24. ARTIKJEL FA DAUT STUDIUM
LEET 24 Komt no Jehowa sienen Boajch
Woo kjenn wie fa emma Jehowa siene Jast bliewen?
“HAR, wäa kaun en dienen Tempel [ooda Zelt] nenkomen?”(PSA. 15:1)
OM WAUT DAUT JEIT
Woo wie Jehowa siene Frind bliewen kjennen un woo wie dän siene Frind behaundlen sellen.
1. Woo kaun Psalm 15:1-5 ons halpen?
EN DÄN väajen Artikjel lieed wie, daut dee, waut Jehowa hanjejäft sent un siene goode Frind sent, en sien bilteljet Zelt kjennen Jast sennen. Oba woo kjenn wie met Jehowa goode Frind woaren? Psalm 15 haft goode Lieren, waut ons halpen, Jehowa noda to komen (läs Psalm 15:1-5).
2. Wuarom räd David woomäajlich von Jehowa sien Zelt?
2 Psalm 15 fangt soo aus dit aun: “HAR, wäa kaun en dienen Tempel [ooda Zelt] nenkomen? Wäa woat opp dienen heiljen Boajch wonen?” (Psa. 15:1). Aus de Psalmenschriewa von Jehowa sienen “Tempel”, ooda Zelt räd, docht hee woomäajlich aun daut Aunbädungszelt, waut fa eene Tiet en Gibeon wia. David räd uk von Gott sienen “heiljen Boajch”, wua hee woomäajlich aun dän Zionsboajch en Jerusalem docht. Dis Zionsboajch wia miere Kilomeeta auf em Sieden von Gibeon. Doa stald David een Zelt opp, wua de Bundeskjist bennen sennen kunn, bat de Tempel foadich wia (2. Sam. 6:17).
3. Wuarom well wie Psalm 15 goot vestonen? (See uk daut Bilt.)
3 De mieeschte Israeliten hauden kjeenmol de Jeläajenheit, bie daut Aunbädungszelt to deenen un jeneiw aul nich, doa nenntogonen, wua de Bundeskjist bennen wia. Oba aule von Jehowa siene true Deena kjennen en sien bilteljet Zelt Jast sennen, wan dee siene Frind woaren un uk bliewen. Well daut nich jieda eena doonen? En Psalm 15 woat jesajcht, waut wie doonen motten, daut wie kjennen Jehowa siene Frind bliewen.
De Israeliten to David siene Tiet kunnen sikj daut goot väastalen, waut doamet jemeent wia, en Jehowa sien Zelt Jast to sennen (See Varsch 3)
LÄW OPPRECHTICH UN DOO DAUT RAJCHTE
4. Woo weet wie, daut Jehowa nich bloos well, daut wie ons deepen loten? (Jesaja 48:1).
4 Psalm 15:2 sajcht, daut een Frint von Gott “opprechtich läft un deit waut rajcht es”. Dit mott eena emma doonen. Oba kaun eena werkjlich opprechtich läwen? Jo. Wan eena soo väl aus mäajlich deit, om Jehowa to jehorchen, dan sitt hee daut doafäa aun, daut eena “opprechtich läft”, wan eena uk onvolkomen es. Dauts mau de Aunfank, wan eena sikj Gott hanjeft un deepen lat. Hast du daut biejlikj jewist, daut een Mensch en de Bibeltiet nich kunn bie Jehowa Jast sennen, bloos wiels dee een Israelit wia? Eenje roopten am aun, “oba nich en eenen woarhauftjen un rechtjen Senn” (läs Jesaja 48:1). Soone Israeliten, waut bie Jehowa wullen Jast sennen, musten mea doaräwa lieren, waut hee von äant velangd un daut uk nokomen. Vondoag dän Dach es daut krakjt soo: Wäa doa well een gooda Frint met Gott sennen, mott mea doonen, aus bloos sikj deepen loten un eent von Jehowa siene Zeijen sennen. Dee mott wieda daut doonen, “waut rajcht es”. Wauts doa aules met en?
