NKHANI YOPFUNZIRA 24
NYIMBO NA. 24 Bwerani Kuphiri la Yehova
Pitirizani kukhala mulendo wa Yahova mpakana kalekale!
‘Yahova, mbani angakhale mulendo mu tenti yanu?’—SAL. 15:1.
CHOLINGA
Kubvesesa vomwe tingachite kuti tipitirize kukhala shamwali wa Yahova na momwe tingachitire vinthu na azishamwali anango wa Yahova.
1. Ko lemba ya Salimo 15:1-5 ingatithandize tani?
MU NKHANI yapita, tidapfunzira kuti yemwe adzipereka kwa Yahova, angakhale shamwali wake na kungena mu tenti yake. Manje ko tingapitirize tani kukhala mulendo mu tenti ya Yahova? Lemba ya Salimo 15 ilewa va nkhani mweyi. (Werengani Salimo 15:1-5.) Salimo mweyi, ifotokoza vomwe tichadekana kuchita kuti tipitirize kukhala pa ushamwali wolimba na Mulungu.
2. Ko Davide ambaganizira va chani pomwe adalewa va tenti ya Yahova?
2 Pa lemba ya Salimo 15, payamba na mawu yakuti: ‘Yahova, mbani angakhale mulendo mu tenti yanu? Ndipo mbani angakhale mu phiri yanu yopatulika?’ (Sal. 15:1) Pomwe ambayankhula va ‘tenti,’ vingachitike kuti Davide ambaganizira va chihema chomwe chimbakhala ku Gibiyoni pa nthawe mweire. Davide adayankhula pomwe va ‘phiri yopatulika’ ya Mulungu, mosakayika iye ambalewa va phiri ya Ziyoni yomwe yenze ku Yerusalemu. Phiri mweyi yenze pa nsenga wa makilometro yanganani ku sul kwa Gibiyoni. Kumoku Davide wenze adakonzako chihema kuti asungire likasa ya mbverano kufikira pa nthawe chaiyo pomwe malo yosungira likasa mweyi yadakonzewa.—2 Sam. 6:17.
3. Ko ndawa chani ni vodekana kubvesesa vomwe lemba ya Salimo 15 ichalewa? (Onani pomwe foto.)
3 Ni shuwadi kuti azinji mwa Aizirayeli ambatumikiralini pa chihema ndipo ne ambangenalini nkati mwa chihema momwe mweze likasa yambverano. Koma atumiki ose okhulupirika wa Yahova angakwanise kukhala mu tenti yake yophimphirisa. Iwo angachite vimwevi mwa kupitiriza kukhala azishamwali wa Yahova. Vimwevi ndivo vomwe tose tinkufuna. Lemba ya Salimo 15, ifotokoza va makhalidwe yomwe tichadekana kukulisa na kuyaonesa kuti tipitirize kukhala azishamwali wa Yahova.
