1. ¿Salmo capítulo 15-pica imatataj yachai tucunchij?

 YACHAI 23-pi yachashca shinaca Jehová Diospaj carpa huasipi casha nishpaca paimanmi mingarina canchij. Shinallataj paipaj alli amigocunami cana canchij. Pero ¿Jehová Diospaj alli amigocuna cangapajca imatataj rurana canchij? Chaitaca Salmo capítulo 15-pimi yachai tucunchij. Chaipimi Jehová Diospajman ashtahuan cꞌuchuyangapaj imallata rurana cashcata yachachin (Salmo 15:​1-5-ta liyipai).

2. ¿Davidca Diospaj carpa huasimanta parlacushpaca ima carpa huasimantataj parlacushcanga?

² Salmo 15:​1-pica: “Mandaj Dioslla, cambaj carpa huasipica ¿maijantaj causagringari? Cambajlla urcupica ¿pitaj causagringari?” ninmi. Davidca ‘cambaj carpa huasi’ nishpaca tabernáculo nishca carpa huasimantami parlacushcanga. Chai punllacunapica tabernáculo carpa huasica Gabaón llajtapimi carca. Shinallataj Davidca ‘cambajlla urcu’ nishpaca Jerusalenpi saquirij Sionmantami parlacushcanga. Sionca Gabaón llajtamanta más o menos diez kilómetros uramanmi carca. Chaipimi Davidca Diospaj Arcata churangapaj shuj huasita shayachingacama shuj carpa huasita shayachirca (2 Samuel 6:17).

3. ¿Salmo capítulo 15-pi nishcacunataca imamantataj yachana canchij? (Fotomantapish parlapai).

³ Huaquin israelitacunallami Diospaj carpa huasipica sirvi tucurcacuna. Shinallataj Diospaj arca maipi cashcamanca mana tucuicunachu yaicui tucurcacuna. Pero Diosta alli sirvij tucui israelitacunami Jehová Dioshuanca alli apanacui tucurcacuna. Jehová Dioshuan alli apanacunami paipaj carpa huasipi sirvicushca shina carca. Ñucanchijpish Jehová Diospaj alli amigocuna canatami munanchij. ¿Chaipajca imatataj rurana canchij? Salmo 15-pi rey David nishca cualidadcunata charingapajmi esforzarina canchij.

 IMA PANDATA MANA RURASHPA, CASHCATA RURASHPA CATISHUNCHIJ

4. ¿Diospaj ñaupajpi alli ricuringapajca bautizarishca canallachu minishtirin? (Isaías 48:1).

⁴ Salmo 15:​2-pi nishca shinaca Jehová Diospaj amigocunaca ‘ima pandata mana rurashpa’, ashtahuanpish ‘cashcata rurashpami’ causana can. Chaita ruranataca manataj saquinachu canchij. Pero ¿gentecunaca ima pandata mana rurashpa causai tucunchijchu? Ari. Tucuicunami chaitaca rurai tucunchij. Juchayujcuna cashpapish Jehová Diosta tucuipi cazungapaj esforzarishpaca paipaj ñaupajpica ima pandata mana rurajcuna shinami ricurishun. Jehová Diosman mingarishpa, bautizarishpaca alli ñanpimi puri callarinchij. Pero Jehová Diospaj carpa huasipi cangapajca mana chaillachu minishtirin. Caipi yuyashun. ¿Israelitacunaca Israelpi huacharishcallamantachu Diospaj amigocuna carca? Mana. Maijan israelitacunaca Jehová Diosta mañajcuna cashpapish paicunaca ‘mana tucui shunguhuanchu’ mañajcuna carca. Ashtahuanpish mana allicunata rurashpami causajcuna carca (Isaías 48:​1-ta liyipai). Israelitacunaca Jehová Dioshuan alli apanacusha nishpaca paipaj mandashcacunata yachashpa, pajtachishpami causana carcacuna. ¿Caimantaca imatataj yachanchij? Jehová Diospaj ñaupajpi alli ricuringapajca bautizarishca canalla, Diospaj pueblopi canallaca mana minishtirinchu. Ashtahuanpish ima alli cashcatami rurashpa catina canchij. Catij parrafopimi chaimanta ashtahuan yachashun.

5. ¿Ima pandata mana ruraj, cashcata rurajcuna shina Diospaj ñaupajpi ricuringapajca imatataj rurana canchij?

