KUYUUJI 24
WAAÑI 24 Subamos a la montaña de Jehová
Juchixkej tatsɨʼyiñ jeʼm Jehová ityɨkjom
«Oh, Jehová, ¿iapaʼap wɨap ityɨgɨy jeʼm impuʼktuktɨkjom?» (SAL. 15:1).
AN̈KEJAYOʼOYI
Tyi ixunba Jehová iga tan̈wadyiñ siiga seguido tanamigojatoʼoba y juutypɨk tanaʼmaʼyiñ jeʼm iamigojyaj.
1. ¿Juutypɨk tayooxpaʼtpa jeʼm Salmo 15:1-5?
JEʼM kuyuuji naswɨʼɨp tan̈kuyujkataʼm iga jempɨk ikɨan̈kodayñeyajum iityi Jehová, tɨgɨyyajpa jeʼm ipuʼktuktɨkjom simbólica iga wɨaiñ iniityyaj tuum wɨnanɨgoʼoyi kun jeʼ. Pero ¿tyi tan̈wadyiñ iga wɨaiñ tanamigoja? Jeʼm Salmo 15 iniity an̈kejayoʼoyiyaj iga tayooxpaʼtpa iga majnam tan̈kunuʼguiñ Jehová (maayɨʼ Salmo 15:1-5). a
2. ¿Tyi sɨʼ idyɨk ikujɨɨs David jesɨgam ijɨykiʼm jeʼm Jehová ityɨk?
2 Jeʼm Salmo 15 mojpa kun yɨʼpyaj an̈maatyi: «Oh, Jehová, ¿iapaʼap wɨap ityɨgɨy jeʼm impuʼktuktɨkjom? ¿Iapaʼap wɨap ityɨgɨy jeʼm in̈kotsɨkyuk kuaʼyñewɨʼɨp?» (Sal. 15:1). Jesɨgam jeʼm salmista David nɨm jeʼm «impuʼktuktɨkjom», wɨapsɨ iga sɨʼ idyɨk ijɨɨs jeʼm tabernáculo iga jaʼy ityi en Gabaón. David nɨmtyim jeʼm «in̈kotsɨkyuk kuaʼyñewɨʼɨp» sɨʼ idyɨk ikujɨɨs jeʼm Sion itywɨʼɨp Jerusalén. Waatyi kilómetros jeʼm an̈eymɨ sur de Gabaón, David iwat tuum puʼktuktɨk juuty wɨap ichak idyɨk jeʼm arca del pacto hasta jesɨk wadaytya tuum tɨk (2 Sam. 6:17).
3. ¿Tyiʼiga tan̈kɨʼpin̈taʼmiñ jeʼm Salmo 15? (Aʼmɨtyim jeʼm imagen).
3 Dyaʼ ityumpɨy jeʼm israelitajyaj kuyooxaoyyaj en jeʼm tabernáculo, y dyatyim idyɨk wɨap ityɨgɨyyaj juuty ity jeʼm arca del pacto. Pero ityumpɨy jeʼm iyooxakɨʼɨwiñyaj wɨap idyɨk ityɨgɨyyaj jeʼm ipuʼktuktɨkjom simbólica siiga iniityyaj tuum wɨnanɨgoʼoyi kun jeʼ. Y jeʼam tansuntaʼmpa, jeʼyukmɨ jeʼm Salmo 15 in̈kejpa weeñi cualidades nasuntapaʼap iga tanaidyiñ siiga seguido tanamigojatoʼoba Jehová.
Jesɨgam jaʼy ityi David jeʼm israelitajyaj iwɨkutɨʼɨyɨyyajpa idyɨk juutypɨk tatɨgɨyba jeʼm Jehová ipuʼktuktɨkjom. (Aʼmɨ jeʼm párrafo 3).
