1. Dahme kahrehda kitail kak paiekihda atail koasoiapene Melkahka 15:​1-5?

 NAN iren onop en mwoweo, kitail sukuhlki me irail kan me inoukihong Siohwa arail mour oh ahneki nanpwungmwahu keren reh kak wia emen me e ketin lukehiong nan sapwellime impwal. Ahpw ia duwen atail kak ahneki nanpwungmwahu wet? Melkahka irelaud 15 koasoia duwen wet. (Wadek Melkahka 15:​1-5.) Melkahka wet padahkihong kitail dahme kitail anahne wia pwehn karanihala Koht.

2. Dahme Depit ele medemedewe ni eh koasoia duwen sapwellimen Siohwa impwal?

² Melkahka irelaud 15 tepikihda “Maing KAUN, ihs me kak patohlong nan Tehnpasomwi? Ihs me kak patohwan kaudok pohn Saion, sapwellimomwi dohl sarawio?” (Mel. 15:1) Ni ahnsou me sounmelkahkao Depit koasoia ‘tehnpesen’ Siohwa, ele e medemedewe duwen impwal sarawio, me mi Kipeon erein ahnsou ehu. Depit pil koasoia sapwellimen Koht “dohl sarawio” me ele dokedoke Saion nan Serusalem. Wasao me mi mwail kei ni palieir en Kipeon, Depit wiahda impwal ehu oh kihong kohpwahn inowo lao tehnpas sarawio kak wiawihda.—2 Sam. 6:17.

3. Dahme kahrehda kitail men wehwehkihla Melkahka irelaud 15? (Pil kilang kilel.)

³ Ei mehlel, pali laud en mehn Israel kan sohte mweimwei en papah nan impwal sarawio, oh me malaulaute me pedolong nan impwalo wasa me kohpwahn inowo mi ie. Ahpw sapwellimen Siohwa ladu lelepek kan koaros kak wiahla tohn eh impwalo sang ni arail wiahla oh wiahte kompoakepah. Kitail koaros men wia met. Melkahka irelaud 15 padahkihong kitail dahme kitail anahne wia pwehn wiahte kompoakepahn Siohwa.

 PEIKIONG KOHT OH WIA DAHME PWUNG

4. Ia duwen atail ese me kaidehn en papidaislalahte me Siohwa ketin kupwurki sang kitail? (Aiseia 48:1)

⁴ Melkahka 15:2 mahsanih me kompoakepahn Koht men iei “me kin peikiong Koht ni mehkoaros oh kin wia me pwung ahnsou koaros.” Kitail anahne pousehlahte wia met. Ahpw ia duwe, kitail kak uhdahn “peikiong Koht”? Ei. Mendahki sohte aramas emen unsek, Siohwa pahn ketin wiahkin kitail emen me kin “peikiong” ih ma kitail wia uwen atail kak koaros en peikiong. Ni atail inoukihong Koht atail mour oh papidaisla, ih met tepidahn atail papah Koht. Karasepe, nan Paipel mehnda ma emen wia mehn Israel men, met sohte wehwehki me e iang kisehn irail kan me Siohwa ketin lukehdo nan sapwellime impwal. Ekei kin likweriong Koht ahpw re ‘sohte kin mehlel.’ (Wadek Aiseia 48:1.) Mehn Israel kan me ahneki mohngiong mehlel anahne sukuhlki kupwuren Siohwa kan oh idawehn. Duwehte met, pwehn ahneki nanpwungmwahu keren rehn Siohwa rahnwet, kitail anahne wia laudsang en papidaislahte nin duwen emen Sounkadehdehn Siohwa kan. Kitail anahne pousehlahte “wia me pwung ahnsou koaros.” Ia duwen atail kak wia met?

5. Ia wehwehn en peikiong Siohwa ni soahng koaros?

⁵ Ong Siohwa, en “peikiong Koht” oh “wia me pwung” kin pidada laudsang en kaukaule iang towehda mihting nan Wasahn Kaudok. (1 Sam. 15:22) Kitail pil anahne nantihong peikiong Koht ni soahng koaros me kitail kin wia, pil ni atail kin kelehpwla. (Lep. Pad. 3:6; Ekl. 12:​13, 14) E pil kesempwal me kitail en song peikiong Siohwa pil ni soahng kan me sohte mwomwen kesempwal. En wia met kin kasalehda me kitail uhdahn poakohng ih oh pil kalaudehla eh ketin poakohng kitail.—Sohn 14:23; 1 Sohn 5:3.

