DJAMBA DJƐ WEKELO 24
YEEMBO 24 Nyoye l’onkókó wɔ Yehova (lá Otetela)
Totshikale tolongo tɔ Yehova etshinda etshinda!
‘Ee Yehova, okoka ndongolama lá mvulu kɛko kɛ mpɛma na?’—YEE. 15:1.
IKANYI YƐ DJAMBA DJƐNƐ
Tongoshishima kɛnɛ kɛlɔmbama djɛ nkindjɛ ndjala la djokanelo djɛ wɔlɔ la Yehova, la tongolenda wopo wɔkɔpande iso nanghela tolongo tɔnde akambo.
1. Wopo wɔkɔnge w’okokaso mba wapɔ má nshishima Yeembo 15:1-5?
LÁ DJAMBA djemboheta, tɛnaka ente enkambi wɛ Yehova wembolalambola le nde nkoka ndongolama lá mvulu kɛnde kɛ mpɛma kɛ djingingi, má ndjala la djokanelo djɛ ma ma la djɛ wɔlɔ la nde. Ko kɛkɔnge k’oyɛso ladjɛ nangha djɛ ndjala la djokanelo djɛ wɔlɔ la nde? Yeembo 15 itepela nkete efula lá nkambo djɛsɔ. (Wala Yeembo 15:1-5.) Yeembo yɛnɛ itɛnyɛ elakanyelo wɛ djonyi efula wekoka ntosukanyɛ la Ndjambe.
2. Kɛkɔnge kekokisá ntshinda ondjombe Davidɛ djɛ numola mvulu kɛ mpɛma kɛ Yehova?
2 Yeembo 15 iwanga nghɔnɛ: ‘Ee Yehova, okoka ndongolama lá mvulu kɛko kɛ mpɛma na? Okoka ndjintasɛ lá onkókó wɔko w’ekina na?’ (Yee. 15:1) Winá wɔ ndatepelaka djɛ ‘mvulu kɛ mpɛma’ kɛ Yehova, nkoka ondjombe Davidɛ ndakanelaka nde tabɛrnaklɛ keyalaki etsho ɛmɔtshi lá Gibɛɔna. Davidɛ alumolaka lonkina ‘onkókó w’ekina’ wɔ Ndjambe, nkoka ndjala ndakanelaka nde Siɔna kɛ lá Jerusalɛmɛ. L’eteyi, lá kilɔmɛtrɛ efula tá sidɛ kɛ Gibɛɔna, Davidɛ apikaka ivuvulu yɛ mpɛma djɛ ndjila onsete w’iseke l’eteyi tii winá wɔ iyongolopika mvulu kɛ ndowilá etshinda etshinda.—2 Sa. 6:17.
3. Ladjikɛnge okombolaso ndjala la looka lɔ wɔlɔ lɔ Yeembo 15? (Lenda edjinge ntshango.)
3 Lá nsɔsɔlɔ, wana w’Isariyɛlɛ efula watakokaki mba lotshungɔ lɔ nkamba la tabɛrnaklɛ, ngo anto amangha toko ndeke lingelaki l’eteyi, lá iyawombaka onsete w’iseke. Koko enkambi enkfumɔ wɛ nkɔmano wɛ Yehova wakokaki ndongolama lá mvulu kɛnde kɛ mpɛma kɛ djingingi, má nkoma la ntshikala tolongo tɔnde. Ɔsɔ alekɔ nkambo dj’okombolaso isankfumɔ. Yeembo 15, ipika nghɔmɔ ɛnsɔsɔ lá wekeka amɔtshi w’oyɛso ladjɛ nkona la nyɛnyɛ djɛ nkindjɛ ndjala tolongo tɔ Yehova.
