1. Mu luholo lutshi mukanda wa Ngimbo mukhapho 15:1-5 uza gutukuatesa?

 MU LONGO diabalega tuamonele egi, athu adihanele gudi Yehowa nu ana kuata n’enji ufuta wakola ajiya gubua ngenji mu tenta yenji ya gifuanesa. Uvi itshi tudi naye gutshita ha gubua mafuta enji? Mukanda wa Ngimbo 15 udi muzuelela ndaga yene. (Tanga Ngimbo 15:1-5.) Uza gutukuatesa ha gujiya ndaga tudi naye gutshita ha gubua mafuta akola a Nzambi.

2. Yajiya gukhala egi ndaga itshi yatumine Davidi ha guzuelela tenta ya Yehowa?

² Mukanda wa Ngimbo mukhapho 15 udi musendesa nu mihu eyi: ‘O Yehowa nanyi wajiya gutamega mu tenta yaye, nanyi wajiya gukhala gu mulundu waye wagijila?’ (Ngi. 15:1) Yajiya gukhala egi ‘tenta’ ya Yehowa Davidi udi muzuelela mu verse eyi, idi inzo ya tenta inyi yakhalele gu Gibeona mu tangua diene. Davidi watangele nji mulundu ‘wagijila’ wa Nzambi, yajiya gukhala egi wakhalele muzuelela mulundu wa Siona gu Yelusalema. Mulundu wene wakhalele gualeha gu sud ya dimbo dia Gibeona; guene Davidi watungile tenta ha guhaga mushete wa gikotelo, mushete wene walanduile gukhala mu tenta yene uu nu tangua tempelo yatungiwe. Fundo diene diakhalele.​—2 Sam. 6:17.

3. Mukunda natshi tudi naye gukamba gukotelesa ndaga jidi mu Ngimbo 15? (Tala nji gifuanesa.)

³ Idi yadiago egi enya Isalele avula ahetelego luendu lua gukalagala mudimo mu inzo ya tenta, phamba athu azonda nji akhalele mungina mukatshi dia tenta fundo diakhalele mubambewa mushete wa gikotelo. Uvi akombeledi agasue a Yehowa akhalele gumuzumba nu gukuata n’enji ufuta, akhalele nu luendu lua gukhala ngenji mu tenta yenji ya gifuanesa. Mukut’etu agasue tuana tshigina gutshita ngenyi. Ngimbo mukhapho 15, idi mumonesa  ndaga tudi naye gutshita ha gulandula gukhala mafuta a Yehowa.

KHALA YAGUJINGINYINA NU KALAGALA NDAGA JIABONGA

4. Luholo lutshi tudi mujiya egi Yehowa ganago gututoga phamba ha gubatijiwa? (Yeshaya 48:1)

⁴ Mukanda wa Ngimbo 15:2 udi mumonesa egi futa dia Nzambi udi naye gukhala ‘muthu wa gujinginyina, munu wana kalagala ndaga jiabonga.’ Mukut’etu agasue tudi naye gulandula gutshita ndaga eji. Uvi tuajiya diago gukhala ‘yagujinginyina’ gudi Yehowa ba? Ayi. Mu luholo lutshi? Ngatshima gushigo nga muthu udi watagana, uvi gula tudi mutshita ngolo ha gutumagela Yehowa, mbawututadila gifua athu a ‘gujinginyina’ gu meso enji. Tangua tuana gudihana gudi Yehowa nu tuana batijiwa, yana khala gisendeselo gia ufuta wetu n’enji. Ha gufezegesa, mu tangua dikulu gula muthu udi muenya Isalele yakhalelego mumonesa egi udi ngenji ya Yehowa. Athu ako akhalele gudiloga mu jina dia Yehowa uvi akhalelego guyitshita mu ‘giamatshidia nu mu luholo luabonga.’ (Tanga Yeshaya 48:1.) Uvi enya Isalele anyi akhalele mutshigina gukhala ngenji mu tenta ya Yehowa, akhalele naye gujiya mikhuala yenji nu guyitumagela. Mangino nji ha gukhala nu ufuta wakola nu Yehowa, tushigo naye phamba gusuga ha gubatijiwa nu gutamegewa egi Matemue a Yehowa uvi gudi nu ndaga jiko tudi naye gutshita. Tudi naye gulandula ‘gukalagala ndaga jiabonga.’ Luholo lutshi tuajiya gukalagala ndaga jiene?

