1. Σόσκε κα κερέν αμένγκε λατσσιπέ ο εδάφια Ψαλμός 15:1⁠-5;

 ΚΟ ΓΙΑΒΕΡ μάθημας, ντικχλάμ ότι οντουλά σο ντένα πουμαρό λάφι τι τζουβντιόν ι Ιεχωβάσκε ντα τθερένα λατσσί φιλία λέσαρ μπορίνενα τι αβέν μισαφίρια λέσκε «τσαντιρίστε». Αλλά σο πρέπει τι κεράς για τι αβάς λέσκε μισαφίρια; Ο Ψαλμός 15 κερέλα λάφι ανταλέσκε. (Διαβάνεν Ψαλμός 15:1-5) Ανταβά ψαλμός βακερέλα αμένγκε σο πρέπει τι κεράς για τι αβάς πο λατσσέ αμαλά ι Ντεβλέσαρ.

2. Σο μπέκιμ τι τσσιντιντάς ι Δαβιδίς τι κερέλ λάφι ι Ιεχωβάσκε τσαντιρίσκε;

² Ο Ψαλμός 15 αρχίνελα ακαλέ λαφίντζαρ: «Ιεχωβά, κον μπορίνελα τι αβέλ μισαφίρι τι τσαντιρίστε; Κον μπορίνελα τι μπεσέλ τι άγιε βεσέστε;» (Ψαλμ. 15:1) Κάνα κερντάς λάφι ι Ιεχωβάσκε «τσαντιρίσκε», ο ψαλμωδός Δαβίδ μάλλον τθερέλας πι γκοντιάτε ι σκηνή της μαρτυρίας, σο ισινέ για κάποιος βακίτι κι Γαβαών. Επίσης, κάνα ο Δαβίδ κερντάς λάφι ι Ντεβλέσκε “άγιε βεσέσκε”, μπορεί τι σκεφτίνελας ι σκηνή σο ισινέ κο βες Σιών, κι Ιερουσαλήμ. Οντουλέ τθανέστε, σο ισινέ ντουρ κατά Γαβαών, ο Δαβίδ κερντάς εκ τσαντίρι για τι τσσουβέλ ι κιβωτός της διαθήκης μέχρι τι λατσσάρντιβελ ο ναός.—2 Σαμ. 6:17.

3. Σόσκε ισί λατσσό τι αγαβάς ο Ψαλμός 15; (Ντικχέν ι φωτογραφία-ντα)

³ Ισί μπαγιά ότι, ο πο μπουτ Ισραηλίτες ποτές να υπηρετιντέ κι σκηνή της μαρτυρίας. Επίσης, μπουτ χάνικ Ισραηλίτες τσσουντέ-πες οτθέ σο ισινέ η κιβωτός της διαθήκης. Όμως σαρέ ο πιστοί υπηρέτες ι Ιεχωβάσκε μπορίνενας τι αβέν μισαφίρια λέσκε τσαντιρίστε άμα κα αβένας ντα κα ατσσόνας λέσκε αμαλά. Σαρέ μανγκάσα-λες ανταβά. Ο Ψαλμός 15 σικαβέλα αμένγκε σο πρέπει τι κεράς για τι ατσσάς αμαλά ι Ιεχωβάσκε.

ΤΙ ΠΦΙΡΕΝ ΣΩΣΤΑ ΝΤΑ ΤΙ ΑΒΕΝ ΔΙΚΑΙΟΙ

4. Σαρ τζανάσα ότι ο Ιεχωβά να μανγκέλα αμένταρ σάντε τι μπολντιάς; (Ησαΐας 48:1)