⁵ Diospaj ñaupajpi ima pandata mana ruraj, cashcata rurajcuna shina ricuringapajca tucui tandanacuicunaman rinallaca mana minishtirinchu (1 Samuel 15:22). Ashtahuanpish Diosta sirvijcunaca ñucanchijlla cashpapish paipaj mandashcacunatami cazuna canchij (Proverbios 3:6; Eclesiastés 12:​13, 14). Shinallataj Diospaj ñaupajpi alli ricuringapajca uchilla ruraicunapipishmi paitaca cazuna canchij. Chaita  rurashpami Jehová Diosta cꞌuyashcata ricuchishun. Jehová Diospish ñucanchijtaca achcatami cꞌuyanga (Juan 14:23; 1 Juan 5:3).

6. ¿Diospaj ñaupajpi alli ricuringapajca ñaupa punllacunapi paita alli sirvinallachu minishtirin? (Hebreos 6:​10-12).

⁶ Jehová Diosta sirvingapajca ñaupa punllacunapica achca sacrificiocunatachari rurarcanchij. Chaimantami Jehová Diosca cushilla sintirirca. Pero Diospaj carpa huasipi cangapajca ñaupa punllacunallapi Jehová Diosta tucuipi cazunaca mana minishtirinchu (Hebreos 6:​10-12-ta liyipai). Jehová Diosca paimanta allicunata rurashcataca mana cungarinchu. Pero paica “tucuringacama” paita tucui shunguhuan sirvishpa catichunmi munan. Chaita rurajpica Jehová Diosca huiñai huiñaitami ñucanchij amigo canga (Gálatas 6:9).

LLULLANA YUYAITA SHUNGUPICA AMA CHARISHUNCHIJ

7. ¿Llullana yuyaita shungupi mana charinaca imatataj nisha nin?

⁷ Salmo 15:​2-pi nishca shinaca Jehová Diosca ‘llullana yuyaita shungupi mana charijcunatami’ paipaj carpa huasiman yaicuchun invitan. Jehová Diosca llullacunata ama nichunllaca mana munanchu. Ashtahuanpish paica tucuipi honrados cachunmi munan (Hebreos 13:18). Chaita ruranaca valishcami can. ¿Imamanta? ‘Jehová Diosca millaita rurajtaca, manataj ricunachinchu. Ashtahuanpish cashcata rurajcunahuanmi tandalla causan’ (Proverbios 3:32).

8. ¿Picuna shinataj mana cashun ninchij?

⁸ Maijancunaca shujtajcunahuan cashpallami Jehová Diospaj mandashcacunata cazuncuna. Pero paicunalla cashpaca Diospaj mandashcacunataca mana cazuncunachu. Chashna cashcamantami paicunaca llullana yuyaita shungupi charishcata ricuchincuna (Isaías 29:13). ¿Chai gentecunaca ima shinataj millaicuna tucurcacuna? Tal vez paicunaca Jehová Diospaj huaquin mandashcacuna mana alli cashcatami yuyai callarircacuna (Santiago 1:​5-8). Chaimi paicunaca uchilla ruraicunapi Jehová Diosta cazunata saquircacuna. Chaita rurashcamanta ima mana tucushcata ricushpami paicunaca jatun juchacunapi urmai callarircacuna. Paicunaca Diospaj ñaupajpi alli ricurishcatami yuyancuna. Pero Jehová Diosca paicunataca ña mana chasquinchu (Eclesiastés 8:11). Ñucanchijca paicuna shinaca mana canata munanchijchu.  Ashtahuanpish tucuipi honrados cashcatami ricuchishun ninchij.

9. ¿Natanael runamantaca imatataj yachanchij? (Fotomantapish parlapai).

⁹ Llullana yuyaita mana charij shunguta charinaca valishcami can. Caita alli intindingapajca Natanael shuti runapi yuyashun. Felipemi paitaca Jesusta rijsichirca. Jesusca Natanaelta mana rijsishpapish: “Ricuichij, cai israelita runata, paipica ima umana yuyaica mana tiyanchu” nircami (Juan 1:47). Jesusca paipaj discipulocuna honradocuna cashcatami yacharca. Pero Natanaelca paicunatapish yallimi honrado carca. Natanaelca ñucanchij shina juchayuj cashpapish siempremi honrado carca. Chaimantami Jesusca paita felicitarca. ¡Manachu ñucanchijpish Jesuspaj ñaupajpi chashna ricurisha ninchijman!

10. ¿Imamantataj ñucanchij cꞌalluta jarcarinata yachana canchij? (Santiago 1:26).