TAWƗSƗSƗOʼYIÑ Y TAN̈WƗWATTAʼMIÑ
4. Siiga tansunba iga Jehová tawɨixiñ, ¿tyi nasuntaap iga tan̈wadyiñ? (Isaías 48:1).
4 Jeʼm Salmo 15:2 in̈matpa iga jeʼm Dios iamigo «wɨsɨsɨoʼyba» y «iwɨwatpa». Jeʼm an̈matyiyaj sɨsɨoʼyba y iwatpa nɨmtoʼoba iga juchixkej iwadyiñ jeempɨk. Pero, ¿wɨapsɨ tan̈wɨsɨsɨoytyaʼm? Jɨ. Mex iga tatan̈kaɨytyaʼm, Jehová iaʼmpa iga tawɨsɨsɨoʼyba jesɨk tan̈watpa juʼtspɨyam tawɨap iga tan̈kupɨkpa. Jesɨk tan̈kɨan̈kodaʼyba tañityi y tachin̈ba, yaguiñ mojpa tawɨsɨsɨoʼoyi. Tan̈kujɨɨstaʼmiñ, pekaʼ weeñi israelitajyaj ijɨykiʼmayyajpa idyɨk jeʼm Jehová iñɨɨyi, pero dyaʼ iwatyajpa «kun tuum wɨbɨk jɨɨxi ni kun justicia», jeʼyukmɨ iga wɨaiñ ityɨgɨyyaj jeʼm Jehová impuʼktuktɨkjom ikwiñkejyajiñ idyɨk iga iniityyaj tuum wɨbɨk jɨɨxi, ikuyujkayajiñ y ikupɨkyajiñ jeʼm Jehová ian̈kiʼmayoʼoyiyaj (maayɨʼ Isaías 48:1). b Jeempɨktyim naspa sɨɨ: siiga tansunba iga Dios tawɨixiñ, odoy numaaj tachin̈iñ y taidyiñ jeʼm Jehová ikumunjom, nasuntaap iga seguido tan̈wɨwadyiñ. ¿Y juutypɨk tan̈watpa?
5. ¿Juutypɨk iaʼmpa Jehová iga algun i wɨsɨsɨoʼyba y iwɨwatpa?
5 Jehová iaʼmpa iga «jempɨk wɨsɨsɨoʼyba» y «jempɨk iwɨwatpa» dyaʼ numaaj nɨkpa tumtum semana jeʼm an̈tuʼumaaji (1 Sam. 15:22). Iwatpa juʼtspɨyam wɨap iga juchixkej ikupɨkpa mex iga itypa ikutyum (Prov. 3:6; Ecl. 12:13, 14). Siiga taɨchtyam juchixkej tan̈kupɨktaʼmpa Jehová, tanakwiñkejpa iga tantoyba y jesɨk jeʼ tatoybatyim (Juan 14:23; 1 Juan 5:3).
6. Juʼuts nɨmpa Hebreos 6:10-12, ¿tyiʼiga seguido tan̈kuyooxaiñ Jehová mex iga jaʼyan̈am amtyɨyam sɨʼ tan̈wat?
6 Mex iga Jehová tsaam ichoowaixpa iga tan̈kuyooxanetaʼm y jaʼyan̈am amtyɨy sɨʼ tan̈wat dyaʼ nɨmtoʼoba iga juchixkej wɨap tantsɨʼy jeʼm ipuʼktuktɨkjom juʼuts nɨmpa Hebreos 6:10-12 (maayɨʼ). Jehová ixunba iga seguido tan̈kuyooxataʼmiñ kun ityumpɨy tananmaj hasta jesɨk nuʼkpa jeʼm aktogoyoʼoyi. Siiga dyaʼ tasoʼpspa, jeʼm jomnaxyukmɨ seguido tanamigojaap (Gál. 6:9).
TANUUMAN̈MADYIÑ
7. ¿Juutypɨk tanakwiñkejpa iga tanuuman̈matpa tananmajom?
7 Salmo 15:2 in̈matpa iga jempɨk Jehová ityɨʼppa impuʼktuktɨkjom «nuuman̈matpa ianmajom». Dyaʼ numaaj iga odoy tamɨgoytyaʼmiñ, Jehová ixunba iga tanuuman̈mattaʼmiñ y tan̈wɨwattaʼmiñ juchixkej (Heb. 13:18). Tanteguedaiñ tan̈wat jeempɨk iga «Jehová ijooyixpa jempɨk tsaam imalwatyajpa pero iniity tuum wɨnanɨgoʼoyi kun jempɨk iwɨwatyajpa» (Prov. 3:32).
