1. ¿Jas kojutoʼ wi ri Salmo 15:1-5?

 PA RI jun kʼutunem kanoq, xqetaʼmaj che ri upatanelabʼ ri Jehová kekunik kekʼojiʼ pa ri rachoch o keʼux rachiʼl. Are kʼu ¿jas rajawaxik kqabʼano rech kkʼojiʼ jun utz qachilanik rukʼ ri Jehová? Ri Salmo 15 kubʼij chqe ri rajawaxik kqabʼano, kʼo pixabʼ chupam che kojutoʼo rech más kojqebʼ rukʼ ri Dios (chasikʼij Salmo 15:1-5).

2. ¿Jas weneʼ chrij xchoman wi ri David are chiʼ xchʼaw chrij ri rachoch ri Jehová?

² Ri Salmo 15 kumajij rukʼ ri e tzij riʼ: «Ajawaxel, ¿jachin ta ri kkuʼinik kkʼojiʼ pa ri achoch la? ¿Jachin ta ri kkuʼinik kjeqiʼ pa ri tastalikalaj juyubʼ la?» (Sal. 15:1). Are chiʼ ri David xchʼaw chrij ri rachoch ri Jehová, weneʼ are tajin kchoman chrij ri tabernáculo, che pa ri tiempo riʼ kʼo pa Gabaón. Ri David xuqujeʼ xchʼaw chrij «ri tastalikalaj juyubʼ» re ri Dios, weneʼ are tajin kchʼaw chrij ri Sion, che kʼo pa Jerusalén. Ri David xubʼan jun ja rech atzʼyaq pa ri sur re Gabaón, jawiʼ kyaʼ wi na ri arca del pacto kʼa kbʼan na jun lugar jawiʼ kkanaj wiʼ kanoq (2 Sam. 6:17).

3. ¿Jasche rajawaxik kojchoman chrij ri kubʼij ri Salmo 15? (Xuqujeʼ chawilaʼ ri wachbʼal).

³ Are kʼu, konojel ta ri israelitas xekunik xepatanin pa ri tabernáculo y xekun taj xeʼok chupam ri ja che bʼanom che atzʼyaq jawiʼ kʼo wi ri arca del pacto. Are kʼu konojel  ri upatanelabʼ ri Jehová kekunik keʼux rachiʼl. Y are laʼ ri kqaj qonojel. Ri Salmo 15 kchʼaw chrij jujun taq bʼantajik che rajawaxik kqakʼutu rech amaqʼel kojux rachiʼl ri Jehová.

CHOJUX CHʼAJCHʼOJ CHUWACH RI JEHOVÁ Y CHQABʼANAʼ RI UTZILAL

4. ¿Jasche xaq xiw ta rajawaxik kqabʼan qasanjaʼ rech kojqaj chuwach ri Jehová? (Isaías 48:1).

⁴ Ri Salmo 15:2 kubʼij che ri rachiʼl ri Dios «man kʼo ta mak pa ri ukʼaslemal» y «kubʼan utzil». Ri tzij kubʼano kraj kubʼij che kyaʼ ta kan ubʼanik. Are kʼu, ¿la qas kojkunik che mat kʼo kojmakun wi? Qastzij che qonojel oj ajmakibʼ y kʼi kojsach wi, are kʼu we kqakoj qachuqʼabʼ y kqanimaj ri Jehová chuwach ri areʼ jetaneʼ kʼo ta qamak. Are chiʼ kqajach ri qakʼaslemal che ri Dios y kqabʼan qaqasanjaʼ chilaʼ kqamajij wi upatanexik. Chnaʼtaj chqe che paneʼ ri winaq are israelita, wariʼ kraj ta kubʼij che kʼo pa ri rachoch ri Jehová. Jujun kkichʼobʼ uwach ri Dios, are kʼu kkiqʼijilaj ta rukʼ ronojel kanimaʼ (chasikʼij Isaías 48:1). Ri qas kʼo jun utz kanimaʼ rajawaxik kketaʼmaj ri utaqanik ri Jehová y kkinimaj. Are je kkʼulmataj kamik: xaq xiw ta rajawaxik kqabʼan qasanjaʼ y oj kʼo pa ri congregación rech kojqaj chuwach ri Dios. Rajawaxik kqaya ta kan ubʼanik ri utzilal. ¿Y jas kraj kubʼij wariʼ?

