1. ¿Imapaqtan yanapamantsik Salmus 15:1 a 5 textuchö ninqan?

 PUNTA KAQ yachatsikuychömi yachakurqantsik, Jehoväpa sirweqninkunaqa wayinchö invitädunkuna y alli amïgunkuna këta puëdiyanqanta. Peru ¿imatataq rurashwan Jehoväpa alli amïgun kanantsikpaq? Tsëpaqqa Salmus 15 textuchö ninqanmi yanapamäshun, tsëchömi nimantsik imakunata ruranapaq (leyi Salmus 15:1-5).

2. “Wayikiman” nirqa, ¿imamanraq David pensëkarqan?

² Salmus 15 textuqa kënö nirmi qallan: “Teyta Jehovä, ¿imanö nunatataq wayikiman chaskinki? ¿Imanö nunatan sagrädu jirkëkichö täkunqa?” (Sal. 15:1). “Wayikiman” nirqa, capazchi Davidqa pensëkarqan Diospa carpa wayinman, y tsë witsampaqqa Gabaonchömi tsë carpa wayi karqan. Tsënöllam Davidqa, ‘sagrädu jirkëkiman’ nirqan. Tsënö nirqa capaz pensëkarqan Jerusalenchö këkaq Sion jirkaman. Tsëchömi Davidqa sagrädu cäja churaränampaq carpa wayita ruratsirqan (2 Sam. 6:17).

3. ¿Imanirtan Salmus 15 ninqampita yachakushwan? (Rikäri dibüjuta).

³ Israelïtakunaqa manam llapantsu Jehoväpa carpa wayinchö trabajëta puëdiyaq, ni manam llapantsu puëdiyaq sagrädu cäja churaränan cuartuman yëkuyta. Peru Jehoväpa llapan sirweqninkunam pëwan alli amïgu karnin kushishqa kawakuyta puëdiyaq. Y tsëtam llapantsikpis munantsik. Salmus 15 ninqanchömi, nimantsik imëpis Jehoväpa amïgun kanantsikpaq imakunata ruranapaq kaqta.

 IMËPIS CÄSUKOQ KASHUN Y ALLI KAQTA RURASHUN

4. ¿Imanötan musyantsik bautizakushqa kanqantsikllapita Jehoväpa alli amïgun këta mana puëdinqantsikta? (Isaïas 48:1).

⁴ Salmus 15:2 textuchömi nin Diospa amïgunkunaqa ninqankunata cäsukuyanqanta y alli kaqta imëpis rurayanqanta. Cäsukoqkuna y alli kaqllata imëpis ruraqkuna nirqa, imë hörapis alli kaqllata rurayänampaq kallpachakuyanqantam nikan. Peru ¿rasumpaku Dios ninqankunata cäsukuyta puëdintsik? Awmi. Jutsasapa karpis alli kaqllata ruranapaq kallpachakushqaqa, alli ruraqtanömi Jehoväqa rikämantsik. Diosnintsikllata sirwinapaq änikushqa y bautizakushqa karpis, alli kaqtaqa imëpis rurëkänantsikllam. Israelïtakunapis manam israelïta kayanqampitatsu Jehoväpa alli amïgun këta puëdiyaq. Wakin israelïtakunaqa Diosta alabëkarpis, imëka mana allikunatam rurayaq (leyi Isaïas 48:1). Jehovä ninqankunata rasumpa cäsukuyta munaqkunaqa mandakunqankunatam yachakuyänan y cumpliyänan karqan. Tsënöllam noqantsikpis Diospa amïgun këta munarqa, imëpis alli kaqkunata ruranantsik y manam bautizakushqa o Testïgu kanqantsikllawanqa conformakunantsiktsu. Peru, ¿imanötan alli kaqkunataqa rurantsik?

5. Alli kaqta ruraq nuna karqa, ¿imakunachötan Jehoväta cäsukushwan?

⁵ Jehoväqa, ¿reunionkunaman mana faltëpa ëwayanqanllapitatsuraq mandakunqankunata cäsukoqtanö o alli kaqta ruraqtanö rikanqa? Manam (1 Sam. 15:22). Diospa sirweqninkunaqa imëkata ruranqantsikkunachömi Jehovä ninqanta cäsukunantsik, hasta japallantsik këkarpis (Prov. 3:6; Ecl. 12:13, 14). Ruranantsikpaq kaq noqantsikpaq mana precisaqnölla kaptimpis, Jehovä ninqannömi ruranantsik. Tsëta rurarqa Jehoväta kuyanqantsiktam rikätsikuntsik, y pëpis kuyamäshunmi (Juan 14:23; 1 Juan 5:3).

