1. ¿Imapitataj yachachimanchi Salmo 15 caj capítulo?

 PASAJ estudiucho yachacushganchi Diospa sirvejnincunaga Jehovapa wasinman yaycushganno carcaycan, chayga ali amigo capäcushganraycu. ¿Imanotaj Diospa ali amigunman ticrashwan? Salmo 15 caj capitulucho yachachimanchi imacunata rurashwan Diospa amigunman ticrananchipaj (leiriy Salmo 15:1-5).

2. ¿Imamanraj David yarpachacuycargan Diospa wasinpaj parlaycarga?

² Salmo 15 caj capítulo cayno galaycamun: “TAYTA DIOS, ¿piraq templuykiman [o wasiquiman] yaykunman? ¿Piraq sagrädu jirkannikicho sirvishunkiman?” (Sal. 15:1). Diospa wasinpaj David parlaycarga, sagrado toldupächi parlaycargan, chayga Gabaón marcacho caycargan. ‘Sagrädu jircapitapis’ parlarganmi, ichanga chayman yarparga, parlaycargan Jerusalencho caycaj Sión jircapaj. Y Gabaón marcapa sur caj laduchomi David sharcachergan sagrado tolduta, chaycho churarächicunanpaj pacto babulta jatun templo sharcachicashgancama (2 Sam. 6:17).

3. ¿Imanirtaj yachacushwan Salmo 15 caj capitulupita? (Dibujutapis ricay).

³ Casi lapan israelitacuna sirviyta puedipäcojchu sagrado tolducho, masraj pacto babul churarashgan sitiucho, ichanga lapan israelitacunami Jehovapa wasinman yaycuyta puedipäcunman cargan. Chaywanga niycanchi Diospa amistäninta ashiyta puedipäcunman. ¿Manachu chaytaga lapanchi munayculanchi? Salmo 15 caj capítulo parlamun imano clase runa canapaj, chaynopa Diospa amigun jinala canapaj.

 ALI CAJLATA RURAR Y JUCHATA MANA RURAYLAPA CAWASHUN

4. ¿Pipis Diospa aprobaciunninta chasquinanpäga bautizacunmanlachu? (Isaías 48:1).

⁴ Salmo 15:2 textuga parlamun Diospa naupancho ali cajlata ruraj runacunaga chacaypapis waraypapis Dios munashgalantami ruran. ¿Rasun cajchoga juchata mana ruraylapa cawayta puedishwanchuraj? Aumi. Juchasapa caycaptinchipis, calpachacushwanmi cäsucoj runa car ali cajcunalata ruranapaj. Chayno captenga Jehovaga ali nawilanwanmi ricaycalämäshun. Dedicacushganchi y bautizacushganchega Diosta sirvishganchicho galaycunalanmi caycan. Unay wichanpis israelitacunaga nipäcojchu ‘israelita cashgäraycurla wasinman yaycuyta puedë’ nir. Waquincunapis “janan shonqulami” Diospa jutintapis jogarircärej (leiriy Isaías 48:1). Diosta cäsucojcuna ichanga paypa mandamientuncunapita yachacunan y cumplinan cargan. Chaynolami canan wichanpis pipis Diospa aprobaciunninta chasquinanpäga, manachi cacunmanchu ‘bautizacushcä y Diospa marcancho caycä’ nirla. Sinoga waran waranmi Diospa mandätuncunata cawaynincho cäsucuycanman. ¿Chayga ima ninantaj?

5. ¿Imatataj Jehová shuyaran juchata mana rurajcunapita y ali cajcunalata ruraj runacunapita?