5. ¿Chuwach ri Jehová jas kraj kubʼij che kʼo ta mak pa ri qakʼaslemal y kqabʼan utzil?

⁵ Chuwach ri Jehová, «ri man kʼo ta mak pa ri ukʼaslemal» y «kubʼan utzil» xaq xiw ta kbʼe pa ri e riqbʼal ibʼ ronojel taq semanas (1 Sam. 15:22). Ri oj cristianos rajawaxik che amaqʼel kqanimaj ri Jehová pa ri qakʼaslemal, xuqujeʼ are chiʼ xaq qatukel oj kʼolik (Prov. 3:6;  Ecl. 12:13, 14). Rajawaxik kqanimaj ri Jehová chke jastaq che weneʼ kqachomaj che nim ta kibʼanik. Are chiʼ kqabʼan wariʼ, kqakʼutu che kqaloqʼoqʼej y ri areʼ nim kojril wi (Juan 14:23; 1 Juan 5:3).

6. Junam rukʼ ri kubʼij Hebreos 6:10-12, paneʼ ojer xqakʼut sukʼilal ¿are kʼu jasche rajawaxik kqaya ta kan ukʼutik?

⁶ Ri Jehová nim kril ri qabʼanom che upatanexik. Paneʼ xojux sukʼ che ojer kanoq are kʼu wariʼ kraj ta kubʼij che amaqʼel kojkʼojiʼ pa ri rachoch, junam rukʼ ri kubʼij pa Hebreos 6:10-12 (chasikʼij). Paneʼ ri Jehová ksach ta pa ujolom ronojel ri qabʼanom che upatanexik, are kʼu kraj che amaqʼel kqapatanij rukʼ ronojel qanimaʼ kʼa pa ri kʼisbʼalil. We kkʼistaj ta qakʼuʼx, kojux rachiʼl pa ronojel ri qakʼaslemal (Gál. 6:9).

AMAQʼEL CHQABʼIJ RI QASTZIJ

7. ¿Jas kraj kubʼij che kqabʼij ri qastzij rukʼ ronojel qanimaʼ?

⁷ Ri Salmo 15:2 kubʼij che ri Jehová kraj che ri winaq kok pa ri rachoch «kubʼij ri qastzij rukʼ ronojel ranimaʼ». Kraj kubʼij che xaq xiw ta kqaxutuj ri molom taq tzij. Xaneʼ ri Jehová kraj che kqakoj qachuqʼabʼ che ubʼanik ri utzilal y kqabʼij ri qastzij (Heb. 13:18). Wariʼ nim ubʼanik, rumal che ri Jehová kretzelaj «kiwach ri e bʼanal taq etzelal, kpe kʼu che jeqelem kukʼ ri e sukʼ» (Prov. 3:32).

8. ¿Jas riʼ ri rajawaxik kqaxutuj?

⁸ Ri winaq che «kubʼij ri qastzij rukʼ ronojel ranimaʼ» xaq ta kujaluj unimaxik ri Dios are chiʼ e kʼo kʼi winaq, xaneʼ rajawaxik kunimaj are chiʼ xaq utukel (Is. 29:13). Ri oj kqaj taj kqabʼan wariʼ. ¿Jas kbʼanowik che jun winaq kubʼan wariʼ? Weneʼ kumaj uchomaxik che ri utaqanik ri Jehová kuya ta utzilal che (Sant. 1:5-8). Weneʼ kunimaj taj rumal che kuchomaj che nim ta ubʼanik ri ktaʼ che. We krilo che kʼo ta kʼax kuriq rumal ri tajin kubʼano, weneʼ kuya ta kan ubʼanik. Are kʼu chuwach ri Jehová kʼo ta upatan ri uqʼijilanik (Ecl. 8:11). Ri oj kqaj taj che xa  kebʼ qapalaj, kqaj che amaqʼel kqabʼij ri qastzij.

