1. Mukanda wa Misambo 15:​1-5, wi kuitukuasha naminyi nsaa y’atuiwubadika?

 MU MUISAMBO ushaale tulongiele’shi, bafubi b’elambule mbalombene kuikala beenyi mu nshibo yaaye ya mu kinfuanyi paabo kuikala naaye mu kipuano kia pa bupeenka. Kadi abitungu tukite kinyi buatudia kuikala beenyi baaye? Mukanda wa Misambo 15, nguakule bi bungi pabitale uno muanda. (Badika Misambo 15:​1-5.) Uno mukanda wa misambo autuusha malongiesha e buwa alombene kuitukuasha buatudia kuikala mu kipuano ki buwa n’Efile Mukulu.

2. Nkinyi ki baadi kilombene kutakula Kayimba ka misambo Davide bua kuteemuna nshibo ya Yehowa?

² Mukanda wa Misambo 15, awamba’shi: ‘Yehowa nnanyi okayitanyina mu Nshibo yobe? Nnanyi mulombene nkashaala pa mwengye oobe wa kishila?’ (Mis. 15:1) Kayimba ka misambo Davide p’ateemuna kishima “nshibo,” ya Yehowa, baadi anangushena bua tabernakele, baadi kuanka mu mafuku a Gideone. Davide baadi dingi muteemune “mwengye wa kishila,” wa Efile Mukulu, pangi baadi anangusheena nshibo i baadi pa muengie wa Siyona mu Yelusalema. Davide baadi muibakie nshibo ya Yehowa, kuushi kua kibundi kia Gabaone mu bilometre bi bungi bua kuimutuula mushete wa kilombeno bua kutengiela mpaa na apakafiki kipungo ki’abakebaka mbalo ya kuikiisha bua losoo, 2 Sam. 6:17.

3. Buakinyi abitungu tupushe akiakula mukanda wa Misambo 15? (Tala dingi kifuatulo.)

³ Mu binyibinyi, bena Isalele be bungi ta babaadi abafubu ku tabernakele sunga kutuela munda mua tabernakele mu babaadi abalamina mushete wa kilombeno nya. Anka bafubi booso ba Yehowa ba sha lulamato, babaadi balombene kuikala bu beenyi mu nshibo yaaye ya mu kinfuanyi pa kuikala na pa kushaala bu ba kuuku baaye. Atue booso atukumiina kuikala bino. Mu  mukanda wa Misambo 15, mui ingi ngikashi ayitungu’shi tuikale nayo na tuiyileeshe buatudia kushaala bu ba kuuku ba Yehowa.

TAMBUKA KUSHI MATOPE NA KUKITA KIAKIA KILULAME

4. Mmushindo kinyi w’atuuku’shi lubatshisho ta ngi nka kioso ki’abetutekie kui Yehowa? (Yeeshaya 48:1)

⁴ Mu mukanda wa Misambo 15:​2, aulesha kuuku’Efile Mukulu bu “muntu atambuka kushi matope na akitshi kiakia kilulame.” Bino bishima bibidi “kutambuka” na “kukita” abilesha kutungunuka na kukita muanda kampanda. Mu binyibinyi, tui ‘kutambuka kushi matope su’? Oolo. Biabia, ta kui muntu mupuidikie nya, anka Yehowa aketumono bu “abatambuka kushi matope” su atuikitshisha bua kumukookiela. Nsaa y’atuilambula kui Efile Mukulu, uno nyi mbangilo a kutambuka pamune n’Efile Mukulu. Bu kileshesho, mu mafuku a kala ta mpa muanda wa’shi muntu baadi muina Isalele ngi kubaadi akumuikasha bu muenyi a Yehowa nya. Bangi babaadi abayitanyinua muishina diaye kadi kushi “mu bînyibînyi na kululama.” (Badika Yeeshaya 48:1.) Bena Isalele ba binyibinyi babaadi abakumiina kulonga pabitale miiya ya Yehowa na kuiyitumikila. Mu mushindo umune, bua’shi tukuminyibue n’Efile Mukulu lelo uno, abitungu tukite bi bungi kukila penda kubatshishibua na kuitanyinua bu Kamonyi ka Yehowa. Abitungu tutungunukie na “kukita kiakia kilulame.” Tui kuibikita naminyi?