Ase Isariyɛlɛ w’etsho wɛ Davidɛ wakokaki nyɛna lá wɔɔngɔ kɛnɛ kesakisola ndjala lá mvulu kɛ mpɛma kɛ Yehova (Lenda itenyi 3)
TƆKƐNDƐ LA NKOMANO LA TONANGHE KƐNƐ KELEKƆ́ WƆLƆ
4. Wopo wɔkɔnge w’ewaso ente ape ngo ndongola batisimo toko ndeke Yehova ɔtɔlɔmbande dj’iso nangha? (Izaya 48:1)
4 Yeembo 15:2 itepela djɛ ilongo yɛ Ndjambe ete ngo ‘onto wɔkɛnda la nkɔmano, w’onangha kɛnɛ kelekɔ́ wɔlɔ.’ Itepela ‘nkɛnda’ la ‘nangha’ nsakisolaka nkambo kana ekete k’oyɛso ladjɛ nkindjɛ nangha. Ko tokoka nsɔsɔlɔ ‘nkɛnda la nkɔmano’? Ee. Kaanga isopalekɔ́ anto wa djɔ, Yehova ntɔsaka ngo ngete anto ‘wakɛnda la nkɔmano’ ntsha tonangha la wolo dj’iso ndɔlɛmɛyɛ. Winá w’olalambolaso le Ndjambe la w’olongolaso batisimo, ndeke owangaso nkɛnda la Ndjambe. Tokote ente l’etsho w’efunamaki Bible, ndjala ngo ose Isariyɛlɛ toko atapɛyɛki onto mpeyi kɛ nkoma ngo mbala kɛkɔ kɛmɔ ilongo yɛ Yehova. Amɔtshi wɔlɔmbaki koko atayalaki ‘lá nsɔsɔlɔ la lá sii.’ (Wala Izaya 48:1.) Ase Isariyɛlɛ w’eloko wɔlɔ wayalaki ladjɛ ndjeka akambo wa Yehova ndalɔmbaka la nkilika akambo wakɔ. Lá wopo wɔkɔ ɔmɔ, djɛ ndjawolama me Ndjambe lɔɔko kɛnɛ, alɔmbama iso nangha akambo efula ape ngo ndongola batisimo la nsanghana l’otshumano w’Akristo toko. Iso ladjɛ nkindjɛ ‘nangha kɛnɛ kelekɔ́ wɔlɔ.’ Okokaso nangha nkambo djɛsɔ ngete mo?
5. Kɛkɔnge kesakisola ndjala la ntshunamo le Yehova lá akambo ankfumɔ?
5 Lá wiso wa Yehova ‘nkɛnda la nkɔmano’ la ‘nangha kɛnɛ kelekɔ́ wɔlɔ’ nsakisolaka akambo efula ape ngo ndɔsa opiko mbala la mbala lá elemo w’enanghemá l’idjena y’ɔtɛmwɛlɔ. (1 Sa. 15:22) Iso ladjɛ nangha la wolo djɛ nɛmɛyɛ Ndjambe lá ikakambo inkfumɔ yɛ lá lowiko lɔso, kaanga winá w’oyɛso isɔmɛlɛ. (Woo. 3:6; Los. 12:13, 14) Alekɔ djonyi efula iso nangha la wolo djɛ nɛmɛyɛ Yehova kaanga lá wayi wa tontshitshi. Má nangha nghɔsɔ, tɔngɛnyɛ ente nsɔsɔlɔ iso ndɔkɔpaka, ko kɛsɔ kengonangha djɛ nde ntɔkɔpa.—Dj. 14:23; 1 Dj. 5:3.
6. Lá nkilika Hebero 6:10-12, ekete kɛkɔnge keleka djonyi efula ndeka akambo wa wɔlɔ ankfumɔ wa isananghe l’etsho wembohetá?
