1. Psaume 15:​1-5 apeut ti aidé e tongana nyen?

 NA YÂ ti article so ahon, e bâ so awakua ti Jéhovah so amû terê ti ala na lo apeut ti duti agene na yâ ti tente ti lo na lege ti fä tongana ala gi ti duti na kpengba songo na lo. Me aye wa la e bezoin ti sara ti duti agene ti lo? Psaume 15 asara tënë mingi na ndö ni. (Diko Psaume 15:​1-5.) Psaume so afa aye so e doit ti sara ti ga nduru mingi na Nzapa.

2. Peut-être nyen la apusu lani David ti sara tënë ti tente ti Jéhovah?

² Psaume 15 akomanse na tënë so: “Jéhovah, zo wa la mo yeke yamba lo na yâ ti tente ti mo? Zo wa la ayeke sara kodro na ndö ti hoto ti mo so ayeke nzoni-kue?” (Ps. 15:1). Na ngoi so David asara tënë ti “tente” ti Jéhovah, peut-être lo yeke pensé lani na tabernacle so ayeke na Gabaon na mbeni ngoi. David asara nga tënë ti ‘hoto ti Nzapa so ayeke nzoni-kue’, peut-être lo yeke pensé lani na tabernacle so ayeke na ndö ti hoto ti Sion na Jérusalem. Kâ na Sion so ayo kilomètre 10 tongaso na sud ti Gabaon, David akpo mbeni tente na lo zia arche ti mbele na yâ ni, a ngbâ kâ juska a leke temple.—2 Sam. 6:17.

3. Ngbanga ti nyen la a yeke nzoni e gi ti mä yâ ti Psaume 15? (Bâ nga foto.)

³ Tâ tënë, mingi ti azo ti Israël asara kua lâ oko na yâ ti tabernacle ape, gï kete wungo ti ala la ayeke gue lani na yâ ti tente, ndo so a bata arche ti mbele dä. Me awakua ti Jéhovah kue so ayeke be-ta-zo apeut ti duti agene na yâ ti tente ti lo na lege ti fä na lege so ala gi ti ga akamarade ti lo nga ala ngbâ akamarade ti lo. E kue e ye tongaso. Psaume chapitre 15 afa ambeni sarango ye so e bezoin ti duti na ni ti ngbâ akamarade ti Jéhovah.

 DUTI ZO SO SARANGO YE TI LO ALINGBI KUE NGA SARA YE SO AYEKE NA LEGE NI

4. E hinga tongana nyen so ye so Jéhovah ahunda na e ayeke gï ti wara batême ape? (Ésaïe 48:1).

⁴ Na Psaume 15:​2, a sara tënë ti mbeni kamarade ti Nzapa a tene lo yeke “zo so sarango ye ti lo alingbi kue, lo yeke sara ye so ayeke na lege ni”. Atënë so aye ti sara tënë ti ye so e doit ti sara ni lakue. Me eskê e peut biani ti duti “zo so sarango ye ti lo alingbi kue”? En. Atâa so zo oko ayeke mbilimbili-kue ape, Jéhovah ayeke bâ e tongana zo so “sarango ye ti lo alingbi kue” tongana e sara ye kue so e peut ti sara ti mä yanga ti lo. Tongana e mû terê ti e na Nzapa nga e wara batême, a ngbâ gï ge ape. Na tapande, ândö, gï so mbeni zo ayeke zo ti Israël aye ape ti tene so lo yeke gene ti Jéhovah. Ambeni airi lani ndo na lo me “ala sara ni na lege ti tâ tënë pëpe nga na lege ti mbilimbili pëpe.” (Diko Ésaïe 48:1.) Azo ti Israël so aye lani biani ti duti agene ti Jéhovah adoit ti gi ti hinga aye so lo hunda na ala ti sara ye alingbi na ni. Legeoko nga laso, ti zia ngia na bê ti Nzapa, a ngbâ gï pëpe na ndö ti warango batême nga dutingo na yâ ti congrégation ti aChrétien. E doit ti ngbâ ti “sara ye so ayeke na lege ni”. E peut ti sara ni tongana nyen?

5. Ti mä yanga ti Jéhovah na yâ ti aye kue aye ti tene nyen?

⁵ Na lê ti Jéhovah, ti duti “zo so sarango ye ti lo alingbi kue” nga ti “sara ye so ayeke na lege ni” angbâ gï pëpe na ndö ti guengo lakue na abungbi na Da ti Royaume (1 Sam. 15:22). E doit ti sara kue ti mä yanga ti Nzapa na yâ ti aye kue so e yeke sara même na ngoi so e yeke gï e oko (aProv. 3:6; Zo-ti. 12:​13, 14). A yeke kota ye ti gi ti mä yanga ti Jéhovah même na yâ ti akete kete ye. Tongana e sara tongaso afa so e ye lo biani, na a yeke sara si lo ye e même mingi.—Jean 14:23; 1 Jean 5:3.