5. Kukookiela Yehowa mu mianda yooso akulesha kinyi?

⁵ Ku meeso kua Yehowa, “kutambuka kushi matope” na “kukita kiakia kilulame,” mbikile kuenda kua mu bulungudi nsaa yooso na kukita kua ingi midimo ku mbalo ya lulanguilo. (1 Sam. 15:22) Abitungu tuikitshishe bua kukookiela Efile Mukulu mu mianda yooso ya mu nshalelo eetu, sunga tuekala pa bupenka. (Nki. 3:6; Mul. 12:​13, 14) Kintu ki na muulo ukata, nkuikitshisha bua kukookiela  Yehowa sunga mu tumianda tupeela. Kukita biabia akulesha’shi tui bamufule binyibinyi, na abinyiisha kumutakula buadia kuitufula namu ngofu.—Yo.14:23; 1 Yo. 5:3.

6. Muyile mukanda wa Bena Ebelu 6:​10-12, nkinyi ki na muulo ngofu kukila bikitshino bia lulamato bitatubakitshine kala?

⁶ Yehowa e na lutumbu lukata bua bioso biatudi bapue kumukitshina. Anka ta mpenda muanda wa’shi tatubakitshine mianda i buwa kala ngi abilesha’shi tui kushaala bu beenyi mu nshibo ya Yehowa nya. Bino mbebileshe kalolo mu mukanda wa Bena Ebelu 6:​10-12. (Badika.) Yehowa t’alubaa bikitshino bietu bia kala nya. Anka Yehowa akumiina’shi tutungunukie na kumufubila n’eshimba dietu dioso “mpaa na ku nfudiilo.” Yehowa aketufutu p’atue kuikala naye mu kipuano kia ikalayika “su ta tui bakookie.”—Nga. 6:9.

AKULA BIA BINYIBINYI MUISHIMBA DIOBE

7. Kuakula bia binyibinyi muishimba dietu akupushisha kinyi?

⁷ Muntu ooso akiebe’shi akuminyibue bu muenyi mu nshibo ya Yehowa, abitungu ‘akule bya bînyibînyi mwishimba dy’ê.’ (Mis. 15:​2, EEM) Bino abipushisha’shi kukutua kudimba su nkapeela. Yehowa akumiina’shi tuikale balulame mu mianda yooso y’atuakula na y’atukitshi. (Eb. 13:18) Kintu ki na muulo nkia’shi, “Yehowa mmushikue muntu sha madimi, anka ekalaa mu kipuano na muntu mululame.”—Nki. 3:32.

8. Eyikashi kinyi aditungu’shi tulekie?

⁸ Baaba ‘abakulaa bia binyibinyi mu mashimba aabo’ t’abakookielaa nka penda apebamono bantu, kadi ku bufiefie bayipanga miya y’Efile Mukulu nya. (Yesh. 29:13) Mbapue kuleka bikitshino bia madimi. Muntu sha madimi abanga na kuikala na mpaka ya’shi miya ya Yehowa t’ayikala nka buwa mafuku ooso. (Yak. 1:​5-8) Ekupela kukookiela Yehowa mu mianda y’amono’shi ta i na muulo ku meeso kua Yehowa. Dingi, su bamono’shi ta nkukitshikie muanda wi bubi mu kupela kuaye kua kukookiela, e kubanga kukita mpaa na mianda ikile bukata ayipaa miya ya Yehowa, sunga anangushena’shi kuete afubila Efile Mukulu. Yehowa t’akakumiina lulanguilo luaye nya. (Mul. 8:11) Ngi buakinyi abitungu tuikale balulame mu mianda yooso.

9. Nkinyi kibakitshikile pa baadi Yesu muimoneene na Natanaele bua musuusa wa kumpala, na bino abitulongiesha kinyi? (Tala dingi kifuatulo.)

 ⁹ Tui kulonga pabitale muulo wa kuikala n’eshimba dilulame bu dia Natanaele, pa bafumankeene na Yesu bua musuusa wa kumpala. Fidipe pabatuadile kuuku aaye natanaele buadia kufumanka na Yesu, kubakitshikile muanda kampanda wa kukaanya. Sunga bikale’shi Yesu ta baadi mubande kuimoneena na Natanaele dingi, anka bakuile’shi: “Talayi, binyibinyi muina Isalele shi na madimi.” (Yo. 1:47) Mu binyibinyi Yesu baadi muukie’shi bangi balongi baye babaadi na kululama, anka bamuene’shi Natanaele baadi na kululama kui pa buako. Natanaele baadi muntu mukutue kupuidika nka bu atue booso. Ta baadi nsesa, anka baadi na kululama mu mianda yoso. Yesu baadi musankile Natanaele na dingi bamutumbuile ngofu bua biabia bi baadi. Kushi mpaka, n’atue namu atukumiina’shi Yesu etutumbule mu uno mushindo umune!

