1. ¿Imaraykú Salmo 15:1-5 mayta yanapawasunman?

 ÑAUPAJ yachaqanapi yachakorqanchej Jehovaman kausayninkuta qopojkunaqa toldo wasinpi invitados kayta atisqankuta. Chaypajqa Diospa sumaj amigosnillanpuni kananku tiyan. Sumaj amigon kanapaj, ¿imatá ruwananchej tiyan? Salmo 15 chay tapuyman kutichiwanchej (Salmo 15:1-5 leey). Kay Salmopi sumaj yuyaychaykuna tiyan, chaytaj Jehovaman astawan qayllaykunapaj yanapawasun.

2. ¿Imapí yuyashanman karqa David Jehovaj toldonmanta parlaspa?

² Salmo 15 kayta nispa qallarin: “Jehová Diosníy, ¿pitataj wasiykiman [chayri toldoykiman] wajyarikuwajri? ¿Pitaj santo orqoykipi tiyakuyta atinmanri?”, nispa (Sal. 15:1, sutʼinchaynin). Davidqa Jehovaj “toldonmanta” parlaspa, ichapis yupaychana toldomanta parlasharqa, chay toldoqa uj tiempota Gabaón llajtapi kasharqa. David parlallarqataj Diospa “santo orqomanta”, chayta nispaqa ichapis parlasharqa Jerusalenpi Sion orqomanta. Chayqa kasharqa ashkha kilometrospi, Gabaonpa sur ladonpi. Chaypi Davidqa toldo wasita sayaricherqa Diospa trato ruwasqan arca chay ukhupi kananpaj, chaypitaj karqa templo ruwakunankama (2 Sam. 6:17).

3. ¿Imaraykutaj 15 Salmota ukhuncharinanchej tiyan? (Dibujotawan qhawariy).

³ Casi tukuy israelitasqa yupaychana toldopi mana sirviyta aterqankuchu, Diospa trato ruwasqan arca kasharqa chaymanpis mana yaykuyta aterqankuchu. Chaywanpis tukuy kasukoj kamachisnin chay toldo wasipi invitados kayta aterqanku. Chaypajtaj paypa amigosnillanpuni kananku karqa. Chaytataj tukuy munanchej. Salmo 15 nin imaynachus kananchej kasqanta Jehovaj amigosnillanpuni kanapaj.

 MANA JUCHAYOJ KANA, CHEQAN KAJTATAJ RUWANA

4. Jehová allinpaj qhawanawanchejpaj, ¿bautizakunallanchejchu tiyan? (Isaías 48:1).

⁴ Salmo 15:2 nisqanman jina, Diospa amigonqa ‘mana juchayoj runa, cheqan kajta ruwajtaj’. Chaytataj tukuy kausayninchejpi ruwanallanchejpuni tiyan. ¿Atisunmanchu mana juchayoj kayta? Arí. Tukuypis pantaj runas kanchej. Chaywanpis Jehovata kasukunanchejpaj tukuy atisqanchejta kallpachakusun chayqa, payqa ‘mana juchayojta jina’ qhawawasun. Jehovaman kausayninchejta qopuspa, bautizakuspataj Diospa amigosnin kayta recién qallarishanchej. Ñaupa tiempopi israelitasqa mana Israel nacionmanta kasqankuraykullachu Jehovaj invitadosnin kayta aterqanku. Wakinkunaqa Jehovamanta mañakoj kanku, jinapis mana “tukuy sonqowanchu, nitaj cheqan kajman jinachu” (Isaías 48:1 leey). Allin sonqoyoj israelitasqa Jehovaj kamachiykunasninmanta yachakunanku karqa, chayman jinataj kausakunanku karqa. Kay tiempopipis Jehová allinpaj qhawanawanchejpajqa, mana bautizakunallachu tiyan, nitaj “Jehovaj testigon kani” nispallachu nina tiyan. Astawanpis “cheqan kajta” ruwanallapuni tiyan. ¿Imaynatá chayta ruwasunman?

5. ¿Imaspitaj Jehovata kasukuna tiyan?