5. Waut bediet daut, Jehowa en aules jehuarsom to sennen?
5 Wäa doa well ver Jehowa “opprechtich” läwen un daut doonen, “waut rajcht es”, mott mea doonen, aus bloos no de Vesaumlunk foaren (1. Sam. 15:22). Wie motten ons sea aunstrenjen, Gott en aule Stekjen to jehorchen, mau rajcht wan ons kjeena sitt (Spr. 3:6; Liera 12:13-14). Dauts needich, daut wie proowen, Jehowa soogoa en kjliene Sachen jehuarsom to sennen. Soo wies wie, daut wie am werkjlich leewen, un daut brinjt am bat doa, ons noch dolla to leewen (Joh. 14:23; 1. Joh. 5:3).
6. Waut es no Hebräa 6:10-12 no noch wichtja, aus aul daut Goode, waut wie aul jedonen haben?
6 Jehowa räakjent daut sea väl, waut wie aul fa am jedonen haben. Oba daut bediet nich, daut wie bie Jehowa woaren Jast bliewen, bloos wäajen wie Goodet jedonen haben. Daut kjenn wie en Hebräa 6:10-12 läsen (läs). Jehowa vejat aul daut Goode nich, waut wie jedonen haben. Oba hee well, daut wie am wieda von gaunzen Hoaten deenen un “bat aum Enj doabie bliewen”. Hee woat fa de gaunze Eewichkjeit ons Frint sennen, wan wie nich oppjäwen (Gal. 6:9).
RÄD VON HOATEN DE WOARHEIT
7. Waut es doa met en, von Hoaten de Woarheit to räden?
7 Wäa doa well Jast sennen en Jehowa sien Zelt, mott “von Hoaten de Woarheit” räden (Psa. 15:2). Doa es mea met en, aus bloos nich to lieejen. Jehowa well, daut wie gaunz un goa opprechtich sent (Heb. 13:18, NW). Dauts wichtich, wiels Jehowa es daut “oppscheislich waut de vekjieede [ooda hinjalestje] Menschen doonen, oba de HAR es de jerajchte sea noaun” (Spr. 3:32).
8. Waut well wie nich doonen?
8 Eena, waut “von Hoaten de Woarheit rät”, woat nich bloos ver aundre Gott siene Jebooten hoolen, un wan am kjeena sitt, dan Schlajchtet doonen (Jes. 29:13). Dee es nich hinjalestich. Een hinjalestja Mensch denkjt veleicht, daut Jehowa siene Jebooten nich emma de baste sent (Jak. 1:5-8). Veleicht woat dee Jehowa en soone Sachen ojjehuarsom sennen, waut hee nich fa wichtich talt. Un wan daut soo lat, daut doa nuscht Schlajchtet bie rut kjemt, wan hee ojjehuarsom es, fangt hee veleicht aun, schlemret to doonen, un sien Gottesdeenst wudd dan een Jeheichel sennen (Liera 8:11). Doawäajen well wie en aules opprechtich sennen.
9. Waut lia wie doavon, aus Jesus Natanael toom ieeschte Mol sach? (See uk daut Bilt.)
9 Dauts sea wichtich, daut wie von Hoaten de Woarheit räden. Dauts doaraun to seenen, waut doa passieed, aus Filippus sienen Frint Natanael no Jesus brocht. Wan Jesus Natanael uk noch kjeenmol ea jeseenen haud, säd hee: “Kjikjt, dauts werkjlich een Israelit, en dän nuscht Onopprechtjet es” (Joh. 1:47). Jesus wist, daut siene aundre Apostel uk opprechtich wieren, oba Natanael wia besonda opprechtich. Natanael wia krakjt soo onvolkomen aus wie, oba hee wia en aules opprechtich un deed daut nich bloos väajäwen. Jesus bewundat daut sea un lowd Natanael doafäa. Wudd daut nich eene Iea sennen, wan Jesus dautselwje von ons säd?