10. Buakinyi abitungu tulekie kufubisha kia buntu kietu kia kuakula mu mushindo wi bubi? (Yakobo 1:26)

¹⁰ Miiya i bungi i mu mukanda wa Misambo 15, ngipushene na mushindo w’atukitshina bangi mianda. Mukanda wa Misambo 15:​3, awamba’shi: muenyi e mu nshibo ya Yehowa nyi “muntu shi na twipu, shyakitshiinaa ben’é bi bubi, taasabuulaa muntu naaye.” Nsaa y’atudimbila bangi mianda ya madimi, mu binyibinyi abatapikaa ku mashimba ngofu, na bino bi kulesha’shi ta tuibalombashe ngikashi itekibue bua kushala bu beenyi mu nshibo ya Yehowa.—Badika Yakobo 1:26.

11. Tuipu nkinyi, na nkinyi kilombene kufikila muntu adimbiila bangi mianda kadi sh’elanga kuishimba?

¹¹ Kayimba ka misambo ashimika kasele pabitale tuipu. Tuipu nkinyi? Nkuakula mianda i bubi ilombene kuluisha nkumo ya mungi muntu. Muntu sha madimi sunga tuipu, sh’elanga kuishimba, mmulombene kutushibua mu kakongie ka bena Nkidishitu—Yel. 17:10.

12-13. Mmu mianda kinyi muatudi balombene kufika mu kukita kilubilo kia kusabuula bantu neetu kushii mu kukumiina kuetu? (Tala dingi kifuatulo.)

 ¹² Mukanda wa Misambo 15:​3, awitulungula dingi’shi muenyi e mu nshibo ya Yehowa t’akitshiinaa ben’é bi bubi, taasabuulaa muntu naaye. Kusaabuula muntu naaye akupushisha kinyi?

¹³ Tui kusabulusha muntu pa ku mu palakeesha mianda ya madimi sunga kushii mu kukumiina kuetu. Bu kileshesho: (1) mukuetu mukashi balekie kukita mudimo wa bu mbala mashinda, (2) mulume na mukashi aaye babalekie kufuba ku Betele, sunga’shi (3) mukuetu mulume taki’afubu dingi bu mukulu sunga bu mufubi a midimo. Bi bubi ngofu su tuabanga kulungula bangi’shi pangi bakuetu balume na bakashi mbakite muanda kampada wi bubi, ngi buakinyi bino bi bebafikila. Kui kuikala tubingilo tui buwa tubafuisha kuakua kushintuluka, kadi tuatush’atuwuku. Ngi buakinyi, muenyi e mu nshibo ya Yehowa “t’akitshiinaa ben’é bi bubi, taasabuulaa muntu naaye.”

NEEMEKA BAABA BOOSO ABATSHINAA YEHOWA

14. Patuula mushindo ulombene muenyi ooso e mu nshibo ya Yehowa “kupeshaa ooso sha kito.”

¹⁴ Misambo 15:​4, amba’shi, ba kuuku ba Yehowa “abapeshaa ooso sha kito.” Tui kuibikita naminyi? Bu biatudi bantu bakutue kupuidika, ta tui na matalua a kutshibila bangi kiimu’shi, kampanda e na kito nya. Buakinyi? Muanda muyile biatudi batandikue, ingi nsaa tui kufula bangi bantu pa muanda wa buikashi buabo na kushikua bangi. Ngi buakinyi, abitungu tulekie kuikala mu kipuano na muntu ooso abamono kui Yehowa’shi e na “kito.” (1 Ko. 5:11) Bino abipushisha baaba booso abakitshi mianda i bubi basha b’elanga ku mashimba, bash’abanemeka lukumiino luetu na mianda yatudi bakumiine sunga abakitshi muabo mooso bua kuitukutshishua kulanguila Yehowa.—Nki. 13:20.

15. Mmushindo kinyi wa kuneemeka “baaba abatshiinyi Yehowa”?

¹⁵ Na dingi, mukanda wa Misambo 15:​4, awitulungula buatudia kuneemeka “baaba abatshiinyi Yehowa.” Biabia, abitungu tukimbe mishindo yooso ya kuneemeka na kuleesha kalolo kui ba kuuku booso ba Yehowa. (Lom. 12:10) Mmushindo kinyi? Mushindo umune wabadi baleeshe mu Misambo 15:​4, EEM, nkuamba’shi muenyi e mu nshibo ya Yehowa “alombasha mutshipo wadi mutshipe sunga wamufwishisha malwa.” Kukutua kulombasha mulayilo wetu, mu binyibinyi kui kutapa bangi ku mashimba. (Mat. 5:37) Bu kileshesho, Yehowa akumiina’shi beenyi baaye balombashe mutshipo wabo w’eyibakishi. Asankaa dingi nsaa ayikitshisha baledi bua kulombasha mulayilo wabakitshina bana baabo. Bu biatudi bafule Efile Mukulu na bantu n’etu, atuikitshisha na muetu mooso bua kulombasha mulayilo wetu.