5. Gutumagela Yehowa mu ndaga jiagasue gudi mukotelesa itshi?

⁵ Gumeso a Yehowa, gukhala ‘yagujinginyina’ nu ‘gukalagala ndaga jiabonga’ gudi nu ndando yavula gubalega guya mu gudibungisa phoso nu phoso. (1 Sam. 15:22) Tudi naye gutshita ngolo ha gutumagela Yehowa mu ndaga jiagasue jia monyo wetu, ikhale tangua tudi esue hakhetu. (Ish. 3:6; Mulo. 12:13, 14) Idi diago nu ndando ha gutumagela Yehowa  ikhale mu ndaga jiazonda-zonda. Gula tuatshita ngenyi mbatumonesa diago egi tuana gumuzumba, muene nji mbawutuzumba muavula gubalega.​—Yone 14:23; 1 Yone 5:3.

6. Ha gutadila Hebelu 6:10-12, ndaga itshi idi nu ndando gu meso a Yehowa gubalega ndaga jiagasue tuakalegele mu masugu abalega?

⁶ Yehowa wana suanguluga diago nu ndaga tuakalegele mu masugu abalega. Uvi tuajiyilego gulandula gukhala ngenji mu tenta yenji phamba mukunda nu ndaga jiene. Mukanda wa Hebelu 6:10-12 udi mumonesa ndaga yene haphelo. (Tanga.) Yehowa ganago gujimbila ndaga jiabonga tuakalegele mu masugu abalega. Uvi wana tshigina egi tulandule gumukalegela nu mutshima umoshi “uu nu gu gisugishilo.” Mbawukhala futa dietu mayilago “gula tualebelego muila.”​—Gal. 6:9.

KHALA MUZUELA GIAMATSHIDIA

7. Guzuela giamatshidia gudi mukotelesa itshi?

⁷ Muthu wagasue udi mutshigina gukhala ngenji mu tenta ya Yehowa udi naye ‘guzuela giamatshidia.’ (Ngi. 15:2) Yakotelesa egi tudi naye gutuna gumba mambo nu gukalagala ndaga jiko. Yehowa wana tshigina egi tuzuele nu tukalagale ndaga nu giamatshidia giagasue. (Heb. 13:18) Idi nu ndando ha guzuela giamatshidia handaga ‘Yehowa ganago gutshigina muenya mambo uvi wana kuata ufuta wakola nu athu ana tshita ndaga jiabonga.’​—Ish. 3:32.

8. Khadilo ditshi tudi naye gutuna?

⁸ Athu ana ‘zuela giamatshidia’ ana tumagela Nzambi tangua adi nu athu ako nga tangua adi hakhawo. (Yesh. 29:13) Ana tuna gukalagala ndaga jiabola mu gisuegi. Muthu udi musuega umuthu wenji wana sendesa gusha giphapha egi mikhuala iko ya Yehowa ishigo yabonga. (Yak. 1:5-8) Muthu muene wajiya gutuna gutumagela Yehowa mu ndaga jidi mumona muene gifua jishigo diago nu ndando. Gula malamba amubuidilego hadi muene mushiya mikhuala ya Yehowa, wajiya gusendesa gutshita ndaga jiabola diago. Ngenyi Yehowa mbagashigo mutshigina isambu yenji. (Mulo. 8:11) Hene tudi naye guzuela giamatshidia mu ndaga jiagasue.

9. Malongo atshi tuajiya guzula mu ndaga jiazuelele Yesu hataganele muene nu Natanaele mbala ya thomo? (Tala nji gifuanesa.)

⁹ Tuajiya guheta malongo ajiya gutukuatesa ha zuela giamatshidia mu ndaga Yesu wawambelele  Natanaele tangua adimonele n’enji mbala ya thomo. Tangua Filipho wayile nu futa dienji Natanaele ha gudimona nu Yesu, gudi nu ndaga imoshi yakalegewe guene. Yesu wakhalele khenji adimonelego nu Natanaele, uvi Yesu wazuelele egi: “Talenu muenya Isalele wa giamatshidia, muene gashigo nu mambo.” (Yone 1:47) Yesu wakhalele mujiya egi alandudi enji ako akhalele muzuela giamatshia uvi Natanaele wazuelele giamatshidia mu luholo lua gushimana. Nathanaele gakhalelego muthu watagana gifua esue. Uvi wakhalele muzuela giamatshidia mu ndaga jiagasue. Yesu wasuangulugile nu wamushimanele muavula mukunda nu ndaga jiene. Mukut’etu agasue tuana tshigina egi Yesu adivue nji ngenyi mukunda nu esue!

