1. Akapeea a Salamo 15:1-5 me tauturu ia tatou?

 I TE atikara i mua atu, kua apii tatou e ka riro te au tavini akatapuia o Iehova ei au manuiri i roto i Tona puakapa me akatupu ratou i tetai pirianga vaitata kiaia. Inara, akapeea e rauka ai ia tatou tetai pirianga kiaia? Ka pau a Salamo 15 i teia uianga. (E tatau ia Salamo 15:1-5.) E maata te au apiianga i roto i teia salamo te ka tauturu ia tatou kia akavaitata atu ki te Atua.

2. Eaa tei akakeu ia Davida kia taiku i to Iehova puakapa?

² Akamata a Salamo 15 i te na ko anga e: “Koai, e Iehova, te ka tuitarere i toou ra puakapa? koai te ka noo i to maunga tapu ra?” (Sala. 15:1) I te taikuanga a Davida i to Iehova “puakapa,” penei te akamanako ra aia i te tapenakara i Gibeona i tera tuatau. Pera katoa, te taiku anga a Davida i to te Atua “maunga tapu,” penei te taiku ra aia i te maunga o Ziona i Ierusalema, e oire i te tua apatonga o Gibeona. Tei reira te ngai i akatu ei a Davida i tetai puakapa no te aruna koreromotu, e kua vai ua te aruna ki reira e tae ua atu ki te pātu anga i te iero.—2 Samu. 6:17.

3. Eaa tatou ka inangaro ei kia mārama ia Salamo 15? (Akara katoa i te tutu.)

³ Ko te tika, kare te maata anga o te ngati Iseraela i tavini ana i ko i te tapenakara, e kare katoa ratou i akatikaia  kia tomo ki roto i te puakapa tei reira te aruna koreromotu. Inara, ka āriki a Iehova i tona au tavini tiratiratu ei manuiri i roto i tona puakapa me riro ua rai ratou ei oa nona. Ka inangaro tatou pouroa i te rave i te reira. Ia Salamo 15, kua akataka mai a Davida i tetai au tu ka anoanoia te au oa o Iehova kia akaari.

EI AERENGA TIRATIRATU TO TATOU E TE AKONO TUATUA TIKA

4. Akapeea tatou e kite ei e maata atu tei anoanoia no te akamareka ia Iehova i te papetito ua? (Isaia 48:1)

⁴ Ia Salamo 15:2, kua akatakaia tetai oa o te Atua ei tangata “aerenga tiratiratu ko tei akono i te tuatua-tika.” Te aiteanga o te tuatua “aerenga tiratiratu” e te “akono i te tuatua-tika,” koia oki kia rave tamou i tetai angaanga. Inara ka rauka ainei ia tatou i te ‘aaere ma te tiratiratu’? Ae. Noatu kare e tangata apa kore, ka riro mai tatou ei tangata “aerenga tiratiratu” ki mua ia Iehova me tauta tatou i te akarongo kiaia. Me akatapuia tatou ki te Atua e me papetito, ko te akamataanga tera o to tatou aaere anga ma te Atua. I te tuatau taito, noatu me e ngati Iseraela koe, kare te aiteanga e ka riro ua mai koe ei manuiri na Iehova. Kua kapiki tetai pae iaia “kare ra ma te tuatua-mou, e kare rai ma te tuatua-tika.” (E tatau ia Isaia 48:1.) Ka anoanoia te au Iseraela ngakau tae kia kite i ta Iehova e umuumu maira e kia akono i te reira. Pera katoa, i teia tuatau e maata atu tei anoanoia no tatou kia akamareka i te Atua, i te papetito ua e te piri ki te putuputuanga. Ka anoanoia tatou kia “akono i te tuatua-tika.” Akapeea tatou me rave i teia?

