1. Kuma ku Salmu 15:​1-5 pudi judanu?

 NA STUDU ku pasa, no aprindi di kuma kilis ku dedika se vida pa Jeova i ku kontinua tene un amisadi intimu ku el, pudi mora na si kau simboliku. Ma ke ku no pudi fasi pa pudi mora nes kau? Salmu 15 papia des asuntu. (Lei Salmu 15:​1-5.) Es salmu kontanu ke ku no dibi di fasi pa sedu amigu intimu di Deus.

2. Ke talves ku Davi staba na pensa nel, oca i fala di kau di mora di Jeova?

² Salmu 15 kumsa ku es purguntas: “SIÑOR, kin ku pudi mora na bu kasa? Kin ku pudi mora na bu monti sagradu?” (Sal 15:1) Kontra Davi staba na fala di “kasa” di Jeova, talves i staba na pensa na tabernakulu ku staba na Jibeon pa un tempu. Suma Davi falaba tambi di “monti sagradu”, talves i staba na pensa na tabernakulu ku staba na monti Sion na Jerusalen. Serka di 10 kilometru na sul di Jibeon, Davi kumpu un tenda pa pui arka di kontratu te oca ku templu kumpudu. — 2 Sam 6:17.

3. Pabia ku no pirsisa di ntindi Salmu 15? (Jubi tambi diseñu.)

³ Na bardadi, maioria di israelitas ka ciga di sirbi na tabernakulu, i so puku delis ku ta yentra dentru di tenda, nunde ku arka di kontratu pudu. Ma tudu servus fiel di Jeova pudiba mora na si kau simboliku, ora ke kontinua sedu si amigus. Es i un kusa ku anos tudu no misti. Salmu 15 kontanu ke ku no pirsisa di fasi pa kontinua sedu amigus di Jeova.

 YANDA SIN KULPA, I FASI KUSAS KI JUSTU

4. Kuma ku no sibi di kuma batismu i ka fin di tudu ke ku Jeova misti pa no fasi? (Isaias 48:1)

⁴ Salmu 15:2 fala di kuma, un amigu di Deus i “kil ku ta yanda sin kulpa, i ta fasi kusas ki justu”. Palabras “yanda” ku “fasi” na fala di un kusa ku no dibi di kontinua fasi. Ma sera ki na bardadi no pudi “yanda sin kulpa”? Sin. Suma nin un pekadur i ka perfeitu, Jeova na ojanu suma kilis ku ta “yanda sin kulpa”, si no fasi no minjor pa obdisil. Ora ku no dedika no vida pa Jeova i batisa, no ta sta so na kumsa yanda ku Deus. Pur isemplu, na tempus bibliku un algin ka ta mora na kau di Jeova, so pabia di kuma i seduba israelita. Alguns ta comalba, ma i ka “ku bardadi, nin i ka ku korson limpu.” (Lei Isaias 48:1.) Israelitas sinseru tenba di aprindi normas di Jeova i sigi elis. Aos tambi, si no misti tene un amisadi forti ku Jeova, no ka dibi di so batisa i comadu Tustumuñas di Jeova, ma no dibi di fasi mas di ki kila. No dibi di kontinua “fasi kusas ki justu.” Kuma ku no pudi fasil?

5. Ke ku signifika obdisi Jeova na tudu kusa?

⁵ Pa Jeova, “yanda sin kulpa” i “fasi kusas ki justu” signifika mas di ki so bai runions sempri na Salon di Renu. (1 Sam 15:22) No dibi di sforsa pa obdisi Jeova na tudu arias di no vida, mesmu ora ku no sta anos so. (Dit 3:6; Ekl 12:​13, 14) I importanti pa no sforsa pa obdisi Jeova, mesmu na kusas pikininu. Ora ku no fasi es, no ta mostra di kuma na bardadi no amal, i es ta pui pa i amanu inda mas. — Jon 14:23; 1 Jon 5:3.

6. Di akordu ku Ebreus 6:​10-12, ke ki mas importanti di ki bon kusas ku no fasi na pasadu?

 ⁶ Jeova ta da balur garandi pa ke ku no fasi pa rel na pasadu. Ma, i ka pabia di kuma no fasi bon kusas na pasadu, ku na pui pa no kontinua mora na kau di Jeova. Es mostradu di manera klaru na Ebreus 6:​10-12. (Lei.) Jeova ka ta diskisi di bon kusas ku no fasi na pasadu. Ma i misti pa no kontinua sirbil di tudu korson “te na fin.” I na sedu no amigu pa sempri “si no ka menusa forsa.” — Gal 6:9.