¹⁰ Salmo capítulo 15-pica shujtajcunata ima shina tratana cashcatami ashtahuanca parlan. Por ejemplo, Salmo 15:​3-pica: ‘Paipaj cꞌalluhuan pita mana yanga llaquichij, pitapish millaita mana ruraj, paipaj cꞌuchullapi causajcunatapish llaquichishpa mana rimajllami Diospaj carpa huasipica causagringa’ ninmi. Caipi nishca shinaca ñucanchij cꞌalluta jarcarinata mana yachashpaca shujtajcunatami llaquichishun. Jehová Diospaj carpa huasipipish mana cai tucushunchu (Santiago 1:​26-ta liyipai).

11. ¿Maijanpish llullacunata nishpa shujtajcunata llaquichishcamanta mana arrepintirijpica ancianocunaca imatataj rurana can?

¹¹ Rey David nishca shinaca ñucanchij cꞌalluhuan pitapish mana yangamanta llaquichinachu canchij. Maijancunaca shuj runa mana alli cashcata crichingapajmi paimantaca llullacunata nincuna. Congregacionpi maijanpish chaita rurashcamanta mana arrepintirijpica congregacionmantaca llujshichishcami cana can (Jeremías 17:10).

12, 13. ¿Mana munashpapish huaquinpica ima shinataj ñucanchij amigocunata llaquichi tucunchij? (Fotomantapish parlapai).

¹² Shinallataj Salmo 15:​3-pi nishca shinaca Jehová Diospaj carpa huasipi cajcunaca ‘pitapish millaitaca mana ruranachu can’. Shinallataj paicunapaj amigocuna mana allicuna cashcata shujtajcuna yuyachunca paicunamantaca mana huashalla rimanachu can.  ¿Ñucanchijpish mana cuidadota charishpaca ñucanchij amigocunataca ima shinataj llaquichi tucunchij?

¹³ Maijan ratoca mana munashpami ñucanchij rimashcacunahuan shujtajcunata llaquichi tucunchij. Por ejemplo, ¿shuj pani precursora canata saquijpi, shuj cusa huarmi Betelpi sirvinata saquijpi o shuj huauqui anciano, siervo ministerial shina sirvinata saquijpica imatataj rurana canchij? ¿“Caimantachari o chaimantachari chashna sirvinata saquircacuna” nishpachu shujtajcunahuan parlanacuna canchij? Mana. Ashtahuanpish paicunapaj causaimanta mana tucuita yachashcatami yuyarina canchij. Shinallataj Jehová Diospaj carpa huasipi cajcuna pitapish millaita mana rurana cashcata, mana huashalla rimana cashcatami yuyarina canchij.

JEHOVÁ DIOSTA CAZUJCUNATA ALLI NISHUNCHIJ

14. ¿Picunalla millaita rurajcuna cashcata yachangapajca imatataj rurana canchij?

¹⁴ Bibliapi nishca shinaca Jehová Diospaj amigocunaca ‘millaita rurajcunata pꞌiñajcuna, Jehová Diosta cazujcunata alli nijcunami’ cana can (Salmo 15:​4, Biblia en Quichua Chimborazo, 1989). Pero ¿picunallataj millaita rurajcuna can? Juchayujcuna huacharishcamantami “caimi alli runa can, pero chaica mana alli runachu can” mana ni tucunchij. ¿Imamanta? Maijancuna ñucanchij shina mana yuyashcamanta o ñucanchij shina mana cashcamantachari paicunahuanca mana tanto apanacunata munanchij. Pero paicunaca chashna cashpapish manachari millaita rurajcuna can. Chaimantami Diospaj ñaupajpi millaita rurajcuna shina ricurijcunallahuan mana apanacuna canchij (1 Corintios 5:11). Por ejemplo, juchacunata rurashcamanta mana arrepintirijcuna, ñucanchij crishcacunata mana respetajcuna, Jehová Diosmanta caruyachinata munajcunami Diospaj ñaupajpica millaita rurajcuna can (Proverbios 13:20).

15. ¿‘Jehová Diosta cazujcunataca’ ima shinataj alli ninchij?

¹⁵ Shinallataj Salmo 15:​4-pi nishca shinaca ‘Jehová Diosta cazujcunatami alli nina canchij’. ¿Chaica imatataj nisha nin? Jehová Diospaj amigocunata cꞌuyaihuan, respetohuan tratana cashcatami nisha nin (Romanos 12:10). ¿Chaitaca ima shinataj rurai tucunchij? Salmo 15:​4-pi nishca shinaca Jehová Diospaj carpa huasipi cajcunaca ‘imata ari nishcata paicunapaj mana alli cajpipish chaitatajmi pajtachina can’. Ñucanchij ari nishcacunata mana pajtachishpaca shujtajcunatami llaquichishun (Mateo 5:37). Por ejemplo, cusa huarmicunaca cazaracushpa paicuna ari nishcatami pajtachina can. Shinallataj Jehová Diosca yaya mamacuna paicunapaj huahuacunaman ima nishcata pajtachichunmi munan. Caipi ricushca shinaca Jehová Diosta, ñucanchij projimotapish cꞌuyashcamantami ñucanchij nishcacunata pajtachingapaj esforzarina canchij.