5. Eaa te aiteanga kia akarongo kia Iehova i te au atianga ravarai?

⁵ I roto i te mata o Iehova ko te “aerenga tiratiratu” e te “akono i te tuatua-tika,” e maata atu tei anoanoia  i te aere putuputu ki te au uipaanga i ko i te Are Uipaanga Patireia. (1 Samu. 15:22) Ka anoanoia tatou kia tauta pakari i te akarongo ki te Atua i te au atianga ravarai e me ko tatou anake ua. (Mase. 3:6; Kohe. 12:13, 14) E mea puapinga kia akarongo tatou kia Iehova me rave tatou i te au ikianga. Me pera tatou, ka akaari te reira i to tatou inangaro iaia e ka akaperepere mai aia ia tatou.—Ioa. 14:23; 1 Ioa. 5:3.

6. Ia Ebera 6:10-12, eaa tei puapinga atu i te au angaanga meitaki ta tatou i rave i mua ana?

⁶ Akaperepere maata a Iehova i ta tatou i rave nana i mua ana. Noatu kua rave tatou i te tuatua tika i te tuatau i topa, kare te aiteanga e ka riro ua rai tatou ei manuiri i roto i to Iehova puakapa. Ka kite tatou i teia ia Ebera 6:10-12. (E tatau.) Kare a Iehova e akangaropoina i ta tatou angaanga i rave. Inara, ka inangaro aia ia tatou kia tavini pu iaia e “tae ua atu ki te openga.” Me kare tatou “e akaparuparu,” ka riro mai aia ei oa mutu kore no tatou.—Gala. 6:9.

TUATUA I TE TUATUA MOU I ROTO I TOOU NGAKAU

7. Eaa te aiteanga kia tuatua i te tuatua mou i roto i to tatou ngakau?

⁷ Me inangaro tetai kia riro mai ei manuiri i roto i to Iehova puakapa, ka anoanoia aia kia “tuatua i te tuatua-mou i roto i tona ra ngakau.” (Sala. 15:2) Kare aia e kopae ua i te pikikaa. Mari ra, ka inangaro a Iehova iaia kia akakite e te rave i te mea tika i te au taime ravarai. (Ebe. 13:18) E puapinga teia no te mea e “viivii oki na Iehova te aronga māro [me kore pikikaa] ra, tei te aronga tuatua-tika ra tana muna.”—Mase. 3:32.

8. Eaa ta tatou ka anoanoia kia kopae?

⁸ Ko te aronga tei ‘tuatua i te tuatua mou i roto i to ratou ngakau,’ kare ratou e akarongo ua ki te Atua i mua i te katoatoa e i taua taime rai ka rave muna i te ara. (Isa. 29:13) Kare ratou e tauta i te akavare i tetai ke. Penei ka ekoko tetai tangata pikikaa me e mea meitaki rai ta Iehova au ture. (Iako. 1:5-8) Penei ka akarongo kore aia kia Iehova no te au  mea tana i manako e puapinga kore. Me kare aia e akautungaia no tona tu akarongo kore, penei ka māro ketaketa tona ngakau e ka rave ua atu aia i te kino. Ka riro tana akamorianga ei mea puapinga kore. (Kohe. 8:11) Inara, ka inangaro tatou i te rave i te mea tika i te au taime ravarai.

9. Eaa ta tatou ka apii mai mei ta Iesu aravei anga ia Natanaela? (Akara katoa i te tutu.)

⁹ Ka kite tatou i te puapinga o te ngakau tika te aravei anga a Iesu ia Natanaela. Te arataki anga a Philipa i tona oa ko Natanaela kia Iesu, kua tupu tetai mea umere. Noatu kare a Iesu i aravei ake ia Natanaela, kua karanga a Iesu: “Ka akara na i te ngati Iseraela tikai, kare ua e pikikaa o roto iaia.” (Ioa. 1:47) Kua kite a Iesu e ngakau tika ta tona au pipi, inara kua kite a Iesu i te tu pikikaa kore o Natanaela. Mei ia tatou rai, e tu apa ua to Natanaela. Noatu ra, kua rave aia i te mea tika i te au mea katoa. Kua umere tikai a Iesu e kua akameitaki ia Natanaela no te reira. Ko te tika, ka inangaro tatou pouroa kia tuatua akapera mai a Iesu no tatou!

