1.‏ سانوں زبور 15:‏1-‏5 تے غور کرن نال کیہہ فائدہ ہو سکدا اے؟‏

 پچھلے مضمون چ اَسی سکھیا سی کہ جیہڑے لوک اپنی زندگی یہوواہ دے ناں کردے نیں، اوہ اوہدے قریبی دوست یعنی اوہدے خیمے چ مہمان بن سکدے نیں۔ پر یہوواہ دا مہمان بنن لئی سانوں کیہہ کرن دی لوڑ اے؟ زبور 15 چ ایس بارے بوہت کجھ دَسیا گیا اے۔ ‏(‏زبور 15:‏1-‏5 نُوں پڑھو۔)‏ ایس زبور چ سانوں ایہو جہے مشورے دِتے گئے نیں جنہاں تے عمل کرن نال اَسی یہوواہ دے ہور نیڑے ہو سکنے آں۔‏

2.‏ جدوں داؤد نے یہوواہ دے خیمے دا ذکر کیتا تے شاید اوہ اوس ویلے کیہہ سوچ رہیا سی؟‏

² زبور 15 دے شروع چ ایہہ سوال پچھیا گیا اے:‏ اَے یہوواہ!‏ کون تیرے خیمے دا مہمان بن سکدا اے؟ کون تیرے مُقدس پہاڑ تے وس سکدا اے؟ (‏زبور 15:‏1‏)‏ جدوں داؤد نے یہوواہ دے خیمے دا ذکر کیتا تے شاید اوہ اوس خیمے بارے سوچ رہیا سی جنہوں اِسرائیلی یہوواہ دی عبادت لئی استمال کردے سن۔ ایہہ خیمہ کجھ عرصے لئی شہر جبعون چ سی۔ داؤد نے خدا دے مُقدس پہاڑ دا وی ذکر کیتا۔ ایہدا ذکر کردے ویلے شاید اوہ یروشلم چ صیون دے پہاڑ بارے سوچ رہیا سی۔ اوتھے جبعون دے شہر توں کئی میل دُور داؤد نے اِک خیمہ لایا جتھے اوہنے عہد دے صندوق نُوں اوہدوں تک رکھیا جدوں تک ہیکل نئیں بن گئی۔—‏2-‏سموئیل 6:‏17‏۔‏

3.‏ سانوں زبور 15 نُوں چنگی طرحاں کیوں سمجھنا چاہی دا اے؟ (‏تصویر نُوں وی ویکھو۔)‏

³ زیادہ‌تر اِسرائیلیاں نُوں یہوواہ دی عبادت لئی استمال ہون والے خیمے چ خدمت کرن دی اجازت نئیں سی تے جنہاں نُوں اجازت ہے وی سی اوہناں چوں وی بوہت گھٹ لوک اوس خیمے دے اندر جا سکدے سن جتھے عہد دا صندوق رکھیا گیا سی۔ پر جیہڑے خیمے دا ذکر زبور 15 چ کیتا گیا اے، اوہدے چ یہوواہ دے سارے وفادار بندے مہمان بن کے جا سکدے نیں تے ہمیشاں تک اوہدے دوست رہ سکدے نیں۔ یقیناً اَسی سارے ایہی چاہنے آں۔ زبور 15 چ کجھ ایہو جہیاں خوبیاں دا ذکر ہویا اے جیہڑیاں یہوواہ دے دوست بنے رہن لئی سانوں اپنے اندر پیدا کر کے ظاہر کرنیاں چاہی دِیاں نیں۔‏

 وفاداری دی راہ تے چلو تے ہمیشاں صحی کم کرو

4.‏ اَسی ایہہ کیوں کیہہ سکنے آں کہ یہوواہ نُوں خوش کرن لئی صرف بپتسمہ لینا ای کافی نئیں اے؟ (‏یسعیاہ 48:‏1‏)‏

