1. Sar daștil te ajutil amen o Psalmo 15:1-5?

 ANDO articolo cai nachlea, sichileam că codola cai dine penghi viața le Iehovasche hai bariarde iech amalimos zuralo lesa daștin te beșen ande leschi țărha. Tha sar daisaras te avas amala le Iehovasa? O Psalmo 15 del duma anda cadai buchi. (Citisar Psalmo 15:1-5.) Cado Psalmo del amen șucar sicaimata cai ajutin amen te pașioas le Devlestar.

2. So daștil-pe că sas andi goghi le Davidoschi cana dea duma anda i țărha le Iehovaschi?

² O Psalmo 15 astarel duie pușimatanța: „O, Iehova, con daștil te avel achardo ande chi țărha? Con daștil te beșel pe chio plain sfânto?”. Cana dea duma anda i „țărha” le Iehovaschi, daștil-pe că o psalmisto David gândisardea-pe ca o tabernacolo cai sas ando Gabaon ande codol ghiesa. Sa cadea, cana phendea le dumes o „plain sfânto” le Devlesco, daștil-pe că ande leschi goghi sas o plain Sion anda Ierusalimo. Code, ca chichiva kilometri catar o Gabaon, o David vazdea iech țărha ande savi șiutea i arca le legământoschi, ji cana avelas vazdino iech than mai lașio anda late – o templo. (2 Sam. 6:17)

3. Sostar si importanto te sichioas mai but buchia anda o Psalmo 15? (Dich vi i imaginea.)

³ Si ciaces, le mai but mașcar le israeliți ci slujisarde niciechdata co tabernacolo, hai numai chichiva mașcar lende daisarde te jian andre andi țărha cai sas încărdi i arca le legământoschi. Tha, sea le manușa loialo le Iehovasche daisarde te aven ande leschi țărha simbolico dacă arăsănas hai așenas lesche amala. Savore mașcar amende camas cadai buchi. Ando Psalmo 15, sam sicade so trebul te cheras caște pașioas le Iehovastar hai te așias lesche amala.

 PHIR BI DOȘACO HAI CHER SO SI MIȘTO

4. Catar jianas că o bolimos na-i i corcori buchi cai manghel-la o Iehova amendar caște avas lesche amala? (Isaia 48:1)

⁴ Ando Psalmo 15:2, phenel-pe că iech amal le Devlesco si codo cai „phirel bi doșaco” hai „cherel so si mișto”. Le dumes „phirel” hai „cherel” sicaven dui buchia cai trebul te cherel-len iech manuș sea o timpo. Tha daisaras ciaces ‘te phiras bi doșaco’? Da. Chiar cana niciech manuș nai-lo perfecto, o Iehova dichel că ‘phiras bi doșaco’ cana das sea amari zor te așunas lestar. Cana deam amari viața le Iehovasche hai boldeam amen, astardeam te phiras po drom le Devlesco. Vi andel ghiesa biblico, iech manuș ci arăsălas pe thaneste o amal le Iehovasco numai anda codoia că cherelas partea andai națiunea Israel. Chichiva mașcar lende acharenas le Devles, tha na „ando ciacimos hai ortomos”. (Citisar Isaia 48:1.) Le israeliți le ilesa lașio, cai camenas te aven amala le Iehovasa, trebuisarde te sichion le buchia cai manghelas-len o Iehova lendar hai te train pala lende. Sa cadea vi aghies, caște avel amen iech amalimos chidino le Devlesa, ci arăsăl numai te bolas amen hai te cheras partea andai congregația creștino. Trebul ‘te cheras so si mișto’ sea o timpo. Sar?