6 Yehova ndɔsaka la ntshina efula kɛnɛ kɛ sonanghela l’etsho wemboheta. Koko, ape ngo mande tombonangha akambo wa wɔlɔ l’etsho wemboheta ndeke isongokindjɛ ndjala lá mvulu kɛ Yehova. Nkambo djɛsɔ djɛnama papoo lá Hebero 6:10-12. (Wala.) Yehova apavungɛki akambo wa wɔlɔ wa isananghe l’etsho wemboheta. Koko nde nkɔpaka iso nkindjɛ ndɔtɛmɔla l’anyima waso ankfumɔ tii lá ‘ekomo.’ Nde angotofuta má ndjala ilongo yɛso yɛ lotshinda ‘ntsha topapekwisa.’—Nga. 6:9.
TEPELA NSƆSƆLƆ LÁ OLOKO WƆKO
7. Ntepela nsɔsɔlɔ l’eloko wɛso osakisolawɔ nge?
7 Onto onkfumɔ w’okombola ndjala ilongo yɛ Yehova ladjɛ ‘ntepela nsɔsɔlɔ lá oloko wɔnde.’ (Yee. 15:2) Kɛsɔ nsakisolaka akambo efula ape ngo ndjimba toko. Yehova nkɔpaka iso ntepela nsɔsɔlɔ lá ekete kenkfumɔ k’onanghaso la k’otepelaso. (Heb. 13:18) Nkambo djɛsɔ dekɔ djonyi efula, ‘ladjikɛnde Yehova nkfupaka onto wɔ lokeso, koko nde ndjalaka la djokanelo djɛ ma ma la onto wɔ sii.’—Woo. 3:32.
8. Oyɛso ladjɛ ndjewɔ eyalelo kɛkɔnge?
8 Anto ‘watepelá nsɔsɔlɔ lá eloko’ wɛwɔ wapafunaka ambɔ wangɔlɛmɛyɛke ɛlɛmbɛ wɛ Ndjambe lá wiso w’anto, ko wangopendolake lá wisisa. (Iza. 29:13) Iwɔ wangotonake djɛ nangha akambo la omfumfu. Onto w’onangha akambo lá wisisa nkoka ntateyɛ nkanela ante ɛlɛmbɛ wɛ Yehova wepayalaka winá enkfumɔ ngo wɔlɔ. (Dja. 1:5-8) Akoka mpendola Yehova l’akambo amɔtshi wɛnande ante wapalekɔ djonyi efula le nde. Manyi, ntsha apɛnyi eposelo wɛ nyɛtshi má mpendo kɛnde, akoka nkindjɛ ntshita ɛlɛmbɛ enkina wɛ Ndjambe, ko ɔtɛmwɛlɔ wɔnde wongokoma wɔ dongi mpe. (Los. 8:11) Koko, iso nkɔpaka ndjala sii l’akambo ankfumɔ.
9. Olakanyelo wɔkɔnge w’okokaso mba má mbala kɛ ntondo kɛ Yeso ndapomana la Natanayɛlɛ? (Lenda edjinge ntshango.)
9 Tokoka mba olakanyelo lá kɛnɛ kelendana la djonyi djɛ nkindjɛ ntepela nsɔsɔlɔ lá eloko wɛso má kɛnɛ kɛ Yeso ndatepela mbala kɛ ntondo kɛ ndapomana la Natanayɛlɛ. Winá wɔ Filipɛ ndayakale ilongo yɛnde Natanayɛlɛ djɛ ndopomana la Yeso, nkambo mɔtshi djɛ djonyi nanghemaka. Kaanga Yeso ndotapomanaka ntondo la Natanayɛlɛ, nde atepelaka ante: ‘Nyolende ose Isariyɛlɛ wɔ nsɔsɔlɔ wopalekɔ́ kaanga la ndambo kɛ lodjimbo.’ (Dj. 1:47) Ape l’ehamo, Yeso ewaki ante ambeki wande watepelaki nsɔsɔlɔ, koko Natanayɛlɛ atepelaki nsɔsɔlɔ lá lɛdji l’efula. Natanayɛlɛ ayalaki onto wɔ ntshamba djɛ djɔ ete ngo iso. Koko nde atayalaki onto wɔ dongi mpe, la atepelaki nsɔsɔlɔ l’akambo ankfumɔ. Yeso ɔkɔpaka la owandjɛka m’ɔtɛ wɔ nkambo djɛsɔ. Wole iyongoyala wɔlɔ ntsha Yeso ambotepela nghɔsɔ lá nkambo djɛso!