9. ¿Jas kukʼut chqawach ri xkʼulmatajik are chiʼ ri Jesús xuchʼobʼ uwach ri Natanael? (Xuqujeʼ chawilaʼ ri wachbʼal).

⁹ Sibʼalaj nim ubʼanik che kqabʼij ri qastzij, kojkunik kqil wariʼ are chiʼ ri Jesús xuchʼobʼ uwach ri Natanael. Are chiʼ ri Felipe xukʼam bʼi ri Natanael chuwach ri Jesús sibʼalaj mayibʼal ri xkʼulmatajik. Paneʼ ri Jesús kuchʼobʼ ta uwach ri Natanael, are kʼu xubʼij: «Chiwilampeʼ jun qas aj israel, ri man kʼo ta wi subʼunik» (Juan 1:47). Ri Jesús retaʼm che ri utijoxelabʼ kkibʼan ri kkibʼij, are kʼu xrilo che ri Natanael qas rukʼ ronojel ranimaʼ kubʼan ri kubʼij. Paneʼ ri Natanael ajmak junam qukʼ oj, are kʼu xaq ta xujaluj ri xubʼano. Ri Jesús nim xril wajun utz ubʼantajik riʼ, rumal laʼ xubʼij we utz taq tzij che. ¡Sibʼalaj utz riʼ we kqabʼano che ri Jesús junam kuchomaj chqij oj!

10. ¿Jasche rajawaxik qas kojchoman na chrij ri kqabʼij? (Santiago 1:26).

¹⁰ Ronojel ri kuya ubʼixik ri Salmo 15 kʼo ubʼanik rukʼ ri kqabʼan che kilik ri nikʼaj chik. Ri Salmo 15:3 kubʼij che ri Jehová are kukʼulaj pa ri rachoch ri winaq «ri man kʼo ta jun rajil utzʼaqat kuyoqʼo, ri man kubʼan ta kʼax che ri rachiʼl, mawi kretzelaj uwach ri ukʼulja». Are chiʼ utz ta kojchʼaw chkij ri nikʼaj chik wariʼ kubʼan kʼax chke; xuqujeʼ weneʼ kubʼano che kojkun taj kojok pa ri rachoch ri Jehová o kojux rachiʼl (chasikʼij Santiago 1:26).

11. ¿Jas kraj kubʼij che jun winaq kumol tzij chrij jun chik y jas kkʼulmataj rukʼ we man kuya kan ubʼanik?

¹¹ Ri salmista are más xchʼaw chrij jun winaq che xaq kumol tzij chrij jun chik rech kchomaxik che itzel winaq. Ri winaq che kubʼan wariʼ y kuya ta kan ubʼanik kesax bʼi pa ri congregación (Jer. 17:10).

12, 13. ¿Jas weneʼ kqabʼij che kubʼano che utz ta kchomax chkij ri nikʼaj chik? (Xuqujeʼ chawilaʼ ri wachbʼal).

 ¹² Ri Salmo 15:3 xuqujeʼ kunaʼtasaj chqe che ri winaq che kok pa ri rachoch ri Jehová «kʼo ta jun rajil utzʼaqat kuyoqʼo, ri man kubʼan ta kʼax che ri rachiʼl, mawi kretzelaj uwach ri ukʼulja». ¿Jas kraj kubʼij wariʼ?

