1. Sar ka pomožini amen o Psalam 15:1-5?

 KO OKOVA članko dikhljam so okola so predajinđe pe e Jehovase hem trudinena pe te oven paše oleja šaj te oven gostija ko oleso simbolično šatori. Ama, so valjani te ćera te šaj hem ponodri te ova olese gostija? Ko 15. psalam vaćeri pe odolestar. (Čitin Psalam 15:1-5.) Odova psalam ka pomožini amen te haljova so valjani te ćera te šaj te ova popaše e Devleja.

2. Ko so o David mislinđa ked pominđa e Jehovaso šatori?

² O 15. psalam počmini jekhe pućibaja: „Jehova, ko šaj te ovel gosto ko to šatori? Ko šaj te ovel ki ti sveto gora?“ (Ps. 15:1). Ked pominđa e Jehovaso „šatori“, o psalmista o David šaj mislinđa ko šatori kova jekh vreme hine ko Gavaon. Isto ađahar, ked pominđa e Devlesi „sveto gora“, šaj mislinđa ki gora Sion koja hine ko Jerusalim. Nekobor kilometrija južno ando Gavaon, o David ko jekh šatori ćhivđa o kovčeg ando savez hem odothe hine sa đi na gradinđa pe o hram (2. Sam. 6:17).

3. Sose mangaja te haljova odova so pisini ko 15. psalam? (Dikh i slika.)

³ But Izraelcija niked na hine len prilika te služinen ko sveto šatori. Samo nekobor olendar šaj hine te khuven andre kaj hine o kovčeg ando savez. Ama, sa e Jehovase verna sluge šaj hine te oven gostija ko oleso simbolično šatori ađahar so bi ovena hem aćhona olese amala. Odova sare amen mangaja. Ko 15. psalam pisini kola osobine valjani te oven amen te šaj te aćhova e Jehovase amala.

 ŽIVIN BESPREKORNO HEM ĆER ODOVA SOJ TANO PRAVEDNO

4. Sar đanaja so o krštenje nane jedino so o Jehova rodela amendar te ćera? (Isaija 48:1)

⁴ Ko Psalam 15:2 aso Devleso amal phenela pe so „živini besprekorno hem ćerela odova soj tano pravedno“. O lafija „živini“ hem „ćerela“ mothovena amenđe so odova tano jekh proces kova trajini. Ama, da li amen ćaće šaj te ova „besprekorna“? Ja. Iako nijekh amendar nane savršeno, o Jehova ipak upro amende šaj te dikhel sar „besprekorna“ ako daja sa amendar te šuna le. Ked predajinaja amen hem krstinaja amen, tegani počminaja te živina besprekorno. Na primer, ko purano vreme odova so jekh manuš hine Izraelco na značinđa so ov tano gosto ko Jehovaso šatori. Disave olendar molinđe pe e Devlese, ama na „iskreno hem pravedno“. (Čitin Isaija 48:1.) Te šaj te mothoven so iskreno mangena te služinen e Devlese, on morandilje te sikljon e Jehovase merilija hem te ićeren pe ko odova. Isto ađahar, te šaj te ova e Jehovase amala, amen valjani te ćera diso pobuter ando odova nego samo te krstina amen hem te ova deo andi skupština. Amen valjani hem ponodri te „ćera odova soj tano pravedno“. Ama, so odova značini?

5. So značini te šuna e Jehova ko sa?

⁵ Anglo Jehovase jaćha „te ova pravedna“ hem „te ćera odova soj tano ispravno“ značini više ando odova samo te đa redovno ko sastankija (1. Sam. 15:22). Amen valjani te da sa amendar te šuna e Jehova ko sa čak ked hijam kokri (Posl. 3:6; Prop. 12:13, 14). Isto ađahar, but tano bitno te trudina amen te šuna e Jehova ko tikne buća. Ako ćeraja odova, amen ka mothova so mangaja le hem  sebepi odova ov ka mangel amen pana pobuter (Jov. 14:23; 1. Jov. 5:3).

6. Premalo Jevrejima 6:10-12, soj tano považno ando šukar buća kola angleder ćerđam?

⁶ O Jehova but cenini sa odova so angleder ćerđam. Ama, odova nane garancija so ka aćhova zauvek ko Jehovaso šatori. Odova tano jasno pisimo ko Jevrejima 6:10-12. (Čitin.) O Jehova na bistrela sa o šukar buća kola angleder ćerđam. Ama, ov mangela hem ponodri verno te služina lese sa „đi o krajo“. Ov ka ovel zauvek amaro amal „ako na ćhinđovaja“ (Gal. 6:9).