Kwa Aizirayeli omwe ambakhala mu nthawe ya Davide, venze vosashupa kubvesa kuti kukhala mulendo wa Yahova kutanthauza chani (Onani ndime 3)
FAMBANI MOSAPHONYESA VINTHU NDIPO MUMBACHITE CHILUNGAMO
4. Ko tinkudziwa tani kuti kwa Yahova tinkudekana kuchita vizinji kuingizira pa kubatiziwa? (Yesaya 48:1)
4 Lemba ya Salimo 15:2, inena kuti shamwali wa Mulungu ‘ni ule yemwe afamba mosaphonyesa vinthu ndipo achachita chilungamo.’ Mawu yakuti ‘kufamba’ na ‘kuchita’ yankuonesa kuti tichadekana kupitiriza kuchita vimwevi. Ko tingakwanisedi ‘kufamba mosaphonyesa vinthu’? Inde. Podiya kuti palibe munthu waungwiro, koma kwa Yahova ‘tichafamba mosaphonyesa vinthu’ tikambachita vomwe tingakwanise pa kumubvera. Tikadzipereka kwa Yahova nkubatizika, ndipo pomwe tiyamba kufamba na Mulungu. Koma ganizirani kuti kalekale, kundokhala ntundu wa Aizirayeli vimbachitisalini munthu kuti akhaliretu mulendo wa Yahova. Anango ambalewa kuti ankutumikira Mulungu koma ambachitalini vimwevi ‘kuchokera pasi pa ntima.’ (Werengani Yesaya 48:1.) Aizirayeli omwe ambafuna kukhala alendo kwa Yahova, ambadekana kupfunzira malamulo yomwe Yahova wenze adayaikha na kuyatewedza. Ni chibodzibodzimbo, kuti tikhale obvumizika kwa Yahova ntsiku zino, tichadekana kuchita vizinji osati kundobatizika nkumbalewa kuti ndise Wamboni za Yahova. ‘Tichadekana kupitiriza kuchita vinthu mwa chilungamo.’ Ko vimwevi vinkutanthauza chani?
5. Ko kubvera Yahova pa vinthu vose kutanthauza chani?
5 Pa maso pa Yahova, ‘kufamba mosaphonyesa vinthu’ na ‘kuchita vinthu mwa chilungamo’ vitanthauza vinthu vizinji osati kundoyenda ku misonkhano. (1 Sam. 15:22) Isepano tichadekana kuchita khama kuti timbabvere Yahova mbali zose za moyo wathu kuphatanidzapo tikakhala patekha. (Miy. 3:6; Mla. 12:13, 14) Ni vodekana kuchita khama kuti timbabvere Yahova podiya pa vinthu vomwe vinkuoneka ninge kuti viribe phindu. Tikambachita vimwevi tionesa kuti tichamukondadi Yahova ndipo iye adzatikonde maninge ndawa ya vimwevi.—Yoh. 14:23; 1 Yoh. 5:3.
6. Mobverana na lemba ya Aheberi 6:10-12, ko chodekana ni chani kuingizira pa vinthu vabwino vomwe tidachita kumbuyo?
6 Yahova achalemekeza maninge vomwe isepano tidachita kale kumbuyo. Olo nteno, vinthu vomwe tidachitakale kumbuyo, ndivolini vokha vomwe vingatithandize kuti tikhale alendo mu tenti ya Yahova. Vimwevi vinkufotokozewa bwinobwino pa lemba ya Aheberi 6:10-12. (Werengani.) Ni shuwadi kuti Yahova ayebwalini vinthu vabwino vomwe tidachita kumbuyo. Koma iye ankufuna kuti tipitirize kumutumikira na ntima wose ‘mpakana mapeto.’ Ndipo tidzakwanise kukhala azishamwali wake mpakana kalekale “tikaleka kuneta.”—Agal. 6:9.
MUMBAYANKHULE CHAIVO MU NTIMA MWANU
7. Ko kuyankhula chaivo mu ntima kutanthauza chani?
7 Munthu yemwe ankufuna kukhala mulendo wobvumizika mu tenti ya Yahova, achadekana ‘kuyankhula chaivo mu ntima mwake.’ (Sal. 15:2) Vimwevi vinkutanthauza vizinji osati kundoyankhula chaivo. Kuyingizira pa kukhala owona ntima tikambayankhula, tichadekana kukhala owona ntima pa vose vomwe tichachita. (Aheb. 13:18) Vimwevi ni vodekana maninge, ‘ndawa yakuti Yahova achazonda munthu wachinyengo koma akhala pa ushamwali wolimba na wanthu owona ntima.’—Miy. 3:32.