¹³ Weneʼ kqil taj y kʼax tajin kojchʼaw chrij jun chik. Chojchoman chrij wariʼ: 1) jun qachalal ixoq kuya kan upatanexik ri Jehová pa tiempo completo, 2) jun kʼulaj kkiya kan Betel o 3) kyaʼ ubʼixik che jun qachalal kʼamal bʼe ta chik o tobʼanel ta chik. ¿La utz che kqamajij ubʼixik tzij y kqabʼij chke nikʼaj chik ri kqachomaj chrij wariʼ? Weneʼ qetaʼm ta ronojel ri xkʼulmatajik. Y chnaʼtaj chqe che ri winaq che kʼo pa ri rachoch ri Jehová «kʼo ta jun rajil utzʼaqat kuyoqʼo, [...] kubʼan ta kʼax che ri rachiʼl, mawi kretzelaj uwach ri ukʼulja».

NIM CHEQILAʼ WI RI KEQʼIJILAN CHE RI JEHOVÁ

14. ¿Jas kqabʼan che retaʼmaxik we jun winaq taqal che ketzelax uwach y che rajawaxik kqaxutuj?

¹⁴ Ri Salmo 15:4 kubʼij che ri rachiʼl ri Jehová «kretzelaj uwach ri taqal retzelaxik uwach». Are kʼu ¿jas kqabʼan che retaʼmaxik we jun winaq taqal che ketzelax uwach? Rumal che oj ajmakibʼ, kojkun taj kqabʼij jachin ri taqal che ketzelax uwach. ¿Jasche? Rumal che jujun taq mul e kʼo winaq keqaj chqawach pero e kʼo nikʼaj chik che kukʼulaj ta qakikʼel. Rumal laʼ xaq xiw kqaxutuj ri winaq che kretzelaj ri Jehová (1 Cor. 5:11). Jujun chke ri winaq riʼ are ri kemakunik y kkiya ta kan ubʼanik ri makaj, nim ta kkil ri qakojonik y ri kkaj kkibʼan kʼax che ri qachilanik rukʼ ri Jehová (Prov. 13:20).

15. ¿Jas kqabʼan che ukʼutik che nim keqil ri kepatanin che ri Jehová?

¹⁵ Xuqujeʼ, ri Salmo 15:4 kubʼij chqe che rajawaxik nim kqil wi «ri kuyaʼ uqʼij ri» Jehová. Rumal laʼ, kqakʼutu che nim keqil wi ri rachiʼl ri Dios (Rom. 12:10). ¿Jas kqabʼan che ubʼanik? Ri Salmo 15:4 kubʼij che ri winaq ri kʼo pa ri rachoch ri Jehová «keʼutzʼaqatisaj ri e uchiʼm puneʼ kʼax kelik». We kqabʼan ta ri kqabʼij, weneʼ kqabʼan kʼax chke nikʼaj chik (Mat. 5:37). Jun kʼutbʼal, ri Jehová kraj che ri e kʼulanik qas kkibʼan ri xkibʼij che ri kikʼulaj. Xuqujeʼ kraj che ri nan tat qas kkitzʼaqatisaj ri kkibʼij chke ri kalkʼwal. Rumal che loqʼ ri Dios chqawach y ri qajil qatzʼaqat, kqakoj qachuqʼabʼ che ubʼanik ri kqabʼij.

16. ¿Jas jun chik kojkunik kqabʼano rech kqakʼutu che nim keqil wi ri rachiʼl ri Jehová?

¹⁶ Jun chik che kqabʼano rech kqakʼutu che nim keqil wi ri rachiʼl ri Dios are che keqabʼan invitar cho qachoch y kojsipan chke (Rom. 12:13). Are chiʼ kojkʼojiʼ más tiempo kukʼ ri qachalal, más keqaj y más kqaj ri Jehová. Y are chiʼ keqabʼan invitar ri qachalal y kojsipan chke, tajin kqesaj uwach ri Jehová.

MAQARAYIJ MÁS PWAQ

17. ¿Jasche kchʼaw ri Salmo 15 chrij ri pwaq?