VAĆER O ĆAĆIPE KO TO VILO

7. So značini te vaćera o ćaćipe ko amaro vilo?

⁷ Neko ko mangela te ovel gosto ko Jehovaso šatori valjani te „vaćeri o ćaćipe ko po vilo“ (Ps. 15:2). Odova na značini samo te na hovava. O Jehova mangela te ova iskrena ko sa so vaćeraja (Jevr. 13:18). Odova tano but važno „sose e Jehovase tano gadno o lošno manuš, a amal tano okolencar kola isi len iskreno vilo“ (Posl. 3:32).

8. Savo stav na valjani te ovel amen?

⁸ Okola kola „vaćerena o ćaćipe ko po vilo“ na šunena e Devle samo ked avera dikhena len, a palo odova ćerena lošna buća (Is. 29:13). On nane licemerna. O manuš kova tano licemerno počmini te mislini so e Jehovase zakonija nane uvek šukar (Jak. 1:5-8). Ov šaj na ka šunel e Jehova ko buća aso kola ov mislini so nane odobor važna. Palo odova, ako dikhela so nane le nisave posledice, ov počmini te ćerel pana pološna buća. Iako ov mislini so služini e Devlese, o Jehova upro leste na dikhela sar upro po sluga (Prop. 8:11). Amen mangaja te ova iskrena ko sa o buća kola ćeraja.

9. So desinđa pe ked o Isus upoznajinđa e Natanailo hem so sikljovaja odolestar? (Dikh i slika.)

⁹ Amen šaj te sikljova kobor tano važno te ovel amen iskreno vilo ando odova so o Isus phenđa e Natanailose. Ked o Filip upoznajinđa le e Isuseja, desinđa pe  diso but zanimljivo. Iako o Isus na đanđa le, ov phenđa lese: „Aće, akava tano pravo Izraelco, ko kova nane prevara“ (Jov. 1:47). O Isus đanđa so hem avera olese učenikija tane iskrena, ama phenđa soj tano o Natanailo posebno iskreno. Sar amen, hem o Natanailo hine nesavršeno. Ama, ov na ćerđa pe već hine iskreno ko sa. E Isusese but sviđinđa pe olesi iskrenost hem odolese pohvalinđa le. Sigurno bi sare amen mangaja o Isus hem amen te pohvalini sebepi amari iskrenost.

10. Sose valjani te pazina so vaćereja? (Jakovljeva 1:26)

¹⁰ Ko 15. psalam tane pisime but buća ando odova sar amen valjani te ova premalo avera. Ko Psalam 15:3 pisini so o gosto ko Jehovaso šatori „na klevetini pe ćhibjaja. Nisavo lošnipe na ćerela pe pašutnese hem na vaćeri lošno kotar po amal“. Ako klevetinaja averen, odova ćaće ka povredini len hem više našti te ova gostija ko Jehovaso šatori. (Čitin Jakovljeva 1:26.)

11. Soj tani i kleveta hem so ka ovel okolencar kola klevetinena, a na kajinena pe?

¹¹ O psalmista konkretno pominđa i kleveta. Soj tani i kleveta? I kleveta tani namerno hovajbe kova šaj te rumini nekaso anav. Ako neko klevetini averen hem na kajini pe, ov našti više te ovel e Jehovaso svedoko (Jer. 17:10).

12-13. Ko kola situacije šaj nesvesno te ova kriva aso klevetanje? (Dikh i slika.)

¹² Ko Psalam 15:3 pisini so o gosto ko Jehovaso šatori na ćerela nisavo lošnipe pe pašutnese hem na vaćeri lošno kotar pe amala. So odova značini?

¹³ Ako na pazinaja, šaj nesvesno te počmina te širina negativna informacije averendar. Na primer: (1) jekh phen šaj više na služini ki punovremeno služba, (2) jekh par na služini više ko Betel (3) ja jekh phral više na služini sar starešina  ja sar sluga pomoćniko. Na bi ovela šukar te vaćera averenđe so akala phralja hem phenja ćerđe diso lošno hem odolese meninđe pe olenge okolnostija. Šaj isi but razlogija sose meninđe pe olenge okolnostija, a amen na đanaja odova. Jekh manuš kova tano gosto ko Jehovaso ćher, na ćerela nisavo lošnipe pe pašutnese hem na vaćeri lošno kotar pe amala.

ČAST MOTHOVI OKOLENĐE SO DARANA ANDO JEHOVA

14. Kastar e Jehovase gostija cidena pe hem sose?

¹⁴ Ko Psalam 15:4 pisini so e Jehovaso amal „cidela pe svakonestar kova na zaslužini ni hari poštovanje“. Sar šaj te đana da li neko odova zaslužini? Nane amaro te procenina odova sose hijam nesavršena hem šaj te desini pe te sviđini pe amenđe neko kasa šukar đala amenđe, a te cida amen nekastar ko nervirini amen. Ama, amen valjani te cida amen samo ando manuša aso kola o Jehova phenela so „na zaslužinena ni hari poštovanje“ (1. Kor. 5:11). A odola tane okola so na kajinena pe aso lošna buća kola ćerena, na poštujinena amare verovanja hem mangena te ciden amen ando pravo drumo (Posl. 13:20).