⁴ Κο εδάφιος Ψαλμός 15:2 βακερέλα ότι αμάλ ι Ντεβλέσκο ισί  «οντουβά σο πφιρέλα σωστά ντα ισί δίκαιος». Ανταβά ισί κάτι σο πρέπει τι κεράς-λες συνέχεια. Αλλά αβέλα-πες τι “πφιράς σωστά”; Βα. Ισί μπαγιά ότι καέκ τζενό νανέ τέλειος. Όμως, κι Ιεχωβάσκε γιακχά “πφιράσα σωστά” άμα κεράσα ο πο λατσσό σο μπορίνασα για τι ντας-λες καν. Κάνα ντάσα αμαρό λάφι τι τζουβντιάς ι Ιεχωβάσκε ντα σοράν μπολντιάσα, κεράσα σάντε ο πρώτος βήμας για τι τθεράς φιλία ι Ιεχωβάσαρ. Για παράδειγμας, κο πουρανέ μπρεσά, να αβέλας-πες κάποιος μισαφίρι ι Ιεχωβάσκο σάντε επειδή ισινέ κο λαός Ισραήλ. Μερικά τζενέ δοξάνενας-λες αλλά όχι «με αλήθεια ούτε με δικαιοσύνη». (Διαβάνεν Ησαΐας 48:1) Ο Ισραηλίτες σο μανγκένας μπαγιά τι αβέν μισαφίρια ι Ιεχωβάσκε έπρεπε τι σικλιόν σο μανγκέλας βοβ ντα τι κερέν-λες. Αντικάς-ντα, για τι κεράς ι Ιεχωβάσκο γκι αντιβές να ερεσέλα τι μπολντιάς ντα τι βακέρντιβας Μάρτυρες ι Ιεχωβάσκε. Πρέπει τι κεράς συνέχεια ο σωστός. Σαρ μπορίνασα τι κεράς-λες ανταβά;

5. Σο μανγκέλα τι βακερέλ τι ντας καν κο Ιεχωβά σαρέ κο πράγματα;

⁵ Κο γιακχά κι Ιεχωβάσκε, για “τι πφιρέλ σωστά” εκ τζενό ντα “τι αβέλ δίκαιος”, να ερεσέλα σάντε τι τζαλ κο συναθροίσεις. (1 Σαμ. 15:22) Πρέπει τι μαράς-αμέν για τι ντας-καν κο Ιεχωβά σαρέ κο πράγματα σο κεράσα, ατζέ-ντα κάνα ισινάμ κορκορέ. (Παρ. 3:6· Εκκλ. 12:13, 14) Ισί σημαντικός τι προσπαθίνας τι ντας καν κο Ιεχωβά ατζέ-ντα κο πράγματα σο ντικχίντιβενα ότι νανέ αζόμ σοβαρά. Ανταβά σικαβέλα ότι μανγκάσα-λες μπαγιά, ντα αντικάς βοβ-ντα κα μανγκέλ-αμέν πο μπουτ.—Ιωάν. 14:23· 1 Ιωάν. 5:3.

6. Σαρέ κερντάμ λατσσέ πράγματα αμαρέ ζωγιάτε. Αλλά σαρ βακερένα ο εδάφια Εβραίους 6:10-12, σο ισί πο σημαντικός ανταλέσταρ;

⁶ Ο Ιεχωβά εκτιμίνελα μπουτ οντουλά σο κερντάμ λέσκε αμαρέ ζωγιάτε. Όμως, επειδή ατσσιλάμας πιστοί ανγκλέ, ανταβά να μανγκέλα πάντα τι βακερέλ ότι κα συνεχίνας τι αβάς μισαφίρια λέσκε τσαντιρίστε. Ανταβά  αγαβάσα-λες κατά εδάφια Εβραίους 6:10-12. (Διαβάνεν) Ο Ιεχωβά να μπιστρέλα ο λατσσέ πράγματα σο κερντάμ αμαρέ ζωγιάτε. Μανγκέλα όμως τι συνεχίνας τι υπηρετίνας-λες σαρέ αμαρέ γκίσαρ «μέχρι κο τέλος». «Άμα να κα παρατίνας-λεν», βοβ κα αβέλ αμαρό αμάλ για πάντα.—Γαλ. 6:9.