⁴ زبور 15:‏2 چ دَسیا گیا اے کہ یہوواہ دے دوست وفاداری دی راہ تے چلدے نیں تے ہمیشاں صحی کم کردے نیں۔ اوہدے دوست بنے رہن لئی سانوں ایہہ کم کردے رہنے چاہی دے نیں۔ پر کیہہ اَسی واقعی وفاداری دی راہ تے چل سکنے آں؟ ہاں جی۔ ایہہ سچ اے کہ سارے انسان غلطیاں کردے نیں۔ پر جے اَسی یہوواہ دے حکماں تے عمل کرن دی پوری کوشش کراں گے تے یہوواہ دی نظر چ اَسی وفاداری دی راہ تے چل رہے ہوواں گے۔ جدوں اَسی اپنی زندگی یہوواہ دے ناں کر کے بپتسمہ لینے آں تے اَسی یہوواہ نال چلنا شروع ای کرنے آں۔ غور کرو کہ پرانے زمانے چ صرف اِسرائیلی ہون دی وجہ توں اِک بندہ یہوواہ دا مہمان نئیں بن سکدا سی۔ کجھ اِسرائیلی یہوواہ نُوں پکاردے تے سن پر سچائی تے نیکی نال نئیں۔ ‏(‏یسعیاہ 48:‏1 نُوں پڑھو۔)‏ جے اِک اِسرائیلی ایہہ ثابت کرنا چاہندا سی کہ اوہ واقعی یہوواہ دا مہمان بننا چاہندا اے تے اوہنوں یہوواہ دے معیاراں بارے جانن تے ایہناں تے عمل کرن دی لوڑ ہوندی سی۔ اَج وی یہوواہ نال گُوڑھی دوستی کرن لئی صرف بپتسمہ لینا تے یہوواہ دا گواہ کہلانا ای کافی نئیں اے سگوں سانوں ہمیشاں صحی کم کرن دی وی لوڑ اے۔ اَسی اِنج کیویں کر سکنے آں؟‏

5.‏ ساریاں گلاں چ یہوواہ دی فرمانبرداری کرن دا کیہہ مطلب اے؟‏

⁵ یہوواہ دی نظر چ وفاداری دی راہ تے چلن تے ہمیشاں صحی کم کرن دا مطلب صرف باقاعدگی نال عبادتاں تے جانا نئیں اے۔ (‏1-‏سموئیل 15:‏22‏)‏ سگوں ایہدے نال نال سانوں زندگی دے ہر معاملے چ یہوواہ دے حکماں تے عمل کرن دی پوری کوشش کرنی چاہی دی اے۔ اوس ویلے وی جدوں اَسی کلّے ہُنے آں۔ (‏اَمثال 3:‏6؛‏ واعظ 12:‏13، 14‏)‏ ایہہ بوہت ضروری اے کہ اَسی ایہو جہے معاملیاں چ وی یہوواہ دے فرمانبردار رہیے جیہڑے بوہت چھوٹے لگدے نیں۔ اِنج کرن نال اَسی ظاہر کراں گے کہ اَسی یہوواہ نُوں دِلوں پیار کرنے آں تے ایہہ ویکھ کے یہوواہ سانوں ہور پیار کرے گا۔—‏یوحنا 14:‏23؛‏ 1-‏یوحنا 5:‏3‏۔‏

6.‏ عبرانیوں 6:‏10-‏12 دے مطابق اَسی ماضی چ یہوواہ لئی جیہڑے کم کیتے نیں، اوہناں نالوں وی زیادہ اہم گل کیہہ اے؟‏

⁶ اَسی ماضی چ یہوواہ لئی جو کجھ کیتا اے، یہوواہ اوہدی بوہت قدر کردا اے۔ پر اَسی صرف اپنے ماضی دے چنگے کماں دی وجہ توں یہوواہ دے خیمے چ اوہدے مہمان نئیں رہ سکدے۔ ایہہ گل عبرانیوں 6:‏10-‏12 توں صاف پتہ چلدی اے۔ ‏(‏ایہناں ایتاں نُوں پڑھو۔)‏ ایہہ سچ اے کہ یہوواہ ساڈے اوہناں کماں نُوں کدی نئیں بُھلے گا جیہڑے اَسی ماضی چ اوہدے لئی کیتے سن۔ پر اوہ چاہندا اے کہ اَسی آخر تک یعنی ساری زندگی دِلوں اوہدی عبادت کردے رہیے۔ ”‏جے اَسی ہمت نئیں ہاراں گے“‏ تے یہوواہ نال ساڈی دوستی ہمیشاں تک قائم رہوے گی۔—‏گلتیوں 6:‏9‏۔‏

