1. ¿Imapaqmi Salmos 15 capitulo yanapawasun?

 PASAQ yachachikuypim yachamurqanchik Diosllapaqña kawsakunankupaq prometekuqkuna paypa carpanpi kasqankumanta utaq amistadnin kasqankumanta. Ichaqa, ¿imam yanapawachwan paywan allin amistad kanapaq? Chaypaqmi Salmos 15 capitulo yanapawasun, chaypim tarinchik achka yachachikuykunata Diosman astawan asuykunapaq (leey Salmos 15:​1-5).

2. ¿Imapim Davidqa piensachkanman karqa Salmos libropi Diospa carpanmanta rimaspanqa?

² Salmos 15 capitulopa qallariyninpim David nirqa: “Jehova Dioslláy, ¿pitaq carpaykipiqa samapakunman? ¿Pitaq yachanman sapaqchasqayki muqupiqa?”, nispa (Sal. 15:1). Huk tiempom Diospa carpanqa Gabaon llaqtapi karqa. Yaqachusmi chaynata David rimaspanqa chay carpapi piensachkarqa. Payqa rimarqataqmi Diospa ‘sapaqchasqan muqumantapas’, chaywanqa ichapas rimachkarqa Jerusalenpi kaq Sion muqumanta. Chay muquqa karqa Gabaon llaqtapa sur lawninpim. Chaypim Diospaq carpata ruwapuspan Diospa baulninta churarqa huk wasita ruwanankukama (2 Sam. 6:17).

3. ¿Imanasqataq Salmos 15 capitulopa nisqanqa ancha allin? (Qawaytaq dibujotapas).

³ Manam llapallan Israel runakunachu Diospa carpanpiqa imapipas yanapakuyta atirqaku. Manataqmi llapallankuchu yaykuyta atiqku Diospa baulninta churasqanku carpamanpas. Ichaqa lliw Diosman sunqu kaqkunam carpanman yaykuchkanmankupas hina paypa amistadnin kaytaqa atiqku. Ñuqanchikpas amistadnin kaytaqa munanchikmá. Salmos 15 capitulopim niwanchik hinalla Diospa amistadnin kanapaq imakuna ruwanamanta.

 DIOSPA MUNASQANMAN HINA KAWSASPAYÁ ALLIN KAQTA RUWASUN

4. ¿Bautizasqallachu kananchik Jehova Diospa chaskisqan kanapaq? (Rimarimuytaq Isaias 48:1 nisqanmantapas).

⁴ Salmos 15:2 versiculopim nin Diospa amistadninqa ‘paypa munasqanman hina kawsakuqkuna’ hinaspa ‘allin kaqta ruwaqkuna’ kasqanmanta. Chayna kanapaqqa hinallam kallpanchakunanchik. Ichaqa, ¿atichwanchu pantaq kaspapas Diospa munasqanman hina kawsakuyta? Arí, atichwanmi Diosta tukuy imapi kasukuspaqa. Diospa munasqanman hina kawsakunapaqmi payman prometekurqanchik hinaspa bautizakurqanchik, ichaqa manam chayraykullachu Diosqa chaskiwasun. Yuyarisun kayta: Ñawpaq tiempopiqa manam Israel runa kasqankuraykullachu Jehova Diospa carpanpiña kaqku utaq paypa amistadninña kaqku. Wakin Israel runakunaqa Diostam sutinmanta qayakuqku ‘llullallata rimachkaspankupas’ utaq ‘mana allinllata ruwachkaspankupas’ (leey Isaias 48:1). Allin sunqu kaqkunaqa Diospa kamachikuyninkunata yachaspankum kasukunanku karqa. Kunanpas Jehova Dios chaskiwananchikpaqqa ‘allin kaqkunatam’ hinalla ruwananchik. ¿Imakunata chaykunaqa?

5. ¿Imaynataq ‘Diospa munasqanman hina kawsakuyqa’ hinaspa ‘allin kaqta ruwayqa’?

⁵ ‘Diospa munasqanman hina kawsakuyqa’ hinaspa ‘allin kaqta ruwayqa’ manam sapa semana Diosta yupaychana wasiman riyllachu (1 Sam. 15:22). Diosta serviqkunaqa sapanchikpipas utaq maypiña kaspapas Diosta kasukunapaqmi kallpanchakunanchik (Prov. 3:6; Ecl. 12:​13, 14). Manam hatun huchata ruwarunallamantachu cuidakunanchik, aswanqa lliwpim Diostaqa kasukunanchik. Chayna kasukuq kaptinchikqa Diosmi yachanqa kuyasqanchikta, chaymi paypas astawan kuyawasun (Juan 14:23; 1 Juan 5:3).