15. Sar šaj te mothova čast „okolenđe so darana ando Jehova“?

¹⁵ Ko Psalam 15:4 hijam podstaknime te mothova čast okolenđe so „darana ando Jehova“. Odolese, valjani te dikha sar šaj te mothova šukaripe hem poštovanje e Jehovase amalenđe (Rimlj. 12:10). Jekh način sar šaj te ćera odova pomini pe ko Psalam 15:4. Odothe pisini so e Jehovaso gosto „ispunini pe obećanja, čak ked tano odova olese ki šteta“. Ked na ićeraja amen ko amare obećanja, šaj te povredina averen (Mat. 5:37). Na primer, o Jehova očekujini kotar rom hem romni te ićeren pe ko zavet kova dinđe jekh jekhese ked venčinđe pe. Isto ađahar, o Jehova tano bahtalo ked dikhela so o roditeljija ićerena pe ko pe obećanja kola dinđe pe ćhavenđe. Odolese so mangaja e Jehova hem averen, amen ka da sa amendar te ićera amen ko odova so obećinđam.

16. Sar šaj pana te mothova čast e Jehovase amalenđe?

¹⁶ Jekh aver način sar šaj te mothova čast e Jehovase amalenđe tano ađahar so ka ova gostoljubiva hem velikodušna (Rimlj. 12:13). Ked provodinaja vreme amare phralencar hem phenjencar odova pomožini amen te zorjaćera amaro amalipe olencar hem e Jehovaja. Isto ađahar, ked hijam gostoljubiva amen oponašinaja e Jehova.

MA MANG O PARE

17. Sose pominena pe o pare ko 15. psalam?

¹⁷ Ki Biblija pana pisini so o gosto ko Jehovaso šatori „pe pare na dela ki kamata, hem na lela talo vas te bi ćerela lošnipe e nedužno manušese“ (Ps. 15:5). Sose akate pominena pe o pare? Odolese so ako mangaja o pare, on šaj te oven amenđe považna ando manuša pa čak hem ando Devel (1. Tim. 6:10). Ko purano vreme, disave iskoristinđe pe phralen kola hine ćorore ađahar so lelje lendar kamata. Isto ađahar, disave sudije lelje pare talo vas hem palo odova nepravedno osudinđe disave nedužno manušen. O Jehova ćaće mrzini ked o manuša ćerena bilo koja andi akija buti (Jezek. 22:12).

18. So šaj te puća amen te šaj te đana savo stav isi amen premalo pare? (Jevrejima 13:5)

 ¹⁸ But tano šukar te razmislina savo stav isi amen premalo pare. Odolese, puć tut: „Da li često razmislinava ando pare hem ando odova so ka ćinav? Ako nekastar pozajminđum pare, da li valjani maje but vreme te irinav lese sose mislinava so na valjani lese? Da li sebepi odova so isi man pare mislinava so hijum pošukar averendar? Da li maje pharo te ovav phravde vasteso? Da li mislinava so ako jekh phral ja phen isi len but pare, odova tano odolese so mangena pobuter o pare nego e Jehova? Da li mangava te družinav man samo okolencar kola tane barvale, a na obratinava pažnja upro ćorore?“ Šukar tano te razmislina ando akala pućiba sose amenđe tani dindi čast te ova e Jehovase gostija. Amen šaj te aćhova gostija ko Jehovaso šatori samo ako nane amen mangipe premalo pare. Ako ađahar ćereja, o Jehova niked na ka aćhavi amen. (Čitin Jevrejima 13:5.)

O JEHOVA MANGELA PE AMALEN

19. Sose o Jehova mangela te ćera sa o buća kolendar vaćeri pe ko 15. psalam?

¹⁹ O 15. psalam završini e lafencar: „Ko ađahar ćerela, niked na ka perel“ (Ps. 15:5). Akate o psalmista phenela sose o Jehova mangela te ćera o buća kola pominena pe ko akava psalam. Ov mangela te ova bahtale. Ked ćereja odova so ov phenela amenđe, tegani isi amen pošukar životi hem ov ka zaštitini amen (Is. 48:17).

20. So e Jehovase gostija jedva ađićerena?

²⁰ O gostija ko Jehovaso šatori radujinena pe sebepi i budućnost koja ađićeri len. O pomazanikija ka živinen ko nebo kuri o Isus pripreminđa lenđe „than“ (Jov. 14:2). Okola so isi len nada so ka živinen ki phuv jedva ađićerena te ispuninen pe o obećanja ando Otkrivenje 21:3. Ćaće, sare but ceninaja so isi amen čast te ova e Jehovase amala, te ova gostija ko oleso šatori zauvek!