5. Sar sicavas că așunas le Iehovastar ande sea le buchia?

⁵ Andel iacha le Iehovasche, ‘te phiras bi doșaco’ hai ‘te cheras so si mișto’ si mai but sar te jias ca fiesavi întrunirea catar i sala le Regatoschi. (1 Sam. 15:22) Trebul te așunas le Iehovastar ande orisavi buchi cai cheras-la ande amari viața, vi cana sam corcore hai ci dichel amen chonic. (Prov. 3:6; Ecl. 12:13, 14) Cadea că, si importanto te cheras so phenel amenghe o Iehova vi andel țâne buchia. Cana cheras so si mișto, sicavas că iubisaras anda sea o ilo le Iehovas hai cadea cheras vi les te iubil amen. (Ioan 14:23; 1 Ioan 5:3)

6. Cadea sar phenel-pe ando Evrei 6:10-12, so si mai importanto sar le lașe buchia cai cărdeam-len mai anglal?

 ⁶ O Iehova dichel cuci sea so cărdeam anda leste ji acana. Cu sea cadala, caște așias mai dur andi țărha le Iehovaschi, ci arăsăn numai le buchia lașe cai cărdeam-len mai anglal. Cadaia sicavel-pe ando Evrei 6:10-12. (Citisar.) O Iehova ci bâstrel le lașe buchia cai cărdeam-len mai anglal, tha vo camel ca vi mai dur te das sea so si amen mai lașio ande leschi buchi „ji co sfârșito”. O mai baro pochinimos cai va dela-les amenghe si lesco amalimos cai încărel anda sea o timpo, „dacă ci va avela te peras chinimastar”. (Gal. 6:9)

PHEN O CIACIMOS ANDE CHIO ILO

7. So si te phenes o ciacimos ande chio ilo?

⁷ Con camel te avel andi țărha le Iehovaschi trebul te „phenel o ciacimos ande pesco ilo”. (Ps. 15:2) Cadaia si mai but sar te na hohavas. O Iehova camel te phiravas amen pachivales ande sea so cheras hai sea so phenas. (Evr. 13:18) Si mișto te cheras cadea anda codoia că „o Iehova ci mai daștil te dichel andel iacha codoles cai athavel averen, tha codo orta bucuril-pe catar iech amalimos chidino lesa”. (Prov. 3:32)

8. So phiraimos ci trebul te avel amen?

⁸ Codola cai ‘phenen o ciacimos ande pengo ilo’ ci așunen le Devlestar numai cana sile dichle le coavere manușendar hai, pala codoia, garades, cheren buchia nasul. (Is. 29:13) Von ci phiraven-pe cioricanes. Iech manuș cioricano daștil te astarel te gândil-pe că o goghiaverimos andal legi le Iehovasche na-i sea o timpo o mai lașio. (Iac. 1:5-8) Vo daștilas te alosarel te na mai așunel le Iehovastar andel buchia mai țâne. Hai, dacă fal-pe că pe thaneste ci țârdel buchia nasul anda codoia că ci așundea le Devlestar, vo daștilas te uștiarel mai dur lesche legi. Cadea, vo arăsăl te anel iech închinarea hohamni le Iehovasche. (Ecl. 8:11) Tha amen camas te avas pachivale ande sea le buchia.

9. So întâmplosardea-pe cana dichlea i iechto data o Isus le Natanaelos hai so daisaras te sichioas anda cadaia? (Dich vi i imaginea.)

⁹ Si zurales importanto te avel amen iech ilo ujo angla o Del. Cadaia dichiol-pe anda so  întâmplosardea-pe cana o Filip andea pesche amales, o Natanael, te prinjianel le Isusos. Chiar cana ci dichlea-les niciechdata, o Isus phendea anda o Natanael: „Ita ciaces iech israelito ande savo ci arachel-pe athaimos!”. (Ioan 1:47) Chiar cana o Isus jianelas că le coaver discipoli sile pachivale hai sinceri, ando Natanael dichlea iech sinceritatea mai bari. Si ciaces, o Natanael sas-lo imperfecto, cadea sar amen. Tha ande leste ci arachelas-pe niciech țâra athaimos sau hohaimos. O Isus dichlea cuci cadai buchi co Natanael hai așardea-les anda late. So bari pachiv avelas ca o Isus te phenel sa codoi buchi vi anda amende!