6. Nin duwen me Ipru 6:​10-12 mahsanih, dahme kesempwalsang soahng kan me kitail wiahda mahso?

 ⁶ Siohwa uhdahn ketin kupwurperenki soahng kan me kitail wiahiong ih mahso. Ahpw, atail wiahda soahng mwahu kan mahso sohte wehwehki me kitail pahn wiahte emen me e ketin lukehdohng nan sapwellime impwal. Met sansal nan Ipru 6:​10-12. (Wadek.) Siohwa sohte kin ketin manokehla soahng mwahu kan me kitail wiahda mahso. Ahpw e ketin kupwurki kitail en kaudokiong ni mohngiong unsek lao “lel ni imwi.” E pahn ketin wiahte kompoakepatail kohkohlahte “ma kitail sohte pahn pwangahkihda.”—Kal. 6:9.

KOASOI MEHLEL NAN OMW MOHNGIONG

7. Ia wehwehn en kin koasoi mehlel nan atail mohngiong?

⁷ Emen me men iang irail kan me Siohwa ketin lukehdo nan eh impwal anahne kin “koasoi mehlel nan eh mohngiong.” (Mel. 15:​2, NW) Met pidada laudsang en dehr likamw. Siohwa ketin kupwurki kitail en kin mehlel ni soahng koaros me kitail nda oh wia. (Ipru 13:18) Met kesempwal pwehki “KAUN-O kin ketin kalahdeki aramas akan me kin wia me suwed, ahpw e kin ketin kompoakepahnki me pwung kan.”—Lep. Pad. 3:32.

8. Tiahk dah me kitail anahne soikala?

⁸ Irail me kin ‘koasoi mehlel nan arail mohngiong’ sohte kin peikiongete Koht ni meteikan ar kin kilang irail ahpw mwuhr wia soahng suwed kan. (Ais. 29:13) Irail sohte men wia aramas widing. Aramas widing men ele kin tepida medewe me sapwellimen Siohwa kosonned kan sohte kin ahnsou koaros mwahu. (Seims 1:​5-8) Ele e sohte kin peikiong Siohwa ni soahng kan me e medewe me sohte nohn kesempwal. Eri ma soahng suwed kan sohte wiawihong ih ni ahnsou me e sapeik, ele e pahn tepida wia soahng kan me pil suwedsang. Mehnda ma e medewe me e kin papah Koht, Siohwa sohte pahn ketin kupwurki eh kaudok. (Ekl. 8:11) Ahpw kitail kin men mehlel ni soahng koaros.

9. Dahme kitail kak sukuhlkihsang ehdin ahnsou me Sises tuhwong Nadaniel? (Pil kilang kilel.)

⁹ E uhdahn kesempwal en wia emen me kin “koasoi mehlel nan eh mohngiong.” Kitail kak  kilang met sang dahme wiawi ni Pilip eh lukehdo kompoakepaho Nadaniel en tuhwong Sises. Mendahki ehdin Sises eh ketin tuhwong Nadaniel, e mahsanih: “Kilang, uhdahn mehn Israel men ih me sohte kin widing.” (Sohn 1:47) Sises mwahngih me sapwellime tohnpadahk teiko kin mehlel, ahpw Nadaniel me kin keieu mehlel. Nadaniel sohte unsek duwehte kitail. Ahpw e sohte kin mwalaun oh kin mehlel ni soahng koaros. Sises ketin kupwurperenki met oh kapingahki Nadaniel. Ei mehlel, kitail koaros men Sises en ketin kilengwohng kitail ni ahlohte!

10. Dahme kahrehda kitail anahne kanahieng dahme kitail kin nda? (Seims 1:26)

¹⁰ Pali laud en dahme kileldi nan Melkahka irelaud 15 kin pidada mwomwen atail wiewia ong meteikan. Melkahka 15:3 mahsanih me emen me lukodohng nan sapwellimen Siohwa impwal “sohte kin karaunmwahlih meteikan, e sohte kin wia mehkot sapwung ong kompoakepah kan, oh sohte kin ndindaseli mehn mpe kan.” Ma kitail kin karaunlikamwih meteikan, e uhdahn pahn kamedekeirailla oh kitail sohla pahn wia emen me lukodohng nan sapwellimen Siohwa impwal.—Wadek Seims 1:26.