6. Hebrëus 6:10 a 12 ninqannö, ¿unë ruranqantsikkunallawantsuraq Diosnintsikpa amïgun imëpis këta puëdishun?

 ⁶ Sirwinantsikrëkur puntata imëkata ruranqantsikkunataqa alläpam Jehovä valoran. Peru puntata ruranqantsikkunallaqa manam yanapamäshuntsu Jehoväpa imëyaqpis invitädunkuna kanantsikpaq, tsëtam Hebrëus 6:10 a 12 (leyi) entienditsimantsik. Puntata ruranqantsikkunata mana qonqarpis, Jehovä Diosnintsikqa shuyaran, “ushananyaq” llapan shonquntsikwan sirwinantsiktam. Tsëta rurëta mana dejashqaqa, Jehoväqa imëyaqpis amïguntsikmi kanqa (Gäl. 6:9).

RASUMPA KAQTA IMËPIS PARLASHUN

7. ¿Ima nitataq munëkan shonqunkunachö rasumpa kaqllata parlakoqkuna nirqa?

⁷ Salmus 15:2 textuchömi nin Jehoväpa invitädunkunaqa, “shonqunkunachö rasumpa kaqta” parlayanqanta. Tsënö nirqa, manam ulikuy o llullakuy mana alli kanqanllatatsu nikan, sinöqa llapan parlanqantsikkunachömi rasumpa kaqllata parlanantsik y imëkata ruranqantsikchömi honrädu kanantsik (Heb. 13:18). “Mana allikunata ruraq nunakunataqa, Teyta Jehoväqa chikinmi, peru allita ruraq nunakunataqa kuyanmi” (Prov. 3:32).

8. ¿Imapitataq cuidakunantsik?

⁸ ¿Allitsuraq kanman wakinkuna rikëkämashqalla Dios mandakunqankunata cumpleq tukunqantsik, peru japallantsik këkarqa munanqantsikkunata rurakunqantsik? (Is. 29:13). Tsëqa manam allitsu kanman, y manam tsënö këtaqa munantsiktsu. Tsënö këmanqa chärishwan Jehovä consejamanqantsikkuna mana yanapamanqantsiktanö pensarmi (Sant. 1:5-8). Capazchi rurëkanqantsikkuna mana precisaqnölla kaptin mana allikunata rurar qallëkushwan. Y tsë ruranqantsikkunapita mana sufrirqa, capaz mas jutsakunata rurar qallëkushwan. Y tsëkunata rurarqa, manam Jehovä Diosnintsikta llapan shonquntsikwannatsu sirwikäshun (Ecl. 8:11). Tsëmi Diosnintsiktaqa rasumpa kaqta parlakur y imëkachöpis honrädu karnin sirwita munantsik.

9. ¿Imatataq yachakuntsik Natanaelpaq Jesus ninqampita? (Rikäri dibüjuta).

 ⁹ Shonquntsikchö rasumpa kaqllata parlakunqantsikqa alläpa allim. Pensarishun Jesusta Natanael reqinqan junaq pasakunqanman. Felïpim amïgun Natanaelta pusharqan Jesusta reqinampaq, y Jesus rikëkurmi kënö nirqan: “Rikäyë, pëqa Israelchö leykunata cäsukoq y rasumpa kaqllata parlaq israelïta nunam” (Juan 1:47). Jesuspa wakin discïpulunkunapis rasumpa kaqllatachi parlayaq, peru Natanaelqa pëkunapita masmi rasumpa kaqllata parlakoq. Natanaeltaqa jutsasapa karpis, rasumpa kaqta parlakuymi gustaq. Tsënö kanqantam Jesusqa alläpa valorarqan, tsëmi felicitarqan. ¡Ima alliraq këkunman noqantsikpaqpis Natanaelpaqnö Jesus niptinqa!

10. ¿Imanirtan wakinkunapaq mana allikunata parlashwantsu? (Santiägu 1:26).