ΤΙ ΒΑΚΕΡΕΝ Ι ΑΛΗΘΕΙΑ ΑΝΤΡΕ ΤΟΥΜΑΡΕ ΓΚΙΣΤΕ

7. Σο μανγκέλα τι βακερέλ τι βακεράς ι αλήθεια αντρέ αμαρέ γκίστε;

⁷ Κον μανγκέλα τι αβέλ μισαφίρι κο τσαντίρι κι Ιεχωβάσκο πρέπει τι “βακερέλ ι αλήθεια αντρέ πι γκίστε”. (Ψαλμ. 15:2) Για τι κεράς-λες ανταβά, να ερεσέλα σάντε μα τι βακεράς ψέματα. Ο Ιεχωβά μανγκέλα τι αβάς τίμιοι σαρέ κο πράγματα σο βακεράσα ντα κεράσα. (Εβρ. 13:18) Ανταβά ισί σημαντικός, «επειδή ο Ιεχωβά τζουνγκάλα κατά τζενό σο ισί μοβόρι, αλλά ισί λατσσό αμάλ οντουλέντζαρ σο ισί δίκαιοι».—Παρ. 3:32.

8. Σο δεν πρέπει τι κεράς;

⁸ Οντουλά σο “βακερένα ι αλήθεια αντρέ πουμαρέ γκίστε” να ντένα καν κο Ιεχωβά σάντε κάνα ντικχένα-λεν ο γιαβερά τζενέ, ενώ κερένα μπέτι πράγματα κάνα ισί κορκορέ. (Ησ. 29:13) Να μοιάζενα τζενέντζαρ σο ισί μοβόρια. Ο τζενό σο ισί μοβόρι μπορεί τι αρχίνελ τι σκεφτίνελ ότι μερικοί νόμοι ι Ιεχωβάσκε νανέ γκοντιαβέρ. (Ιακ. 1:5-8) Κο πράγματα σο ντικχίντιβενα λέσκε ότι νανέ σημαντικά, μπέκιμ μα τι ντελ καν κο Ιεχωβά. Σοράν, άμα ντικχίντιβελα ότι να αβέλα-πες κάτι μπέτι κάνα να ντέλα καν, μπορεί τι αρχίνελ τι κερέλ πο γκεραλέ πράγματα. Άμα κα ερεσέλ κο σημείος ανταβά, μπορεί τι αμντίνελ ότι υπηρετίνελα ι Ντεβλές, αλλά ο Ιεχωβά να κα δεχτίνελ λέσκι λατρεία. (Εκκλ. 8:11) Αμέν, όμως, μανγκάσα τι αβάς τίμιοι σαρέ κο πράγματα.

9. Σο αβιλό-πες ι πρώτη φαρ σο ντικχλάς ο Ιησούς ι Ναθαναηλίς, ντα σο σικλιαρέλα-αμέν ανταβά; (Ντικχέν ι φωτογραφία-ντα)

⁹ Ισί μπουτ σημαντικός τι βακεράς ι αλήθεια αντρέ αμαρέ γκίστε. Ντικχάσα-λες ανταβά οντουλέσταρ σο αβιλό-πες κάνα ο Φίλιππος βακερντάς πι αμαλέσκε, κο Ναθαναήλ τι γνωρίνελ ι Ιησούς. Παρόλο σο ο Ιησούς ντικχέλας πρώτη φαρ ι Ναθαναηλίς, βακερντάς: «Άκ’  εκ σωστός Ισραηλίτης, σο ναστί χουχαβέλα». (Ιωάν. 1:47) Σίγουρα ο Ιησούς τζανέλας ότι ο γιαβερά-ντα μαθητές βακερένας ι αλήθεια αντρέ πουμαρέ γκίστε. Όμως, ντικχλάς ότι ο Ναθαναήλ κερέλας-λες ανταβά ατζέ πο μπουτ. Ο Ναθαναήλ ισινέ ατελής σαρ ισινάμ αμέν-ντα. Αλλά να σικαβέλας κάτι γιαβέρ οντουλέσταρ σο ισινέ μπαγιά, ντα βακερέλας ι αλήθεια. Ανταβά κερντάς εντύπωση κο Ιησούς, ντα οντουλέσκε ισαρντάς-λες. Σο σουκάρ κα αβέλας τι βακερέλ-λες ο Ιησούς ανταβά αμένγκε-ντα!