⁵ Jehovaj ñaupaqenpi “mana juchayoj” kanapaj, ‘cheqan kajtataj ruwanapajqa’ mana tantakuykunallamanchu rina tiyan (1 Sam. 15:22). Manaqa kallpachakunanchej tiyan Diosta tukuy imapi kasukunapaj, sapallanchej kashaspapis (Pro. 3:6; Ecl. 12:13, 14). Jehovataqa juchʼuy imitaspipis kasukunanchej tiyan, ajinamanta rikuchisun payta mayta munakusqanchejta, paytaj astawan munakuwasun (Juan 14:23; 1 Juan 5:3).

6. Hebreos 6:10-12 nin jina, ñaupajpi allin imasta ruwajtinchejpis, ¿imatataj ruwanallapuni tiyan?

⁶ Jehovaqa imatachus paypaj ruwapusqanchejta may jatunpaj qhawan. Chaywanpis  ñaupajpi Jehovata kasukusqanchejqa mana niyta munanchu Jehovaj toldo wasinpi invitadosllapuni kayta atisqanchejta. Chayta sutʼita entiendenchej Hebreos 6:10-12 (leey) versiculospi. Jehovaqa mana qonqapunchu ñaupajpi imatachus ruwapusqanchejta. Chaywanpis munan “tukukuykama” tukuy sonqo payta yupaychanallanchejtapuni. ‘Mana saykʼupusunchu’ chayqa, wiñaypaj amigosnin kayta atisun (Gál. 6:9).

SONQONCHEJPI MANA LLULLAKUSPA PARLANA

7. ¿Ima niytá munan sonqonchejpi mana llullakuspa parlay?

⁷ Pillapis Jehovaj toldo wasinpi invitado kayta munan chayqa, ‘sonqonpi mana llullakuspa parlaj runa’ kanan tiyan (Sal. 15:2). Chaypajqa ni imapi llullakunanchejchu tiyan ni parlaspa, ni ruwaspapis (Heb. 13:18). Chaytaqa ruwananchejpuni tiyan, imaraykuchus “Jehová Diosqa sajra imasta ruwajkunata chejnikun. Cheqan runastataj amigosninpaj qhawan” (Pro. 3:32).

8. ¿Imatataj mana ruwanachu tiyan?

⁸ ‘Sonqonkupi mana llullakojkunaqa’ mana wajkunaj rikunallankutachu Diosta kasukunku, manachayqa sapallanku kashaspapis (Isa. 29:13). Ajinatapunitaj ruwana tiyan, mana chayta ruwaspaqa sonqonchejpi llullakushasunman. Pichus sonqonpi llullakojtaj ichapis yuyanman Jehovaj wakin kamachiykunasnin mana allinpunichu kasqanta (Sant. 1:5-8). Ichapis yuyanman wakin imitaspi Jehovata mana kasukunanpunichu kasqanta. Mana kasukojtin ni imapis pasajtintaj, aswan sajra imastaraj ruwanman. Ajinamantataj puraj uya kashanman (Ecl. 8:11). Noqanchejtaj sonqonchejpi mana llullakuyta munanchejchu, tukuy imapitaj allinta ruwayta munanchej.

9. ¿Imatá yachakusunman Natanaelmanta? (Dibujotawan qhawariy).

⁹ Sonqonchejpi nipuni llullakunanchejchu tiyan. Chayta reparanchej Natanaelpi. Felipeqa payta Jesusman pusarqa. Jesustaj payta mana rejsispapis paymanta nerqa: “Kaymá  israelitaqa, paypeqa manapuni ima llullakuypis kanchu”, nispa (Juan 1:47). Jesusqa yacharqa tukuy discipulosnin chʼuwa sonqos kasqankuta. Chaywanpis repararqa Natanaelqa aswan chʼuwa sonqoraj kasqanta. Natanaelqa noqanchej jinallataj pantaj runa karqa, chaywanpis mana puraj uyachu karqa, tukuy imapitaj allin kajtapuni ruwaj. Jesusmanqa chay gustarqa, chayraykutaj felicitarqa. May sumajpuni kanman Jesús chayta noqanchejmanta ninan.

10. ¿Imaraykutaj mana imatapis parlanallachu tiyan? (Santiago 1:26).