16. Mmushindo kinyi dingi watudia kuleesha ba kuuku ba Yehowa kaneemo?

¹⁶ Ungi mushindo wa kuneemeka ba kuuku ba Yehowa, nkuikala muntu akukilaa beenyi na sha kalolo. (Lom. 12:13) Kukisha kapapi na bakuetu balume na bakashi, akuitukuasha buatudia kuikala n’abo mu kipuano ki buwa, na kuikala mu kipuano na Yehowa. Dingi, p’atukuukila bangi atuambula Yehowa.

ELAME KU KIFULO KIA MAKUTA

17. Buakinyi mbakuile muanda wa makuta mu Misambo 15?

¹⁷ Atubadika mu Bible’shi muenyi a Yehowa ‘eeyapushenaa makuta kushi kuteka makasa, t’akokyelaa kantu ka kulwishiisha shi na mwanda.’ (Mis. 15:5) Buakinyi uno musambo wipi awakuila makuta? Muanda kuikala na mueneno e bubi pabitale makuta, kui kuluisha kipuano  kietu na bangi na kuluisha dingi kipuano kietu n’Efile Mukulu. (1 Ti. 6:10) Mu mafuku a kala, bangi bantu babaadi abakitshina balanda mianda kushi kalolo, pa kuibafutshisha makuta akile abaabadi beyapule. Dingi, bangi ba nsushi babaadi abakumiina kutshibibua milomo bua kutshibila muntu shi musoole muanda kiimu ki bubi. Yehowa mmushikue bantu abakitshi mianda i biabia.—Es. 22:12.

18. Nkonko kinyi ilombene kuitukuasha bua kutaluula mueneno eetu pabitale makuta? (Bena Ebelu 13:5)

¹⁸ Bi buwa tutaluule mueneno eetu pabitale makuta. Biabia eyipushe’shi: ‘Nakambaa kunangushena pabitale makuta na bintu abitungu’shi ngule su? Su neyapula makuta, nealashenaa bua kuialusha, pa kuamba’shi yawa muiangiyapushe te nao lukalo su? Kuikala na makuta akuntakulaa bua kuipusha na kineemo, sunga’shi akunkutshishua bua kuleesha bangi kalolo su? Namonaa bakuetu balume na bakashi bu be na kifulo kia bintu bia ku mbidi, penda muanda wa’shi be na makuta e bungi? Nakumiinaa kuikala mu kipuano nka penda na baaba be na makuta kushi balanda?’ Kuiyipusha ino nkonko kui na muulo ukata, muanda tui na kineemo kikata kia kuikala beenyi ba Yehowa. Tui balombene kukaluila kino kineemo kietu, p’atue kuilama ku kifulo kia makuta. Su tubakitshi biabia, Yehowa t’aketusumbushena efuku su ndimune!—Badika Bena Ebelu 13:5.

YEHOWA MMUFULE BA KUUKU BAAYE

19. Buakinyi Yehowa akumiina’shi tukite mianda yooso i mu Misambo 15?

¹⁹ Mukanda wa Misambo 15, aupudiisha na uno mulayilo’shi: ‘Muntu akitshi biabia ashaala na muwa bua looso.’ (Mis. 15:5) Mufundi a misambo apatuula pano buakinyi Yehowa aukumiina’shi tukite ino mianda yooso yabadi baleeshe mu uno musambo. Muanda Yehowa akumiina’shi tuikale na muloo. Ngi buakinyi kuete kuitupa bukunkushi abuitutuadila miabi yaye na kuitukaluila.—Yesh. 48:17.

20. Beenyi ba Yehowa mbalombene kukulupila kinyi mu mafuku e kumpala?

²⁰ Beenyi ba Yehowa mbalombene kukulupila nshalelo e buwa mu mafuku e kumpala. Bedibue muimu abakeekala na muwa muiyilu mu mbalo ibaabadi bebalumbuluile kui Yesu. (Yo. 14:2) Baaba be na lukulupilo lua kuikala na muwa pa nsenga, abatengiela kulombana kua mulayilo wi mu Kibafumbuilue 21:3. Eyendo, atue booso tui na kineemo kikata kia kuitaminyibua na Yehowa bua kuikala ba kuuku baaye, na beenyi mu nshibo yaaye bua losoo!