دِلوں سچ بولو

7.‏ دِلوں سچ بولن چ کیہہ شامل اے؟‏

⁷ جیہڑا بندہ یہوواہ دا مہمان بننا چاہندا اے، اوہنوں دِلوں سچ بولنا چاہی دا اے۔ ایہدا مطلب صرف ایہہ نئیں اے کہ اوہ جھوٹھ نہ بولے۔ (‏زبور 15:‏2‏)‏ یہوواہ چاہندا اے کہ اَسی اپنی ہر گل تے ہر کم چ ایمان‌دار ہوئیے۔ (‏عبرانیوں 13:‏18‏)‏ ایہہ بوہت ضروری اے کیونکہ یہوواہ دھوکھےباز لوکاں توں نفرت کردا اے پر سِدھی راہ تے چلن والیاں نال اوہدی گُوڑھی دوستی اے۔—‏اَمثال 3:‏32‏۔‏

8.‏ سانوں کیہڑی گل توں خبردار رہنا چاہی دا اے؟‏

⁸ جیہڑے لوک دِلوں سچ بولدے نیں، اوہ دُوجیاں سامنے یہوواہ دی فرمانبرداری کرن دا دِکھاوا نئیں کردے تے نہ ای کلّے چ اوہدے حکماں نُوں توڑدے نیں۔ (‏یسعیاہ 29:‏13‏)‏ اوہ دھوکھےبازی نئیں کردے۔ اِک دھوکھےباز بندہ شاید ایہہ سوچن لگ پئے کہ یہوواہ دے حکماں تے عمل کرنا ہمیشاں فائدےمند نئیں ہوندا۔ (‏یعقوب 1:‏5-‏8‏)‏ شاید اوہ ایہو جہے معاملیاں چ یہوواہ دی نافرمانی کرن لگ پئے جیہڑے اوہدی نظر چ اہم نئیں نیں۔ تے فیر جدوں اوہنوں لگے کہ اوہنوں یہوواہ دی نافرمانی کرن دی وجہ توں کوئی نقصان نئیں ہو رہیا تے شاید اوہ یہوواہ دے ہور حکم وی توڑن لگ پئے۔ بھانویں اوہنوں لگے کہ اوہ یہوواہ دی عبادت کر رہیا اے پر یہوواہ اوہدی عبادت نُوں قبول نئیں کرے گا۔ (‏واعظ 8:‏11‏)‏ پر اَسی ایہو جہے نئیں بننا چاہندے سگوں اَسی ہر گل چ ایمانداری توں کم لینا چاہنے آں۔‏

9.‏ جدوں یسوع پہلی واری نتن‌ایل نُوں مِلیا تے کیہہ ہویا تے اَسی ایہدے توں کیہہ سکھ سکنے آں؟ (‏تصویر نُوں وی ویکھو۔)‏

⁹ نتن‌ایل دی مثال توں پتہ چلدا اے کہ صاف دل ہونا کِنّاں اہم  اے۔ جدوں فِلپّس اپنے دوست نتن‌ایل نُوں پہلی وار یسوع نُوں ملوان لیایا تے اِک بڑی زبردست گل ہوئی۔ بھانویں کہ یسوع نتن‌ایل نُوں پہلاں کدی نئیں مِلیا سی پر فیر وی اوہنے نتن‌ایل بارے کہیا:‏ ”‏ویکھو!‏ اِک سچا اِسرائیلی جدے چ کھوٹ نئیں اے۔“‏ (‏یوحنا 1:‏47‏)‏ سچ اے کہ یسوع جان دا سی کہ اوہدے باقی شاگرد وی سچے تے ایمان‌دار نیں پر نتن‌ایل دی صاف دلی کجھ زیادہ ای خاص سی۔ بھانویں کہ نتن‌ایل وی ساڈے وانگوں عیب‌دار سی پر اوہدے چ ذرا جیہا وی پاکھنڈ نئیں سی سگوں اوہ ہر معاملے چ ایمان‌دار سی۔ یسوع مسیح نے ایس گل لئی اوہدی تعریف کیتی۔ ذرا سوچو کہ جے یسوع ساڈے بارے ایہہ گل کہوے تے سانوں کِنّی خوشی ہوئے گی۔‏

