1. Xana hi nga pfuneka hi yini loko hi kambisisa buku dzra Amapsalma 15:1-5?

 KA XIDONDZRO lexi khalutiki, hi dondzre leswaku lweyi a tinyiketelaka ka Yehovha a nga va munghanu wake ni ku tlhela a va muyeni a tendeni dzrake. Kambe, xana hi nga tama hi va vayeni a tendeni dzra Yehovha hi ndlela yini? Buku dzra Amapsalma 15 dzri vulavula hi mhaka leyi. (Dondzra Amapsalma 15:1-5.) Amapsalma lawa ma tlhamuxela leswi hi fanelaka ku swi yentxa akuva hi tama hi va kusuhi na Xikwembu Nkulukumba.

2. I yini leswi Davhida a a yanakanya ha swone loko a vulavula hi tende dzra Yehovha?

² Buku dzra Amapsalma 15 dzri sungula hi mazritu lama liki: ‘Yehovha, a muyeni waku a ta va mani a tendeni dzraku? A ta va mani xana, lweyi a taka yaka a nhaveni yaku ya ku xwenga?’ (Amaps. 15:1) Loko Davhida a vulavula hi ‘tende’ swi nga yentxeka a a yanakanya hi tabernakele, ledzri a dzri kumeka a Gibiyoni ku dzringana nkama wa kukazri. Davhida a tlhele a vulavula hi ‘nhava ya ku xwenga’ ya Xikwembu Nkulukumba. Swi nga yentxeka a a vulavula hi nhava ya Siyoni leyi a yi kumeka a Yerusalema. Ka nhava yoleyo, leyi a yi kumeka kulenyana a nyingitimu wa Gibiyoni, Davhida a a yake tende akuva a beka areka dzra xipfumelelanu ku ko ku yakiwa tempele lani a ku ta bekiwa kone a areka.—2 Sam. 6:17.

3. Ha yini swi li swa lisima ku twisisa leswi Amapsalma 15 yi swi hlayaka? (Tlhela u vona ni mufoto.)

³ Swi le livaleni leswaku a hi Vaisrayele hinkwavu lava a va ta tizra a tabernakeleni, nambi ku nhingena ndzreni ka dzrone va ya lani a ku ni areka dzra xipfumelelanu. Kambe malandzra hinkwawu ya ku dumbeka ya Yehovha a ma ta va vayeni a tendeni dzrake dzra ku fanekisela hi ku tama ma va vanghanu vake. Nakone  leswo, hi leswi mun’wana ni mun’wana wezru a swi navelaka. Amapsalma 15, yi vulavula hi matsrhamela lawa hi fanelaka ku ma txutxela akuva hi tama hi va vanghanu va Yehovha.

YENTXA LESWINENE NI LESWI LULAMIKI

4. Hi swi tivisa kuyini leswaku akuva hi yamukeleka ka Yehovha a swi yanelanga ku babatisiwa ntsena? (Ezaya 48:1)

⁴ Amapsalma 15:2 yi hlaya leswaku a munghanu wa Xikwembu Nkulukumba hi ‘lweyi a fambaka a swineneni, a yentxa leswi lulamiki.’ Xiga lexi liki ‘famba’ ni lexi liki ‘yentxa’, swi kombisa leswaku hi fanela ku tama hi yentxa xa kukazri. Kambe xana hakunene hi nga famba ndleleni leyinene? Ina. Leswi hi nga vhanu lava kalaka va nga hetisekanga, Yehovha a ta hi vona na hi famba a ndleleni leyinene loko hi yentxa hinkwaswu leswi hi nga swi kotaka akuva hi mu yingiseta. Loko hi tinyiketela ka Yehovha hi va hi babatisiwa, hi va na hi sungula ku famba na Xikwembu Nkulukumba. Kambe xiya leswaku, a minkameni ya Bibele kuva ntsena mhunu a li Muisrayele a hi swone leswi a swi mu yentxa a va muyeni wa Yehovha. Van’we a va hlaya leswaku va gandzrela Xikwembu Nkulukumba kambe a va nga mu gandzreli hi ‘xihlayelamfuzri ni wululami’. (Dondzra Ezaya 48:1.) Vaisrayele lava a va djula ku va vayeni va Yehovha a va fanela ku dondzra ni ku landzra milawu ya Yehovha. Hi lani ku fanaka, akuva hi yamukeleka ka Yehovha hi fanela ku yentxa leswi yengetelekiki ku tluka ku babatisiwa ni ku tiviwa swanga Timboni ta Yehovha ntsena. Hi fanela ku tama hi ‘yentxa leswi lulamiki’. Xana swi tlhamuxela yini leswo?

