1. O ā aogā e tatou te maua mai i le iloiloina o le Salamo 15:​1-5?

 I LE mataupu ua mavae, na tatou aʻoaʻoina ai e mafai ona avea auauna tuuina atu a Ieova ma mālō i lona faleʻie faafaatusa, e ala i le atiaʻe o se faiā māfana ma Ia. Ae o ā mea e manaʻomia ona tatou faia ina ia avea ai ma ana uō? Ua fesoasoani mai le Salamo 15 e tali lenā fesili. (Faitau le Salamo 15:​1-5.) O loo aumaia i lenā Salamo lesona aogā e fesoasoani iā i tatou ina ia mafuta vavalalata atu ai i le Atua.

2. O le ā atonu sa mafaufau i ai Tavita ina ua ia taʻua le faleʻie o Ieova?

² Ua faapea mai le Salamo 15:1: “Ieova e, o ai e fai ma mālō i lou faleʻie? O ai foʻi e mafai ona nofo i lou mauga paia?” Ina ua taʻua e Tavita le “faleʻie” o Ieova, atonu sa mafaufau o ia i le faleʻie paia sa iai i Kipeona mo sina taimi. Na ia taʻua foʻi le “mauga paia” o le Atua, lea atonu na faasino atu i Siona i Ierusalema. O i inā na faatū ai e Tavita se faleʻie e tuu ai le atolaau o le feagaiga, seʻia oo i le taimi na fausia ai le malumalu.—2 Samu. 6:17.

3. Aiseā e tatou te naunau ai ina ia malamalama i le Salamo 15? (Tagaʻi foʻi i le ata.)

³ O le toʻatele o tagata Isaraelu e leʻi maua le faaeaga e auauna ai i le faleʻie paia. E lē gata i lea, e leʻi mafai foʻi ona latou ō i totonu i le vaega o loo tuu ai le atolaau o le feagaiga. Peitaʻi, na mafai ona avea auauna faamaoni uma a Ieova ma mālō i lona faleʻie faafaatusa, e ala i le faaauau pea ona avea ma ana uō. O lo tatou faanaunauga foʻi lenā. O loo taʻua i le Salamo 15, nisi o uiga e manaʻomia ona tatou atiaʻe ma faaalia, ina ia avea ai pea i tatou ma uō a Ieova.

 IA SAVALI MA LE LĒ TAʻULEAGAINA MA IA FAIA LE MEA SAʻO

4. E faapefea ona tatou iloa e lē lava le tau ina papatiso ina ia avea ai se tasi ma uō a Ieova? (Isaia 48:1)

⁴ O loo faamatalaina i le Salamo 15:​2, o se tasi e avea ma uō a le Atua, ʻe savali ma le lē taʻuleagaina, ma e faia le mea saʻo.’ O faaupuga “savali” ma le “faia,” e faasino atu i ni gaoioiga e faifai pea. Ae pe e moni e mafai ona tatou ʻsavavali ma le lē taʻuleagaina’? Ioe. O le mea moni, e leai se tagata e lelei atoatoa. Ae e silasila Ieova iā i tatou o ni ē e ʻsavavali ma le lē taʻuleagaina,’ pe afai e tatou te faia le mea sili e usiusitaʻi ai iā te ia. Pe a tuuina atu i tatou iā Ieova ma papatisoina, ua na o se amataga lea o la tatou faauōga ma ia. O se faataʻitaʻiga i taimi o le Tusi Paia, e tusa po o se tagata Isaraelu, ae e lē otometi ai ona avea o ia ma mālō a Ieova. E iai nisi na valaau atu i le Atua, ae e leʻi faia e tusa ma le “upu moni ma le amiotonu.” (Faitau le Isaia 48:1.) Na manaʻomia e tagata Isaraelu lotofaamaoni ona aʻoaʻoina tapulaa a Ieova ma mulimuli i ai. Ina ia tatou maua foʻi le finagalo malie o Ieova i aso nei, e lē lava le tau ina papatiso ma auaufaatasi ma le faapotopotoga Kerisiano. E tatau foʻi ona faaauau ona tatou “faia le mea saʻo.” E faapefea?

