1. Hao nao Psalm 15:​1-5 savve helpem iumi?

 LO ARTICLE wea iumi studyim finis, iumi lanem hao olketa wea dedicate lo Jehovah savve kamap guest lo tokpiksa tent blo hem taem olketa gohed for fren klos witim hem. Bat wat nao iumi need for duim for kamap guest blo hem? Psalm 15 bae storyim disfala subject. (Readim Psalm 15:​1-5.) Disfala psalm storyim olketa samting wea iumi savve duim mekem iumi fren klos witim God.

2. Wat nao maet mekem David for storyim tent blo Jehovah?

² First toktok lo Psalm 15 hem sei: “O Jehovah, hu nao savve kamap guest lo tent blo iu? Hu nao hem savve stap lo holy maunten blo iu?” (Ps. 15:1) Taem David storyim “tent” blo Jehovah, maet hem tingim tabernacle, wea stap lo Gibeon for samfala taem. David storyim tu “holy maunten” blo God. Maet hem minim Maunt Zion lo Jerusalem, wea hem samfala kilometer south lo Gibeon. Lo there, David wakem wanfala tent for ark blo covenant go kasem taem wea olketa wakem wanfala permanent ples for ark hia stap insaed.—2 Sam. 6:17.

3. Why nao iumi interest lo samting wea Psalm 15 storyim? (Lukim tu piksa.)

³ Klosap evri Israelite bifor no allowed for waka lo tabernacle, and only tu-thri nomoa savve go insaed lo tent wea ark hem stap. Bat evri faithful servant blo Jehovah savve kamap guest insaed tokpiksa tent blo hem taem olketa kamap fren blo hem and continue for fren witim hem. Datwan hem samting wea iumi evriwan laek for duim. Psalm 15 hem storyim samfala wei wea iumi need for garem and showimaot for gohed fren witim Jehovah.

 NO GAREM BLAME AND DUIM STRET SAMTING

4. Hao nao iumi savve Jehovah laekem iumi for mas duim moa samting winim for baptaes nomoa? (Isaiah 48:1)

⁴ Lo Psalm 15:​2, hem sei dat wanfala fren blo God hem “man wea no garem blame lo samting wea hem duim, hem evritaem duim samting wea stret.” Toktok lo disfala verse showim wat iumi mas gohed for duim evritaem. Bat hao, iumi really no savve garem blame? Yes. Nomata iumi evriwan no perfect, Jehovah savve ting lo iumi olsem iumi “no garem blame” if iumi traem best for obeyim hem. Taem iumi dedicatem iumiseleva lo God and baptaes, iumi just start for fren witim Hem. Tingim hao lo taem blo Bible, nomata iu wanfala Israelite datwan no minim iu qualify for kamap guest blo Jehovah. Samfala Israelite prea lo hem bat no duim samting “followim truth” and “stret samting.” (Readim Isaiah 48:1.) Olketa faithful Israelite mas lane abaotem wat Jehovah laekem olketa for duim and mas followim. Distaem tu, for iumi fren witim God, iumi mas duim moa samting winim for baptaes and associate witim kongregeson nomoa. Iumi mas gohed for “evritaem duim samting wea stret.” Hao nao iumi savve duim datwan?

5. Wat nao hem minim for obeyim Jehovah lo evri samting?

⁵ Lo eye blo Jehovah, “man wea no garem blame” and “evritaem duim samting wea stret” hem no just minim man wea evritaem go lo meeting nomoa. (1 Sam. 15:22) Iumi mas traem best for obeyim Jehovah lo evri samting, nomata taem iumi stap seleva. (Prov. 3:6; Eccl. 12:​13, 14) Hem important for iumi trae for obeyim Jehovah nomata lo olketa smol samting. Taem iumi duim olsem, hem showim iumi really lovem hem, and hem bae lovem iumi go moa.—John 14:23; 1 John 5:3.

6. Olsem Hebrew 6:​10-12 storyim, wat nao hem moa important winim olketa gud samting wea iumi duim bifor?

 ⁶ Jehovah barava appreciatim wat iumi bin duim for hem. Bat wat iumi duim bifor, hem no mekem iumi qualify for gohed stap olsem guest blo hem. Iumi savve lukim klia datwan lo Hebrew 6:​10-12. (Readim.) Jehovah no forgetim olketa gud samting wea iumi bin duim. Bat hem laekem iumi for gohed worshipim hem witim full heart “go kasem end.” Hem bae fren blo iumi for olowe “sapos iumi no givap.”—Gal. 6:9.

HEM HONEST FROM HEART LO WAT HEM TALEM

7. Wat nao disfala toktok “lo heart blo hem, hem honest lo wanem hem talem” hem minim?

⁷ For Jehovah acceptim samwan olsem guest lo tent blo hem, hem mas man wea “lo heart blo hem, hem honest lo wanem hem talem.” (Ps. 15:2) Diswan no just storyim wei for no laea. Jehovah laekem iumi for honest lo evri samting wea iumi talem and duim. (Heb. 13:18) Diswan hem important “bikos Jehovah barava heitim man for laea, bat Hem fren gud witim man wea duim stret samting.”—Prov. 3:32.