5. Swi tlhamuxela yini ku yingiseta Yehovha ka mintxhumu hinkwayu?

⁵ Ka Yehovha, ‘ku famba a ndleleni leyinene’ ni ‘ku yentxa leswi lulamiki’ a swi tlhamuxeli ntsena ku ya mintlhanganwini. (1 Sam. 15:22) Hi fanela ku tikazratela ku yingiseta Yehovha a wuton’wini byezru nambiloko hi li wuswezru. (Amapr. 3:6; Ekles. 12:13, 14) I swa lisima kuva hi tikazratela ku yingiseta Yehovha nambi ka mintxhumu ya yitsrongo. Loko hi yentxa leswo,  hi va na hi kombisa leswaku hakunene ha mu zrandzra Yehovha nakone yene a ta tama a hi zrandzra hi kola ka leswo.—Yoh. 14:23; 1 Yoh. 5:3.

6. Hi ku ya hi Vaheberu 6:10-12, i yini leswi nga swa lisima ku tlula mintxhumu leyinene leyi hi yi yentxiki khale?

⁶ Yehovha a swi nyika lisima hinkwaswu leswi hi mu yentxeliki swone khale. Kambe, kuva hi yentxe mintxhumu leyinene khale a swi hi tiyisekisi kumbe ku hi yentxa hi faneleka kuva vayeni a tendeni dzrake. A buku dzra Vaheberu 6:10-12 dzri swi beka livaleni leswo. (Dondzra.) I ntiyiso leswaku Yehovha a nga dzrivali mintxhumu leyinene leyi hi mu yentxeliki yone khale, kambe a djula leswaku hi tama hi mu gandzrela hi mbilu hinkwayu “ku ya tlhasa a wugamu”. Nakone hi ta tama hi va vanghanu vake “loko hi nga godoli”.—Gal. 6:9.

VULAVULA NTIYISO A MBILWINI YAKU

7. Swi tlhamuxela yini ku vulavula ntiyiso a mbilwini?

⁷ Mhunu lweyi a djulaka ku va muyeni lwa yamukelekaka a tendeni dzra Yehovha, a fanela ku vulavula ntiyiso a mbilwini yake. (Amaps. 15:2) Leswo a swi hlayi ntsena ku va hi nga hembi. Yehovha a djula leswaku hi dumbeka ku nga li ka leswi hi swi hlayaka ntsena kambe ni le ka leswi hi swi yentxaka. (Heb. 13:18) Leswo i swa lisima hikusa ‘a mhunu wa ku somboloka i likasi [nsila] ku Yehovha, lava lulamiki va ni wunakulobye byake’.—Amapr. 3:32.

8. He wani matsrhamela lawa hi kalaka hi nga fanelanga ku va na wone?

⁸ Lava vulavulaka ntiyiso a timbilwini tavu a va yingiseti Yehovha loko va le vhanwini ntsena va gama loko va li wuswavu va yentxa mintxhumu ya ku biha. (Eza. 29:13) A matsrhan’wini ya leswo, va yentxa hinkwaswu akuva va nga vi vakanganyisi. Mhunu lweyi a nga ni wukanganyisi a nga ha sungula ku yanakanya leswaku a hi minkama hinkwayu swi nga swa lisima ku yentxa ku zrandzra ka Yehovha. (Yak. 1:5-8) A nga ha sungula ku va a nga yi yingiseti milawu ya Yehovha ka mintxhumunyana ya yitsrongo leyi vonekaka ingiki a hi ya ntxhumu. Loko a vona leswaku a ku yentxeki ntxhumu nambiloko a tlule nawu a nga sungula ku yentxa mintxhumu yinyingi ya ku biha na a tibyela leswaku a ha tizrela Xikwembu Nkulukumba. Kambe Yehovha a nga byi yamukeli wugandzreli byolebyo. (Ekles. 8:11) Hi djula ku tama hi dumbeka ka mintxhumu hinkwayu.