10.‏ سانوں اپنی زبان دا غلط استمال کیوں نئیں کرنا چاہی دا؟ (‏یعقوب 1:‏26‏)‏

¹⁰ زبور 15 چ یہوواہ دے مہمان بنن بارے جیہڑیاں گلاں دَسیاں گئیاں نیں، اوہناں وچوں زیادہ‌تر دا تعلق ایس گل نال اے کہ اَسی دُوجیاں نال کیویں پیش آنے آں۔ زبور 15:‏3 چ دَسیا گیا اے کہ یہوواہ دے خیمے چ آن والا مہمان اپنی زبان توں جھوٹھیاں گلاں نئیں پھیلاندا، اوہ اپنے گوانڈھی نال کجھ بُرا نئیں کردا تے اپنے دوستاں نُوں بدنام نئیں کردا۔ جے اَسی ایہو جہیاں گلاں کراں گے تے اَسی دُوجیاں دا دل دُکھاواں گے۔ اِنج اَسی یہوواہ دے خیمے چ اوہدے مہمان بنن دے لائق نئیں رہواں گے۔‏‏—‏یعقوب 1:‏26 نُوں پڑھو۔‏

11.‏ جھوٹھیاں گلاں پھیلان توں کیہہ نقصان ہوندا اے تے ایہہ ایناں وڈا گُناہ کیوں اے؟‏

¹¹ زبور 15 چ خاص طور تے دُوجیاں بارے جھوٹھیاں گلاں پھیلان دا ذکر ہویا اے۔ جیہڑا بندہ کسے بارے جھوٹھیاں گلاں پھیلاندا اے، اوہ اوہنوں بدنام کردا اے۔ ایہہ ایناں وڈا گُناہ کیوں اے؟ کیونکہ جیہڑا بندہ اپنے ایس گُناہ توں توبہ نئیں کردا، اوہنوں کلیسیا توں خارج کر دِتا جاندا اے۔—‏یرمیاہ 17:‏10‏۔‏

12، 13.‏ اَسی انجانے چ اپنے دوستاں دی بدنامی کیویں کر سکنے آں؟ (‏تصویر نُوں وی ویکھو۔)‏

¹² زبور 15:‏3 چ سانوں دَسیا گیا اے کہ یہوواہ دے مہمان اپنے گوانڈھی نال کجھ بُرا نئیں کردے تے اپنے دوستاں نُوں بدنام نئیں کردے۔ کوئی انجانے چ اِنج کیویں کر سکدا اے؟‏

¹³ اَسی کسے بارے غلط معلومات پھیلان نال انجانے چ اوہدی  بدنامی کر سکنے آں۔ فرض کرو کہ (‏1)‏اِک بھین کُل‌وقتی طور تے خدمت کرنا چھڈ دیندی اے، (‏2)‏اِک میاں بیوی ہُن بیت‌ایل چ خدمت نئیں کر رہے یاں (‏3)‏اِک بھرا ہُن خادم یاں بزرگ دے طور تے خدمت نئیں کر رہیا۔ کیہہ ایہو جہے حالاتاں چ ایہہ اندازے لانا صحی ہوئے گا کہ اوہناں نال اِنج ایس لئی ہویا اے کیونکہ اوہناں نے کجھ غلط کیتا اے؟ تے فیر کیہہ اپنی رائے نُوں دُوجیاں چ پھیلانا ٹھیک ہوئے گا؟ اکثر سانوں ساری گل دا پتہ نئیں ہوندا۔ یاد رکھو کہ یہوواہ دا مہمان اپنے گوانڈھی نال کجھ بُرا نئیں کردا تے اپنے دوستاں نُوں بدنام نئیں کردا۔‏

یہوواہ دا خوف رکھن والیاں دی عزت کرو

14.‏ دَسو کہ یہوواہ دے مہمان گھٹیا لوکاں توں دُور کیویں رہندے نیں۔‏

¹⁴ زبور 15:‏4 چ دَسیا گیا اے کہ یہوواہ دے دوست گھٹیا لوکاں توں دُور رہندے نیں۔ اَسی اِنج کیویں کر سکنے آں؟ اَسی ایہہ فیصلہ نئیں کر سکدے کہ کیہڑا بندہ گھٹیا اے تے کیہڑا نئیں۔ ایہدی کیہہ وجہ اے؟ اَسی عیب‌دار آں ایس لئی ہو سکدا اے کہ اَسی اوہناں لوکاں نُوں پسند کرئیے جنہاں نال ساڈی اچھی بن دی اے۔ پر اوہناں لوکاں نُوں بالکل وی پسند نہ کرئیے جنہاں دے کجھ کماں توں سانوں کھج چڑھدی اے۔ ایس لئی سانوں صرف اوہناں لوکاں توں دُور رہنا چاہی دا اے جیہڑے یہوواہ دی نظر چ گھٹیا نیں۔ (‏1-‏کُرنتھیوں 5:‏11‏)‏ ایہناں چ اوہ لوک وی شامل نیں جیہڑے اپنے بھیڑے کماں توں توبہ نئیں کردے، ساڈے عقیدیاں دا مذاق اُڈاندے نیں یاں یہوواہ نال ساڈی دوستی توڑن دی کوشش کردے نیں۔—‏اَمثال 13:‏20‏۔‏

