NSOLO WA PFUNDZIRO 24
NYIMBO 24 Bwerani pa Phiri ya Yahova
Khalani Mulendo wa Yahova Kwenda na Kwenda!
“Yahova, mbani anafuna khala mulendo panyumba panu?”—MAS. 15:1.
PINAFUNA IFE KUPFUNDZA
Tinabvesesa kuti tisafunika kucitanji toera tipitirize kukhala axamwali a Yahova, pontho tinaona kuti tisafunika kutsalakana tani axamwali anango a Yahova.
1. Bukhu ya Masalmo 15:1-5 inatiphedza tani?
MU NSOLO udamala, ife tapfundza kuti ule anaperekeka kuna Yahova anakwanisa kukhala xamwali wace, peno kukhala mulendo wace. Mphapo tinakwanisa tani kupitiriza kukhala alendo panyumba ya Yahova? Bukhu ya Masalmo 15 isalonga pyenepi. (Lerini Masalmo 15:1-5.) Lemba ineyi isafokotoza pinthu pinafunika ife kucita toera tipitirize kukhala na uxamwali wakuwanga na Mulungu.
2. Dhavidhi panango akhanyerezeranji mu ndzidzi udalonga iye nyumba ya Yahova?
2 Bukhu ya Masalmo 15 isatoma na mafala awa: “Yahova, mbani anafuna khala mulendo panyumba panu? Mbani anafuna kukhala paphiri yanu yakucena?” (Mas. 15:1) Pidalonga Dhavidhi pya “nyumba” ya Yahova, panango iye akhanyerezera tabhernakulo idakhala ku Jibheyoni mu ndzidzi ungasi. Dhavidhi alongambo pya ‘phiri yakucena,’ ya Mulungu. Panango iye akhalonga pya phiri ya Sioni ikhagumanika ku Yerusalemu. Pa phiri ineyi yakuti ikhali kutali kakamwe na Jibheyoni, Dhavidhi akhadamanga nyumba toera kuikha bokosi ya cibverano mpaka mu ndzidzi ukhafuna kumangwa templo.—2 Sam. 6:17.
3. Thangwi yanji ndi pyakufunika kubvesesa pinalonga Masalmo 15? (Onanimbo foto.)
3 Ndimomwene kuti Aizraeli azinji nee mbadakwanisa kutumikira mu tabhernakulo, nee kupita pa mbuto ikhagumanika bokosi ya cibverano. Mbwenye atumiki onsene akukhulupirika a Yahova mbadakwanisa kukhala alendo panyumba yakuphipirisa ya Yahova mukupitiriza kukhala axamwali a Yahova. Ife tonsene tisafunambo kucita pyenepi. Bukhu ya Masalmo 15 isalonga makhaliro anango akuti tisafunika kuakulisa toera tipitirize kukhala axamwali a Yahova.
Pikhali pyakukhonda nentsa kuna Aizraeli a mu ndzidzi wa Dhavidhi kunyerezera kuti pisabvekanji kukhala mulendo pa nyumba ya Yahova (Onani ndima 3)
FAMBANI MWAKUKHULUPIRIKA, PONTHO CITANI PINTHU PYADIDI
4. Tisadziwa tani kuti tisafunika kucita pizinji kuna Yahova kupiringana basi ene kubatizwa? (Izaiya 48:1)
4 Masalmo 15:2 isalonga kuti xamwali wa Mulungu ndi ‘ule anafamba mwakukhulupirika, mbacita pinthu pyadidi.’ Ife tisafunika kupitiriza kucita pyenepi. Kodi tinakwanisadi ‘kufamba mwakukhulupirika’? Inde. Ndimomwene kuti nkhabe munthu wakusowa madawo, mbwenye kuna Yahova, ife ‘tisafamba mwakukhulupirika’ tingawangisira toera kumbvera. Tingaperekeka kuna Mulungu mbatibatizwa, tatoma kufamba na iye. Mbwenye onani kuti kale, basi ene kukhala Muizraeli nee kukhacitisa munthu kukhala mulendo panyumba ya Yahova. Anango akhalonga kuti akhatumikira Mulungu, mbwenye akhacita pyenepi “mwaumpfakafaka na mwakusowa ulungami.” (Lerini Izaiya 48:1.) Aizraeli akhafuna kukhala alendo panyumba ya Yahova, akhafunika kupfundza kubvera mitemo yace. Munjira ibodzi ene, toera kukhala akutawirika kuna Yahova lero, tisafunika kucita pizinji kupiringana basi ene kubatizwa mbatilonga kuti ndife Mboni za Yahova. Tisafunika kupitiriza ‘kucita pinthu pyadidi.’ Tinacita tani pyenepi?