5. O ā mea e aofia ai i le usiusitaʻi atoatoa iā Ieova?

⁵ I le silafaga a Ieova, ina ia “savali ma le lē taʻuleagaina” ma “faia le mea saʻo,” e lē lava le tau ina auai e lē aunoa i sauniga. (1 Samu. 15:22) E tatau ona tatou taumafai malosi e usiusitaʻi i le Atua i vala uma o o tatou olaga, e oo lava i taimi pe a na o i tatou. (Faata. 3:6; Fai. 12:​13, 14) E tāua foʻi ona tatou usiusitaʻi iā Ieova e oo lava i mataupu lāiti. O le faia faapea, e faamaonia atu ai e tatou te alolofa moni iā te ia, ma atili ai ona pele i tatou iā te ia.—Ioa. 14:23; 1 Ioa. 5:3.

6. E tusa ai ma le Eperu 6:​10-12, o le ā e sili atu ona tāua nai lo o galuega o le faamaoni na tatou faia i le taimi ua teʻa?

 ⁶ E matuā talisapaia e Ieova mea na tatou faia mo ia i taimi ua teʻa. Ae e lē lava na galuega o le faamaoni e tatou te agavaa ai e avea pea o ni mālō i le faleʻie o Ieova. O loo faamaonia lenā manatu i le Eperu 6:​10-12. (Faitau.) E lē galo iā Ieova galuega lelei na tatou faia i le taimi ua teʻa. Peitaʻi, e finagalo o ia e tatou te auauna atu pea iā te ia ma le lotoatoa “e oo i le iʻuga.” O lea, o le a faaauau ona avea o ia ma a tatou uō, “pe a tatou lē faavaivai.”—Kala. 6:9.

IA TAUTALA MA LE FAAMAONI I LOU LOTO

7. O le ā e aofia ai i le tautala ma le faamaoni i o tatou loto?

⁷ Ina ia agavaa se tasi e avea ma mālō i le faleʻie o Ieova, e tatau ona “tautala ma le faamaoni i lona loto.” (Sala. 15:2) E lē faapea e na o le ʻalofia o le faia o tala pepelo, ae e aofia ai foʻi le faamaoni i gaoioiga. (Epe. 13:18) E tāua lenā manatu, “auā e inosia e Ieova le tagata taufaaʻoleʻole, ae e mafuta vavalalata atu o Ia i ē ua amio saʻo.”—Faata. 3:32.

8. O ā amioga e tatau ona tatou ʻalofia?

⁸ O i latou e ʻtautatala ma le faamaoni i o latou loto,’ e latou te lē faafoliga atu e faamaoni pe a vaai mai isi, ae pe a na o i latou, e latou te solia tulafono a le Atua. (Isa. 29:13) E latou te ʻalofia le faia o gaoioiga taufaaʻoleʻole. O se tagata e taufaaʻoleʻole, atonu o le a amata ona ia fesiligia le aogā o nisi o tapulaa a Ieova. (Iako. 1:​5-8) E ono lē usiusitaʻi o ia iā Ieova pe a oo i mataupu e foliga mai e lē tāua tele iā te ia. Pe afai e foliga mai iā te ia e leai ni āuga leaga o lona lē usiusitaʻi, atonu o le a ia faia ai nisi mea e sili atu ona leaga, ma faagutugutulua ai i lana tapuaʻiga iā Ieova. (Fai. 8:11) Peitaʻi, e tatou te mananaʻo ia faamaoni i mea uma.

9. O le ā e tatou te aʻoaʻoina mai i le taimi muamua na feiloaʻi ai Iesu ma Natanielu? (Tagaʻi foʻi i le ata.)

⁹ E tatou te aʻoaʻoina le tāua o le iai o se lotofaamaoni, mai i le taimi muamua na feiloaʻi ai Iesu ma Natanielu. Ina ua aumai e Filipo  lana uō o Natanielu e feiloaʻi iā Iesu, e iai se mea mataʻina na tupu. E ui e leʻi feiloaʻi muamua Iesu iā Natanielu, ae na ia fetalai: “Vaai, o le tagata Isaraelu moni, e lē faaʻoleʻole o ia.” (Ioa. 1:47) Na silafia e Iesu le faamaoni o isi ona soo. Peitaʻi, na ia mātauina le mataʻina o le faamaoni o Natanielu. E pei o i tatou, o Natanielu o se tagata e lē lelei atoatoa. Ae e leʻi faagutugutulua o ia pe lē faamaoni foʻi. Na talisapaia e Iesu lenā uiga, ma na ia faamālō atu ai iā Natanielu. Maʻeu se faaeaga pe afai o loo mātauina mai e Iesu o loo tatou faaalia foʻi lenā uiga!