¹⁰ Salmus 15 textuchöqa masqa parlan, nuna mayintsikkunata imanö tratanapaq kaqtam. Salmus 15:3 textuchömi nin Jehoväpa wayinchö kaqkunaqa nuna mayinkunata mana calumniayanqanta, nuna mayinkunata mana allikunata mana rurayanqanta y amïgunkunapaq mana rimayanqanta. Nuna mayintsikpaq mana allita parlanqantsikqa pëkunatam alläpa llakitsin, y tsënö parlarqa manam Jehoväpa wayinchö këtapis puëdishunnatsu (leyi Santiägu 1:26).

11. ¿Imatan calumniaqa? ¿Y calumniakoq nunaqa mana arrepentikurqa congregacionchö sïguita puëdinku? (Rikäri fötuta).

¹¹ Calumnia nirqa, ¿imapaqtan salmu qellqaq nuna parlëkan? Tsënö nirqa parlëkan mana allichö quedatsita munarnin pitapis mana kaqpita acusayanqampaqmi. Juk calumniakoq nunataqa, mana arrepentikuptinqa, congregacionpitam qarqurita puëdiyan (Jer. 17:10).

12, 13. ¿Imakuna pasakuptintan mana munëkarpis amïguntsikkunata mana allichö quedaratsishwan? (Rikäri fötuta).

¹² Salmus 15:3 textuqa yarpätsimantsik Jehoväpa wayinchö invitädu këkaqkunaqa,  nuna mayinkunapaq mana allikunata mana rurayanqanta y amïgunkunapaq mana rimayanqantam. ¿Imanötan amïguntsikkunataqa mana allichö quedaratsishwan?

¹³ Capazchi mana munëkarpis amïguntsikkunapaq mana kaqkunata parlarqa, mana allichö quedaratsishwan. Këkunallaman pensarishun: 1) juk pani llapan tiempunwan yanapakuykanqanta dejarinman, 2) juk wawqi warminwan Betelchö yanapakuyanqanta dejariyanman o 3) juk wawqipaq willakarayämunman manana anciänu kanqanta o manana siervu ministerial kanqanta. Tsënö willakarayämuptinqa, ¿kikintsik pensanqantsiknötsuraq, “kërëkurmi o wakrëkurmi rurëkäyanqanta dejayashqa” nir parlar qallëkushwan? Rasumpa kaqchöqa, manam llapan pasakunqankunataqa musyëta puëdintsiktsu. Tsëmi yarpänantsik Jehoväpa wayinchö invitädu këkarqa, manam nuna mayintsikkunapaq mana allikunata parlashwantsu ni amïguntsikkunapaq rimashwantsu.

JEHOVÄTA KUYAQKUNATA RESPETASHUN

14. ¿Imanötan musyashwan pï nuna Jehoväpa rikëninchö mana alli ruraq nuna kanqanta y imanirtan chaskishwantsu?

¹⁴ Salmus 15:4 textuchöqa nin Jehoväpa amïgunkunaqa, mana allita ruraq nunakunata mana chaskiyanqantam. ¿Imanö nunakunatan mana allikunata ruraqkuna kayan? Tsëta musyanapaqqa, manam pensanantsiktsu mëqan nunata yachananqantsikta o mana yachananqantsikta. Tsëpa rantinqa, Jehovä chikinqan nunakunatam chikinantsik (1 Cor. 5:11). ¿Y imanö nunakunatataq Jehovä chikin? Jutsata rurayanqampita mana arrepentikoqkunata, creenciantsikkunata mana respetaqkunata y Jehoväpita rakimänantsikrëkur imëkata ruraqkunatam (Prov. 13:20).

15. ¿Imanötan Jehoväta kuyaqkunata respetanqantsikta rikätsikushwan?

¹⁵ Salmus 15:4 textuchömi nin, “Teyta Jehoväta kuyaq nunakunata” respetanapaq. Tsëmi Jehoväpa amïgunkunata respetanqantsikta rikätsikunapaq alkäbu këkänantsik (Rom. 12:10). ¿Imakunata rurartan respetanqantsikta rikätsikuntsik? Salmus 15:4 textuchömi nin Jehoväpa wayinchö këkaqkunaqa perdiyänan kaptimpis änikuyanqanta cumpliyanqanta. Änikunqantsikta mana cumplirqa, wakinkunatam llakitsishwan (Mat. 5:37). Këllaman pensarishun: Jehoväpa amïgunkunaqa, casakurnin äninakuyanqantam cumpliyänan, papä kaqkunapis wamrankunata äniyanqantam cumpliyänan, y Jehoväta y nuna mayintsikta kuyarmi llapan parlanqantsikta cumplinantsik.