5. Pisabvekanji kubvera Yahova mu pinthu pyonsene?
5 Kuna Yahova, ‘kufamba mwakukhulupirika’ na ‘kucita pinthu pyadidi’ kusaphataniza pizinji kupiringana basi ene kuenda ku misonkhano. (1 Sam. 15:22) Ife tisafunika kuwangisira kakamwe toera kubvera Yahova mu pinthu pyonsene pinacita ife mu umaso wathu, kuphatanizambo tingakhala tekhene. (Mis. 3:6; Ekl. 12:13, 14) Ndi pyakufunika kupitiriza kuwangisira toera kubvera Yahova ngakhale mu pinthu pinaoneka ninga nee ndi pyakufunika kakamwe. Tingacita pyenepi, tinapangiza kuti mwandimomwene tisafuna Yahova, pontho iye anatifuna kakamwe.—Juw. 14:23; 1 Juw. 5:3.
6. Mwakubverana na Ahebheri 6:10-12, ndi pinthu pipi pyakufunika kakamwe kupiringana pidacita ife nduli?
6 Yahova nkhabe kuduwala pinthu pyadidi pidancitira ife nduli. Mbwenye basi ene pinthu pyenepi nee pisatipasa cinyindiro cakuti tinapitiriza kukhala alendo panyumba ya Yahova. Lemba ya Ahebheri 6:10-12 isapangiza pyenepi. (Lerini.) Ndimomwene kuti Yahova nee asaduwala pinthu pyadidi pidacita ife nduli, mbwenye iye asafuna kuti tipitirize kumulambira na ntima onsene “mpaka kunkhomo.” Pontho “tingakhonda kufewa manungo” tinakhala axamwali ace kwenda na kwenda.—Agal. 6:9.
LONGANI UNDIMOMWENE MUNTIMA MWANU
7. Kulonga undimomwene muntima kusaphatanizanji?
7 Munthu anafuna kukhala mulendo panyumba ya Yahova asafunika ‘kulonga undimomwene muntima mwace.’ (Mas. 15:2) Pyenepi pisaphataniza pizinji kusiyapo kukhonda kulonga uthambi. Kusiyapo kukhala akukhulupirika pakulonga, tisafunikambo kukhala akukhulupirika mu pinthu pyonsene pinacita ife. (Aheb. 13:18) Pyenepi ndi pyakufunika kakamwe “thangwi Yahova asaida munthu anacita pinthu mwaciphamaso, mbwenye ali na uxamwali wakuwanga na anthu akulungama.”—Mis. 3:32.
8. Ndi pinthu pipi pyakuti nee tisafunika kupicita?
8 Munthu ‘analonga undimomwene muntima’ nee asapangizika kuna anthu kuti asabvera Yahova, angakhala ekhene mbakhonda kumbvera. (Iza. 29:13) M’mbuto mwace, munthu unoyu nee asacita pinthu mwaciphamaso. Munthu anacita pinthu mwaciphamaso anatoma kunyerezera kuti nee ndi pyadidi ndzidzi onsene kubvera mitemo ya Yahova. (Tiya. 1:5-8) Iye anatoma kukhonda bvera Yahova mu pinthu pinaoneka ninga nee ndi pyakufunika, pontho angaona kuti nkhabe cinacitika thangwi yakukhonda kubvera kwace, iye asatoma kucita pinthu pyakuipa kakamwe. Maseze munthu unoyu anyerezere kuti ali kulambira Mulungu, Yahova nkhabe kutawira ulambiri wace. (Ekl. 8:11) Mbwenye ife tisafunika kukhala akukhulupirika mu pinthu pyonsene.
9. Ninji pidacitikira Natanieli, pontho tisapfundzanji na pyenepi? (Onanimbo foto.)
9 Ife tinakwanisa kupfundza pinthu pinango thangwi ya kufunika kwa kulonga undimomwene tingaleri pinthu pidacitika mu ndzidzi udadziwana Yezu na Natanieli. Filipi pidapangiza iye Yezu xamwali wace Natanieli, pacitika cinthu cakufunika kakamwe. Maseze Yezu akhadzati kudziwa Natanieli, iye alonga: “Onani, uyu ndi Muizraeli wandimomwene, mwa iye nkhabemo uthambi.” (Juw. 1:47) Ndimomwene kuti Yezu akhaonambo anyakupfundzace anango ninga anthu akukhulupirika, mbwenye iye aona kuti Natanieli akhali wakusowa uthambi. Ninga ife, Natanieli akhali wakusowa ungwiro, mbwenye nee akhali mpfakafaka, iye akhali wakukhulupirika mu pinthu pyonsene. Yezu adzumatirwa na pyenepi, pontho asimba Natanieli. Kodi nee mbamudakomerwa Yezu mbadakusimbani munjira ibodzi ene?