8. ¿Tyi dyaʼ tan̈wattamtoʼoba?
8 Jempɨk «nuuman̈matpa ianmajom» dyaʼ numaaj ikupɨkpa jeʼm Dios ian̈kiʼmayoʼoyiyaj jesɨk sɨʼ iaʼmta, y imalwatpa jesɨk itypa ikutyum (Is. 29:13). ¿Tyiʼiga algun i mojpa imalwat? Jesɨk ijɨɨspa iga weeñi Jehová ian̈kiʼmayoʼoyiyaj dyaʼ nasuntaap iga juchixkej kupɨktaiñ (Sant. 1:5-8). Wɨapsɨ ijɨɨs iga dyaʼ sɨʼ imalwat. Y siiga iaʼmpa iga dyaʼ joodon̈ataap jempɨk sɨʼ iwat, wɨap iga majtyim imalwatpa y dyam iwɨkoosteñaʼyba Jehová (Ecl. 8:11). Taɨchtyam juchixkej tanuuman̈mattoʼoba y tan̈wɨwattoʼoba.
9. ¿Tyi tan̈kejaʼyba jempɨk nas jesɨk Jesús iixpɨk Natanael? (Aʼmɨtyim jeʼm imagen).
9 Tsaam wɨɨ siiga tanuuman̈matpa y tan̈wɨwatpa, jeʼam tan̈kejaʼyba Jesús jesɨgam iixpɨk Natanael. Jesɨk Felipe ininɨk jeʼm iamigo Natanael iga iixpɨguiñ, Jesús nɨm: «Yɨɨm miñpa tu̱m nunta Israelpɨc pɨ̱xiñ, jém d́apɨc inii̱ mɨgooyi» (Juan 1:47). Ijoodon̈ idyɨk iga jeʼm tun̈gak idiscípulos dyatyim mɨgoyyajpa, pero jesɨgam iixpɨk Natanael iaʼm iga tsaam iwɨakwiñkejpa yɨʼp wɨbɨk jɨɨxi mex iga tan̈kaɨytyim idyɨk juʼuts taɨchtyam. Jesús aʼman̈jak juʼuts idyɨk Natanael y ianmajan̈chiʼ. Tsaam tamaymaytyam siiga Jesús jeempɨktyim taaʼmpa.
Jesɨk Jesús iixpɨk Natanael nɨm iga jeʼ dyaʼ mɨgoyba. ¿Jeʼtyimsɨ ijɨɨspa de taɨchtyam? (Aʼmɨ jeʼm párrafo 9).
10. ¿Tyiʼiga nasuntaap iga tan̈kuixiñ tyi tanɨmpa? (Santiago 1:26).
10 Jeʼm an̈kiʼmayoʼoyiyaj itywɨʼɨp en Salmo 15 tan̈kejaʼyba juʼutspɨk trato tanchiʼiyajiñ tun̈gakyaj. Salmo 15:3 nɨmpa iga Jehová ipɨktson̈ba jeʼm ipuʼktuktɨkjom «jempɨk dyaʼ kujɨʼyoʼyba, jempɨk dyaʼ imalwadaʼyba tun̈gakyaj y dyaʼ ikujɨʼyba iamigojyaj». Siiga tamɨgoʼyba dyaʼ numaaj tammalwadaʼyba tun̈gakyaj; dyatyim wɨap tañity jeʼm Jehová impuʼktuktɨkjom (maayɨʼ Santiago 1:26).
11. ¿Tyi iwatpa jempɨk kujɨʼyoʼyba y tyi iñaskaʼaba jempɨk dyaʼ ikakpa ijɨɨxi?