16. ¿Jehová Diospaj amigocunata alli nishcata ricuchingapajca imatataj rurana canchij?

¹⁶ Shinallataj Jehová Diospaj amigocunata alli ningapajca puzachijcuna, cujcunami cana canchij (Romanos 12:13). Huauqui panicunata ñucanchijhuan pasachun invitashpaca paicunapaj alli amigocunami tucushun. Jehová Diospajmanpish ashtahuanmi cꞌuchuyashun. Ashtahuancarin Jehová Dios shina cꞌuyajcuna, puzachijcuna cashcatami ricuchishun.

CULLQUI YUYAILLA AMA CAUSASHUNCHIJ

17. ¿Salmo 15-pica imamantataj cullquimanta parlan?

¹⁷ Shinallataj Salmo 15-pica: “Cullquita mañachishpapish, mana huahua cullqui jahua mañachij, ima mana allita mana rurashca cajpipish paita llaquichingaraiculla camarita mana japijmi Diospaj carpa huasipi causagringa” ninmi (Salmo 15:5). ¿Cai salmoca ashalla versocunata charishpapish imamantataj cullquimanta parlan? Mana cuidadota charishpaca ashtahuan cullquita charinallapimi yuyai callarishun. Pero  chashna yuyai callarishpaca shujtajcunatami llaquichishun. Ashtahuancarin Jehová Diosmantami caruyashun (1 Timoteo 6:10). Ñaupa punllacunapica maijan israelitacunaca cullquita mañachishpapish huahua cullqui jahuami mañachijcuna carca. Shinallataj huaquin juezcunaca shujtajcuna ima mana allita mana rurashca cajpipish paicunata llaquichingaraicullami cullquita japijcuna carca. Jehová Diosca chaicunata rurajcunataca manataj ricunayachinchu (Ezequiel 22:12).

18. ¿Cullqui solopi yuyacushcata yachangapajca imatataj rurana canchij? (Hebreos 13:5).

¹⁸ Cullqui solopi yuyacushcata yachangapajca cashna nishpami tapurina canchij: “¿Siemprechu cullquillapi, ashtahuan cosascunata randinallapi yuyani? ¿Pi ñucaman cullquita mañachijpica ‘paica mana minishtingachu’ nishpachu mana utca pagani? ¿Cullquita charishcallamantachu shujtajcunata yalli cashcata yuyani? ¿Shujtajcunaman cuj canaca ñucapajca sinchichu can? ¿Cullquita charij tucui huauqui panicuna ashtahuan charinallapi yuyajcuna cashcatachu yuyani? ¿Pobrecunata ladoman saquishpa charijcunallahuanchu apanacunata munani?”. Jehová Diospaj carpa huasipi canaca achca valishcami can. Chaimanta cullqui yuyailla ama causashunchij. Chaita rurajpica Jehová Diosca para siempremi paipaj carpa huasipi cachun saquinga (Hebreos 13:​5-ta liyipai).

JEHOVÁ DIOSCA PAIPAJ AMIGOCUNATAMI CꞌUYAN

19. ¿Salmo 15-pi nishca mandashcacunataca Jehová Diosca imamantataj ñucanchijcunamanca cushca?

¹⁹ Salmo 15-ca caita nishpami tucuchin: “Maijanpish tucui chaicunata manataj rurajca mana lluchcaringachu” (Salmo 15:5). Rey David nishca shinaca Jehová Diosca ñucanchijcuna alli causachun munashpami paipaj mandashcacunata cushca. Chaimantami paica paipaj bendicionta, paipaj ayudatapish chasquingapaj imata rurana cashcata yachachin (Isaías 48:17).

20. ¿Diospaj carpa huasipi cajcunaca ima bendicioncunallatataj chasquingacuna?

²⁰ Jehová Diospaj huasipi cajcunaca paita tucuipi cazushpaca achca bendicioncunatami chasquingacuna. Jehová Diosca ungidocunataca jahua pachapimi chasquinga. Jesusca paicunapajca ‘maipi causanatami’ jahua pachapica ña allichishcata charin (Juan 14:2). Cutin cai allpapi causana esperanzata charijcunaca Apocalipsis 21:​3-pi nishca bendicioncunatami chasquingacuna. Jehová Diospaj carpa huasipi canaca valishca bendicionmi can. Shamuj punllacunapica chaipica huiñai huiñaitami causai tucushun.