8. Ko tichadekanalini kuchita chani?
8 Yemwe ‘achayankhula chaivo mu ntima mwake,’ achachitalini vinthu vowonesa kuti achabvera Yahova akakhala pagulu koma akakhala payekha nkumbachita vinthu vomwe vikhumudwisa Yahova. (Yes. 29:13) Kusiyana na vimwevi iye apewa kuchita vinthu mwachinyengo. Munthu wachinyengo angayambe kuganiza kuti ni nthawe zoselini pomwe ni vabwino kutewedza malamulo ya Yahova. (Yak. 1:5-8) Iye angayambe kusabvera Yahova pa vinthu vomwe ni ving’onoving’ono, ndipo akaona kuti palibe chinkuchitika ndawa ya kusabvera kwake, angayambe kuchita vinthu vikuluvikulu. Podiya achiganiza kuti ankutumikira Yahova, utumiki wake ni wosabvumizika kwa Yahova. (Mla. 8:11) Koma isepano tinkufuna kukhala owona ntima pa vinthu vose.
9. Ko nchani chomwe chidachitika pa nthawe yakuyamba pomwe Yesu adadziwana na Natanayeli ndipo tinkupfunzira chani? (Onani pomwe foto.)
9 Tingapfunzire pomwe vizinji va phindu ya kukhala munthu woona ntima pakuwona vomwe Yesu adachita pomwe adadziwana na Natanayeli pa ulendo woyamba. Pomwe Filipo adamudziwikisa shamwali wake Natanayeli kwa Yesu, padachitika chinthu chopasa chidwi maninge. Podiya kuti Yesu ambamudziwalini Natanayeli, iye adanena kuti: “Onani munthu waku Izirayeli shuwa, yemwe mwa iye mulibe chinyengo.” (Yoh. 1:47) Ni shuwadi kuti Yesu ambaona pomwe opfunzira wake anango kuti ni owona ntima, koma Yesu adaona mwa Natanayeli chilungamo chodabwisa. Natanayeli wenzebe ungwiro ninge isepano, koma iye wenze alibe chinyengo ndipo wenze woona ntima pa vinthu vose. Yesu adakomedzewa na vimwevi ndipo adamutembeja ndawa ya vimwevi. Ko munkuonalini kuti ni ulemelero ukulu Yesu achilewa vimwevi kwa isepano?
Filipo adamudziwikisa shamwali wake Natanayeli kwa Yesu, mwamuna wachilungamo chaicho. Ko Yesu angalewembo vimwevi kwa isepano? (Onani ndime 9)
10. Ndawa chani tichadekana kukhala osamala na vomwe tichayankhula? (Yakobo 1:26)
10 Yazinji mwa malangizo yomwe tiyagumana pa Salimo 15, yankulewa va momwe tichachitira vinthu na wanthu anango. Lemba ya Salimo 15:3 inena kuti mulendo wa mu tenti ya Yahova ‘anenalini magunkha, achitiralini vinthu voipa munzake ndipo anyozalini azishamwali wake.’ Peno isepano tichita magunkha nkunamizira munthu munango tingakhumudwise wanthu. Ndawa ya vimwevi Yahova angatibvumelini kuti tikhale alendo wake.—Werengani Yakobo 1:26.
11. Ko magunkha ni chani, ndipo ni chani chomwe chichitikira munthu wa magunkha yemwe alapalini?
11 Davide adafotokoza mobveka bwino nkhani ya magunkha. Ko magunkha ni chani? Ni kuyankhula nkhani ya bodza kulewa va munthu munango vomwe vingaipise mbiri yake. Munthu yemwe achita magunkha panango kunamizira wanthu anango ndipo ne kulapa, angachosewe mumpingu wa Chikhrisitu.—Yer. 17:10.
12-13. Ko ni pa vochitika viponi pomwe mosadziwa tingaipise mbiri ya azishamwali wathu? (Onani pomwe foto.)
12 Lemba ya Salimo 15:3 itikumbusa kuti mulendo wa Yahova achitiralini vinthu voipa wanthu anango, aipisalini mbiri panango kuchitisa manyazi azishamwali wake. Ko vimwevi vinkutanthauza chani?