10. Eaa tatou ka matakite ei i ta tatou ka tuatua? (Iakobo 1:26)

¹⁰ Te akataka maira te maata anga o te au umuumuanga ia Salamo 15 akapeea tatou me akono i tetai ke. Akakite mai a Salamo 15:3 no te manuiri i roto i to Iehova puakapa, “ko tei kore i urutoe tona arero, ko tei kore i takinga-kino i tona tangata tupu, ko tei kore i āriki i te tuatua kino i tona taunga.” Me tuatua akakino tatou i tetai ke, ka mamae ratou e ka akaateaia tatou mei roto i to Iehova puakapa.—E tatau ia Iakobo 1:26.

11. Eaa te urutoe, e eaa te ka tupu ki te aronga urutoe tei kore i tataraara?

¹¹ Kua taiku te tata salamo i te urutoe. Eaa te reira? Ko te urutoe, e tuatua pikikaa te reira te ka akakino i te ingoa o tetai tangata. Ka akaateaia te aronga urutoe tei kore i tataraara mei te putuputuanga Kerititiano.—Iere. 17:10.

12-13. Eaa te au turanga penei ka akatotoa tatou i te tuatua akakino no to tatou au taeake? (Akara katoa i te tutu.)

 ¹² Kua taiku katoa a Salamo 15:3 no te au manuiri i roto i to Iehova puakapa e ko tei kore i takinga kino i tona tangata tupu, ko tei kore i āriki i te tuatua kino. Eaa te aiteanga o te reira?

¹³ Penei ka akatotoa tatou i te tuatua akakino no tetai taeake. Akamanako i teia au akaraanga: (1) kua akamutu tetai tuaine i tana angaanga painia, (2) kua akaruke tetai nga tokorua akaipoipo ia Betela, e te (3) kare tetai taeake e tavini akaou ei tangata pakari me kore ei tavini tauturu. E mea meitaki ainei kia tamanako tatou i te au tumu i tupu ei teia au tauianga, e oti e akakite i te reira ki te katoatoa? Penei e au tumu anga meitaki tetai no teia au tauianga kare tatou i kite. Pera katoa, ko te manuiri i roto i to Iehova puakapa, kare aia e “takinga-kino i tona tangata tupu e kare e āriki i te tuatua kino i tona taunga.”

AKANGATEITEI I TE ARONGA TEI MATAKU IA IEHOVA

14. Akamārama akapeea te manuiri a Iehova me akavaavaa i te “tangata viivii.”

¹⁴ Karanga ra a Salamo 15:4 no tetai oa o Iehova e ko “tei akavaavaa i te tangata viivii.” Akapeea tatou me rave i teia? Ei aronga apa ua, kare tatou e tau kia akava i tetai ei tangata viivii. No teaa ra? Penei ka piri tatou ki te aronga ta tatou i manako e oaoa ratou e ka akavaavaa i te aronga tei akariri mai ia tatou. Inara ka patoi tatou i te aronga tei rave i te au mea ta Iehova i karanga e mea “viivii.” (1 Kori. 5:11) Te kapiti maira i te aronga tei rave akakoro i te kino, tei patoi i to tatou irinakianga e tei tauta i te akaparuparu i to tatou pirianga kia Iehova.—Mase. 13:20.

15. Eaa tetai ravenga e akangateitei ra tatou i “te aronga i mataku ia Iehova”?

¹⁵ I tetai tua karanga a Salamo 15:4, “e akangateitei ra i te aronga i mataku ia Iehova.” No reira, ka kimi tatou i te au ravenga kia takinga meitaki e te akangateitei i to Iehova au oa. (Roma 12:10) Akapeea ra? Ko tetai ravenga kua taikuia ia Salamo 15:4 no te manuiri i roto i to Iehova puakapa, “ko tei taputou ra, kino ua’i aia uaorai, kare e taeke ua.” Me kare tatou e akatupu i ta tatou i taputou, ka mamae tetai ke. (Mata. 5:37) Ei akaraanga, ka tapapa a Iehova i tona au manuiri kia akono i ta ratou tia akaipoipo. Ka mareka katoa aia me tauta te au metua i te akono i ta ratou au taputou no ta ratou tamariki. No to tatou inangaro i te Atua e tetai ke ka tauta pakari tatou i te akono i ta tatou i taputou.