9. Ku yentxeke yini loko Yesu a vone Nataniyele hi khambi dzra ku sungula nakone hi nga dondzra yini? (Tlhela u vona ni mufoto.)

 ⁹ I swa lisima ku va hi va vhanu lava vulavulaka ntiyiso a mbilwini. Hi nga swi vona leswo hi leswi yentxekiki loko Filipi a zrambe munghanu wake Nataniyele akuva a ta tiva Yesu. Yesu a te: “Vonani Muisrayele wa kakunene, lweyi a nga liki na wukanganyisi.” (Yoh. 1:47) I ntiyiso leswaku Yesu a a vona vadondzrisiwa vake swanga va kakunene, kambe Nataniyele a a li wa kakunene hi ndlela ya ku hlawuleka. Nambileswi Nataniyele a a nga hetisekanga ku fana na hine kambe a nge na wukanganyisi, a matsrhan’wini ya leswo, a a dumbeka ka mintxhumu hinkwayu. Leswo swi mu hlamalisile Yesu nakone a mu kulungelile hi kola swone. Swi nga nyonxisa ndjani ku yingela Yesu na a hlaya mazritu lama fanaka ha hine!

10. Ha yini hi fanela ku tivonela ka leswi hi swi hlayaka? (Yakobe 1:26)

¹⁰ Swidzringanyeto swinyingi leswi hi swi kumaka ka Amapsalma ndzrima 15, swa yelana ni ndlela leyi hi hanyisanaka ni vambeni ha yone. Amapsalma 15:3 yi hlaya leswaku lweyi a nga muyeni a tendeni dzra Yehovha ‘a lidzrimi lakwe a dzri hlayi ku lumbeta, a nga yentxeli mhunukulobye swa ku biha, a nga humeseli makwavu xisolo.’ Loko hi lumbeta vambeni, hi nga ha va vavisa nakone swi nga yentxeka hi nga ha vi vayeni a tendeni dzra Yehovha.—Dondzra Yakobe 1:26.

11. I yini ku lumbeta nakone ku nga ha yentxeka yini hi mulumbeti lwa kalaka a nga tisoli?

¹¹ Davhida a vulavule hi ku lumbeta hi ku kongoma. Kambe i yini ku lumbeta? Hi ntoloveto, ku lumbeta swi tlhamuxela ku hlaya madzrimi lawa ma nga ha honaka vito dzra mhunu wa kukazri. Mhunu lweyi a lumbetaka kumbe ku hlaya madzrimi, swi nga ha yentxeka a nga ha faneleki ku va mun’we wa Timboni ta Yehovha.—Yer. 17:10.

12-13. He swini swiyimu swin’wan leswi hi nga ha vaka ni nandzru wa ku honaka vito dzra mhunu mumbeni? (Tlhela u vona ni mufoto.)

¹² Amapsalma 15:3 yi tlhela yi hi dzrimuxa  leswaku lava nga vayeni a tendeni dzra Yehovha a va yentxeli vambeni swa ku biha kumbe ku va danisa. Leswo swi djula ku hlaya yini?