PAPIA BARDADI NA BU KORSON

7. Ke ku signifika papia bardadi na no korson?

⁷ Kin ku misti mora na kau di Jeova dibi di “papia bardadi di si korson.” (Sal 15:2) Es signifika mas di ki ka konta mintida. Jeova misti pa no sedu onestu na tudu ke ku no ta fala i fasi. (Eb 13:18) Es i importanti, “pabia SIÑOR i nuju kil ku ta yanda mal, ma i ta mostra si sigridu pa kilis ku tene korson di bardadi.” — Dit 3:32.

8. Kal komportamentu ku no dibi di ivita?

⁸ Kilis ku ta ‘papia bardadi di se korson’ ka ta obdisi Jeova dianti di jintis, ma e ta fasi mau kusas ora ke sta elis so. (Isa 29:13) E ta ivita sedu tarpaseru. Algin tarpaseru pudi kumsa ku pensa di kuma, leis di Jeova ka ta da sempri bon rusultadu. (Tiagu 1:​5-8) Talves i ta disobdisi Jeova na kusas ki i pensa di kuma i ka muitu importanti. Si parsi di kuma nada di mal ka kontisi dipus ki disobdisi, i pudi kumsa ku fasi kusas mas pior. I pudi pensa di kuma i sta na sirbi Deus, ma Jeova ka na seta si adorason. (Ekl 8:11) E ku manda no misti sempri konta bardadi na tudu kusas.

9. Ke ku no aprindi di purmeru nkontru di Jesus ku Natanael? (Jubi tambi diseñu.)

⁹ I importanti dimas sedu algin ku ta “papia bardadi di si korson”. No pudi  oja es na ke ku kontisi oca ku Filipi kumbida si amigu Natanael pa i bai oja Jesus. Jesus nunka cigaba di kunsi Natanael, ma i fala sin aserka del: “Ali un israelita puru ku ka ten finjimentu.” (Jon 1:47) Jesus sibiba di kuma utrus disipulus seduba onestu, ma onestidadi di Natanael seduba garandi dimas. Natanael seduba imperfeitu suma anos, ma i ka ta finjiba. En ves di kila, i seduba onestu na tudu kusa. Jesus fikaba dimiradu ku kila, e ku manda i ngaba Natanael. Anos tudu no misti pa Jesus falanu mesmu kusa!

10. Pabia ku no dibi di kuida ku ke ku no ta papia? (Tiagu 1:26)

¹⁰ Maioria di kusas ku faladu na Salmu 15 i aserka di kuma ku no ta trata utrus. Salmu 15:3 fala di kuma kin ku mora na kau di Jeova “ka ta disfama ku si boka; i ka ta fasi mal pa si kumpañer, nin i ka ta pasanta kombersa kontra si kumpañer”. Si no ta disfama utrus, kila pudi pui elis sinti mal i no ka na pudi kontinua mora na kau di Jeova. — Lei Tiagu 1:26.

11. Ke ki disfama, i ke ku na kontisi ku un algin ku ta disfama utrus i ku ka ripindi?

¹¹ Salmista papia di manera klaru di kilis ku ta disfama. Ke ki disfama? I ta sedu sempri, un kombersa falsu ku pudi dana nomi di un algin. Si kin ku ta disfama ka ripindi i na tiradu di kongregason kriston. — Jer 17:10.

12-13. Kal situasons ku no pudi sin da konta tene kulpa di disfama no ermons? (Jubi tambi foto.)

¹² Salmu 15:3 lembrantanu tambi di kuma, kilis ku mora na kau di Jeova ka ta fasi nada di mal kontra se kumpañeris, i e ka ta disfama se ermons. Kuma ku no pudi disfama no ermons?

¹³ No pudi sin misti, disfama un algin  ora ku no sta na spalia mau informason aserka del. Pur isemplu: (1) un irma para sirvisu di pioneru, (2) un kasal para sirbi na Betel, o (3) un ermon ka sta mas na sirbi suma ansion o servu ministerial. Sera ki i na sedu bon, fala utrus di kuma talves e fasi algun kusa di mal ku pui i ten es mudansas? I pudi ten manga di motivus di mudansas ku no ka sibi. Tambi kin ku mora na kau di Jeova “ka ta fasi mal pa si kumpañer, nin i ka ta pasanta kombersa kontra si kumpañer”.

RISPITA KILIS KU RISPITA DEUS

14. Splika ba kin ku “Deus raproba” ku kilis ku mora na kau di Jeova dibi di dispreza.

¹⁴ Salmu 15:4 fala di kuma un amigu di Jeova ta “dispreza kil ku Deus raproba”. Kuma ku no pudi sibi si Deus raproba un algin? Suma jintis imperfeitu, no ka sta na pusison di fala si Deus raproba un algin o nau. Pabia? No pudi mas gosta di sertus jintis pabia di se maneras di sedu, o ka gosta di utrus pabia no ka ta da ben ku elis. Asin, no dibi di dispreza so kilis ku Jeova “raproba.” (1 Kor 5:11) Es nklui kilis ku ta fasi ke ki mal sin ripindi, kilis ku ta mostra falta di rispitu pa ke ku no fia nel, o e ta tenta dana no amisadi ku Jeova. — Dit 13:20.