8. Wat kaen wei nao iumi need for stap klia lo hem?

⁸ Olketa wea honest lo wat olketa talem, no pretend for obeyim God taem olketa stap between pipol, bat taem olketa stap seleva, olketa brekem law blo God. (Isa. 29:13) Olketa stap klia lo wei for laea. Man wea savve laea maet start for daotem if hem stret for obeyim samfala law blo Jehovah. (Jas. 1:​5-8) Hem maet disobeyim Jehovah lo olketa samting wea hem tingse hem smol nomoa. Then if luk olsem hem no kasem eni nogud samting from hem no obey, datwan maet mekem hem no fraet for duim olketa nara samting wea brekem law blo God, and taem olsem hem kamap hypocrite. (Eccl. 8:11) Bat iumi no laek olsem, iumi laek for honest lo evri samting.

9. Wat nao iumi savve lanem from firstaem wea Jesus meetim Nathanael? (Lukim tu piksa.)

⁹ Wat Jesus talem lo firstaem wea hem meetim Nathanael, hem teachim iumi hao wei for honest hem important. Taem Philip leadim  kam fren blo hem Nathanael for meetim Jesus, wanfala interesting samting happen. Nomata Jesus no meetim Nathanael enitaem bifor, hem sei: “Lukim . . . wanfala man long Israel wea hem nating savve laea.” (John 1:47) Jesus savve olketa nara disaepol blo hem honest, bat hem lukim hao honest fasin blo Nathanael hem winim eni narawan. Olsem iumi, Nathanael tu no perfect. Nomata olsem, hem no pretend bat hem barava honest lo evri samting. Jesus tinghae lo datwan and praisem Nathanael. Hem spesol samting if Jesus ting olsem abaotem iumi!

10. Why nao iumi shud careful abaotem wat iumi talem? (James 1:26)

¹⁰ Staka samting wea Psalm 15 storyim, hem join witim hao iumi treatim olketa narawan. Psalm 15:3 sei wanfala guest lo tent blo Jehovah, “hem no iusim tongue blo hem for laea for spoelem nem blo narawan, hem no duim nogud samting lo neiba blo hem, and hem no tok nogud abaotem olketa fren blo hem.” If iumi duim datwan, hem savve barava spoelem olketa narawan and mekem iumi no qualify for gohed guest lo tent blo Jehovah.—Readim James 1:26.

11. Wat nao hem minim for laea for spoelem nem blo narawan, and wat nao bae happen if man olsem hem no repent?

¹¹ Datfala psalm tok stret abaotem wei for laea for spoelem nem blo narawan. Wat nao datwan minim? Staka taem, datwan minim wei for talem wanfala story wea no tru abaotem narawan and gogo datwan spoelem reputation blo datfala person. Eniwan wea duim datwan and no repent, bae olketa aotem from kongregeson.—Jer. 17:10.

12-13. Wat nao samfala situation wea maet end ap iumi spoelem reputation blo olketa fren blo iumi? (Lukim tu piksa.)

¹² Psalm 15:3 remindim iumi tu hao olketa guest blo Jehovah no duim eni nogud samting lo neiba blo olketa and no tok nogud  abaotem olketa fren blo olketa. Wat nao datwan minim?

¹³ Taem iumi spredim negative information abaotem samwan, maet end ap iumi spoelem reputation blo hem. For example: (1) wanfala sista stop for duim full-taem service, (2) wanfala marit couple finis for waka lo Bethel, or (3) wanfala brata finis from elder or ministerial servant. Hao, hem stret for iumi trae guessim why situation blo olketa change, and then storyim lo olketa narawan? Maet iumi no savve lo olketa reason why olketa change hia kamap. And tu, wanfala guest lo tent blo Jehovah “hem no duim nogud samting lo neiba blo hem, and hem no tok nogud abaotem olketa fren blo hem.”

HONORIM OLKETA WEA FRAET LO JEHOVAH

14. Hao nao wanfala guest blo Jehovah savve rejectim “eniwan wea wei blo hem nogud?” Explainim.

¹⁴ Psalm 15:4 sei wanfala fren blo Jehovah hem “rejectim eniwan wea wei blo hem nogud.” Hao nao iumi savve dat wei blo samwan hem nogud? From iumi no perfect, hem isi for iumi no luksavve if wei blo samwan hem nogud. Why? Bikos hem natural for iumi laek fren witim samwan wea iumi interest lo olketa sem samting and les lo olketa wea wei blo olketa difren. Dastawe, iumi rejectim nomoa man wea duim samting wea Jehovah sei hem “nogud.” (1 Cor. 5:11) Diswan hem includim pipol wea no repent from wei for duim nogud samting, pipol wea no respectim teaching and biliv blo iumi, or trae for spoelem frenship blo iumi witim Jehovah.—Prov. 13:20.