16. ¿Imanö mastan Jehoväpa amïgunkunata respetanqantsikta rikätsikushwan?

¹⁶ Y juknöpaqa, Diosta kuyaqkunata respetanqantsikta rikätsikuntsik alli nuna karninmi (Rom. 12:13). Imatapis ruranqantsik hörakuna o jamanqantsik hörakuna pëkunawan juntu kanapaq invitarninqa, pëkunawan masllam reqinakushun y Jehovätapis masmi kuyashun. Tsënöllam pëkunawan alli karninqa, Jehovänö kuyakoq këkantsik.

AMA QELLËTA KUYASHUNTSU

17. ¿Imanirtan Salmus 15 textuchöqa qellëpaq parlan?

¹⁷ Salmus 15 textuchöqa Jehoväpa invitädunkunapaqmi nin, qellëta prestakurpis wachëninta mana cobrakuyanqanta, y jutsannaq nunata culpatsayänampaq imatapis mana chaskipakuyanqanta (Sal. 15:5). ¿Imanirtan kë salmuchöqa qellëpaq parlan? Mana cuidakurninqa, qellërëkurmi wakinkunata llakiratsishwan o Diosnintsikwan amïgu këtapis dejarishwan (1 Tim. 6:10). Bibliata  qellqayanqan witsanchöqa, Jehoväpa wakin sirweqninkunaqa qellëta prestakurmi wachënintawan cobrakuyaq. Hasta juezkunapis päguta chaskipakurmi culpannaq nunakunata condenayaq. Tsë rurëtaqa Jehovä alläpam chikin (Ezeq. 22:12).

18. ¿Ima tapukuykunamantan pensanantsik? (Hebrëus 13:5).

¹⁸ Y noqantsikqa, ¿qellëllamanku alläpa yarparäkuntsik? Tsëta musyarinapaq kënö pensarishun: “¿Imëpis qellëllamanku o imatapis rantïllamanku yarparäkü? Pillapis qellëta prestamaptinqa, ¿mana wananqanta pensarku raslla o saslla kutitsëtsu? Qellënï kariptinqa, ¿wakinkunapita mas alli kanqätaku pensä? ¿Qellënïta llakiparku wakinkunata imallatapis invitätsu? Qellëyoq wawqi panikunapaqqa, ¿qellëllata alläpa kuyayanqantaku pensä? ¿Pobri kaqkunata dejarirku rïcu kaqkunallapa amïgun kä?”. Jehovä Diosnintsikpa invitädun këqa, ¡alläpa shumaqmi y manam perdita munantsiktsu! Ama qellëllamanqa yarparäkushuntsu. Yarpë, Jehovä Diosnintsikqa manam imëpis dejamäshuntsu (leyi Hebrëus 13:5).

JEHOVÄQA AMÏGUNKUNATA KUYANMI

19. ¿Imanirtan Jehovä Diosnintsikqa Salmus 15 textuchö imakunapita cuidakunapaq kaqta mandamantsik?

¹⁹ Salmus 15 textuqa kënö nirmi ushan: “Tsënö allikunata ruraq nunakunaqa imëpis kushishqam kawakuyanqa” (Sal. 15:5). Jehovä Diosnintsikqa kushishqa kawakunata munarmi, kë salmuchö nikämantsik imakunata ruranapaq kaqta. Y yachëkätsimantsikmi bendicionninta chaskita munarqa y mana allikunapita tsapämänata munarqa, imakunata ruranapaq kaqta (Is. 48:17).

20. ¿Ima bendiciontataq chaskiyanqa Jehoväpa invitädunkuna?

²⁰ Jehoväta cäsukoq invitädunkunaqa atska bendicionkunatam chaskiyanqa. Ciëlupaq akrashqa kaqkunam ciëluchö kawakuyanqa, tsëchömi Jesusqa pëkunapaq atska sitiukunata rakishqa (Juan 14:2). Y kë Patsachö kawaqpaq kaqkunanam Apocalipsis 21:3 ninqannö mana wanushpa imëyaqpis kushishqa kawakuyanqa. Amïgunkuna kanantsikpaq Jehovä invitamanqantsikpitaqa, ¡alläpam kushikuntsik! ¡Y wayinchömi imëyaqpis kawakuyta puëdishun!