10. Σόσκε δεν πρέπει τι χρησιμοποιήνας αμαρί τσσιπ μπέτι τροπόσαρ; (Ιακώβου 1:26)

¹⁰ Ο πο μπουτ πράγματα σο βακέρντιβενα κο Ψαλμός 15 ντένα-αμέν τι αγαβάς σαρ τι συμπεριφερίντιβας κο γιαβερά. Ο εδάφιος Ψαλμός 15:3 βακερέλα ότι ο μισαφίρι κο τσαντίρι κι Ιεχωβάσκο «να βακερέλα ψέματα πι μόσαρ γιαβερέ τζενέσκε, να κερέλα κακός κο γιαβερά, ντα πι αμαλένγκο λατσσό ναβ να χαλαβέλα-λες». Άμα χρησιμοποιήνασα αμαρί τσσιπ ασακέ μπέτι τροπόσαρ μπορεί τι κεράς μπαρό ζιάνι κο γιαβερά ντα τι τσσιναβάς τι αβάς κο τσαντίρι κι Ιεχωβάσκο.—Διαβάνεν Ιακώβου 1:26.

11. Σο πρέπει τι αβέλ-πες οντουλέντζαρ σο χαλαβένα ι γιαβερένγκο ναβ χωρίς τι μετανιώνεν;

¹¹ Ο ψαλμωδός κερέλα λάφι οντουλένγκε σο βακερένα ψέματα ι γιαβερένγκε για τι χαλαβέν λένγκο ναβ. Κάνα εκ τζενό βακερέλα ψέματα ι γιαβερένγκε για τι χαλαβέλ λένγκο ναβ ντα να μετανιώνελα, χάλα αποκοπή.—Ιερ. 17:10.

12, 13. Κάνα κα μπορίναας, χωρίς τι μανγκάς-λες, τι χαλαβάς αμαρέ αμαλένγκο ναβ; (Ντικχέν ι φωτογραφία-ντα)

¹² Ο Ψαλμός 15:3 ανέλα αμαρέ γκοντιάτε ότι ο μισαφίρια ι Ιεχωβάσκε να κερένα γκεραλιπέ κο γιαβερά. Επίσης, να χαλαβένα ο λατσσό ναβ πουμαρέ αμαλένγκο. Σαρ κα μπορίνελας κάποιος τι κερέλ-λες ανταβά;

¹³ Μπορεί τι χαλαβάς εκχέ τζενέσκο ναβ, χωρίς τι μανγκάς-λες, άμα κα βακεράς μπέτι  πράγματα λέσκε. Σκεφτίνεν ακαλά παραδείγματα: (1) εκ πφεν σταματίνελα ο σκαπανικός, (2) εκ αντρόγυνος νασέλα κατά Μπέθελ ή (3) εκ πφραλ σο ισινέ πρεσβύτερος ή διακονικός υπηρέτης χασαρντάς ανταβά προνόμιος. Νανέ σουκάρ τι βακεράς ότι ανταβά αβιλό-πες επειδή ο πφραλ ή η πφεν κερντέ κάτι λάθος. Μπέκιμ υπαρχίντιβενα μπουτ λόγοι σο αβιλί ανταγιά αλλαγή αλλά αμέν να τζανάσα-λεν. Επίσης, οντουβά σο ισί μισαφίρι κο τσαντίρι κι Ιεχωβάσκο «να κερέλα κακός κο γιαβερά, ντα πι αμαλένγκο λατσσό ναβ να χαλαβέλα-λες».

ΣΕΒΑΝΕΝ ΟΝΤΟΥΛΕΝ ΣΟ ΝΤΑΡΕΝΑ ΚΑΤΑ ΙΕΧΩΒΑ

14. Εξηγίνεν σαρ ο μισαφίρια ι Ιεχωβάσκε κερένα πέρα «ι γκεραλέ τζενές».

¹⁴ Ο εδάφιος Ψαλμός 15:4 βακερέλα ότι ο αμάλ ι Ιεχωβάσκο «κερέλα πέρα ι γκεραλέ τζενές». Σαρ μπορίνασα τι κεράς-λες ανταβά; Ναστί βακεράσα ότι εκ τζενό ισί γκεραλό σάντε επειδή αμέν αμντίνασα-λες ανταβά ή επειδή να μπεϊντίνασα-λες. Σόσκε; Επειδή ισινάμ ατελείς μπορεί τι μπεϊντίνας μερικέ τζενέν σόσκε ταρτίνελα-αμέν λένγκο χαρακτήρας. Γιαβερέν όμως μπορεί μα τι μπεϊντίνας-λεν σόσκε χολιασκιαρένα-αμέν. Οτθάρ, πρέπει τι κεράς πέρα σάντε οντουλέν σο ισί «γκεραλέ» κι Ιεχωβάσκε γιακχά. (1 Κορ. 5:11) Αντρέ ανταλέ τζενέντε ισί οντουλά σο κερένα ο γκεραλιπέ χωρίς τι μετανιώνεν, να σεβάνενα οντουλά σο πακιάσα ή προσπαθίνενα τι χαλαβέν αμαρί φιλία ι Ιεχωβάσαρ.—Παρ. 13:20.