10. Sostar trebul te las sama sar das duma? (Iacov 1:26)

¹⁰ Ando Psalmo 15 del-pe duma mai but anda sar manghel amendar o Iehova te phiravas amen averența. O Psalmo 15:3, phenel că con camel te beșel andi țărha le Iehovaschi „ci phenel pesca șibasa hohaimata anda aver, ci cherel niciech nasulimos pesche pașardesche hai ci cherel lajiavestar pesche amalen”. Dacă ci las sama pe amaro mui sar das duma, daisaras te cheras but nasulimos averenghe hai chiar te hasaras amaro amalimos le Iehovasa. (Citisar Iacov 1:26.)

11. So cherel-pe varecasa cai rimosarel o anav lașio averengo hai ci fal-les nasul?

¹¹ O manuș cai scriisardea o Psalmo 15 del duma directo anda codola cai rimosaren o lașio anav varecasco prin le hohaimata cai phenen-len. Codola cai cheren cadai buchi jiungali hai ci fal-len nasul anda so cărde ci mai daștin te așen andi congregația. (Ier. 17:10)

12, 13. Ande so situații daisaras te arăsas te cheras lajiavestar amare amalen bi te camas? (Dich vi i imaginea.)

¹² O Psalmo 15:3 anel amenghe andi goghi că codola cai sile andi țărha le Iehovaschi ‘ci cheren niciech nasulimos penghe pașardenghe hai ci cheren lajiavestar penghe amalen’. Tha sar daisaras te arăsas te cheras lajiavestar amare amalen?

 ¹³ Daisaras te cheras cadaia bi te camas, cana phenas buchia nasul anda lende. Te dichas le situații cai aven: 1) iech phei așavel o servicio cu timp integral, 2) iech cuplo căsătorime ci mai slujil co Betelo hai 3) iech phral ci mai silo phuro sau slujitoro auxiliaro. Ci avelas șucar te pachias că von cărde vareso nasul hai chiar te das duma anda cadai buchi averența andai congregația. Daștin te aven but motivea sostar lenghi situația parudea-pe hai amen te na jianas cadal motivea. Mai but, te na bâstras că iech amal le Iehovasco cai beșel ande leschi țărha „ci cherel niciech nasulimos pesche pașardesche hai ci cherel lajiavestar pesche amalen”.

TE DAS PACHIV CODOLENGHE CAI DARAN LE IEHOVASTAR

14. Sar daisaras te jianas con si codola ‘cai meritin te aven dichle jiungales’?

¹⁴ O Psalmo 15:4 sicavel că iech amal le Iehovasco „duriarel pestar codoles cai meritil te avel dichlo jiungales”. Sar daisaras te las amen pala cado sfato? Sar manușa imperfecți, ci daisaras te phenas con meritil te avel dichlo jiungales. Sostar? Daștil-pe că si amenghe mai ușoro te pașioas le manușendar cai amean amența hai te na ciaion amen le coaver anda codoia că vareso anda lengo phiraimos holiarel amen. Cadea că, trebul te duriaras amendar numai codolen cas o Iehova dichel-len „jiungales”. (1 Cor. 5:11) Mașcar cadala si le jene save cheren o păcato hai ci fal-len nasul, ci sicaven pachiv caring amaro pachiamos sau camen te cheren amen te mechas amaro amalimos le Iehovasa. (Prov. 13:20)

15. Sar daisaras te sicavas pachiv „codolenghe cai daran le Iehovastar”?

¹⁵ Mai dur, o Psalmo 15:4 phenel că trebul ‘te das pachiv codolenghe cai daran le Iehovastar’. Cadea că, das amari zor te sicavas lașimos hai pachiv caring le amala le Iehovasche. (Rom. 12:10) Sar daisaras te cheras cadaia? O Psalmo 15:4 sicavel că con si andi țărha le Iehovaschi „ci uștiarel peschi duma, chiar cana si ande lesco hasarimos”. Dacă ci încăras amari duma, daisaras te duchavas averen. (Mat. 5:37) Sar exemplo, o Iehova ajucărel ca lesche amala te încăren o solaharimos la căsătoriaco. Sa cadea, vo si voime cana o dad hai i dei den penghi zor te încăren le promisiuni cărde penghe șiavenghe. I iubirea anda o Del hai anda amare pașarde zuriarel amen te cheras sea so daisaras caște încăras amari duma.