¹³ Hi nga ha sungula ku hona vito dzra mhunu na hi nga swi xiyanga hi ku va hi sungula ku hangalasa mintxhumu ya ku biha mayelanu ni mhunu yelweyo. Yanakanya hi swikombiso leswi landzrelaka: 1) makwezru wa xisati lweyi a yimiki ku va phayona dzra nkama hinkwawu, 2) vatekani lava yimiki ku tizra a Betele, 3) makwezru wa xinuna lweyi a yimiki ku tizra swanga nkulu wa bandla kumbe nandzra wa wutizreli. Swi nga va swi bihile ku tsrhamela ku hlaya leswaku kumbexana vamakwezru lava va yentxe ntxhumu wa ku biha lowu va yentxiki va yima ntizro wavu. Swi nga yentxeka ku ni swivangelo leswi twalaka leswi hi kalaka hi nga swi tivi leswi yentxiki va yima ntizro wavu. Kutani, lweyi a nga muyeni a tendeni dzra Yehovha a nga va yentxeli swa ku biha van’wana nakone a nga va honi vito vanghanu vake.

HLONIPHA LAVA TXHAVAKA YEHOVHA

14. Tlhamuxela leswaku lava nga vanghanu va Yehovha va nga ‘dzrela mubihi’ hi ndlela yini.

¹⁴ Amapsalma 15:4, yi hlaya leswaku a munghanu wa Yehovha a ‘dzrela mubihi’. Hi swi tivisa kuyini leswaku mhunu wa kukazri i mubihi? Leswi hi kalaka hi nga hetisekanga a hi fanelanga ku hlaya leswaku mhunu wa kukazri i mubihi kumbe im-him. Ha yini? I swa ntumbuluku kuva hi zrandzra mhunu wa kukazri hi leswi a hi nyonxisaka kambe hi nga va zrandzri vambeni hi leswi va kalaka va nga hi nyonxisi. Kambe ku hlaya ntiyiso, hi fanela ku nyenya ntsena lava yentxaka leswi Yehovha a liki swi “bihile”. (1 Kor. 5:11) Leswo swi patsra lava yentxaka mintxhumu ya ku biha va va va nga tisoli, lava kalaka va nga hloniphi leswi hi swi kholwaka kumbe lava zamaka ku helisa wunghanu byezru na Yehovha.—Amapr. 13:20.

15. Hi hlonipha ‘lava txhavaka Yehovha’ hi ndlela yini?

¹⁵ Hi tlhelo dzrin’wana, Amapsalma 15:4 yi hlaya leswaku hi fanela ku hlonipha ‘lava va txhavaka Yehovha’. Hi yentxa leswo hi ku va hi djuletela tindlela ta ku kombisa wunene ni xihlonipho ka vhanu va Yehovha. (Rom. 12:10) Hi ndlela yini? Yin’we ya tindlela, yi kumeka ka Amapsalma 15:4, leyi hlayaka leswaku a muyeni a tendeni dzra Yehovha ‘loko a hlambanyile a nge he na ku ndzruluka, nambi ku nga va ku honekeliwa ku yene’. Loko hi nga swi hetisisi leswi hi swi hlambanyiki hi nga ha khunguvanyisa van’wana. (Mat. 5:37) Hi xikombiso, Yehovha a yimela leswaku nuna na nsati va landzra xihlambanyu lexi va xi yentxiki hi siku ledzri va txhatiki ha dzrone. Yehovha a tlhela a nyonxa loko vapswele va hetisisa swidumbiso leswi va swi yentxelaka vanavu. Leswi hi zrandzraka Xikwembu Nkulukumba ni vhanu van’wana hi ta tikazratela ku hetisisa swidumbiso swezru.

16. He yini ndlela yin’wana leyi hi hloniphaka vanghanu va Yehovha a yone?

¹⁶ Ndlela yin’wana ya ku hlonipha vhanu va Xikwembu Nkulukumba i ku va komba malwandla ni wunene. (Rom. 12:13) Ku tinyika nkama wa ku va ni vamakwezru, ku nga li ntsena mintlhanganwini ni le nsin’wini, swi hi pfuna ku tiyisa wunghanu byezru na vone kun’we na Yehovha. Loko hi kombisa malwandla hi va na hi yetisela Yehovha.