15. Καβά ισί εκ τρόπος για τι σεβάνας «οντουλέν σο νταρένα κατά Ιεχωβά»;

¹⁵ Οκιά μπάνταρ, ο εδάφιος Ψαλμός 15:4 βακερέλα αμένγκε τι σεβάνας «οντουλέν σο νταρένα κατά Ιεχωβά». Οτθάρ, ρόντασα τρόπους για τι σικαβάς λατσσιπέ ντα σεβασμός κο αμαλά κι Ιεχωβάσκε. (Ρωμ. 12:10) Σαρ; Εκ τρόπος ισί, σαρ βακερέλα ο εδάφιος Ψαλμός 15:4, “μα τι λας παλάλ αμαρό λάφι ατζέ-ντα άμα οντουβά σο βακερντάμ νανέ λατσσό αμένγκε”. Άμα να ατσσικιαράσα αμαρό λάφι, κα μπορίναας τι κεράς ζιάνι κο γιαβερά. (Ματθ. 5:37) Για παράδειγμας, ο Ιεχωβά μπεσέλα πι αμαλένταρ τι ατσσικιαρέν ο λάφι σο ντινέ ο εκ κο γιαβέρ κάνα παντρισάλε. Επίσης, κάνα ο νταντά ντα ο νταγιά ντένα πουμαρό λάφι πουμαρέ τσσαβέντε εκχέ πραγμάσκε, ο Ιεχωβά χαιρίνελα κάνα προσπαθίνενα τι ατσσικιαρέν-λες. Επειδή μανγκάσα ι Ντεβλές ντα ι γιαβερέν, κα κεράς ο πο λατσσό για τι ατσσικιαράς αμαρό λάφι.

16. Καβά ισί εκ γιαβέρ τρόπος τι σεβάνας ι Ιεχωβάσκε αμαλέν;

¹⁶ Εκ γιαβέρ τρόπος τι σεβάνας ι Ντεβλέσκε αμαλέν ισί τι πουτράς αμαρό κχερ λένγκε ντα τι αβάς πουταρντέ βαστένγκε. (Ρωμ. 12:13) Κάνα νακχάσα χρόνος αμαρέ πφραλέντζαρ ντα πφενίντζαρ, εκτός κατά συνάθροιση ντα κατά έργος, αβάσα πο πασέ εμ λέντζαρ εμ ι Ιεχωβάσαρ. Επίσης κάνα πουτράσα αμαρό κχερ ι γιαβερένγκε μοιάζασα κο Ιεχωβά.

ΜΑ ΜΑΝΓΚΕΝ ΜΠΟΥΤ Ο ΛΟΒΕ

17. Σόσκε ο Ψαλμός 15 κερέλα λάφι ι λοβένγκε;

¹⁷ Διαβάνασα ότι ο μισαφίρι ι Ιεχωβάσκο «να ντέλα δανεικά για τι νικαβέλ κιάρι ούτε δεχτίνελα τι ποκίντιβελ για τι κρίνελ άδικα εκχέ τζενές σο ισί αθώος». (Ψαλμ. 15:5) Σόσκε ανταβά χουρντό ψαλμός κερέλα λάφι ι λοβένγκε; Επειδή άμα μανγκάσα μπουτ ο λοβέ, μπορεί τι ντικχάς-λεν πο σημαντικά κατά τζενέ, ατζέ-ντα κατά Ντεβέλ. (1 Τιμ. 6:10) Κο πουρανέ μπρεσά, μερικά τζενέ κάνα ντένας δανεικά πουμαρέ τσορορέ πφραλέντε προσπαθίνενας τι νικαβέν κιάρι. Επίσης, μερικά τζενέ δεχτίνενας τι ποκίντιβεν για τι κρίνεν άδικα τζενέν σο ισινέ αθώοι. Ο Ιεχωβά τζουνγκάλα ασακέ πραγματένταρ.—Ιεζ. 22:12.