15. Wat nao wanfala wei wea iumi savve honorim “olketa wea fraet lo Jehovah”?

¹⁵ Nara samting wea Psalm 15:4 askem iumi for duim, hem for honorim “olketa wea fraet lo Jehovah.” So iumi laek for duim samting for kaen and respectim olketa fren blo Jehovah. (Rome 12:10) Hao? Psalm 15:4 storyim wanfala wei for duim diswan. Hem sei guest lo tent blo Jehovah hem “keepim promis wea hem mekem nomata taem datwan no isi for hem.” If iumi brekem promis blo iumi, datwan savve mekem olketa narawan feel nogud. (Matt. 5:37) For example, Jehovah expectim olketa guest blo hem for keepim marit promis blo olketa. Hem hapi tu taem parents waka hard for keepim promis wea olketa talem lo pikinini. Love blo iumi for God and neiba bae mekem iumi for duim best for keepim promis blo iumi.

16. Wat nao nara wei wea iumi savve honorim olketa fren blo Jehovah?

¹⁶ Nara wei wea iumi savve honorim olketa fren blo God, hem for welkamim olketa and kaen lo olketa. (Rome 12:13) Wei for spendem taem witim olketa brata and sista savve helpem iumi for strongim frenship blo iumi witim olketa and Jehovah. And tu, taem iumi duim datwan iumi followim wei blo Jehovah.

NO LAEKEM TUMAS SELEN

17. Why nao Psalm 15 storyim selen?

¹⁷ Disfala psalm storyim dat wanfala guest blo Jehovah “no askem interest lo selen wea narawan kaonem, and hem no acceptim bribe for spoelem man wea innocent.” (Ps. 15:5) Why nao disfala psalm storyim selen? Bikos taem iumi no garem balance tingting abaotem selen, selen savve kamap moa important winim olketa narawan and even spoelem frenship blo iumi witim God. (1 Tim. 6:10) Lo taem blo Bible, samfala treatim nogud olketa brata wea poor taem olketa askem interest lo selen wea olketa kaonem. And tu, samfala judge acceptim bribe and then judgem olketa innocent pipol lo wei wea no followim justice. Jehovah  barava feel nogud taem pipol duim olketa samting olsem.—Ezek. 22:12.

18. Olketa wat kaen kwestin nao savve helpem iumi for lukluk gud lo attitude blo iumi abaotem selen? (Hebrew 13:5)

¹⁸ Hem gud for iumi lukluk gud lo attitude wea iumi garem abaotem selen. Tingim olketa kwestin hia: ‘Hao, mi evritaem ting abaotem selen and wat mi savve peim? If mi kaonem selen, hao, mi slow for changem bak bikos mi tingse datfala person wea mi kaon lo hem no needim? Hao, wei for garem selen mekem mi feel olsem mi gud winim narawan, and mekem mi no willing for give? Hao, mi judgem olketa brata and sista blo mi and tingse olketa laekem tumas material samting bikos olketa garem staka selen? Hao, mi laek fren nomoa witim olketa wea rich and no interest lo olketa wea poor?’ Hem gud for ting raonem olketa kwestin hia bikos Jehovah givim spesol invitation for iumi kamap guest blo hem. Iumi savve protectim datfala privilege taem iumi mek sure for no laekem tumas selen. If iumi duim datwan, Jehovah bae nating lusim iumi!—Readim Hebrew 13:5.

JEHOVAH LOVEM OLKETA FREN BLO HEM

19. Why nao Jehovah laekem iumi for duim evri samting wea Psalm 15 storyim?

¹⁹ Last toktok lo Psalm 15 hem end witim disfala promis: “Eniwan wea duim olketa samting hia bae no savve seksek.” (Ps. 15:5) Lo disfala psalm, hem storyim why Jehovah laekem iumi for duim olketa samting hia. Jehovah laekem iumi for hapi. So, taem iumi followim direction wea Jehovah givim, bae iumi kasem blessing and protection.—Isa. 48:17.

20. Wat nao olketa guest blo Jehovah luk forward for hem?

²⁰ Olketa wea Jehovah chusim for kamap guest blo Hem luk forward for wanfala nambawan future. Olketa faithful anointed wan bae stap lo haos bilong Dadi lo heven wea garem “staka spes,” wea Jesus preparem for olketa. (John 14:2) Olketa wea garem hope for laef lo earth luk forward for datfala promis wea Revelation 21:3 storyim. Hem wanfala spesol privilege for iumi kasem invitation from Jehovah for kamap olketa fren blo hem, and for stap olsem guest lo tent blo hem for olowe!