13 Panango mosazindikira tingayambe kuipisa mbiri ya munthu munango, pakufalisa nkhani zabodza. Ganizirani vochitika ivi: (1) mulongo yemwe wasiya kuchita upainiya, (2) banja yomwe yaleka kutumikira pa Beteli, (3) m’bale yemwe wasiya kutumikira ninge nkulu panango ntumiki wothandiza. Vingakhale voipa maninge kumbalewa kuti abale mwawa panango aphonyesa vinthu ndipomwapa vimwevi vawachitikira. Koma chaivo ni vakuti pakhala vifukwa vizinji vomwe isepano tinkuvidziwalini. Ndawa ya vimwevi, mulendo mu tenti ya Yahova ‘achadekanalini kuchitira anzake vinthu voipa panango kunyoza azishamwali wake.’
Mosazindikira tingayambe kufalisira nkhani zoipa anango mpakana kufika pakuwanenera magunkha azibale wathu (Onani ndime 12-13)
LEMEKEZANI WALE OMWE ACHAGOPA YAHOVA
14. Fotokozani momwe mulendo wa Yahova angapewere ‘wanthu onyoza.’
14 Lemba ya Salimo 15:4 inena kuti: ‘Shamwali wa Yahova, abveranalini na munthu aliyese wonyoza.’ Ko tingamudziwe tani munthu wonyoza? Ndawa ya uchimo, isepano tingakwaniselini kulewa munthu kuti ni wonyoza panango neye. Ndawa chani? Ndawa yakuti tilibe ungwiro, tingayambe kukonda munthu na momwe achaonekera nkumbazonda wanthu anango omwe akonda kutikalipisa. Koma chaivo ni vakuti isepano tichadekana kundopewa wale omwe Yahova awaona kuti ni ‘onyoza.’ (1 Akor. 5:11) Vimwevi vinkuphatanidzapo wanthu omwe achita vinthu voipa koma alapalini, alemekezalini vomwe tichakhulupirira ndipo achita vinthu vakuti afokese ushamwali wathu na Yahova.—Miy. 13:20.
15. Ko ni mwanjira iponi momwe tingalemekezere ‘wanthu omwe achagopa Yahova’?
15 Lemba ya Salimo 15:4, ilewa pomwe kuti tichadekana kulemekeza ‘omwe achagopa Yahova.’ Kuti tikwanise kuchita vimwevi, tichayesesa kuona njira zomwe tingaonesere kukoma moyo na ulemu kwa azishamwali wa Yahova. (Aro. 12:10) Ko tingachite tani vimwevi? Njira ibodzi yochitira vimwevi yanenewa pa Salimo 15:4 pomwe palewa kuti: ‘Mulendo wa mu tenti ya Yahova alekalini kukwanirisa polomisi yake podiya kuti vinthu vimufambirelini bwino.’ Tikasiya kukwanirisa polomisi yathu tingakhumudwise wanthu anango. (Mat. 5:37) Mwakulinganiza, Yahova adikhira kuti wanthu olowolana akwanirise vomwe adapolomisana pomwe ambalowolana. Yahova akhala pomwe wokondwa azibereki akambachita khama kuti akwanirise polomisi yomwe achita kwa wana wawo. Ndawa ya chikondi chomwe tinacho kwa Yahova na wanthu anango, tidzachite vose vomwe tingakwanise kuti tikwanirise mapolomisi yathu.
16. Ni njira inango iponi yomwe tingalemekezere azishamwali wa Yahova?
16 Njira inango yomwe tingalemekezere azishamwali wa Yahova, ni kukhala ochereza na opasa. (Aro. 12:13) Kuluza nthawe ndawa yokhala pabodzi na abale na alongo pambuyo pa misonkhano panango mu umboni, kutithandiza kuti tilimbise ushamwali wathu na iwo komasoti na Yahova. Ndipomwapa tikambayesesa kukhala ochereza tikhala kuti tinkutewedzera Yahova.