U NGA ZRANDZRI MALI

17. Ha yini Amapsalma 15 yi tlhela yi vulavula hi mali?

¹⁷ Ka Amapsalma 15:5, hi dondzra leswaku a muyeni wa Yehovha ‘a nga voleki vhanu mali yake ha bindzru, a nga yamukeli nyiko akuva a yavanyisa lwe a ngeke na nandzru’. Ha yini Davhida a hlawule ku vulavula hi mali ka tindzrimana leti ta titsrongo ta Amapsalma? Hikusa loko hi kazrateka ngopfu hi mali, yi nga ha va ya lisima ngopfu kwezru ku tlula vhanu vambeni nambi ku tlula Yehovha. (1 Tim. 6:10) A minkameni  ya Bibele, vhanu van’wana a va xanisa vamakwavu lava a va li swisiwana, hi kuva va va voleka mali va gama va londzra leswaku va tlheliseliwa mali leyo na yi ni majuru manyingi lawa a swi va kazratela ku ma hakela. Handle ka leswo, a vayavanyisi van’wana a va pfumela ku xaviwa akuva va nga yavanyisi mhaka hi ndlela ya kone. Kambe Yehovha awa va nyenya lava yentxaka leswo.—Ezek. 22:12.

18. He swini swivutiso leswi hi fanelaka ku tihamba swone akuva hi vona leswaku he dzrini vonela dzrezru mayelanu ni mali? (Vaheberu 13:5)

¹⁸ Swi nga va swinene leswaku mun’wana ni mun’wana wezru a pfana a tikambela leswaku he dzrini vonela dzrake mayelanu ni mali. Tivutise leswi: ‘Xana ni tsrhamela ku yanakanya hi mali ni leswi a ni ta swi xava loko a ni ni mali ya yinyingi? Xana loko mhunu a ni voleki mali ni hlwela ku mu tlhelisela na ni yanakanya leswaku a nga yi vileli? Xana ni tivona na ni li wa lisima hi leswi ni nga ni mali ya yinyingi? Xana na tsronana? Loko makwezru a ni mali ya yinyingi, xana ni yanakanya leswaku a zrandzra ngopfu mali ku tlula Yehovha? Xana ni hamba wunghanu ni vhanu lava nga ni mali ya yinyingi ni dzrela lava nga swisiwana?’ I swa lisima ku tihamba swivutiso leswi hikusa hinkwezru hi yamukele xizrambu xa ku va vayeni va Yehovha. Kambe loko hi djula ku tama hi va vayeni va Yehovha hi fanela ku tivonela akuva hi nga zrandzri ngopfu mali. Loko hi zrandzra ngopfu Yehovha ku tlula mali a nge ti hi tsrhika!—Dondzra Vaheberu 13:5.

YEHOVHA A ZRANDZRA VANGHANU VAKE

19. Ha yini Yehovha a djula leswaku hi yentxa hinkwaswu leswi nga ka Amapsalma 15?

¹⁹ Amapsalma 15 yi gama hi xidumbiso lexi liki: ‘Lwa yentxaka leswi a nga tsrekatsrekisiwi ni siku ni dzrin’we.’ (Amaps. 15:5) Lani, Davhida a tlhamuxela leswaku ha yini Xikwembu Nkulukumba a djula leswaku hi yentxa hinkwaswu leswi tlhamuxeliwiki ka Amapsalma lawa. Yehovha a djula leswaku hi nyonxa. Xileswo, loko hi yentxa leswi Yehovha a hi byelaka swone awa hi tovokisa ni ku hi sizrelela.—Eza. 48:17.

20. He kwini ku lavisela ka wumundzruku loku vayeni va Yehovha va nga na kone?

²⁰ A vayeni va Yehovha va ni ku lavisela ka wumundzruku bya ku xonga. Vatotiwa hinkwavu va ku dumbeka va ta zrambiwa kuva va va ka “mimbangu yinyingi ya ku tsrhama ka yone” leyi Yesu a va lulamiseliki yone a matilweni. (Yoh. 14:2) Kambe lava nga ni dumbo dzra ku hanya lani misaveni va yimele ku vona ku hetiseka ka xidumbiso lexi nga ka Mpfuletelo 21:3. Nakunene, i tovoko dzrikulu ku va Yehovha a hi zrambile kuva hi va vayeni vake ni ku va vayeni a tendeni dzrake hi lani ku nga helikiki!