí nan yunan. Nos amor pa Dios i pa nos próhimo lo pone ku nos lo hasi tur nos esfuerso pa kumpli ku nos palabra.

16. Ki ta un otro manera pa onra Yehova su amigunan?

¹⁶ Un otro manera pa onra Yehova su amigunan ta ora nos ta hospitalario i generoso. (Rom. 12:13) Ora nos pasa nos tempu liber ku nos rumannan, esei ta yuda fortalesé nos amistat ku nan i ku Yehova. Anto ora nos ta hospitalario, nos ta imitá Yehova.

NO STIMA PLAKA

17. Dikon Salmo 15 ta papia tokante plaka?

¹⁷ Salmo 15:5 ta bisa ku un huéspet di Yehova “no ta fia hende sèn ku interes, ni e no ta aseptá plaka pasá bou di mesa pa akusá hende inosente.” Dikon ta papia tokante plaka den e salmo kòrtiku  akí? Pasó si nos stima plaka, nos por dun’é mas importansia ku hende i Yehova. (1 Tim. 6:10) Den tempu di Beibel, tabatin algun ku a probechá di nan rumannan pober kobrando interes riba fiansa. Anto algun hues tabata tuma plaka bou di mesa pa kondená hende inosente. Yehova tin rabia riba e kosnan ei.—Eze. 22:12.

18. Ki nos por puntra nos mes pa wak kon nos ta mira plaka? (Hebreonan 13:5)

¹⁸ Ta bon pa nos analisá kon nos ta mira plaka. Puntra bo mes: ‘Henter ora mi ta soña òf pensa tokante plaka i loke mi ke kumpra kuné? Si un hende fia mi sèn, mi ta tarda pa paga bèk, pensando ku e fiadó no mester dje sèn? Plaka ta laga mi sinti mi masha kos? Ta duru pa mi ta generoso? Mi ta pensa ku rumannan ku tin sèn ta materialista? Mi tin amistat ku hende ku tin sèn so i no ta wòri ku sobrá hende?’ Ta importante pa nos hasi nos mes e preguntanan ei pasó nan lo yuda nos pa no pèrdè e privilegio di ta huéspet den Yehova su tènt. Anto e ora ei, Yehova hamas lo bandoná nos!—Lesa Hebreonan 13:5.

YEHOVA STIMA SU AMIGUNAN

19. Dikon Yehova a duna nos e rekisitonan na Salmo 15?

¹⁹ Salmo 15 ta kaba ku e promesa akí: “Un persona asina hamas lo tambaliá.” (Sal. 15:5) Ku e palabranan ei, e salmista ta laga nos sa pa ki motibu Yehova ta duna nos tur e rekisitonan ei: Yehova ke pa nos ta felis. Anto ora nos hasi loke Yehova pidi nos, nos bida lo bai mihó i lo e protehá nos.—Isa. 48:17.

20. Kiko Yehova su huéspetnan ta spera?

²⁰ Yehova su huéspetnan por spera un futuro briante. Esnan ku ta ungí lo biba den shelu unda Hesus a prepará “masha hopi lugá” di biba pa nan. (Huan 14:2) Esnan ku tin speransa pa biba aki riba tera ta warda riba kumplimentu di e promesanan na Revelashon 21:3. Ta un gran onor ku Yehova a invitá nos pa bira su amigu i pa keda den su tènt pa semper.