Filipi apangiza Yezu xamwali wace Natanaeli, wakuti akhali wakukhulupirika na wakusowa uthambi. Kodi ife tiri nawombo makhaliro anewa? (Onani ndima 9)
10. Thangwi yanji tisafunika kucita mphole-mphole na pinthu pinalonga ife? (Tiyago 1:26)
10 Pinthu pizinji pinafunika ife kucita pinagumanika pa Masalmo 15 pisalonga pya njira inafunika ife kutsalakana anango. Masalmo 15:3 isalonga kuti mulendo wa Yahova “nkhabe longa psweda na lirimi yace, iye nkhabe kucitira ndzace pyakuipa, pontho iye nkhabe kulonga mwakuipa axamwali ace.” Tingalonga mwakuipa axamwali athu, tinaatsukwalisa, pontho Yahova nee anatitawira toera kukhala alendo ace.—Lerini Tiyago 1:26.
11. Psweda ninji, pontho ninji pinacitika na munthu analonga psweda anango mbakhonda tcunyuka?
11 Dhavidhi alonga pya psweda. Mphapo psweda ninji? Kazinji kene, psweda ndi kulonga uthambi thangwi ya munthu mbatipswipisa makhaliro ace. Munthu angalonga psweda anango mbakhonda kutcunyuka, nee anakhalabve Mboni wa Yahova.—Yer. 17:10.
12-13. Ndi mu pinthu pipi pyakuti panango tinalonga mwakuipa abale na alongo athu? (Onanimbo foto.)
12 Masalmo 15:3 isalonga kuti alendo a Yahova nee asacitira anango pinthu pyakuipa, pontho nee asalonga psweda axamwali awo peno kuapasa manyadzo. Pyenepi pisabvekanji?
13 Mwakukhonda funa, panango tinapswipisa dzina ya munthu mukulonga mphangwa zakuipa thangwi ya iye. Nyerezerani pitsandzo ipi: (1) mulongo asiya kutumikira ninga mpainiya, (2) banja yasiya kutumikira pa Bheteli na (3) m’bale asiya kutumikira ninga nkulu wa mpingo peno ntumiki wakutumikira. Nee pinakhala mwadidi kulonga kuti abale anewa acita pinthu pyakuipa. Panango nee tisadziwa pyonsene pidacitika. Natenepa, mulendo wa Yahova “nkhabe kucitira ndzace pyakuipa, pontho iye nkhabe kulonga mwakuipa axamwali ace.”
Mwakukhonda dzindikira, panango tinatoma kulonga mwakuipa anango mbapikhala psweda (Onani ndima 12-13)
LEMEDZANI ALE ANAGOPA YAHOVA
14. Fokotozani kuti mulendo wa Yahova anaida tani “anthu anacita pinthu pyakuipa”?
14 Masalmo 15:4 isalonga kuti xamwali wa Yahova “asaida anthu anacita pinthu pyakuipa.” Tinacita tani pyenepi? Ninga anthu akusowa ungwiro, ife nee tinakwanisa kulonga kuti munthu uyu asacita pinthu pyakuipa. Thangwi yanji? Ife tiri na cipendamiro ca kukomerwa na ale ali na makhaliro akulandana na athu mbatikhonda kukomerwa na ale anacita pinthu pyakuti tisaipirwa napyo. Mbwenye undimomwene ndi wakuti tisafunika kukhonda basi ene ale “anacita pinthu pyakuipa” pamaso pa Yahova. (1 Akor. 5:11) Pyenepi pisaphataniza ale anacita pinthu pyakuipa mbakhonda kutcunyuka, ale anakhonda lemedza pinakhulupira ife na anayesera kuticitisa kusiya kutumikira Yahova.—Mis. 13:20.
15. Tinalemedza tani “ale anagopa Yahova”?
15 Masalmo 15:4 isalongambo kuti tisafunika kulemedza “ale anagopa Yahova.” Natenepa, ife tisasaka njira zakulemedza axamwali a Yahova na kuacitira udidi. (Aroma 12:10) Tinacita tani pyenepi? Njira ibodzi yakucita pyenepi isagumanika pa Masalmo 15:4. Mulendo wa Yahova “asakwanirisa mapikiro ace, maseze mapikiro anewa am’bweresere nyatwa.” Tingakhonda kukwanirisa mapikiro athu tinatsukwalisa anango. (Mat. 5:37) Mwacitsandzo, Yahova asafuna kuti mamuna na nkazi akwanirise dumbiro idacita iwo kuna unango na ndzace pakumanga banja. Pontho Yahova asatsandzaya anyakubala angawangisira toera kukwanirisa mapikiro anacita iwo kuna anawo. Thangwi ya ufuni wathu kuna Mulungu na kuna anango, tinacita pyonsene pinakwanisa ife toera kukwanirisa mapikiro athu.