11. Dahkot karaunlikamw, oh dahme pahn wiawihong emen me kin karaunlikamwih meteikan oh sohte koluhla?

¹¹ Sounmelkahkao koasoia duwen karaunlikamw. Dahkot karaunlikamw? E kin wehwehki koasoi likamw me kak kauwehla ahn emen adamwahu. Ma emen karaunlikamwih meteikan oh sohte koluhla, e solahr kak wia emen Sounkadehdehn Siohwa.—Ser. 17:10.

12-13. Ia ekei irair kan me kitail kakete kahdsuwedih kompoakepatail kan? (Pil kilang kilel.)

¹² Melkahka 15:3 pil katamankihong kitail me irail kan me lukodohng nan sapwellimen Siohwa impwal, sohte kin wiahiong kompoakparail kan mehkot suwed oh kahdsuwedih kompoakparail kan. Ia duwen atail kak kahdsuwedih kompoakepatail kan?

 ¹³ Kitail kakete kahdsuwedihala emen sang ni atail ndaseli soahng suwed kan me pid ih. Karasepe: (1) sister men sohla pioneer. (2) pwopwoud ehu sohla papah nan Pedel, de (3) brother men sohla wia elder de sounsawas. E pahn sapwung en padahkihong meteikan me brother oh sister pwukat ele wiahda mehkot sapwung ihme kahrehda arail irairo wekila. Ele mie kahrepe tohto me irairo wengkihla me kitail sehse. Patehng met, emen me lukodohng nan sapwellimen Siohwa impwal “sohte kin karaunmwahlih meteikan. E sohte kin wia mehkot sapwung ong kompoakepah kan.”

WAUNEKI IRAIL KAN ME KIN LEMMWIKI SIOHWA

14. Menlau kawehwehda ia duwen irail kan me lukodo nan sapwellimen Siohwa impwal ar pahn soikala “irail kan me Koht kin ketin soikala.”

¹⁴ Melkahka 15:4 mahsanih me kompoakepahn Siohwa men “kin kailongki irail kan me Koht kin ketin soikala.” Ia duwen atail kak wia met? Kitail sohte kak ese ma Koht ketin soikala emen de soh sang ni dahme kitail pein ese de mwahuki. Dahme kahrehda? Kitail sohte unsek, oh kitail kakete perenki ekei me mengei en patehng oh sohte perenki irail me kin kalidorih kitail. Eri kitail en soikalahte irail kan me Siohwa ketin “soikala.” (1 Kor. 5:11) Met iangahki irail kan me sohte kin koluhkihla sapwung kan me re wiahda, sohte wauneki dahme kitail kamehlele, de song en kaluwetehla atail nanpwungmwahu rehn Siohwa.—Lep. Pad. 13:20.

15. Ia ehu elen wauneki “irail kan me kin peikiong” Siohwa?

¹⁵ Mwurin mwo, Melkahka 15:4 mahsanih me kitail en wauneki “irail kan me kin peikiong KAUN-O.” Eri kitail kin rapahki ahl akan en kasalehda kadek oh wauneki kompoakepahn Siohwa kan. (Rom 12:10) Ia duwen? Nin duwen me Melkahka 15:4 mahsanih, ehu ahl iei me emen me lukodohng nan sapwellimen Siohwa impwal “kin kapwaiada dahme e inouki ahnsou koaros, mehnda ma e apwal.” Ma kitail kauwehla atail inou kitail pahn kamedekihala meteikan. (Mad. 5:37) Karasepe, Siohwa ketin kasik pwopwoud kan en kapwaiada arail inou en pwopwoud. E pil ketin kupwurperenki ni pahpa nohno kan ar kin kapwaiada inou kan me irail wiahiong neirail seri kan. Pwehki kitail poakohng Koht oh meteikan, kitail pahn wia uwen atail kak en kapwaiada atail inou.