6. Hebreos 6:​10-12 nisqanman hinaqa, ¿kunankama Diosman sunqu kasqanchikraykullachu wiñaypaq amistadnin kasun?

⁶ Diosqa paypaq tukuy ima ruwasqanchikwanmi anchata kusikun. Chaywanpas  Hebreos 6:​10-12 (leey) nisqanman hinaqa manam kunankama Diosman sunqu kasqanchikraykullachu wiñaypaq amistadninqa kasun. Allin kaqkuna ruwasqanchikta Dios mana qunqaspanpas payqa munan “tukupaykama” tukuy sunquwan servinanchiktam. “Mana pisiparuspaqa” wiñaypaq amistadninmi kasun (Gal. 6:​9, willakuynin).

SUNQUMANTA IMAM KAQTA RIMASUN

7. ¿Ima ninantaq ‘sunqumanta imam kaqta rimaq’ kayqa?

⁷ Salmos 15:2 nisqanpiqa willawanchiktaqmi Jehova Diospa amistadnin ‘sunqumanta imam kaqta rimaq’ kasqanmantapas. Chaywanqa nichkan manam mana llullakuq kanallanchikmantachu, aswanqa tukuy imapi mana llullakuspa allin kawsakunanchikmantam (Heb. 13:18). ¿Imanasqam chayna kawsakuyqa ancha allin? Bibliapim niwanchik: “Mana allin ruwaq runataqa Jehova Diosqa chiqninmi, allin ruwaq runakunatam ichaqa kuyan”, nispa (Prov. 3:32).

8. ¿Imaynatam Dioswan amistadninchikta yanqachachwan?

⁸ ‘Sunqumanta imam kaqta rimaq’ kanapaqqa manam hukkunapa qayllanpi kaspallachu Diospa kamachikuyninkunataqa kasukusun, kasukusunmi sapallanchikpi kaspapas (Is. 29:13). Sapallanchikpi mana allinkunata ruwaspaqa iskay uya rikuriruspam Dioswan amistadninchikta yanqachasun. ¿Imaynatam pipas chayna kayta qallaykunman? Ichapas Diospa wakin kamachikuyninkuna allinninchikpaq kasqanmanta iskayrayayta qallaykuspan (Sant. 1:​5-8). Ichapas piensanman: “Kayta ruwaptiyqa manataq imatapas niwankuchu”, nispan. Mana allin ruwasqanwan mana imapas pasasqanraykum aswan mana allinkunataraq ruwayta qallaykunman. Chayna iskay uya kasqanraykum Diosta servisqanqa yanqapaq (Ecl. 8:11). Ñuqanchikmi ichaqa tukuy imapi mana llullakuspa allin kawsakuyta munanchik.

9. ¿Imatam yachachwan Natanaelta Jesus chayllaraq riqsiptin ima pasasqanmanta? (Qawaytaq dibujotapas).

⁹ Sunqumanta imam kaqta rimayqa ancha allinmi. Chayna kasqantam yachanchik Jesusta riqsichinanpaq Natanaelta Felipe pusaptin ima pasasqanwan. Jesusqa chayllaraqmi Natanaeltaqa rikuykurqa, chaywanpas kaynatam nirqa: “Paypiqa manapunim ima llullapas kanchu”, nispa (Juan 1:47). Jesusqa yacharqam  wakin qatiqninkunapa imam kaqta rimaq kasqankutaqa, chaywanpas Natanaelpa imam kaqta rimaq kasqanqa aswan admirakunapaqmi karqa. Natanaelqa ñuqanchik hina pantaq kaspanpas tukuy imapi mana llullakuspa confianapaq runam karqa. Chayna kasqanraykum Jesusqa alabaykurqa. Ñuqanchikpas munanchikmi Natanael hina kasqanchikrayku Jesus alabaykuwananchikta.

10. ¿Imanasqataq rimasqanchikta controlakunanchik? (Rimarimuytaq Santiago 1:26 nisqanmantapas).