16. Ndi njira ipi inango yakulemedza axamwali a Yahova?
16 Njira inango yakulemedza axamwali a Mulungu ndi kukhala na nsambo wakutambira alendo na kupasa mwakudzala manja. (Aroma 12:13) Kusiyapo kucedza na abale na alongo athu pa misonkhano peno m’basa yakumwaza mphangwa, kukhala na ndzidzi unango wakucedza nawo kunatiphedza toera kuwangisa uxamwali wathu na iwo, pontho na Yahova. Kusiyapo pyenepi, tingakhala na nsambo wakutambira alendo tisatowezera Yahova.
LEKANI KUFUNA KAKAMWE KOBIRI
17. Thangwi yanji Masalmo 15:5 isalonga pya kobiri?
17 Masalmo 15:4 isalonga kuti mulendo wa Yahova “nkhabe kubwerekesa kobiri yace toera abwezerwe na juru, pontho iye nkhabe kudyekerwa toera kukonesa munthu wakusowa mulando.” (Mas. 15:5) Thangwi yanji Dhavidhi alonga pya kobiri pa vesi ineyi? Thangwi tingadzudzumika kakamwe na kobiri, iyo inakhala yakufunika kakamwe kuna ife kupiringana anthu anango peno Yahova. (1 Tim. 6:10) Mu ndzidzi wakale, anango akhabandza mwai toera kufiyarisi kobiri abale awo akutcerenga na juru yakuti nee mbadakwanisa kuibwezera. Kusiyapo pyenepi, atongi anango akhatawira kudyekerwa toera kukonesa anthu akusowa mulando. Mbwenye Yahova asaida anthu anacita pyenepi.—Ezek. 22:12.
18. Ndi mibvundzo ipi inafunika ife kucita toera kudziwa maonero athu thangwi ya kobiri? (Ahebheri 13:5)
18 Tisafunika kunyerezera maonero ali na ife thangwi ya kobiri. Natenepa, bvundzikani: ‘Kodi ndzidzi onsene ndisanyerezera kobiri na pinthu pyakuti ndinakwanisa kupigula? Ndingafiyari kobiri, kodi ndisadembuka kuibwezera mbandinyerezera kuti munthu adafiyari ine nee asaifuna cincino? Kodi ndisapibva kuti ndine wakufunika kakamwe kupiringana anango basi ene thangwi ndiri na kobiri izinji? Ndisanentseka toera kupasa anango mwakudzala manja? Ndisanyerezera kuti munthu asafuna kakamwe pinthu pyakumanungo basi ene thangwi iye ali na kobiri? Ndisacita uxamwali basi ene na anthu akupfuma mbandisiya kucita uxamwali na anthu akutcerenga?’ Tonsene tiri na mwai ukulu wakukhala alendo a Yahova. Mbwenye tingafuna kupitiriza kukhala alendo ace, tisafunika kucita mphole-mphole toera tikhonde kufuna kakamwe kobiri. Tingacita pyenepi, Yahova cipo anatisiya!—Lerini Ahebheri 13:5.
YAHOVA ASAFUNA AXAMWALI ACE
19. Ndi cipi cifuniro cakufunika kakamwe ca mitemo ya Yahova?
19 Masalmo 15:5 isamalisa na mafala awa: “Iye nkhabe kudzudzumika mu pyonsene pinacita iye.” (Mas. 15:5) Dhavidhi alonga thangwi yakufunika kakamwe inacitisa Yahova kufuna kuti ticite pinthu pinalongwa pa Masalmo 15. Yahova asafuna kuti tikhale akutsandzaya. Na thangwi ineyi, tingacita pinaphemba Mulungu, tinakhala na umaso wadidi, pontho iye anatitsidzikiza.—Iza. 48:17.
20. Alendo a Yahova asadikhiranji ntsogolo?
20 Alendo a Yahova asadikhira pinthu pyadidi kakamwe ntsogolo. Akristu akudzodzwa akukhulupirika asacemerwa toera kakhala m’mbuto zizinji’ zidaakhunganyira Yezu. (Juw. 14:2) Mbwenye ale ali na cidikhiro cakukhala pa dziko yapantsi asadikhira kukwanirisika kwa pikiro inagumanika pa Apokalipse 21:3. Mwakukhonda penula, ife tisaona kuti ndi mwai ukulu kakamwe kucemerwa na Yahova toera kukhala axamwali ace na alendo ace kwenda na kwenda!
NYIMBO 39 Kucita Dzina Yadidi Pamaso pa Mulungu