6. Ti gue oko na aHébreu 6:​10-12, nyen la ayeke kota mingi ahon aye so e sara ândö ti fa so e yeke be-ta-zo?

 ⁶ Jéhovah abâ na nene ni mingi aye so e sara ândö ndali ti lo. Me aye so e sara ândö ti fa so e yeke be-ta-zo aye ti tene ape so nyen na nyen e yeke ngbâ agene na yâ ti tente ti Jéhovah. A sigi polele na yâ ti atënë so ayeke na aHébreu 6:​10-12. (Diko ni.) Jéhovah agirisa ape anzoni ye so e sara ândö. Me lo ye ti tene e ngbâ ti sara na lo na âme ti e kue “juska na nda ni”. Lo yeke ngbâ kamarade ti e teti lakue lakue “tongana e woko pëpe.”—aGal. 6:9.

TENE TÂ TËNË NA YÂ TI BÊ TI MO

7. Ti tene tâ tënë na yâ ti bê ti e aye ti tene nyen?

⁷ Zo so aye ti duti gene so azia ngia na bê ti Jéhovah adoit ti duti zo so ayeke “tene tâ tënë na yâ ti bê ti lo.” (Ps. 15:2). A ngbâ gï pëpe na ndö ti kengo ti tene mvene. Jéhovah aye ti tene e tene tâ tënë na yâ ti atënë ti e kue nga e sara ye na lege ni na yâ ti aye kue (aHéb. 13:18). Tënë so ayeke kota tënë mingi “ndali ti so Jéhovah ake zo so asara ye na handa, me akota kamarade ti lo ayeke azo ti mbilimbili.”—aProv. 3:32.

8. Sarango ye wa la e bezoin ti kpe ni?

⁸ Azo so ayeke tene ‘tâ tënë na yâ ti bê ti ala’ ayeke mä yanga ti Nzapa gï pëpe na ngoi so azo abâ ala me na hondengo ni ala yeke doro andia ti Nzapa (És. 29:13). Ala yeke sara ye na handa ape. Zo so ayeke sara ye na handa apeut ti komanse ti duti na kite so andia ti Jéhovah ayeke lakue nzoni mingi (Jacq. 1:​5-8). Lo peut ti ke yanga ti Jéhovah na yâ ti ye so lo pensé so ayeke nga kota ye ape. Na pekoni, tongana lo bâ so lo wara kpale ape na peko ti so lo ke yanga ti Nzapa, bê ti lo apeut ti pusu lo ti doro ambeni ndia ti Nzapa ni, na vorongo so lo yeke voro na Nzapa ayeke ti handango lê ti zo (Zo-ti. 8:11). Me e ye ti sara ye na lege ni na yâ ti aye kue.

9. Nyen la e peut ti manda na lege ti ye so asi na ngoi ti kozo tingbingo terê ti Jésus na Nathanaël? (Bâ nga foto.)

⁹ E peut ti hinga ndani so a yeke kota ye ti duti na vuru bê na lege ti ye so asi na ngoi ti kozo tingbingo terê ti Jésus na Nathanaël.  Na ngoi so Philippe aga na ita ti lo Nathanaël ti wara terê na Jésus, mbeni kpengba ye apassé. Atâa so Jésus awara terê na Nathanaël lâ oko ape, Jésus atene: “Bâ, tâ zo ti Israël so tënë ti handa ayeke na yâ ti lo pëpe.” (Jean 1:47). Jésus ahinga lani so tanga ti adisciple ti lo ayeke sara ye na lege ni, me sarango ye na lege ni ti Nathanaël apika bê mingi. Atâa so Nathanaël ayeke lani mbilimbili-kue ape tongana e, lo sara ye ti handango lê ti zo ape me lo sara ye na lege ni na yâ ti aye kue. A nzere lani na Jésus na lo gonda Nathanaël ndali ni. Tongana Jésus agonda e tongaso, a yeke nzere na e mingi.