16. Ia ehu elen wauneki kompoakepahn Siohwa kan?

¹⁶ Ehu elen wauneki kompoakepahn Koht kan iei sang atail kasamwo meteikan oh kasalehda kadek. (Rom 12:13) Ni atail kin patehng riatail Kristian kan kaidehn ahnsoun mihtingte de kalohk, kitail kin karanihala irail oh Siohwa. Pil ehu, ni atail kin kasamwo meteikan, kitail kin alasang Siohwa.

SALEDEKSANG LIMPOAK EN MWOHNI

17. Dahme kahrehda Melkahka 15 koasoia duwen mwohni?

¹⁷ Kitail wadek me irail me lukodohng nan sapwellimen Siohwa impwal “sohte kin ale wihnen nah mwohni me aramas pekihsang pwe re en doadoahngki; oh e pil sohte pahn wia sounkadehde likamw ong emen me sohte dipe pwe en ale pweine.” (Mel. 15:5) Dahme kahrehda sounmelkahkao koasoia duwen mwohni? Pwehki ma kitail nohn poakohng mwohni, e kak wiahla mehkot me kesempwal sang aramas oh pil atail nanpwungmwahu rehn Koht. (1 Tim. 6:10) Nan Paipel, ekei kin isanekihla riarail kan me semwehmwe sang ni arail kahrehiong irail en pwain laudsang dahme re pekihsang. Pil ehu, ekei sounkopwung kan kin ale mwohni sang meteikan oh eri kopwung  sapwungih me sohte wiahda sapwungo. Siohwa kin ketin kalahdeki soangen wiewia pwukat.—Esek. 22:12.

18. Peidek dah kan me kak sewese kitail en kasawih atail madamadau me pid mwohni? (Ipru 13:5)

¹⁸ E mwahu ong kitail en kasawih atail madamadau me pid mwohni. Pein idek rehmw: ‘I kin kalapw medemedewe duwen mwohni oh dahme e kak pwainda? Ma I kin pekihsang emen mwohni, I kin pwand en kapwungala, oh medewe me aramaso sohte anahne? En naineki mwohni kin kahrehiong ie en medewe me I mwahusang meteikan? E kin apwal ong ie en kasalehda kadek ong meteikan? I kin medewe me ma riei Kristian kan naineki diren mwohni, met wehwehki me irail poakohng mwohni laudsang Siohwa? I men kompoakepahnkihte irail kan me kepwehpwe a kaidehn me semwehmwe?’ E kesempwal en idek soangen peidek pwukat pwehki kitail alehdier luhk en iang mi nan sapwellimen Siohwa impwal. Kitail kak pere pai kaselel wet sang ni atail dehr poakohng mwohni. Ma kitail wia met, Siohwa sohte pahn ketin mweisang kitail!—Wadek Ipru 13:5.

SIOHWA KETIN POAKOHNG KOMPOAKEPAH KAN

19. Dahme kahrehda Siohwa ketin kupwurki kitail en wia soahng koaros me kileldi nan Melkahka 15?

¹⁹ Melkahka 15 kaimwisengkihla inou wet: “Me kin kapwaiada mepwukat pahn pehm saledek sang apwal kohkohlahte.” (Mel. 15:5) Sounmelkahkao kawehwehda dahme kahrehda Siohwa ketin kupwurki kitail en wia soahng koaros me kileldi nan melkahka wet. Siohwa ketin kupwurki kitail en peren. Ni atail kin kapwaiada dahme Siohwa ketin kupwurki kitail en wia, kitail pahn ahneki mour nsenamwahu oh e pahn ketin pere kitail.—Ais. 48:17.

20. Dahme irail me lukodohng nan sapwellimen Siohwa impwal kak kasikasik?

²⁰ Irail kan me lukodohng nan sapwellimen Siohwa impwal kak kasik ahnsou kaselel ehu ni ahnsou kohkohdo. Irail me keidi kan pahn mour nanleng wasa me Sises ketin kaunopada ong irail. (Sohn 14:2) Irail kan me ahneki koapworopwor en mour kohkohlahte nin sampah kin kasikasik dahme Kaudiahl 21:3 inoukihda. E uhdahn wia pai kaselel me Siohwa ketin lukei kitail en mi nan eh impwal kohkohlahte!