10. Aiseā e tatau ai ona tatou ʻalofia le faaaogāsesē o le meaalofa o le tautala? (Iakopo 1:26)

¹⁰ O le tele o tapulaa a Ieova o loo taʻua i le Salamo 15, e fesootaʻi atu i le auala e tatou te feutagaʻi ai ma isi. Ua faapea mai le Salamo 15:​3, o se tasi e avea ma mālō i le faleʻie o Ieova, “e lē tautala lona laulaufaiva i upu taufaaleaga. E na te lē faia se mea leaga i lona tuaoi, e na te lē taʻuleagaina foʻi ana uō.” O le faaaogāsesē o le laulaufaiva e telē se aafiaga lē lelei i isi, ma e tatou te lē agavaa ai e avea ma mālō i le faleʻie o Ieova.—Faitau le Iakopo 1:26.

11. O le ā le taufaaleaga, ma o le ā le iʻuga o i latou e fai ma masani le taufaaleaga ae e lē salamō?

¹¹ Na taʻua e le faisalamo le taufaaleaga. O le ā le taufaaleaga? O le faia lea o ni faamatalaga lē moni e faaleagaina ai le talaaga lelei o se tasi. O ē e fai ma a latou masani le faia o tala taufaaleaga ae e lē salamō, e faateʻaese i latou mai i le faapotopotoga Kerisiano.—Iere. 17:10.

12-13. O ā nisi o tulaga e tatou te ono taʻuleagaina ai a tatou uō e ui e tatou te leʻi fuafuaina? (Tagaʻi foʻi i le ata.)

¹² O loo taʻua foʻi i le Salamo 15:​3, o ē e avea ma mālō a Ieova, e latou te lē faia se mea leaga i o latou tuaoi ma e latou te lē taʻuleagaina foʻi a latou uō. O le ā le uiga o lenā manatu?

 ¹³ Atonu e tatou te taʻuleagaina se tasi e ui e tatou te leʻi fuafuaina, e ala i le faasalalau o ni faamatalaga lē lelei e faatatau iā te ia. O se faaaʻoaʻoga, (1) ua lē toe faaauau le paeonia a se tuafafine, (2) ua lē toe auauna se ulugalii i le Peteli, po o le (3) ua lē toe toeaina pe auauna o le faiva se uso. Faamata e talafeagai le masalosalo i māfuaaga ua lē faaauau ai le auaunaga a i latou na, ma faailoa atu i isi o tatou manatu? Atonu e iai māfuaaga talafeagai na fai ai na suiga e tatou te lē o malamalama i ai. O le mea moni, o sē e avea ma mālō i le faleʻie o Ieova, “e na te lē faia se mea leaga i lona tuaoi, e na te lē taʻuleagaina foʻi ana uō.”

IA FAAMAMALUINA Ē E MATATAʻU IĀ IEOVA

14. O le ā e uiga i ai le teena o “i latou ua inosia”?

¹⁴ I le Salamo 15:​4, o loo taʻua ai o se tasi e avea ma uō a Ieova ʻe na te teena i latou ua inosia.’ E faapefea ona tatou faia lenā mea? E lē mafai ona tatou faamasinoina se tasi o sē e inosia. Aiseā? Talu ai e tatou te lē lelei atoatoa. E iai i latou e tatou te fiafia i ai, ae e iai foʻi i latou e tatou te lē fiafia i ai ona e latou te faatigā mai iā i tatou. O lea, e tatou te teena na o i latou e “inosia” e Ieova. (1 Kori. 5:11) E aofia ai i latou e faia ma le lē salamō amioga leaga, o ē e lē faaaloalo i o tatou talitonuga, ma i latou e taumafai e faaleagaina la tatou faauōga ma Ieova.—Faata. 13:20.

15. O le ā se tasi o auala e faamamaluina ai “ē e matataʻu iā Ieova”?

¹⁵ Ua faapea mai le Salamo 15:​4, ia “faamamaluina ē e matataʻu iā Ieova.” E tatou te saʻilia auala e faaalia ai le agalelei ma le faaaloalo i uō a Ieova. (Roma 12:10) O se tasi o auala e faia ai faapea o loo taʻua i le Salamo 15:​4, o sē e avea ma mālō i le faleʻie o Ieova, “e lē toe suia lana folafolaga, e tusa pe e tigā ai o ia.” O le lē tausisi i a tatou folafolaga, o le a telē se aafiaga lē lelei i isi. (Mata. 5:37) O se faaaʻoaʻoga, e faatalitalia e Ieova ana mālō ina ia faamaoni i a latou tautoga o le faaipoipoga. E faafiafiaina foʻi Ieova pe a ia silasila mai, o loo faia e mātua le mea sili e faataunuu ai folafolaga e latou te faia i a latou fanau. Talu ai e tatou te alolofa iā Ieova ma o tatou tuaoi, o le a tatou taumafai ai e faamaoni i a tatou folafolaga i le tele e mafai ai.