11 Jeʼm salmista ijɨykiʼm jempɨk kujɨʼyoʼyba. ¿Tyi nɨmtoʼoba? Jesɨk algun i in̈matpa mɨgoʼoyiyaj iga imalwadaytyoʼoba tun̈gak. Jempɨk iwatpa yɨʼɨmpɨk y dyaʼ ikakpa ijɨɨxi wɨapsɨ iga dyam tsɨʼyba juʼuts Testigo (Jer. 17:10).
12, 13. ¿Juutypɨk wɨap tammalwadayyaj jeʼm tanamigoj mex iga dyaʼ tan̈wattamtoʼoba? (Aʼmɨtyim jeʼm imagen).
12 Salmo 15:3 takjɨɨspatyim iga jempɨk itypa jeʼm Jehová ipuʼktuktɨkjom «dyaʼ imalwadaʼyba tun̈gakyaj y dyaʼ ikujɨʼyba iamigojyaj». ¿Juutypɨk tammalwadaʼyba jeʼm tanamigojyaj?
13 Wɨapsɨ iga mojpa tan̈kujɨyaj mex iga dyaʼ tamalwadayyajtoʼoba. Tan̈kujɨɨstaʼmiñ: 1) tuum yoomtɨwɨ dyam kuyooxaoʼyba a tiempo completo, 2) tuum an̈komɨʼɨyi dyam kuyooxaoyyajpa Betel o 3) tuum tɨɨwɨ dyam kuyooxaoʼyba juʼuts anciano o siervo ministerial. ¿Jobitytyi tanan̈jɨɨsjakpa iga imalwatyaj y mojpa tanan̈madayyaj tun̈gakyaj? Wɨapsɨ iga dyaʼ tanjoodon̈tam tyiʼiga ipɨkyaj yɨʼp jɨɨxi. Y tan̈kujɨɨstaʼmiñ iga jempɨk ityyaj jeʼm Jehová ipuʼktuktɨkjom «dyaʼ imalwadaʼyba tun̈gakyaj y dyaʼ ikujɨʼyba iamigojyaj».
Dyaʼ tan̈kaʼ tan̈kujɨyyaj tun̈gakyaj mex iga dyaʼ tammalwadayyajtoʼoba idyɨk. (Aʼmɨ jeʼm párrafojyaj 12 y 13).
TANAN̈PƗʼTSYAJIÑ JEMPƗK IKUPƗKYAJPA JEHOVÁ
14. ¿Tyi iwatyajiñ jempɨk ityyajtoʼoba jeʼm Jehová ipuʼktuktɨkjom?
14 Salmo 15:4 nɨmpa iga jeʼm Jehová iamigo «dyaʼ in̈pɨʼtspa jempɨk imalwatyajpa». Iga tatan̈kaɨytyaʼm dyaʼ jobity wɨap tan̈kutɨʼɨyɨy siiga algun i imalwatpa o dyaʼ, wɨapsɨ iga maaj dyaʼ tan̈kaʼ tan̈wɨnanɨgayyaj weeñiyaj, y tun̈gakyaj uxan̈ tan̈kaʼ iga dyaʼ tumtyi jɨɨxi tanaitytyaʼm. Pero Jehová tanɨʼmaʼyba iga odoy tanan̈pɨʼtsyajiñ jempɨk imalwatyajpa (1 Cor. 5:11). Juʼuts jempɨk tan̈kawatyajpa y dyaʼ ikakyajpa ijɨɨxi, jempɨk dyaʼ ikwiñkejayyajpa respeto jeʼm Jehová ian̈kiʼmayoʼoyiyaj y ikkupoʼnaketyajtoʼoba jeʼm tan̈wɨnanɨgoʼoyi kun jeʼ (Prov. 13:20).
15. ¿Juutypɨk tan̈wɨwadayyajpa «jempɨk ikɨɨn̈yajpa Jehová»?