18. Καλά ερωτήσεις κα βοηθίνεν-αμέν τι αγαβάς σαρ ντικχάσα ο λοβέ; (Εβραίους 13:5)

 ¹⁸ Ισί λατσσό τι σκεφτίνελ ο κάθε εκ αμένταρ σαρ ντικχέλα ο λοβέ. Πουτσέν-τουμέν: “Μήπως σκεφτίναβα μπουτ φαρ ο λοβέ ντα ο πράγματα σο μπορίναβα τι κινάβ λέντζαρ; Άμα λιντόμ δανεικά, μήπως αργίναβα τι νταβ-λεν παλάλ επειδή σκεφτίναβα ότι ο τζενό σο ντινάς-λεν μάντε να χρειαζίντιβελα-λεν; Άμα τθεράβα λοβέ, μήπως αμντίναβα-μαν πο σημαντικός κατά γιαβερά; Ισί μάνγκε δύσκολος τι αβάβ πουταρντέ βαστένγκο; Μήπως αμντίναβα ότι μερικά πφραλά ντα πφενιά μανγκένα ο λοβέ πο μπουτ κατά Ιεχωβά επειδή απλώς τθερένα μπερεκέτι λοβέ; Μήπως μανγκάβα τι αβέν μο αμαλά σάντε οντουλά σο ισί χουλανέ ντα όχι οντουλά σο ισί τσορορέ;” Ισί σημαντικός τι σκεφτίνας ανταλά ερωτήσεις επειδή τθεράσα ο σουκάρ προνόμιος τι αβάς μισαφίρια κι Ιεχωβάσκο τσαντίρι. Αλλά για τι ατσσάς λέσκε μισαφίρια πρέπει τι αβάς σίγουροι ότι να μανγκάσα μπουτ ο λοβέ. Αζομάν ο Ιεχωβά να κα μουκχέλ-αμέν ποτές!—Διαβάνεν Εβραίους 13:5.

Ο ΙΕΧΩΒΑ ΜΑΝΓΚΕΛΑ ΠΙ ΑΜΑΛΕΝ

19. Σόσκε ο Ιεχωβά μανγκέλα αμένταρ τι κεράς σαρέ οντουλά σο ισί κο Ψαλμός 15;

¹⁹ Ο Ψαλμός 15 τελειώνελα ακαλέ σουκάρ λαφίντζαρ: «Κον κερέλα ανταλά πράγματα να κα περέλ ποτές». (Ψαλμ. 15:5) Ακατέ ο ψαλμωδός βακερέλα σόσκε μανγκέλα ο Ιεχωβά τι κεράς-λεν σαρέ ανταλά. Ο Ιεχωβά μανγκέλα τι αβάς ευτυχισμέ. Κάνα κεράσα οντουλά σο μανγκέλα αμένταρ ο Ιεχωβά, κα τθεράς εκ πο λατσσί ζωή ντα κα αρακχαβέλ-αμέν.—Ησ. 48:17.

20. Σο μπεσένα τι αβέλ-πες ο μισαφίρια ι Ιεχωβάσκε;

²⁰ Ο μισαφίρια ι Ιεχωβάσκε μπορίνενα τι τθερέν ανγκλά-πουμέντε εκ μπουτ σουκάρ μέλλον. Ο πιστοί χρισμέ κα τζουβντιόν κο «μπουτ τθανά» σο ετοιμαντάς λένγκε ο Ιησούς κο ουρανός. (Ιωάν. 14:2) Οντουλά σο τθερένα ι ελπίδα τι τζουβντιόν κι πφουβ μπεσένα σαρ σαρ τι αβέλ-πες οντουβά σο βακερέλα κο εδάφιος Αποκάλυψη 21:3. Ισί μπαρό προνόμιος αμένγκε τι καλίνελ-αμέν ο Ιεχωβά τι αβάς μισαφίρια λέσκε τσαντιρίστε για πάντα!