¹⁰ Salmo 15 astawan parlan imatachus wajkunaj contrankupi mana ruwanamanta. Salmo 15:3 Jehovaj toldo wasinpi invitadomanta nin: “Mana pimantapis llullakuspa parlanchu, runa masintaqa mana ima sajratapis ruwanchu, amigosnintapis mana qhasimanta tumpanchu”, nispa. Chay imasta ruwasunman chayqa, wajkunata mayta llakichisunman, niñataj Jehovaj toldo wasinpi invitados kayta atisunmanchu (Santiago 1:26 leey).

11. ¿Imataj kanman pipis wajkunamanta llullasta parlajtin, chanta imataj kanman mana arrepientekojtin?

¹¹ Salmistaqa nerqa mana pimantapis llullakuspa parlanata. Wajkunamanta llullakuspa parlaj runaqa paykunata malpi quedachinman. Chayrayku wajkunamanta llullasta parlajkunaqa, mana arrepientekojtinku congregacionmanta qharqosqa kankuman (Jer. 17:10).

12, 13. ¿Ima kutispitaj mana reparakuspalla wajkunamanta llullasta parlasunman? (Fototawan qhawariy).

¹² Salmo 15:3 yuyarichillawanchejtaj Jehovaj invitadosnenqa wajkunata mana ima sajratapis ruwasqankuta, nitaj amigosninkutapis qhasimanta tumpasqankuta. ¿Ima niytá munan chay?

¹³ Mana reparayllata wajkunamanta llullasta parlasunman paykunamanta mana  allin imasta cuentakuspa. Chaytaj kanman 1) uj hermana manaña precursora kajtin, 2) uj qhariwarmi Betelmanta llojsipojtin, 3) uj hermano manaña ancianochu chayri manaña siervo ministerialchu kajtin. Ichapis wajkunawan parlayta munasunman chay ruwaykunata imaraykuchus saqepusqankumanta. Chayta ruway, ¿allinchu kanman? Noqanchejqa mana yachanchejchu imaraykuchus chay ruwaykunata saqepusqankuta. Chantapis Jehovaj toldo wasinpi invitado kajqa “runa masintaqa mana ima sajratapis ruwanchu, amigosnintapis mana qhasimanta tumpanchu”.

DIOSTA MANCHACHIKOJKUNATA JATUNPAJ QHAWANA

14. ¿Pikunawantaj mana masichakunachu tiyan?

¹⁴ Salmo 15:4 Jehovaj amigonmanta nin: “Chejnikun millay kausayniyoj runasta”, nispa. ¿Imaynapí yachasunman pichus millay kausayniyoj kasqanta? Mana yuyasqanchejman jinallachu ninanchej tiyan pichus millay kausayniyoj kasqanta. Noqanchejqa pantaj runas kanchej, chayrayku pikunawanchus allinta apanakunchej chaykunallata allinpaj qhawasunman, phiñachiwanchej chaykunatataj mana allinpajchu qhawasunman. Chayrayku pikunatachus Jehová “millay kausayniyoj” kasqankuta nin, chaykunallawan mana masichakunachu (1 Cor. 5:11). Chay jina runasqa kanku juchata ruwasqankumanta mana pesachikojkuna, imapichus creesqanchejta mana respetajkuna, Jehovamanta karunchachiyta munawanchej chaykuna ima (Pro. 13:20).

15. ¿Imaynatá “Jehová Diosta manchachikoj” runasta jatunpaj qhawasqanchejta rikuchisunman?

¹⁵ Chantapis Salmo 15:4 niwanchej “Jehová Diosta manchachikoj” runasta jatunpaj qhawanata. Chayrayku Jehovaj amigosninwan kʼachas kanchej, jatunpajtaj qhawanchej (Rom. 12:10). Salmo 15:4 versiculoqa Jehovaj toldonpi invitadomanta nin: “Ruwasaj nisqantaqa juntʼanpuni, mana allinninpaj kajtinpis”, nispa. Nisqanchejta mana juntʼaspaqa wajkunaj sonqonkuta nanachisunman (Mat. 5:37). Jehovaqa munan casados casarakushaspa imatachus nisqankuta juntʼanankuta. Chantapis Jehovaqa munallantaj tatas wawasninkuman imatachus nisqankuta juntʼanankuta. Diosta, runa masinchejtapis munakusqanchejrayku kallpachakusun nisqanchejta juntʼanapajpuni.