⁵ Pipis reuniunman mana faltaypa aywashganraycurlachu Taytalanchi Jehová nengachu juchata mana rurajcuna y ali cajlata ruraj runacuna cashganta (1 Sam. 15:22). Cristianucunaga chacaypapis junajpapis Diosta cäsucuycarlami caycashwan, may chaycho japalanchila caycaptinchipis (Prov. 3:6; Ecl. 12:13, 14). Pipis ninmanchu ‘cayga ichanga cäsucunapaj caycan, cayga ichanga mana pipis cuentata gocungachu’ nir. Lapanchomi cäsucoj cashwan, chaynoparaj Diosta  cuyashganchipis ricacämunga y paypis cuyamäshunmi (Juan 14:23; 1 Juan 5:3).

6. Hebreos 6:10-12 texto nishganno, ¿ima mastaraj rurashwan Jehovapa wasin nirajcho quedacunapaj?

⁶ Jehová amatar cushicun payta sirvinapaj unay rurashganchicunaman yarpaptin. Ichanga paypa wasin nirajcho quedacunapäga calpachacunanchiraj (leiriy Hebreos 6:10-12). Aumi, Jehovaga manami gonganchu payraycu lapan rurashganchicunata, jina munaycanmi lapan shongunchiwan ushanancama payta sirvinanchita ‘mana ajayaylapa’. Payta ganas ganasla sirvirga mana wanuypa cawayta tarichimäshun (Gál. 6:9).

SHONGUNCHICHOPIS RASUN CAJLAMI CAYCANMAN

7. ¿Imanirtaj ninchi shongunchicho rasun cajla caycanman?

⁷ Salmo 15:2 texto wilacun Diospa wasinman yaycoj runapa shongunga rasun cajlatash riman. Alapa alimi pipis mana lulacuylapa cawacuptenga. Chayno captinpis lapanchimi limpio shongu car Dios munashgalanta rurashwan (Heb. 13:18). Chayman yarparga alapa ali, “fiyu runakunataqa TAYTA DIOS rikaytapis manami munantsu. Ali shonqu runakunatami itsanqa kuyan” (Prov. 3:32).

8. ¿Imano runataj mana cashwanchu?

⁸ Runacunapa shonguncho rasun cajla caycaptenga, japalan caycaptinpis o waquincunawan caycaptinpis alilatami rurapäcun (Is. 29:13). Yarpaylapis yarpäshunchu mana ali cajcuna pacaylapa mana ruranapaj; ichanga waquincuna cay trampaman ishquinmanchi ‘cay Biblia consejacushganga manami nogapänochu’ nir (Sant. 1:5-8). Chayno captenga, capaz öraga juc ishcaylata mana cäsucuyta galaycunga. Nircur ichanga mana ali comportacushganraycu jatun juchamanpis ishquirinmanchi. Y mana chaylachu, yangalana Diostapis sirviycanmanna (Ecl. 8:11). Noganchicuna ichanga rasun cajlata shongunchicho charar Dios munashgalanta rurashwan.

9. ¿Imatataj yachacunchi Natanaelwan Jesús reguinacushgan junaj ima pasashganpita? (Dibujutapis ricay).

⁹ Alapa alimi shongunchicho rasun cajla  caycaptenga, chaypita masla yachacushun Natanaelwan Jesús tarinacushgan junaj ima pasashganpita. Juc cuticho Felipe amigun Natanaelta Jesús cajman apargan. ¿Imataj pasargan chaycho? Jesusga chaylaraj Natanaelta reguishga cargan, chayno captinpis cayno nergan: “Kay runami itsanqa rasunpa Israel runa. Payqa manami lulakuntsu” (Juan 1:47). Jesusga musyarganmi waquin gatejnincuna yäracuypaj runacuna capäcushganta, ichanga Natanaelpita chayno parlacamurgan pipis cuentata gocunanpaj chayno runa captinchega alapa ali cashganta. Aumi, Natanaelga juchasapa runa captinpis, Diospa ricayninpäga limpio shongu caycargan. Chayraycu Jesusga payta felicitargan. ¡Alapa alichi canman noganchipitapis Jesús chayno parlaptin!

10. ¿Imanirtaj ali yarpachacur-raj parlashwan? (Santiago 1:26).