Filipɛ ɛnyɛ Yeso Natanayɛlɛ kanga lotayalaki la lodjimbo. Akoka ntepela wopo wɔkɔ ɔmɔ lá nkambo djɛso? (Lenda itenyi 9)
10. Ladjikɛnge oyɛso ladjɛ ndjewɔ dj’ipa nkamba lá wopo wɔ pɔlɔ la opapayɛ wɔ otepela? (Djakɔbɔ 1:26)
10 Akambo efula w’oyɛso ladjɛ nangha w’owalawɔ lá Yeembo 15 walendana ole la wopo wɔ nanghela anto ankina akambo. Yeembo 15:3 itepela ante ilongo yɛ Yehova ‘apamamanyeyɛka onto la lolemi lɔnde, apananghelaka winande nkambo djɛ nyɛtshi, la apatepelaka nyɛtshi lá nkambo djɛ tolongo tɔnde.’ Nkamba la etepela wɛso lá topo tɔ nghɔsɔ nkoka nkɔta anto ankina la nkoka ntosambɛ mpeyi kɛ ndjala lá mvulu kɛ mpɛma kɛ Yehova.—Wala Djakɔbɔ 1:26.
11. Mamanyeyɛ onto nkambo osakisolawɔ nge, ko kɛkɔnge kengokomela onto w’omamanyeyɛ winande akambo wopalapɛlɛ?
11 Ondjombe atepelaka pekapeka djɛ mamanyeyɛ onto nkambo. Mamanyeyɛ onto nkambo osakisolawɔ nge? Mbala efula iyoyalaka nde, etepela w’ongolo w’ekoká ntshita lokumu l’onto. Onto w’omamanyeyɛ winande akambo ko opalapɛlɛ, ladjɛ mposa má otshumano w’Akristo.—Jɛr. 17:10.
12-13. Akambo amɔtshi wakɔnge w’okokaso ndotepela nyɛtshi lá nkambo djɛ winaso ipa la ndjewa? (Lenda edjinge ntshango.)
12 Yeembo 15:3 itovungola lonkina ante tolongo tɔ Yehova wapananghelaka winawɔ akambo wa nyɛtshi la wapatshitelaka lokumu lɔwɔ. Kɛsɔ osakisolawɔ nge?
13 Tokoka ipa la ndjewa ntshitela onto ɔmɔtshi lokumu má ntshanghanyɛ losango lɔ nyɛtshi lá nkambo djɛnde. Ndjɔmbɔmba: 1) nkaana ambotshika nkamba olemo wɔ winá enkfumɔ, 2) ampɛtshɛki wapokamba lonkina lá Betɛlɛ, kana 3) wɔnanyɔ apokamba lonkina ete ngo ikokolo kana onkambi w’okotshɛ́. Angoyala wɔlɔ nunghanungha djɛ donga mbotshinda djɛ nangha etshikitano wɛsɔ la mpoposanyɛ le anto ankina? Donga djɛ etshikitano wɛsɔ djɛ isopewe dekɔ. Lá djiko djɛ lasɔ, ilongo yɛ Yehova ilekɔ́ lá mvulu kɛnde ‘apananghelaka winande nkambo djɛ nyɛtshi, la apatepelaka nyɛtshi lá nkambo djɛ tolongo tɔnde.’