15 Salmo 15:4 nɨmpa iga tan̈wɨwadayyajiñ «jempɨk ikɨɨn̈yajpa Jehová». Jeʼyukmɨ tanyaʼachan̈jaamyajpa y tanakwiñkejayyajpa respeto jeʼm Dios iamigo (Rom. 12:10). ¿Juutypɨk wɨap tan̈wat? Salmo 15:4 nɨmpa iga jempɨk itytyoʼoba jeʼm Jehová ipuʼktuktɨkjom «mex iga dyatyi ikooñwɨʼyba ikkupakpa jempɨk nɨmneʼ». Siiga dyaʼ tanakkupakpa jeʼm tanan̈matyiyaj wɨap tammalwaday tun̈gakyaj (Mat. 5:37). Tan̈kujɨɨstaʼmiñ, Jehová ixunba iga jempɨk an̈koʼmɨyñeyajum ikkupakyajiñ jempɨk najɨykamayñeyajta. Ixunbatyim iga jeʼm jaatun̈yaj ikkupakyajiñ jempɨk iñɨʼmayyajpa imanɨktam. Iga tantoyba Dios y tun̈gakyaj tan̈watpa juʼtspɨyam tawɨap iga tanakkupakpa jeʼm tanan̈matyiyaj.
16. ¿Juutypɨknam wɨap tan̈wɨwadayyaj jeʼm Jehová iamigojyaj?
16 Wɨaptyim tan̈wɨwadayyaj jeʼm Dios iamigojyaj siiga tanyooxpaʼtyajpa kun tyityam tanaity y siiga tan̈wɨpɨktson̈yajpa (Rom. 12:13). Siiga tantɨʼppa jeʼm tantɨwɨtam jesɨk tan̈watpa algun tyi, majtyim tan̈wɨnanɨgayyajpa y tampɨɨmchiʼiba jeʼm tan̈wɨnanɨgoʼoyi kun Jehová y sɨʼtyim tan̈watkiʼps.
ODOY TANTOʼYIÑ JEʼM TUMIÑ
17. ¿Tyiʼiga jeʼm Salmo 15 ijɨykiʼmpa jeʼm tumiñ?
17 Jeʼm Salmo 15 nɨmpatyim iga jempɨk ityyaj jeʼm Jehová ipuʼktuktɨkjom «dyaʼ aknuksoʼyba tumiñ iga maaj jaʼyan̈ akseedaytyaiñ y dyaʼ ipɨktson̈ba tumiñ iga imalwadaʼyba jempɨk dyaʼ imalwatneʼ» (Sal. 15:5). ¿Tyiʼiga yɨʼp salmo ijɨykiʼmpa jeʼm tumiñ? Siiga dyaʼ tanakuixtyaap wɨapsɨ iga mojpa tantoy jeʼm tumiñ. Siiga naspa yɨʼɨmpɨk, wɨap tammalwaday tun̈gakyaj y wɨaptyim tampatstogoy jeʼm tan̈wɨnanɨgoʼoyi kun Jehová (1 Tim. 6:10). Wiñɨk, weeñi israelitajyaj iknuʼksyajpa tumiñ jeʼm ityɨwɨtam iga maaj jaʼyan̈ akseedayyajtaiñ. Itytyim idyɨk jueces iga ipɨktson̈yajpa tumiñ iga ikumɨgoʼyba jempɨk dyaʼ imalwatneʼ. Jehová ijooyixpa ityumpɨy yɨʼp (Ezeq. 22:12).
18. ¿Tyi wɨɨ iga tanakwaʼktamtaiñ? (Hebreos 13:5).
18 Siiga tanjoodon̈atoʼoba iga tantoyba jeʼm tumiñ. Tanakwaʼktamtaiñ: «¿Juchixkej anjɨɨspa jeʼm tumiñ y tyityam anjuytyoʼoba? Siiga algun i aknuʼkspa tumiñ, ¿dyaʼ jobity anakseedaʼyba iga anjɨɨspa iga dyaʼ ityogoyay? ¿Anakujiʼptaap iga atumiñɨy? ¿Tan̈kaʼ anyooxpaʼt tun̈gakyaj kun tyityam anaity? ¿Tyi anjɨɨspa jesɨk anaʼmpa iga tuum tɨɨwɨ tumiñɨy? ¿Anan̈pɨʼtspa numaaj jempɨk tumiñɨyyaj?». Odoy tampatstogoytyaʼmiñ jeʼm wɨbɨk xaaja iga Jehová tatɨʼpneʼ jeʼm ipuʼktuktɨkjom. Odoy tantoytyaʼmiñ jeʼm tumiñ, siiga tan̈watpa jeempɨk, Jehová dyaʼ tatsakpa tan̈kutyum (maayɨʼ Hebreos 13:5).