15.‏ یہوواہ دا خوف رکھن والیاں دی عزت کرن دا اِک طریقہ کیہہ اے؟‏

¹⁵ زبور 15:‏4 چ اَگے دَسیا گیا اے کہ سانوں اوہناں لوکاں دی عزت کرنی چاہی دی اے جیہڑے یہوواہ دا خوف رکھدے نیں۔ ایس لئی اَسی ایہو جہے موقعے لبھدے رہنے آں جنہاں چ اَسی یہوواہ دے دوستاں لئی مہربانی تے احترام وکھا سکئے۔ (‏رومیوں 12:‏10‏)‏ اِنج کرن دا اِک طریقہ زبور 15:‏4 چ دَسیا گیا اے۔ اوتھے دَسیا گیا اے کہ جیہڑا بندہ یہوواہ دے خیمے چ اوہدا مہمان بن کے آندا اے، اوہ ہمیشاں اپنا وعدہ پورا کردا اے فیر بھانویں اوہنوں نقصان ای کیوں نہ چُکنا پووے۔ جے اَسی اپنے وعدے توڑ دینے آں تے ایہدے توں دُوجیاں نُوں دُکھ پونچ دا اے۔ (‏متی 5:‏37‏)‏ مثال لئی، یہوواہ اپنے مہماناں کولوں ایہہ توقع کردا اے کہ جے اوہ شادی‌شُدہ نیں تے اوہ اپنے جیون ساتھی دے وفادار رہن۔ اوہ اوس ویلے وی بڑا خوش ہوندا اے جدوں ماں پیو پوری کوشش کردے نیں کہ اوہ اپنے اوہناں وعدیاں نُوں پورا کرن جیہڑے اوہ اپنے بچیاں نال کردے نیں۔ اَسی یہوواہ تے دُوجیاں نال بوہت پیار کرنے آں ایس لئی اَسی اپنے وعدیاں نُوں نبھان دی پوری کوشش کرنے آں۔‏

16.‏ یہوواہ دے دوستاں دی عزت کرن دا اِک ہور طریقہ کیہہ اے؟‏

¹⁶ یہوواہ دے دوستاں دی عزت کرن دا اِک ہور طریقہ ایہہ وے کہ اَسی مہمان‌نواز تے کُھلے دل والے بنئے۔ (‏رومیوں 12:‏13‏)‏ جدوں اَسی اپنے بھین بھراواں نال عبادتاں تے مُنادی دے علاوہ وی وقت گزارنے آں تے ساڈی اوہناں نال تے یہوواہ نال ہور پکی دوستی ہو جاندی اے۔ ایہدے علاوہ مہمان‌نوازی وکھان نال اَسی یہوواہ دی مثال تے عمل کر رہے ہُنے آں۔‏

پیسے نال پیار کرن توں بچو

17.‏ زبور 15 چ پیسے دے موضوع تے گل کیوں کیتی گئی اے؟‏

¹⁷ زبور 15 چ اَسی ایہہ وی پڑھنے آں کہ یہوواہ دا مہمان سُود تے قرضہ نئیں دیندا تے بے قصور بندے نُوں پھسان لئی رشوت نئیں لیندا۔ (‏زبور 15:‏5‏)‏ ایس چھوٹے جہے زبور چ پیسے دے موضوع تے گل کیوں کیتی گئی اے؟ کیونکہ جے اَسی پیسے بارے حدوں ودھ سوچاں گے تے ایہہ ساڈے لئی یہوواہ تے انساناں نالوں بوہتا اہم بن جاوے گا۔ (‏1-‏تیمُتھیُس 6:‏10‏)‏ پرانے زمانے چ کجھ اِسرائیلی اپنے غریب بھراواں کولوں سُود سمیت قرضہ واپس لے رہے سن تے اِنج اوہناں نُوں لُٹ رہے سن۔ ایہدے علاوہ کجھ جج رشوت لے کے بے‌قصوراں نال نااِنصافی کردے سن۔ یہوواہ ایہو جہے کماں توں سخت نفرت کردا اے۔—‏حِزقی‌ایل 22:‏12‏۔‏