¹⁰ Chauraga Salmo 15 caj capítulo yachachicun imacunatataj rurashwan waquincunawan ali goyäcunapaj. Salmo 15:3 texto parlamun Diospa wasincho caycaj runacunapaj. Cayno nin: “Paykunaqa pipa wasantapis manami rimantsu, runa mayinta manami traicionantsu y vecïnunkunapaqpis manami lutanta rimantsu”. Washa rima carga waquincunata laquichishwanchi. Y mana chaylachu, Diospa wasin nirajman yaycuytapis puedishwanchu (leiriy Santiago 1:26).

11. ¿Imaraj pasanman washa rimajcuna mana arrepenticäriptenga?

¹¹ Salmuta escribej o guelgaj runaga washa rimajcunapaj parlamun. Paycunashi waquincunapa guepancho adrede lutancunata parlacachan. Washa rimajcuna mana arrepenticäriptenga congregaciunpitapis gargushga canmanmi (Jer. 17:10).

12, 13. ¿Imacuna pasaptintaj hermanunchicunapa washanta parlar galaycushwan? (Fotutapis ricay).

¹² Jina Salmo 15:3 textupis parlamun Diospa wasin nirajcho caycaj runacunaga runa  masinta mana aliman chayananta ashinchu, vecinuncunata imatapis mana alita ninchu. ¿Imata rurartaj öraga pipa washantapis parlar galaycushwan y laquichishwanpis?

¹³ Öraga cuentata mana gocur pipa washantapis parlar galaycushwanchi. Imaraj canman cay wilacuycuna chasquiptinchi: 1) wilacamun juc hermana precursor regular manana cashganta, 2) wilacamun Betelpita juc matrimonio yargushganta o 3) wilacamun maygan hermanupis siervo ministerial o anciano manana cashganta. Chay hora waquincunawan parlar galaycushwanchuraj ‘¿imanir-raj chayta wilacäramush?’ nir o ¿yarpashwanchuraj ima juchacunatapis rurashganta? Rasun cajchoga manami musyanchichu imacunapa hermanulanchicuna pasaycashganta. Ama gongashunchu, Jehovapa wasin nirajcho caycajcunaga manami pipa washantapis parlanchu ni munanchu mana alicunaman chayananta.

JEHOVATA RESPETAJCUNATA RESPETASHUN

14. ¿Pipitapis witicunapäga imamanrätaj yarpachacushwan?

¹⁴ Salmo 15:4 nin Diospa amigun cajcunaga “jutsa ruraqkunapita witikärinmi”. Pero, ¿yarpayninchilaman yäracurchuraj pipitapis jucla witicushwan? Manami. Chayta rurarga ichanga pantarcushwanchi. ¿Imanir? Waquincunawanga jucla amiguta rurarinchi, ichanga waquincunawanga sasaraj ticracurin. Chaymi pipitapis witicunapäga chay runata Jehová imano ricashganpita canga (1 Cor. 5:11). Chay runacunaga juchancunapita arrepenticärinchu, Diosman creicunanchitapis michäcärin y imaycata rurapäcun Diosta manana sirvinapaj (Prov. 13:20).

15. ¿Imanotaj respetanchi Diosta respetajcunata?

¹⁵ Jina Salmo 15:4 textupis parlamun ‘TAYTA DIOSTA mantsakuqkunata respetanapaq’. Chaytaga ruranchi imaycanopapis calpachacurcur paycunata cuyapar y respetanapaj (Rom. 12:10). ¿Imanotaj chayga cawayninchicho ricacämunman? Chay chuscu caj versiculupis niycan Diospa amiguncuna “awnishqantaqa lapantami cumplin”, ruranapaj sasa o aja captinpis. Ima aunicushganchicunata mana cumplerga pitapis laquichishwanchi (Mat. 5:37). Jehovaga shuyaran matrimoniucuna acuerdun rurashgancunata cumplipäcunanta. Taytacunapis wamrancunata aunipashganta cumplipäcunanta. Chay lapantaga ruranchi Diosninchita cuyar y runa masinchita cuyarpis.