10. Ngbanga ti nyen la a yeke nzoni e sara hange na tënë ti yanga ti e? (Jacques 1:26).

¹⁰ Mingi ti aye so a hunda na e ti sara so ayeke na Psaume chapitre 15 abâ fason ti sarango ye ti e na mbage ti azo. Psaume 15:3 atene so zo so ayeke gene na yâ ti tente ti Jéhovah ayeke “pa zo na yanga ti lo pëpe, lo sara sioni na mba ti lo pëpe, nga lo buba iri ti akamarade ti lo pëpe.” Tongana e pa azo, a peut biani ti sara sioni na ala nga e yeke ngbâ agene na yâ ti tente ti Jéhovah encore ape.—Diko Jacques 1:26.

11. Ti pa zo aye ti sara tënë ti nyen? Nyen la a yeke sara na mbeni ita so ayeke pa azo me so achangé bê ti lo ape?

¹¹ Zo ti sungo psaume ni asara mbilimbili tënë ti pango zo. Ti pa zo aye ti sara tënë ti nyen? Mingi ni, a ye ti sara tënë ti mbeni tënë ti mvene so apeut ti buba iri ti mbeni zo. Tongana mbeni ita ayeke pa azo na lo changé bê ti lo ape, lo peut ti ngbâ Témoin ti Jéhovah encore ape.—Jér. 17:10.

12-13. Na yâ ti aye wa la e peut ti buba iri ti mbeni ita sân ti hinga? (Bâ nga foto.)

¹² Psaume 15:3 adabe ti e so agene ti Jéhovah ayeke sara sioni na amba ti ala ape nga ala yeke buba iri ti aita ti ala ape. Tongana nyen la e peut ti buba iri ti aita ti e?

¹³ E peut ti buba iri ti mbeni zo sân ti hinga ni na lege so e sara si mbeni tënë so ayeke na lege ni ape so a tene na ndö ti lo amû ndo.  Gbu li na ndö ti aye so: 1) mbeni ita-wali azia kua ti pionnier, (2) mbeni couple azia ti sara kua na Béthel, wala (3) mbeni ita-koli azia ti sara kua ti ancien wala ti wakua ti mungo maboko. Eskê a yeke na lege ni ti imaginé araison so ndali ni aye so asi nga ti fa ni na azo? Araison apeut ti duti dä so e hinga ni ape so ndali ni aye so asi. Na ndö ni, zo so ayeke gene na yâ ti tente ti Jéhovah ayeke “sara sioni na mba ti lo pëpe nga lo [yeke] buba iri ti akamarade ti lo pëpe.”

NE AZO SO AKPE MBETO TI JÉHOVAH

14. Fa tongana nyen la agene ti Jéhovah ayeke “ke zo kue so ayeke tâ sioni”.

¹⁴ Psaume 15:4 atene so kamarade ti Jéhovah ‘ake zo kue so ayeke tâ sioni’. E yeke hinga tongana nyen so mbeni zo ayeke tâ sioni? So e yeke mbilimbili-kue ape, e lingbi pëpe ti fa wala mbeni zo ayeke tâ sioni. Ngbanga ti nyen? Mingi ni, e yeke ye ambeni zo ndali ti sarango ye ti ala nga e yeke ke ambeni ndali ti so ala son bê ti e. Tongaso, a yeke nzoni e ke gï azo so Jéhovah atene so ala yeke “tâ sioni”. (1 aCor. 5:11). Na popo ti azo ni so, e yeke wara azo so ayeke sara sioni ye sân ti changé bê ti ala, azo so abâ na nene ni pëpe aye so e mä na bê na ni wala so agi ti buba yâ ti songo ti e na Jéhovah.—aProv. 13:20.

15. Mbeni lege ti ne azo so “akpe mbeto ti Jéhovah” ayeke so wa?

¹⁵ Na pekoni, Psaume 15:4 ahunda na e ti ne azo so “akpe mbeto ti Jéhovah.” Tongaso, e yeke gi alege ti sara ye na nzoni bê na mbage ti akamarade ti Jéhovah nga ti ne ala (aRom. 12:10). E yeke sara ni tongana nyen? Mbeni lege ti sara ni so a fa ni na Psaume 15:4 ayeke so gene ti Jéhovah, “tongana lo mû zendo, lo yeke kiri na peko pëpe, atâa a ga na lo kpale.” Tongana e sara ye alingbi na azendo ti e ape ayeke sara sioni na amba ti e (Mat. 5:37). Na tapande, Jéhovah ahunda na akoli nga na awali ti sara ye alingbi na zendo so ala mû na mba na ngoi ti mariage ti ala. Tongana ababâ na amama asara effort ti sara ye alingbi na azendo so ala mû na amolenge ti ala, a yeke nzere nga na lo. Yengo so e ye na Nzapa nga na amba ti e ayeke pusu e ti sara ye kue so e peut ti sara ti sara ye alingbi na azendo ti e.