¹⁰ Diospa amistadnin kanapaqqa Salmos 15 capitulopa nisqanman hinataqmi hukkunawanpas kananchik. Salmos 15:3 nisqanman hinaqa, ¿pikunatam Diosqa chaskin carpanpi samapakunankupaq utaq amistadnin kanankupaq? ‘Mana pitapas yanqamantaqa tumpaqtam’, runamasinta mana ima mana allintapas ruwaqtam hinaspa ‘kuyasqan runakunatapas pinqayman mana churaqtam’. Chaynaqa, rimasqanchikta mana controlakuspaqa hukkunatam hukmanyarachichwan, manataqmi atichwanchu Diospa carpanpi samapakuytapas utaq amistadnin kaytapas (leey Santiago 1:26).

11. ¿Imaynam yanqamanta tumpakuq runaqa? ¿Imam pasan pi iñiqmasinchikpas chayna kasqanta mana cambiayta munaptinqa?

¹¹ Salmos 15:3 nisqanpiqa riman ‘pitapas yanqamanta tumpaymantam’. Pitapas yanqamanta tumpakuq runaqa llullakunata rimaspanmi hukkunata pinqaypi qipachin. Pi iñiqmasinchikpas chayna kasqanta mana cambiayta munaspanqa congregacionmanta qarqusqam kanan (Jer. 17:10).

12, 13. ¿Imakuna pasaptintaq mana cuentata qukuspa kuyasqanchik runakunata pinqayman churachwan? (Qawaytaq dibujotapas).

¹² Salmos 15:3 nisqanqa yuyarichiwanchiktaqmi Jehova Diospa amistadninqa ‘runamasinta mana ima mana allintapas ruwasqanta’ chaynataq ‘kuyasqan runakunatapas pinqayman mana churasqanta’. ¿Imaynatam kuyasqanchik runakunata pinqayman churachwan?

¹³ Mana cuentata qukuspam hukkunamanta mana allinta rimayta qallaykuchwan.  Ichapas warmi iñiqmasinchik tukuy tiemponwan Dios servisqanta saqirunman, casarasqa iñiqmasinchikkunañataq betelmanta lluqsirunmanku chaynataq mayqin iñiqmasinchikpas punta apaq utaq punta apaqkunapa yanapaqnin manaña kanmanchu. ¿Chayraykuchu ima mana allintapas ruwarusqankuta piensaspa paykunamanta mana allinkunata rimayta qallaykuchwan? Manapaschá lliwtachu yachanchik Dios servisqankupi imanasqa chay cambiokuna kasqanmantaqa. Chaymi yuyarinanchik Diospa amistadninkunaqa ‘runamasinta ima mana allintapas mana ruwaq’ kasqanta chaynataq ‘kuyasqan runakunatapas pinqayman mana churaq’ kasqanta.

DIOSTA KASUKUQKUNATA KUYASUN

14. ¿Imaynatam yachachwan pipas mana allin ruwaq kasqanta? ¿Imayna runakunallatam qipanchananchik?

¹⁴ Salmos 15:4 versiculopim niwanchik Jehova Diospa amistadninkunaqa ‘mana allin ruwaqkunata qipanchasqanta’. ¿Imaynatam yachachwan pipas mana allin ruwaq kasqanta? Chaypaqqa manam piensasqallanchikpichu hapipakuna. Pantaq kasqanchikrayku ichapas wakin iñiqmasinchikkunawan astawan kayta munanchik imayna kasqanku gustawasqanchikraykulla. Wakinkupa imayna kasqankum ichaqa mana gustawachwanchu. Chaywanpas lliwtam Diosqa kuyan. Chayraykum qipanchananchikqa Jehova Diospa qipanchasqan runakunallata (1 Cor. 5:11). Chayna runakunaqa kanku mana pinqakuspa huchallapi kaqkunam, imapi creesqanchikta mana respetaqkunam hinaspa Diosmanta karuncharuyta munawaqninchikkunam (Prov. 13:20).

15. ¿Imatam ruwasun ‘Jehova Diosta kasukuqkunata kuyaspaqa’?

¹⁵ Salmos 15:4 versiculopiqa niwanchiktaqmi ‘Jehova Diosta kasukuqkunata kuyanamantapas’. Chayraykum Diospa amistadninkunataqa imapipas yanapaykuyta hinaspa respetayta munanchik (Rom. 12:10). Hina chay versiculopim niwanchik Diospa carpanpi kaqqa utaq amistadninqa ‘mana allinninpaq kanan kaptinpas imapas nisqankunata ruwaq’ kasqanta. Imapas nisqanchikta mana cumpliq kaspanchikqa hukkunatam hukmanyachichwan (Mat. 5:37). Diosqa munan warmi-qari casarakuspanku prometenakusqankuta cumplinankutam. Munantaqmi churi-wawankuman tayta-mamakuna prometesqankuta cumplinankutapas. Chaynaqa, Diostawan runamasinchikta kuyasqanchikraykuyá tukuyta ruwasun imapas nisqanchikta cumplinapaq.