16. ¿Imaynamantataj Jehovaj amigosninta jatunpaj qhawasqanchejta rikuchillanchejtaj?

¹⁶ Jehovaj amigosninta jatunpaj qhawallasunmantaj paykunata wajyarikuspa, qorikuytataj yachaspa (Rom. 12:13). Hermanosninchejwan khuska karikunapaj tiempochakusun chayqa, paykunawan astawan masichakusun, Jehovamanpis astawan qayllaykusun. Chantapis wajkunata wajyarikuspaqa Jehová jina ruwashanchej.

AMA QOLQEMANTA WAÑUSQA KANACHU

17. ¿Imaraykutaj Salmo 15 qolqemanta parlan?

¹⁷ Salmo 15:5 Jehovaj invitadonmanta nillantaj: “Qolqetapis mana interesniyojta manun. Nitaj pagaykuchikunchu mana juchayoj runaj contranta parlananpajqa”, nispa. ¿Imaraykú kay Salmo qolqemanta parlan? Qolqemanta wañusqa kasunman chayqa, qolqerayku sajra imasta wajkunapaj ruwasunman, Diosmantapis karunchakusunman (1 Tim. 6:10). Ñaupa tiempopi wakenqa wajcha hermanosninkumanta aprovechakoj kanku paykunaman qolqeta mañaytawan interesesta cobraspa. Chantapis wakin juecesqa llukʼiykuchikuspa  chayri coimeachikuspa mana juchayoj runasta juchachaj kanku. Jehovaqa chay imasta chejnisqata chejnin (Eze. 22:12).

18. ¿Ima tapuykunapitaj tʼukurinanchej tiyan? (Hebreos 13:5).

¹⁸ Sumajta qhawarikuna imatachus qolqemanta yuyasqanchejta. Kay tapuykunapi tʼukurina: “¿Qolqellapichu yuyani? ¿Imatachus rantinallaypichu yuyani? Pipis qolqeta mañariwajtin, ¿nichu chay rato qopuni mana necesitasqanta yuyaspa? ¿May kasqaytachu yuyakuni qolqeyoj kasqayrayku? ¿Sonqoy aysawanchu wajkunaman qorinaypaj? ¿Qolqemanta wañusqas kasqankutachu yuyani ashkha qolqeyoj hermanosmanta? ¿Qhapajkunallawanchu masichakuni, wajchastataj nichu valechini?”, nispa. Jehovaj invitadosnin kayqa may sumajpuni. Invitadosnillanpuni kanapajtaj amapuni qolqemanta wañusqas kanachu. Ajinamanta Jehová Diosninchej ni jaykʼaj saqerpariwasunchu (Hebreos 13:5 leey).

JEHOVAQA AMIGOSNINTA MUNAKUN

19. ¿Imaraykutaj Jehová munan Salmo 15 nisqanman jina ruwananchejta?

¹⁹ Salmo 15 kay jinata nispa tukuchan: “Ajinata kausakoj runaqa sinchʼita sayanqa”, nispa (Sal. 15:5). Salmistaqa chayta nispa nishawanchej imaraykuchus Jehová chay imasta ruwananchejta munasqanta. Payqa munan kusisqas kananchejta. Dios niwasqanchejman jina ruwaspaqa aswan allinta kausakunchej, paytaj cuidawanchej (Isa. 48:17).

20. ¿Ima sumaj imastaj kanqa Jehovaj invitadosninpaj?

²⁰ Jehovaj invitadosnin payta tukuy sonqo kasukullajtinkupuni, qhepaman paykunapaj may sumaj kausay kanqa. Ajllasqa cristianosqa cielopi tiyakonqanku. Chaypi Jesusqa ‘ashkha lugaresta’ paykunapaj wakichipun (Juan 14:2). Tukuynin waj cristianostaj, Apocalipsis 21:3 nisqanman jina kay jallpʼapi ashkha bendicionesta japʼenqanku. Jehová amigosnin kananchejpaj invitawasqanchejqa may sumajpuni. Toldo wasinpi wiñaypaj invitados kayta atisun.