Aus Jesus Natanael daut ieeschte Mol sach, säd hee von am, daut hee besonda opprechtich wia. Wudd hee dautselwje von ons sajen kjennen? (See Varsch 9)
10. Wuarom mott wie väasechtich sennen, waut wie räden? (Jakobus 1:26).
10 En Psalm 15 rät daut daut mieeschte doavon, woo wie aundre behaundlen sellen. Psalm 15:3 sajcht, daut eena, waut en Jehowa sien Zelt Jast es, von “aundre nich schlajchtet norät un sienen Noba nich orrajcht behaundelt, un sienen näakjsten nich schlajchtet norät”. Wäa von eenen aundren Schlajchtet norät, kaun dän sea toosaten un wudd nich mea kjennen Jast sennen en Jehowa sien Zelt (läs Jakobus 1:26).
11. Waut woat met soonen jedonen, waut aundre eenen schlajchten Nomen moakt un nich een Leetsennen haft?
11 De Psalmenschriewa rät uzhent von eenen, waut äwa aundre schlajcht rät toom dee eenen schlajchten Nomen moaken. Wäa met Fliet soont deit un nich een Leetsennen haft, kaun nich mea Poat von de Vesaumlunk sennen (Jer. 17:10).
12-13. En waut vonne Loagen wudd wie kjennen onse Frind eenen schlajchten Nomen moaken, onen daut to wellen? (See uk daut Bilt.)
12 Psalm 15:3 halpt ons denkjen, daut dee, waut en Jehowa sien Zelt Jast sent, dän Näakjsten nich schlajcht behaundlen un äare Frind nich eenen schlajchten Nomen moaken. Woo wudd wie kjennen onse Frind eenen schlajchten Nomen moaken?
13 Wan wie von wäm waut Schlajchtet novetalen, kjenn wie dän eenen schlajchten Nomen moaken, onen daut wie daut soo wellen. Toom Biespel: (1) wan eene Sesta opphieet met Pionia sennen, (2) wan een Ehepoa nich mea em Betel deent ooda (3) wan een Brooda nich mea een Deenstaumthelpa ooda Eltesta es. Wudd daut rajcht sennen, sikj waut dietlich to moaken, wuarom daut soo es un dan aundre doavon to vetalen? Doa sent veleicht väl Jrind, wuarom eene Endrunk needich wia, wua wie nich omweeten. Eena, waut bie Jehowa sien Zelt Jast es, es eena, dee “sienen Noba nich orrajcht behaundelt, un sienen näakjsten nich schlajchtet norät”.
Dauts sea leicht, von aundre waut notovetalen, waut dee kaun eenen schlajchten Nomen moaken (See Varsch 12-13)
IEA DEE, WAUT JEHOWA DEENEN
14. Wäa sent dee, “dee Gott nich aunnämen”?
14 Psalm 15:4 sajcht, daut eena, waut Jehowa sien Frint es, “dee veacht, dee Gott nich aunnämen”. Woo weet wie, aus doa wäa Gott nich aunnemt? Aus onvolkomne Menschen kjenn wie nich bloos doano entscheiden, woo wie denkjen ooda waut wie jleichen. Es daut nich eenjemol soo, daut wie ons no eenje Menschen hanjetrocken feelen wäajen daut, woo dee daut haben, un bie aundre wada nich? Doawäajen sell wie bloos dee aufwiesen, dee Jehowa nich aunnemt (1. Kor. 5:11). Doa sent uk dee met en, waut emma wada Schlajchtet doonen un nich een Leetsennen haben, onsen Gloowen veachten un ons proowen, em Jeisteljen rauftobrinjen (Spr. 13:20).
15. Waut es eene Wajch, woo wie “de Gottesferchtje” ieren kjennen?
15 Daut Näakjste sajcht Psalm 15:4: Ieet “de Gottesferchtje”. Doawäajen kjikj wie emma no Jeläajenheiten, woo wie Jehowa siene Frind Leew un Respakjt wiesen kjennen (Reem. 12:10). Woo kjenn wie daut doonen? Eene Wajch es en Psalm 15:4: Dee, wäa en Jehowa siene Zelt Jast es, “helt waut hee jeschwuaren haft, eendoont waut daut kost”. Wan wie ons nich aun een Vespräakjen hoolen, woa wie aundre sea schoden (Mat. 5:37). Jehowa velangt biejlikj von siene Jast, daut dee sikj aun äa Ehevespräakjen hoolen. Hee freit sikj uk, wan de Elren sikj aun äa Vespräakjen hoolen, waut see met äare Kjinja moaken. Wäajen wie Gott un onsen Näakjsten leewen, woa wie emma proowen, ons Wuat to hoolen.