10. Mukunda natshi tudi naye gumonesa gutema mu ndaga tudi muzuela? (Yakoba 1:26)

¹⁰ Ndaga jiavula jidi mu mukanda Ngimbo 15 jidi mumonesa luholo tudi naye gukalegela athu ako ndaga. Ngimbo 15:3 idi muzuela egi muthu wagasue udi ngenji mu tenta ya Yehowa ‘ganago gumuanga mene jia mambo mukunda nu athu ako, ganago gukalegela athu ako ndaga jiabola, gajiyilego nji gufeta mafut’enji.’ Gula tudi mufeta athu ako, yajiya guasagesa, ngenyi tuajiyilego luko gukhala ngenji mu tenta ya Yehowa.​—Tanga Yakoba 1:26.

11. Gumuanga mene jia mambo gudi mukotelesa itshi? Ndaga itshi yajiya gubuila muthu muene gula gashigo mubemba khadilo diene?

¹¹ Thomo muyimbi wa ngimbo watangele muthu wana muanga mene jia mambo. Gumuanga mene jia mambo gudi mukotelesa itshi? Mbala jiavula yana khala guzuela ndaga jia mambo jinyi jiajiya gubolesa lukuma lua muthu muko. Gula muthu udi mumuanga mene jia mambo mukunda nu athu ako nu gashigo mubemba khadilo diene, wajiya guzolewa mu hungu.​—Yel. 17:10.

12-13. Ndaga jitshi jiajiya gututuma ha gufeta athu ako uvi esue gujiya ndo? (Tala nji gifuanesa.)

¹² Ngimbo 15:3 idi nji gutuwunguluisa egi muthu wagasue udi ngenji ya Yehowa ganago  gukalegela athu ako ndaga jiabola, gajiyilego nji gufeta mafut’enji. Luholo lutshi tuajiya gufeta mafut’etu?

¹³ Tuajiya gusendesa gumuanga mene jiabola mukunda nu muthu mumoshi uvi esue gujiya ndo egi tudi gumufeta. Tangiza gale ndaga eyi: 1) phangi mumoshi wa mukhetu wabemba gutshita mudimo wa tangua diagasue, 2) phangi muko wa yala nu mukaji’enji ashigo luko mukalagala mudimo gu Betele, 3) phangi muko wa yala nji gashigo luko mukulu nga mukuateshi wa mudimo. Mbayikhala ndaga yabola gula tudi muwambela athu ako egi aphangi ene akalagala ndaga jiabola hene abembi midimo yene. Yajiya gukhala egi gudi nu ndaga jiavula jiatshitshi egi aphangi ene abembe midimo yene uvi esue tushigo gujijiya. Luko, muthu udi ngenji mu tenta ya Yehowa ‘ganago gukalegela athu ako ndaga jiabola, gajiyilego nji gufeta mafut’enji.’

NEMESA ATHU ANA TUMAGELA YEHOWA

14. Luholo lutshi muthu udi futa dia Yehowa wana tadila ‘muthu wagasue Nzambi wana tuna’? Kotelesa.

¹⁴ Ngimbo 15:4 idi muzuela egi muthu udi futa dia Yehowa ‘wana segulula muthu wagasue Nzambi wana tuna.’ Luholo lutshi tuajiya guyitshita? Luholo tushigo athu a tagana yajiya gukhala lamba ha gujiya gula Nzambi gashigo luko musuanguluga nu muthu mumoshi ngenyi. Mukunda natshi? Handaga tuajiya gusendesa guzumba athu anyi tuana tangiza egi adi nu makalegelo abonga uvi ako ndo handaga ana tshita ndaga jiana gutusagesa. Uvi tudi naye gutuna phamba athu anyi ana kalagala ndaga jinyi Yehowa wana “tuna.” (1 Kol. 5:11) Yakotelesa egi gutuna athu ana kalagala ndaga jiabola uvi ashigo mubalumuna mutshima, athu anago gunemesa gutshigina guetu nga anyi ana kamba gubolesa ufuta wetu nu Yehowa.​—Ish. 13:20.

15. Luholo lutshi tuajiya gumonesa egi tuana nemesa “athu ana tumagela Yehowa”?

¹⁵ Uvi Ngimbo 15:4 idi muzuela egi tudi naye gunemesa ‘athu ana tumagela Yehowa.’ Hene tudi naye gutshita yagasue ha gumonesa gisemo nu ginemua gudi mafuta a Yehowa. (Roma 12:10) Mu luholo lutshi? Ndaga iko ya gutshita idi mu Ngimbo 15:4, verse yene idi mumonesa egi ngenji ya Yehowa ‘wana tagenesa ndaga jiazuelele muene ha gutshita ikhale ndaga jiene jiamubatela malamba.’ Gula tushigo mutagenesa ndaga tuadilogele ha gutshita yajiya gusagesa athu ako. (Mat. 5:37) Ha gufezegesa, Yehowa wana tshigina egi yala nu mukhetu atanegese ndaga adilogele mu lusugu lua ulo wawo. Wana suanguluga nji muavula gula mvuaji jidi mutshita ngolo ha gutagenesa ndaga ana laya an’awo. Guzumba guetu mukunda nu Nzambi nu athu ako guana gututuma ha gutshita ngolo ha gutagenesa ndaga tuaalayele.