16. Mbeni lege nde ti ne akamarade ti Jéhovah ayeke so wa?

¹⁶ Mbeni lege nde ti ne akamarade ti Nzapa ayeke ti duti azo so ayeke yamba agene nga ti mû ye mingi na azo (aRom. 12:13). Ngoi ti ngia so e na aita ti e e passé ndo oko ayeke aidé e ti kpengba songo ti kamarade so ayeke na popo ti e na ala nga na Jéhovah. Na ndö ni, tongana e yamba agene, andâ e yeke sara ye tongana Jéhovah.

DUTI ZO SO ANDOYE NGINZA APE

17. Ngbanga ti nyen la Psaume chapitre 15 asara tënë na ndö ti nginza?

¹⁷ Bible atene so gene ti Jéhovah ayeke “sara bon intérêt na zo pëpe. Lo yeda pëpe ti mû goro ti bi tënë na li ti zo so tënë ayeke na li ti lo pëpe.” (Ps. 15:5). Ngbanga ti nyen la a sara tënë ti nginza na yâ ti psaume so? Ngbanga ti so tongana e yeke na nzoni bango ndo na ndö ti nginza ape, a peut ti sara sioni na azo nga apeut ti buba songo ti e na Nzapa (1 Tim. 6:10). Ândö, ambeni zo ayeke wara go na ndö ti aita ti ala so ayeke awayere na lege so ala hunda na ala ti futa mbeni ye na ndö ti nginza so ala mû na ala na bon. Nga, ambeni juge ayeke yeda lani na goro na pekoni ala yeke fâ ngbanga ti azo so tënë ayeke na li ti ala ape na lege ni ape. Jéhovah ake azo so asara mara ti aye so.—Ézéch. 22:12.

18. Ahunda wa la apeut ti aidé e ti hinga bango ndo ti e na ndö ti nginza? (aHébreu 13:5).

 ¹⁸ A yeke nzoni ti tene e hinga bango ndo ti e wani na ndö ti nginza. Hunda terê ti mo: ‘Eskê mingi ni mbi yeke pensé ka na ndö ti nginza nga na ye so mbi peut ti vo na ni? Tongana mbi sara bon na tîtï zo, eskê a yeke ninga ngbii si mbi kiri na ni ndali ti so mbi pensé so zo ni abezoin ni ape? Eskê tongana mbi wara nginza asara si mbi bâ so mbi yeke kota mingi me a yeke ngangu na mbi ti mû ye mingi na azo? Eskê mbi yeke tene so aita ayeke azo so aye aye ti sese mingi gï ndali ti so ala yeke na nginza? Eskê mbi ye ti duti gï kamarade ti azo so ayeke na mosoro me ti azo so ayeke awayere ape?’ A yeke kota ye ti hunda terê ti e na ahunda so ndali ti so e yeke na kota pasa so Jéhovah atisa e ti duti agene ti lo. Me e peut ti ngbâ agene ti Jéhovah tongana e sara kue ti ndoye nginza ape. Tongana e sara tongaso, Jéhovah ayeke zia e lâ oko ape.—Diko aHébreu 13:5.

JÉHOVAH AYE AKAMARADE TI LO

19. Ngbanga ti nyen la Jéhovah aye ti tene e sara aye kue so a sara tënë ni na Psaume 15?

¹⁹ Psaume chapitre 15 ahunzi na tënë so: “Zo so asara aye so, ye ayeke yengi lo lâ oko pëpe.” (Ps. 15: 5). Zo ti sungo psaume ni afa ndani so Jéhovah aye ti tene e sara aye kue so ayeke na yâ ti chapitre so. Lo ye ti tene e duti na ngia. Tongana e sara aye so Nzapa ahunda na e ti sara, gigi ti e ayeke duti nzoni mingi nga lo yeke bata e.—És. 48:17.

20. Nyen la agene ti Jéhovah apeut ti ku ti wara ni ande?

²⁰ Agene ti Jéhovah apeut ti ku ti wara mbeni pendere gigi ti kekereke. Azo so a soro ala ti gue na yayu ayeke duti ande na ‘ando ti lango so ayeke mingi’ so Jésus aleke ni ndali ti ala na yayu (Jean 14:2). Azo so ayeke na beku ti vivre na ndö ti sese ayeke ku kungo ti bâ gango tâ tënë ti zendo so ayeke na Apocalypse 21:3. Biani, a yeke mbeni kota pasa so Jéhovah atisa e ti duti agene na yâ ti tente ti lo teti lakue lakue.