18.‏ اَسی پیسے بارے اپنی سوچ دا جائزہ لین لئی اپنے آپ کولوں کیہڑے سوال پچھ سکنے آں؟ (‏عبرانیوں 13:‏5‏)‏

 ¹⁸ ایہہ چنگا ہوئے گا کہ اَسی اپنا جائزہ لئیے کہ اَسی پیسے بارے کیہو جہی سوچ رکھنے آں۔ اِنج کرن لئی اپنے آپ کولوں پچھو:‏ ”‏کیہہ مَیں اکثر پیسے بارے سوچدا رہنا واں تے ایہہ وی کہ مَیں ایہدے نال کیہہ کجھ خریداں گا؟ جے مَیں کسے کولوں پیسے اُدھار لئے نیں تے کیہہ مَیں واپس کرن چ دیر کرنا واں کیونکہ مینوں لگدا اے کہ قرضہ دین والے بندے نُوں ایہدی لوڑ نئیں اے؟ کیہہ پیسہ ہون دی وجہ توں مَیں اپنے آپ نُوں دُوجیاں نالوں خاص سمجھنا واں؟ پر جدوں دُوجیاں نُوں کجھ دین دی گل آندی اے تے مَیں کنجوسی کرنا واں؟ جے میرے کسے ہم‌ایمان کول کافی پیسہ اے تے کیہہ مَیں ایہہ سوچنا واں کہ اوہ یہوواہ نالوں بوہتا پیسے نال پیار کردا اے؟ کیہہ مینوں غریب لوکاں نالوں زیادہ امیر لوکاں نال دوستی کرن دا شوق اے؟“‏ ایہناں سوال تے غور کرنا بوہت ضروری اے۔ کیونکہ سانوں یہوواہ دے مہمان بنن دا اعزاز مِلیا اے تے اَسی نئیں چاہندے کہ پیسے نال پیار کرن دی وجہ توں اَسی ایہہ اعزاز کھو دَئیے۔ اَسی ہر قیمت تے یہوواہ دے مہمان بنے رہنا چاہنے آں۔ جے اَسی سب توں زیادہ یہوواہ نال پیار کراں گے تے اوہ سانوں کدی کلّا نئیں چھڈے گا۔‏‏—‏عبرانیوں 13:‏5 نُوں پڑھو۔‏

یہوواہ دے دوستاں نال پیار کرو

19.‏ یہوواہ ایہہ کیوں چاہندا اے کہ اَسی زبور 15 چ لکھی ہر گل تے عمل کرئیے؟‏

¹⁹ زبور 15 دے آخر چ ایہہ وعدہ کیتا گیا اے:‏ جیہڑا بندہ ایہہ سارے کم کردا اے، اوہ کدی وی نئیں ڈولے گا۔ (‏زبور 15:‏5‏)‏ ایس زبور نُوں لکھن والے نے اصل چ ایہہ دَسیا اے کہ یہوواہ ایہہ کیوں چاہندا اے کہ اَسی ایس زبور چ لکھی ہر گل تے عمل کرئیے۔ ایہدی وجہ ایہہ وے کہ یہوواہ چاہندا اے کہ اَسی خوش رہیے۔ ایس لئی اوہنے سانوں ایہو جہیاں ہدیتاں دِتیاں نیں جنہاں تے عمل کرن نال سانوں برکتاں مِل سکدیاں نیں تے اَسی محفوظ رہ سکنے آں۔—‏یسعیاہ 48:‏17‏۔‏

20.‏ یہوواہ دے مہمان کیس گل دی امید رکھدے نیں؟‏

²⁰ یہوواہ دے مہمان اِک شاندار مستقبل دی امید رکھدے نیں۔ پاک روح نال مسح ہوئے مسیحیاں نُوں اسمان تے اوس جگہ رہن دا موقع ملے گا جیہڑی یسوع نے اوہناں لئی تیار کیتی اے۔ (‏یوحنا 14:‏2‏)‏ جیہڑے لوک زمین تے ہمیشاں دی زندگی پان دی امید رکھدے نیں، اوہ اوس وعدے نُوں پورے ہوندیاں ویکھن گے جیہڑا مُکاشفہ 21:‏3 چ لکھیا اے۔ ایہہ ساڈے لئی بڑے مان دی گل اے کہ اَسی یہوواہ دے دوستاں دے طور تے اوہدے خیمے چ ہمیشاں تک اوہدے مہمان بن کے رہ سکنے آں۔‏