JEHOVÁ ITYOYBA JEʼM IAMIGOJYAJ
19. ¿Tyiʼiga Jehová tachiʼiba an̈kiʼmayoʼoyiyaj en Salmo 15?
19 Jeʼm Salmo 15 kuyajpa kun yɨʼp jɨykamoʼoyi: «Jempɨk iwatpa yɨʼɨmpɨk dyaʼ tyi ixiʼkspa» (Sal. 15:5). Yɨʼɨmpɨgam jeʼm salmista in̈kejpa iga Jehová tachiʼiñeʼ yɨʼpyaj an̈kiʼmayoʼoyiyaj iga ixunba iga tamaymayataʼmiñ. Tan̈kejaʼybatyim juutypɨk wɨap tampɨktson̈ ikumaykedoʼoyi y ikuixoʼoyi (Is. 48:17).
20. ¿Juʼptam kumaykedoʼoyiyaj ipɨktson̈yajpa jempɨk ityyajum jeʼm Jehová ipuʼktuktɨkjom?
20 Jempɨk ityyajum jeʼm Jehová ipuʼktuktɨkjom y kupɨgoyyajpa ipɨktson̈yajpa jaʼyan̈ kumaykedoʼoyiyaj. Jeʼm kupin̈neyajtawɨʼɨp nɨkpa ityiyaj sɨn̈yukmɨ kun Jesús (Juan 14:2). Jempɨk ityyajpa yɨʼp Naxyukmɨ ipɨktson̈yajpa jeʼm kumaykedoʼoyiyaj ijɨykimpaʼap Apocalipsis 21:3. ¡Tuum wɨbɨk xaaja iga Jehová tatɨʼpneʼ iga tanamigojaiñ! ¡Juchixkej wɨap tantsɨʼytyaʼm jeʼm Jehová ipuʼktuktɨkjom!
WAAÑI 39 Un buen nombre ante Dios
a Salmo 15:1-5: Oh, Jehová, ¿iapaʼap wɨap ityɨgɨy jeʼm impuʼktuktɨkjom? ¿Iapaʼap wɨap ityɨgɨy jeʼm in̈kotsɨkyuk kuaʼyñewɨʼɨp? 2 Jempɨk wɨsɨsɨoʼyba, jempɨk iwɨwatpa y nuuman̈matpa ianmajom. 3 Jempɨk dyaʼ kujɨʼyoʼyba, jempɨk dyaʼ imalwadaʼyba tun̈gakyaj y dyaʼ ikujɨʼyba iamigojyaj. 4 Dyaʼ in̈pɨʼtspa jempɨk imalwatyajpa, pero in̈pɨʼtspa jempɨk ikɨɨn̈yajpa Jehová. Mex iga dyatyi ikooñwɨʼyba ikkupakpa jempɨk nɨmneʼ. 5 Dyaʼ aknuksoʼyba tumiñ iga maaj jaʼyan̈ akseedaytyaiñ y dyaʼ ipɨktson̈ba tumiñ iga imalwadaʼyba jempɨk dyaʼ imalwatneʼ. Jempɨk iwatpa yɨʼɨmpɨk dyaʼ tyi ixiʼkspa.
b Isaías 48:1: Maton̈taʼamɨ yɨʼp, tɨgan̈juj de Jacob, mimichtyam iga miknɨʼɨyakatamtaap Israel y miputnetaʼm de Judá, mimichtyam iga in̈wattaʼmpa juramento kun jeʼm Jehová iñɨɨyi y inin̈wejpaʼttaʼmpa jeʼm Israel iDios, dyaʼ in̈wattaʼmpa kun tuum wɨbɨk jɨɨxi ni kun justicia.