Alekɔ wɔdju ntshanghanyɛ nsango yɛ nyɛtshi lá nkambo dj’anto ankina, ikoká ndokoma emamɔ mbala imɔtshi (Lenda itenyi 12-13)
TƆSHI ANTO W’OKA YEHOVA WƆMA L’ODJITO
14. Kopakisola lá wopo wɔkɔnge tolongo tɔ Yehova otonakawɔ ‘onto onkfumɔ wɔ nyɛtshi.’
14 Yeembo 15:4 itepela ante ilongo yɛ Yehova ‘ntonaka onto onkfumɔ wɔ nyɛtshi.’ Wopo wɔkɔnge w’okokaso nangha nkambo djɛsɔ? Ete ngo oyɛso anto wa ntshamba djɛ djɔ, topalekɔ l’akoka wa nshikikɛ ente onto kapanda alekɔ nyɛtshi. Lamo? Ladjikɛnde tokoka nkɔpa anto amɔtshi m’ɔtɛ wɔ lonto lɔwɔ, ko ntona ankina mande topekela lawɔ. Djɛko ndeke iso ladjɛ ntona ngo anto wa Yehova ɔsa nde ante anto wa ‘nyɛtshi.’ (1 Kɔ. 5:11) Ndjila ole anto wananghá wayi wa pɔlɔ wapalapɛlɛ, wapalɛmɛyɛ djawo djɛso, kana wasɛsá djɛ ntshita lonyuma lɔso.—Woo. 13:20.
15. Wopo ɔmɔtshi wɔkɔnge w’okokaso nyɛnyɛ ente iso ndɔsaka l’odjito ‘anto w’oka Yehova wɔma’?
15 Lá wedji onkina, Yeembo 15:4 itɔlɔmba djɛ ndɔsa ‘anto w’oká Yehova wɔma’ l’odjito. Djɛko ndeke tongohonake djɛ nyɛnyɛ tolongo tɔ Yehova dilɛmɛlɔ la oloko wɔlɔ. (Ɔrɔ. 12:10) Lá wopo w’ɔkɔnge? Yeembo 15:4 itepela djɛ wopo ɔmɔtshi w’okokaso nangha nkambo djɛsɔ ante ilongo yɛ Yehova ilekɔ́ lá mvulu kɛnde kɛ mpɛma ‘apakalɔka lá daka djɛnde kaanga oyɛwɔ nyɛtshi le nde.’ Nsamba nkotshɛ alaka waso nkoka nsɔsɔlɔ nanghela anto ankina nyɛtshi. (Mat. 5:37) Ndjɔmbɔmba, Yehova ndɔmbaka djɛ tolongo tɔnde ntɔlɔnghanyɛ mbiko yɛwɔ la ɛlɔkɔ kɛwɔ kɛ bala. Nde nsasangaka winá wɔ ambotshi onanghawɔ la wolo djɛ nkotshɛ kɛnɛ k’olakawɔ wana wawɔ. Ngandji kɛso te Yehova la te winaso anto kengototshinda dj’iso nangha djɛ nkotshɛ etepela wɛso.
16. Wopo onkina wɔkɔnge w’okokaso nyɛnyɛ ente iso ndɔsaka tolongo tɔ Yehova l’odjito?
16 Wopo onkina wɔ ndɔsa tolongo tɔ Yehova l’odjito nde, má ndjala la lokapo la má ndongolana. (Ɔrɔ. 12:13) Mpetshɛ winá esanga la wananyɔ l’ankaana ntokotshɛ́ka djɛ nkembɛ djokanelo djɛso lawɔ ole la Yehova. La koko, má ndongolana, tongokolake Yehova.