16. Sar mai daisaras te sicavas pachiv caring le amala le Iehovasche?

¹⁶ Mai daisaras te sicavas pachiv caring le amala le Devlesche cana acharas-len amende chăre hai das-len buhle vastesa anda sea so si amen. (Rom. 12:13) Cana beșas ande iech than amare phralența, zuriaras amaro amalimos lența hai le Iehovasa. Mai but, cana primisaras le phralen anda sea o ilo ande amare chăra, las amen pala o Iehova.

TE NA IUBISARAS LE LOVE

17. Sostar del-pe duma anda le love ando Psalmo 15?

¹⁷ O manuș cai beșel andi țărha le Iehovaschi „ci del love pe camnimaste hai ci daștil te avel chindo lovența caște cherel nasul codolesche cai na-i doșalo”. (Ps. 15:5) Tha sostar del-pe duma andal love ande iech psalmo cadea de țâno? Dacă iubisaras le love, daisaras te cheras nasul codolenghe de pașa amende hai te rimosaras amaro amalimos le Iehovasa. (1 Tim. 6:10) Andel ghiesa biblico, chichiva țârdenas i morci pa lenghe phrala ciore hai denas-len love pe camnimaste. Mai but, chichiva judecători mechenas-pe  chinde lovența hai banghiarenas i cris anda codola nedoșale. Cadal buchia sas-le zurales jiungale andel iacha le Iehovasche. (Ezec. 22:12)

18. So pușimata daștin te ajutin amen te das amari sama sar dichas le love? (Evrei 13:5)

¹⁸ Si mișto te gândisaras amen so si ande amaro ilo cana si i duma andal love. Te pușias amen: „Gândisarav man butivar ca le love hai ca so daștiv te chinav lența? Dacă manglem love, țârdav o timpo te na dav-len parpale hai gândiv man că le manușes cai dea-len manghe nai-les nevoia lendar? Si manghe pharo te avav vastuno? Pachiav că le phralen save silen barvalimata iubin le love? Cherav manghe amala numai mașcar codola cai sile barvale hai ci interesin man codola ciore?”. Te na bâstras că sas amenghe dini i bari pachiv te beșas andi țărha le Iehovaschi! Dacă ci camas te hasaras cadai pachiv, trebul te na peras ando athaimos te iubisaras le love. Dacă cheras cadea, o Iehova ci va mechela amen niciechdata. (Citisar Evrei 13:5.)

O IEHOVA IUBIL PESCHE AMALEN

19. Sostar camel o Iehova te cheras sea le buchia cai phenen-pe ando Psalmo 15?

¹⁹ O Psalmo 15 phandavel-pe prin le dumes: „Con cherel cadal buchia ci va perela niciechdata”. (Ps. 15:5) Anda cado verseto, hachiaras sostar camel o Iehova te încăras sea so manghel amendar vo. Vo camel te avas fericime. Cadea că, vo sicavel amen so te cheras caștel avel amen iech viața mai lași hai caște avas ferime le buchiandar nasul. (Is. 48:17)

20. So daștin te ajucăren ando viitorii le amala le Iehovasche?

²⁰ Le manușa le Iehovasche cai arachen-pe ande leschi țărha va bucurina-pe catar iech viitorii șucar. Codola machle va traina ando cerii, cai o Isus lașiardea lenghe „but thana cai te beșen”. (Ioan 14:2) Hai le creștinen saven silen i speranța te train pi phuv va dichena sar va pherela-pe i promisiunea andai Revelația 21:3. Savore pachias ciaces că si iech bari pachiv că o Iehova achardea amen anda sea o ilo te avas lesche amala hai te beșas ande leschi țărha anda sea o timpo!