¹⁷ Ri Salmo 15 kubʼij chi wariʼ chrij ri winaq che kʼo pa ri rachoch ri Jehová «kuyaʼ urajil pa jalomal ri man kutoqʼij ta qajebʼal rech, ri man kukʼam ta upa qʼabʼaj che ubʼanik kʼax che ri man kʼo ta umak» (Sal. 15:5). ¿Jasche kchʼaw wajun salmo riʼ chrij ri pwaq? Rumal che weneʼ kqil taj y kqamajij utzukuxik qʼinomal.  We kqabʼan wariʼ, weneʼ kqabʼan kʼax chke nikʼaj chik y che ri qachilanik rukʼ ri Jehová (1 Tim. 6:10). Ojer kanoq, e jujun más xkibʼan kʼax chke ri kachalal che e mebʼaʼ are chiʼ xkitaʼ ral ri pwaq che xkiya chke pa qajik. Xuqujeʼ e kʼo qʼatal taq tzij che kyaʼ pwaq chke rech kkiqʼat tzij pa kiwiʼ ri winaq che kʼo ta kimak. Ri Jehová itzel kril wariʼ (Ezeq. 22:12).

18. ¿Jas preguntas rajawaxik kojchoman chrij? (Hebreos 13:5).

¹⁸ Utz che kojchoman chrij ri kqabʼan che rilik ri pwaq. Chojchoman chrij wariʼ: «¿La amaqʼel kinchoman chrij ri pwaq y ri kwaj kinloqʼo? We kʼo jun kuya pwaq chwe pa qajik, ¿la aninaq kintoj che o kinchomaj rumal che kʼo upwaq rajawaxik taj kintojolaʼ che? ¿La kinnaʼo che nim nubʼanik xa rumal che kʼo nupwaq? ¿La kʼax kinbʼan che uyaʼik sipanik? ¿La kinchomaj che juntir ri qachalal che kʼo kipwaq are más nim kkil ri qʼinomal? ¿La are más kewachilaj ri kʼo kipwaq y kinkʼojiʼ ta kukʼ ri e mebʼaʼ?». Are jun tewchibʼal che oj kʼo pa ri rachoch ri Jehová o che oj rachiʼl. ¡Maqayaʼo che urayixik ri pwaq kukoj pa kʼax wajun tewchibʼal riʼ! We kqarayij ta más pwaq, amaqʼel kojux rachiʼl ri Jehová (chasikʼij Hebreos 13:5).

RI JEHOVÁ E LOQʼ RI RACHIʼL CHUWACH

19. ¿Jasche kraj ri Jehová che kqabʼan ronojel ri kubʼij ri Salmo 15?

¹⁹ Ri Salmo 15 kukʼis rukʼ ri e tzij riʼ: «Ri je ukʼaslemal waʼ mawi jumul ktzaq ta na» (Sal. 15:5). Ri salmista xubʼij che are waʼ ri kraj ri Jehová che kqabʼano rech kojkikotik. Rumal laʼ, ri Jehová kubʼij chqe ri kqabʼano rech kojutewchij y kojuchajij (Is. 48:17).

20. ¿Jas tewchibʼal kkiriq na ri winaq che e kʼo pa ri rachoch ri Jehová?

²⁰ Ri winaq che e rachiʼl ri Jehová y che amaqʼel keʼux sukʼ, kkiriq na jun kʼaslemal kʼo ta ukʼisik. Ri kebʼe pa ri kaj kekʼulax na chilaʼ jawiʼ ri Jesús ubʼanom «kʼiʼalaj kʼolbʼal» kekʼojiʼ wi (Juan 14:2). Ri nikʼaj chi cristianos che kekanaj kan cho ri uwach Ulew kkiriq na ri tewchibʼal che kubʼij Apocalipsis 21:3. ¡Are jun tewchibʼal che ri Jehová kraj kojux rachiʼl! ¡Kojkunik kojkʼojiʼ pa ri rachoch chbʼe qʼij saq!