16. ¿Ima masta ruraptinchitaj Jehovata respetajcunata respetaycanchi?

¹⁶ Jina Diosta respetajcunatapis respetanchi shongunchita quichapar paycunata yanapacuptinchi (Rom. 12:13). Imalatapis micupacunapaj waquincunata wasinchiman invitaptinchega, paycunawanpis quiquin Jehovawanpis más amiguraj cashun. Piwanpis yanapacoj runa carga, Jehová Dios rurashgannomi ruraycanchi.

GUELLAYTA AMA CUYASHUNCHU

17. Salmo 15:5 textuga, ¿imanirtaj guellaypita parlacamun?

¹⁷ Salmo 15:5 texto nin Jehovapa amiguncunaga “qellayta prestarpis wawanta manami cobrantsu. Manakaqpita jitapänanpaq pägayta munaptinpis manami chaskintsu” (Sal. 15:5). ¿Imanirtaj cay Salmuga ichicla caycaptinpis guellaypita parlamun? Lapanchipis mana cuidacuptinchega guellayta cuyar galaycushwan. Chay pasaptin waquincunatapis laquichishwanmi y Diospa amistäninta ograycushwanchi (1 Tim. 6:10).  Unay tiempucho Biblia wilacun waquincunaga wacchacunata guellayta prestaycur wawantapis cobracojmi. Juezcunapis cargan pacaylapa guellayta chasquicoj mana juchayojcunata castigananpaj. Chay lapan mana ali ruraycunata Jehová alapa chiquin (Ezeq. 22:12).

18. ¿Imacunatataj tapucunanchi? (Hebreos 13:5).

¹⁸ Shongunchicho alitarämi yarpänanchi guellaypita. Chaypäga cayta tapucushwan: ¿Guellaylaman y imata rantinäpaj cajlamanchu yarparaycä? Pilapapis jagan caycaptëga, ¿demoracöchu guellayninta cutichinäpaj ‘pay necesitanrächu’ nir? ¿Ali tucöchu achca guellayta charashgäraycu? ¿Imalawanpis yanapacuycächu pitapis? ¿Lutantachu yarpä maygan hermanulapis achca guellayta charaptin? ¿Achca guellayta charashgan cajcunalawanchu juntacö? Diospa wasin nirajcho caycashganchipitaga cushiculanchimi. Chaymi cuidacushun guellaylaman mana yarparäcunapaj. Chayta rurarga Jehová imaypis jaguimäshunchu (leiriy Hebreos 13:5).

JEHOVAGA AMIGUNCUNATA CUYANMI

19. Salmo 15 caj capitulucho caycaj consejucuna, ¿imanirtaj Jehová gomashganchi?

¹⁹ Salmo 15 caj capítulo cayno ushan: “Tsayno ali kawaqkunaqa Tayta Dios munashqannömi imaypis kawapäkunqa” (Sal. 15:5). Chauraga Salmuta escribej o guelgaj runaga, wilaycalämanchi cushishga cawacunapäga Jehovataraj cäsucunapaj cajta. Jina yachachimanchi imano cuidamänanchipaj y imata rurananchi bendiciunninta chasquinapaj (Is. 48:17).

20. ¿Ima bendiciuntataj Jehová goycunga wasincho caycajcunata?

²⁰ Jehovapa wasilancho caycajcunapäga jatun bendiciuntami Jehová shuyaraycächin. Cielupaj acrashga cajcunataga, Jesusmi cielucho shuyaraycan chasquinanpaj (Juan 14:2). Waquin uyshacunaga cay Pachachomi cawapäcunga, chaypaj parlan Apocalipsis 21:3. ¡Jehovapa amigun canapaj chasquishganchi invitaciunga imaypis yarparänapächi canga! ¡Wasilanchomi quedacuyta munayculanchi!