16. Woont es noch eene aundre Wajch, woo wie Jehowa siene Frind ieren kjennen?
16 Wie kjennen Jehowa siene Frind noch opp eene aundre Wajch ieren, wan wie oppnäment un friejäwrich sent (Reem. 12:13). Wan wie met onse Breeda un Sestren toop Tietvedrief haben, woa wie met dee jratre Frind un uk met Jehowa. Un dan uk noch, wan wie oppnäment sent, doo wie daut soo aus Jehowa.
SIE NICH HUNGRICH NO JELT
17. Wuarom rät daut en Psalm 15 von daut Jelt?
17 Wäa bie Jehowa Jast es, es eena, dee “sien Jelt onen Entras utliet, un wäa sikj nich beschenkjen lat de oschuldje to beschuljen” (Psa. 15:5). Wuarom rät daut en disen korten Psalm von Jelt? Wiels wan eena nich rajcht äwa daut Jelt denkjt, kaun eena aundre schoden un veleicht uk nich mea Frind sennen met Jehowa (1. Tim. 6:10). Enne Bibeltiet behaundelden eenje äare oame Breeda ojjerajcht, wäajen see dee Entras auffodren deeden, wan see dee Jelt lieden. Un eenje Rechtasch leeten sikj bekjeepen, om de Oschuldje to beschuljen. Soont aus dit haust Jehowa sea (Hes. 22:12).
18. Waut vonne Froagen kjennen ons halpen to weeten, woo wie äwa daut Jelt denkjen? (Hebräa 13:5).
18 Wie sellen daut unjasieekjen, woo wie äwa daut Jelt denkjen. Wie kjennen mol nodenkjen: “Woa ekj foaken en, daut ekj äwa Jelt denkj un waut ekj doamet kjeepen kaun? Wan ekj mie Jelt lieen doo, lot ekj daut dan lang dieren, ea ekj daut trigjtol, wäajen ekj denkj, daut dänjanjen daut aulmols nich doaraun fält? Denkj ekj, daut ekj bäta sie aus aundre, wan ekj Jelt hab? Es mie daut schwoa, friejäwrich to sennen? Denkj ekj, daut eenje Breeda un Sestren nom Tieteljen hinjaraun sent, bloos wiels dee goot Jelt haben? Proow ekj, met dee Frind to woaren, waut rikj sent un met dee, waut oam sent oba nich?” Wie haben de Iea jekjräajen, bie Jehowa Jast to sennen, oba wie kjennen daut bloos bliewen, wan wie nich nom Jelt hinjaraun sent. Dan woat Jehowa ons kjeenmol veloten! (läs Hebräa 13:5).
JEHOWA LEEFT SIENE FRIND
19. Wuarom well Jehowa, daut wie aul daut doonen, wua Psalm 15 von rät?
19 Tolatst rät Psalm 15 von dit Vespräakjen: “Wäa soo läft, steit opp emma opp secharem Grunt” (Psa. 15:5). Hia sajcht de Psalmenschriewa, waut de wichtichste Uasoak es, daut to doonen, waut Jehowa von ons haben well. Jehowa well, daut wie schaftich sent. Wan wie daut doonen, waut hee ons sajcht, dan woat hee ons säajnen un beschitzen (Jes. 48:17).
20. To waut kjennen Jehowa siene Jast sikj freien?
20 Jehowa siene Jast kjennen sikj to eene wundascheene Hopninj freien. De Jesaulwde woaren em Himmel nennkomen, wua Jesus “väl Woninjen” fa äant reedjemoakt haft (Joh. 14:2). Un dee, waut de Hopninj haben, hia oppe Ieed to läwen, freien sikj to daut, waut Openboarunk 21:3 vesprakjt. Dauts eene groote Iea, daut Jehowa ons enjelot haft, fa aule Eewichkjeit en sien Zelt Jast to sennen!
LEET 39 Sikj eenen gooden Nomen bie Gott moaken