15. Kal ki un di manera ku no ta rispita “kilis ku rispita Deus”?

¹⁵ Pa utru ladu, Salmu 15:4 fala di kuma no dibi di rispita “kilis ku rispita Deus”. Asin, no ta buska maneras di mostra bondadi ku rispitu pa amigus di Jeova. (Rom 12:10) Di kal manera? Un di manera faladu del na Salmu 15:4. I fala di kuma, kin ku mora na kau di Jeova “ta kumpri si purmesa, mesmu ki kustal”. Si no ka kumpri no purmesa, no na fasi utrus mal. (Mat 5:37) Pur isemplu, Jeova misti pa kilis ku mora na si kasa kumpri se votu di kasamenti. Tambi i ta kontenti ora ku papes ta sforsa ciu pa kumpri purmesas ke fasi se fijus. Suma no ama Deus i no ama utrus, no na fasi tudu ku no pudi pa kumpri no purmesa.

16. Di kal utru manera ku no pudi rispita amigus di Jeova?

¹⁶ Utru manera di mostra rispitu pa amigus di Jeova, i ora ku no gosta di risibi ospris i no gosta di pati. (Rom 12:13) Tempu ku no ta pasa ku no ermons ku irmas na utrus mumentu, ta judanu torna no amisadi mas forti ku elis i ku Jeova. Tambi, ora ku no ta risibi ospris, no ta sta na kopia Jeova.

KONTINUA FIKA LIVRI DI AMOR PA DIÑERU

17. Pabia ku Salmu 15 fala di diñeru?

¹⁷ No oja di kuma kin ku mora na kau di Jeova “ta pista si diñeru sin kobra juru; i ka ta seta suku di bas pa julga kontra kil ku ka ten kulpa.” (Sal 15:5) Pabia ku asuntu di diñeru faladu del nes Salmu? Pabia si no ama diñeru i pudi dana no amisadi ku utrus, i te mesmu ku Jeova. (1 Tim 6:10) Na tempus bibliku, alguns ta apruveita di se ermons koitadi, e ta pui elis paga diñeru mas di ki kil ke pista. Tambi es juisis ta setaba suku di bas i e ka ta julgaba inosentis diritu. Jeova ka ta kontentiba ora ku jintis fasi es kusas. — Eze 22:12.

18. Kal purguntas ku pudi judanu sibi kuma ku no ta nkara diñeru? (Ebreus 13:5)

 ¹⁸ I bon pa no jubi no kabesa pa sibi kuma ku no ta nkara diñeru. Punta bu kabesa: ‘Sera ki N ta pensa sempri na diñeru i na ke ku N pudi kumpra? Si N pista diñeru, sera ki N ta tarda pa pagal, pabia N ta pensa di kuma algin ku pistan el, ka pirsisa del? Sera ki tene diñeru ta fasin sinti di kuma N sedu importanti, ma i ta difisil pa N pati utrus? Sera ki N ta pensa di kuma si ermons ku irmas tene manga di diñeru, i pabia di kuma e mas ama diñeru di ki Jeova? Sera ki N ta tene amisadi so ku jintis riku i N ta mostra puku interesi pa jintis koitadi?’ I importanti pa no fasi es purguntas, pabia no dadu oportunidadi garandi di mora na kau di Jeova. No pudi kontinua tene es oportunidadi, ora ku no manti no vida livri di amor pa diñeru. Si no fasi es, Jeova nunka ka na bandonanu! — Lei Ebreus 13:5.

JEOVA AMA SI AMIGUS

19. Pabia ku Jeova misti pa no fasi tudu kusas ku faladu del na Salmu 15?

¹⁹ Salmu 15 kaba ku es purmesa: “Kil ku ta fasi e kusas, nunka i ka na bulbulidu.” (Sal 15:5) Li salmista kontanu pabia ku Jeova misti pa no fasi tudu kusas ku faladu del nes Salmu. Jeova misti pa no sedu filis. Asin, ora ku no fasi ke ku Deus falanu, no ta tene un vida minjor, tambi i ta proteẑinu. — Isa 48:17.

20. Kal speransa ku kilis ku mora na kau di Jeova tene?

²⁰ Kilis ku mora na kau di Jeova tene speransa di un futuru bonitu. Unjidus fiel na pirmitidu yentra na “manga di moradia” ku Jesus purpara pa relis na seu. (Jon 14:2) Kilis ku tene speransa di vivi na Tera, sta na pera tempu ku purmesas ku sta na Apokalipsi 21:3 na bin kumpri. I un kusa garandi dimas, manera ku Jeova kumbidanu pa no sedu si amigus, i mora na si kasa pa sempri!