16. ¿Imaynataraqtaq Diosta kasukuqkunata kuyachwan?

¹⁶ Diosta kasukuqkunataqa kuyachwantaqmi wasinchikpi samaykachispapas utaq imanchikta quykuspapas (Rom. 12:13). Kusirikunapaq utaq imapipas pukllanapaq iñiqmasinchikkunata invitaspanchikqa paykunawan hinaspa Dioswanmi allin amistad kasun. Arí, wasinchikpi samaykachispaqa Jehova Diostam qatipakuchkanchik.

MANAM QULLQITAQA KUYANANCHIKCHU

17. ¿Imaynanpitaq Salmos 15 capituloqa qullqimanta riman?

¹⁷ Diospa amistadnin imayna kasqanmanta rimaspanqa hinallaraqmi Salmos 15 capituloqa niwanchik: “Qullqintapas qun mana mirayniyuqta kutichipunanpaqmi. Manataqmi imatapas chaskikunchu mana huchayuqkuna ñakarichisqa kanankupaqqa”, nispa (Sal. 15:5). ¿Imaynanpitaq kay capitulopiqa qullqimanta riman aschalla versiculoyuq kachkaspapas? Mana cuidakuspanchikqa qullqilla maskayman qukuruspam hukkunata mana allinta ruwachwan, Diosmantapas karunchakuruchwanmi  (1 Tim. 6:10). Ñawpaqpi wakin runakunam wakcha runaman qullqita prestaykuspanku mirayniyuqta mañakuqku. Wakin juezkunañataqmi qullqirayku niqku mana huchayuq runa castigasqa kananpaq. Chaykuna ruwaytaqa Diosqa chiqninmi (Ezeq. 22:12).

18. ¿Imakunatam tapukunanchik? (Rimarimuytaq Hebreos 13:5 nisqanmantapas).

¹⁸ Chaymi sapakama tapukunanchik: “¿Qullqillapichu hinaspa imapas rantiy munasqallaypichu piensani? Pimantapas qullqita prestakuruspayqa, ¿mana necesitasqanta piensaspaychu mana chaylla kutiykachipuni? ¿Qullqiyuq kasqayraykuchu wakinkunamanta aswan allinpaq hapikuni? ¿Maqllachu kani? ¿Lliw qullqiyuq iñiqkuna qullqilla kuyaq kasqankutachu piensani? ¿Qullqisapakunallapa amistadninchu kani?”, nispa. Kusisqam tarikunchik Diospa amistadnin kaspanchikqa, amayá qullqita kuyaspaqa paymanta karunchakurusunchu. Diosman sunqu kaptinchikqa manam haykapipas payqa saqiwasunchu (leey Hebreos 13:5).

DIOSQA AMISTADNINKUNATAM KUYAN

19. ¿Imanasqam Diosqa imayna kananchikmanta niwanchik Salmos 15 capitulopi?

¹⁹ Salmos 15 capitulom kaynata tukun: “Chayna runaqa haykapipas hawkam tarikunqa”, nispa (Sal. 15:5). Arí, Diosqa kusisqa kananchikta munasqanraykum imayna kananchikmanta niwanchik Salmos 15 capitulopi. Kasukuptinchikqa bendeciwasunmi hinaspapas cuidawasunmi (Is. 48:17).

20. ¿Imaynam hamuq tiempopi kawsakusun Diospa lliw amistadninkuna?

²⁰ ¿Imaynam hamuq tiempopi kawsakusun Diospa carpanpi samapakuqkuna utaq amistadninkuna? Hinalla payman sunqu kaspaqa hanaq pachapaq kaqkunam Jesuspa allichasqan ‘sitiokunapi’ yachanqaku (Juan 14:2). Wakiqninchikñataqmi Apocalipsis 21:3 nisqanman hina kay allpa pachapi kusisqa kawsakusun. ¡Anchatamá kusikunchik amistadnin kanapaq kikin Jehova Dios invitaykuwasqanchikmantaqa! Wiña-wiñaypaqmá paypa carpanpi samapakuytaqa atichwan.