16. Eaa atu tetai ravenga kia akangateitei i to Iehova au oa?

¹⁶ Ko tetai ravenga kia akangateitei i to te Atua au oa koia oki, kia takinga meitaki ia ratou e te oronga ua. (Roma 12:13) Me akapou tatou i tetai tuatau ki te au taeake e te au tuaine no te tamataora, ka akamatutu te reira i to tatou pirianga kia ratou e Iehova. Pera katoa, me akaari tatou i te tu takinga meitaki kia ratou te aru ra tatou ia Iehova.

AURAKA E ANOANO MAATA I TE MONI

17. Eaa te tumu i taikuia ai te moni i roto ia Salamo 15?

¹⁷ Ka tatau tatou no tetai oa o Iehova “ko tei kore i tuku i tana moni ki te ou ra; ko tei kore i rave i te tutaki ei akaapa i te tangata ara kore ra.” (Sala. 15:5)  Eaa te tumu i taikuia ai te moni i roto i teia salamo? No te mea me anoano maata tatou i te moni, ka mamae tetai ke e ka takinoia to tatou pirianga ki te Atua. (1 Timo. 6:10) I te tuatau Pipiria, kua kaiou tetai pae i te moni maata ki to ratou au taeake putaua. Pera katoa, kua tutakiia te au akava kia akaapa i te aronga ara kore. E peu rikarika teia kia Iehova.—Eze. 22:12.

18. Eaa te au uianga te ka tauturu ia tatou kia kite i to tatou manako no te moni? (Ebera 13:5)

¹⁸ E mea meitaki kia akara i to tatou manako no te moni. E ui kia koe uaorai: ‘Ka pou ua ainei toku manako ki runga i te moni e ta te reira ka oko? Me kaiou au, ka marie ainei au i te tutaki i te reira, ma te manako e kare e anoanoia kia tutaki i te reira kaiou? Ka manako ainei au e puapinga au me maata taku moni e ka ngatā ainei i te oronga ua? Ka manako ainei au e oraanga apinganui to te au taeake e te au tuaine e moni ta ratou? Ka piri ainei au ki te aronga apinganui e te akavaavaa i te aronga putaua?’ E apainga ngateitei ta tatou kia riro mai ei manuiri na Iehova. Inara, ka riro ua rai tatou ei manuiri na Iehova me kare tatou e anoano maata i te moni. Me pera tatou, kare rava a Iehova e akaruke ia tatou!—E tatau ia Ebera 13:5.

AKAPEREPERE A IEHOVA I TONA AU OA

19. Eaa te tumu i inangaro ei a Iehova kia rave tatou i Tana e umuumu maira?

¹⁹ Kua taopenga a Salamo 15 i te na ko anga: “Ko tei akapera i te rave i taua au mea nei, kare e ngaueue e tuatau ua atu.” (Sala. 15:5) Te akamārama maira te tata salamo i te tumu i inangaro ei te Atua kia rave tatou i tana e umuumu maira. Ka inangaro a Iehova kia mataora tatou. Me rave tatou i tana e pati maira, ka mataora to tatou oraanga e ka paruru aia ia tatou.—Isa. 48:17.

20. Eaa ta te au manuiri a Iehova ka tapapa atu?

²⁰ E manakonakoanga manea ta te au manuiri o Iehova ka tapapa atu no te tuatau ki mua. Ka noo te aronga akatainuia ki te ngai ta Iesu i akamanea no ratou. (Ioa. 14:2) Ka tapapa te aronga e manakonakoanga to ratou no te enua kia tupu te taputou ia Apokalupo 21:3. E mea papu, e apainga ngateitei kia patiia e Iehova kia riro ei au oa nona e kia noo ki roto i tona puakapa e tuatau ua atu!