16. O le ā se isi auala e faamamaluina ai uō a Ieova?

¹⁶ O se isi auala e faamamaluina ai uō a le Atua, o le faaalia lea o le agaga talimālō ma le limafoaʻi. (Roma 12:13) O faatasiga faasamasamanoa ma uso ma tuafāfine, o le a fesoasoani e faamalosia ai a tatou faauōga ma i latou faapea foʻi ma Ieova. O le mea moni, o le faaalia o le agaga talimālō, ua tatou faaaʻoaʻo ai iā Ieova.

IA ʻALOFIA LE MANAʻO TELE I TUPE

17. Aiseā na taʻua ai tupe i le Salamo 15?

¹⁷ O sē e avea ma mālō a Ieova, “e lē nonō atu ana tupe e maua ai ni tupe faasili, e na te lē talia foʻi se foaʻi faaalatua ina ia tuuaʻia ai le tagata e lē sala.” (Sala. 15:5) Aiseā ua taʻua ai tupe i lenei salamo? Pe afai e sesē la tatou vaaiga i tupe, e ono iai se aafiaga lē lelei i isi ma faaleagaina ai la tatou faauōga ma le Atua. (1 Timo. 6:10) I taimi o le Tusi Paia, na faileagaina e isi tagata o latou uso e matitiva, e ala i le nonō atu o tupe ina ia maua ai ni tupe faasili. E lē gata i lea, e iai faamasino na taliaina tupe faaalatua, ma faia ai faamasinoga e lē tonu o tagata e lē  sala. O na gaoioiga e matuā inosia lava e Ieova.—Eseki. 22:12.

18. O ā fesili e fesoasoani iā i tatou e iloilo ai o tatou manatu e faatatau i tupe? (Eperu 13:5)

¹⁸ O se mea lelei le fai ma iloilo o tatou manatu e faatatau i tupe. Ia fesili ifo: ʻPe e tele ina ou mafaufau i tupe ma mea e mafai ona faatau ai? Pe afai ou te nonō mai se tupe, pe e faatuai ona ou toe totogi atu ona ou te manatu e tele tupe a lē na nonō mai ai? Pe afai e tele aʻu tupe, pe ou te vaai maulalo ai i isi ma faigatā ona ou faaalia ai le limafoaʻi? Pe afai e tele tupe a isi uso ma tuafāfine, pe ou te manatu ai iā i latou o ni ē e mananaʻo tele i meafaitino? Pe ou te fiafia e faifaimea faatasi ma ē e tele tupe ae faalēano i ē matitiva?’ Ua tatou maua se faaeaga tāua e avea ai ma mālō a Ieova. E mafai ona tatou taofimau i lenā faaeaga, e ala i le ʻalofia o le manaʻo tele i tupe. Pe afai e tatou te faia faapea, e lē tuua lava i tatou e Ieova.—Faitau le Eperu 13:5.

E ALOFA IEOVA I ANA UŌ

19. O le ā le māfuaaga autū e tatou te tausia ai tapulaa a Ieova?

¹⁹ E faaiʻu le Salamo 15 i le folafolaga lenei: “O lē e na te faia nei mea uma, e lē tautevateva lava o ia.” (Sala. 15:5) Ua faamatilatila mai e le faisalamo, o le māfuaaga autū e tatou te tausia ai tapulaa a Ieova, ona e finagalo o ia ina ia tatou maua le fiafia. O lea, o taʻiala ua ia saunia, e tatou te maua ai ana faamanuiaga ma lana puipuiga.—Isa. 48:17.

20. O ā mea e mafai ona tulimataʻia e mālō a Ieova?

²⁰ O ē e avea ma mālō a Ieova, e mafai ona latou tulimataʻia se lumanaʻi matagofie. Ua saunia e Iesu i le lagi se “mea e nonofo ai” le ʻaufaauuina. (Ioa. 14:2) E tulimataʻia e i latou e iai le faamoemoe e ola i le lalolagi, folafolaga o loo taʻua i le Faaaliga 21:3. E mautinoa o se faaeaga sili le valaaulia o i tatou e Ieova, e avea ma ana mālō e faavavau i lona faleʻie!