AYI KUKONDA KOBIRI
17. Ko ndawa chani Salimo 15 ilewa va kobiri?
17 Pa lemba ya Salimo 15:5 tiwerenga kuti: ‘Mulendo wa Yahova, akweretesalini kobiri kuti adzatambire na kalowa ndipo atambiralini kobiri kuti akhonese mulandu wa munthu wosaphonya.’ Ko ndawa chani Davide adanena nkhani ya kobiri pa Salimo ing’onong’ono mweyi? Ni ndawa yakuti tikambakonda maninge kobiri, tingambaone kuti ni yodekana maninge kwa isepano koposha wanthu anango panango Yahova. (1 Tim. 6:10) Kalekale, anango ambajerera azibale wawo osauka pa kuwakweretesa kobiri kuti adzapagali na kalowa. Kuyingizira pamwapa, oweruza anango ambabvuma kutambira kobiri kuti aweruze mulandu wa munthu wosaphonya mosowa chilungamo. Koma Yahova azonda wanthu akambachita vimwevi.—Ezek. 22:12.
18. Ko tingadzibvunze mibvunzo yaponi kuti tione momwe tichaionera kobiri? (Aheberi 13:5)
18 Vingakhale bwino maninge tose isepano kuganizira momwe tichazionera kobiri. Dzibvunzeni kuti: ‘Ko nindoganizira va kobiri na vomwe ningagule nichikhala na kobiri zizinji? Ko munthu akanikweretesa kobiri nichebwa kumubwezera nkumbaganiza kuti iye alibe nayo basa? Ko nidzibva kuti ndine wodekana maninge kuposha anango ndawa yakuti ninakobiri zizinji? Ko nishupika kuthandiza wanthu anango? Ko inepano nichaona kuti munthu akonda vinthu vakuthupi ndawa yakuti ana kobiri zizinji? Ko nikonda kukhala pa ushamwali na wanthu olemera nkumbapewa wanthu osauka?’ Tose tinamwayi ukulu wochemerewa ninge alendo wa Yahova. Koma peno tinkufuna kupitiriza kukhala alendo wa Yahova, tichadekana kukhala osamala kuti tileke kumbakonda kobiri. Tikambakonda maninge Yahova osati kobiri, iye adzatisiyelini!—Werengani Aheberi 13:5.
YAHOVA AKONDA AZISHAMWALI WAKE
19. Ndawa chani Yahova achatipasa malangizo?
19 Lemba ya Salimo 15 imaliza na polomosi iyi: ‘Yemwe achita vimwevi adzagunduzikelini.’ (Sal. 15:5) Pamwapa pankufotokoza chifukwa chomwe chichitisa Mulungu kuti ambatikumbire vinthu vizinji tene. Yahova ankufuna kuti timbakhale okondwa. Ndipomwapa, tikambachita vomwe Yahova ankufuna, tikhala na moyo wabwino ndipo iye atiteteza.—Yes. 48:17.
20. Ko alendo wa Yahova ankudikhira chani kutsogolo?
20 Alendo wa Yahova anachidikhiro chakutsogolo chogaka maninge. Akhrisitu odzodzewa okhulupirika adzachemerewe kuti ‘akakhale mu mipando’ yomwe Yesu wawakonzera kudzulu. (Yoh. 14:2) Ndipo wale omwe anachidikhiro chodzakhala pa dziko yapasi, ankudikhira mwachidwi kukwanirisiwa kwa lemba ya Chivumbulutso 21:3. Mosakaika, isepano tidzibva kuti ni ulemelero ukulu maninge kuchemerewa na Yahova kuti tikhale azishamwali wake na alendo wake mu tenti yake mpakana kalekale!
NYIMBO NA. 39 Tipange Dzina Labwino Ndi Mulungu