16. Ndaga jitshi jiko tuajiya gutshita ha gumonesa egi tudi munemesa mafuta a Yehowa?

¹⁶ Ndaga iko tuajiya gutshita ha gumonesa egi tuana nemesa mafuta a Yehowa, idi gukhala nu khadilo dia guhana nu dia guyamba athu. (Roma 12:13) Gula tudi mubalegesa tangua nu aphangi etu Aklisto tuana kolesa ufuta wetu nu aphangi ene, tuana kolesa nji ufuta wetu nu Yehowa. Luko, tangua tuana mumonesa khadilo dia guyamba ngenji tuana landula gifezegeselo gia Yehowa.

UKHADIGO MUZUMBA MBONGO

17. Mukunda natshi mukanda wa Ngimbo 15 udi muzuelela mbongo?

¹⁷ Ngimbo mukhapho 15:5 idi muzuela egi ngenji ya Yehowa ‘ganago gusomba athu mbongo jienji hagula amuvutudile nu jiko holu, ganago gutshigina gabatshi’a kano ha gufuisa muthu wabonga milonga.’ Mukunda natshi mukhapho owu wa Ngimbo udi muzuelela  mbongo? Handaga gula tudi muzumba mbongo muavula, yajiya gusagesa athu ako nu gubolesa ufuta wetu nu Yehowa. (1 Tim. 6:10) Mu tangua dikulu, athu ako akhalele musomba aphangi’awo akhalele phutu mbongo hagula a avutudile nu jiko holu. Manzuji ako nji akhalele mutshigina gabatshi’a kano ha gufuisa muthu gatshitshilego gubola milonga. Yehowa ganago gusuanguluga nga hazonda nu athu ana tshita ndaga eji.​—Ezek. 22:12.

18. Mihu itshi yajiya gutukuatesa ha gujiya luholo tuana tadila mbongo? (Hebelu 13:5)

¹⁸ Idi ndaga yabonga gula tudi mutangigiza luholo tuana tadila mbongo. Dihule egi: ‘Ngana tangiza mbongo muavula nu ima ngajiya gusumba ba? Gula ngasomba mbongo ngana gujivutula muphushi ba? Nga ndo ngana tangiza egi fumi’a najio gashigo najio funu mu tangua diene ba? Ngana gudivua egi ngabalega athu ako handaga ngudi nu mbongo ba? Nga ndo yakhala lamba gudi ame ha gukhala nu khadilo dia guhana ba? Ngana tangiza egi aphangi ako adi nu ima yavula handaga ana zumba mbongo muavula gubalega Yehowa ba? Ngana kuata ufuta phamba nu athu adi nu mbongo uvi phutu ndo ba?’ Idi nu ndando ha gudihula mihu eyi handaga tudi ngenji jia Yehowa. Gula tushigo muzumba mbongo tuajiya gulandula gukhala ngenji jia Yehowa, ngenyi muene mbagashigo gutubemba nga hazonda!​—Tanga Hebelu 13:5.

YEHOWA WANA ZUMBA MAFUTA ENJI

19. Gubonga gutshi mbatuheta gula tudi mutumagela mikhuala ya Yehowa yagasue?

¹⁹ Ngimbo 15 idi musugisa nu mbimbi eji: “Muthu udi mutshita ndaga eji mbagashigo mu khakhuga.” (Ngi. 15:5) Mu verse eyi muyimbi wa ngimbo udi mumonesa mukunda natshi tudi naye gutumagela mikhuala yagasue ya Nzambi. Idi handaga Yehowa wana tshigina egi tukhale nu gusuanguluga. Hene gula tudi mutumagela Yehowa mbatukhala nu gusuanguluga nu mbawutubamba.​—Yesh. 48:17.

20. Ndaga itshi ngenji jia Yehowa jiana nengenena mu masugu adi muza?

²⁰ Mafuta a Yehowa mbaaheta gubonga mu masugu adi muza. Aklisto ambiwe maji mu nyuma mbaajinga mu “mafundo avula” Yesu walondele mu dilu mukunda ene. (Yone 14:2) Uvi athu adi nu felela dia gujinga ha mavu ana nenga gutagenesewa gua ndaga jidi mu mukanda wa Gumonesa 21:3. Yadiago mukut’etu agasue tuana suanguluga muavula luholo Yehowa watutamegele ha gukhala ngenji mu tenta yenji mayilago!