YALA LA IKANYI YƐ WƆLƆ LÁ NKAMBO DJƐ NGANDJI KƐ MFALANGA
17. Ladjikɛnge otepelawɔ djɛ mfalanga lá Yeembo 15?
17 Towala ente ilongo yɛ Yehova ‘apasɔmbɛka mfalanga yɛnde la wapɔ, nde apawolaka bɔndɔ djɛ nanghela onto wopalekɔ la lowo nyɛtshi.’ (Yee. 15:5) Ladjikɛnge otepelawɔ djɛ mfalanga lá Yeembo y’itenyi yɛnɛ? Ladjikɛnde ndjala la ikanyi yɛ nyɛtshi lá nkambo djɛ mfalanga, nkoka nanghela anto ankina nyɛtshi la ntshita djokanelo djɛso la Ndjambe. (1 Ti. 6:10) L’etsho wefunamaki Bible, anto amɔtshi wɛngɛyɛki wananyɔ wawɔ wayalaki ɛmvɔ má ndasɔmbɛ mfalanga dj’iwɔ ndokawoyɛ la wapɔ. Lonkina, tosushi tɔmɔtshi tawolaki bɔndɔ ko tɛngɛyɛki anto wapalekɔ́ la lowo lá dombo. Yehova nkfupaka nanghedji djɛ nghɔsɔ—Ezk. 22:12.
18. Weepó wɛkɔnge wekoka ntokotshɛ́ djɛ nshishima eyalelo kɛso lá kɛnɛ kelendana la mfalanga? (Hebero 13:5)
18 Angoyala wɔlɔ iso nshishima eyalelo kɛso lá nkambo djɛ mfalanga. Tolawopole ente: ‘Langokanelake mfalanga la nkete dj’okokami nsomba mbala la mbala? Ntsha lambɔsɔmba mfalanga, longoyalake ilá djɛ ndokawoyɛ, má ntepela ente onto wɔnsɔmbisa apalekɔ la djonyi? Ndjala la mfalanga nkomɛka lemi djɛ ndáwoka ente ndeka anto ankina, edjinge langoyalake l’okakasano djɛ nkapa? Langɔsake wananyɔ l’ankaana ilekɔ l’okfudji ente wakɔpa nkete djɛ demba efula? Langonaghake djɛ ndjokana ngo l’ase ekfudji ko ndápɛyɛka ndambo daambi te ase ɛmvɔ?’ Iso tombowa mpeyi k’ekekete efula kɛ ndjala tolongo tɔ Yehova. Tokoka mbomba mpeyi kɛsɔ má ndálama má ngandji kɛ mfalanga. Ntsha tombonangha nghɔsɔ, Yehova apatokadjɛki lotshinda!—Wala Hebero 13:5.
YEHOVA NKƆPAKA TOLONGO TƆNDE
19. Lamo Yehova ɔkɔpande iso nangha akambo ankfumɔ walekɔ́ lá Yeembo 15?
19 Yeembo 15 ikoma la daka djɛnɛ: ‘Onto onkfumɔ w’onangha wayi wasɔ apasasokaki lotshinda.’ (Yee. 15:5) Lanɛ ondjombe apakisola lamo Yehova ɔkɔpande iso nangha akambo ankfumɔ wasɔ. Yehova nkɔpaka iso ndjala la osasa. Djɛko ndeke ɔtɔpɛyɛnde ɛlɔndjɛlɔ kengotoyakala esako la elamelo.—Iza. 48:17.
20. Kɛkɔnge kɛ tolongo tɔ Yehova okongawɔ l’oloko lukuluku?
20 Tolongo tɔ Yehova nkoka nkonga l’eloko lukuluku etsho weyaye wɛ wɔlɔ efula. Ankfutami w’avuta wa nkɔmano wangotintasɛ lá ‘djena’ djɛ Yeso ndalɔngɔsɔla l’olongo. (Dj. 14:2) Waalekɔ́ la nkongi djɛ mbika lá looko wakonga l’oloko pakipaki kɛnɛ kɛ Ndjiso 21:3 olakande. Lá nsɔsɔlɔ, isankfumɔ tolekɔ la mpeyi k’ekekete efula kɛ ndongola leeta l’osasa lɔ Yehova lɔ ndjala tolongo tɔnde, la ndjala lá mvulu kɛnde kɛ mpɛma etshinda etshinda!
YEEMBO 39 Toyale la djiina djɛ wɔlɔ lá wiso wa Ndjambe (lá Otetela)
